༄༅། །འཇང་གླིང་གཡུལ་འགྱེད།

གླིང་གེ་སར་རྒྱལ་པོའི་སྒྲུང༌ལས།
འཇང་གླིང་གཡུལ་འགྱེད།

གླེང་བརྗོད།

༄༅། །འཛམ་གླིང་ནང་དམངས་ཁྲོད་རྩོམ་རིག་རིང་ཤོས་སུ་གྲགས་པའི་གླིང་གེ་སར་རྒྱལ་པོའི་སྒྲུང་ནི་བོད་མི་རིགས་ཀྱི་རྩོམ་རིག་ཕུལ་བྱུང་ཞིག་ཡིན་པ་མ་ཟད། འཛམ་གླིང་རྩོམ་རིག་གི་བང་མཛོད་ཁྲོད་ཀྱི་འོད་སྟོང་འཕྲོ་བའི་ནོར་བུ་ཞིག་ཀྱང་ཡིན་པས། ད་བར་སྐད་ཡིག་བཞི་བཅུ་ལྷག་གི་ནང་ཕབ་བསྒྱུར་པར་འགྲེམས་དང༌། ཕྱི་ནང་མཁས་པ་དུ་མས་ཆེད་དུ་ཞིབ་འཇུག་རྒྱུན་མཐུད་བྱེད་མུས་ལགས་ན། རང་རེའི་སློབ་ཕྲུག་རྣམས་ལ་ཕུལ་དུ་བྱུང་བའི་རྩོམ་རིག་དེ་ངོ་སྤྲོད་དང་སྦྲགས། བོད་ཀྱིསྣོད་བཅུད་དང༌། གནའ་བོའི་འཚོ་བའི་གོམས་སྲོལ། ཆོས་དང་འཇིག་རྟེན་གྱི་ལྟ་ཚུལ། ལེགས་ཉེས་བླང་དོར། མུ་ཏིག་བསྟར་ལ་བརྒྱུས་པ་ལྟ་བུའི་གཏམ་དཔེ་དང་ཁ་ཤགས་སོགས་བོད་ཀྱི་རིག་གཞུང་གི་ཞག་རྩི་འཁྱིལ་པ་འདི་རང་རེའི་གཞོན་སྐྱེས་ཚོར་ངོ་སྤྲོད་བྱ་གལ་ཤིན་ཏུ་ཆེ་བར་བརྟེན། ད་བར་འཁྲུངས་གླིང་མེ་ཏོག་ར་བ་དང༌། ཧོར་གླིང་གཡུལ་འགྱེད་སྟོད་ཆ་དང་སྨད་ཆ། རྟ་རྒྱུག་རྒྱལ་འཇོག བདུད་འདུལ་སོགས་ཕྱོགས་བསྡུས་པར་འགྲེམས་རིམ་པར་ཟིན་པ་དང༌། ད་ཐེངས་འདིར་འཇང་གླིང་གཡུལ་འགྱེད་ཀྱི་ལེའུ་དོན་བསྡུས་པར་འགྲེམས་བྱས་པར་རང་རེའི་སྤྱི་ཚོགས་དང་ལྷག་པར་དུ་རྗེས་རབས་གཞོན་སྐྱེས་ཚང་མས་ཐུགས་སྣང་ཆེར་བསྐྱེད་ཡོང་བའི་རེ་བསྐུལ་དང་བཅས།  ཤེས་རིག་ལས་ཁུངས་ནས། བོད་རྒྱལ་ལོ་ ༢༡༣༥ ཕྱི་ལོ་ ༢༠༠༩ ཟླ་ ༣ ཚེས་ ༢ ལ།།

འཇང་གླིང་གཡུལ་འགྱེད། (ཚན་པ་དང་པོ)
འཇང་གླིང་གཡུལ་འགྱེད། (ཚན་པ་གཉིས་པ)
འཇང་གླིང་གཡུལ་འགྱེད། (ཚན་པ་གསུམ་པ)

རྩོམ་སྒྲིག་འགན་འཛིན།            ཨཱཙཱརྱ་ཀརྨ་སྨོན་ལམ།
ཕྱོགས་སྒྲིག་པ།                ཨཱཙཱརྱ་ཀརྨ་སྨོན་ལམ། ལྷ་ལུང།
རྒྱབ་ཤོག་ཇུས་འགོད་པ།            ཚེ་བརྟན།
ཞུ་དག་པ།                ཆུང་ཚེ་རིང༌།

མདུན་ཤོག

འཇང་གླིང་གཡུལ་འགྱེད།(ཚན་པ་དང་པོ)

༄༅། །ན་མོ་གུ་རུ་ལོ་ཀེ་ཤྭར་ཡ། བླ་མ་དང་འཕགས་པ་སྤྱན་རས་གཟིགས་ལ་ཕྱག་འཚལ་ལོ། །དེ་ཡང་འཇང་ཡུལ་མཚར་ར་སྨུག་པོ། ནམ་མཁའི་མཐིང་གི་གཞལ་ཡས། ས་གཞི་ནོར་བུའི་འབྱུང་ཁུངས། ལ་དྲུག་རྩི་ཐོག་བཀྲ་བ། དམན་ཤར་མེ་ཏོག་འཁྲུངས་པའི་ཡུལ་དུ། ཕོ་དྲག་པ་ས་ཐམ་རྒྱལ་པོར། བློན་ཤེས་རབ་གྱི་སྐྱ་རེངས་ཤར། དགོས་འདོད་ལ་ནོར་བུའི་བང་མཛོད། རྐང་འགྲོས་ལ་གནག་རྟ་ར་ལུག མཁར་གཡུ་འབྲུག་ཟིལ་ཆེན་གྱི་རྫོང་དུ་འཇང་ཁྲི་འབུམ་ནང་གི་ཡང་སྙིང་ཁོང་འཁྲུངས་པའི་དུས་སུ་ཡང༌། འགྲན་མེད་ཀྱི་རྒྱལ་པོར་གྲགས་ཤིང༌། གནམ་གྱི་ལྷ་དང་ས་ཡི་ཀླུ་རྣམས་འདུ། དབང་ཆེན་པོ་ཐོབ་པ་གནམ་ཐེའུ་དང་དགའ་རབ་གཉེན་གྱིས་རྒྱལ་བུར་མཚན་གསོལ་མཛད་དོ། །
ཁོང་དགུང་ལོ་བརྒྱད་ཀྱི་དུས་སུ་བདུད་མི་ཆེན་ཨ་ཁྱུང་ཀེ་རུའི་བློན་རྗེ་བདུད་རྒྱལ་མཐོང་དཀར་བཅས་ཕྲལ་དགོས་སུ་ཡོ་ཆགས་སུ་བཏང་ནས། སྐུ་ཆེ་བ་རི་རྒྱལ་ལྷུན་པོ་དང་གསུང་ཆེ་བ་གཡུ་འབྲུག་ངར་སྐད་དང༌། སྙིང་ཁམས་དམར་ཡག་སྟག་ལས་ངར་བ། སྤྱན་མིག་ཉི་ཟླའི་རང་མདངས་ཅན་ལ། ལྗགས་ནི་བར་སྣང་གློག་དང་འདྲ་བས་གཏམ་ཡར་ལབ་ནམ་མཁའི་མཐོ་གསུམ་དང་མར་ལབ་ས་གཞི་ཆེ་གསུམ་ལ་ཁྱབ་བར་བྱས། ཉིན་གཅིག་གདུག་གི་ཡང་སྟེང་ལ་ཁྲི་རིན་ཆེན་གླང་ཆེན་བསྣོལ་བའི་ཡང་སྟེང་དུ་རྔམ་སྟབས་ཀྱིས་ཧོར་འདུག་མཛད་ནས་ཤེས་ཆེན་བློན་པོ་ལ་འདི་ལྟར་གསུངས། ང་མདང་སུམ་མར་གཉིད་ཐུན་སོ་ལ། ལྷ་གོང་མས་ལུང་བསྟན་འདི་ལྟར་བྱུང། ཞེས་གསུངས་བ་དང་དཔའ་བའི་གླུ་འདི་ལྟར་བླངས།
གླུ་ཐ་ལ་ཐ་ལ་ལ་ལ་རེད། །ལ་ལ་གླུ་ཡི་ལེན་ལུགས་རེད། །རང་ཕྱོགས་མི་ཡི་ཁ་འཛིན་མཛོད། །དགྲ་དཔུང་མ་ཞོག་ཆམ་ལ་ཕོབ། །དགྲ་མཐའ་གྲུ་གུ་སྒྲིལ་སྒྲིལ་གྱིས། །དགྲ་རྒྱུད་རྩ་བ་ཁུང་ནས་ཕུད། །དེ་ནས་ང་ལ་ཉན་རྒྱུ་ལ། །ས་འདི་ས་ངོ་མ་ཤེས་ན། །ས་འདི་འཇང་ཡུལ་གཡུ་རིའི་མདུན། །མཁར་འདི་གཡུ་འབྲུག་ཟིལ་པའི་མིང༌། །ཕོ་ང་དང་ང་ངོ་མ་ཤེས་ན། །རྨུ་རྗེ་ས་ཐམ་རྒྱལ་པོ་ཟེར། །གྲགས་པ་འཛམ་གླིང་བོད་ལ་གྲགས། །གཡུ་འབྲུག་སྔོན་མོའི་སྐད་ཡ་ཡིན། །སེངྒེ་དཀར་མོའི་འགྱིང་ཡ་ཡིན། །དོག་མོའི་ས་དང་མཉམ་ཆགས་ཡིན། །རྒྱལ་པོ་ཆེ་བཞིའི་འགྱིང་ཡ་ཡིན། །ཁྲོས་ན་ཆུ་བོ་སྐེད་ནས་གཅོད། །ཕོ་རབ་སྤྱོད་པ་དར་ལས་འཇམ། །དཀྲུག་མི་བྱུང་ན་སྟག་ལས་ངར། །ཡ་རབས་གཏམ་ཚིག་ཐོལ་གྱིས་ཡོང༌། །ལུང་ཆེན་ཆུ་འབབ་ཁད་ཀྱིས་ཡོང༌། །ཉོན་དང་ཚིག་ལ་དོན་འབྲས་ཡོད། །མདང་སུམ་མར་གཉིད་ཐུན་སོ་ལ།་་་༌།ཁྱོད་ས་ཐམ་ཡུལ་གཞིས་བཟུང་བ་ལ། །གླིང་ཇོ་རུས་གདོང་གནོན་འོང་ཉེན་འདུག། །སང་གི་ཉིན་མའི་སྔ་དྲོ་ནས། །བྱུས་རྒྱལ་ལག་ལ་ནམ་བྱུང་བར། །དམག་བུ་རྟའི་ཡོ་ལངས་གྱིས་ཤིག་གསུངས།་་་༌།ང་མི་སྡོད་ཡར་ཁམས་སྟོད་ལ་འགྲོ། །ཟས་བཅུད་ཕུད་གཡང་དུ་ལོང་ལེ་བྱེད། །དཔུང་རྟེན་གནམ་ཐེལ་ལྷ་དང་འགྲོགས།  །སྙོམས་ཆུང་སྡོད་ལུགས་དགོས་པ་མེད། །གནའ་མི་རྒན་གྱི་གཏམ་དཔེ་ལ། །ནུབ་གཡུ་འབྲུག་སྔོན་པོའི་འགྱིང་སྐད་དེ། །ཆབ་དང་མ་འགྲོགས་ཅི་མི་སྲིད། །ཤར་སེངྒེ་དཀར་མོའི་འགྱིང་རྩལ་དེ། །ཆབ་དང་མ་འགྲོགས་ལྟས་ངན་རྒྱུ། །ཡུལ་སྲིད་རྒྱལ་པོའི་ཆབ་འབངས་དེ། །བྱུས་ལག་མེད་ན་ཁས་ཞན་འདྲ། །དགྲ་འདུལ་དཔའ་བོའི་དཔའ་རྟགས་དེ། །སྡང་དགྲ་ལ་མེད་ན་སྡར་མ་ཝ། །སལ་སིལ་མཛངས་མའི་སྤྱོད་འགྲོས་དེ། །ལག་རྗེས་མེད་ན་བ་རྒན་འགྲོས། །ཨེ་རེད་བློན་པོའི་སེམས་ལ་བསྐོར།་་་༌།སང་གི་ཉི་མ་རྩེ་ཤར་ལ། །ལ་ལུང་དམག་གིས་བཀང་ནས་གཏོང༌། །རི་ཐང་རྟ་ཡིས་བཀང་ནས་གཏོང༌། །གཏམ་གོ་ནི་ཨེ་བྱུང་བེར་ཐུལ་བློན། །
ཞེས་ཟེར་ཞིང་ཐུགས་ཁྲོས་པའི་སོ་སྒྲ་ལྡིར། ཨོག་ཚོམ་ཐད་མར་དཀྲུག  སྤྱན་རྩ་དམར་ཤིག་ངང་ནས་བཞུགས་སོ། །བློན་བེར་ཐུལ་གྱི་བསམ་པར། རྒྱལ་པོ་ནི་སྔར་ཡིན་ན་རང་ཤེས་སྤྲིན་མེད་ཀྱི་ནམ་མཁའ་ལ་ཉི་མ་ཤར་བ་ལྟ་བུའི་སྟེང་དུ་སྡོད་པ་བཟང་ཤེས། གཞན་ལའང་ཆ་འཇོག་ཆེ་བ། ལྷག་པར་ང་རང་བེར་ཐུལ་གྱིས་ཅི་ཞུས་སྙན་གྱི་བཅུད་དུ་འཛིན་པ་ཞིག་སྟེ། ན་ནིང་གནམ་ལོ་ནས་རང་གི་བློ་ཚོད་མི་ཟིན་པ་དར་ལྕེ་རླུང་གིས་ཁྱེར་བ་ལྟ་བུ་གཞན་ལ་ཡང་ཆ་འཇོག་མི་བྱེད་ཅིང༌། ནང་དོན་རླུང་ལྟར་མཁའ་ལ་གཏོར། ནང་འཁོར་བཙུན་མོ་སྲས་དང་བཅས་པ་ལའང་བཀའ་བཀྱོན་གྱི་རྣམ་པ་ཁོ་ན་མཛད། ད་ལན་ཡང་རྩོད་མེད་ཀྱི་ཡོ་ལང་ཆེན་པོ་མི་ལེགས་པའི་རྒྱུ་ཡིན་རུང༌། ང་རང་གཅིག་པུས་ཞུས་རུང་ཆ་འཇོག་ཅི་མི་ཤེས། ལྷག་པར་བྱུར་ལྷ་དང་གཡུ་ལྷ་ཐོག་འགྱུར་བཅས་ཁ་བཙན་པས། གྲོས་མཐུན་གྱི་ཇི་བབས་མ་གཏོགས། རང་ཁ་གཅིག་པུས་ཆོད་པ་མིན་བསམས༌ནས། ལུང་པའི་ཕུ་མདའ་ལ་བང་ཆེན་དང་ཡིག་ཆུང་གིས་ཁྱབ་པར་བྱས།
དེའི་སང་འཇང་མི་རྣམས་མཁར་གཅིག་གི་ནང་ནས་ཐོན་པ་ལྟར་ཆུ་ཚོད་སྔ་ཕྱི་མ་གཏོགས་གཞན་སྔ་ཕྱི་མ་འགྱངས་པར་རྒྱལ་པོའི་མཁར་སྒོ་ཉི་མ་སྟོང་ལྡན་གྱི་འགྲམ་དུ་ཚོགས་ནས། དེར་ཇ་ཆང་གི་སྐྱེམས་འཕར་སྐོར་འདྲེན་བྱེད་སྐབས་བློན་བེར་ཐུལ་ཁོང་གིས་རྒྱལ་པོའི་གསུང་བསྒྱུར་བ་དང༌། དམག་མི་བཤོལ་ཐབས་ཀྱི་གཏམ་འདྲ་ཨེ་ཡོང་བསམ་ནས་སྨྲས་པ། ད་འོ་ན་འདིར་ཚོགས་ཀྱི་རྒྱལ་བློན་རྣམས་སྙན་གྱི་དབང་པོ་གཏད་འཚལ། ལྷག་པར་གྲོས་བྱེད་ཀྱི་བློན་པོ་རྣམས། རྒྱལ་པོའི་གསུང་དང་མི་སྡེའི་ཚོགས་དོན་འདི་ལྟར་ཡིན་པས་བསམ་མནོ་འདྲ་སྐོར་ཟེར་ཞིང་ཁོ་རང་གི་ཚིག་གསལ་བྱེད་ངག་ལ་དྲངས་ཏེ་འདི་ལྟར་བླངས་སོ། །
གླུ་མཐོ་གསུམ་དགུང་སྔོན་འབུམ་མཁར་ནས། །ནམ་མཁའི་ལྷ་རྣམས་མཆོད་ཅིང་བསྟོད། །ལས་ཅི་བྱེད་དཀར་པོའི་ཕྱོགས་སུ་བགྲོས། །གླུ་འབྲས་གསུམ་ས་གཞིའི་ས་བརྟན་ནས། །ས་གཞིའི་ཀླུ་རྣམས་མཆོད་ཅིང་བསྟོད། །བྱུས་བརྟན་ཕུར་དཔག་བསམ་ཤིང་ལྟར་ཚུགས། །གླུ་མཁའ་དབྱིངས་བར་སྣང་ཡངས་པ་ནས། །བར་རྟེན་བཙན་གྱི་ལྷ་ཚོགས་མཆོད། །བྱུས་སྔ་ཕྱིའི་བརྟན་ཕུར་ཚུགས་པར་ཤོག། །ལས་ཅི་བྱེད་ཀ་བ་འགྲུབ་པར་ཤོག། །དེ་ནས་ང་ལ་ཚུར་གསོན་དང༌། །ས་འདི་རྒྱལ་པོའི་ཕོ་བྲང་རེད། །གཡུ་འབྲུག་ཟིལ་པའི་མིང་དུ་གྲགས། །ང་དང་ང་ངོ་ལོས་ཀྱང་ཤེས། །  བེར་ཐུར་རྒྱལ་པོའི་བཀའ་བློན་ཡིན། །དེ་ནས་ང་ལ་གསན་རྒྱུ་ལ། །གླུ་སྙན་གྲེ་བ་མ་འགྱུར་ཏེ། །ངག་འཇམ་པོའི་ཚིག་ལ་དོན་འབྲས་སྤྱོད། །གུང་གསེར་ཁྲིའི་སྟེང་གི་ཉི་འོད་ལ། །ཐུགས་ཁྲོས་པའི་མུན་པ་ཕྱོགས་བཅུར་གཡོས། །གསུང་རྔམ་པའི་ཚིག་ལ་འདི་ལྟར་བྱུང༌། །ཡུལ་སྟོང་སྒོ་མཐུན་མཚན་ཁྲ་མོ་ལ། །བྱང་རྒྱ་ཚ་གཡང་དུ་ཨེ་ཁུག་གསུངས། །དམག་བུ་རྟ་ཡོ་ལངས་བྱེད་དགོས་གསུངས། །གསུངས་དེ་ལ་འགྱུར་ལྡོག་ཡེ་མ་མཆིས། །ཐུགས་ཁྲོ་ལོ་བཞེངས་ཏེ་ཞུ་མ་ནུས། །འཇང་ཁ་རའི་མི་སྡེ་གསོག་དགོས་བྱུང༌། །དེ་ཨེ་ཡག་བློན་ཚོགས་བསམ་མནོ་བསྐོར། །རང་རང་བསམ་བློའི་ཞུ་བ་ཕུལ། །མི་མ་འཕྲུལ་གྱི་རྒྱལ་པོ་ལ། །བྱུས་ཡ་ཡོ་འོང་ལེ་མི་དར་ཏེ། །མི་དར་བྱས་ཀྱང་དར་ལེ་མང༌། །འགྱུར་འདོད་ཆུ་ཆེན་སྐེད་ནས་འགྱུར། །ཆུ་ཆེན་སྐེད་ནས་མིའགྱུར་རྒྱུ། །ཆུ་ཚོད་མ་ཟིན་སྐྱོན་གཅིག་བྱུང༌། །བཞུ་འདོད་སྲིད་པའི་གངས་ཀྱང་བཞུ། །གངས་རིའི་རྩེ་ནས་མི་བཞུ་རྒྱུ། །མཐོ་ཚོད་མ་ཟིན་སྐྱོན་གཅིག་བྱུང༌། །ཆག་འདོད་སྡོང་པོ་སྐེད་ནས་ཆག། །ཤིང་སྡོང་སྐེད་ནས་མི་ཆག་རྒྱུ། །སྐྱེ་ཚོད་མ་ཟིན་སྐྱོན་གཅིག་བྱུང༌། །དཔེ་དེ་དང་ཁྱད་པར་ག་ན་ཡོད། །དེ་ནས་དཔོན་པོ་ས་ཐམ་ལ། །ངས་བསམ་དཀར་ལོ་མ་ཁ་ནས་འབུད། །རྫུན་གཡོ་ཟོལ་ཡོད་ན་དཀོན་མཆོག་ཁྲེལ། །ད་ལོའི་བྱུས་ཀྱི་ཡོ་ལངས་འདི། །མི་ཡག་ཨེ་གོ་སྐྱུར་ན་བསམ། །དཔོན་དབུ་འཕང་མཐོ་དུས་མ་གསན་ན། །ཕོ་འདྲ་འདྲའི་གོང་གནོན་བྱུང་ལེ་མང༌། །ཆོས་བཟང་དུས་བསམ་གཏན་མ་བསྒོམ་ན། །བདུད་ནག་པོའི་བར་ཆད་བྱུང་ལེ་མང༌། །ཕོ་དལ་དུས་ལས་ལ་མ་བརྩོན་ན། །འགག་ཐུག་ཉིན་ལྷམ་ཆུང་རྡོལ་བ་མང༌། །ཚྭ་མཚོ་བསྟན་མ་བཅུ་གཉིས་ནི། །སྤྱིར་གངས་ཅན་བོད་ཀྱི་རང་བདག་ཡིན། །སྒོས་གེ་སར་རྒྱལ་གྱི་འཛིན་བདག་རེད། །དེ་ལས་དེ་བཤོལ་ལ་མོ་ཐོངས། །ཁྱོད་ཐབས་ལ་མཁས་པའི་རྒྱལ་མཆོག་གིས། །ཐུན་མོང་རྫུ་འཕྲུལ་བདག་དང་སྡེབས། །བདག་ཅག་འདིར་ལུས་འབངས་རྣམས་ལ། །གསུང་ངག་བདུད་རྩིའི་ཆར་རྒྱུན་གྱིས། །ཅི་འདོད་ཡིད་བཞིན་སྩལ་དུ་གསོལ། །སྐྱེམས་འཕར་བདུད་རྩིའི་རོ་མཆོག་དང༌། །དམར་བའི་ཤ་དང་དཀར་བའི་འབྲུ། །ཐུགས་ལ་སྒྲིལ་བའི་བརྒྱ་ཙམ་ལ། །བྱང་ཚྭ་བྱུང་བའི་དཔེ་སྲོལ་མེད། །ཨེ་རེད་རྒྱལ་པོའི་ཐུགས་ལ་སྐོར། །
ཟེར་ཞིང༌གཞན་མས་ཅི་ཡང་མི་ཟེར་བར་འདུག བར་དེར་རྒྱལ་པོ་ཆེན་པོ་ཐུགས་ཁྲོས་པའི་ངར་དང་བཅས་ནས། བློན་པོའི་ཚོགས་རྣམས་ལེགས་པར་ཉོན་ལ་ཡིད་ལ་བཟུང་འཚལ། བློན་བེར་ཐུལ་གྱི་གཏམ་ལ་ཉན་ན། རང་བྱུས་མ་ཤོར་རབ་ཡིན་ཚུལ་འདུག་རུང༌། སྙོམས་ཆུང་གི་ངང་ནས་རང་མགོ་ཅི་ཚུད་མེད་པར་སྡོད་དགོས་པའི་མི་མིན། ཚྭ་མཚོ་བསྟན་མ་བཅུ་གཉིས་དེ། མི་ངན་ཇོ་རུའི་བདག་འཛིན་ཡིན་འདུག་རུང༌། དེ་མིན་འཛམ་གླིང་མ་བགོས་ཐུན་མོང་ཡིན། ཁ་དྲག་གི་སྒོར་ཚད། སྙོམས་ཆུང་གིས་སྐལ་ཆད་སོགས་བྱེད་ཐབས་མེད། ཇོ་རུས་ཚོད་འཛིན་པ་ལ་ཁག་ཐེག། བརྒྱ་ལ་མི་ངན་བུ་སྡུག་གིས་རྩོད་གྲབས་བྱུང་རུང༌། བསྡོ་མི་འཕེར་བའི་མི་གཅིག་མིན་ཟེར་ཞིང་གླུ་འདི་ལྟར་བླངས་སོ། །
གླུ་ཨ་ལ་ཐ་ལ་ལ་ལ་རེད། །ཐ་ལ་གླུ་ཡི་ལེན་ལུགས་རེད།་་་༌།དིང་རི་མི་རྒན་ཁུ་བྱུག་དང༌། །ལྷ་འཁོར་བྱེ་བ་ས་ཡ་བཅས། །རང་བྱུས་བརྟན་ཕུར་མཐའ་རུ་སྐྱོངས། །དེ་ནས་ང་ལ་ཉན་རྒྱུ་ལ། །དམག་དཔོན་བྱུར་ལྷ་དཔོན་པོ་དང༌། །མཚལ་དམར་དཔོན་པོ་ཁེར་སྐྱེས་དང༌། །ཡང་སྒོས་གཡུ་ལྷ་ཐོག་འགྱུར་བཅས། །སྡེ་ཤོག་དམག་དཔོན་ཆེ་དགུ་རྣམས། །ཉོན་དང་འདྲ་མ་ཚིག་གསུམ་ཡོད། །ང་འཁོར་ལོས་བསྒྱུར་བའི་རྒྱལ་པོ་ལ། །ཁ་འཛིན་གནམ་ལྷ་དཀར་པོ་ཡོད། །འཇང་མི་རབས་བརྒྱད་ཀྱི་ཕ་མཐའ་རུ། །འགྲན་མེད་གནམ་གྱི་རྒྱལ་པོ་ཟེར། །དཔའ་སྟང་མ་ཤ་རློམ་ཟ་མི་གཅིག། །ནམ་མཁའ་ལྷ་ཡི་ལུང་ན་དྲངས། །ཉམས་དཔྱད་ན་ཨ་ཕོ་ང་རང་རེད། །ཉི་ཟླ་རང་འདོད་བཙན་ཞན་འདྲ། །ནམ་མཁའི་འོག་ལ་མ་འདུས་མེད། །ཆུ་ཆེན་འུར་ལ་འབབ་ཆེ་ཡང༌། །རྒྱ་མཚོའི་ཀློང་ལ་མ་ཐེབས་མེད། །རི་བོ་མཐོ་ཚོད་རབ་བརྗིད་ཀྱང༌། །བྱ་བརྒྱའི་གཤོག་གིས་མ་འཁོར་མེད། །གླིང་རུ་རྒོད་གཡེར་ཆེ་གྱུར་ཀྱང༌། །ང་ས་ཐམ་མི་ཐུབ་ཡོང་དོགས་མེད། ། ས་བོན་ནམ་དུས་དཔྱིད་ལ་འདེབས། །མ་ཐེབས་སྟོན་གྱི་དུས་ན་འགྱོད། །དམ་ཆོས་གཞོན་ནུའི་དུས་སུ་བྱེད། །མ་བྱས་འཆི་ཁའི་དུས་སུ་འགྱོད། །དགྲ་བོ་ཕ་སྤུན་འཛོམས་ཉིན་འདུལ། །མ་ཐུབ་རྒྱབ་ཆད་བྱུང་ན་འགྱོད། །བཤོལ་བཤོལ་མང་བས་དོན་གོ་མེད།  །ཁྱོད་རྣམས་མ་སྡོད་ལ་མོ་སོང༌། །
ཞེས་གསུངས་ཤིང༌། བློན་པོ་རྣམས་ཀྱིས་ཞུ་མ་ཕོད་པར་རེ་ཞིག་ལུས། །བར་དེར་གཡུ་ལྷ་ཐོག་འགྱུར་ལངས་ཏེ་རྒྱལ་པོའི་སྐུ་ཞབས་སུ་པུས་མོ་བཙུགས་ནས། འགྲོ་ལུགས་དང་དཔའ་བྱེད་ཚུལ། གཞན་མ་བློན་པོ་རྣམས་སྤྲོ་བ་བསྐྱེད་ཕྱིར་གླུ་འདི་ལྟར་བླངས་སོ། །
གླུ་ཨ་ལ་ཐ་ལ་ལ་ལ་རེད། །ཐ་ལ་གླུ་ཡི་ལེན་ལུགས་རེད། །ལྷ་ཡར་མཆོད་གནམ་ཐེལ་ར་དཀར་སྐྱ། །སྟེང་རྗེའི་དབུ་འཕང་དགུང་ལ་བསྟོད། །བར་མཆོད་བར་ཐེལ་ར་ཁྲ་སྐྱ། །བློན་པོའི་ཡིད་རྩ་སྟག་ལས་ངར། །མར་མཆོད་ས་ཐེལ་ར་ནག་སྐྱ། །མི་སྡེའི་གཞི་རླིང་མཚོ་བས་ཆེ། །སྒེར་ལྷ་གཡུ་རི་སྔོན་པོ་མཆོད། །རང་རྒྱུད་རིག་པའི་སྒྲོན་མེ་སྤོ། །བློན་ཆེན་བེར་ཐུལ་སྙན་གསོན་དང༌། །སྙོམས་ཆུང་གཏམ་དེ་དགོས་པ་ཆུང༌། །ཚྭ་མཚོ་བསྟན་པ་བཅུ་གཉིས་དེ། །སྐྱེ་འགྲོ་མ་དགོས་སྤྱི་མ་ཡིན། །གླིང་དཀར་རང་བདག་ཡིན་དོགས་མེད། །ཁོང་སེང་ཆེན་སྙན་པ་རྒྱང་ནས་ཆེ། །གླིང་དཔའ་བདུད་རྒོད་གཡེར་རྒྱང་ན་ཆེ། །འགྲམ་བཅར་ན་ཅི་ཡོད་ངེས་པ་མེད། །ཕོ་རྒོད་སྙིང་རྩ་འདར་མི་དགོས། །འདར་དྲགས་ན་གཞན་གྱི་ཟུར་ནས་ཁྲེལ། །
ཞེས་ཟེར་ཞིང་འགྲོ་བར་ཆས་སྐབས་དེར། མཁའ་འགྲོའི་སྤྲུལ་པ་འཇང་བཟའ་མེ་ཏོག་ཆོས་སྒྲོན་དེའི་ཐུགས་ལ་ད་ལན་ཡོ་ལངས་ཆེན༌པོ་མི་ལེགས་པ་ཁོ་ན་ཡིན་འདུག དེ་བས་བཤོལ་ཐབས་འདྲ་ཨེ་ཡོང་བསམ། ཡབ་ཀྱི་དྲུང་དུ་སོང་ནས།་་་་མི་ཡོང་མི་ལེགས་ཚུལ་གྱི་ཞུ་བ་མང་དུ་ཕུལ། ཡབ་ཀྱིས་གསུངས་པ། བུ་མོ་ཁྱེད་རང་ལ་བཅོལ་བ་ཡོད་ན་བརྩོན་ཆོག མ་བཅོལ་བའི་མི་དྲན་དྲན་མདོག ཀི་ལྷང་ལྷང་སོྭ་ཁྱེར་གྱིས་དགོད་པ་མེད། དེ་བས་ཁ་རོག་སྡོད་གསུངས། ཡང་བེར་ཐུལ་གྱིས་འགྱོད་མེད་ཀྱི་ལས་གཅིག་མ་བྱས་ན་མི་ཡོང༌། ལྷག་པར་འཇང་ས་བདེན་བསམས་ནས་སྨྲས་པ། འཇང་བཟའ་ཆོས་སྒྲོན་གྱིས་གསུངས་པ་ལྟར་ཡིན། སྔོན་ལུང་བསྟན་གྱི་དུས་ཚོད་ཡོ་དཔྱད་སོགས་གང་ནས་བལྟས་ཀྱང་བཀྲ་མི་ཤིས་པའི་དཔྱད་ཚང་འདུག ཡིན་ནའང་ད་རུང་རང་བྱུས་ལག་ན་ཡོད་རིང༌། རྒྱལ་བློན་རྣམས་བཀའ་གྲོས་བྱས་ན་བསམ་ཟེར་ནས་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གླུ་རེ་རེ་མ་བླངས་ཀ་མེད་རེད། །རེ་རེ་མ་བླངས་ཚོད་མེད་རེད། །སྐྱིད་ན་ཇ་ཆང་ཚར་གླུ་རེད། །སྡུག་ན་རང་སེམས་གསོ་རོགས་རེད། །གཏམ་རེ་རེ་མི་གཏོང་ཀ་མེད་རེད། །མི་ཆོག་ས་ཐམ་རྒྱལ་པོ་ལ། །ཞུས་པ་བློན་པོས་འཆལ་འདུག་དགོངས། །ཐུགས་དད་མེད་ཅིང་ཐུགས་ཁྲེལ་རྒྱུ། །ཕ་མས་བུ་ལ་བརྩེ་བ་ལྟར། །གཏན་དུ་རྒྱལ་པོའི་བཀའ་དྲིན་ལ། །ད་དུང་སེམས་ཀྱི་མི་བཟོད་འདུག བློན་པོའི་བླ་གནས་སྟག་རིས་ངུར། །རྒྱལ་པོའི་ཐུགས་ལ་ཁྲོ་ལོ་བཞེངས། །བློན་པའི་ཞེ་ལ་ཕྲག་དོག་འདུག །མི་སྡེའི་ཁ་ལ་ཕད་ཤར་འདུག །སྤྱོད་ངན་རང་གིས་བསྒྱུར་བས་ལན། །ཡིན་ཀྱང་ད་དུང་བསམས་མནོ་སྐོར། །རང་བྱུས་ལག་ཏུ་ཡོད་རིང་ལ། །ལྟ་སྤྱོད་ལོག་ལྟ་འཆར་འགྱུར་ཀྱང༌། །ཤེས་རིག་ལྡན་པས་བཅོས་རྒྱུ་ཡོད། །མ་བརྟན་འདུན་མའི་གདན་ས་ཚུགས། །མ་རྫོང་མདའ་མོ་སྐེད་ནས་འདྲོང༌། །ཡོ་གྲང་མཆོག་དཀར་ཀླད་ནས་གྱིས། །རྒྱལ་པོ་ཕོ་བྲང་བཅུད་དུ་བཞུགས། །བློན་པོ་མི་སྡེ་སྔར་ལྟར་ཞོག །འདོ་བ་རྟ་དང་སྲ་ཐང་སྒ། །ཀི་ཁྱེར་སེ་བྱུང་ན་ཐོན་ཆོག་གྱིས།  །
ཟེར་བ་སོགས་བཤོལ་ཐབས་ཀྱི་གཏམ་མང་ཙམ་ལབ་ཀྱང༌། རྒྱལ་པོ་ནི་སྙན་གྱི་ཟུར་ལ་འགྲིམས་པ་མ་གཏོགས་ངག་ནུས་ཐོན་པ་ཅི་ཡང་མ་བྱུང༌། སྐབས་དེར། འཇང་མ་ཁྲི་ལྕམ་རྒྱལ་མོའི་ཐུགས་ལ་ཡང༌། འདི་ལོའི་དམག་དང་ཇག་འཁྲུག་ནི་མི་ལེགས་པའི་ངོ་ཡིན། སྔོན་གྱི་ལུང་བསྟན་དུས་ཀྱི་འགྱུར་ཆོད་ཅི་ནས་སྐོར་ཀྱང་བུ་མོ་མེ་ཏོག་སྒྲོན་དང་བེར་ཐུལ་གྱིས་ཟེར་བ་དེ་རང་ཡིན་ཞེས། ཞུ་བ་ཅི་ཕུལ་རུང་མ་གསན་ཅིང༌། བྱུར་ལྷ་དཔོན་གྱིས། འཇང་ཕྲུག་གཡུ་ལྷ་ཐོག་འགྱུར་བཅས་ཁས་བླངས་མི་གསུམ་འགྲོ་བསམ་ན་ཕྱིན་པ་དྲག། རྒྱལ་པོའི་གསུང་དང་གནམ་ལྷའི་ལུང་བསྟན་ལ་བསྟུན་ནས་ཉན་པ་མ་གཏོགས་ཅ་ཅོའི་ཚིག་ལ་གཏད་སོ་ཅི་ཡོད། ཅེས་མཁས་མཁས་ཙམ་ཤོད་པ་ལ་འདི་ལོ་དམག་བཤོལ་བཟང་ཚུལ་ཐད་ཀར་ཞུ་མ་ནུས།   སྐབས་དེར་རྒྱལ་པོ་ས་ཐམ་ན་རེ། འཇང་ས་ཐམ་གྱི་ཡུལ་དུ་ཟས་ཀྱི་བྲོ་མཆོག་ལེན་དགོས་ལ། རང་བཞིན་ལོང་གཏམ་གཏད་མེད་ནོར་གསོག་འདོད་ཀྱི་གཏམ་མ་ཡིན་ཞིང༌། གནམ་ཐེལ་གྱི་ལུང་བསྟན་དངོས་ཡིན་པས། བློན་ཚོགས་རྣམས་གཉིས་འཛིན་མི་དགོས། དམག་མང་ཆས་རུང་མི་སྡེ་འཁྲུག་ཆེ་བས། བློན་བེར་ཐུལ་གྱི་ཞུ་བ་ལྟར་ཆ་འཇོག གོང་མངགས་མི་གསུམ་སོང་རྗེས་ལ་ངེད་རང་རྣམས་དམག་མང་གོ་བཤེར་ནས་ཐོན་ཆོག་བྱེད་ཟེར། དམག་མང་རྣམས་གྲབས་གཤོམ་བྱེད་དགོས་ཚུལ་གྱི་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གླུ་གུང་སྔོན་ནམ་མཁའི་རྭ་བ་ནས། །མཁྱེན་ཅིག་དགྲ་ལྷའི་དབུ་འཕང་བསྟོད། །འཇང་ཡུལ་འདོད་དགུའི་ས་ཆ་རེད། །གནའ་མི་རྒན་གྱི་གཏམ་དཔེ་ལ། །ཕུ་གངས་དཀར་འགྲམ་གྱི་བན་བཙུན་རྣམས། །བློ་སེམས་ཀྱི་གསལ་འདེབས་མ་བྱས་ན། །ཆོས་ཡིན་ལུགས་བཤད་པ་ཆགས་སྡང་རྒྱུ། །སྒོམ་ཁ་རོག་སྡད་པའི་གཏི་མུག་སྨྲ། །དམའ་བསམ་མེད་རུ་ཚང་རྡོ་བརྒྱབ་ཀྱིས། །ལས་ལེ་ལེན་གྱི་མི་ཁ་བླ་མར་བབས། །རྫོང་ཁྲ་བོ་རྣམས་ཀྱི་རྗེ་འབངས་རྣམས། །ལས་འདི་བྱས་བྱུས་ཁ་དཔོན་ལ་བབས། །ཕྱི་སྙོམས་ལས་བྱས་པའི་གཡལ་མེད་རྟགས། །འདོད་འཁོར་ཚང་རྩིད་སྐུད་མགོ་བྲག་གི །ཤག་མ་ཁའི་བསྟན་པ་དཔོན་ལ་བབས། །དཔེ་དེ་དང་ཁྱད་པར་ག་རེ་ཡོད། །འཇང་ས་ཐང་ཡུལ་དུ་རྒྱལ་བློན་རྣམས། །ནག་ཕྱོགས་རུ་འཛིན་རྒྱལ་པོར་བབས། །དེ་ཡིན་ལུགས་བཤད་པ་ཁོང་ནས་ཆོད། །དེ་མ་ལོན་ངན་པ་རྒྱལ་པོས་ཁྱེར། །ད་ལན་དམག་འདི་བཤོལ་ཐབས་མེད། །སང་གི་ཉི་མ་རྩེ་ཤར་ལ། །དམག་དཔོན་རེ་རེའི་མངའ་ཞབས་སུ། །ལས་དམག་གོ་མཚོན་འཛོམ་ལེ་གྱིས། །ལྷག་པར་སྔོན་ཞུད་རྒོད་པོ་གསུམ། །ད་ཡང་མ་སྡོད་འགྲོ་རན་རེད། །གཏམ་གོ་ནི་ཨེ་བྱུང་རྒོད་པོ༌རྣམས། །ཞེས་གསུངས་པ་ལྟར།  བུ་དཔའ་བོ་རྣམས་མདའ་དར་གྱི་སྐྱེལ་མ་སོགས་ཀྱི་ཟས་བཅུད་གཡང་དུ་ལེན་པ་ལ་བཞུད་དོ། །
དེའི་སྐབས་སུ༌འཛམ་གླིང་མི་ཡི་ཉི་མ། གངས་པ་བོད་ཀྱི་སྐྱབས་གཅིག ནག་པོ་བདུད་ཀྱི་གཉའ་གནོན། ས་བཅུ་གནོན་པའི་སངས་རྒྱས། ས་གནམ་བར་གྱི་ཀ་བ། མུན་པ་འཇོམས་པའི་སྒྲོན་མེ་ཁོང༌། ཧོར་སེར་རྩ་མེད་དུ་བཏང་ནས་ཕོ་བྲང་ཇ་མཁར་ཕྱུག་མོར་གཟིམས་ལ་བཞུགས་པའི་ནུབ་མོ་གཅིག་ནམ་མཁའ་གཡས་ཀྱི་ཕ་རོལ། ནམ་མཁའ་གཡོན་གྱི་ཚུར་རོལ། ནམ་མཁའ་སྤྲིན་ཕུང་སྐྱོགས་མོ་ནས། སྤྲིན་འཇའ་ཚོན་གཉིས་ཀྱི་བར་སྐབས་སུ། མ་ནེ་ནེ་གུང་སྨན་རྒྱལ་པོ་དེ། སེངྒེ་སྒ་མེད་སྲབ་མེད་ཆིབས། སྤྲིན་མི་ལྷ་ཡི་རྒྱབ་བསྐྱོར་བྱས། སྤྲིན་མི་གཟུགས་ཅན་གྱི་ཆིབས་ཁ་ཁྲིད། སྤྲིན་མི་མགོ་ཅན་གྱི་གཡས་རམ་བཏེགས། རིགས་བཞིའི་མཁའ་འགྲོའི་བསྐོར་ནས་ལུང་བསྟན་གསལ་ཚིག་གི་ངག་གསུང་བ་བརྡ་སྤྲོད་ལ་སྦྱར་ཏེ་གླུ་འདི་གསུངས་སོ། །
སྭོ་སྭོ་སྭོ་སྭོ་ལྷ་སྭོ་སྭོ། །གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གནས་ལྔ་གར་བཞུགས་གཞལ་ཡས་ནས། །རིགས་ལྔ་མཁའ་འགྲོ་བདེ་ཆེན་ལྕམ། །རྟག་ཏུ་གུས་པས་ཕྱག་འཚལ་ལོ། །དུར་ཁྲོད་བརྒྱད་ཀྱི་ས་ཕྱོགས་ནས། །ཡུལ་ཆེན་ཤེས་རབ་ཕར་ཕྱིན་མ། །འགྲོ་དྲུག་ཡོངས་ལ་སྤྱན་གྱིས་གཟིགས། །དྲིན་ཆེན་ས་ལམ་བགྲོད་པར་ཤོག །དེ་ནས་ང་ལ་གསན་རྒྱུ་ལ། །ས་འདི་ས་ངོ་མ་ཤེས་ན། །རང་ཡུལ་མཐོང་བ་ཀུན་སྨོན་རེད། །སྐུ་མཁར་ཇ་མཁར་ཕྱུག་མོ་རེད། །ང་དང་ང་ངོ་མ་ཤེས་ན། །ནེ་ནེ་གུང་སྨན་རྒྱལ་མོ་ཟེར། །རིགས་བཞི་མཁའ་འགྲོས་བསྐོར་ནས་ཡོད། །བདེ་ཆེན་ལམ་སྣ་འདྲེན་མཛད་མ། །རྡོ་རྗེ་རིགས་ཀྱི་མཁའ་འགྲོ་དེ། །དཀར་མོ་བཞིན་བཟང་ཡལ་ལེ་ཡོད། །སྟོང་ཉིད་ཡིད་བཞིན་འཆར་མཛད་མ། །རིན་ཆེན་རིགས་ཀྱི་མཁའ་འགྲོ་ཡོད། །སེར་མོ་འཛུམ་ཞལ་ཁྱུག་སེ་ཁྱུག  །རྟོག་པའི་དྲ་བ་འཛོམས་མཛད་མ། །པདྨ་རིགས་ཀྱི་མཁའ་འགྲོ་ཡོད། །དམར་མོ་གར་སྟབས་ལྡོག་སེ་ཡོད། །ཅིར་སྣང་ཆོས་སྐུར་སྟོན་མཛད་མ། །ལས་ཀྱི་རིགས་ཀྱི་མཁའ་འགྲོ་ཡོད། །ལྗང་མོ་བྲོ་བརྡུང་ཁྲབ་སེ་ཡོད། །མཁའ་འགྲོ་འབུམ་གྱི་གཙོ་མོ་ང༌། །གླིང་བཞི་མུན་པ་གསལ་ལེ་ཡིན། །གེ་སར་རྒྱལ་པོའི་བཀའ་སྡོད་ཡིན། །ལེགས་ཉེས་བཏང་འཛིན་བྱེད་མི་ཡིན། །ཁ་ལག་ལྟར་དུ་ནེ་ནེ་ཡོད། །ལུས་གྲིབ་མ་ལྟར་དུ་ནེ་ནེ་ཡོད། །གེ་སར་དགྲ་འདུལ་རྒྱལ་པོ་དང། །ནེ་ནེ་སྣང་གསལ་སྒྲོན་མེ་གཉིས། །ཐབས་ཤེས་མདའ་གཞུ་ལྟ་བུ་ཡོད། །བླང་དོར་ལུང་ཚིག་འདི་ལ་གསོན། །ཇོ་རུ་མ་ཉལ་ཇོ་རུ་ལོངས། །འཇིག་རྟེན་གཏམ་གྱི་ཁ་དཔེ་ལ། །ཆོས་པ་ཉལ་ན་སེམས་ཉིད་ཉལ། །སེམས་ཉིད་ཉལ་ན་འདྲེན་དོན་འཆོར། །འདྲེན་དོན་འཆོར་ན་དམྱལ་བར་འགྲོ། །བུ་དཔའ་བོ་ཉལ་ན་མདའ་མགོ་འཆོར། །མདའ་མགོ་ཤོར་ན་དགྲ་མགོ་ལངས། །དགྲ་མགོ་ལངས་ན་བྱུས་མགོ་འགྱེལ། །དམག་བུ་རྟའི་ལས་བཀོད་གྲབས་གཤོམ་གྱིས། །བྱུས་རན་ལེ་མ་ཚད་ཕྱིས་ལེ་རེད། །འཇང་གཡུ་ལྷ་ཐོག་འགྱུར་མགོ་བྱས་ཀྱི། །དམག་སུམ་བརྒྱ་དྲུག་ཅུ་རྩེབས་ནས་འདུག །བདུད་རྒྱལ་བ་ཐོད་དཀར་མགོ་བྱས་ཀྱི།། དམག་སུམ་བརྒྱ་དྲུག་ཅུ་རྩེབས་ནས་འདུག  །འབྲུག་སྒྲའི་དཔལ་ལྡན་མགོ་བྱས་ཀྱི། །དམག་སུམ་བརྒྱ་དྲུག་ཅུ་རྩེབས་ནས་འདུག  །ཁོ་དམག་དཔོན་གསུམ་གྱིས་མགོ་བྱས་པའི། །ལས་དམག་སྟོང་དང་བརྒྱད་བཅུ་དེ། །མཐོ་ནམ་མཁའ་དར་གྱིས་འགེངས་ཤིང་འདུག   །དར་ལ་སུམ་འཕྲུ་འཛུགས་ཅིང་འདུག  །དམའ་ས་གཞི་ར་ལ་བྱེད་ཅིང་འདུག   །ར་མ་གཞི་ལྕགས་སྤྲོད་ཅིང་འདུག  །མི་འཛོམས་རྟ་འཛོམས་ཁྲིགས་སེ་འདུག  །ཁས་ལེན་སྟག་མོ་ངར་ཞིང་འདུག  །མདུང་བཟུང་གོག་ཁྱུ་ཤར་ཤར་རེད།  །ཕུབ་བཟུང་རྒོད་པོ་མཆོང་མཆོང་རེད། །ཟས་ཀྱི་བྲོ་མཆོག་ཁྱེར་གྲབས་འདུག  །ཟས་ཀྱི་བྲོ་མཆོག་ཁྱེར་ཟེར་ན། །ཕྱི་རེས་གངས་པ་བོད་ལ་གནོད། །དེང་སང་ཇོ་རུའི་གཏམ་ལ་རྩོད་ལུགས་ཡོད། །སྐོར་ལ་གོང་དཀར་སེམས་ལ་སྐོར། །ཕོ་རྩོད་རྩོད་གཏམ་ལ་རྩོད་ལུགས་ཡོད། །དཔོན་རྩོད་རྩོད་བྱུས་ལ་རྩོད་ལུགས་ཡོད། །བྱུས་བསྟན་པའི་རྩ་བ་མ་ཚུགས་ན། །ཡུལ་གྲུ་བཞིའི་འདུན་མ་སུ་ལ་རེ། །སང་གི་ཉི་མའི་སྔ་དྲོ་ལ། །དགྲ་ཕར་བརྒྱབ་ལས་ལ་ཅི་ཡང་བཟང༌། །ནོམ་ཚུར་ལེན་གཡང་དུ་ཁུག་ལེ་ཡིན། །ལྷ་དམག་དཀར་པོའི་ལས་བཀོད་གྱིས། །སྤྱིར་ས་ཐམ་རྒྱལ་པོའི་བཀའ་བློན་ལ། །རྒོད་གྲགས་པ་མ་ཐོབ་གཅིག་ཀྱང་མེད། །ཡང་སྒོས་གཡུ་ལྷ་ཐོག་འགྱུར་དེ། །ལས་ཅི་བསམ་འདུན་མ་འགྲུབ་ངེས་ཡིན། །འཇང་ས་ཐམ་ཡུལ་དུ་འགྲོ་ཉིན་ལ། །གཞན་པའི་དགྲ་དང་འདྲ་ལེ་མིན། །ཁག་ཐག་ཆོད་ས་ཐམ་ཡུལ་དུ་ཡོད། །གྲོས་བཟང་པོའི་བཙན་མཁར་ཟིན་ལེ་གྱིས། །
ཞེས་གསུངས་ཤིང་མི་སྣང་བར་གྱུར། དེ་ནས་སང་ཉིན་འཛམ་གླིང་ཆོས་ཀྱི་རྒྱལ་པོོ་ཁོང་གིས་མ་ནེ་ནེའི་ལུང་བསྟན་དང༌། འཇང་ས་ཐམ་གྱི་དམག་སླེབས་ཚུལ། གླིང་དམག་ཆས་དགོས་ཚུལ་གྱི་གླུ་འདི་འགགས་མེད་རྡོ་རྗེའི་རང་སྒྲ་བཞེངས་ཏེ་གསུངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །སྐྱབས་རྒྱལ་བ་རྒྱ་མཚོའི་ཞབས་ལ་འདུད། །རྗེ་དཀོན་མཆོག་གསུམ་ལ་ཕྱག་འཚལ་ལོ། །ང་སྐྱེས་བུའི་བློ་ཡི་རྫི་བོ་མཛོད། །འོག་མིན་ཆོས་དབྱིངས་ཕོ་བྲང་ནས། །དུས་གསུམ་རྒྱལ་བ་རྒྱ་མཚོ་དང༌། །ནེ་ནེ་གུང་སྨན་རྒྱལ་མོ་བཅས། །མི་འབྲལ་སྤྱི་བོའི་གཙུག་ཏུ་བཞུགས། །དེ་རིང་སྐྱེས་བུའི་ཁ་འཛིན་མཛོད། །གངས་ཅན་བསྟན་པ་མཐའ་རུ་སྤེལ། །དེ་ནས་ང་ལ་ཉན་རྒྱུ་ལ། །འབྲུག་མོ་མ་ཉལ་འབྲུག་མོ་ལོངས། །གཡོ་ས་མ་ཉལ་གཡོ་ས་ལོངས། །མདང་སུམ་གཉིད་ཀྱི་ཐུན་སོ་ལ། །ནེ་ནེས་ང་ལ་ལུང་ཞིག་བྱུང༌། །ནེ་ནེ་གུང་སྨན་རྒྱལ་མོ་ཡིས། །འཇང་ས་ཐམ་ལས་དམག་སླེབས་འདུག་ཟེར། །གླིང་ལྷ་སྡེའི་ཅི་བསམ་འགྲུབ་པའི་སླད། །གླིང་ཚོ་ཆེན་ལྷ་དམག་ཆས་ཤོག་གྱིས། །ལུང་བསྟན་གསལ་ཚིག་འདི་ལྟར་བྱུང༌། །མཁར་མི་འགྱུར་དངུལ་ཆུ་ཁྲོ་རྫོང་ན། །གདོང་གཅེས་ཕྲུག་དགྲ་ལྷ་རྩེ་རྒྱལ་ཡོད། །མི་དེ་ཡང་མ་འདུག་འཛོམས་ཤོག་གྱིས། །རང་འོག་ལས་དམག་ཁྲིགས་སེ་གྱིས། །རྒོད་འཕྲུ་ཅན་གྱི་ཁ་ལོ་བསྒྱུར། །མུ་ནེ་ལྷ་རྫོང་ཕྱུག་མོ་ན། །གདོང་ཨ་ཁུ་ག་ནེ་གོམས་པ་ཡོད། །མི་དེ་ཡང་མ་སྡོད་འཛོམས་ཤོག་གྱིས། །མཁར་མི་འགྱུར་གའུ་གསེར་རྫོང་ན། །གསེར་པའི་ཉི་འབུམ་དར་ལུ་ཡོད། །མི་དེ་ཡང་མ་སྡོད་འཛོམས་ཤོག་གྱིས། །རང་འོག་ལས་དམག་ཁྲིགས་སེ་གྱིས། །མཁར་མི་འགྱུར་རྒྱ་ནག་ལྡིང་རྫོང་ན། །འོམ་བུའི་ཨ་ནུ་དཔའ་སེང་ཡོད། །མཁར་མི་འགྱུར་འབུམ་སྡེ་སྲོག་རྫོང་ན། །མུ་སྤྱང་རིན་ཆེན་དར་ལུ་ཡོད། །མི་དེ་གཉིས་མ་སྡོད་འཛོམས་ཤོག་གྱིས། །རང་འོག་ལས་དམག་ཁྲིགས་སེ་གྱིས། །དཀར་རུའི་སྟོང་འཁོར་བཅུ་གཉིས་དེ། །ཆེ་རྒྱུད་གླིང་གི་ཚ་ཞང་ཡིན། །གསེར་འཕྲུ་ཅན་ལ་སྟོང་ཚོ་དགུ། །ནག་རུའི་སྟོང་འཁོར་བཅུ་གཉིས་དེ། །འབྲིང་རྒྱུད་གླིང་གི་ཚ་ཞང་ཡིན། །ལྕགས་འཕྲུ་ཅན་ལ་སྟོང་ཚོ་བདུན། །དེ་ཚོ་མ་སྡོད་འཛོམས་ཤོག་གྱིས། །རང་འོག་ལས་དམག་ཁྲིགས་སེ་གྱིས། །མི་འགྱུར་གཡུ་རྫོང་སྔོན་པོ་ན། །འདན་མ་ཁྲི་གཅེས་བསམ་འགྲུབ་ཡོད། །མཁར་མི་འགྱུར་ཕོ་རོག་སྙིང་རྫོང་ན། །སྟག་རོང་དཔོན་པོ་ཁྲོ་ཐུང་ཅན། །མཁར་མི་འགྱུར་ཕོ་བྲང་སྟག་རྩེ་ན། །སྐྱ་ལོ་སྟོན་པ་རྒྱལ་མཚན་ཡོད། །མཁར་མི་འགྱུར་སྨྱུ་གུ་འབུམ་རྫོང་ན། །སྒར་སྡེ་སྒྱོགས་ཀྱི་ལྡེ་མིག་ཡོད། །གཡུ་འཕྲུ་ཅན་ལ་སུམ་བརྒྱ་ཡོད། །རང་འོག་ལས་དམག་ཁྲིགས་སེ་གྱིས། །མོན་འཇང་གཉིས་ཀྱི་ས་མཚམས་ཀྱི། །མཁར་མི་འགྱུར་རྒོད་ཚང་ཁ་ལེབ་ན། །དཔའ་ལའི་མི་སྤྱང་དཀར་པོ་ཡོད། །མཁར་མི་འགྱུར་གླག་མོ་ཁེར་རྫོང་ན། །གུང་པ་བུ་ཡི་ཁྲ་སྐྱ་ཡོད། །དེ་ཡང་མ་སྡོད་འཛོམས་ཤོག་གྱིས། །ནག་པོ་བདུད་ཀྱི་ཤོག་གསུམ་ནས། །བདུད་བློན་ཨ་ནུ་ཕྱིང་སྔོན་ཅན། །ལྗང་སྲས་ཟླ་ཁྲི་སྨིན་དྲུག་དང༌། །རྒྱ་གར་མ་ཎི་ཕ་ལ་བཅས། །སྡིག་སྤྱོད་ཤན་པ་དམར་པོ་སོགས། །བཀའ་བགེགས་པའི་ས་རེ་འགྲོ་དགོས་ཡོད། །མི་དེ་ཡང་མ་སྡོད་འཛོམས་ཤོག་གྱིས། །རང་འོག་ལས་དམག་ཁྲིགས་སེ་གྱིས། །སྲོ་མ་མ་སྡོད་མགྱོགས་པར་སོང༌། །མངགས་པའི་མི་དང་འཕངས་པའི་མདའ། །གར་བཏང་གོ་ཆོད་ཡོང་ལེ་གྱིས། །
ཞེས་གསུངས་པས་སྲོ་མས་གླིང་སྟོད་སྨད་བར་གསུམ་ལ་ཀི་བཏང༌། ཁྲིམས་རྔ་བརྡུངས། དུང་འབུད་བཞིན་ཡོད།  ཉི་མ་ལ་ཕག་ཏུ་མ་སོང་ཙམ་དུ་ཤན་པས་སྲོ་མ་ཡོང་བ་མཐོང་སྟེ། མི་རྟའི་དཔྱད་སོགས་སྲོ་མ་ཡིན་པར་ཤེས་ནས། རེ་ཞིག་གང་ཡིན་བརྟགས་པ་དང༌། གདོང་བསུ་བར་ཕྱིན་པས། སྲོ་མས་རྒྱལ་པོའི་གསུང་ཅི་ཡོད་རྣམས་བཤད་པ་དང༌། ཤན་པའི་བསམ་པར་རྒྱལ་པོའི་གསུང་ཡིན་འདུག་རུང༌། ང་ཕྱིན་རུང་རྒྱལ་མཆོག་ཁོང་གི་དཔུང་ཡ་མི་ཕན་པའི་ཁར། བློན་པོ་རྣམས་ཀྱི་ཕྲག་དོག་དང༌། ངན་སྨྲས་མི་ཡོང་བའི་གཞི་མེད། ད་རེས་སོང་ཡང་དོན་གོ་མི་ཡོང་བསམས། འགྲོ་མ་འདོད་པ་དང༌། སྲོ་མའི་བསམ་པར་ཤན་པ་མི་འགྲོ་བ་དཔའ་བདུད་རྣམས་ཀྱིས་ངན་སྨྲས་ཡོང་བའི་དོགས་པ་ཞིག་འདུག་རུང༌། ཨ་ལན་མེད་པར་ལོག་ན་མི་ཡོང་བསམས་ནས་སྨྲས་པ། འོ་ན་ཤན་པ་དམར་པོ་ལགས། ཁྱོད་ཕོ་རབ་སྐོར་ཤེས་ཡིན་ཟེར་ན། རྒྱལ་པོའི་བཀའ་བཅག་མི་རུང༌། ཐུགས་ཁྲེལ་ན་འདི་ཕྱི་གཉིས་མེད་ཡིན། དེ་བས་རང་རེ་འགྲོགས་ནས་ཕྱིན་ན་མི་ལེགས་སམ་ཞེས་ཟེར་བར་ཤན་པའི་བསམ་པར། ད་རེ་ཞིག་སྲོ་མའི་གསུང་ལྟར་མ་སོང་ན་རྒྱལ་པོའི་ཐུགས་ལ་ཅི་འཁྲུང་ཅི་ཤེས།  རྒྱལ་པོ་ཐུགས་ཁྲེལ་ན་མི་ལེགས་སམ་བཞིན་སྲོ་མ་ལ། དོ་ནུབ་འདིར་སྡོད།  སང་སྔ་བར་རང་གི་ལས་དམག་དང་བཅས་འགྲོ་འོང་ཟེར།  སང་ཉིན་དེར་འདུ་ར་སྟག་ཐང་ཁྲ་མོར་དཔའ་རྟུལ་དེ་དྲག་རྣམས་རང་རང་གི་དཔུང་དང་བཅས་ཁྲ་ལམ་མེར་ཚོགས་འདུག་པ་དེར་ཤན་པ་དང་སྲོ་མ་བཅས་སླེབས་ཙ་ན། འདམ་མས་མཐོང་ཞིང་ཡིད་ལ་ཤན་པ་འདི་སྔར་ཕུང་ཚབས་དེ་ཙམ་བྱས། དགྲ་མི་ཤ་ཟོས་པའི་ཁ་དམར་འདི་དང་སྡེབས་ནས། ལས་ཅི་ལ་ཐུག་རུང་དམག་ལ་མི་འགྲོ་བསམས། མ་དགའ་ལོག་གེ་བསྡད་པའི་སྐབས་དེར་གདོང་ག་ནེ་གོམས་པས་རྒྱལ་པོའི་གསུང་བསྒྱུར་བ་དང༌། འཇང་ས་ཐམ་གྱི་དམག་སླེབས་ཚུལ་ངག་རྟ་དལ་བ་རིང་མེད་ལ་དྲངས་ཏེ་འདི་ལྟར་བླངས་སོ། །
གླུ་ཨ་ལ་ཐ་ལ་ལ་ལ་རེད། །ཐ་ལ་གླུ་ཡི་ལེན་ལུགས་རེད། །སྐྱབས་རྒྱལ་བ་རྒྱ་མཚོའི་ཞབས་ལ་འདུད། །སྐྱེ་མེད་ཆོས་སྐུར་གསོལ་བ་འདེབས། །འོད་གསལ་ལོངས་སྐུ་ཐུགས་རྗེས་བཟུང༌། །ཐུགས་རྗེའི་སྤྲུལ་སྐུས་བྱིན་གྱིས་རློབས། །འགགས་པའི་སྐྱོན་ཡང་བསལ་དུ་གསོལ། །བར་ཆད་མེད་པར་མཛད་དུ་གསོལ། །ས་འདི་འདུ་ར་སྟག་ཐང་རེད། །དེ་ནས་གླིང་དཀར་ལྷ་སྡེ་རྣམས། །གསན་ཟེར་ཏེ་འདྲ་མ་ཚིག་གསུམ་ཡོད། །འདི་གང་སྐྱོབ་པའི་དཔོན་པོ་དང༌། །ཕྱི་མ་འདྲེན་པའི་བླ་མ་སྟེ། །གསལ་སྒྲིབ་མེད་པའི་རྒྱལ་མཆོག་ལ། །ལྷ་གོང་མས་ལུང་བསྟན་གནང་ལེ་ལ། །འཇང་ས་ཐམ་དམག་སྣ་སླེབས་འདུག་ཟེར། །ཟས་ཀྱི་བྲོ་མཆོག་ཁྱེར་མི་ལ། །འཇང་ཕྲུག་གཡུ་ལྷ་ཐོག་འགྱུར་དང༌། །བདུད་ཆེན་རྒྱལ་བ་ཐོད་དཀར་དང༌། །འབྲུག་སྒྲའི་དཔལ་ལྡན་རྒོད་པོ་གསུམ། །ཁས་ལེན་སྔོན་ལ་ཐོན་འདུག་གསུངས། །དེ་ནས་ཚོ་ཆེན་ལྷ་སྡེ་རྣམས། །ས་ཐམ་སྐྱེ་རྒྱུས་ག་འདྲ་ཡོད། །རྫོང་བཙན་པོའི་སྐྱེ་རྒྱུས་ག་འདྲ་ཡོད། །བར་གླིང་སྐྱེ་རྒྱུས་སུ་འདྲ་ཡོད། །ཨ་ཁུ་ན་སོ་སླེབས་པ་འདི། །མི་རྒྱུད་ཆད་པའི་རྒད་བུ་རེད། །ཡིན་ཀྱང་བསམ་པའི་རྟོགས་བརྗོད་ལ། །ཕར་འགྲོའི་དམག་གི་འགྲོ་ལུགས་དང༌། །ཚུར་འོང་སྟང་མ་ངོམས་ལུགས་བཅས། །རྒད་པོའི་སེམས་ལ་ཝ་ལེ་ཡོད། །ཡང་སྒོས་གཡུ་ལྷ་ཐོག་འགྱུར་ཁོ། །མདའ་མིན་ཐོག་མིན་འཕེན་མི་ཡིན། །གཞུ་མིན་བྲག་མིན་འཐེན་མི་ཡིན། །ཐབས་ཞི་བའི་སྒོ་ནས་མ་ཐུལ་ན། །དྲག་པོའི་སྒོ་ནས་ཐུབ་ས་མེད། །གཏམ་གོ་ནི་ཨེ་བྱུང་གླིང་རུའི་སྡེ། །
ཞེས་ཟེར་བ་དང༌། སེར་པོ་ཧོར་གྱི་གྲལ་འགོ་ནས། དཔའ་བཟང་ཤན་པ་དམར་པོ་དེ། མགོ་ར་ཆེན་སྐྲ་མདུན་ཅིག་བརྒྱབ། རུ་ཆུང་རུ་སྐྲ་མདུད་ཅིག་བརྒྱབ། བྱི་རུ་རྡོ་རྗེ་མདུད་ཅིག་བརྒྱབ། ཨོག་ཚོམ་ར་ཕོ་མདུད་ཅིག་བརྒྱབ། ཝ་ཞྭ་མགོ་གཉིས་མགོ་ལ་གྱོན། དམག་འགྲོ་ལུགས་དང་གཏམ་ཤོད་པའི་གླུ་ངག་རྟ་འབྲེལ་རིང་འབྲེལ་ཐུང་ལ་དྲངས་ཏེ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ལྷ་ཡར་མཁྱེན་གནམ་ཐེལ་དཀར་པོ་མཁྱེན། །མར་མཁྱེན་ས་ཐེལ་ནག་པོ་མཁྱེན། །བར་མཁྱེན་བར་ཐེལ་ཁྲ་བོ་མཁྱེན། །ངང་ཡག་ཐེལ་མོ་སྤུན་དགུ་མཁྱེན། །ཤན་པའི་ལྕོགས་ལ་དམར་པོ་མཁྱེན། །ས་འདི་ས་ངོ་མ་ཤེས་ན། །ཡུལ་གླིང་མཐོང་བ་ཀུན་སྨོན་རེད། །ང་དང་ང་ངོ་མ་ཤེས་ན། །ཨ་ཆེན་ཧོར་གྱི་ས་ཆ་ནས། །སེར་པོ་རག་དུག་མཁར་དགུ་ནས། །མཛོ་མོ་རུ་རྫོང་ནང་བཅུད་ནས། །ཡ་ཟི་ཆགས་པའི་སྔ་མ་རེད། །གུར་སྟོང་ཤོང་ཕུབ་པའི་ཀ་བ་རེད། །གསོན་ཟེར་ལེ་དམ་ཆོས་མི་འདུག་སྟེ། །འདྲ་ཨེ་ཆགས་ཚིག་གསུམ་ཤན་པས་ཞུ། །འཇང་ཕྱི་ནང་རྒྱུས་དེ་ང་རང་ཆེ། །སྔར་དུས་ཡིན་པའི་དུས་ཚོད་ན། །འཇང་དང་ཧོར་སེར་ཉ་རིང་ཡིན། །ངོ་ཤེས་མནའ་ཤག་འབེལ་ལེ་ཡིན། །རྨུ་རྗེ་ས་ཐམ་རྒྱལ་པོ་དེ། །མི་མ་འཕྲུལ་གྱི་རྒྱལ་པོ་ཡིན། །འཇང་ཕྲུག་གཡུ་ལྷ་ཐོག་འགྱུར་དང༌། །དཔའ་ལིང་དཔའ་བོ་ཐོག་འགྱུར་བཅས། །མདའ་འཕངས་ནམ་མཁའི་ཐོག་དང་འདྲ། །གཞུ་འཐེན་ལེ་རྡོ་རྗེའི་བྲག་དང་འདྲ། །ཨོག་ཚོམ་ཐོགས་པའི་མི་གསུམ་ཡོད། །བྱུར་ལྷ་དཔོན་པོ་ཨོག་ཚོམ་ཅན། །སེ་རིག་རྒད་པོ་ཨོམ་ཚོམ་ཅན། །སྡེ་རྒན་ཨ་ཁུ་ཁ་མཁས་གསུམ། །ཁྲོས་ན་ཤི་བདུད་ངར་ཆས་ཡིན། །འགྲན་ན་དམར་ཡག་སྟག་བས་ངར། །ཡང་སྒོས་གཡུ་ལྷ་ཐོག་འགྱུར་ཁོ། །ཐབས་ཞི་བས་ཁ་བསླུས་མ་བྱུང་ན། །དྲག་པོས་ཁུལ་ནས་ཐུབ་ས་མེད། །ང་ཤན་པ་སྔོན་དུ་འགྲོ་རྒྱུ་བྱེད། །གཡུ་ལྷ་ཁ་བསླུས་དྲོངས་ངེས་བྱེད། །ལག་ལེན་སྟང་མ་ལོན་ངེས་བྱེད། །ཨེ་ཟེར་ལྟོས་ལ་མི་ཟེར་ཉོན། །གླིང་རུའི་ཐུགས་ལ་དེ་ལྟར་ཞོག །
ཅེས་ཟེར་བ་དང༌། འདན་མ་གློ་བུར་དུ་ངར་ལངས་ཏེ་སྨྲས་པ། འོ་དེ་ལྟར་བརྩོན་པའི་ཆེ་བསྟོད་དང་ཡིན་མཁས་དཔའ་འདོད་ཀྱི་གཏམ་མང་དུ་འདུག་རུང༌། དམག་ཕར་འཛིང་ལ་ཆ་རྒྱུས་དོན་ཡོད་པ་གཅིག་པུས་ཆོག་པ་མིན། སྟང་མ་འདི་བྱས་རྒོད་པོ་སུ་ཡིན་དགྲ་བོ་གདོང་ཐུག་ན་ཤེས། འཐབ་རོགས་འཛིང་རོགས་མ་ནུས་ཀྱི་དགོས་པ་ཟེར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ཚངས་པ་དཀར་པོའི་སྡེ་ཚོགས་མཆོད། །གླུ་ལེན་པ་ཚངས་པའི་དབུ་འཕང་བསྟོད། །ངག་འགུགས་པ་སྐུ་ལྷ་གཉན་ཆེན་མཆོད། །ཚིག་ཐུ་བ་ཀླུ་རྒྱལ་གཙུག་ན་མཆོད། །འདན་མའི་ཅི་བསམ་འགྲུབ་པར་ཤོག །སྟོང་དབྱེར་མེད་ཁ་ལོ་ཆོས་ལ་བསྒྱུར། །འགྲོ་དྲུག་བདེ་ལ་འཁོར་པར་ཤོག །ས་འདི་ས་ངོ་མ་ཤེས་ན། །འདུ་ར་སྟག་ཐང་ཁྲ་མོ་རེད། །ང་འདྲ་ང་ངོ་མ་ཤེས་ན། །འདན་ས་ཁྲི་གཅེས་བསམ་གྲུབ་ཡིན། །དཔའ་རྒྱ་ཚ་གླིང་ལ་བཞུགས་པའི་དུས། །སྒར་ཁྱིལ་ལེར་གྲོས་རྭ་འཛིན་ཉིན་མོ། །དང་པོ་རྒྱ་ཚས་གསུང་ཞིག་བྱོན། །འདི་གྱིས་ལས་བཀོད་འདན་མས་བྱེད། །གཏམ་ཚིག་གསུམ་ལབ་པ་ངོ་སོ་མཐོ། །གོམ་གསུམ་ཕྱིན་ཀྱང་ས་ཆོད་ཆེ། །དེང་དུས་དུས་ཀྱི་དང་པོ་ལ། །གུང་རྒྱལ་པོའི་གསུང་དེ་མ་གྲགས་པར། །སྡུག་བཙོན་པའི་ཁ་བཀོད་བཏང་ནས་བྱུང༌། །ང་འདན་མས་ཚིག་གཅིག་མ་ལབ་པར། །སྡུག་བཙོན་པའི་ཁ་བཀོད་བཏང་ནས་བྱུང༌། །ཡིན་བསམ་པའི་རྣ་བའི་ཟུར་ལ་མེད། །ས་ཐམ་འཇང་གི་རྒྱལ་པོ་ལ། །ཕོ་རྒོད་དཔའ་ཆེན་མང་གྱུར་ཀྱང༌། །འཐབ་ས་ཡོད་པ་ཀུན་ཤེས་རེད། །རྟ་རྒོད་མྱུར་མགྱོགས་ཡོད་གྱུར་ཀྱང༌། །རྒྱུགས་ས་ཡོད་པ་ཀུན་ཤེས་རེད། །ཡང་སྒོས་གཡུ་ལྷ་ཐོག་འགྱུར་ཁོ། །ང་འདན་མས་མི་ཐུབ་ཡོང་དོན་མེད། ། ང་འདན་མ་སྔོན་ལ་འགྲོ་བས་ཆོག །གཡུ་ལྷ་རྒོད་ཞན་བལྟས་ནས་ཡོང༌། །གནམ་ཡག་བང་ཁ་མྱུལ་ནས་ཡོང༌། །ཨེ་རེད་གླིང་རུས་ཐུགས་བསམ་སྐོར། །ཅེས་ཟེར་ཞིང་ངར་ལངས་པའི་སྐབས་དེར། ཤན་པས་གཏམ་ལན་གྱི་གླུ་འདི་བླངས་སོ། །
གླུ་ཨ་ལ་ཐ་ལ་ལ་ལ་རེད། །ཐ་ལ་གླུ་ཡིན་ལེན་ལུགས་རེད། །བདེ་མོའི་ངག་ལམ་འཆད་རོགས་མཛོད། །ས་འདི་ས་ངོ་མ་ཤེས་ན། །སྔར་དུས་རྐང་པས་མ་བཅག་ཀྱང༌། །ད་དུང་སྡོད་མལ་ལྷ་ལུང་རེད། །འདུ་ར་སྟག་ཐང་ཁྲ་མོ་རེད། །ང་དང་ང་ངོ་མ་ཤེས་ན། །ཧོར་དཔའ་བཟང་ཤན་པ་རྨེ་རུ་རྩེ། །སེམས་མཚར་བྱས་ཀྱང་ཤན་པ་ང༌། །སྐྱིད་ཟེར་བ་ཧབ་སྟེ་རྒོད་དོགས་མེད། །ཟ་མ་མོ་ཡི་ཡ་ཚུལ་རེད། །སྡུག་ཟེར་བ་ཤུགས་ཀྱིས་ངུ་དོགས་མེད། །སྐྱེས་པ་ཕོ་ཡི་ཡ་ཚུལ་རེད། །ང་བྱུས་ཤོར་ཧོར་གྱི་བཙོན་པ་ལ། །ཁྱོད་མའི་དཔའ་གཏམ་དགོས་པ་མེད། །ས་ཐམ་འཇང་གི་རྒྱལ་པོ་ལ། །འདན་མས་འཛིངས་ནས་ཨེ་ཐུབ་ལྟོས། །ང་ཤན་པའི་སེམས་ཀྱི་བསམ་ཚུལ་ལ། །ངར་རྒྱུས་འདན་མ་རྒོད་ཞན་འདྲ། །གཡུ་ལྷ་ཐོག་འགྱུར་མི་ཐུབ་བསམ། །བྱང་ཐང་ཡངས་མོ་ལོག་གི་མདན་མ་རྒོད་ཞན་འདྲ། །དམར་གཡང་བྲག་ལ་འགྲོ་ལེ་མིན། །འབེན་བཞག་སྟེང་གི་སྐྱེན་པོ་དེ། །སྔོན་པོའི་ཁྲབ་ལ་འགྲོ་ལེ་མིན། །གཞིས་བུད་མེད་དཀྱིལ་གྱི་གཏམ་བཟང་དེ། །བྱུས་ཆེན་ཁྲོམ་ལ་འགྲོ་ལེ་མིན། །གཉེན་བྱམས་པའི་མདུན་གྱི་ཁ་པོ་དེ། །དགྲ་ནག་པོའི་ཐོག་ཏུ་ཁུར་ལེ་མིན། །དེ་ཟེར་ཡང་ཟེར་ལ་བདེན་པར་གོ །ང་བཙོན་པའི་ཐོག་ཏུ་འགྲོ་འགྲོ་དེ། །དཔུང་ཆེན་གཡུལ་ངོ་ཨེ་བཟློག་ལྟོས། །གཏམ་དེ་ཚོ་འདན་མའི་ཡིད་ལ་ཟུངས། །
ཞེས་ཟེར་ཞིང༌། གཞན་ཡང༌འདན་མས་ཤན་པ་འདི་དང་ཕོ་སུ་རེད་ཀྱི་ཚད་གཅིག་མ་བལྟས་པར་དམག་འགྲོ་སོགས་ཡོང་ཐབས་མེད་བསམས་ཤིང༌། ཤན་པ་ལ་གཏམ་གྱི་ལན་དུ་གླུ་འདི་བླངས་སོ། །
གླུ་ཨ་ལ་ལ་ལ་ཨ་ལུ་རེད། །ཨ་ལ་ངག་གི་འགུགས་གླུ་རེད། །གླུ་རྒྱབ་རྟེན་རྒྱལ་བ་རིགས་ལྔས་མཛོད། །མདུན་བསུ་རིག་འཛིན་ཕོ་མོས་མཛོད། །གླུ་སྣ་མ་དང་མཁའ་འགྲོས་དྲོངས། །སྟོང་དབྱེར་མེད་མཁའ་འགྲོ་ཆོས་ལ་བསྒྱུར། །ཆོས་འབྱུང་དཀར་པོས་ལམ་སྣ་དྲོངས། །དེ་ནས་ང་ལ་ཉན་རྒྱུ་ལ། །ཧོར་སེར་པོའི་བཙོན་པ་དམར་རྒྱ་བ། །ཁྱེད་བདེན་རང་བདེན་ནོ་དམར་རྒྱ་བ། །ཕོ་ལ་ལས་བརྗེད་དུས་ལ་ལས་དྲན། །བྱ་ལ་ལ་འཕུར་དུས་ལ་ལ་བབས། །ང་འདན་མས་མ་བཟུང་བརྗེད་ལེ་རེད། །ཁྱོད་ཤན་པས་གསལ་འདེབས་དྲན་ལེ་རེད། །སྨ་གླིང་ཁུག་པ་སྒར་གྱིས་མནན། །རྨ་ཆུའི་ཁུག་པ་ཁྲག་ལ་བསྒྱུར། །གཡུ་སྦྲ་རེ་བས་ཤ་གདན་བྱས། །ཇ་རྫོང་སྨུག་པོའི་ཟུར་བཞི་བཀོག །གཡུ་སྒོང་སྔོན་པོ་བྲག་ལ་བརྡབ། །བཞེངས་པའི་མཁར་རྫོང་འདན་དང་བྲལ། །སྐྱེས་པའི་མི་རྣམས་གྲི་རུ་བཀུམ། །སེང་ལྕམ་འབྲུག་མོ་བཙན་འཕྲོག་བྱས། །ཆགས་མེད་དྲི་ཟའི་གྲོང་ལྟར་བཅོམ། །ཡང་སྒོས་འབུམ་པའི་ཞལ་ལུ་དཀྲོངས། །མ་བྱས་ལས་ལ་གཅིག་ཀྱང་མེད། །དེ་བྱེད་མི་གཡོ་མི་ཤན་པ་ཡིན། །ཚེས་བཅོ་ལྔའི་ཟླ་བ་ཤར་བའི་ཚེ། །རྒྱ་ཚའི་ཞལ་རས་དྲན་ཐེངས་རེ། །དྲན་ཐེབས་རེ་ལ་མཆི་མས་གནོང༌། །ཁྱོད་དང་ང་གཉིས་རྩེད་མོ་རྩེ། །ཁྱོད་ཤི་ན་འགྱོད་པ་མཚར་ལེ་ཡོད། །ང་སེང་ཆེན་རྒྱལ་པོའི་ཆོས་བློནཡིན། །ང་ནི་ཤི་ཡང་འགྱོད་པ་མེད། །བྱས་ཆེ་ན་རིན་ཆེན་སྲོག་ལ་བབས། །གཏམ་ཟེར་ཡང་ཟེར་དེ་བདེན་པ་རེད། །དཔའ་རྒྱ་ཚའི་ཞལ་རས་མ་དབང་པའི། །གོང་དཔོན་པོས་མགོ་འདྲེན་ཡོང་སྙམ་མེད། །ང་མི་རྒན་ཡིད་ལ་སེམས་རླུང་འཁྲུགས། །ད་ཐོན་ཤོག་ཐོན་ཤོག་དམར་རྒྱ་བ། །
ཞེས་ཟེར་ཞིང་ངར་བའི་སྐབས་སུ། སྲས་དགྲ་ལྷ་རྩེ་རྒྱལ་དེ་ལ་འདན་མའི་ཚིག་གིས་རྐྱེན་བྱས་ནས་ཡབ་ཞལ་ལུ་ཐུགས་ལ་འཕྲེང་ཞིང༌། གློ་བུར་དུ་ཐུགས་ཁྲོས་དེ་སྨྲས་པ།
སྭོ་སྭོ་སྭོ། གླུ་ཨ་ལ་ལ་ལ་ཐ་ལུ་རེད། །ཨ་ལ་ངག་གི་འགུགས་གླུ་རེད། །སྐྱབས་དཀོན་མཆོག་གསུམ་ལ་གསོལ་བ་འདེབས། །ས་འདི་ས་ངོ་མ་ཤེས་ན། །སྨ་ཡུལ་གླིང་གི་ས་ཆ་རེད། །ང་དང་ང་ངོ་མ་ཤེས་ན། །འབུམ་པའི་དགྲ་ལྷ་རྩེ་རྒྱལ་ཡིན། །མིང་ཆེ་བ་དགུང་དུ་དྲག་ཞན་འདྲ། །དོན་རྣོ་ངར་ཕ་མེད་དྭ་ཕྲུག་རེད། །དྲིན་ཕ་མ་མེད་པའི་བུ་ཕྲུག་ནི། །གཏམ་ཚིག་གསུམ་ལབ་ཀྱང་ཚིག་འཕང་དམའ། །གོམ་གསུམ་འགྲོ་ཡང་ས་ཆོད་ཆུང༌། །རང་ལས་ཞན་པས་ཕག་ན་འཕྱང༌། །འཁོར་རྟེན་མེད་པའི་རླུང་དང་འདྲ། །མཁོ་བའི་ཚིག་བཟང་སུ་ཡིས་སློབ། །གཏམ་སྙན་པ་ཤོད་མཁན་སུ་ཡང་མེད། །མི་དགོས་ངན་ཚིག་ཀུན་གྱིས་སྟོན། །དཔའ་ཞལ་ལུའི་དགྲ་ཤ་མ་ལོན་པའི། །དགྲ་སྟག་ལྤགས་མགོ་ནས་མ་ཐུལ་ན། །དེ་ཡིན་འབུམ་པའི་དགྲ་ལྷ་ང༌། །རྫོང་འབུམ་ཆུང་ནང་དུ་རྒས་ན་ཕངས། །གཏམ་གོ་ནི་ཨེ་བྱུང་གླིང་རུའི་སྡེ། །
ཞེས་གསུངས་ཤིང་ཤན་པ་ལ་ཐུགས་ཁྲོས་པའི་ངང་ནས་གླུ་དེ་ལྟར་བླངས་པས། དེའི་རྒྱབ་དཔའ་མོ་ཨ་སྟག་ཀླུ་མོས་སྨྲས་པ། འོ་ན་གླིང་དཀར་དཔའ་རྟུལ་དང་སྲས་དགྲ་ལྷ་བཅས་གསོན། ཡང་སྒོས་ཧོར་ཤན་པ་ཉོན་དང༌། གླིང་ཚོ་ཆེན་ལྷ་སྡེའི་བྱུས་ཀྱི་འགྱུར་ཚོད་བྱུས་བཙོན་པ་ལ་མ་བབས། ཁ་བདེ་བས་མི་ཚེ་འཁྱོལ་བ་མིན། དོན་དམ་པའི་དཔའ་གཏམ་ཡིན་ན། ཨེ་ཡག་ཁྱེད་རང་བསམ་བློ་བསྐོར་འཐབ་ཡ་དཔའ་མོ་ངས་ཀྱང་ཡོང་ཟེར་བའི་སྐབས་དེར། འཛམ་གླིང་སེང་ཆེན་རྒྱལ་པོས། ཚོ་ཆེན་ལྷ་སྡེ་དཀར་པོ་དང༌། ཡང་སྒོས་སྲས་དགྲ་ལྷ་འདན་མ་བྱང་ཁྲ་བཅས་ཉོན། ང་འགོག་ཚ་གླིང་གི་ཇོ་རུ་དགྲ་ལན་མེད་དུ་གཏོང་བའི་མི་ཞིག་མིན། ཧོར་ཤན་པ་འདི་གོང་མ་ལྷ་ནས་ཡོང་སྐབས་སྨོན་ལམ་འདེབས་ཚུལ་གྱིས་སྐྱེ་ས་ལོག་པ་མ་གཏོགས༌དོན་དུ་ཕུ་ནུ་དང་ཁྱད་མེད་པས། བསད་ན་སྤྱི་ཆོས་གླིང་ལ་གཏམ་ངན་པའི་གཞི་ཡིན། ཡང་སྒོས་སྨུག་པོ་གདོང་ལ་མི་ལེགས་པའི་གཞི་ཡིན། རྒྱུ་མཚན་ཡོད་པས་ཉོན་ཅིག་གསུངས་ནས་གླུ་འདི་བླངས་སོ། །
གླུ་ཐ་ལ་ཐ་ལ་ཐ་ལ་རེད། །གླུ་ཨ་ལ་ངག་གི་འགུགས་གླུ་རེད། །ས་འདི་ས་ངོ་མ་ཤེས་ན། །འདུ་ར་སྟག་ཐང་ཁྲ་མོ་རེད། །ང་དང་ང་ངོ་མ་ཤེས་ན། །སྨར་ཁམས་གླིང་གི་ས་ཆ་ནས། །ཇོ་རུ་ཕྱོགས་བཞིའིདགྲ་འདུལ་རེད། །ང་ཇོ་རུའི་དགྲ་ལ་ཐུལ་དུས་མེད། །འཇང་ས་ཐམ་ཕར་དམག་སླེབས་འདུག་ཟེར། །ཟས་ཀྱི་བྲོ་མཆོག་ཁྱེར་འདུག་ཟེར། །ཕུ་ནུ་སྟག་གཟིག་ཁ་སྤྲོད་ལ། །བསམ་པ་མི་གཅིག་ཡོང་དོགས་མེད། །ཡང་སྒོས་འདི་ལོའི་ཕར་དམག་འདི། །ལེགས་ན་ཕུག་བདེ་འཕྲལ་སྐྱིད་རེད། །བློ་སེམས་འདུན་མ་འགྲུབ་ལེ་རེད། །ནམ་མཁའ་དབུ་བྱས་ས་གཞི་ལ། །ཧོར་ཤན་པ་མེད་ན་མེད་ཐབས་མེད། །ཤན་པ་སྔོན་ལ་འགྲོ་དགོས་ཡོད། །ནེ་ནེས་ང་ལ་ལུང་བསྟན་ཡིན། །དེ་ཚོ་གླིང་གི་ཡིད་ལ་ཟུངས། །ཞེས་གསུངས། དེ་ནས་ད་དུང་།
ཁྱོད་འདན་མ་མ་སྡོད་རྟ་སྒ་སྒྲོན། །དམག་ཡ་གིའི་འགྲམ་ལ་ཕར་ཕར་རྒྱུགས། །དཔའ་རྒྱ་ཚའི་ཞལ་རས་མཇལ་ནས་ཡོང༌། །ལས་སྐྱིད་སྡུག་གཏམ་གཅིག་ཡོང་ངེས་ཡིན། །ཧོར་སྡིག་སྤྱོད་ཤན་པ་རྨེ་རུ་རྩེ། །ཡིན་རིག་གཏམ་ཞིག་ཡོང་ངེས་ཡིན། །དེ་ནས་གླིང་དཀར་དཔའ་རྟུལ་རྣམས། །བྱུས་ཕྱི་ནང་ལག་ལེན་བྱེད་མི་རྣམས། །དམག་ཁྲ་བོ་སྒར་གྲ་སྒྲིག་གྲབས་གྱིས། །ལོ་གསུམ་བདུད་བློན་བཙོན་ལ་བཟུང༌། །དགུང་ཉི་ཟླ་མི་མཐོང་ཁྱིམ་ལ་ཆུག། །ཁྱོད་རང་བྱས་རང་གི་སྟེང་དུ་ཡོང༌། །སེམས་དགའ་རུ་བསམ་མམ་སྡུག་ཏུ་བསམ། །ད་མ་སྡོད་ཤེད་ཆེན་བུ་གཉིས་ལོངས། །ཁྲ་ཧོར་པས་བྱིལ་ཆུང་བཟུང་འདྲ་གྱིས། །གཏམ་གོ་ནི་ཨེ་བྱུང་གླིང་རུའི་སྡེ། །
ཞེས་གསུངས་པས་གླིང་རྒན་མི་རྣམས་དགའ་དྲག་ནས་ཕྱག་འཚལ་བ་སོགས་བྱས། ཁྲོ་ཐུང་ཁ་སྐྱེངས་ནས་རེ་ཞིག་ཐོམ་མེར་ལུས། དེ་ནས་བསམ་བློ་ཞིག་ལ་གླིང་མི་གཞན་རྣམས་ནི་རྟ་སྒ་སྤྲོད་པ་མི་འདུག །ངས་སྔོན་ལ་སོང་ནས་སྒར་ཡ་གིའི་གཏམ་བཟང་ངན། ལྷག་པར་རྒྱ་ཚ་སྐུ་དངོས་ཡོད་ན་འདན་མའི་ཞོར་བཏེགས་པའི་གཏམ་ཞིག་དམོས་བསམ་འཕྲལ་དུ་སོང་ཞིང་ལྷ་སྒར་ལ་ཤར་རྒྱག་འགྲོ་རྩིས་ལ། ལྷ་རྣམས་ཀྱིས་ནང་དུ་ཕྱིན་མི་ལྡོག་པ་དང་གཟུགས་བཟང་བ་ཡོད་པའི་སྟབས་ཀྱིས་ཉེ་བར་འགྲོ་མ་ཕོད་ཅིང་རྒྱང་ནས་མཇལ་དར་ཕུལ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་ངག་གི་འགུགས་གླུ་རེད། །གླུ་ལེན་པ་དགུང་སྔོན་དབྱངས་སུ་ལེན། །ངག་འགུག་པ་གཡུ་འབྲུག་སྐད་དུ་ལེན། །ཚིག་འཐུ་བ་རྒྱ་མཚོའི་གླིང་ལ་འཐུ། །ཀ་ལའི་ལྷ་ཐང་གཡས་ཟུར་རེད། །སྒར་འདི་ལྷ་སྒར་རྔམ་ཟིལ་ཅན། །ལས་སྨོན་དག་པའི་མཇལ་ལུགས་ལ། །ང་དཔོན་པོ་ཁྲོ་ཐུང་སྐལ་ངོ་ལ། །དར་དཀར་སེར་སྔོན་པོ་ཡུག་མཐུད་དགུ། །ཁྱེད་ལྷ་དམག་དཀར་པོའི་མཇལ་རྟེན་མཛོད། །དེ་ནས་མོས་པའི་ཞུ་བ་ཡོད། །མ་ཡེངས་སྙན་གྱི་དབང་པོ་གཏོད། །ཕོ་སྐྱེ་ལུས་ཐོབ་པའི་ཡང་རྩེ་ལ། །མ་བཞི་དཔོན་པོ་ཁྲོ་ཐུང་ལ། །འདི་ལོ་དམག་ལ་འགྲོ་ལེ་ལ། །མི་ལ་དཔའ་བའི་སྲོག་ཁེབ་ཞུ། །མཚོན་ལ་རྣོ་བའི་ངར་ཆུ་བླུད། །ལས་ཅི་བསམ་འགྲུབ་པའི་སྡོང་གྲོགས་མཛོད། །སྨར་ཁམས་གླིང་གི་ས་ཆ་རུ། །ཟོག་ནོར་བུ༌ཆུ་སྲིན་གྲེ་བའི་བཅུད། །ངར་ཚེར་མ་ཙནྡན་ཤིང་གི་སྡོང༌། །གླིང་གེ་སར་འཛམ་གླིང་བོད་ཀྱི་ལྷ། །འདི་མིན་པ་ཡུལ་ཁམས་གཞན་དག་ན། །ཡོད་བསམ་པ་སེམས་པའི་ཟུར་ལ་མེད། །ཡིན་ཀྱང་འདི་ལོའི་གྲོས་འཛིན་ལ། །གུང་དཔོན་པོའི་བཀའ་བཀྱོན་བློན་ལ་བབས། །དོན་བདེ་མོའི་ངག་ལ་མཁོ་ངེས༌པའི། །སེམས་ཤེས་བྱའི་སྐྱ་རེངས་མ་ཤར་ན། །བློ་མུན་དུ་འཁྲིགས་ནུས་མི་ཤེས་འདུག། །སྒོས་ཞལ་ལུ་ཧོར་གྱིས་དཀྲོངས་ལེ་དེ། །ལུས་འདོམ་གང་ཧོར་གླིང་ས་ཆ་རུ། །གནས་ས་ཕུང་བཞིན་དུ་གཏོར་ཞན་འདྲ། །སེམས་གོང་དཀར་ཆོས་ཉིད་རང་མདངས་དེ། །སྟེང་དག་པ་ལྷ་རུ་བཞུགས་ཡོད་ཟེར། །དེ་ཡོད་ན་ཞལ་མཇལ་ཨེ་འོང་ལགས། །ཚིག་འབྲས་བུའི་གནས་ལུགས་མི་ཤེས་ཀྱང༌། །བདེན་ངེས་པའི་གཏམ་ཞིག་ཞུ་དགོས་བསམ། །གླིང་འདན་མའི་སྐྱིད་སྡུག་བཤད་དགོས་བསམ། །དོན་འབྲས་མེད་ཡོང་ལུགས་དེ་ལྟར་ཡིན། །རྐྱེན་ཕྱི་ནང་བར་ཆད་སེལ་བར་ཤོག། །
ཅེས་ཟེར་ཕྱག་འཚལ་ནས་ཡུད་ཙམ་དེ་གར་གནས། ངག་ཟུར་གྲུབ་པའི་ལན་ཚིག་འབྲས་ཐོས་པ་ཙམ་མ་བྱུང༌། བར་དེར་དཔའ་རྟུལ་གཞན་རྣམས་ཀྱང་ལྷ་སྒར་ལ་ཡ་མཚན་དང་མོས་པའི་སྒོ་ནས་ཐམས་ཅད་དགའ་སྤྲོ་དཔག་མེད་ཐོབ། འདན་མ་ངེས་པར་རྒྱ་ཚ་དངོས་དང་མཇལ་ཨེ་ཡོང་བསམ་དགའ་སྐྱིད་ཟུང་འབྲེལ་སྒོ་ནས་ཕར་ཙམ་སོང་བས། ཤར་ཕྱོགས་ཀྱི་ནམ་མཁའ་ལ་སྤྲིན་ཁ་དོག་སྣ་ཚོགས་འཇའ་ཡི་ཕུང་ལྟར་གསེར་དངུལ་དང་སྤུག་དང་ཟངས་མའི་མདངས་བཞི་ལྡན་དུ་འཚར་བས་མེ་ཏོག་འདབ་མ་ལྔ་པར་ཆར་ཆེན་བབས་ཤིང༌། དེའི་ཚེ་སྤྲིན་གྱི་དབུས་སུ་སྤྲིན་དཀར་གྱི་ཕུང་པོ་མཆོད་རྟེན་གྱི་དབྱིངས་ལྟ་བུ་དེའི་དཀྱིལ་དུ་རྒྱ་ཚའི་སྐུ་དངོས་འདྲ་བ་ཕྱེད་ཙམ་མཐོང་ཞིང༌། གཞུ་རིས་ཀྱི་དབྱིབས་ལྟ་བུའི་ན་བཟའ་བཅས། ཞལ་རས་ཉ་རྒྱས་དུང་ཟླ་ལྟ་བུར་འཛུམ་ཞིང༌། འདན་མ་ལ་ཅེ་རེར་གཟིགས་ནས། འདན་མ་ཡང་རྒྱ་ཚ་མཇལ་བའི་དགའ་སྤྲོ་དཔག་མེད་ཐོབ་ཅིང་ཕྱག་གྱང་འགྱེལ་བ་ལྟར་འཚལ་སྐབས་དེར། རྒྱ་ཚས་འདན་མ་ལ་ཞལ་གཏམ་སྡུག་བསྔལ་རང་གྲོལ་ངག་རྟ་ལྷའི་བསིལ་སྙན་ལ་དྲངས་པ་འདི་གསུངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །སྐྱབས་ཆོས་སྐུའི་སངས་རྒྱས་ཀུན་ཏུ་བཟང༌། །ལོངས་སྐུ་བདེ་གཤེགས་རིགས་ལྔ་དང༌། །སྤྲུལ་སྐུ་རིགས་གསུམ་མགོན་པོ་བཅས། །ཐུགས་བརྩེ་བས་འགྲོ་བ་ཡོངས་ལ་གཟིགས། །སེམས་དཀར་པོ་ཆོས་ཀྱི་ཞིང་ས་རུ། །གསོལ་འདེབས་གཡུ་འབྲུག་ཁ་ནས་ལྡིར། །བྱིན་རླབས་ཆར་པ་བབས་པར་ཤོག། །དེ་ནས་ང་ལ་ཉན་རྒྱུ་ལ། །ས་འདི་ས་ངོ་མ་ཤེས་ན། །སྨར་ཁམས་གླིང་གི་ས་ཆ་རེད། །ཡུལ་ལུང་མཐོང་སྨོན་རྒྱང་གྲགས་རེད། །ང་དང་ང་ངོ་མ་ཤེས་ན། །དགུང་སྔོན་འཇའ་ཡི་གུར་ཁྱིམ་འདིར། །སྐད་ལྷང་ལྷང་སྒྲོག་པའི་ཆོས་ཚིག་ཅན། །སྔར་དུས་འབུམ་པའི་རྒྱ་ཚ་རེད། །ད་དུས་ལྷ་ཕྲུག་གཞོན་ནུ་རེད། །དུས་དེ་རིང་ས་གཞི་བསྲ་བརྟན་སྟེང༌། །ལྷ་མར་མེ་མཛད་ཀྱི་རྗེས་འཇུག་ལ། །ཐབས་ཤེས་རབ་འཕྲུལ་གྱི་མེ་ལོང་ཅན། །དོན་འགྱུར་མེད་འདན་མ་བྱང་ཁྲ་ཁྱོད། །ལས་སྒྱུ་མའི་འཁྲུལ་སྣང་བྱེད་མི་ལ། །ངེས་དོན་གོ་ན་བརྡ་གཅིག་ཡོད། །མ་ཡེངས་རྣ་བའི་དབང་པོ་གཏོད། །ཅི་སྣང་སེམས་ཀྱི་ཆོ་འཕྲུལ་ལ། །སྐྱིད་སྡུག་སྐྱོ་ཤས་ཡིད་མུག་སོགས། །བར་སྣང་སྟོང་པའི་འཇའ་དང་འདྲ། །བདེན་འཛིན་གྲུབ་པ་ལར་གྱིས་མེད། །ཁྱོད་འདན་མ་བློ་སེམས་ངར་མི་དགོས། །ཡང་སྒོས་འཛམ་གླིང་སེང་ཆེན་དེ། །སངས་རྒྱས་བཀའ་ཡིས་མངགས་ལེ་རེད། །ཐར་ལམ་སྟོན་པའི་བླ་མ་འདྲ། །དམ་ཚིག་མ་ལགས་ཅི་གསུངས་སྒྲུབས། །ཚངས་པའི་ལུང་ན་གྲགས་ལེ་ལ། །དགྲ་འདུལ་དཔའ་བོ་གཟུགས་སུ་གྲུབ། །སངས་རྒྱས་བསྟན་པའི་སྲོག་ཤིང་འཛུགས། །ངག་འཁྱལ་ཐུགས་འཁྲུལ་ཡོད་མི་སྲིད། །གསུང་ལ་གྱེན་ལྡོག་ཞུ་མི་འཚལ། །རང་སེམས་རྩ་བ་མ་རྟོགས་ན། །ང་རྒྱལ་དྲག་པོས་དགོངས་པ་འཁྲུག། །འདི་ཕྱིའི་བདེ་བ་ག་ལ་འགྲུབ། །ཕྱི་མ་འབྲས་བུ་དམྱལ་བ་སྤྱོད། །དཀོན་མཆོག་རིན་ཆེན་རྣམས་གསུམ་ལ། །མི་བདེན་མ་སྙམ་བློ་སེམས་གཏོད། །སངས་རྒྱས་ཆོས་ལ་ཡིད་གཉིས་སྤོངས། །རྒྱུ་འབྲས་གཉིས་ལ་ཐེ་ཚོམ་སྤོངས། །རྒྱ་ཚ་གླིང་ལ་ཡོད་དང་མཚུངས། །རྒྱ་ཚ་ང་ཉིད་དྲན་པའི་དུས། །འབྲལ་མེད་སྙིང་ནས་གསོལ་བ་ཐོབ། །བྱིན་རླབས་ཉེ་རིང་མེད་པར་ཡོང༌། །རྒྱ་ལ་ཤན་པ་བསད་ཟེར་ན། །གླིང་རུ་རྨེ་མིང་ཐོག་རྒྱུ་རེད། །ཕྱི་རེས་གངས་པ་བོད་ལ་གནོད། །དེ་བས་འདན་མ་བསམ་བློ་སྐོར། །འདན་མའི་འཐབ་རོགས་ཡོང་ངེས་ཡིན། །དོན་དེ་འདན་མའི་རྣ་བར་ཟུངས། །
ཞེས་གསུངས་པས། འདན་མའི་བསམ་པར་རྒྱ་ཚ་དངོས་ཀྱི་གསུང་ཡིན་འདུག་རུང་ཤན་པ་ངེད་གཉིས་ཡུན་རིང་པོ་བློ་གཅིག་ཐབས་མེད་ཀྱང༌། ད་ལན་མི་བྱེད་ཐབས་མེད་ཡིན་སྙམ། དེ་ནས་གླིང་དམག་རྣམས་ཀྱི་ཉིན་ལམ་གཅིག་གི་ས་ནས་ཧོར་ཤན་པ་སྔོན་ལ་བརྫངས་ཤིང་འཇང་དམག་རྣམས་སྒར་གྲ་སྒྲིག་པའི་ཐོག་ཏུ་སླེབས་ཅིང༌། འཇང་མི་རྣམས་ཀྱི་མཐོང་བས་བྱང་ཤར་མཚམས་ནས་ཐལ་བ་འཕྱུར་ཞིང་མི་དམར་རྟ་དམར་གཡབ་ལེ། །གསེར་ཁྲབ་སེར་རྨོག་གྱོན་པ། །འཁོར་གསུམ་སྤྲིན་རྨོག་འཁྲིགས་ས། །མདུང་དམར་མེ་ལྕེ་མཆེད་འདྲ་ཁུར་བ་ཞིག་ཐེ་ཚོམ་མེད་པར་བསླེབས་བྱུང་བས། །ལ་མོ་གཡུ་ལྷ་ཐོག་འགྱུར་དེ་གནམ་ཡག་སྔོན་པོ་ལ་ཆིབས། །བྱང་བུ་ལྷ་རྒྱུན་ལུས་ལ་གྱོན། །ནོར་ནུ་རྩེ་གསུམ་མགོ་ལ་གྱོན། །འཁོར་གསུམ་བསྐོར་རྒྱང་ངེར་ཐོན་ནས་མདའ་མགོ་འཕུར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་ལ་གླུ་ཡི་ལེན་ལུགས་རེད། །ལྷ་ཡར་མཁྱེན་གནམ་ཐེལ་དཀར་པོ་མཁྱེན། །བར་མཁྱེན་བར་ཐེལ་ཁྲ་བོ་མཁྱེན། །མར་མཁྱེན་ས་ཐེལ་ནག་པོ་མཁྱེན། །མཁྱེན་གཟིགས་དཔའ་བོའི་སྡོང་གྲོགས་མཛོད། །ཨ་ཀྱང་མཚར་གྱི་ཆེ་བ་ལ། །མི་མེད་ཡུལ་ལ་མི་ཞིག་བྱུང༌། །མ་ཤི་ཁ་འཁྱར་གང་འདྲ་ཡིན། །རྟ་མེད་ཡུལ་ལ་རྟ་ཅིག་བྱུང༌། །རྟ་ཤི་རྟིལ་ཐོར་གང་འདྲ་ཡིན། །མགོ་འཁོར་མི་ཡི་ཡོང་ལུགས་ལ། །ཞམ་ཆེན་པ་ཞིག་ངེས་ཀྱི་གྱོན། །རྐུན་མ་ཡིན་ན་ཧམ་པ་ཆེ། །ཇག་པ་ཡིན་ན་དཔུང་རེ་ཉུང༌། །སྡིག་པའི་ན་བུན་ཐུ་ལུ་ལུ། །ས་གང་གི་ཕྱོགས་ནས་ཡོང་ལེ་ཡིན། །ལམ་སྐྱ་རིང་བརྒྱུད་ནས་ག་རུ་འགྲོ། །ཕ་ས་མ་འཁུར་གང་འདྲ་ཡོད། །གཉེན་དང་ཉེ་བ་གང་འདྲ་ཡོད། །མགོ་འཛིན་དཔོན་པོ་གང་འདྲ་ཡིན། །རྒྱབ་ལ་ཕར་དཔུང་གང་འདྲ་ཡོད། །མི་ཡོང་ཁ་མེད་སུ་ཡིས་དེད། ཁྱོད་དེ་རིང་གསོན་རེས་འཁོར་ལེ་རེད། །
ཅེས་ཟེར་ཞིང་མདའ་འདོན་ཚད་པའི་སྐབས་དེར། ཤན་པས་སྨྲསཔ། ཁོ་རེ་སྔོན་པོ་གཡབ། ཁྱོད་ཀྱི་མདའ་ལ་བསྲིང་ལོང་ཡོང༌། ལྷོད་ཙམ་གྱིས་ལ་ངའི་གླུ་འདི་ཉོན་ཟེར་ཞིང་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ས་འདི་ས་ངོ་མ་ཤེས་ན། །བྱང་ལ་སྐྱ་མོའི་གཡས་ཟུར་རེད། །ང་དང་ང་ངོ་མ་ཤེས་ན། །ཡིན་རྒྱུ་ཅན་གྱི་མི་ཞིག་ཡིན། །ཁུང་དང་ཉེ་བ་ལོས་ཀྱང་ཡོད། །རང་རྒྱུད་ཤེས་པ་བཀྲ་ལེ་ཡིན། །འ་ཆེན་ཧོར་གྱི་ས་ཆ་ལ། །རྒྱལ་པོ་མཆེད་གསུམ་གྱིང་ཡ་ཡིན། །མ་ཡིན་ཟེར་ཀྱང་ཤན་པ་ཡིན། །ཐིང་ཤིང་རྒྱལ་གྱི་བུ་སྐལ་ཁྱོད། །ཨ་ཁ་མི་ཡི་མཚར་ལུགས་ལ། །རྐང་པས་ཡོས་དཀར་བྲེལ་ལུགས་དང༌། །ལག་གྱི་ཆོག་དཀར་རྒྱང་ལུགས་ལ། །རྡོ་ཐུང་ང་རྒྱལ་ཆེ་ལུགས་ལ། །དེ་འདྲ་ལར་གྱི་དགོས་དོགས་མེད། །བསམ་བློ་ལེགས་པར་བཏང་ནས་སུ། །ཚིག་གསུམ་གྲབ་ལེན་མ་བྱས་ན། །དགྲ་གཉེན་ཤན་ཞིག་འབྱེད་ལུགས་མེད། །གོམ་གསུམ་གོམ་གཅིག་མ་སོང་ན། །སྒོ་ཐེམ་ལ་མོ་ཐེབས་དོགས་མེད། །ཁྲ་ཆུང་མིག་གིས་མ་བལྟས་ན། །ས་གནམ་གྱེད་གོ་ཤེས་དོགས་མེད། །ང་ཡོང་ལེ་ཡོང་ལུགས་བཤད་པས་ན། །ཁ་སང་ཉི་མའི་ཡར་སྟེང་ལ། །གུར་གཡང་གནམ་གྱི་རྒྱལ་པོ་དེ། །གསུང་ཞལ་ལྟའི་ཟུར་ནས་འདི་འདྲ་བྱུང༌། །ས་ཐམ་འཇང་གི་ཕར་དམག་དེ། །ཟས་བཅུད་ལེན་དུ་འགྲོ་འདུག་ཟེར། །དམག་དཔོན་གཡུ་ལྷ་ཐོག་འགྱུར་གྱིས། །རུ་སྣེ་ཁས་ལེན་བྱས་འདུག་ཟེར། །ཤན་པ་མ་སྡོད་སོང་ཞིག་གསུངས། །འཇང་ཕྲུག་གཡུ་ལྷ་ཐོག་འགྱུར་དང༌། །སྟེང་མ་ལྷ་ནས་དམ་ཚིག་གཅིག །ཚངས་པ་དཀར་པོའི་སྲས་སྐལ་དུ། །མེ་ཏོག་འདབ་མ་གཅིག་ལ་ཐུག །མཐུན་སེམས་འདུན་མ་ཆིག་སྒྲིལ་གྱིས། །མི་འགྱུར་གཏམ་གཅིག་ཞོག་ཤོག་གསུངས། །དེས་ན་འགོག་མོའི་ཇོ་རུ་ཁོས། །ཕུང་བཤིག་སྟ་གྲི་ཀུན་ལ་བྱས། །བཀྲ་ལག་ཟེར་མ་རླུང་ལྟར་བྲན། །རྒྱ་ཚ་ཞལ་དཀར་མགོ་བྱས་པའི། །རྒོད་པོ་འགའ་རེ་ཧོར་གྱིས་བསད། །སེང་ལྕམ་འབྲུག་མོས་གཙོ་བྱས་པའི། །མཛངས་མ་འགའ་རེ་ཧོར་གྱིས་ཁྲིད། །དེང་སང་དུས་ཀྱི་ཁུག་སོ་ལ། །འགོག་ཚའི་བུ་སྡུག་ཇོ་རུ་ཁོས། །ནག་པོ་བདུད་ལ་ཐོད་མདའ་སྤྲད། །བདུད་སྡེ་དཀར་ནག་ཆོས་ལ་བསྒྱུར། །ཤ་ཟ་བདུད་ཀྱི་དམག་དང་སྡེབས། །དེང་སང་ཧོར་ལ་ཡོང་རྒྱུ་ཟེར། །འཇང་ས་ཐམ་དམག་རོགས་སླེབས་པའི་དུས། །ཇ་འདྲེན་ཆང་གུས་བྱེད་མི་ཡིན། །སྐོར་ན་སེམས་ཆུང་ཚང་ལེ་རེད། །མ་བཞུགས་གཡུ་ལྷ་ཕེབས་གྲབས་གྱིས། །འ་ཆེན་གུར་དཀར་སྐུ་ཞབས་སུ། །ཇ་ཆང་ལོངས་སྤྱོད་སྐྱེམས་ཞུ་བྱེད། །རྟ་མཛོ་དར་གྱི་འབུལ་བ་བྱེད། །དེ་ནས་དཔུང་རྒོད་མཉམ་སྒྲིག་གྱིས། །གླིང་དཀར་སེར་བས་བཅོམ་འདྲ་བཟོ། །གཏམ་དེ་ཚོ་ཡན་ལ་ལབ་རྒྱུ་མེད། །
ཅེས་ཟེར་ཅིང་ལྷོད་ཀྱི་སྡད་པས། གཡུ་ལྷའི་སེམས་ལ་མི་འདིའི་ཟེར་ལུགས་ལ་མགོ་གཡོག་ཞིག་ཡིན་ནམ་བསམས་ཀྱང་གང་ཟེར་བལྟ་བའི་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ས་འདི་ས་ངོ་མ་ཤེས་ན། །བྱང་ལ་སྐྱ་མོ་གཡས་ཟུར་རེད། །ང་དང་ང་ངོ་མ་ཤེས་ན། །ས་ཐམ་འཇང་གྱི་ས་ཆ་ལ། །འཇང་ཕྲུག་གཡུ་ལྷ་ཐོག་འགྱུར་ཟེར། །ས་ཐམ་རྒྱལ་པོའི་བཀའ་བློན་ལ། །སྡེ་ཁྲ་བོ་ཁྲ་ཤོག་སྣ་འདྲེན་ཡིན། །ཡིན་ལུགས་བཤད་ན་དེ་ལྟར་ཡིན། །དེ་ནས་ཧོར་ཕྲུག་དམར་པོ་ཁྱོད། །གཏམ་ཕུག་མེད་རྫུན་གཏམ་ཁ་ཤོར་འདུག །ཁྱོད་ཧོར་སེར་གུར་དཀར་རྒྱལ་པོ་དེ། །སྔར་གཏམ་ཡིན་ནམ་ད་ཡོད་ཡིན། །ཁྲ་མ་འཆོལ་ལ་ཡིད་མ་ཆེས། །ཐག་རིང་རྣ་བའི་གོ་ཆོད་ལ། །དམར་པོ་མེ་ཡི་ཚ་ངད་དེ། །ཟིལ་པ་རླུང་གྱི་འཇོམས་འདུག་ཟེར། །མང་པོ་གཏམ་ལོང་ང་ལ་མེད། །ཐུ་རུ་སྙིང་མེད་ཚེར་མགོ་ལ། །དམར་ཡག་ཉན་པ་བཅོལ་རེ་ཆུང༌། །རྡ་ལི་ངར་སྐད་ཤོར་བ་ལ། །གཟིག་ཐིག་ལེ་ཉན་པ་རྒོད་རེ་བྲོ། །ཁྱོད་ཙམ་ཚིག་གི་བཤད་བཤད་ལ། །གཡུ་ལྷས་བདེན་འཛིན་ཨ་རེ་མཚར། །མི་དགོས་གཏམ་འདི་ཞོག་ལ་ཐོངས། །ས་ཐམ་མི་ཧྲག་རྟ་ཧྲག་ལ། །ཝ་ཕྲུག་དཔུང་རོགས་དགོས་ལེ་མིན། །དེ་གོ་ན་གོང་དཀར་དཀྱིལ་དུ་ཞོག །དེ་རིང་ཉི་མའི་གདོང་གང་ལ། །ཕར་ལ་གོམ་གང་བཏང་དོགས་མེད། །བཏང་ན་གཡུ་ལྷ་ཡིན་དོགས་མེད། །ཧོར་ཕྲུག་ཤོར་ན་བྱུས་ཤོར་རེད། །
ཧོར་ཕྲུག་ཟིན་ན་བྱུས་ཟིན་རེད། །དམར་པོ་བཙུགས་པ་བྲག་གི་འཕེན། །གཡུ་ལྷ་མ་འཕང་ཐོག་གྱི་འདའ། །སྡིག་དང་སྲོག་གི་སྒྲེལ་ལུགས་ལ། །ཁྱོད་དགའ་རུ་བསམ་མམ་སྡུག་གོ་བསམ། །
ཞེས་ཟེར་ཞིང་སྔོན་ལས་ཀྱང་ངར་ཆེར་སོང་ཞིང༌། ཤན་པའི་བསམ་པར་མདའ་སོགས་འཕང་པ་ན་ཐོག་དང་དབྱེར་མ་མཆིས་པས་དགོས་པ་མེད་བསམ་སྨྲས་པ། ཁོ་རེ་གཡུ་ལྷ་ཐོག་འགྱུར། ས་ཕྱོགས་གང་སྐད་ཀྱིས་དྲིས་ན་ཤེས། བདེ་མོ་གཏམ་གྱི་ཡིན་ལུགས་འཆད་ལོང་མེད་པ་ངང་ཐུང་བྱས་ན་ཨེ་ཡག ང་ཤན་པ་དམར་པོ་ལ་ཡ་ཟི་དཔོན་གྱིས་ཁྱེད་གདན་ཞུ་ལ་མངགས་ལེ་ཡིན། ཁྱེད་རང་ང་ལ་མདའ་གྲི་སོགས་ཅི་བྱས་ཀྱང་ངས་ལན་མི་འཇལ་ཐག་ཆོད་ཡིན། རྟ་ཁྲབ་འཁོར་གསུམ་དང་བཅས་པ་ལེན་ནུས་ན་ཁྱེད་རང་ཅི་བྱེད་གྱིས་ཟེར། ང་ཤན་པ་སྲོག་བཅད་ཀྱང་ཁེད་རང་གི་ལག་ཏུ་ཡོད་བསམ་བློ་མ་བཏང་བར་བྱ་བ་ཆེས་ན་ནམ་ཕུག་ཅི་ཡོང་མི་ཤེས། ལྷག་པར་གུང་དཀར་རྒྱལ་ལ་ང་འབུམ་ཚོ་གཅིག་ལས་ལྷག་ངེས་ཡིན་མི་དགོས་པའི་གྱོད་གཞི་འདིང་ན། རྗེ་ས་ཐམ་རྒྱལ་པོའི་དྲུང་དུ་ལོག་སྐབས་ཀྱང་སྡེ་གཉིས་ཁ་འཐབ་ཟོས་པའི་མི་ངན་དཔའ་ཐལ་རང་ལ་སོང་བས་ལང་ཤོར་ཅན་གསུངས་ཤིང་ཐུགས་མི་ཁྲེལ་བའི་ངེས་པ་མེད།  དེ་བས་ད་དུང་འདྲ་ཨེ་འདུག་ང་ཤན་པའི་གླུ་ལ་ཉོན་ཟེར་ཞིང༌། ངག་རྟ་འབྲེལ་རིང་འབྲེལ་ཐུང་ལ་དྲངས་ནས་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡ་ལེན་ལུགས་རེད། །ས་འདི་ས་ངོ་མ་ཤེས་ན། །བྱང་ལ་སྐྱ་མོའི་གཡས་ཟུར་རེད། །ང་དང་ང་ངོ་མ་ཤེས་ན། །ཐེ་མོ་ཧོར་གྱི་ས་ཆ་ནས། །ཡ་ཟིའི་གུར་དཀར་རྒྱལ་པོ་ཡིས། །བལྟ་ན་དཔྲལ་བའི་མིག་དང་འདྲ། །ལབ་ན་འཕྲིན་སྐྱེལ་ལྕེ་དང་འདྲ། །གཅེས་པ་ཁོག་པའི་སྙིང་དང་འདྲ། །འགྲོ་ན་བྱིན་པའི་ཉ་དང་འདྲ། །ཁ་ལག་བར་གྱི་ཐུར་མ་འདྲ། མཆོག་དཀར་གྱོང་ཤིང་ཐུག་པ་འདྲ། །རྒྱ་བོད་བར་གྱི་གསེར་ཟམ་འདྲ། །ཨ་ཡོད་ནང་གྱི་ད་ཡོད་རེད། །སྒོ་ངའི་ནང་གི་སེར་ཐིག་རེད། །ར་མགོའི་ནང་གི་མིག་རྡོག་རེད། །སྡང་བའི་དགྲ་ལ་ངོམ་རྒྱུ་ཡིན། །བྱམས་པའི་གཉེན་ལ་སྨོན་རྒྱུ་ཡིན། །ཁ་གཏམ་མེད་པའི་སྣ་ཐུག་དང༌། །མ་བྲིས་གོང་གི་བྲེལ་ལེ་གཅིག །ངེད་གཉིས་བར་ལ་ཡོང་དགོས་མེད། །ཕོ་དགའ་རེས་དགྲ་ལ་དགྲ་རྒྱུད་འཛིན། །ཕོ་འགའ་རེ་གྲོགས་ཀྱི་མཁན་པོ་ཡིན། །དམག་འགའ་རེ་མགྲོན་དུ་བོས་ཟེར་ན། །མགྲོན་འགའ་རེ་ནོར་བུ་སྒོ་སྐྱེལ་ཡིན། །ཡག་བསམ་ན་མདའ་དེ་ཕོངས་ལ་ཤོག །དེ་ནས་ཉོན་དང་སྔོན་པོ་གཡབ། །ཆབ་ཆུ་བོ་སྒྲོལ་བ་གསེར་ཟམ་ཡིན། །མཁར་ཁྲ་བོའི་ལམ་ངོ་བཙས་པ་ཡིན། །མི་སྐད་རིགས་འཆད་ས་ཐུགས་ནས་བྱང༌། །ཁྱོད་མ་འདུག་ཡ་ཟི་མཁར་ལ་འགྲོ། །ཁྱོད་ཚང་ས་ཐམ་རྒྱལ་པོ་ལ། །སྐུ་ཆེ་བའི་རྒྱལ་སྲས་ཡོད་ཟེར་ན། །ཁ་འདུན་མ་འོས་ལེ་ངེད་ལ་ཡོད། །ཡ་ཟིའི་སྲས་མོ་གུར་ལོ་མཚོ། །ཐུགས་རྒྱ་དར་བཞིན་དུ་འཇམ་ལེ་ཡོད། །མཛེས་གངས་རི་བཞིན་དུ་སྤམ་ལེ་ཡིན། །ཁྱོད་འཇང་ཕྲུག་གཡུ་ལྷ་ཐོག་འགྱུར་གྱིས། །སེམས་ཁྲོ་བ་ཞི་ཞིང་ལྷོད་དེ་སྡོད། །
ཅེས་ཟེར་ཞིང་གླུ་དར་ལྟར་བླངས་ནས་རྟ་ལས་བབས་འཁོར་གསུམ་བཀྲོལ་ཞིང་སྡོད་པའི་ཚུལ་གྱི་ཐང་དུ་བསྡད་སོང་བས་གཡུ་ལྷའི་བསམ་པར་མི་འདིའི་བདེན་ངེས་པའི་གཏམ་ཅིག་ཡིན་ནམ།  ཅི་ཟེར་རྟགས་པའི་གཏམ་ཞིག་ད་དུང་བྱེད་དགོས་བསམ་སྨྲས་པ། འོ་ན་ཤན་པ་རྨེ་རུ་རྩེ་ཡིན་ཟེར་གཏམ་ཁ་གཅིག་ལྕེ་གཉིས་རྐུན་མ་མི་ཡི་བཟུང་བ་འདྲ་བའི་ཚིག་ལབ་མི་འདི་ལེགས་པར་ཉོན་ཅིག་ཟེར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །འཕུར་རྩལ་ཅན་གྱི་ཁྱུང་ཕྲུག་ལ། །གཤོག་མི་ངོམས་ཟེར་ཡང་འགྱོད་རྒྱུ་མེད། །སེམས་ཕུ་ཐག་ཆོད་པའི་བན་བཙུན་ལ། །མི་རྒྱབ་ཟེར་ཡང་འགྱོད་རྒྱུ་མེད། །ཕོ་རྒོད་པོས་རང་བྱུས་འཛིན་ལེ་ལ། །མི་བྱ་མེད་ཟེར་ཀྱང་འགྱོད་རྒྱུ་མེད།  །ཁྱོད་ཁ་ཙམ་གཏམ་གྱི་མགོ་འཁོར་ལ། །དེ་མ་ཟེར་ཟེར་ཀྱང་འགྱོད་རྒྱུ་མེད། །མདའ་ཉག་ཕྲན་ཐོག་མར་རང་འགྲུབ་ནི། །འཕེན་ངེས་ཁྱོད་ལ་འཕེན་རྒྱུ་ཡིན།  །ཁྱོད་སེར་པོའི་རྒྱལ་བློན་འཁོར་བཅས་དེ། །འབྲུག་འུར་སྒྲ་ཆེ་ཡང་སྟོང་སྒྲ་རེད། །འཇའ་རི་མོ་ལེགས་ཀྱང་ཡུན་གཅིག་ཡིན། །མི་ཡིན་པའི་ཡིན་དོགས་ངོ་རེ་ཚ། །ར་གན་གསེར་དོགས་ཡིད་རེ་མུག །དོག་མོའི་གཡུ་མདོག་ཁ་རེ་སྐྱེངས། །ཞ་ཉེའི་དངུལ་མདོག་སྐྱུགས་རེ་བྲོ། །ཤན་པའི་དཔའ་གཏམ་ཞེ་རེ་ཁྲེལ། །གུར་དཀར་ཆེ་བསྟོད་སྙིང་རེ་རྗེ། །མི་མང་དར་ཚུལ་སྣང་བ་མཐོ། །བདེན་ངེས་གཏམ་ཞིག་ལབ་རྒྱུ་ཡོད། །ན་ནིང་རྣ་བའི་གོ་ཚུལ་ལ། །ཧོར་རྗེ་གུར་དཀར་འགོ་བྱས་པའི། །རི་ཐང་རྒྱལ་ཁག་བཅུ་གཉིས་དེ། །གཅིག་མེད་སྟོང་པར་སོང་འདུག་ཟེར། །དེ་ནས་ཉོན་དང་དམར་པོ་སྐྱ། །གུར་དཀར་ཁྲི་བཙུན་གཙུག་ཡག་དང༌། །ཧོར་རྗེའི་རྒྱལ་ཕྲུག་དགུ་པོ་འདི། །བར་སྣང་སྟོང་པའི་འཇའ་གཟུགས་ལ། །འདུན་མ་ཅི་འདྲ་ལེན་རྒྱུ་ཡིན། །འཇང་བཟའ་མེ་ཏོག་ཆོས་སྒྲོན་དེ། །འགྲན་མེད་ཡེ་ཤེས་མཁའ་འགྲོར་གྲགས། །སྟོང་པའི་སྣ་འདྲེན་ཧམ་པ་ཆེ། །གཏམ་སྐད་ཆ་ལབ་ཚད་རྫུན་གཏམ་རེད། །སྤྱང་ཐོང་སྐྱ་རིང་ལམ་ལ་ཆས།   །གཡང་དཀར་ཤ་ཡིས་ནོམ་སྤྲོད་བྱུང༌། །མ་ཟོས་སྤྱད་ཐོང་ཡིན་དོགས་མེད། །ལ་རིང་ཚོང་པ་ལམ་ལ་ཆས། །ནོར་བུའི་ཆབ་བུ་མགྲོན་དང་འཕྲད། །མ་འཁྱེར་ཚོང་པ་ཡིན་དོགས་མེད། །རྔོན་པ་སྡིག་ཅན་ལུང་ལ་འགྲོ། །ཕོ་ཤེན་ཤྭ་བའི་ཁྱུ་དང་ཐུག །མ་བསད་རྔོན་པ་ཡིན་དོགས་མེད། །འཇང་ཕྲུག་གཡུ་ལྷ་དམག་ལ་ཆས། །དགྲ་སྣ་ཟོན་ཁྲིད་གླུ་མི་བྱུང༌། །མ་བསད་གཡུ་ལྷ་མིན་རྟགས་གྱིས། །ཧམ་ཆེན་ཁ་ཕོ་མ་མཐོ་ཞིག །ཤེས་ན་ཕྱག་རྒྱ་ཆེན་པོ་སྒོམ། །མ་ཤེས་མ་ཎི་པདྨེ་སྒྲོངས། །ཨ་བ་རེ་ལ་སྙིང་རེ་རྗེ། །སྡིག་ཅན་བུ་ལ་ང་འདྲ་ཞིག  །ཚེ་ཟད་མི་ལ་ཁྱོད་འདྲ་ཞིག  །
ཅེས་ཟེར་ཅིང་ངར་བའི་ཚུལ་གྱིས་མདའ་འཕངས་ཚད་པའི་སྐབས་དེར། ཤན་པས་སྨྲས་པ་འོ་ན་གཡུ་ལྷ་ཐོག་འགྱུར་ཁྱེད་བསམ་བློ་ལེགས་པར་སྐོར། ཧོར་ཡ་ཟི་གནམ་གྱི་རྒྱལ་རྒྱུད་གླིང་བཞི་དབང་དུ་སྡུད་མི། འབྱུང་བཞི་རང་དབང་ཐོབ་མི། འཛམ་བུ་གླིང་ལ་འགྲན་མེད་ཁོང་ལ་དགྲ་ཡ་བཙུག་ན་ཡག་རྒྱུ་མེད། ང་ཤན་པ་དམར་པོའི་སྙིང་ཚིག་ལ་རྒྱབ་མ་ལོག་ཟེར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །དཔའ་བཟང་ཤན་པ་དམར་པོ་ངས། །གླུ་གཅིག་འབྲེལ་རིང་འབྲེལ་ཐུང་ལེན། །འབྲེལ་རིང་ལྷ་ཡི་ངོ་སོ་བསྟོད། །འབྲེལ་ཐུང་དགྲ་བོ་གཉའ་ནས་གནོན། །བསམ་དཀར་ཤེལ་དཀར་སྤྲོད་ས་ཡིན། །ན་ཀྱང་མ་ངར་ཕ་ཡི་བུ། །བློ་སྔོན་ནས་དྲན་ན་མཁས་པ་ཟེར། །རྒྱབ་ནས་འགྱོད་ཚེ་ཕྱིས་པོ་ཡིན། །འཇང་གྱི་ས་ཐམ་རྒྱལ་པོ་ལ། །གུར་དཀར་རྒྱལ་གྱི་བསྟུན་ལེ་ཡིན། །ནམ་མཁའི་རྒྱན་ལ་རྒྱ་མཚོ་འོས། །རི་བོའི་རྒྱན་ལ་རྩི་ཤིང་འོས། །ས་ཐམ་འཇང་གྱི་རྒྱལ་པོ་ལ། །མངའ་ཐང་ཆེ་བ་ཆ་མཆིས་ཀྱང༌། །ད་དུང་གུར་དཀར་དོ་བ་མེད། །ཤན་པ་རྫུན་མའི་གྲལ་ལ་བཞག །ཧོར་སེར་སྟོང་པའི་ཞིང་ལ་དྲངས། །ཁ་གཏམ་བདག་མེད་ཆ་མ་ཆོས། །དཔྱོད་པའི་མདུན་གྲོས་ཧ་མ་ཧུར། །ཡང་ན་བསམ་པ་འཆོལ་ལེ་རེད། །ཡང་ན་ཕུང་གཞི་བསྐྱོད་ལེ་རེད། །ཤན་པ་གསོད་པ་མི་དཀའ་སྟེ། །དགྲ་ཡ་ཧོར་ལ་བྱེད་པ་འདི། །མི་ཡག་ལས་ཀྱི་བདེན་གཏམ་ཡིན། །ཅི་བྱེད་གཡུ་ལྷའི་ལག་ན་ཡོད། །མི་སྡོད་ད་ལྟ་འགྲོ་རྒྱུ་གྱིས། །ཕོ་རབས་འདུན་མ་ནང་དུ་གྱིས། །དགྲ་མཐའ་ཅི་ཡོད་ཐབས་ཀྱིས་བཅོམ། །བསམ་བློ་བཞི་གསུམ་བཅུ་གཉིས་ཐོངས། །བློ་རྩེ་ཉི་ཤུ་རྩ་ལྔ་བསྐོར།་་་༌།ད་མ་བཞུགས་གཡུ་ལྷ་ཕེབས་རྒྱུ་གྱིས། །གཏམ་དེ་ཚོ་ཡན་ལ་ལབ་རྒྱུ་མེད། །ཚིག་ལོག་པས་ཞུས་ན་ངོམས་རྒྱུ་མེད། །ངོ་ཤེས་ན་སྙིང་གཏམ་ཚིག་གསུམ་ཡིན། །
ཞེས་ཟེར་ཞིང་གླུ་དེ་ལྟར་བླངས། བག་ཕེབས་ནས་མི་རྟ་གཉིས་རང་སར་གོང་ལྟར་བསྡད་པས། གཡུ་ལྷའི་བསམ་པར་བདེན་ངེས་རང་ཡིན་ན་ཁོ་རང་ཟེར་བ་ལྟར་གྱོད་གྱི་གཞི་འདིང་བས་ཧ་ཅང་ཐལ་ཡོང་ཁེབ་ཆེ་སྙམ། མདའ་གཞུ་རྣམས་རང་སར་བསྡུས་ཤིང་རྟ་ལས་བབས། ཤན་པའི་མདུན་དུ་ཡར་ཡོང་ནས་གཏམ་གླེང་ཞིབ་རྒྱས་བྱས་པའི་མཐར། ལྷའི་འཁྲུལ་དྲན་པ་ལྟ་བུའི་གཡུ་ལྷ་དེ་ཡང་མགོ་འཁོར་ཞིང་ཉེ་བར་ཤན་པ་དང་སྡེབས་ནས་འགྲོ་རྩིས་གྱིས་དམག་དཔོན་གཞན་མ་གཉིས་ལ་ཡང་བློ་གྲོས་མཐུན་གཅིག་ཀྱང་མེད་པར་རང་ཐག་བཅད།  བདུད་རྒྱལ་བ་ཐོད་དཀར་དང་འབྲུག་སྒྲ་དཔལ་ལྡན་རྒོད་པོ་ཁྱེད་གཉིས་ཀྱི་དམག་དཔོན་འགྲོ་སྡོད་དང༌། མགོ་འཛིན་ང་རང་གི་བྱེད་པ་ལྟར་མཛོད་ཅིག  ང་ཤན་པ་དང་བསྡེབས་ནས་ཧོར་དུ་ཕྱིན། བྱ་དགའ་དང་སྣ་གཏད་འཇུ་ཁ་བླངས་ནས་འཕྲལ་དུ་སླེབས་ཡོང༌། ཞག་མ་གསུམ་ཁོང་དུས་འཁོར་ངེས་བྱེད་ཟེར། བདུད་རྒྱལ་བ་ཐོད་དཀར་གྱིས་བདེན་དུ་བཟུང་ཞིང༌། ཁ་མཁས་དང་བསྟུན་པ་མ་གཏོགས་བློ་ཕུག་ཏུ་ང་རྒྱལ་གྱིས་ཆགས་སྡང་ཡོད་པར་བརྟེན་གཡུ་ལྷ་ཐོག་འགྱུར་ཧོར་ལ་ལོངས་སྤྱོད་སྙོགས་རིང༌།  སྟང་མ་དང་ཚྭ་ཁ་འཕྲལ་དུ་བླངས་ཤིང་རྒྱལ་པོའི་དྲུང་དུ་མྱུར་བར་ཕྱིན་ན་ངོ་སོ་ཆེ་བསྟོད་ཡོང་བསམ་སྨྲས་པ།    དེ་ལྟར་ཨ་བུ་རང་གིས་ཟེར་བ་ལྟར་འབུམ་དམག་གི་དཔུང་དང་འཇུ་ལེན་བྱ་དགའ་ཕྱག་རྟགས་ཞུ་གསོལ་བཞེས་ནས་མྱུར་དུ་ཕེབས་མཛོད་ཅིག  ངེད་རྣམས་འདི་གར་ཞག་ལྔ་བཞི་གང་རུང་སྡོད་དགོས་བྱུང་ཡང་བསྡད་ཆོག་ཟེར། འབྲུག་སྒྲ་དཔལ་ལྡན་དེ་སྤྱིར་གྱི་རྒྱུད་ཆེ་བ་དང་སྒོས་སུ་ཁོ་རང་ཞི་འཇམ་པས་ཐམས་ཅད་ལ་མི་དགའ་བ་ཅིག་ཀྱང་མེད། ལྷག་པར་བསམ་པ་བཟང་པོ་གསེར་དང་འདྲ་བའི་བསམ་བློ་ལ། གཡུ་ལྷ་སོང་ན་ངེད་རྣམས་ཀྱིས་གཞིས་གོ་ཨེ་ཆོད་ཀྱང་མི་ཤེས། ཁོ་རང་ཡང་དགྲ་ཡུལ་གྱི་མཚམས་འདི་ལྟ་བུར་དམག་དཔོན་ཁ་བྲལ་བའི་དཔེ་མེད་བསམ་སྨྲས་པ་འོ་ན་ཨ་མཉེས་རང་གིས་ལྟོས་མཛོད། ངས་བསམས་ན་འདི་ལྟར་ཡོད། སྤྱིར་གྱི་རྒྱལ་པོའི་བཀའ་ལ་རང་རེ་རྣམས་མངགས་པའི་ཟས་བཅུད་ལོངས་ཤོག་གསུངས་པ་མ་གཏོགས་ཧོར་དང་སྐྱིད་སྡུག་ཆིག་སྒྲིལ་སྐོར་ཤོག་གསུངས་པ་མེད། ཡང་སྒོས་ཐག་རིང་གི་གཏམ་ལ་བཞག་ཡོད་མེད་ཇི་ལྟར་ཡང་ཧོར་ཡུལ་རྩ་མེད་དུ་སོང་ཟེར་བའི་གཏམ་ཐོས་ནས་ལོ་གསུམ་འགྲོ། ལར་ནས་རང་ཡང་དོན་མེད་པའི་མི་འདི་ཅི་ཡིན་མི་ཤེས་པས་ང་རང་རྣམས་ད་དུང་མ་འཐོར་བར་མངགས་པའི་སྟང་མ་དེ་བླངས། མྱུར་དུ་ལོག་ལ་མི་དྲག་གམ་ཟེར། གཡུ་ལྷས་སྨྲས་པ། བུ་རང་ན་ཚོད་ཆུང་བའི་བློ་རེད། དེ་ཙམ་དགོས་དོགས་མེད། སྤྱིར་བློ་དང་གཞུ་མོ་ཐབས་ཀྱིས་ཁུག་ཟེར་བའི་དཔེ་ལྟར་ཧོར་དང་འདུན་མ་གཅིག་སྒྲིལ་བྱུང་ན་བྱུས་གྲུ་བཞི་རང་གི་ལག་ཏུ་ཡོད་ཅིང་རྒྱལ་པོའི་ཐུགས་ལ་མི་བབས་མིན། ཁྱེད་རྣམས་གཞི་གོ་ཆོད་པར་གྱིས་ལ་འདིར་ཤོག་གསུངས་ཏེ་གནམ་གཡག་སྔོན་པོ་ལ་ཆིབས་ནས་ཤན་པ་དང་སྡེབ་རླུང་འཁོར་བ་ལྟར་ཕེབས་སོ། །དེར་གླིང་སྒར་ནས་འདན་མ་དེ་ཡང་ཤན་པ་སོང་རྗེས་ངར་གྱིས་བསྐྱོད་པ་ལྟ་བུ་ཡོང་བའི་ལམ་བར་ཐུག་ཅིང་རྒྱང་ཙམ་སོང་རྗེས་གཅིག་གིས་གཅིག་ལ་ཁ་ཤགས་དང་དཔའ་གཏམ་ཤོད་རེས་བྱེད་བཞིན་སོང་བས།  མཐར་གླིང་དཀར་དུ་བསླེབས་པ་ན་གཡུ་ལྷ་བློ་མི་བདེ་པ་དང་དངངས་འཚབ་ལྟ་བུ་བྱུང་རུང་བྱེད་ཐབས་མ་བྱུང༌། བཙོན་པའི་ཚུལ་དུ་ལག་གཉིས་བསྡམས་ཤིང་སྐེ་ལ་ཐག་པ་ནག་པོས་ཁྱི་ཁྲིད་པ་ལྟར་རྒྱལ་བློན་རྣམས་ཀྱི་དྲུང་དེར་ཁྲིད་ནས་སླར་ཡང་ལག་གི་བཀྱིག་ཐག་བཀྲོལ་ཞིང་ཤ་ཆང་གི་བཙོན་ལྟོ་སྤྲད་བསྡད་པའི་བར་དེར། རྒྱལ་བློན་རྣམས་ཀྱི་ནང་ནས་མ་བཞིའི་དཔོན་པོ་ཁྲོ་ཐུང་དེ་གྲལ་གྱི་དབུས་ནས་ལངས་ཤིང་གཡུ་ལྷ་ལ་ངན་ཚིག་ཤགས་འདེབས་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ས་འདི་ས་ངོ་མ་ཤེས་ན། །བྱང་ལ་སེ་བོའི་གཡས་ཟུར་རེད། །ང་དང་ང་ངོ་མ་ཤེས་ན། །སྲིད་པ་ཁོ་མོའི་རོང་རྫོང་ནས། །དབྱར་དགུན་མེད་པ་ཁ་བ་འབབ། །སྟོན་དཔྱིད་མེད་པར་བུ་ཡུག་འཚུབ། །ལྷ་བྱ་གོང་མོས་གཤོག་གུར་ཕུབ། །འདྲེ་བྱ་སྲེག་པའི་ཚ་རག་འཐེན། །མི་མིང་བོས་ན་འདྲེ་མོ་ལངས། །ཕྱི་མིང་བོས་ན་ཝ་མོ་རྒྱལ། །ཕོ་རོག་སྙིང་རྫོང་ནང་བཅུད་ལ། །མ་བཞིའི་དཔོན་པོ་ཁྲོ་རྒྱལ་ཟེར། །དབུ་ནག་བོད་ཀྱི་ས་ཆ་ན། །སྐུ་ཆེ་བ་འཛམ་གླིང་རྒྱལ་པོ་ཡིན། །ཐབས་སུ་མཁས་ཟེར་ན་ང་རང་མཁས། །དེ་ཡན་ལ་མི་གཅིག་ཡོང་དོགས་མེད། །འཇང་ཕྲུག་གཡུ་ལྷ་ཐོག་འགྱུར་དེ། །ས་གནམ་གྱེར་སྒོའི་སྐད་ཆ་ལ། །ས་ཐམ་རྒྱལ་པོའི་བཀའ་བློན་དེ། །བཅར་ན་སྙིང་མེད་ཀླད་ཡུ་འཁོར། །མནོ་ཆུང་རླུང་གིས་ཁྱེར་ལ་ཁད། །ཁྲབ་གཤམ་སུ་ལུ་དཀྲུག་དཀྲུག་རེད། །དར་འཕྲུ་རླུང་གིས་བསྐྱོད་ལེ་རེད། །ཁྱོད་འཇང་ཡུལ་མཐིལ་ནས་ཡོང་ཉིན་མོ། །དཔའ་འདོད་གང་འདྲ་བསྟན་ལེ་ཡིན། །ཡིན་མདོག་ཅི་འདྲ་བྱས་ལེ་ཡིན། །དེ་ནས་རྒྱལ་པོ་སེང་ཆེན་ལགས། །བྱུས་མགོ་ཐབས་ཀྱི་ཟིན་ལེ་རེད། །རྒོད་མིང་ཐོབ་པའི་གཡུ་ལྷ་ཁོ། །བཅར་ན་ལྟད་མོ་མ་ཆེ་སྟེ། །འདོ་བ་གནམ་ཡག་སྔོན་པོ་དེ། །གཞན་མའི་རྟ་ལས་ཡག་ལེ་འདུག    །འདི་འདྲ་ཨ་ཁུའི་ནོམ་དུ་ཞུ། །གུ་གུ་རྟ་ཡི་གཏོད་རོགས་བྱེད། །ཡོད་ན་ཡོད་མཆོག་རྟ་གཅིག་རེད། །ད་ལན་ཨ་ཁུའི་གཏམ་ཞུས་ལ། །རྒྱལ་པོའི་ཐུགས་ཀྱི་བཅུད་དུ་བཞུགས། །ཞེས་ཟེར་ཞིང་གླུ་དེ་ལྟར་བླངས་པས། གཡུ་ལྷའི་བསམ་པར་མི་འདིའི་དཔའ་གཏམ་བཤད་བཤད་སྡར་མ་བཙོན་ཐོག་དཔེ་ལྟར་མི་འདྲ་རུང༌། བྱ་ཐབས་ནི་མི་འདུག་སྙན་ངོ་ནག་ལོང་ངེ་བྱས་ནས་སྨྲས་པ། འོ་ན་གླིང་གི་རྒྱལ་བློན་རྣམས། གསོན་དང་ཞུ་རྒྱུ་འགའ་རེ་ཡོད་ཟེར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ལྷ་ཡར་མཁྱེན་དགུང་སྔོན་རྭ་བ་ནས། །མེ་ཤེལ་ཉི་མའི་སྤྱན་མིག་ཅན། །བར་མཁྱེན་བར་སྣང་རྭ་བ་ནས། །གསལ་སྒྲིབ་མེད་པའི་མཐུ་རྩལ་ཅན། །མར་མཁྱེན་ས་གཞིའི་རྭ་བ་ནས། །ཆུ་ཤེལ་ཟླ་བའི་སྤྱན་མིག་ཅན། །མི་འབྲལ་སྤྱི་བོའི་གཙུག་ཏུ་བཞུགས། །ཡེ་ཤེས་སྤྱན་གྱིས་ཨེ་གཟིགས་ལ། །ལས་ནག་པོའི་ས་ལ་མ་སྲིད་པའི། །འབྲུག་ཕོ་ཐོང་འདྲ་བའི་གཡུ་ལྷ་ལ། །བུང་བ་འདྲ་བས་སྐད་ངར་འགྲན། །མི་ཡོང་ལས་ལ་གཅིག་ཀྱང་མེད། །ས་ཐམ་དྲུང་དུ་སྡོད་པའི་དུས། །གསེར་ཁྲི་གནོན་པའི་རྒྱལ་པོ་ཡིན། །དེང་སང་བྱུས་ཀྱི་ཁྱེར་སོ་ལ། །སྐེ་ཐག་ནག་ཤ་ལེ་བཙོན་པའི་གྲལ། །ན་ས་འཆི་ས་དུར་ས་གསུམ། །གཤིན་རྗེའི་ཁྲོམ་ལ་གར་བཏབ་རེད། །ཚེ་རོགས་སྡོད་མལ་གནས་ཁང་གསུམ། །སྔོན་མའི་ལས་ལ་གར་བཀོད་རེད། །ཨ་རེ་མཚར་ཀྱང་འགྱོད་པ་མེད། །ཡང་སྒོས་རྨུ་རྗེ་ས་ཐམ་རྒྱལ། །རྒྱལ་ས་ཕལ་གྱིས་དོ་ཟླ་མེད། །ཉིན་གཅིག་འཆར་བའི་ཉི་མ་དེ། །ཐེབས་རེ་འབུད་པ་ཀུན་ཤེས་རེད། །ལན་གཅིག་ཐོབ་པའི་མི་ལུས་འདི། །དུས་མཐའ་འཆི་བ་ཀུན་ཤེས་རེད། །གཏམ་ངན་བརྙས་བཞག་ཁུར་གོང་ལ། །ཐངས་རེ་སྲོག་དམར་མ་ཆད་ལོ། །མ་བཞིའི་ཁྲོ་རྒྱལ་ཡིན་ནོ་ཟེར། །སྙིང་རྩ་་སྡར་མ་ཝ་ལས་ཤེས། །རྟ་བཟང་འདྲ་འདྲ་གཡབ་ན་ཤེས། །གོ་མཚོན་ཕུབ་ཐོགས་མདའ་མདུངས་སོགས། །རྒོད་པོའི་ལུས་ལ་ཡོད་ན་ཨང༌། །ཕོ་སུ་རེད་ཚད་ཅིག་བལྟས་ན་གསལ། །སྲོག་དམར་བཅད་ཀྱང་འགྱོད་པ་མེད། །
ཅེས་ཟེར་ཞིང་ངར་བའི་སྒོ་ནས་གཞན་མ་ཆས་མ་འཛོམ་པར་འགྲམ་དུ་བཙོན་ལྟོ་སྤག་སྟག་ཡོད་པ་དེ་བླངས་ནས་བརྒྱབ་པས། ཁྲོ་ཐུང་གི་འདན་པར་ཕོག་ཅིང་ཁྲི་ཐོག་ཏུ་མ་ཚུགས་པར་གན་རྐྱལ་ལོག་ནས་འགྱེལ་བྱུང་བས། རྗེ་བློན་ཐམས་ཅད་བཞད་མའི་ཐིག་པའི་ངང་ནས་ཁྲོ་ཐུང་བརྒྱལ་སངས་ཤིང་གདོང་པ་དམར་ཕྱུར་རེ། ཚིག་པ་ཟ་བའི་གནས་སུ་གྱུར་ཀྱང་བྱ་ཐབས་མེད་པར་རེ་ཞིག་ལུས། དེའི་ནུབ་རྒྱལ་བློན་རྣམས་ད་རུང་དམག་དཔོན་གཉིས་ཡོད་པས་ཐབས་ཅི་དྲག་ཟེར་བའི་བཀའ་གྲོས་ཀྱི་སྒོ་ནས་འཛམ་གླིང་སེང་ཆེན་རྒྱལ་པོ་ཁོང་གི་འདི་གྱིས་གསུངས་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གནས་སྤྱི་གཙུག་ཚངས་པའི་སྒོ་འབྱེད་ནས། །ཁྲི་པད་མ་བརྩེགས་པའི་གདན་སྟེང་ན། །སྐུ་མཚན་དཔེའི་རང་འོད་གཟི་འབར་བས། །མགོན་སྲིད་པའི་གདུང་སེལ་འོད་དཔག་མེད། །གླིང་སྐྱེས་བུས་གུས་པས་གསོལ་བ་འདེབས། །འགྲོ་དྲུག་འཁོར་བའི་གནས་ནས་དྲོངས། །ལམ་བར་དོའི་འཇིགས་པ་བསལ་དུ་གསོལ། །གླིང་དཀར་པོའི་དཔའ་བདུད་བརྒྱད་ཅུ་རྣམས། །ཡང་སྒོས་དགྲ་ལྷ་རྩེ་རྒྱལ་དང༌། །གསེར་བའི་དཔོན་དང་འོམ་བུའི་དཔོན། །མུ་སྤྱང་མི་ཁྲི་རྟ་འབུམ་བཅས། །མཐོན་པོ་རི་ཡི་འགྲམ་དུ་ཡོད། །དམའ་མོ་ཆུ་ཤིང་འགྲམ་དུ་ཡོད། །སེམས་སྟོང་ཉིད་འོད་གསལ་ཅིར་སྣང་ལ། །དགྲ་གཉེན་དོགས་པ་ལར་ནས་མེད། །སངས་རྒྱས་བསྟན་པའི་སྲོག་ཤིང་ལ། །རེས་འགའ་དྲག་པོའི་སྐུ་རུ་སྟོན། །རང་ལུས་འདོམ་གང་མཛུབ་རྩེར་ཁྱེར། །ཤུགས་སྐྱེད་ལུས་ཀྱི་ངལ་དུབ་བསང༌། །སེམས་མི་བདེ་ཚེར་དོང་བཙོན་ཉལ་བྱས། །བདུད་ནག་པོའི་བསྟན་པ་ཐབས་ཀྱིས་བརླགས། །ཚེ་འདི་ལ་ཞེན་པ་མ་མཆིས་ཀྱང༌། །ནོར་དཔག་མེད་གླིང་པའི་དོན་ཕྱིར་བླངས། །གཏིང་ཕྱི་རེས་གངས་པ་བོད་ལ་ཕན། །ད་ལྟ་རྒྱལ་པོའི་སྟང་མ་རེད། །བདུད་ཆེན་རྒྱལ་བ་ཐོད་དཀར་དང༌། །འབྲུག་སྒྲ་དཔལ་ལྡན་རྒོད་པོ་གཉིས། །སུ་རེད་ཁ་བསླུས་གྱིས་ལ་ཤོག།།མི༌དྲག་བྱས་ཀྱང་ཤན་པ་དྲག། །ཡོད་ན་དེས་ཆོག་ཤན་པ་རེད། །མེད་ན་དེས་ཕུང་ཤན་པ་རེད། །གཏམ་ཚིག་གསུམ་གླིང་གི་སྤྱི་ཚིག་ཡིན། །ཤན་པ་སྔོན་སྔོན་སྔོན་ལ་རྒྱུག    །གླིང་དཀར་ལྷ་སྡེའི་ཕར་དམག་རྣམས། །བྱང་ལུང་སྐྱ་མོའི་མདོ་རུ་སྡོད། །སང་ཉིན་ཉི་མ་རྩེ་ཤར་ལ། །བྱང་ལུང་སྐྱ་མོའི་མདོ་རུ་འགྲོ། །སྒར་མ་བཏབ་ཁྲིགས་སེ་འཁོད་ནས་འགྲོ། །རུ་གྲལ་སྒྲིགས་ལམ་ལ་ཤར་སེ་འགྲོ། །ཡིད་སྐྱོ་མོའི་ལམ་ལ་མ་སོང་ན། །སེམས་དགའ་བའི་ཟོག་དང་འཕྲད་དོགས་མེད། །དེ་ཟེར་ལེ་གངས་པའི་གཏམ་ལ་ཡོད། །འཇང་ཕྲུག་གཡུ་ལྷ་ཐོག་འགྱུར་ནི། །གླིང་སྒར་སྟོད་ལ་ཁྲིད་ནས་སོང༌། །གླིང་ཆེ་རྒྱུད་ཚང་ནས་རྟ་མི་གསུམ། །འབྲིང་རྒྱུད་ཚང་ནས་རྟ་མི་གསུམ། །ཆུང་རྒྱུད་ཚང་ནས་རྟ་མི་གསུམ། །རྟ་མི་དགུ་ཡི་ཁྲིད་ལ་སོང༌། །ཡབ་རྗེ་སེང་བློན་རྒྱལ་པོ་ལ། །འཇང་གླིང་འཁྲུག་རེས་ནམ་ཕྱེད་བར། །བཙོན་པའི་གྲལ་ལ་ཞོག་མཛོད་གྱིས། །འཇང་རྟ་གནམ་ཡག་སྔོན་པོ་ནི། །རེ་ཞིག་ཨ་ཁུས་བདག་རྒྱུ་གྱིས། །ཕྱིས་བྱ་བ་བྱུས་འགོ་ལེན་ཉིན་མོ། །ཁོ་རང་གཡུ་ལྷའི་ལག་ལ་སྤྲོད། །དེ་བར་ཨ་ཁུས་བདག་རྒྱུ་བྱེད། །སྒ་འཁོར་ལྕམ་སེ་ད་ལྟ་ཁྲིད། །དེ་ནས་གླིང་དཀར་དཔའ་བདུད་རྣམས། །མ་བྲེལ་མ་ངར་ལྷོད་ཅིང་འགྲོ། །དེ་རིང་ཤན་པ་སྔོན་ལ་སོང༌། །བར་ཆད་མེད་པའི་བསྐྱེལ་མ་དང༌། །བསམ་དཀར་འགྲུབ་པའི་སྨོན་ལམ་འདེབས། །ང་དང་གོང་མ་ལྷ་ཡིས་འདེབས། །སྤྱི་ཚིག་ཡིན་པས་འགྲུབ་པར་ཤོག །
ཅེས་གསུངས་པའི་ཆོས་གླུ་དེ་ལྟར་བླངས་པས། དཔའ་རྟུལ་རྣམས་ཡིད་གཅིག་ཏུ་རྒྱལ་པོའི་གསུང་ལ་མངོན་པར་བསྟོད་ཅིང༌། དེ་ལྟར་ལེགས་སོ་བཀྲ་ཤིས་གཡང་ཆགས་པའི་གྲོས་ཚིག་རྒྱལ་པོས་གསུངས་པ་དེ་ལྟར་རང་བྱེད་ཟེར་ཞིང་ཐམས་ཅད་དགའ་དགའ་བྱེད། དེའི་སང་ཉི་མ་ཤར་བ་དང་ལྷན་དུ་རྟ་ཁལ་རྣམས་ཁྲིགས་སེ་བྱས། གུར་རྣམས་འུབ་སེ་བསྡུས་ཤིང་ལམ་དུ་ཆས། བྱང་ལུང་དེའི་མདོ་རུ་བསྡད། ཤན་པ་ནི་རྟ་དམར་ཆུང་དེ་ཡི་སྟེང་དུ་ཐོན། འཇང་དམག་ཡོད་པའི་ས་རུ་སོང་ངོ༌། །དེར་འཇང་དམག་རྣམས་རུ་བསྒྲིགས་ཤིང་བསྡད་པའི་ས་རུ་སླེབས། བདུད་རྒྱལ་བ་ཐོད་དཀར་དེ། རྟ་འདོ་བ་དམར་པོ་དེའི་གོང་དུ་ཐོན་ཞིང༌། ཤན་པའི་གདོང་བསུ་བ་འདྲ་ཞིག་བྱས་བས། རྒྱང་ཙམ་ནས་གང་ཟེར་བལྟ་བའི་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལིན་ལུགས་རེད། །གནམ་ཐེལ་དཀར་པོ་ར་དཀར་སྐྱ། །ས་ཐམ་དབུ་འཕང་མཐོ་བར་མཛོད། །བར་མཁྱེན་བར་ཐེལ་ཁྲ་བོ་སྐྱ། །འཇང་བདུད་ཕྲུག་བསྟན་པ་དར་བར་ཤོག    །མར་མཁྱེན་ས་ཐེལ་ནག་པོ་སྐྱ། །ང་བུ་སྡུག་ངོ་སོ་མཐོ་བར་མཛོད། །ས་འདི་ས་ངོ་མ་ཤེས་ན། །བྱང་ལ་སྐྱ་མོའི་གཡས་ཟུར་རེད། །ང་དང་ང་ངོ་མ་ཤེས་ན། །འཇང་ཡུལ་མཚལ་ར་སྨུག་པོ་ན། །དེ་ཡོད་ནང་གི་དེ་དྲག་ལ། །མདེའུ་བཞིན་དུ་བསྟུན་ལེ་ཡིན། །མདའ་སྨྱུག་བཞིན་དུ་བསལ་ལེ་ཡིན། །དགྲ་མི་ཐུབ་ཆམ་ལ་འབེབ་མི་ཡིན། །གཉན་མ་ནུས་རེ་བ་བྱས་པ་ལ། །བདུད་ཆེན་རྒྱལ་བ་ཐོད་དཀར་ཟེར། །སྟག་དམར་མི་ཤ་ཟ་དང་མཚུངས། །གཡུ་འབྲུག་མཚོ་ལ་སྨིན་དང་མཚུངས། །གསེར་ཁྲབ་ཅན་གྱི་བདག་པོ་ཡིན། །རྒྱལ་པོ་ས་ཐམ་སྐུ་ཞབས་ལ། །དཔའ་ཁས་བླངས་བྱས་ནས་ཐོན་ལེ་ཡིན། །ས་དྲོ་མོའི་ཐོག་གི་ནོར་བུ་ཡིན། །གཉེན་ཕ་སྤུན་ནང་གི་མར་དཀར་ཡིན། །སྡང་དགྲ་བོའི་སྟེང་གི་ཤི་བདུད་ཡིན། །དགྲ་ཕར་ལ་མི་བརྒྱབ་གཅིག་ཀྱང་མེད། །ཁ་སང་བྱུང་བའི་དམར་པོ་སྐྱ། །དེ་རིང་བྱུང་བའི་དམར་པོ་སྐྱ། །ཚུར་ཆས་ཡོང་ལུགས་གང་འདྲ་ཡིན། །འཇང་བུ་གཡུ་ལྷ་ཐོག་འགྱུར་དེ། །ཕེབས་སམ་འབྱོན་འཁྱིལ་གང་འདྲ་ཡོད། །དོ་ནུབ་སང་གོང་ཚུན་སྟབས་ལ། །དམག་དཔོན་ཞལ་བཟང་ཨེ་འཁོར་ལགས། །དེ་ནས་ཉོན་དང་དམར་པོ་གཡབ། །ཁེར་འགྲོ་ཆིག་སྡོད་མང་ལུགས་འདི། །ཧ་ཅང་ཡིད་ཅིག་མ་ཆེས་བྱུང༌། །དམའ་དམྱལ་བའི་གཏིང་དུ་ལྷུང་ཡང་སྲིད། །མགོ་དར་འཕྲུ་ལྕམ་སེ་ཤོར་ཡང་སྲིད། །གཏམ་གོ་ནི་ཨེ་བྱུང་དམར་པོ་སྐྱ། །གོ་ན་རྣ་བའི་བདུད་རྩི་ལ། །མ་གོ་གླུ་ལ་སྐྱོར་རྒྱུ་མེད། །གཏམ་དེ་ཚོ་ཡན་ལ་ལབ་རྒྱུ་མེད། །
ཅེས་གླུ་དེ་ལྟར་བླངས་པས། ཤན་པའི་བསམ་པར། མི་འདིའི་ཟེར་ལུགས་ཀྱིས་བྲོས་ན་ཨ་དྲག་བསམ། སྨྲ་ན་ངག་བདེ་མགོ་བསྐོར་བ་ལ་མི་དཀའ་བསམ་སྨྲས་པ། འོ་ན་དམག་དཔོན་གཡུ་ལྷ་ཐོག་འགྱུར་དེས་གསུང་འཕྲིན་ཚིག་གསུམ་སྤྲོད་རྒྱུ་ཡོད་ཟེར་ཅིང་གླུ་འདི་ལྟར་བླངས་སོ།།
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །མ་བྲེལ་མ་བྲེལ་ལྷོད་དེ་བཞུགས། །དོན་ཆེན་བསྒྲུབ་ན་ངང་གིས་སྲིངས། །གཏམ་སྙན་དགོས་ན་རྣ་བས་ཉོན། ང་དང་ང་ངོ་མ་ཤེས་ན། །དཔའ་བཟང་ཤན་པ་དམར་པོ་ཟེར། །ཧོར་ཡུལ་འ་ཆེན་གཞུང་དྲུག་ནས། །གུར་དཀར་རྒྱལ་གྱི་སྤུན་ཡ་ཡིན། །ཐིག་ཤིང་རྒྱལ་གྱི་བུ་སྐལ་ཡིན། །ལབ་ན་འཕྲིན་སྐྱེལ་ལྕེ་རིང་ཡིན། །ཁ་སང་ཉི་མའི་སྔ་དྲོ་ལ། །དམག་དཔོན་གཡུ་ལྷ་ཐོག་འགྱུར་ཁོང༌། །བྱ་དགའ་ཕེབས་བསུ་བྱེད་མི་ཡིན། །ཡ་ཟིའི་གུར་དཀར་རྒྱལ་པོ་དང༌། །མི་ཆེན་མདུན་གྲོས་བྱེད་ཅིང་ཡོད། །གུར་དཀར་གསེར་ཁྲིའི་སྟེང་དུ་ཡོད། །གཡུ་ལྷ་དངུལ་ཁྲིའི་སྟེང་དུ་ཡོད། །དཀར་ཡོལ་ནང་གི་ཇ་འདྲེན་ཡོད། །དངུལ་གཡང་ནང་གི་ཆང་འདྲེན་ཡོད། །ཇ་ཆང་ཧུབ་སྐོར་བྱེད་ཅིང་ཡོད། །སྐྱིད་བདེ་ཉི་མ་བདེ་ལྡན་རེད། །ད་རུང་དེས་ཀྱང་མ་ཚད་པའི། །ཁམས་གསུམ་དབང་བསྡུས་གུར་དཀར་དང༌། །ནམ་མཁའི་ཐོག་མདའ་གཡུ་ལྷ་གཉིས། །ད་ལྟ་རྗེས་ལ་ཡོང་ཞིང་ཡོད། །ཤན་པ་སྔོན་ལ་མངགས་ལེ་རེད། །བདུད་ཆེན་རྒྱལ་བ་ཐོད་དཀར་ལ། །མ་བཞུགས་སྔོན་ལ་ཕེབས་ཤོག་གསུངས། །ཁྲ་བོ་ཁྲ་ཤོག་ནང་ཤེད་ནས། །རྫས་རིན་ཆེན་བཤམས་པའི་ལོངས་སྤྱོད་དེ། །སྐུ་མི་ཉེས་སྐལ་པ་འབུལ་དགོས་ཟེར། །ད་རུང་གཏམ་ཚིག་མདུན་གྲོས་ལ། །གལ་ཆེ་བའི་ནན་ཏན་རེ་གཉིས་ཡོད། །ཤེས་ཁ་རུ་བསྐོར་ཅིང་བྲོས་བྱེད་ཟེར། །དེ་ཟེར་ནས་ཤན་པ་མངགས་ལེ་རེད། །ད་མ་བཞུགས་དམག་དཔོན་ཕེབས་རྒྱུ་གྱིས། །ཤར་གླིང་བྲན་དུ་བསྐུལ་བ་ལ། །སྔ་ཁྱད་རིང་ཆ་གཉིས་ཀ་ཡོད། །སྤྱང་ཐོང་འདུར་ཁ་སྐྱེན་ལེ་དེ། །ལུག་གཡང་དཀར་ཁྱུ་སྣེ་ཨེ་ཆོད་བསམ། །རྐྱང་ཁ་དཀར་བང་ཁ་སྐྱེན་ལེ་དེ། །བྱང་ན་དམར་སྙིང་རྩ་ཨེ་ཆོད་བསམ། །འཇང་ཧོར་གུར་དང་ཁྲི་གདུག་ནི། །གླིང་དཔའ་བདུད་བྲན་དུ་ཨེ་ཁུག་བསམ། །སེམས་དཀར་པོའི་སྨོན་ལམ་འདེབས་ཤིང་ཡོད། །ཡུན་རིང་ན་ཅི་ཡོང་ངེས་པ་མེད།    །གླིང་སེང་ཆེན་མི་མ་འཕྲུལ་གྱི་བུ། །རྟགས་དང་རྫུ་འཕྲུལ་བཀྲ་ལག་ཚང༌། །བྱུས་ལག་ལ་ཡོད་པ་སྟོར་བ་མང༌། །ད་མ་བཞུགས་དམག་དཔོན་ཕེབས་རྒྱུ་གྱིས། །འགྲོ་ཟེར་ན་ངེད་གཉིས་མཉམ་འགྲོ་བྱེད། །མི་འགྲོ་ཤན་པ་ལོག་ནས་འགྲོ། །    ཞེས་ཟེར་ཞིང་གླུ་དེ་བླངས།

གླེང་བརྗོད།
འཇང་གླིང་གཡུལ་འགྱེད། (ཚན་པ་གཉིས་པ)
འཇང་གླིང་གཡུལ་འགྱེད། (ཚན་པ་གསུམ་པ)

འཇང་གླིང་གཡུལ་འགྱེད།(ཚན་པ་གསུམ་པ)

དེ་ནས་འབྲོང་བཤོལ་མི་ཀྱང་ཐད་ཐད་ནས་སླེབས། ཁྲོ་ཐུང་གི་བསམ་པར་ང་རང་དོན་མེད་པར་ཁུང་དུ་འཛུལ། གུང་པའི་རྟ་དེ་ཡང་འབྲོང་ལ་ཤོར་བའི་རྐྱེན་འདྲ་ཞིག་བྱུང་བས་གླིང་དམག་ནང་དུ་ཁ་སྐྱེངས་པས།  ཟེར་རྒྱུ་ཨེན་ཙམ་མེད་ན་མི་ཡོང་བསམས་ནས། འཕྱི་བ་གཉན་པོ་ཞིག་ཁུང་དེ་ཁའི་ནང་ནས་བཟུང་ཞིང་ཁྱེར་ནས་གླིང་པ་ཚོགས་པའི་དཀྱིལ་དུ་གླུ་ཐུང་ཐུང་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གླུ་ལེན་པ་དགུང་སྔོན་དབྱིངས་ནས་ལེན། །མཐོན་པོའི་དབྱིངས་ནས་མི་ལེན་རྒྱུ། །དགྲ་གནམ་ལ་འཕུར་ན་གནམ་ནས་འགུགས། །གཤོག་ཐོག་མ་བཞི་ཁྲོ་ཐུང་རེད། །རྩལ་ཆེན་མ་བཞི་ཁྲོ་ཐུང་རེད། །སྡེར་ཐོག་མ་བཞི་ཁྲོ་ཐུང་རེད། །གསོན་དང་ཚོ་ཆེན་ལྷ་སྡེ་རྣམས། །མ་བཞིའི་དཔོན་པོ་ཁྲོ་ཐུང་རེད། །རྒོད་པོའི་མིང་ཅིག་མ་གྲགས་ཏེ། །རྒོད་རྟགས་དཔའ་ཁ་རིམ་བྱུང་རེད། །དར་སེང་དཀར་མོའི་སྐྱེ་ཡག་དེ། །གཞན་ལ་མཚར་བ་ཆ་མཆིས་ཀྱང༌། །གང་བྱུང་མི་ཡིས་མི་མཐོང་འདུག །དཔེ་དེ་དང་གླིང་དཀར་མི་དྲག་འདྲ། །རྒོད་དབྱེར་ཆེ་བ་མ་གཏོགས་པ། །དོན་ལག་ཏུ་ཁེལ་བ་དེ་ཙམ་རེད། །གཡོག་ཕྲུག་ལག་གི་ཡག་པ་དེ། །ངོ་སྐལ་མཚུངས་པ་ཆ་མཆིས་ཀྱང༌། །གར་དགོས་ས་ལ་ཁྲོབ་སེ་ཡོང༌། །དེ་དང་མ་བཞི་ཁྲོ་རྒྱལ་འདྲ། །ངེད་རང་གླིང་དཀར་དཔའ་རྟུལ་རྣམས། །མ་བསྡད་འབྲོང་ལུང་བཤོལ་དུ་སོང༌། །དཔའ་མོ་ཨ་སྟག་ཀླུ་མོ་ཡིས། །ཟངས་རྭ་ཐོགས་པའི་གཡག་གུ་ཞིག །སྡུག་ཐག་མདའ་ཡིས་བསད་ནི་ཐལ། །ངོམས་རྒྱུ་ཅུང་ཙམ་དེ་ལ་ཡོད། །ཕྱི་ལྟར་སེམས་ཅན་འཕྱི་བའི་ལུས། །ནང་དུ་བདུད་ཀྱི་བླ་གནས་ཚང༌། །དོན་དུ་རྟེན་འབྲེལ་ཕུན་སུམ་ཚོགས། །ད་ལྟ་ཨ་ཁུའི་ལག་ན་ཡོད། །གཟིགས་དང་གླིང་དཀར་ལྷ་སྡེ་རྣམས། །དཔའ་ཁ་གཟེངས་བསྟོད་ང་ལ་གྱིས། །དྲིན་ཅན་ཟེར་ན་ཨ་ཁུ་ཡིན། །
ཞེས་ཟེར་ཞིང་གླུ་དེ་ལྟར་བླངས་སོ། །རྗེ་བློན་རྣམས་ཅི་ཡང་མི་གསུང་ཐམས་ཅད་ཞལ་འཛུམ་འཛུམ་མཛད། སྲས་དགྲ་ལྷ་རྩེ་རྒྱལ་གྱིས་གསུངས་པ། འོ་ལགས་སོ། ཨ་ཁུའི་དཔའ་ཁ་དེ་བྱུང་རྟེན་འབྲེལ་བཟང་བཟང༌། མི་རྒན་གྱི་ཁ་ཡིན་པས་གཡང་ཆགས། ད་མར་བཞུགས་དཔའ་སྟེར་དང་གཟེངས་བསྟོད་ངེད་ནས་བྱེད་གསུངས་གླུ་འདི་བླངས་སོ། །
གླུ་ཨ་ལ་ཐ་ལ་ལ་ལ་རེད། །ཐ་ལ་གླུ་ཡི་ལེན་ལུགས་རེད། །དེ་རིང་ཉི་མའི་གདོང་གང་ལ། །དཔའ་ལའི་མི་སྤྱང་དཀར་པོ་དང༌། །དཔའ་མོ་ཨ་སྟག་ཀླུ་མོ་གཉིས། །མ་བཞིའི་དཔོན་པོ་ཁྲོ་ཐུང་གསུམ། །དཔའ་ཁ་ཡོད་པ་འདྲ་འདྲ་རེད། །ཕྱི་ལྟར་དཔའ་ཁ་མཉམ་སྟེར་བྱེད། །དོན་དུ་གཟེངས་བསྟོད་ཁ་མཁས་ལ། །འཇང་ཕྲུག་བཀྲ་ཤིས་བསོད་ནམས་ཀྱིས། །རྟ་ཁྲབ་འཁོར་གསུམ་མ་ཉམས་པ། །དཔའ་ལ་རང་གི་དཔའ་དར་བྱེད། །བྱུར་ལྷའི་བླ་འབྲོང་ཟངས་རྭ་ཅན། །ཤ་ཀོ་གྲུ་གཅིག་མ་ཉམས་པ། །དཔའ་མོ་རང་གི་དཔའ་དར་བྱེད། །གསེར་ཕྱེ་སེར་པོ་གསེར་ལས་ལྷག །ཡུ་རྩེ་ཙམ་ཞིག་མ་ཉམས་པ། །ཨ་ཁུ་རང་གི་དཔའ་དར་བྱེད། །དེ་ནས་གླིང་དཀར་དཔའ་རྟུལ་རྣམས།  །ས་ཐམ་འཇང་གི་གཞི་སྐྱེམས་ནས། །དེ་རིང་སོ་ལམ་སྔོན་རྒྱུག་དེ། །ཚངས་པ་དཀར་པོའི་སྐུ་དྲིན་གྱིས། །མགོ་འཁོར་སྒར་ལ་བརྫངས་ལེ་རེད། །མི་གཉིས་མིན་པ་ཐམས་ཅད་བསད། །གཞིས་བཞུགས་ངོད་ཀྱི་དཔའ་ཁ་རེད། །དེ་ནས་འཇང་ཕྲུག་མི་གཉིས་ལ། །གླིང་མོ་ཞིབ་རྒྱས་བྱས་པ་ཡིན། །ང་རང་འབུམ་པའི་དགྲ་ལྷ་ལ། །གྲོས་ཡ་བཀའ་བློན་འདན་མ་དང༌། །ཨ་ཀུ་ག་ནེ་གོམས་པ་གཉིས། །འབུམ་དམག་གཅིག་གི་འཁོར་དང་བཅས། །རི་ཐང་མཚམས་ནས་ཤར་ན་བསམས། །འབུམ་དམག་གཅིག་གི་འཁོར་དང་བཅས། །ཐང་གཞུང་རྒྱུད་ནས་སོང་ན་བསམ། ། མ་བཞིའི་དཔོན་པོ་ཁྲོ་ཐུང་ལ། །གྲོས་ཡ་དཔའ་མོ་ཨ་སྟག་དང༌། །གུང་པ་བུ་ཡི་ཁྲ་སྐྱ་གཉིས། །འབུམ་དམག་གཅིག་གི་འཁོར་དང་བཅས། །རི་ཐང་མཚམས་ནས་ཤར་ན་བསམ། །འབུམ་དམག་བཞི་ཡི་ཁོང་སེང་ནས། །འཇང་མི་དཔུང་དམག་གང་ཡོད་དེ། །གཅིག་མེད་ཁྲག་ལ་བསྲེས་ན་བསམ། །མུ་སྤྱང་རིན་ཆེན་དར་ལུ་ལ། །གྲོས་ཡ་སྐྱ་ལོའི་འབྲུག་རྒྱལ་དང༌། །དཀར་རུ་ཉི་མ་རྒྱལ་མཚན་དང༌། །ནག་རུ་ཐར་པ་རྒྱལ་མཚན་གཉིས། །གཞིས་བཞུགས་མགོ་འཛིན་བྱས་ན་བསམས། །འདྲ་ཨེ་གདའ་གླིང་དཀར་ལྷ་སྡེ་རྣམས། །
ཞེས་གསུངས་པས་ཐམས་ཅད་དགྲ་ལྷས་གསུངས་པ་ལྟར་བློ་མཐུན། ནམ་ཕྱེད་མ་ཟིན་ཙམ་དུ་གོང་མངག་གི་དམག་རྣམས་རང་རང་གི་ཤོག་དང་བཅས་མཚན་བཤར་བརྒྱབ་ཅིང་འཇང་དམག་ཡོད་པའི་ས་དེར་སླེབས།  ནམ་ལངས་པ་དང༌། ཤར་ཕྱོགས་སུ་དགྲ་ལྷའི་ཤོག་དང༌། བྱང་ཕྱོགས་སུ་འོམ་བུའི་ཤོག ནུབ་ཕྱོགས་སུ་ཉི་འབུམ་གྱི་ཤོག ལྷོ་ཕྱོགས་སུ་ཁྲོ་ཐུང་གི་ཤོག་བཅས་ཀྱིས་ཨ་ལོང་ལྟར་བསྐོར་ཞིང་འཇང་རྟ་ཕལ་ཆེར་གླིང་ལ་ཐོབ། འཇང་མི་རྣམས་ཀྱིས་བལྟས་པས་ཕྱོགས་བཞིར་དམག་གིས་རུ་དར་རྟ་ཡི་རྨིག་སྒྲ་བཅས་མི་སྐད་ཀྱིས་ཁེངས་ཏེ་བལྟ་མི་ཕོད་པ་འདུག་པས། དུག་ཕྲུག་ལྷའུ་སིལ་སིལ་དེ་རྟ་སེར་པོ་དཔུང་ནག་པོའི་སྟེང་དུ་ཐོན་ནས་སྟོང་འཇུག་དང་གཏམ་ལེན་ཅི་ཡང་མེད་པར་བྱང་ཕྱོགས་ཀྱི་སྒར་སྣེ་ནས་ཐོན། ངར་གྱིས་ཁ་ལོ་ལ་དཔའ་ལིང་དཔའ་བོ་ཅིང་ཧྲིལ་གྱིས་གཤག་པས། གླིང་དམག་རྣམས་ཀྱིས་མཚོན་ཆ་འདེབས་ཚོད་མ་ཤེས་པར་འཁྲུག་འཁྲུག་ལོང་ལོང་དཀྲུགས་ནས་མཚོན་མང་དུ་སྡིག་རུང་གླིང་ལྷ་བཟང་བས་སྐྱོན་མ་བྱུང༌། སླར་ཁོ་རང་གི་སྒར་དུ་ལོག དེའི་རྗེས་སེང་ལྕམ་ལྷའུ་ཐོག་འགྱུར་དེ་རྟ་དགུ་ཆིག་སྐྱ་རིང་གི་སྟེང་དུ་ཐོན་ས་ཤར་ཕྱོགས་ཀྱི་དམག་རྣམས་གཤོར་རྩིས་ཀྱིས་རྒྱང་ངེར་བྱུང་བས་འདན་མས་གདོང་བཀག་པས་ཁོས་རྟ་ཁ་འཐེན་ཡོབ་རྒྱང་ཞིང༌། གཡའ་ཁོ་རེ་སྔོན་པོ་གཡབ་ཁྱོད་དང་ང་གཉིས་ཕོ་སུ་རེད་ཀྱི་ཚད་ཅིག་བལྟ་ཟེར་ཅིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གླུ་ལེན་པ་གནམ་ཐེལ་མདུན་ནས་ལེན། །དཀར་པོ་ལྷ་ཡི་དབུ་འཕང་བསྟོད། །མི་ཐུབ་དགྲ་བོ་ཆམ་ལ་ཕོབས། །ས་ཐམ་སྐུ་བྱུས་བརྟན་པར་ཤོག  །ས་འདི་ས་ངོ་མ་ཤེས་ན། །ཉི་མ་ཞུད་ཀྱི་རྒྱབ་ཕྱོགས་རེད། །རྟ་བྲོ་རིང་མོའི་ཐང་ཆེན་རེད། །ང་དང་ང་ངོ་མ་ཤེས་ན། །རྨུ་རྗེ་ས་ཐམ་རྒྱལ་པོ་ཡི། །སྐྱིད་ན་ཡའུ་བྱེད་མི་དང༌། །སྡུག་ན་གྲོགས་པོ་བྱེད་མི་རུང༌། །སེང་ལྕམ་ལྷའི་ཐོག་འགྱུར་ཟེར། །དེ་ནས་ཉོན་དང་སྔོན་པོ་གཡབ། །ལས་དམག་ས་ལ་མི་ཤོང་འདི། །ས་ཕྱོགས་གང་ནས་དྲངས་ལེ་ཡིན། །དམག་དཔོན་སུ་འདྲ་ཡོད་ལེ་ཡིན། །གཏམ་དང་ཉག་ཕྲན་དྲང་ན་དགའ། །དྲང་བ་དགའ་བས་དྲང་གཏམ་གྱིས། །ལམ་དང་གཞུ་མོ་འཁྱོག་ན་དགའ། །འཁྱོག་ན་དགའ་བས་འཁྱོག་དེར་འགྲོ། །ཨེ་ཡིན་མ་ཡིན་དྲང་པོར་ཤོད། །
ཅེས་ཟེར་ཞིང་གླུ་དེ་ལྟར་བླངས། རྟ་ཁ་འཐེན་གཞུ་སྟེང་དུ་མདའ་བཞག་ཁོ་ཡིས་གཏམ་ལན་ཞིག་ཡོད་འགྲོ་དེ་ཉན། དེ་ནས་མདའ་ཞིག་གིས་སྣེ་ལ་གཏོང་བསམ་བསྡད་པས། འདན་མས་དེ་ལན་དུ་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །དེ་ནས་ཉོན་དང་དཀར་པོ་སྐྱ། །ཁྱོད་རང་ཟེར་ཟེར་དེ་རང་རེད། །གཏམ་དང་ཉག་ཕྲན་དྲང་ན་དགའ། །དྲང་གཏམ་ཨ་ཕོའི་ངག་ནས་འཆད། །ཁྱོད་རང་ཟེར་བའི་དམག་དཔོན་གསུམ། །མི་ཤ་གར་བགོས་ཤོད་དགོས་མེད། །མངགས་པའི་ས་དེ་ག་ན་ཡིན། །མི་ཤ་དེ་རུ་བགོས་ལེ་རེད། །ལས་དམག་ས་ལ་མི་ཤོང་འདི། །རྨུ་རྗེ་ས་ཐམ་རྒྱལ་པོ་ཡི། །བོས་པའི་དགྲ་དེ་སུ་འདྲ་ཡིན། །དེ་འདྲའི་ལས་དམག་སླེབས་ལེ་རེད། །འཆད་དགོས་ཤོད་དགོས་གང་ཡང་མེད། །ཁྱོད་རང་སེམས་ལ་ཝ་ལེ་ཡོད། །ཁྱོད་ལས་དམག་ཨ་ལོང་བསྐོར་ལེ་རེད། །ཉི་མ་དེ་རིང་ཕན་སྟབས་སུ། །གོམ་གང་བྲོས་དབང་ཁག་པོ་ཡོད། །ད་རུང་དེས་ཀྱང་མ་ཚད་པའི། །འཇང་ཡུལ་ལུང་པ་ཁྲ་མོ་རུ། །རྟ་དང་སྒར་གྱིས་གང་རྒྱུ་ཡིན། །སེང་ལྕམ་ལྷའུ་ཐོག་འགྱུར་ཁྱོད། །ཐོག་འགྱུར་མིང་དུ་ཆགས་སོ་ཟེར། །འགྱུར་དུ་ཨེ་འདུག་དེ་རིང་བལྟ། །ཚེ་ཟད་ཅིག་གི་འཆི་ལུགས་ལ། །འབུལ་ཐག་ཆོད་སྔོན་མོའི་མཚོན་འཁོར་འབུལ། །ཤེས་ན་བླ་མ་གང་བཟང་བསྒོམ། །མ་ཤེས་མ་ཎི་པདྨེ་བགྲོངས། །
ཅེས་ཟེར་ཞིང་མདའ་ཞིག་བསྲིངས་པས་འདན་མའི་མདའ་དེས་བྲག་རྡོ་རྗེ་ཡིན་ཀྱང་མི་འཐོར་མི་སྲིད་ཀྱང༌། ཁོ་ལ་ཐེ་རང་གི་གོ་དགུ་བཅུ་བྲན་པ་གཅིག་མ་ཆོད། ཁོས་ཀྱང་མདའ་འཕངས་པས་འདན་མའི་ཁྲབ་དེ་སློག་རུལ་ལྟར་འཐོར་ཞིང་ནང་དུ་མཚོན་སྲུང་གིས་མཐུས་ལུས་ལ་མདའ་རྨས་མ་བྱུང་བར། དེར་ཁོ་ཡི་བསམ་པར་སྐད་ཅིག་ལ་འཁྱེར་བསམ་སྦར་མོ་གདངས་ཞིང་རྒྱུག་པས། འདན་མས་ཀྱང་ངེས་པར་འཁྱེར་བསམ་ནས་མདའ་གྲི་སོགས་གང་ཡང་མ་བྱས་པར་རྒྱུག་པས། གཉིས་ཀ་ལུག་གདོང་སྤྲད་པ་ལྟར་ཐུག་ནས་གཅིག་ལ་གཅིག་གིས་འཇུས་པའི་ངང་ནས་འདྲེད་མ་འགྱེལ་གཉིས་ཀ་རྟ་ཐོག་ནས་ལྷུང་ཞིང་འཐབ་པའི་སྐབས། སྲས་དགྲ་ལྷ་རྩེ་རྒྱལ་གྱིས་ཆིབས་དཀར་འཇམ་ཡ་མེད་ཁ་སྤྲུགས་ཤིང་རྒྱུག་ནས་ཁོ་ལ་གྲི་བསག་གསུམ་བརྒྱབ་པས་ཐེ་རང་གིས་གོ་མ་ཕེད། ཡང་གྲི་ཡ་ཟི་སྐར་ཕྲན་ཚར་གཅིག་དབྱུགས་པས་མགོ་འཕྲུ་དང་བཅས་པ་ས་ཐོག་ཏུ་ལྷུང་ངོ༌། །དེ་ཕྱོགས་སུ་རྟ་མི་རྣམས་ཉི་དེར་བྱེད། བར་དེར་དུག་ཕྲུག་ལྷའུ་སིལ་སིལ་དེ་བྱང་ཕྱོགས་ཀྱི་སྒར་མཐའ་ནས་ཐོན་ཅིང་སྔོན་མ་ལྟར་གཤོར་རྩིས་ལ། དཔའ་ལ་དང་ཤན་པ་གཉིས་གཅིག་མཇུག་གཉིས་མཐུད་ཀྱིས་མཆོངས་ནས་གདོང་བཀག་ཅིང༌། ཧོར་ཤན་པ་རྨེ་རུ་རྩེས་རྟ་དམར་ཆུང་གི་སྟེང་དུ་ཡོབ་ལངས་ཤིག་བྱས་ནས་ཁོ་རེ་སེར་པོ་གཡབ། ཁྱོད་ལ་ཅི་དགོས་རྟ་ཁ་འཐེན་ཙམ་གྱིས་ཟེར་ནས་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ཧོར་ཨ་ཡན་རྒྱལ་པོའི་དགྲ་ལྷ་མཆོད། །མི་ཡན་རྒྱལ་པོའི་ཟོ་དོར་མཆོད། །ངང་ཡག་ཐེ་མོ་སྤུན་གསུམ་མཆོད། །མགར་བའི་ནག་པོ་རྐང་གཅིག་མཁྱེན། །ཤན་པའི་ལྕོགས་ལྷ་མཚལ་དམར་མཆོད། །སྔར་དུས་ཡིན་པའི་དུས་ཚོད་ལ། །ཧོར་འབུམ་ཤོག་བཅུ་གཉིས་གར་ནང་དུ། །རུ་སྣེ་ཆུ་ཆེན་བསྒྱུར་མི་དང༌། །རུ་རྟིང་གྲུ་གུ་སྒྲིལ་མི་དང༌། །ཨེ་ཡོད་བྱས་ཀྱང་ཤན་པ་ཡིན། །མི་ཡོད་བྱས་ཀྱང་ཤན་པ་ཡིན། །སྡིག་པའི་ན་བུན་ཁ་ནས་འཁྲིགས། །ང་རྒྱལ་དུག་ཆུ་ཁ་ནས་འཁྲུགས། །དཔའ་བདུད་ངར་མའི་དཔུང་རོགས་རེད། །འཛམ་གླིང་རྒྱལ་པའི་རུ་འཛིན་ཡིན། །ཡིན་ལུགས་བཤད་ན་དེ་འདྲ་ཡིན། །མ་བྲེལ་མ་བྲེལ་ལྷོད་ཀྱིས་སྡོད། །བྲེལ་བས་བྲེལ་གོ་ཆོད་ལེ་མིན། །བོད་ལ་བྲེལ་བ་རྣམ་གསུམ་ཡོད། །ཁུ་བྱུག་སླེབས་དུས་ཁྭ་ཏ་བྲེལ། །སྟོན་དགུན་བརྗེ་ཁར་སྤྲིན་མགོ་བྲེལ། མི་ནག་འཆི་ཁར་རིག་པ་བྲེལ། །འཕུར་བསམ་ཡོད་ན་གཤོག་པ་སྟོན། །འཛུལ་བསམ་ཡོད་ན་སྡེར་མོ་སྟོན། །དེ་མིན་འགྲོ་ས་ཡོད་དོགས་མེད། །བྲེ་སེ་འབྲོང་གི་དཔུང་འཐུད་ལ། །གླང་ཆུང་ར་བརྡར་དགོད་རང་བྲོ། །ཐིག་ལེ་གཟིག་གི་ཁྲ་སྡེབ་ལ། །རྡ་ལི་ངར་སྐད་ཡ་རེ་ང༌། །གཡུ་འབྲུག་སྔོན་པོའི་སྐད་ཡ་ལ། །སྦྲང་ཆུང་ཟིལ་སྐད་ཉོན་རེ་མོངས། །མ་བྱེད་ཨེ་གོ་བདེན་ངེས་ཡིན། །སྲོག་དམར་མཛུབ་རྩེར་འཁྱེར་རྒྱུ་ལ། །བསམ་བློ་བཞི་གསུམ་བཅུ་གཉིས་སྐོར། ། སྐྱོ་གྲོགས་ཐུ་རུ་སེར་ཆུང་རེད། །རང་མགོ་ཐོན་ན་དཔའ་བོ་རེད། །གེ་སར་རྒྱལ་པོའི་ཆབ་སྲིད་ལ། །མངའ་ཞབས་མ་འདུས་མི་གཅིག་མེད། །དེ་ནས་ང་ལ་ཚུར་ཉོན་དང༌། །མི་ཡག་ཨེ་གོ་སྙིང་གཏམ་ཡིན། །
ཞེས་ཟེར་ཞིང་གླུ་དེ་ལྟར་བླངས་སོ། །ཁོ་ཡིས་རྟ་ཁ་འཐེན་ཙམ་བྱས་ནས་ཤན་པའི་གཏམ་དེར་ལན་སྨྲས་པ། ཁོ་རེ་དམར་པོ་གཡབ། ཁྱེད་རང་ཟེར་བ་ལྟར་རང་མགོ་ཐོན་པ་དཔའ་བོ་ཡིན་ན་ཁྱོད་རང་ཀུན་དུ་གྲགས་ལེ་རེད། ང་ཁྱེད་ལ་བློ་གཏད་བབས་པ་རུང་ཡང་མི་རུང༌། ཁྱོད་ཀྱི་ཁ་དེ་ལ་ཐལ་བ་ཐོབ་ཟེར་ཞིང་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །དལ་བའི་དུས་སུ་མཆོད་པའི་ལྷ། །བྲེལ་བའི་དུས་སུ་མགོན་སྐྱབས་མཛོད། །དེ་ནས་ང་ལ་ཚུར་ཉོན་དང༌། །ང་དང་ང་ངོ་མི་ཤེས་ན། །དུག་ཕྲུག་ལྷའུ་སིལ་སིལ་ཟེར། །རྨུ་རྗེ་ས་ཐམ་རྒྱལ་པོ་ཡི། །དཔུང་པ་གཡས་པའི་ངར་རྒོད་ཡིན། །རྐང་ཆུང་གཡོན་གྱི་ངར་གདོང་ཡིན། །ཁྲ་ཆུང་གཡོན་མའི་ཨ་བྲས་ཡིན། །འོག་ལ་གཡབ་པའི་འདོ་ཕྲུག་རྟ། །དྲེལ་རྒན་སེར་པོ་དཔུང་ནག་ཟེར། །ལུས་ལ་གྱོན་པའི་ཁྲབ་དཀར་འདི། །ཆུ་རྒྱུན་སྔོན་མའི་ཟིལ་པ་ཟེར། །མགོ་ལ་གྱོན་པའི་རྨོག་དཀར་འདི། །མུ་ཁྲི་དཀར་མོ་གླིང་བཞི་ཟེར། །གཡས་གཡས་ལ་བཏགས་པའི་ས་ཐག་འདི། །ལྷོ་སྤྲིན་སྨུག་པོའི་དཔུང་འཐུད་ཟེར། །གཡོན་ལ་བཏགས་པའི་གཅིག་ཤུབས་ནི། །སྣང་ཆེན་འཇའ་རིས་འཁྱུག་པ་ཟེར། །ཡིན་ལུགས་བཤད་ན་དེ་ལྟར་ཡིན། །རྒྱལ་པོ་ས་ཐམ་མ་ལགས་པའི། །རྒྱལ་ཕྲན་ཕལ་ལ་རྩེས་དགོས་མེད། །བློན་པོ་བེར་ཐུལ་མ་ལགས་པའི། །བློན་ཆུང་གཞན་ལ་བརྒྱུད་དགོས་མེད། །གཡས་ལ་བཏགས་པའི་ཞགས་པ་འདི། །དེ་རིང་ཁྱོད་ལ་འདེབས་ངེས་ཡིན། །ཞགས་ནག་ཨ་ལོང་ཧོ་མ་ཡ། །
ཞེས་ཟེར་ཞིང་ཞགས་པ་དེ་འཕངས་བྱུང་བས། སྐད་ཅིག་གིས་རླུང་བསྐྱོད་པ་ལྟར་ཤན་པའི་སྐེ་ལ་འཁོན་ཞིང༌། ཤན་པ་རྟ་ཐོག་ནས་ལྷུང་ལ་ཁད་ཀྱི་རྟ་དེ་ཡང་རྒྱུག་མ་འདུར་གྱིས་ཁོ་ཡིས་ཕྱི་བཞིན་ཁྲིད་པས། སྐབས་དེར་དཔའ་ལ་ནི་གཡའ་དེ་རིང་ལས་ནག་པོ་ཐོན་སོང༌། ཤན་པ་མི་རྟ་བཅས་ཤོར་སོང་བ་འདི་སྒོར་ཐུབ་པ་ཞིག་བྱེད་དགོས། དེ་མ་བྱུང་ཡང་འཆི་ཐུབ་པ་ཞིག་བྱེད་བསམས་ནས་རྟ་སྟོང་རི་དར་དཀར་གྱི་ལྕག་འཐུད་ནས་སྐད་ཅིག་ལ་སྐར་མདའ་ཆད་པ་ལྟར་སྐྱ་ཧྲིལ་བྱུང་ནས་སྣ་སྒོར་ཞིང་སྨྲས་པ། ཁོ་རེ་དོན་མེད་ཀྱི་ལས་དེ་ཅི་ལ་བྱེད། ངེད་ཀྱི་ཤན་པ་དམར་པོ་བཏང་བ་དགའ་ཟེར་ཞིང༌། གདོང་བཀག་པས་ཁོ་སྐད་ཅིག་ལ་ངར་ལངས་ཞིང་ཞགས་པ་མ་བཏང་བར་གཞུ་སྟེང་དུ་མདའ་ཞིག་བཞག་ནས་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ཚེ་ཟད་ཅིག་གི་ཡོང་ལུགས་ལ། །ལས་ངན་ཅིག་གི་འཁོར་ལུགས་ལ། །ངོ་ཚ་མེད་པའི་རྒོད་པོ་རྣམས། །གཅིག་ལ་གཉིས་རུབ་བྱེད་ལུགས་ལ། །ཁྱི་རྒན་བེ་སེར་སྐོར་སྐོར་རེད། །དེ་ལ་རྒོད་པོ་ཟེར་དོགས་མེད། །ནམ་གུང་བཅོ་ལྔའི་དུང་ཟླ་དེ། །སྤྲིན་ནག་འགྲོས་ལ་ཟུར་དགོས་མེད། །མ་བཙུག་མདའ་མོའི་འབེན་བཞག་ཁྱོད། །མདའ་སྣེ་གོང་མ་ལྷ་ཡིས་ཁྲིད། །མེ་ལྕེ་འབར་ཞིང་འུར་སྒྲ་གཡོས། །དུར་རླུང་འཚུབ་ཅིང་ལྡིར་སྒྲ་སྒྲོགས། །དཔའ་ཁ་དགུང་དུ་གྲགས་པར་ཤོག །དྲོད་མ་ཡལ་དགྲ་ཤ་ཟ་བར་ཤོག །ཨ་བ་རེ་ལ་སྙིང་རེ་རྗེ། །ལུས་ཕུང་བྱ་ཁྱིའི་ཚོགས་སུ་རོལ། །རྣམ་ཤེས་དག་པའི་ཞིང་ལ་དྲོངས། །
ཞེས་ཟེར་ཞིང་མདའ་ཞིག་འཕངས་བྱུང་བས་དཔའ་ལའི་ལུས་ལ་ཕོག  །ཁྲབ་རྒྱུན་རྣམས་སིལ་ལེ་སྟོར་ཞིང་གོས་དང་ལས་དར་གྱིས་ཐུབ་ཅིང་མདའ་རྨས་མ་བྱུང༌།དེ་བར་ཤན་པ་ཤོར་ཅིང་རེ་ཞིག་རུབ་མ་བརྒྱབ་པར་དེ་ཁར་བསྡད། དེའི་རྗེས་དཔའ་ལས་ཁོ་ཡི་གླུ་ལེན་དང་མདའ་བསྐུལ་གྱི་གླུ་འདི་སེང་སྟག་གི་ངར་འཛོམས་རིང་མོར་དྲངས་ཏེ་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གནས་དག་པ་རྒྱལ་བའི་ཕོ་བྲང་ནས། །སྐྱབས་གཅིག་མཆོག་གསུམ་བླ་མའི་ཚོགས། །བདག་སྒོ་གསུམ་གུས་པས་གསོལ་བ་འདེབས། །མཆོག་ཐུན་མོང་དངོས་གྲུབ་དུས་འདིར་སྩོལ། །ཨ་ལ་གླུ་ཡི་ལེན་ལུགས་རེད། །གླུ་དར་དཀར་བཞིན་དུ་མི་འཕྱར་རྒྱུ། །སངས་རྒྱས་བསྟན་པ་དར་འཇམ་ཡིན། གླུ་དར་དམར་བཞིན་དུ་མི་འདྲེན་རྒྱུ། །མར་མེ་འཛད་ན་དམར་པོ་ཡིན། །གླུ་དར་ནག་བཞིན་དུ་མི་སྡེབ་རྒྱུ། །སྡང་དགྲ་བོའི་ཐོག་གི་ནག་འཇམ་ཡིན། །གླུ་རིག་པའི་འཁོར་ལོ་མི་ལེན་རྒྱུ། །རང་མགོ་ཐོན་ངེས་མདའ་ཞིག་རེད། །དཔའ་ལའི་སྟེང་དུ་འགྲོ་ལུགས་མེད། །མཐེབ་མཛུབ་མདའ་མོ་འདར་ལིང་ལིང༌། །མཆོག་དཀར་གཞུ་མོ་བྲེལ་ཉམ་ཉམ། །མདའ་འཕེན་ན་འཕེན་ལུགས་དེ་འདྲ་མིན། །གཞུ་འགུགས་ན་འགུགས་ལུགས་དེ་འདྲ་མིན། །ད་གིན་ཁྱོད་ཀྱི་རེ་མོས་རེད། །ད་རེས་དཔའ་ལའི་རེ་མོས་རེད། །རྒོད་པོ་སུ་རེད་ལྟ་ན་ཤེས། །སྟག་དོང་ནང་ནས་མདའ་ཞིག་འདོན། །གཟིག་ཤུབས་ནང་ནས་གཞུ་ཞིག་འདོན། །མདེལ་རྩེ་ལྷ་དང་སྲུང་མས་ཁྲིད། །བསྐལ་པའི་འབྲུག་སྒྲ་འུར་གྱིས་སྒྲོགས། །སྨྱུག་སྐེད་མ་དང་མཁའ་འགྲོས་འཚོས། །འབྱུང་བའི་བུ་ཡུག་འུར་གྱིས་འཚུབ། །སྟོང་ཁ་ཁྲག་འཐུང་དཔའ་བོས་འཚོས། །མེ་སྟག་ཐོག་ལྕེ་ངར་གྱིས་རྒྱུག།།ཤི་དམྱལ་བ་མེད་པར་ཐུགས་རྗེས་གཟིགས། །ལམ་བར་དོ་མེད་པར་བྱིན་གྱིས་རློབས། །
ཞེས་ཟེར་ཞིང་མདའ་ཞིག་འཕངས་པས་འུར་སྒྲ་དང་མེ་སྟག་ཁྲོམ་ཁྲོམ་དུ། དུག་ཕྲུག་གི་བྲང་ལ་ཕོག་ཅིང་གོ་ཁྲབ་སོགས་གང་ཡང་མ་བརྟེན་པར་གདའོ། །དེར་ཁོ་མདའ་ཕོག་པ་དང་འཕྲལ་དུ་མ་ཤི་བར། རྟ་ཁ་ཕྱིར་ལོག་ཅིང་གླིང་དམག་གི་སྒར་དེར་འདྲེས་ཤིང་སྤྲུགས་པས་ཁྲབ་མ་གཉིས་ཙམ་བརླགས་ནས་ཁོ་རང་གི་སྒར་ནང་དུ་བྲོས་ནས་འདས་སོ། །སྐབས་དེར་ནུབ་ཕྱོགས་གནས་ཀྱི་སྒར་སྒོ་ནས་དཔའ་ལིང་དཔའ་བོ་ཐོག་འགྱུར་དེ་རྟ་ཆུ་བྱ་ལྡིང་ཤེས་ཀྱི་གོང་དུ་ཐོན་ནས། གླིང་དམག་གཤོག་རྩིས་ཀྱིས་ཕྱི་འགྱེ་མེད་པར་ཐོན་བྱུང་བས་གདོང་ལེན་དུ་ཉི་འབུམ་གྱིས་ང་འགྲོ་ཟེར། རོང་ཚས་ཁྱེད་བཞུགས་ང་འགྲོ་ཟེར་སྐབས་དེར་དགའ་སྡེས་སྨྲས་པ། ཁྱེད་གཉིས་སྐུ་མཆེད་ཡིན་པས་བཞུགས་མཛོད། དེ་རིང་གི་གདོང་ལེན་ང་ལ་བབས་ཟེར་ནས་རྟ་རླུང་ནག་ལྡིང་ཤེས་ཀྱི་སྟེང་དུ་ཐོན་ཅིང༌། གདོང་བཀག་པས་ཁོས་ཀྱང་མདའ་རྒྱང་ཙམ་ནས་རྟ་ཁ་འཐེན་ཅིང་ཟུར་སྡོད་ཀྱི་སྐེད་གཟེར་ཞིག་བྱས་ནས་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ང་དང་ང་ངོ་མ་ཤེས་ན། །འཇང་ཡུལ་མཚལ་ར་སྨུག་པོ་ན། །ཐང་རྫོང་རིང་མོའི་ནང་བཅུད་ལ། །དཔའ་ལིང་དཔའ་བོ་ཐོག་འགྱུར་ཟེར། །དེ་ཡོད་ནང་གི་དེ་གྲགས་ཡིན། །དེ་དྲག་ནང་གི་དེ་ཆེ་ཡིན། །སྒོ་ངའི་ནང་གི་སེར་ཐིག་ཡིན། །ར་མགོའི་ནང་གི་མིག་ཚིལ་ཡིན། །དེ་ནས་ཉོན་དང་སྐད་ཆ་འདུག །ཁྱོད་དང་ང་རང་གཉིས་པོ་ནི། །ཁྱེད་ཁྱེད་མདའ་ཁ་ཨེ་བྱེད་ལགས། །ཐུང་ཐུང་གྲི་ཁ་ཨེ་བྱེད་ལགས། །ཁྱེད་ཐུང་མདུང་ཁ་ལ་སྐོན་དགོས་སམ། །ཅི་བྱེད་ཁྱོད་རང་བསམ་བློ་སྐོར། །རྨུ་རྗེ་ས་ཐམ་རྒྱལ་པོ་དེས། །ངེད་དམག་དཔོན་མི་གསུམ་མངགས་ལེ་རེད། །ལས་དམག་སྟོང་གསུམ་བསྐོར་ནས་ཡོད། །ཁྱོད་དོན་མེད་ཚུར་བརྙས་བྱེད་དོན་མེད། །ཕར་འགྲོ་འདིར་བྱེད་མ་རྟོགས་པར། །ཚུར་བརྙས་དགྲ་བོ་ཁུར་སྣང་མེད། །དགུང་ཨ་སྔོན་ཡངས་པའི་འགྲིམས་ལམ་ལ། །མཐེབ་ཆུང་མཛུབ་མོས་འཇལ་སྣང་མེད། །གཡས་སྟག་དོང་ནང་ནས་མདའ་ཞིག་འདོན། གཡོན་གཟིག་ཤུབས་ནང་ནས་གཞུ་ཞིག་འདོན། མདའ་ཞགས་མི་འཕེན་ཐོག་ཅིག་འཕེན།  །ནམ་མཁའི་སྐར་ཕྲན་འདར་ཞིང་འཁྲུགས། །གཞུ་ཞིག་མི་འགུགས་བྲག་ཅིག་འགུགས། །མཐེབ་ཤེད་ཆེན་མདའ་མོ་ངར་དང་སྤྲོད། །གཞུ་སྟོད་གནམ་ཐེལ་དཀར་པོས་འཚོས། །གཞུ་སྨད་ས་ཐེལ་ནག་པོས་འཚོས། །འཆང་བཟུང་བར་ཐེལ་གཉེན་གྱིས་འཚོས། །མདེལ་རྩེ་སྡིང་རི་མི་རྒན་འཚོས། །
ཞེས་ཟེར་ཞིང་མདའ་ཞིག་འཕངས་བྱུང་བས། སྐད་ཅིག་ཉིད་ལ་ས་ཐེལ་ནག་པོས་རླུང་ནག་ཅིག་དང་བསྡེབས་ནས་འུར་སྒྲ་དང་བཅས་དགའ་སྡེའི་ལུས་ལ་ཕོག་པས་གོ་ཆ་རྣམས་སོ་སོར་ཐོར་ཡང༌། ནང་དུ་དགྲ་ལྷའི་ཚེ་གོས་ཀྱི་མཐུས་ལུས་ལ་མདའ་རྨས་མ་བྱུང༌། བར་དེར་ཁོ་ཡིས་མགོ་ཟུར་ཞིང་བསྡད་པས། དགའ་སྡེས་གཞུ་སྟེང་དུ་མདའ་ཞིག་བཞག་ནས་སྨྲས་པ། ཁོ་རེ་འཇང་ཕྲུག་ཧམ་ཆེན་ཁྱོད་མདའ་ནུས་མེད་དེ་འདྲ་ངོ་རེ་ཚ། ངེད་སྨར་ཁམས་གླིང་ཡུལ་ཁྲ་མོ་ལ། མདའ་འདི་ལས་ལྷག་པ་གྲངས་མེད་ཡོད། འདི་ལས་ཞན་པ་གཅིག་ཀྱང་མེད་ཨེ་བདེན་ཁྱོད་རང་མདའ་ལ་ལྟོས་ཟེར་ཞིང་གླུ་འདི་བླངས་སོ།།
གླུ་ཐ་ལ་ཐ་ལ་ལ་ལ་རེད། །གླུ་མཆོད་ཅིག་སྟོང་ཉིད་ཁྲག་འཐུང་ཚོགས། །བེར་ནག་པོས་སྙིང་ནས་གསོལ་བ་འདེབས། །མཆོད་ཅིག་སྟོང་ཉིད་དཔལ་མགོན་ཚོགས། །བེར་ནག་པོའི་བུ་ལ་སྡོང་གྲོགས་མཛོད། །ང་དང་ང་ངོ་མ་ཤེས་ན། །འབྲུ་དགའ་སྡེའི་མི་ཆེན་སེར་པོ་ཟེར། །ཁོ་རེ་འཇང་ཕྲུག་ཧམ་པ་ཅན། །གླིང་དཀར་ཁྲ་མོའི་གཞི་དཀྱིལ་ལ། །འཇང་ཕྲུག་རྒོད་པོ་སྙིང་རེ་རྗེ། །སྐྱ་ཁྲ་ནམ་གཞུང་མི་ཤེས་པའི། །བྱིས་ཆུང་སྐད་སྙན་དགོད་རེ་བྲོ། །ལྷ་མེད་གེ་སར་ལྷ་ལ་འགྲན། །དཔུང་མེད་གླིང་པའི་དཔུང་ལ་འགྲན། །དཔའ་མེད་དགའ་སྡེའི་ངར་ལ་འགྲན། །ཚོད་མེད་མི་ལ་ལས་ཐང་མེད། །དམག་དཔོན་དུག་ཕྲུག་ལྷའུ་དང༌། །སེང་ལྕམ་ལྷའུ་ཐོག་འགྱུར་གཉིས། །བདེ་མོའི་ཐང་ལ་ལྷུ་ཚིགས་ཕྲལ། །དེ་རིང་དེས་ཀྱང་མ་ཚད་པའི། །གཡུ་ལྷ་ཐོག་འགྱུར་བཙོན་དུ་བཟུང༌། །དེ་མིན་གང་ཡོད་དམར་གསོད་བཏང༌། །སྙིང་ཚིམ་ཨེ་གདའ་འཇང་ཕྲུག་ཁྱོད། །འཇང་ཕྲུག་ཁ་བཤད་སྟོང་གཏམ་ཅན། །ལག་ལེན་ནམ་མཁའི་འཇའ་རིས་ཅན། །མདའ་སྐྱེན་རྒན་མོ་འཕང་ཐུར་ཅན། །གཞུ་འགུགས་སེ་བའི་ཡང་ཤུན་ཅན། །དེ་རིང་ཉི་མའི་གདོང་གང་ལ། །ཧོར་པའི་གདོང་གི་བྱིས་ཆུང་ལྟར། །བྱིས་སྒྲོ་ལིང་སེ་མ་བཏང་ན། །དགའ་སྡེ་མིན་པའི་རྟགས་ལ་ཞོག། །རྩལ་གྲུབ་མེད་པའི་རྟགས་ལ་ཞོག།།
ཅེས་ཟེར་ཞིང་མདའ་ཞིག་འཕངས་པས། ཁོ་ཡི་བྲང་ལ་ཕོག་ཅིང་གོ་ཁྲབ་སོགས་གང་གིས་ཀྱང་མ་བརྟེན་པར། རྒྱབ་ཏུ་སྐྱ་སེང་ངེ་བྱུང་བས་ཁོ་རྟ་ཐོག་ནས་གན་རྒྱལ་དུ་འགྱེལ་ལོ། །
དེའི་ནུབ་ཕྱོགས་སུ་ཡོད་པའི་གླིང་པ་རྣམས་ཀི་དིར་བྱེད་ཅིང་དགའ་སྡེར་གཟེངས་བསྟོད་དོ། །དུས་དེ་ཙམ་ལ་འཛམ་གླིང་སེང་ཆེན་རྒྱལ་པོ་ཡང་སྐྱ་མིན་སེར་མིན་གྱི་སྤྲང་པོའི་ཆས་སུ་སྤྲུལ་ནས་འཇང་ཡུལ་དུ་བྱོན། ཆིབས་རྟ་རྐྱང་རྒོད་ཡེར་བ་དེ་བོང་བུ་གསུམ་དུ་སྤྲུལ་ནས་རྩྭ་ཁར་བཏང༌། དེ་དུས་འཇང་ས་ཐམ་རྒྱལ་པོའི་རྟ་རྫི་ཐེ་མོ་རྐང་རིང་གིས་མཐོང་བ་ལྟར། རྒྱལ་པོ་ལ་ཡ་མཚན་པའི་བོང་བུ་གསུམ་གྱི་སྐོར་སྙན་གསན་ཞུས་པ་ན། བོང་བུ་རྣམས་ཡར་འཁྲིད་ཤོག་གསུངས་པ་བཞིན་རྒྱལ་པོར་ཕུལ་བས། རྒྱལ་པོའི་ཆིབས་རྟ་གཉིས་དང་ལྷན་དུ་རྟ་རའི་ནང་དུ་བདག་ཉར་བྱས། ཉིན་གཅིག་ཆུ་འགྲམ་དུ་བོང་བུ་ཕན་ཚུན་འཛིང་རེས་བྱས་པའི་རྐྱེན་གྱིས། རྒྱལ་པོའི་ཆིབས་རྟ་གཉིས་ཆུ་ནང་དུ་ལྷུང་ནས་ཤི་བ་སོགས་མི་ལེགས་པའི་གནས་ཚུལ་དུ་མ་ཞིག་བྱུང་སྐབས་སུ། བོང་བུ་གསུམ་རང་ཡལ་དུ་སོང༌།
གླིང་གེ་སར་སློང་མཁན་གྱི་ཚུལ་དུ་བཞུགས་པ་དེར། འཇང་གི་མི་འགའ་དང་སྤྱང་བཟང་ལྷ་མོས། སྤྲང་པོ་ཁྱོད་ཕྱོགས་གང་ནས་འོང༌། གཏམ་ཇི་འདྲ་ཡོད་ཅེས་དྲིས་པར། སྤྲང་པོས། ང་འཁྱམས་པོར་ཕ་ཡུལ་དང་སྡོད་གནས་འདི་ཡིན་ཟེར་རྒྱུ་མེད། རེས་འགའ་གླིང་ཡུལ་དང༌། སྐབས་རེར་ཧོར་ཡུལ། ཡང་སྐབས་རེར་མོན་རོང་ཡུལ་དུ་བསྡད་ཟེར་ཞིང༌། ཧོར་གླིང་གཡུལ་འགྱེད་དང་འཇང་གི་གཡུ་ལྷ་སོགས་ཧོར་ཡུལ་དུ་སོང་བའི་སྐོར་བཤད། འཇང་གི་རྒྱལ་བློན་ཚོས་ཀྱང་སྤྲང་པོ་བཤད་པའི་གཏམ་བདེན་པ་མིན་ནམ་བསམས་པ་བྱུང༌།
གེ་སར་གྱིས་རང་གི་ཆིབས་པ་རྐྱང་རྒོད་འགུག་པའི་གླིང་བླངས་ནས་མི་རྟ་གཉིས་འཛོམས་ནས་གླིང་དམག་ཡོད་སར་ཕེབས། འཇང་ཡུལ་དུ་སྤྲང་པོར་བརྫུས་ནས་ལས་དོན་གང་བྱས་པ་རྣམས་གླིང་པར་བཤད། སྐབས་དེར༌འཇང་ས་ཐམ་རྒྱལ་པོ་ནི་བཙུན་མོ་ཁང་ཐོག་ནས་ལྷུང་བ་དང་ཆིབས་རྟ་གཉིས་ཆུས་འཁྱེར་བ་སོགས་ཀྱི་མྱ་ངན་གྱིས་ནོན་ཏེ། རྒྱལ་པོ་ལོ་དགུའི་བར་དུ་མྱ་ངན་གྱི་མུན་ཁང་དུ་བཞུགས། གླིང་དམག་འཇང་ཡུལ་དུ་འབྱོར་བའི་ཛ་དྲག་གི་གནས་ཚུལ་རྒྱལ་པོར་ཞུས་ཀྱང་གསན་འཇོག་མ་མཛད་པས། འཇང་གི་བློན་པོ་རྣམས་ཅི་བྱེད་མེད་པར་གྱུར།་་་་་་་ དེའི་སང་ཉིན་གླིང་དམག་འཇང་ཡུལ་དུ་ཕེབས་ཤིང༌། དེ་ནས་ནུབ་གཅིག་འཛམ་གླིང་སེང་ཆེན་རྒྱལ་པོ་ཁོང་ལ། ལྷ་ཆེན་ཚངས་པ་དཀར་པོས་གང་དགོས་ལུང་བསྟན་གསལ་ཚིག་ཏུ་གསུངས་པ།
རྒྱལ་པོ་བྱུས་ལ་ཐུགས་སེམས་སྒྲིལ། །འཇང་གི་ས་ཐམ་རྒྱལ་པོ་ཁོ། །མུན་རྫོང་ནག་པོའི་མཁར་ནང་ནས། །ལོ་དགུའི་བར་དུ་ཐོན་པ་མེད། །དེ་ནས་འདུལ་ལུགས་རིམས་གྱིས་བྱེད། །བྱུར་ལྷ་དཔོན་པོ་གསེར་ཁྲབ་ཅན། །སང་ཉིན་མི་སྡོད་ཤོར་ངེས་ཡིན། །དེ་འདྲ་སུས་ཀྱང་ཐུབ་པ་མེད། །མི་ཤི་གླིང་ལ་བཟོ་ངེས་ཡིན། །དེ་ཡི་གདོང་དུ་སུ་ལངས་ཀྱང༌། །གསོན་དུ་གཏོང་བའི་རེ་བ་མེད། །ལྷ་རྟ་རྐྱང་རྒོད་ཡེར་པས་གཙོས། །གླིང་རྟ་ཁྱུ་གཅིག་ཟུར་འཁྱར་
གྱིས། །བྱུར་ལྷའི་གདོང་དུ་ཁས་ལེན་མཛོད། །དེ་ནས་བློ་ཁ་ཚངས་པས་སྒྱུར། །བྱུས་ལ་བསད་ཤོར་བྱུང་དོགས་སུ། །ཞི་བའི་ཁུལ་གྱི་ཆིངས་སྐོར་གྱིས། །ལོ་དགུ་དབང་ཐང་རྫོགས་པ་ན། །ཞི་དྲག་ཅི་བྱེད་རང་ལ་ཡོད། །
ཅེས་ལུང་བསྟན་གསལ་ཚིག་དེ་ལྟར་གནང་བ་དང༌། དེའི་སང་རྒྱལ་པོ་སེང་ཆེན་གྱིས་ལྷའི་ལུང་བསྟན་བྱུངཚུལ་རྣམས་ཞིབ་ཏུ་གསུངས་སོ། །ཡང་སྐབས་དེར་འཇང་དམག་གི་ནང་ནས་བྱུར་ལྷ་དེས་དེ་རིང་ང་ཡི་དཔའ་ཁ་དགུང་དུ་གྲགས་ངེས་ཤིག་བྱེད་བསམ། ལྷག་པར་ངར་བའི་འཁོར་གསུམ་དང་སྒོ་རྒྱབ་རྟ་གྲུ་མོ་ཁྲུང་ཁྲུང་གི་སྟེང་དུ་ཐོན་ནས་འཇང་དམག་རྣམས་ལྟོས་ཨང་ངེད་ཀྱི་དཔའ་ཁ་འདི་བཞིན་མཛོད་ཟེར་ཁ་ཁྱད་དང་བཅས་པར་རྟ་ཁ་སྒྱུར། གླིང་དམག་གི་གཡས་ཕྱོགས་སུ་གཏད་ནས་རི་གཟར་གྱི་རྦབ་འགྲིལ་པར་ལྟར་མཆོངས་པས། གླིང་དམག་སུམ་ཅུ་སྐོར་བསད་ནས་ལོག་པའི་ལམ་བར་གླིང་རྟ་སྣེ་ཁྱེར་བས་ཐད་ནས་རྟ་ཐོབ་ཅིང་དེད་ནས་ལོག་སྟེ་སྒར་དུ་སླེབས་པ་དང་རྟ་རྣམས་ནོམ་གྱི་ཚུལ་དུ་བགོས། རྐྱང་པོ་འཕུལ་གྱི་རྟ་དེ་ཡིན་པར་མ་ཤེས། ཐམས་ཅད་རྐྱང་པོ་ལ་ཧབ་ཐོབ་བྱུང་ཡང་མཐའ་མར་བྱུས་ལྷ་ཁོང་རང་ལ་ཐོབ། དེ་ནས་ཐམས་ཅད་ལས་གུར་དུ་འདུས་ཤིང་ཇ་ཆང་གི་སྐྱེམས་འདྲེན་སྐབས་སུ་བྱུར་ལྷས་སྨྲས་པ།  སྟེང་བཞུགས་གསེར་ཁྲི་གནོན་མི་ཁོང༌། མུན་ཁང་དུ་དགོངས་པ་མུག དེ་བྱེད་མེད་པའི་འཇང་མི་རྣམས། ལས་ཅི་འདྲ་བྱས་ན་དྲག་རྒྱུ་རེད། ང་བྱུར་ལྷའི་བསམ་པ་འདི་ལྟར་གདའ་ཟེར་ཞིང་གཏམ་གྱི་ཐ་མ་གླུ་འདི་བླངས་སོ། །
ཨ་གླུ་ཐ་ལ་ཐ་ལ་རེད། །ཨ་ལ་ལ་ལ་ལ་ལ་རེད། །ལྷ་ཡར་མཁྱེན་གནམ་ཐེལ་དཀར་པོ་མཁྱེན། །མཆོད་པའི་མི་ལ་ཁ་འཛིན་མཛོད། །བོས་པའི་མི་ལ་ཨ་ལན་མཛོད། །མཆོད་པའི་མི་ལ་དཔལ་མགོན་མཛོད། །དཔུང་དམག་ཁྲ་མོའི་གཞི་དཀྱིལ་དུ། །ངས་སྣང་བ་མཚར་བའི་གླུ་ཞིག་ལེན། །ནང་བཅུད་མེད་པའི་མཁར་རྫོང་རྣམས། །རྩིག་གཞི་ལེགས་ཀྱང་མ་ཕན་བྱུང༌། །མི་སྡེ་མེད་པའི་ལུང་པ་དེ། །ཡུལ་བཟང་ཡིན་ཀྱང་མི་ཕན་འདུག །གོང་བཞུགས་མེད་པའི་བློན་པོ་དེ། །རང་སེམས་དྲང་ཡང་མི་ཕན་འདུག །དེ་སྟེ་ངེས་པར་ཤི་ན་བསམ། །དཔོན་ནུས་ཤོར་བའི་གཡོག་པོ་དང༌། །ཨ་མ་མེད་པའི་ཕྲུ་གུ་གཉིས། །སྐྱོ་མོའི་སེམས་ལ་སངས་དུས་མེད། །ད་སྟེ་བྱུར་ལྷ་རྒོད་པོ་ང༌། །དེ་རིང་ཉི་མའི་གདོང་གང་ལ། །ཡང་དང་གླིང་དམག་ཤོག་ནི་དགོས། །འཐབ་ཡ་སེང་ཆེན་ཨེ་ཡོང་བལྟ། །ཤི་རོགས་དུར་ས་དེ་རིང་འོས། །ངས་ཉག་ཕྲན་མདའ་དང་སྐྱ་ཁྲ་མཚོན། །བ་དན་མདུང་དང་འཕྲུལ་འཁོར་སོགས། །རྒོད་པོའི་དཔའ་རྟགས་ངོམ་ནས་ཡོད། །འདོ་ཆེན་ཉི་མ་སྐྱ་རིང་དེ། །གླིང་ཕྲུག་ཕོ་གསར་མདའ་ཡིས་བསད། །གླིང་རྟ་རྐྱང་པོ་མཐོང་རྔམ་ཅན། །རྒྱུགས་རྒྱུ་ཅི་འདུག་དེ་རིང་བལྟ། །
ཞེས་ཟེར་ཞིང་གློ་བུར་དུ་ངར་ལངས་ལྟར་རྟ་རྐྱང་པོ་བཞོན་ནས་གླིང་དམག་གི་ཕྱོགས་སུ་རྒྱུག་སྐབས། འདོ་ཆེན་རྐྱང་རྒོད་གཡེར་པོ་དེས་འཕུར་གཤོག་འགྲན་པས་ནམ་མཁའི་མཐོངས་སུ་བྱུར་ལྷ་དེ་ཁྱེར་ཅིང༌། བྱུར་ལྷ་ནི་ཅི་བསམ་མེད་པར་དབང་མེད་བྱ་སྒྲོ་རླུང་གིས་ཁྱེར་བ་ལྟར་སྤྲིན་གསེབ་ཉི་འོད་དང་བཅས་པར་བཅར་ཞིང་རིག་པ་ཕྲ་མོ་ཆོལ་གྱི་སྐབས་དེར་རྐྱང་པོས་འགྱུར་གཅིག་བརྒྱབ་པས་རྟ་ཐོག་ནས་བྱ་བབ་པ་ལྟར་དུ་དུག་མཚོའི་ནང་དུ་ལྷུང་ངོ་། །འཇང་མི་རྣམས་ཀྱིས་དང་པོ་བྱུར་ལྷ་རྟ་ཡིས་ཁྱེར་བ་ཡང་མཐོང༌། དེ་ནས་ཇེ་མཐོར་འགྲོ་བ་མཐོང༌། མཐའ་མ་རྟ་ཐོག་ནས་དུག་མཚོའི་ནང་དུ་ལྷུང་བའང་མཐོང་ཞིང༌། དེར་འཇང་མི་རྒན་འབྲིང་གཞོན་གསུམ་མྱ་ངན་གྱིས་ནོན་ཞིང༌། གླིང་ལ་དགྲ་བྱས་ན་འདི་ལས་ཅི་ཡོད། རྟ་ཡིས་ཀྱང་དེ་ལྟར་བྱེད་པ་ཨང་ཟེར་ཐམས་ཅད་ངོ་ནག་རོག་གེར་བསྡད། དེའི་ནུབ་ཟས་སྐོམ་བྱ་བའི་འདུ་ཤེས་ཀྱང་མེད་པར་ལུས། དེ་ནས་གླིང་དམག་རྣམས་ཀྱི་སྒར་ནང་དུ་རྒྱལ་པོ་སེང་ཆེན་དེ་ཉིད་ལྷ་གུར་མཐོང་བ་ཀུན་སྨོན་གྱི་ནང་དུ་བཞུགས་པའི་སྐབས། ལྷ་ཆེན་ཚངས་པ་དཀར་པོ་དེ་ལྷ་རྟ་གྲོ་དཀར་ཞབས་ལ་ཆིབས་ཤིང་མདུན་གྱི་ནམ་མཁར་སྤྲིན་སྣ་འཇའ་འོད་འཁྲུགས་པའི་གུར་ཁང་ནས་ལུང་བསྟན་གྱི་གླུ་འདི་བཞེངས་པར་གདའོ། །
སྐྱབས་ཆོས་སྐུ་ལོངས་སྐུ་སྤྲུལ་སྐུ་གསུམ། །དག་པ་ཡིད་ཀྱིས་གསོལ་བ་འདེབས། །བདེ་གཤེགས་རྒྱལ་བ་རིགས་ལྔ་ལ། །གུས་པའི་སེམས་ཀྱིས་གསོལ་བ་འདེབས། །ཁམས་གསུམ་འཁོར་བའི་སེམས་ཅན་ལ། །ཡེ་ཤེས་སྤྱན་གྱིས་དབྱིངས་ནས་གཟིགས། །ང་དང་ང་ངོ་མ་ཤེས་ན། །ཡབ་ཆེན་ཚངས་པ་དཀར་པོ་ཟེར། །ལྷ་གུར་དཀར་པོའི་ནང་བཅུད་དེ། །འཛམ་གླིང་རྒྱལ་པོ་མིན་ངོ་ཤེས། །ཡིན་ན་ལུང་བསྟན་གསལ་ཚིག་ཡོད། །ས་ཐམ་འཇང་གི་ས་ཆ་རུ། །གླིང་དམག་ཚེ་སྡོད་བྱས་པ་དེ། །ད་ལྟ་སྨོན་ལམ་འགྲུབ་ངེས་ཡིན། །ས་ཐམ་དབང་ཐང་རྫོགས་ལེ་ཡིན། །དེ་ནས་གསོན་དང་ཞུ་རྒྱུ་འདུག། །ས་ཐམ་འཇང་གི་སྒར་ཆེན་ནས། །སང་ཉིན་ནམ་གྱི་ཕྱེད་ཆ་རུ། །གླིང་དཀར་ལས་དམག་བཅོམ་རྩིས་འདུག །ཚུར་འགེལ་བྱུང་ན་ཡག་རྒྱུ་མེད། །འགྱོད་ལ་ཤི་རྨས་ཡོང་ངེས་ཡིན། །དེ་བས་སང་དགོང་ནམ་ཕྱེད་དུ། །གླིང་དཀར་ལས་དམག་ཕར་ལ་ཆོས། །འཇང་སྡེའི་དམག་སྒར་བཏབ་པ་དེ། །མ་བཞག་འཕྱུག་པ་ཡོང་ངེས་གྱིས། །མཚལ་དམར་དཔོན་པོ་ཁེར་སྐྱེས་ཁོ། །གྲི་ཡ་ཟིའི་ངར་ལ་མ་དྲངས་ན། །གཞན་མིན་སུས་ཀྱང་ཐུབ་པ་མིན། །དགྲ་ལྷ་ཁོ་དང་ཐུག་ལེ་ཡོད། །མགོན་དགྲ་ལྷའི་ཚེ་མདུད་ཁོང་ལ་སྤྲོད། །གཞོན་ནུ་མདུང་ཐུང་ལག་རིང་ཁོ། །མདའ་ལྷ་མདའི་ངར་ལ་མ་དྲངས་ན། །གཞན་མིན་སུས་ཀྱང་ཐུབ་ལེ་མེད། །ཉི་འབུམ་ཁོང་ལ་ཐུག་ལེ་ཡོད། །མགོན་དགྲ་ལྷའི་ཚེ་མདུད་ཁོང་ལ་སྤྲོད། །དུག་མི་བཀྲ་ཤིས་ཐོག་འགྱུར་ཁོ། །མཐེབ་སྐྱེན་པོའི་དཔུང་གིས་མ་ལོན་ན། །གཞན་མིན་སུས་ཀྱང་ཐུབ་ལེ་མེད། །བློན་འདན་མ་ཁོང་དང་ཐུག་རྒྱུ་ཡིན། །མགོན་དགྲ་ལྷའི་ཚེ་མདུད་ཁོང་ལ་སྤྲོད། །ལྷའུ་ངར་རྒོད་ལག་རིང་ཁོ། །ཕོ་རྩལ་ཆེན་འགག་གསོད་མ་བྱུང་ན། །གཞན་མིན་སུས་ཀྱང་ཐུབ་ལེ་མེད། །འབྲུ་སྒ་སྡེ་ཁོང་དང་ཐུག་རྒྱུ་ཡིན། །མགོན་དགྲ་ལྷའི་ཚེ་མདུད་ཁོང་ལ་སྤྲོད། །དུག་མི་ཐ་ཆུང་ལུ་གུ་དེ། །མཚོན་ལེབ་ཆེན་ངར་ལ་མ་དྲངས་ན། །གཞན་མིན་སུས་ཀྱང་ཐུབ་ལེ་མེད། །དཔའ་ལ་ཁོང་དང་ཐུག་རྒྱུ་ཡིན། །མགོན་དགྲ་ལྷའི་ཚེ་མདུད་ཁོང་ལ་སྤྲོད། །གསེར་ལྷ་དཔོན་པོ་གཡུ་ཁྲབ་ཅན། །ཐབས་ཞི་དྲག་འཛིང་སྐོར་མ་མཁས་ན། །སང་ཉིན་སུས་ཀྱང་ཐུབ་པ་མེད། །ཤན་པ་དཔོན་དང་ཐུག་རྒྱུ་ཡིན། །མགོན་དགྲ་ལྷའི་ཚེ་མདུད་ཁོང་ལ་སྤྲོད། །འཆི་མེད་ལྕགས་རྡོ་ནག་པོ་ཁོ། །སང་ཉིན་སུས་ཀྱང་ཐུབ་ལེ་མེད། །ང་ཚངས་པས་སྤྲུལ་པ་གར་རྒྱུགས་ཀྱི། །ཁ་ཁེར་གཞི་མ་མ་བྱུང་ན། །གླིང་གིས་འཛིན་པས་ཐུབ་པ་མེད། །འགྲན་མེད་བེར་ཐུལ་བཀའ་བློན་ཁོ། །ཁྱེད་རྒྱལ་པོ་མིན་པ་འདུལ་སྐལ་མེད། །དེ་ནས་གནངས་ཀྱི་ཉི་མ་ལ། །རྨུ་རྗེ་ས་ཐམ་རྒྱལ་པོ་ཁོ། །མྱ་ངན་ཁང་ནས་ཐོན་རྒྱུ་ཡིན། །ཁོའི་བློ་ཁ་ཚངས་པས་སྒྱུར་ལེ་ཡིན། །མཚོ་ནོར་བུ་འཁྱིལ་དུ་རྫིང་བུ་ལ། །སྡུག་མུན་པ་གསལ་བྱེད་སྡིག་འཁྲུལ་དུ། །ཐོ་ཐོག་བུ་གསུམ་དང་བཅས་པ། །དཔོན་གཡོག་ཉུང་ཧྲག་འགྲོ་རྒྱུ་རེད། །ཁྱོད་ཇོ་རུ་མ་སྡོད་དེ་རུ་རྒྱུགས། །དངོས་མེད་ཁུལ་གྱི་མ་ཐུབ་ན། །དངོས་ཅན་ཐུག་པས་ཐུབ་ས་མེད། །དངོས་མེད་ཁུལ་གྱི་དགྲ་འདུལ་གྱིས། །དེ་ནས་ཅི་བསམ་འགྲུལ་ལེ་ཡིན། །ལས་འཇིགས་པ་མེད་དོ་ཨ་ཕའི་བུ། །མི་ལ་སྲ་བའི་གོ་ཁྲབ་དང༌། །རྟ་ལ་མི་འགྱེལ་དཔུང་རྟེན་ཡོད། །དགའ་བོ་སྐྱིད་པའི་དགྲ་འདུལ་ཡིན། །སངས་རྒྱས་བསྟན་པ་ཚུགས་ངེས་ཡིན། །མི་འགྱུར་རྒྱལ་པོའི་ཐུགས་ལ་ཞོག །
ཅེས་གསུངས་ཤིང་ནམ་མཁའ་ལ་ཕེབས་སོ། །རྒྱལ་པོ་ཆེན་པོ་ཐུགས་དགའ་བ་དང་འཇིགས་པ་གཉིས་ཀའི་ངང་ནས་སང་ཉི་ཤར་ཙམ་དུ། དཔའ་རྟུལ་དེ་དྲག་ལྷ་གུར་དུ་བསྡུས་ཤིང་ཚངས་པའི་ལུང་བསྟན་བྱུང་ཚུལ་གསུངས་གླུ་འདི་བཞེངས་སོ། །
ལྷ་ཀི་ཀི་ཀི་ལ་སྭོ་སྭོ་སྭོ། །ཀི་ཀི་ལྷ་ཡི་སོྭ་བ་ཡིན། །ཀི་སོྭ་དཔའ་བོའི་སྡོང་གྲོགས་མཛོད། །གསོན་དང་གླིང་དཀར་དཔའ་རྟུལ་རྣམས། །ལྷ་ཆེན་ཚངས་པ་དཀར་པོ་ཁོང༌། །མི་དཀར་རྟ་དཀར་གོ་ཆ་དཀར། །སེམས་དཀར་གསུང་ཚིག་ཆོས་ཚིག་དཀར། །དཀར་པོ་དྲུག་གི་གྲལ་སྡེབ་དེ། །གླིང་དཀར་སྟོད་ལ་གཏད་སོ་རེད། །ད་ལོ་གླིང་དམག་སྒར་ཆེན་འདིའི། །ཅི་འདོད་བསམ་པ་འགྲུབ་ཡོང་གསུངས། །འཇང་ས་ཐམ་རྒྱལ་བློན་འཁོར་བཅས་རྣམས། །རྒོད་པོ་ལུང་དུ་མི་རན་ཡོད། །ད་འཇང་མིའི་དབང་ཐང་རྫོགས་ཡོད་གསུངས། །སང་ཉིན་ཉི་མ་རྩེ་ཤར་ལ། །གླིང་ལྷ་སྡེའི་དམག་སྒར་སྒར་ཆེན་ནས། །སྒར་མི་འདེབས་འཇང་དམག་བཅོམ་ནས་འགྲོ། །དེ་གྲགས་དཔའ་རྟུལ་རེ་རེ་ལ། །དགྲ་རེ་རེའི་གདོང་ཐུག་ཡོང་ལེ་ཡོད། །གསེར་ལྷ་དཔོན་པོ་གཡུ་ཁྲབ་ཅན། །སང་ཉིན་སུས་ཀྱང་ཐུབ་པ་མིན། །ཤན་པ་དཔོན་དང་ཐུག་རྒྱུ་ཡིན། །སྟང་མ་རང་ཚོད་ཐབས་མཁས་གྱིས། །འཆི་མེད་ལྕགས་རྡོ་ནག་པོ་དང༌། །འཇང་བློན་མིང་ཆེན་བེར་ཐུལ་གཉིས། །སང་ཉིན་དབང་ཐང་རྫོགས་པ་མེད། །མི་གཉིས་གར་རྒྱུགས་དོགས་ཟོན་གྱིས། །འཇང་གཡོན་མི་དར་ཆོས་ཁྲི་ཁོ། །དཔའ་མོ་རང་དང་ཐུག་རྒྱུ་ཡིན། །མདུང་མོ་རང་གིས་ཨེ་དྲོངས་ལྟོས། །དེ་ནས་དག་པ་ལྷ་རིགས་ཀྱི། །ཚེ་ལ་སྲ་བའི་མདུད་པ་གནང༌། །སྲོག་ལ་བརྟེན་པའི་འཁར་བ་མཛོད། །གོ་ཁྲབ་ལྷ་དམག་མདངས་སྟོང་མཛོད། །དེ་ནས་ས་ཐམ་རྒྱལ་པོ་ཁོ། །མྱ་ངན་ཁང་ནས་ཐོན་རྒྱུ་ཡིན། །དགྲ་འདུལ་ལུགས་ཅི་དགོས་ངེད་ཀྱིས་བྱེད། །ཁྱེད་རྣམས་སེམས་ལ་དེ་ལྟར་ཟུངས། །
ཞེས་གླུ་དེ་ལྟར་གསུངས་སོ། །དཔའ་རྟུལ་ལྷ་དམག་གི་མི་རྟ་རྣམས་ལ་ལྷ་ཡི་རིལ་བུ་དང༌། སྲུང་བ་རྡོ་རྗེའི་གོ་ཁྲབ་ཀྱིས་ཁྱབ་པར་གནང༌། དཔའ་རྟུལ་རྣམས་ཀྱིས་རང་རང་གིས་མངགས་པའི་ལས་ལ་ཐུགས་གཏད་ཅིང་དེའི་ཕར་རྒྱབ་ལ་ཤིན་བཟང་བས་གཟའ་སྐར་འཕྲོད་སྦྱོར་དགེ་བའི་དུས། འཇང་མི་རྣམས་ཀྱང་དེ་ནུབ་བློན་བེར་ཐུལ་དེ་ལ་རྨི་ལྟས་ཉེས་ཏེ་བློ་ཕུགས་མི་བདེ་བ་བྱུང་བ་དང༌། འཕྲལ་དུ་ཐམས་ཅད་སོ་སོ་ནས་རྟ་སྒ་བསྟད་ཅིང་གོ་ཆ་རྣམས་སྤྲས་ཡོད་པ་དང་མཉམ་དུ་ནམ་ལངས་པ་དང༌། གླིང་དམག་གིས་ཕྱོགས་བཞི་ནས་སྐོར་ཞིང༌། དང་པོ་ཤར་ཕྱོགས་སྲས་དགྲ་ལྷ་རྩེ་རྒྱལ་དང༌། བཀའ་བློན་འདན་མ་གཉིས་ལ་རྟ་དམག་གིས་སྐོར། ལྷོ་ཕྱོགས་ནས་གསེར་པའི་ཉི་འབུམ་དང༌། འོམ་པའི་དཔའ་སེང་གཉིས་ལ་རྟ་དམག་གིས་སྐོར། ནུབ་ཕྱོགས་ནས་མུ་སྤྱང་རིན་ཆེན་དར་ལུ་དང༌། འབྲུ་སྒ་སྡེ། ཁྲོ་ཐུང་བཅས་ལ་རྟ་དམག་གིས་སྐོར། བྱང་ཕྱོགས་ནས་དཔའ་ལ་དང་ཤན་པ། དཔའ་མོ་བཅས་རྟ་དམག་གིས་སྐོར། དེ་དག་གི་དབུས་སུ་འཛམ་གླིང་སེང་ཆེན་རྒྱལ་པོའི་སྤྲུལ་པ་རེ་རེ་བཞུགས་ཤིང༌། ཕྱོགས་བཞིའི་ནས་གླིང་གི་དཔུང་དམག་གང་ཡོད་རྒྱུགས་ཤིང་ཧྲིལ་གྱིས་འདྲེན་ནས་འཁྲུག་འགྲེལ་ཏེ་ཀི་ཁྱེར་དང་རྟ་རྡུལ་བར་སྣང་ཁེངས་པས་འཁྲུག་འཁྲུག་ལོང་ལོང་དུ་བྱེད་སྐབས་ནམ་ལངས་ནས་ཉི་མ་ཕྱེད་སླེབས་ཙམ་དུ། རི་ཀླུང་ཐམས་ཅད་ལ་བྲོས་པ་དང་བསྡད་པ་དང་བསད་པ་སོགས་བསམ་གྱིས་མི་ཁྱབ་པའི་བར་དེར། འཇང་རི་སྟག་སྣ་ཁྲ་བོའི་མར་ཞབས་སུ་གསེར་པའི་ཉི་འབུམ་དེས་འཇང་དམག་བྲོས་པའི་རྗེས་སུ་ལུག་ནང་དུ་སྤྱང་ཀི་ཤོར་བ་ལྟར་གསོད་ཅིང་འགྲོ་མུས། འཇང་གཞོན་ནུ་མདུང་ཐུང་ལག་རིང་དེས། གསེར་པའི་ཉི་འབུམ་གྱི་གདོང་བཀག་ཅིང་མདའ་མགོ་འཕུར་ནས་གླུ་འདི་བླངས་སོ། །
གླུ་ལེན་པ་དགུང་སྔོན་དབྱིངས་ནས་ལེན། །དགུང་སྔོན་ནམ་མཁའ་མི་ལེན་རྒྱུ། །མགོ་སྤྱི་བོ་གཏད་ས་ཁོང་ལ་ཞུ།་་་༌།ས་འདི་ས་ངོ་མ་ཤེས་ན། །འཇང་སྟག་རི་ཁྲ་བོ་མར་ཞབས་རེད། །ཡུལ་གྲུ་བཞི་ཕ་མལ་བུ་བཟུང་རེད། །ཕོ་ང་དང་ང་ངོ་མ་ཤེས་ན། །ཕོ་མི་འགྱུར་གཞོན་ནུ་ལག་རིང་ཟེར། །གཞན་མིན་ཕོ་དང་འདྲ་ལེ་མིན། །ལག་རིང་ཐོབ་པའི་གྲས་ལ་ཡོད། །གནམ་སྔོན་མོའི་རྒྱུ་སྐར་འབེབས་མི་ཡིན། །ཕྱི་རྒྱ་མཚོའི་གཏིང་ནས་དཀྲུག་མི་ཡིན། །སྟག་ཡེར་མོ་ལག་བཟུང་འདོན་མི་ཡིན། །འཇང་ཕྱི་གླིང་ནང་གླིང་བར་གླིང་གསུམ། །སྟག་མི་ཤ་ཟ་འདྲའི་བུ་མང་ཡང༌། །མི་ང་དང་འདྲ་བ་རེ་རེ་ཙམ། །ང་ལས་ལྷག་པ་གཅིག་ཀྱང་མེད། །ཁོ་རེ་གླིང་ཕྲུག་སེར་པོ་གཡབ། །མི་མ་འགྲས་མིག་དམར་འཁྱུག་ལེ་ཁྱོད། །ངོ་མ་ཤེས་ཡིད་རྩ་དཀྲུག་མི་ཁྱོད། །མི་མང་སྟེང་དུ་འགྲོ་འགྲོ་དེ། །ང་གཞོན་ནུའི་བུ་ལ་ཨེ་འགྲོ་མེད། །ཟིལ་དཀར་འབྲི་ལ་འཛིང་འཛིང་དེ། །བྲེ་སེར་འབྲོང་ལ་འགྲོ་མདོག་མེད། །ལ་ཆེན་གླིང་གི་དུར་དམག་འདི། །མ་བྱས་ལས་ལ་གཅིག་ཀྱང་མེད། །རྨུ་རྗེ་ས་ཐམ་ཕ་གཞིས་དེ། །ས་ནག་རླུང་གིས་བསྐྱོད་བསྐྱོད་བྱས། །ས་ཐམ་འཇང་དང་མཐོང་སྨོན་གླིང༌། །གནམ་སའི་ཁྱད་པར་ལོག་ས་མེད། །མངའ་ཐང་བྱས་ཀྱང་ས་ཐམ་ཆེ། །བསོད་ནམས་བྱས་ཀྱང་ས་ཐམ་ཆེ། །ཕྱི་རུས་པའི་བསེས་མཁར་གཏོར་བ་ཤོག །ནང་རྣམ་ཤེས་མར་མེ་དྲོངས་ལ་ཤོག །ཅེས་ཟེར་ཞིང་མདའ་ཞིག་བསྲུངས་བྱུང་བས། ཉི་འབུམ་གྱི་སྐུ་ལ་ཕོག་ཅིང་གསེར་ཁྲབ་དེའི་བྱང་བུ་ཁ་ཤས་གཏོར་ཀྱང༌། སྲུང་བ་རྡོ་རྗེའི་གོ་ཁྲབ་ཀྱི་མཐུས་སྐྱོན་མ་བྱུང༌། ཉི་འབུམ་གྱི་བསམ་པར། རྒྱལ་པོའི་གསུངས་བཞིན་ལྷ་མདའ་མིན་པས་མི་གསོད་དགོངས། གེ་སར་རྒྱལ་པོའི་ལྷ་མདའ་ཆ་གསུམ་ཡོད་པ་གཅིག་གཞུ་སྟེང་དུ་བཞག་ཅིང་མདའ་གླུ་ལྷ་སྐུལ་འདི་ལྟར་བླངས་སོ། །
གླུ་མཆོད་དོ་དགུང་སྔོན་ཕོ་བྲང་ནས། །ཚངས་པ་ལྷ་ཡི་སྡེ་ཚོགས་མཆོད། །དཔའ་སེང་འོད་ཀྱི་རྒྱལ་པོ་ནས། །དེ་རིང་དགྲ་སྲོག་རྩད་ནས་ཆོད། །ང་དང་ང་ངོ་མ་ཤེས་ན། །འཛམ་གླིང་བོད་ཀྱི་ས་ཆ་ནས། །གླིང་གེ་སར་ཨ་སྔོན་ཚུལ་དུ་ཡོད། །གསེར་འབུམ་ཉི་འོད་ཀུན་ལ་ཁྱབ། །ཕོ་ལོ་ཉེར་གཅིག་གོང་ང་ནས། །དཔའ་མེད་ཀྱང་གསེར་པའི་ཤོག་དཔོན་བྱས། །སྙིང་མེད་ཀྱང་གེ་སར་ཆོས་བློན་བྱས། །རྩལ་མེད་ཀྱང་གཡས་རུའི་དམག་དཔོན་བྱས། །ད་ནང་ཉི་མ་སྔ་དྲོ་ལ། །འཇང་དམག་སྒར་ཆེན་བཏབ་ལེ་དེ། །ཡར་དེད་རི་བོའི་རྩེ་ལ་དེད། །མར་དེད་ཆུ་བོའི་གཞུང་ལ་དེད། །བསད་པ་ལས་ཀྱང་རྨས་པ་མང༌། །རྨས་པ་ལས་ཀྱང་ལྕེབས་པ་མང༌། །ཐུག་རྒྱུའི་བུ་དང་ཨེ་ཐུག་བསམ། །བསམ་པས་དོན་དེ་འགྲུབ་ནས་བྱུང༌། །གསོན་དུ་བཏང་ན་ཉི་འབུམ་མིན། །ཁྱོད་ཕར་ལ་ཕྱི་བྲོས་མ་བྱེད་ཅིག །ང་གོམ་གང་ཕྱི་ལ་བྲོས་མདོག་མེད། །ལག་གི་མདའ་མོ་གསེར་ལྟོང་མ། །གླིང་གེ་སར་རྒྱལ་པོས་གནང་ལེ་ཡིན། །དེ་རིང་མི་འཕེན་དཀའ་མེད་རེད། །ཁྱོད་ལུས་སེམས་ཁ་ཁར་མ་བཏང་ན། ། ང་གསེར་པའི་ཉི་འབུམ་མིན་པའི་རྟགས། །གཞུ་ཡར་མཆོག་ལྷ་དང་སྲུང་མས་འཚོས། །མར་མཆོག་མ་དྲོང་ཀླུ་ཡིས་འཚོས། །འཆང་བཟུང་གེར་མཛོ་གཉན་གྱིས་འཚོས། །མདེལ་རྩེ་ཚ་ཚ་ཐེལ་ཐེལ་སོང༌། །ལྟོང་ཁ་དུ་བ་ཕྱུར་རེ་སོང༌། །གཞུ་སྐད་ནམ་མཁའ་འབྲུག་ལྟར་ལྡིར། །ཉི་མ་དེ་རིང་དཀར་ལམ་དུ། །ས་སྟེང་འདུག་རེས་འཁོར་ལོ་རེད། །
ཅེས་གསུངས་ཤིང་མདའ་བསྲིངས་པས། ཁོ་ཡི་བྲང་དཀྱིལ་དུ་ཕོག་ཅིང་གོ་ཁྲབ་སོགས་ཀྱིས་མ་བརྟེན་པར་རྒྱབ་ཕྱོགས་ནས་སྐྱ་སེང་ངེར་ཐོན། ཁོ་ཡང་རྟ་ཐོག་ནས་གན་རྐྱལ་ལ་འགྱེལ་ཞིང་ཟིང་ངེར་བྱུང༌། དེར་ཁོ་ཡི་མགོ་དེ་གོང་ལེན་དུ་ཁྱེར་ཅིང་འཇང་དམག་རྣམས་ཆག་ཉིལ་དུ་གཏོང་བ་དང༌། རི་ནག་སྤུང་པས་རི་ཐང་མཚམས་སུ་ནགས་མཐུག་པོ་ཡོད་པའི་ཐད་དུ། འདན་མ་དེས་འཇང་མི་གསོད་ཅིང་ནགས་གསེབ་ཏུ་གབ་པ་རྣམས་རིམ་པར་བཅོམ་པའི་སྐབས་དེར། དུག་མི་བཀྲ་ཤིས་ཐོག་འགྱུར་དེས་རྟ་དམར་རྫི་དེ་བཞོན་ནས་འདན་མའི་ཕྱི་བཞིན་བྱུང་བ་དང༌། རི་སྣ་ནག་ལོང་ལོང་ཡོད་པ་ཞིག་ཏུ་ཁ་ཐུག་བྱུང་བས། ཁོ་ཡིས་འདན་མ་མཐོང་བ་དང༌། གཏམ་ལན་སོགས་ཅི་ཡང་མེད་པར་གྲི་བཏོན་ནས་མཆོང་བྱུང་བ་དང༌། འདན་མས་ཀྱང་རྒྱལ་པོས་གསུངས་པ་དྲན་ནས་མདའ་གཞུ་སྟེང་དུ་བཞག་ནས་འདོམ་བཀང་ཞིང་བསྡད་པས། ཁོ་ཡང་ཐེ་མི་ཚོམ་པར་བྱུང༌། འདན་མས་མདའ་དེ་བསྲིངས་པ་དང་ཁོ་ལ་མདའ་རྨས་ཆེ་ཙམ་བྱུང་ཡང༌། ད་རུང་བྲོས་བློ་མེད་པར་ཚུར་བྱུང་བས། ཡང་མདའ་གཅིག་བསྲིངས་པས་དུག་མདའ་དེས་ཡ་ཐོད་དཔྲལ་བའི་དུང་ཕོར་ལིང་གིས་བཀོག་ཅིང་རྟ་ཐོག་ནས་ལྷུངས། འདན་མས་ཁོ་ཡི་མགོ་དར་འཕྲུ་བཅས་བླངས་ཤིང་ཁོ་རང་གི་རྟ་དེའི་གོང་དུ་བསྡམས་ནས་ཁྲིད་དེ་ཁོང་རང་གི་རྟ་རྔོག་ཕྱུག་དེ་གཡབ་ནས་ཡང་འཇང་མི་རྣམས་གསོད་ཅིང༌། དུས་དེ་ཙམ་ན་རི་ཐང་མཚམས་དེར་མཚལ་དམར་དེས་རང་ཤོག་འཕྲུ་དམར་ཅན་བརྒྱ་ཚོ་ཙམ་ཞིག་ཁྲིད་ནས་ཡོད་པ་དང༌། སྲས་དགྲ་ལྷ་རྩེ་རྒྱལ་དང་ཐུག    མཚལ་དམར་དེ་དམག་གི་ཁྲོད་ནས་རྒྱང་ཙམ་ཐོནཅིང་སྲས་དགྲ་ལྷའི་གདོང་བཀག་སྟེ་བྱུང་བ་དང་མདའ་རྒྱང་ཙམ་ནས་མདའ་གཞུ་སྟེང་དུ་བཞག་ཅིང་གཏོང་གཞན་ཅིང་ཡང་གཏམ་མེད་པར་གླུ་འདི་བླངས་སོ། །
གླུ་རེ་རེ་མི་ལེན་ཀ་མེད་རེད། །རེ་རེ་མ་བླངས་ཚོད་ཡོད་རེད། །སྐྱིད་ན་ཇ་ཆང་མཚར་གླུ་རེད། །སྡུག་ན་རང་སེམས་གསོ་གླུ་རེད། །ས་འདི་ས་ངོ་མ་ཤེས་ན། །རི་ནག་སྤུང་པའི་མར་ཞབས་རེད། །ང་དང་ང་ངོ་མ་ཤེས་ན། །མཚལ་དམར་དཔོན་པོ་ཁེར་སྐྱེས་རེད། །ཁོ་རེ་གླིང་ཕྲུག་དཀར་པོ་ཁྱོད། །ཁྱོད་སྣང་བ་མཐོ་བའི་མི་ཞིག་རེད། །ཝ་གྲ་ཡག་ཚང་དུ་མི་ཉལ་ལེ། །སྟག་དམར་པོའི་གདོང་དུ་ཅི་ལ་ཡོང༌། །ཁྱོད་གླིང་ཕྲུག་སྒར་ཆུང་མི་འཛིན་པར། །ང་མཚལ་དམར་གདོང་དུ་ཅི་ལ་འོང༌། །ཚེ་ཟད་བུ་ཞིག་ཡིན་ངེས་རེད། །ལས་དྲག་པོས་དེད་ལེ་ཡིན་ངོ་རེད། །ང་མཚལ་དམར་བུ་ཡི་ཁེར་སྐྱེས་ནི། །དགྲ་མི་ཐུབ་ཆམ་ལ་འབེབས་མི་ཡིན། །གཉེན་མ་ནུས་མཐའ་ནས་སྐྱོང་མི་ཡིན། །དཔའ་རྒྱ་སྟག་མི་ཤ་ཟ་མི་ཡིན། །སྟག་དམར་ཡག་ང་གཉིས་འདྲ་འདྲ་ཡིན། །མདེལ་རྩེ་དིང་རི་མི་རྒན་དེས། །ད་ལྟ་མི་དཀར་རྟ་དཀར་འདི། །དོན་སྣོ་བཅུ་གཉིས་བཏུབ་ལ་ཤོག། །དཔའ་སྟང་མ་རང་གིས་ལོན་ལེ་ཤོག །
ཅེས་ཟེར་ཞིང་མདའ་བསྲིངས་པས། སྲས་དགྲ་ལྷ་ཁོའི་གླུ་དེའི་ཚིག་ལ་ཐུགས་ཨེན་ཙམ་ཡེངས་པའི་སྐབས་ཁྲབ་སྟོད་སྨད་ཀྱི་མཚམས་སུ་ཕོག་ཀྱང༌། ནང་དུ་རྒྱལ་པོའི་དགྲ་ལྷའི་ཚེ་གོས་སྨུག་པོ་མནབ་ཡོད་པས་མདའ་ཡིས་མ་ཆོད། དེར་མདའ་དེ་ཕྱག་གིས་བཞེས་ཤིང་གྲི་ཡ་ཟི་སྐར་ཕྲན་དེ་བཏོན་ནས། ཡ་ཁོ་རེ་མཚལ་དམར་ཁེར་སྐྱེས་ཁྱོད། མ་གྲགས་དགུ་རུ་གྲགས་སོང་ཟེར། གཟུག་ནུས་མེད་པའི་མདའ་འཕེན་དེ། མདའ་རྒྱང་ནས་འཕེན་པའི་མི་ཞིག་མིན། གྲི་བཅར་ནས་དབྱུགས་པའི་མི་ཞིག་ཡིན་ཞེས་གསུངས་ཤིང༌། ངག་རྟ་རྩེད་གླུ་དཀར་མོ་ལ་དྲངས་ཏེ་གླུ་འདི་བླངས་སོ། །
དཀོན་མཆོག་གསུམ་ལ་གསོལ་བ་འདེབས། །བྱིན་རླབས་གཏེར་ཁ་འབྱེད་དུ་གསོལ། །དངོས་གྲུབ་བདུད་རྩིའི་ཆར་པ་ཕོབ། །རིགས་དྲུག་འཁོར་བའི་འདམ་ནས་དྲོངས། །ང་དང་ང་ངོ་མ་ཤེས་ན། །འབུམ་པའི་དགྲ་ལྷ་རྩེ་རྒྱལ་ཟེར། །གླུ་འདི་དང་གླུ་ངོ་མ་ཤེས་ན། །དགྲ་ལྷའི་རྩེད་གླུ་དཀར་པོ་ཟེར། །དགུང་ནས་ཤར་བའི་ཁྲི་གདུགས་དེ། །འཛམ་གླིང་རྒྱལ་པོ་གེ་སར་ཡིན། །འོད་ཡ་དཔུང་སྡེབས་བྱེད་མི་ལ། །དགྲ་ལྷ་ཆུ་ཤེལ་ཟླ་བའི་དཔེ། །དཔའ་རྟུལ་སྐར་ཚོགས་ཕྲ་མོ་ལ། །དབང་སྒྱུར་ཉི་ཟླ་གཉིས་ལས་མེད། །གླིང་བཞི་མུན་གསེལ་བདེ་ཐབས་ལ། །འོད་ཁྱིམ་ཉི་ཟླ་གཉིས་ལས་མེད། །ཁོ་རེ་འཇང་ཕྲུག་དམར་པོ་གཡབ། །སྨུག་པོ་གདོང་གི་ཕ་རྒྱུད་འདི། །དཔའ་ཡོད་མ་རེད་དཔའ་མེད་རེད། །ཁྱོད་མཚལ་དམར་ཡིད་ལ་དེ་ལྟར་ཞོག །
ཅེས་གསུངས་ཤིང་རྣོན་པོ་ཡ་ཟི་སྐར་ཕྲན་དེ་ཕྱར་ནས་ཆིབས་དཀར་འཇམ་ཡ་མེད་དེ་སྤྲིན་དཀར་རླུང་གིས་སྐྱོད་པ་ལྟར་བྱོན་པ་དང༌། ཁོ་ཡང་གྲི་བཏོན་ནས་མཆོང་བྱུང་བས། གྲི་ཁ་ཐུག་ཙམ་བྱས་པའི་མཐར་སྲས་དགྲ་ལྷས་གྲི་དབྱུགས་ཐེངས་གཅིག་ལ་ཁོ་ཡི་མགོ་འཕྲུ་དང་བཅས་པ་ས་ཁར་དྲུལ་ནས་བསད་དོ། །དེ་ཙམ་ན། དཔའ་ལའི་མི་སྤྱང་དེས་འཇང་མི་རྣམས་གསོད་ཅིང་ཡར་གཤགས་མར་གཤགས་ཀྱི་སྐབས་དེར། དུག་མི་ཐ་ཆུང་ལུ་གུ་དེ་དང་ཐུག་ཅིང༌། དུག་མི་དེས་རྒྱང་ཙམ་ནས་གྲི་མགོ་འཕུར། རྟ་ཁ་འཐེན་ནས། ཡ་ཁོ་རེ་གླིང་ཕྲུག་དཀར་པོ་གཡབ། ཕོ་རྒོད་དཔའ་མདོག་དེ་ཙམ་ཡིན། མང་དྲགས་ན་རང་སྲོག་སྐྱེལ་ལེ་ཡོང༌། ཟེར་ཞིང་གླུ་འདི་ལྟར་ལེན་པར་གདའོ། །
ཨ་ལ་ཐ་ལ་ཐ་ལ་རེད། །ཐ་ལ་གླུ་ཡི་ལེན་ལུགས་རེད། །ཡར་མཁྱེན་གནམ་ཐེལ་དཀར་པོ་མཁྱེན། །བར་མཁྱེན་བར་ཐེལ་ཁྲ་བོ་མཁྱེན། །མར་མཁྱེན་ས་ཐེལ་ནག་པོ་མཁྱེན། །དུག་མིང་ང་ལ་སྡོང་གྲོགས་མཛོད། །རྒོད་པོའི་བུ་ལ་དཔལ་མགོན་མཛོད། །ང་དང་ང་ངོ་མ་ཤེས་ན། །དུག་མི་ཐ་ཆུང་ལུ་གུ་ཟེར། །དཔའ་མི་འགྱུར་སྟག་གཟིག་སྤུན་གསུམ་ཡོད། །དགྲ་ལ་ཕྱར་ན་དུག་མི་ཡིན། །གཉེན་ལ་ངོམ་ན་དུག་མི་ཡིན། །རྒྱ་བོད་བར་ལ་གྲགས་ལེ་ཡིན། །དཔའ་ཁ་བྱས་ན་འགྲན་ཡ་མེད། །ཁོ་རེ་གླིང་ཕྲུག་དཀར་པོ་སྐྱ། །ཕོ་གསར་པོའི་རྒོད་རྒོད་དེ་ཙམ་ཡིན། །རྟ་གསར་པའི་མགྱོགས་མགྱོགས་དེ་ཙམ་ཡིན།  །རྔན་ཆེན་མ་བཏང་གཅིག་ཀྱང་མེད། །གླིང་ཕྲུག་མི་དཀར་རྟ་དཀར་ཁྱོད། །བྲག་རི་ཐོག་གི་གཏོར་འདྲ་ཞིག །མགོ་སྐེ་སྟང་མ་མ་བླངས་ན། །ང་དུག་མི་ཐོགས་པ་སྟོང་གཏམ་རེད། །ཁྱོད་དང་ང་རང་གཉིས་པོ་ནི། །བར་པ་སྐྱ་སེར་རླུང་ལས་མེད། །ཁྲག་མཐུང་དོག་མོ་ས་ལས་མེད། །ལྟད་མོ་ཨ་སྔོན་དགུང་ལ་ལྟོས། །མདའ་རྒྱང་འཕེན་བྱེད་པ་དར་དོགས་མེད། །གྲི་བཅར་ནས་རྒོད་པོ་སུ་རེད་ལྟ། །ཡང་མིན་ན་དགྲ་མགོ་ལོན་ལེ་བྱེད། །ཡང་མིན་ན་ཤི་བ་ཟེར་ལེ་བྱེད། །མ་བྱུང་ལོག་པ་དར་དོགས་མེད། །
ཅེས་གླུ་དེ་ལྟར་བླངས་ཤིང་གྲི་དེ་རྟ་ཡི་རྔོག་མ་ལ་ཕྱིས་ཕྱིས་དང༌། ཕྱར་ཕྱར་བྱེད་ཅིང་ཁོ་ཡི་གཏམ་ལན་ཞིག་ཡོད་སྲིད་བསམ་བསྡད་པས། དཔའ་ལས་མཚོན་ལེབ་ཆེན་གྲི་མགོ་འཕུར་ཞིང་སྨྲས་པ། ཁོ་རེ་འཇང་ཕྲུག་ཐ་ཆུང་ལུ་གུ་ཁྱོད་ལ་དཔའ་ཅི་འདུག་ཚོད་གཅིག་ལེན་ཡིན། དཔའ་གཏམ་དང་ཁ་པོ་ངོ་མི་ཚ་འམ། ང་དཔའ་ལའི་གླུ་ལ་ཚུར་ཉོན་དང་ཟེར་ནས་གླུ་འདི་བླངས་སོ། །
གླུ་རེ་རེ་མ་བླངས་ཀ་མེད་རེད། །སྐྱིད་ན་ཇ་ཆང་མཚར་གླུ་རེད། །སྡུག་ན་རང་སེམས་གསོ་གླུ་རེད། །ཕོ་ང་དང་ང་ངོ་མ་ཤེས་ན། །དཀར་ཡག་གངས་ཀྱི་དར་སེང་ལ། །གཡུ་རལ་གསར་དུ་ངོམ་དགོས་མེད། །ཙནྡན་ནགས་ཀྱི་རྒྱ་སྟག་ལ། །རི་མོ་གསར་དུ་ངོམས་དགོས་མེད། །བར་སྣང་མཐོངས་ཀྱི་གཡུ་འབྲུག་ལ། །ངར་སྐར་དགུང་དུ་གྲགས་དགོས་མེད། །མོན་འཇང་གཉིས་ཀྱི་ས་ཆ་རུ། །མི་འགྱུར་རྒོད་ཚང་ཁ་ལེབ་ནས། །མི་འགྱུར་དཔའ་ལའི་མི་སྤྲང་ཡོད། །ལྷོ་འཛམ་བུ་གླིང་གི་ས་ཆ་རུ། །དགུང་ནམ་མཁའི་ཁྲི་གདུགས་སེང་ཆེན་ལ། །བློན་མི་འགྱུར་རྒྱུ་སྐར་སྨིན་དྲུག་དེ། །ང་དཔའ་ལས་མ་གྲགས་ཡོད་དོགས་མེད། །རྟ་སྟོང་རི་བར་སྣང་རླུང་ཤུགས་ལ། །རྔོག་གནོན་མི་དཔའ་ལ་ང་ཙམ་ཡིན། །མཚོན་ལེབ་ཆེན་དགྲ་བོའི་ཤན་གྲི་ལ། །ལུང་སྒྱུར་མི་དཔའ་ལ་ང་ཙམ་ཡིན། །ཁྱོད་དུག་མི་ཐ་ཆུང་ལུག་གུ་ཁྱོད། །སྤྱང་དར་མའི་གདོང་གི་ལུག་ཆུང་ཁྱོད། །ཁྱོད་ང་རང་གཉིས་པོ་ཐུགས་ལེ་ཡིན། །མེ་ཆུ་དང་འཕྲད་ན་འཆི་བ་ཡིན། །ཁྱོད་ཚུར་བརྙས་གླིང་ལ་འགྲན་རྒྱུ་ལ། །ད་འགྱོད་ཅིང་ཨེ་འདུག་འཇང་ཕྲུག་ཁྱོད། །
ཅེས་པའི་གླུ་འདི་བླངས་སོ། །འཇང་དམག་རྣམས་འགའ་རེ་ཕྱིར་འགྱེལ། ལ་ལ་ནང་དུ་རུབ་ནས་ཟིང་ཟིང་ལོང་ལོང་གི་སྐབས་དེར། གཡོག་སེར་ཚ་རྐང་རིང་དང་ཁྲིམས་པ་གནམ་ལྕགས་མདེ་ལྔ་གཉིས་རེ་རེ་ནས་ཤོར་ན། ཤན་པ་དང་གསེར་ལྷ་གཉིས་ཐུག་ཅིང་དང་པོ་མདའ་འགྲན་བྱས་ཀྱང་ཐག་མ་ཆོད་དེ་ནས་མདུང་འགྲན། ཐ་མ་ཤན་པས་སྟང་མ་རང་ཚོད་ཀྱི་རྟ་དམར་ཆུང་ཁ་བསྒྱུར་ནས་བྲོས་པ་ལྟར་བྱེད། ཁོས་ཀྱང་འདེད་པ་ལྟར་གྱི་ངང་ནས་ཕན་ཚུན་དུ་གྱེས་སོ། །འཆི་མེད་ལྕགས་རྡོ་ནག་པོ་དེ་གླིང་གི་སྤྲུལ་པ་སྐྱེས་པ་མི་དཀར་རྟ་དཀར་དེ་དང་ཐུག་ཅིང་ལྕགས་རྡོས་གྲི་བཏོན་ནས་བྱུང་བས། སྤྲུལ་པ་དེ་བྲོས་པ་ལྟར་མཛད་ནས་མཐོ་རི་བོའི་རྩེ། དམའ་རྒྱ་མཚོའི་འགྲམ། ཆུ་བོའི་གཞུང་ཐམས་ཅད་དེད་པས། ཟིན་ལ་ཁད་མི་ཟིན་ལ་ཁད་ཀྱི་ངང་ནས་ཐང་ཆད་ཡིད་མུག་པ་ལྟ་བུས་ཤོར་བ་གདའོ། །བཀའ་བློན་བེར་ཐུལ་དང༌། རྒྱལ་པོ་སེང་ཆེན་གྱི་སྤྲུལ་པ་དེ་ཉིད་མདའ་འགྲན་དང་མདུང་འགྲན་གྱི་འཛིང་ཁ་བྱེད་རྩིས་བེར་ཐུལ་གྱིས་མདུང་བསར་ནས་བྱུང་བས། སྤྲུལ་པ་དེས་ཀྱང་མདུང་བསར་ཞིང་མདུང་འཛིང་གིས་རྙབ་ཙམ་དང་མི་རྙབ་ཙམ་གྱི་ངང་ནས་ཕན་ཚུན་རེ་མི་ཁ་བས་སོ་སོར་གྱེས་སོང༌། དེར་གླིང་པ་རྣམས་སྒར་དུ་འདུས་ཞིང༌། ལས་གུར་མཐོང་བ་ཀུན་སྨོན་གྱི་ནང་དུ། རྒྱལ་བློན་རྣམས་བཞུགས་ཤིང་མདུན་དུ་ཇ་ཆང་གི་ལོངས་སྤྱོད་མང་པོ་སྒྲིག་ཅིང༌། འབྲུ་དཀར་དང་ཤ་མར་གྱི་སྡེར་ཁ་རྣམས་ཕུན་སུམ་ཚོགས་པས་འདོད་སྒུར་ལོངས་སྤྱོད་མཛད་བཞིན་གནས། འོན་ཀྱང་འཇང་མི་རྣམས་འདུས་ཤིང་ངུ་འབོད་དང་མྱ་ངན་ལ་གནས། ས་ཐམ་རྒྱལ་པོའི་ཐུགས་ལ་ཡ་གླིང་ངན་པས་གཡོ་འཕྲུལ་གྱིས་མི་བྱེད་པའི་ལས་གཅིག་ཀྱང་མེད། དགོངས་པ་འཁྲུག་པའི་སོ་སྒོ་ཚག་ཚག སྤྱན་དམར་ཁྱིལ་ཁྱིལ། དབུ་ཡི་མདུན་སྣེ་རྣམས་ནས་མེ་སྟག་དམར་སིལ་སིལ་བྱེད་ཅིང་སྨྲས་པ། འོ་ན་བློན་པོ་བེར་ཐུལ་བདེན། ཉི་མ་གཅིག་གི་གླིང་དམག་དེ་སྔས། དེ་རིང་གཡུལ་ཉེས་དེ་མ་བྱུང་ན་སང་ངས་གར་བྱས་བྱས་གཅིག་ཡིན། རྐང་འོག་གི་ཐལ་བར་མི་རྩི། དེ་སྐྱོན་མེད་ངས་དགྲ་ཤ་དྲོ་མོ་དང་དགྲ་ཁྲག་ཚ་མོ་འཐུང་ཐུབ་པ་བྱེད་ཟེར་ངར་བའི་ངང་དུ་བཞུགས་སོ། །དེའི་སང་སྔ་བར་རྒྱལ་པོ་ས་ཐམ་དེ་མྱ་ངན་ཁང་ནས་བཞེངས་ཤིང་ཕོ་བྲང་གི་དབུས་སུ་ཕེབས། སྐུ་ལ་དར་སྔོན་གྱི་ཆུ་དར་སྤྲིན་པའི་མདངས་རིས་དེ་གསོལ། དབུ་ལ་དུད་སྣེ་སྔ་རིགས་དཀར་པོའི་སྦྲུལ་མདུད་དེ་མཛད། ཕྱག་གདུབ་ཞབས་གདུབ་རྣམས་བརྒྱན་ཅིང་དྲག་པོའི་སྐུ་རུ་ཁྲོས་ནས། ཕོ་བྲང་གཡུ་འབྲུག་ཟིལ་པའི་ཡར་སྟེང་ནས་ཡར་གཟིགས་ཤིང༌། དབུ་སྤྲིན་གསེབ་དུ་སླེབས་འདྲ་ཞིག་བྱས་ནས། གསུངས་ཆེན་པོའི་གད་རྒྱང་གི་ངར་སྐད་ཀྱིས་གླིང་པ་རྣམས། སྙིང་རྗེ་ཁྲེལ་འདོད་ཀྱི་ཨ་བ་རེ། སྤྲང་ཉོག་སྦར་གང་འདི་ཅི་བྱས་ཀྱང་ལས་སླ་ཟེར་གླུ་འདི་བླངས་སོ། །
ཨ་ལ་ཐ་ལ་ཐ་ལ་རེད། །ཐ་ལ་གླུ་ཡི་ལེན་ལུགས་རེད། །ལྷ་ཀི་ཀི་སྭོ་སྭོ་འཇང་གི་ལྷ། །གནམ་ཐེལ་དཀར་པོ་ཐོག་རྒོད་དེ། །བཀྲ་ལམ་མ་མང་གྲོགས་ལ་བྱོན། །སྭོ་སྭོ་མཆོད་དོ་འཇང་གི་ལྷ། །བར་ཐེལ་ཁྲ་བོ་སྙིང་རིང་པོ། །བོས་པའི་དུས་སུ་རླུང་ལྟར་བྱོན། །བསྟོད་དོ་མཆོད་དོ་འཇང་གི་ལྷ། །ས་ཐེལ་ནག་པོ་ཀླད་མེད་པོ། །འབོད་པའི་དུས་སུ་ཐོག་ལྟར་འབེབས། །ཡུལ་གྲུ་བཞིའི་རྩ་བ་མི་འཛིན་པར། །གཏམ་ལུང་བསྟན་བཀྲ་ལག་ཅི་ཞིག་བྱེད། །དེ་རིང་ཡོད་ན་ཆས་ནས་ཤོག །ཕོ་ང་དང་ང་ངོ་མ་ཤེས་ན། །མ་གྲགས་དགུ་རུ་གྲགས་ལེ་དེ། །དེ་སྔ་ཉི་མའི་ཕན་ཆོད་དུ། །སྡུག་ལ་ཐང་ཆད་པའི་ལས་མཐའ་ལ། །བློ་མུན་པའི་ཁང་དུ་རང་སྡུག་སྒོམ། །སེམས་སྡུག་པའི་སྟེང་གི་སྙིང་ཚིམ་དང༌། །སྐེད་བཅད་པའི་སྟེང་གི་ཨག་བཅུས་དེ། །ཁོ་མི་ངན་འགོག་ཚ་ཇོ་རུས་དྲན། །འཇང་མཚལ་རའི་རྒོད་པོ་གང་ཡོད་དེ། །གཅིག་མེད་རྩ་བ་ཕུད་ནས་འདུག     །དེ་བྱས་དེ་ལན་སྤྲད་ངེས་ཡིན། །འཇང་ས་ཐམ་གཡོ་བ་མི་སྲིད་དེ། །གླིང་སྤྲང་ཉོག་དཔུང་གིས་བྲན་དུ་བཀོལ། །ང་རྒྱལ་པོ་ངར་རྒོད་ཤོར་བ་ན། །ཁོ་གླིང་པ་ཁྱི་ཤིག་སྦར་གང་རེད། །ལས་དུར་ཅིག་སྦུག་ཅིག་གླིང་ངན་ཁྱོད། །ངས་དེ་རིང་ཉི་མའི་དགོང་ཁ་རུ། །སྒར་ཁྲ་བོ་བཏབ་ཤུལ་མེད་ལེ་བཟོ། །ཁོ་ཇོ་རུ་མི་ཉག་ཉ་ཁ་བ། སྐེ་ཐག་ཐག་ལེ་ཁྲིད་ནས་འོང༌། །ཁོ་ཇོ་རུ་ལོན་ན་དེ་ཁས་ཆོག །དུག་མཚོའི་ནང་ལ་རྡོ་ལྟར་འཕེན། །སེམས་སྡུག་སྡུག་མི་དགོས་འཇང་སྡེ་རྣམས། །ལམ་མྱུར་དུ་མི་འཕྲོད་རྒྱལ་པོ་མིན། །བློ་ཡིད་གཉིས་འཛིན་ན་མི་སྡེ་མིན། །གཏམ་དེ་ལ་ཐམས་ཅད་བློ་སེམས་གཏོད། །ང་དེ་རིང་ཉི་མའི་སྔ་དྲོ་ལ། །སྡུག་མྱ་ངན་སངས་པའི་དགའ་དགའ་ལ། །ཁྲུས་བདུད་རྩིའི་རོ་མཆོག་མྱོང་དུ་འགྲོ། །ནས་དོ་ནུབ་དགོང་ཕྱོགས་ལ། །ལན་ཅི་འདུག་མི་སྡེའི་ཟུར་ནས་ལྟོས། །
ཅེས་ཟེར་ཞིང་གླུ་དེ་ལྟར་བླངས། བློན་བེར་ཐུལ་ཅན་གྱི་རྒྱལ་པོའི་དགྲ་ལན་འཕྲོད་ན་དེ་ལྟར་རང་གནང་དགོས། ཕྱིས་ལན་སྤྲོད་རྩིས་བྱས་རུང་བསམ་ཐོག་ཏུ་ཨེ་ཁེལ་རང་མི་ཤེས་ཟེར་ཞུ་བའི་སྐབས་དེར། གླིང་པ་རྣམས་ལ་ཁྲོ་ཐུང་གིས་སྨྲས་པ། གསོན་དང་གླིང་དཀར་རྗེ་བློན་རྣམས། ཡར་ལྟོས་དང་འཇིག་ངོ་ཨེ་འདྲ་འདུག འཇང་གཡུ་འབྲུག་ཟིལ་པའི་མཁར་སྟེང་དུ། རྫོང་མི་སྔོན་བདུད་པོ་འཇིག་ཏུ་རུང༌། ལུས་རྩལ་ཆེན་རི་རབ་ལྷུན་པོ་ཙམ། མགོ་མཐོན་པོ་ནམ་མཁའི་སྤྲིན་དང་འདྲེས། གླིང་རང་ས་བཟུང་ནས་མི་སྡོད་པར། མི་ཡེ་འདྲའི་གདོང་ལ་ཡོང་རྒྱུ་ཨང༌། ད་བྲོས་ན་ཐར་པ་མི་གདའོ། །ལས་ཅི་འདྲ་བྱས་ན་དྲག་རྒྱུ་རེད། ཟེར་ནས་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །བསམ་དོན་རང་གི་ཤུགས་བྱུང་རེད། །འབྲུ་དྲུག་ཚིག་གི་དཔྱོད་ཚུལ་རེད། །གསོན་དང་ཚོ་ཆེན་ལྷ་སྡེ་རྣམས། །སྐྱིད་སྡེ་ཡིན་ནམ་དུག་སྡེ་ཡིན། །རི་སྡེ་ཡིན་ནམ་ཀླུ་སྡེ་ཡིན། །བཟང་ངན་གང་ཡིན་མི་ཤེས་ཏེ། །ལྟོས་དང་འཇིག་ངོ་ཡེ་འདྲ་གདའ། །ན་ནིང་འཇང་ལ་སླེབས་ཚུན་ནས། །ལོ་ཟླ་དགུ་རུ་བསྒུག་ནས་སོང༌། །དོན་དམ་པ་འཆི་བ་བསྒུག་ལེ་རེད། །ཕར་ལ་བྲོས་ཀྱང་ཐར་དོགས་མེད། །འདིར་བསྡད་སྲོག་ལ་མི་དབང་འདུག །འཕུར་བསམ་གཤོག་རྒྱས་ལེ་མེད། །ས་འཛུལ་སྡེར་མོ་ཐོགས་ལེ་མེད། །གླིང་ཕུ་ནུ་སྟག་གཟིག་ཐང་གང་རེད། །འདྲེན་ནག་པོས་ཁྲིད་ལེ་ཨེ་རེད་ལགས། །ཡང་མིན་ན་སྨྱོ་བ་ཨེ་རེད་ལགས། །མི་ཡེ་འདྲའི་གདོང་ལ་སྒུག་རྒྱུ་ཨང༌། །གླིང་གེ་སར་ལྷ་ཡོད་ཁྲམ་པ་རེད། །སྔ་ཕྱིའི་ལུང་བསྟན་རྫུན་མ་རེད། །མི་མང་ཐོད་པའི་རི་མོ་ནི། །བྲིས་ལེ་མ་རེད་བསྐོས་ལེ་རེད། །བསྐོས་ཐང་ཐུར་ལ་བསྐོས་ལེ་རེད། །དཀར་བྲིས་མ་རེད་ནག་བྲིས་རེད། །ས་སྐྱིད་པོ་གླིང་དཀར་མཐོང་སྨོན་ནས། །དམག་བུ་རྟ་རང་མལ་མི་གནོན་པར། །སྲོག་དམར་པོ་སྐྱེལ་བའི་བང་མགྱོགས་དེ། །ལས་ཅི་ལྟར་རེད་བསམ་གླིང་དཀར་སྡེ །ད་བྱེད་ཐབས་ལར་གྱི་མི་འདུག་སྟེ། །འཆི་བདག་གཤིན་རྗེའི་ཁྲམ་ཁ་ནས། །བཟློག་ཐབས་ལར་གྱི་མི་འདུག་སྟེ། །འོན་ཀྱང་ཨ་ཁུའི་བསམ་ཚུལ་ལ། །ཚ་བོ་སེང་ཆེན་རྒྱལ་པོ་དང༌། །ང་རང་མ་བཞིའི་ཁྲོ་ཐུང་དང༌། །གསེར་པའི་ཉི་འབུམ་དར་ལུ་དང༌། །འོམ་བུའི་ཨ་ཁུ་དཔའ་སེང་དང༌། །མུ་སྤྱང་རིན་ཆེན་དར་ལུ་དང༌། །དགྲ་ལྷ་ཡང་ཚ་རྩེ་རྒྱལ་བཅས། །གཡོག་ཉུང་སྡུས་བཅས་ཏེ་བྲོས་ནས་འགྲོ། །མ་ཐར་བསད་ཀྱང་བྱེད་ཐབས་མེད། །དེ་མིན་གླིང་དམག་གང་ཡོད་དེ། །འཇང་མིས་འཁྱེར་ཀྱང་གང་དགའ་གྱིས། །ཆུ་བྲག་གཉིས་ལ་ཤི་ལྕེབས་གྱིས། །བྲོས་ནས་ཐར་པ་ཡོད་མདོག་མེད། །
ཅེས་ཟེར་ཞིང་འདར་བའི་ངང་ནས་གླུ་འདི་བླངས་པ་དང༌། གདོང་ག྄་ནེ་གོམས་པས། ཁྱོད་ཁྲོ་ཐུང་ཁ་ལ་ཐལ་བ་འཇུག འཇང་ས་ཐམ་མི་མ་འཕྲུལ་གྱི་རྒྱལ་པོ་ལ། རྟགས་དང་རྫུ་འཕྲུལ་ཐོགས་མེད་ཡིན། ཁྱོད་བྲོས་ཕ་དྲན་ཀྱང་ཐར་མདོག་མེད། ང་འཆི་བ་ཡིན་ཀྱང་བསྒུགས་ནས་སྡོད། བར་དོ་ཡིན་ཀྱང་རང་ལས་ཡིན། སྡེ་གླིང་པ་ངང་རྒྱུད་རིང་བས་ལན། ལྷ་གོང་མས་གླུ་བ་མི་སྲིད་སྙམ། ད་ནི་ལྷ་ཡིས་མ་ཐུལ་ན། འཛིང་ན་ཐུབ་པ་ཡོད་དོགས་མེད། མདའ་རྒྱབ་མདེའུས་ཆོད་དོགས་མེད། སྡེ་གླིང་པའི་དཔའ་རྟུལ་རེ་རེ་ལ། ཤི་སྲོག་གཅིག་ལས་ཡོད་དོགས་མེད། འཛམ་གླིང་རྒྱལ་པོ་ལྷ་རྒོད་ཀྱིས། དཔུང་མི་འགྱུར་ལྷ་གྲོགས་མ་བྱུང་ན། ཕོ་ཡེ་འདྲའི་གདོང་ཐུག་བྱུང་ཟེར་ན། ལག་མཛུབ་ཆུང་གཅིག་ཀྱང་ཐུབ་དོགས་མེད། ད་བྱ་བ་ཅི་བྱས་ལྷ་ལ་སྨོས། དེ་མིན་བྱ་ཐབས་ཅི་ཡང་མེད། ཅེས་ཟེར་ཞིང་ཐུགས་ཡིད་བདེ་བའི་ཚུལ་བྱེད། རྒྱལ་པོ་སེང་ཆེན་ཐུགས་ཡིད་འཇིགས་པས་ངང་ནས་གསུངས་པ། དཔའ་རྟུལ་རྣམས་ཉོན་དང༌། གླིང་པ་རྣམས་བྱ་བ་ཅི་ལ་ཐུག་རུང་བྲོས་ཐབས་མེད་གསུངས་ཤིང་གླུ་འདི་ལྟར་བཞེངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ས་འདི་ས་ངོ་མ་ཤེས་ན། །འཇང་ཡུལ་ཞེ་ས་མཚལ་རའི་ཐང༌། །ང་དང་ང་ངོ་མ་ཤེས་ན། །འགོག་ཚ་གླིང་གི་ཇོ་རུ་རེད། །དམག་ཇག་གཉིས་ཀྱི་བསོད་ནམས་འདི། །རང་འདོད་རྒྱག་པ་མ་ཡིན་ཏེ། །དབུ་ནག་བོད་ཀྱི་བདེ་ཐབས་སུ། །བདུད་ནག་བསྟན་པ་བཤིགས་དགོས་བྱུང༌། །གནམ་འཁོར་ལོ་རྩིབས་བརྒྱད་མར་ཞབས་དང༌། །ས་པདྨ་འདབ་བརྒྱད་ཡར་སྟེང་ལ། །ལས་དྲག་པོའི་དགྲ་འདུལ་བྱེད་མི་དང༌། །མཐའ་སངས་རྒྱས་བསྟན་པ་འཛུགས་མི་དེ། །ང་ཇོ་རུ་མིན་པ་ཡོད་བསམ་མེད། །འོན་ཏེ་ཐོད་པའི་རི་མོ་ལ། །དགྲ་རེ་རེ་ཐུལ་ན་རེ་རེ་ལངས། །སེམས་ཐོག་ཏུ་འཁེལ་བ་མི་ཡོང་འདུག །རྨུ་རྗེ་ས་ཐམ་རྒྱལ་པོ་དེ། །ཐབས་ཞི་བས་འདུལ་དགོས་ལྷས་ལུང་བསྟན། །མི་སྡོད་རྒྱལ་པོ་ཐོན་ངེས་ཡིན། །དེ་རིང་འདུག་ན་དཔའ་བོ་རེད། །དེ་རིང་མེད་ན་ཁྱི་ཤི་རེད། །ཨེ་རེད་གླིང་དཀར་ལྷ་སྡེ་རྣམས། །
ཞེས་གསུངས་ནས་དགྲ་ལྷའི་གོ་ཆ་རྣམས་མདངས་བྲན། འདོ་བ་རྐྱང་པོ་ལ་སྒ་བརྒྱབ། གླིང་དམག་རྣམས་འདར་ཞུམ་ཞུམ་འཇིག་པའི་ཚུལ་དང་བཅས་པ་ཐམས་ཅད་སྨྲ་མི་ནུས་པའི་སྐབས་དེར། བློན་འདན་མས་གསུངས་པ། གླིང་པ་རྣམས་རྟེན་འབྲེལ་ཅི་ངན་གྱི་དགྲ་མ་མཐོ་བ་ཙམ་གྱིས་བྲོས་གཏམ་དང་འདར་སྐད་མ་བྱེད་དང༌། དགྲ་མཐའ་བཅོམ་པའི་སྐབས་སྙིང་མེད་ལྦུ་བ་ཐོན་འདྲ་དེ་ལ་ཅི་བྱེད་ཟེར་ནས་ངར་བའི་སྒོ་ནས་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གླུ་ལེན་པ་ཚངས་པ་ལྷ་ལ་མཆོད། །གླིང་གེ་སར་དབུ་འཕང་དགུང་ལ་བསྟོད། །ས་འདི་ས་ངོ་མ་ཤེས་ན། །ཞེ་ས་མཚལ་ར་སྨུག་པོ་རེད། །ང་འདྲ་ང་ངོ་མ་ཤེས་ན། །གླིང་མུན་པའི་རྒྱལ་རབས་མི་འགྱུར་གྱི། །བློན་མི་འགྱུར་འདན་མ་ཕོ་རབས་རེད། །གསོན་དང་ཚོ་ཆེན་ལྷ་སྡེ་རྣམས། །མ་གཡེངས་འདན་མའི་གླུ་ལ་གསོན། །ཨ་མཚར་བ་ལ་ཐང་མེད་ལེ་གྱིེས། །དགུང་ལ་གྲགས་པའི་གཡུ་འབྲུག་དེ། །མ་གཞིའི་དཔོན་པོ་ཁྲོ་ཐུང་རེད། །གསུངས་སྡུག་སྡུག་བོང་བུའི་ངར་སྐད་རེད། །ས་ལ་གྲགས་པའི་དཔའ་བོ་དེ། །མ་གཞིའི་དཔོན་པོ་ཁྲོ་ཐུང་རེད། །ཐབ་སྡུག་སྡུག་ཝ་བྲོས་ལ་ཐང་རེད། །གླིང་རུའི་ནང་གི་ཡ་སྙིང་དང༌། །དཔའ་གདུག་ཐོག་གི་ངར་རྒོད་མཐོ། །ཡིན་ངེས་སྟག་རོང་ཁྲོ་རྒྱལ་ཡིན། །སྡང་དགྲ་བོའི་ངོ་གདོང་མཐོང་བའི་དུས། །སེམས་ཁྲ་ཆུང་དབང་པོ་ཉམས་གྲབས་འདུག །ཡང་མིན་ན་དཔོན་པོའི་རྒོད་རྟགས་རེད། །ཡང་མིན་ན་ཁྲོ་ལུའི་སྔ་སྲོལ་རེད། །ཡང་མིན་ན་གླིང་པའི་བསོད་ནམས་རེད། །ང་མི་རྒན་བསམ་བློ་སྐོར་མགོ་ནི། །ཤི་ཡང་གླིང་རུའི་བྱུས་ལ་བསམ། །གག་ཀྱང་རྒྱལ་པོ་སླུའོ་བསམ། །དེ་རིང་མི་སྡོད་མཆོང་ངེས་ཡིན། །དར་འཕྲུ་ཅན་གྱི་ལས་དམག་དེ། །ང་འདན་མ་རང་གི་ལས་འོག་ཡིན། །གཡས་རུ་སྒར་སྣ་ཁྲིགས་སེ་ལོངས། །འདོ་བ་རྟ་ལ་གསེར་སྲབ་རྒྱུས། །བལ་གདན་གསེར་སྒ་ཁྲིགས་སེ་གྱིས། །སྔོན་མོའི་མཚོན་ལ་ངར་ཚ་ལོང༌། །ཤུབས་ཁྲ་ཡུ་ལུང་ཁྲིགས་སེ་གྱིས། །ཉག་ཕྲན་མདའ་ཡི་ལྟོང་དོང་ཁོལ། །རྒོད་སྒྲོ་མཚལ་དམར་ཁྲིགས་སེ་གྱིས། །མཆོག་དཀར་དར་གཞུ་མོ་རྒྱུན་དུ་སྒྲོན། །ཁྲབ་དཀར་ཚེ་མདུད་སྤུངས་སེ་གྱིས། །མཆོག་དཀར་དར་འཕྲུ་ལམས་སེ་གྱིས། །ཀི་གཅིག་འདན་མས་དགུང་དུ་གྲགས། །ཀི་གཉིས་སྔོན་པོའི་རྡུང་དུ་བྲན། །དེའི་རྗེས་ཐམས་ཅད་མཆོང་ལ་ཤོག །དགྲ་མ་ཐུབ་ཝ་བྲོས་བརྒྱབ་པ་ལས། །མགོ་ཁྲག་རལ་ཉི་ལི་བསད་ན་དགའ། །དེ་ཨེ་རེད་ཚོ་ཆེན་ལྷ་སྡེ་རྣམས། །
ཞེས་གླུ་དེ་ལྟར་བླངས་ནས་ངར་གྱིས་བསྐྱོད་ནས་མཆོང་ཚད་པའི་སྐབས་དེར། ས་ཐམ་རྒྱལ་པོ་དེ་ནི་བདུད་རྟ་མུན་པ་ཤུགས་ཅན་གྱི་གོང་དུ་ཐོན། ཐོད་ཐོག་བུ་གསུམ་དང༌། དེ་འོག་ཉུང་སྡུས་བཅས་ཁྲུས་བྱེད་པར་འགྲོ་རྩིས་ཐུམ་མེར་ལམ་དུ་བཞུགས། གླིང་པ་རྣམས་ཀྱིས་མཐོང་བ་དང༌། རྒྱལ་པོ་གེ་སར་གྱིས་གསུངས་པ། ད་ཅིས་ཀྱང་ལས་སླ་བར་ཡོང༌། ཁོ་རང་དབང་ཐང་རྫོགས་ཏེ་ཤི་ས་འཚོལ་བ་ཡིན། ངེད་མི་རྟ་གཉིས་འདི་མུས་ལམ་ལ་བསྐྱོད་ནས་ས་ཐམ་ཁོ་ཐུལ་ངེས་བྱེད། ཁྱེད་རྣམས་འདི་རིང་ཉི་མ་གོང་ཁ་བར་གོ་ཆོད་པར་མཛོད་འཇང་ས་ཐམ་འདུལ་བར་དཔུང་གི་དགོས་པ་མེད། ཐབས་ཞི་བའི་སྤྲུལ་པ་ཇི་སྙེད་ཀྱི་མ་ཐུལ་ན་ཐུལ་ཐབས་མེད་པས། འདན་མ་ཅིས་ཀྱང་སྡོད་གསུངས་ཞལ་ཏ་གནང་བས། འདན་མ་དེ་ཡང་བློ་ལྷོད་པ་ལྟ་བུའི་བག་ཕེབས། རྒྱལ་པོ་ཆེན་པོ་ཆིབས་ལ་བསྐྱོད་ནས་ཤུགས་ཀྱིས་འཇང་ས་ཐམ་རྒྱལ་པོའི་དྲུང་དུ་ཕེབས་ནས། གེ་སར་རྒྱལ་པོ་ནི། ཆིབས་རྐྱང་རྒོད་དེ་ཙནྡན་གྱི་ཤིང་དྲུང་དུ་སྤྲུལ་ནས་ནགས་གསེབ་ཏུ་བཞུགས། རྨོག་རྒྱལ་བའི་གླིང་གཞི་དེ་ཤིང་གི་འདབ་མར་སྤྲུལ། ཁྲལ་ཟིལ་པ་དེ་ཆུ་མིག་གཅིག་ཏུ་སྤྲུལ། འཁོར་གསུམ་དེ་མེ་ཏོག་ཚོམ་བུར་སྤྲུལ་ཏེ་བཞག རྒྱལ་པོ་ཉིད་ལྕགས་ཀྱི་སྦྲང་ཆུང་གཟུགས་མངོན་པ་ཙམ་ལ་གཤོག་པ་སྲབ་པ་ཞིག་ཏུ་སྤྲུལ་ནས་འཕུར་བྱོན་ཏེ། ས་ཐམ་འདུལ་ཐབས་ཅི་དྲག་དགོངས་པའི་ཚེ། མཚོ་སྨན་དེ་ཡང་དཀར་ཕྱོགས་ལ་དགའ་བས་རྒྱལ་པོ་དགྲ་འདུལ་ཕྱོགས་ལ་དགའ་བས་རྒྱལ་པོ་དགྲ་འདུལ་གྲོགས་ལ་སྔོན་དུ་ཞལ་གྱི་བཞེས་པ་བཞིན་གེ་སར་ཕེབས་པ་ཤེས་ཤིང༌། ཁྲུས་ཀྱི་རྫིང་བུ་མྱུར་སྟབས་སུ་འཁྲུགས་པས། ཁོ་པ་རྣམས་ཀྱང་ཐེ་ཚོམ་མེད་པར་ཁྲུས་བྱས་ནས་ཧུབ་གསུམ་འཐུང་བས་དང་པོ་དེ་ལ་མ་ཚུད། བར་པ་དང་བསྡེབས་ནས་སྦྲང་བུ་དེ་ཡང་ཆུད་ཅིང་བདུད་དེའི་ཁོག་པ་གེ་སར་ཕེབས་ཏེ་སླར་ཡང་ལྕགས་ཀྱི་སྤུ་གྲི་གདོང་ཁ་རེག་གཅོད་ཟེར་བར་སྤྲུལ་ནས་ལན་འགའ་དཀྲུག་པས། རྒྱལ་པོ་ས་ཐམ་དེ་ཕོ་ལྷང་སྲིད་ནད་ཀྱིས་ཐེབས་པ་ལྟ་བུས་ཡར་ལངས། མར་ཉལ། འགྲེ་ལྡོག་གི་ངང་ནས་རྒྱལ་པོ་གསུང་འཇལ་མ་ཐུབ་རུང༌། ཐུགས་ལ་མ་ངན་འགོག་ཚའི་འཕྲུལ་བྱུང་བ་དགོངས་ཤིང༌། གླིང་ཕྱོགས་སུ་མིག་ཧྲིག་ཧྲིག་དང་མཛུབ་མོ་སྟོན་པ་ལྟར་བྱེད་པའི་སྐབས་དེར། སྤུ་གྲི་དེས་སྙིང་དཀར་ནག་མཚམས་སུ་དཀྲུགས་པས་ཚེ་ལས་འདས་སོ། །དེར་ཐོད་ཐོག་བུ་གསུམ་དང་དེར་ཡོད་ཀྱི་མི་རྣམས་འདུས་ཤིང༌། མཆི་མ་ཤར་ཤར་དུ་ངུ་བ་དང༌། སྨྲེ་སྔགས་དང་འོ་དོད་ལན་དུ་མར་འབོད་ཀྱང་ཕན་པ་ནི་མ་བྱུང་བས་བྱ་ཐབས་དང་བྲལ་བས། གཞོན་ནུ་ཉི་མས་སྨྲས་པ། ད་ངུ་ཞིང་བསྡད་པས་ཅི་ཕན། ངེད་རང་རྣམས་འདིར་བསྡད་པའི་དོན་མེད། འགའ་ཞིག་དེར་བསྡད་གླིང་ངན་པའི་འཕྲུལ་མིན་པ་གཞན་འདི་འདྲ་ཅི་འོང༌། ཟེར་མཆི་མ་ནར་ནར་བྱེད་དོ། །གཞན་རྣམས་དེར་བསྡད། སྐྱ་མི་གསུམ་ཕོ་བྲང་ཕྱོགས་སུ་མངག་པ་འགྲན་དུ་སླེབས་པ་དང༌། འཇང་མི་རྣམས་ཀྱིས་མཐོང་ཞིང་འཇང་བཟའ་ཆོས་སྒྲོན་དང་བེར་ཐུལ་བཅས་སྙིང་མི་དགའ་ལྷང་ངེར་ཡོད་སྐབས་བེར་ཐུལ་གྱིས་སྨྲས་པ། མི་གསུམ་ཡོང་ལུགས་ལ་བལྟས་ན་གཏམ་སྙན་པོ་ཨེ་ཡོང་ཟེར་སྐབས་ཁོང་གསུམ་སླེབས་ཤིང་ངུ་འབོད་དང་སྨྲེ་སྔགས་ཀྱིས་སྨྲས་པ། བློན་ཚོགས་དང་མཛངས་མ་མེ་ཏོག་ཆོས་སྒྲོན། སྡུག་མཐའ་ནག་པོའི་གཏམ་རྒྱུ་ལ། དབང་པོའི་མིག་དང་ཁོག་པའི་སྙིང༌། རྗེ་རྒྱལ་པོའི་ཁོང་ཚོའི་འགྲམ་དུ་གཤེགས་ནས་ཡོད། འདི་བྱུང་འདི་བྱས་ནི་མི་ཤེས་སོ། །ཡུལ་མེད་གཏན་བྲལ་བྱུང་ནས་སོང༌། ཟེར་ཞིང་ངུ་བའི་སྨྲེ་ངག་འདོན། འཇང་བཟའ་ཆོས་སྒྲོན་དེ་ནི་ཐུགས་མུག་ཅིང༌། ཉི་ཟླ་གཟའ་ཡི་ཟིན་པ་ལྟ་བུ་ཡུད་ཙམ་དྲན་མེད་དུ་བརྒྱལ་བར་གདའོ། །དེར་རྒྱལ་པོ་སེང་ཆེན་ཀྱང་ཁོའི་ཁོག་ནས་སྦྲང་བུར་སྤྲུལ་ཏེ་ཕྱིར་ཐོན་པ་དང༌། མཚོ་སྨན་དེའི་ཤེལ་གྱི་བུམ་པ་དྲི་བཟང་བླུག་པའི་ཁྲུས་མཛད་ཅིང༌། ཆིབས་རྐྱང་རྒོད་ཡོད་པའི་ས་དེར་ཕེབས་ཏེ་ཆིབས་པ་དང༌། དགྲ་ལྷའི་གོ་ཆ་རྣམས་ཀྱང་རྫུ་བ་བཤིགས་ནས་རང་སར་བཞུགས། རྒྱལ་པོ་ཆེན་པོ་ཡུད་ཙམ་དེར་བཞུགས། ས་ཐམ་དེ་ཡང་དགྲ་རུ་སྐྱེས་རུང་སྟོང་པ་མཆོར་མེད་སྙིང་རྗེ་ཚད་མེད་འཁྲུངས་ཤིང་ཏིང་ངེ་འཛིན་གྱི་ངང་དུ་ཡུད་ཙམ་གནས། སླར་ཡང་ཏིང་ངེ་འཛིན་དེ་ལས་བཞེངས་ཏེ་ཆིབས་ཀྱང་རྒོད་དེ་ཆིབས་ནས་ག་ལེར་ཕེབས་ཡོངས་སྐབས། འཇང་གི་དུག་མཚོ་དེའི་ཆུ་བྲག་འཐབ་པས་འཕྲང་ཆེན་པོ་ཞིག་ཡོད་པའི་ས་དེར། བེར་ཐུལ་ཅན་དེ་ཚུར་ཡོང་བ་དང་ཐུག་ཅིང༌། ཟུར་ས་སྣོལ་ས་མེད་པར་མཛུབ་མོ་སྤྲད་པ་ལྟར་བྱུང་བས། བེར་ཐུལ་དེས་སེང་ཆེན་ཡིན་པར་ཤེས་ཤིང༌། མྱུར་སྟབས་སུ་ངར་ལངས་ཞིང་ཨམ་གཙིགས་ཐམ་ཐམ་གཞན་མིན་གོ་ཆ་ནི་མེད། རལ་གྲི་ཟོར་ར་རེ་གཅོད་དེ་ཡོད་རུང་ཁོ་ལ་བརྒྱབ་པས་ནི་རྨ་མི་འོང༌། དེ་བས་ཤི་འཛིང་རང་བྱས་ཏེ། མཐར་དུག་མཚོའི་ནང་དུ་མཉམ་ཤི་ལས་མ་བྱུང་ཡང་དེས་ཆོག་སྙམ་ཞིང༌། དཔུང་པ་བརྫེས་ཏེ་རྟ་གསེར་རྒོད་ཁ་འཐེན་ཙམ་བྱས་ནས་འཆི་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གླུ་རེ་མི་ལེན་ཀ་མེད་རེད། །རེ་རེ་མ་བླངས་ཚོད་ཡོད་རེད། །སྐྱིད་ན་ལ་ཆང་མཚར་གླུ་རེད། །སྡུག་ན་རང་སེམས་གསོ་གླུ་རེད། །ཨ་ཀྱང་མཚར་གྱི་ཆེ་བ་ལ། །ཡིད་སྐྱོ་མོའི་གནས་ལ་འདུ་འབྲས་མེད། །སེམས་སྡུག་པའི་མུན་པ་སངས་དུས་མེད། །ལུས་བྲེལ་པས་དལ་དུས་ཡོད་དུས་མེད། །ཡིད་མུག་པའི་ཁོང་སྐྲན་འཇུག་མི་དེ། །ཁྱོད་མ་བྱས་ལས་ལ་གཅིག་ཀྱང་མེད། །སྟག་ཕྲུག་ནང་གི་འཛུལ་རེས་དེ། །དཔོན་ས་ཐམ་འདྲ་པ་གཏན་བྲལ་བཟོས། །མི་ངན་དུག་གི་ལོ་མ་ཁྱོད། །ཞེ་ངན་ཁ་ཏ་ནག་ཆུང་ཁྱོད། །ལྟས་ངན་འུག་པ་སེར་པོ་ཁྱོད། །མ་ངན་འགོག་ཚའི་ཇོ་རུ་ཁྱོད། །རྒོད་ངན་ཐུ་རུ་རྐྱང་ཆུ་ཁྱོད། །རྒོད་གཡེར་མགྱོགས་གཡེར་ཡོད་དོ་ཟེར། །འ་ཆེན་ཧོར་གྱི་རྒྱལ་པོ་དེས། །སྟོང་ཕོ་བོ་གྲི་རུ་དམར་གསོད་བྱས། །གདོང་ཆུང་མ་མདུན་ནས་བཙན་འཕྲོག་བྱས། །མཁར་བཟང་དྲུག་རྩི་གཞི་ས་རོ་བཟོས། །སྡེ་ཤོག་དྲུག་མུ་གེའི་ཡུལ་དུ་འགྲིམས། །ཕོ་རྒོད་ན་དེ་དུས་བབས་འབྲས་རེད། །མདའ་སྐྱེན་ན་དེ་དུས་ཁྲིག་ཁྲིག་རེད། །ས་ནག་པོའི་སྟེང་དུ་སོང་ལེ་ཁྱོད། །དེ་རིང་ཉི་མའི་གདོང་གང་ལ། །ཁྱོད་དང་ང་རང་གཉིས་པོ་ནི། །འཛིང་ལུགས་ཐབས་ལུགས་ཅི་འདུག་ལྟ། །ང་ཕྱི་ལ་གོམ་གང་བྲོས་དོགས་མེད། །ཤི་དང་གསོན་ལ་ཁྱད་པར་མེད། །ཁྱེད་ཐུག་རྒྱུའི་མི་དང་ཐུག་ལེ་ཡིན། །དུག་མཚོའི་ནང་དེར་མཉམ་ཤི་བྱེད། །
ཟེར་ཞིང་རྒྱལ་པོའི་ཕྱག་དཔུང་གི་སྟེང་ནས་བཟུང་ཞིང་དཀྲུགས་པས། ནང་དུ་གཡུག་གྲབ་ལན་གཉིས་བྱུང་བས། རྒྱལ་པོས་ལྷ་ལ་འབོད་པ་དྲག་པོ་འདི་ལྟར་མཛད། སྟེང་དག་པ་ལྷ་ཡི་ཞིང་ཁམས་ནས། འོད་ཚངས་པ་དཀར་པོ་དམ་ཚིག་ཅན། དགོངས་པ་ག་རུ་ཡེངས་ནས་ཡོད། དེ་རིང་སྐྱེ་བུའི་གྲོགས་ལ་བྱོན། དགྲ་མ་ཐུབ་ཆམ་ལ་འབེབས་རོགས་མཛོད། ཅེས་གསུངས་ཤིང་དབྱུགས་བློ་ཙམ་མཛད་པ་མ་གཏོགས། ལྷ་སྲིན་རྣམས་ཀྱི་མཐུས་ཁོ་འགྱེལ་བ་དང༌། རྒྱལ་པོ་གེ་སར་གྱིས་གྲི་གུ་གསེར་གཡར་སོར་གསུམ་དེ་བཏོན་ཅིང༌། ཡ་ཁོ་རེ་བདུད་ཕྲུག་བེར་ཐུལ་ཁྱོད། འཇང་ས་ཐམ་བློན་པོ་ཨེ་བྱེད་བསམ། ཕ་མའི་གཅེས་ཕྲུག་ཨ་མྱོང་ལགས། རྟ་འདོ་བའི་གོང་རྒྱན་ཨེ་འདོད་ལགས། ལྕགས་སྲོག་གྲུབ་བསམ་ཨེ་ཡོད་ལགས། རྒོད་བསམ་ན་ད་ལྟ་ལོང་ལ་ཤོག གྲི་ཟོ་ར་རེག་གཅོད་གཡུ་ལ་ཤོག དེ་མིན་ན་འགྱོད་པ་ཅི་འདྲ་འདུག མིག་ཧྲིག་གེར་རང་སྲོག་ཨེ་མཐོང་འདུག གསུངས་ཤིང་སྐེ་གཅོད་ཚད་པས་བྲང་དཀྱིལ་དུ་པུས་མོ་བཙུགས་ནས་བཞུགས་པས། ཁོ་ནི་ཚིག་པ་ལོང་ལོང་ཟ་བའི་ཚུལ་དང་ཨམ་གཙིགས་བསྡམས། མགོ་གུག་གུག་བྱེད་པ་མ་གཏོགས་བྱ་ཐབས་མེད་པས། རྒྱལ་པོས་ཁོའི་སྐེ་བཅད་དེ་མགོ་ལག་འཕྲུ་དང་བཅས་པ་རྟ་གསེར་རྒོད་འཕུར་ཤེས་ཀྱི་སྟེང་དུ་བསྡམས། རོ་དེ་དུག་མཚོའི་ནང་དུ་བསྐུར། རྒྱལ་པོ་ཉིད་ཆིབས་རྐྱང་རྒོད་ལ་ཆིབས། རྟ་གསེར་རྒོད་དེ་ཁྲིད་ནས་ཕེབས་ཅིང༌། རྗེ་བློན་ཐམས་ཅད་སེམས་བདེ་བས་ཁྱབ་པར་གྱུར་ཏོ། །འཇང་ས་ཐམས་ཅད་རྒྱལ་པོའི་ཕོ་བྲང་གཡུ་འབྲུག་ཟིལ་པ་དེའི་ཤར་ལྷོ་ནུབ་བྱང་བཞི་ནས་བསྐོར་ཏེ། ཤར་སྒོ་ལྷོ་སྒོ་གཉིས་རང་བཞིན་གྱིས་བྱེ་ནས་རྟ་དམག་ཤར། ནུབ་སྒོ་བྱང་སྒོ་གཉིས་བརྒྱབ་འདུག་པ་སྟ་གྲིས་བསྲེས་ཤིང༌། རྟ་དམག་ཤར་བས་འཇང་ཡུལ་གདན་གཞིས་ཅི་འདུག་གླིང་གི་ཟིན་ཅིང༌། སྲས་ཆུང་བ་གཡུ་ཁྲི་ནི་རེ་ཞིག་བཙོན་ཚུལ་མཛད། གཞན་ཡང་འཇང་ཡུལ་ཆེ་ཕྲ་ཆུང་གསུམ་གྱིས་སྤྲུལ་པའི་རྒྱལ་པོར་ཕྱག་འབུལ་བའི་ཆོས་འབངས་སུ་མཇལ་ཁ་འཁྱེར་དགོས་ཀྱི་བཀའ་འཕྲིན་རིན་ཆེན་འབར་བས་ཁྱབ་བར་མཛད་པ་དང༌། འཇང་ཕྱི་གླིང་ནང་གླིང་བར་གླིང་གསུམ་གྱི་སྐྱེ་རྒུ་མཐའ་དག་འདུས་ཤིང་ཆོས་འབངས་བྱེད་པའི་དམ་བཅས། རྒྱལ་མཆོག་ནོར་རུ་དགྲ་འདུལ་དེ་ཉིད་ཀྱིས་ས་འོག་རི་རྩེ། ཆུ་འགྲམ་མཐའ་དག་ལ། སངས་རྒྱས་བྱང་སེམས་ཀྱི་སྐུ་དང༌། གཟུངས་སྔགས་ཟབ་མོ་མཐའ་ཀླས་པ་བཀོད། མ་ཎི་དང་དར་ཆེན་དར་ལྡིང་གིས་ཁྱབ་པར་མཛད་ཅིང་དཀར་པོའི་རྟེན་བཞེངས་པ་ཐམས་ཅད་ཀྱི་སྐུ་ཞབས་དང༌། འཇང་སྡེ་དཀར་ནག་ཁྲ་གསུམ་གྱི་འགོ་འཛིན་དུ་གསེར་པའི་ཉི་འབུམ་དང༌། བློ་གྲོགས་སུ་དཔའ་ལ་དང༌། སྐུ་སྲུང་དམག་མི་ལྔ་བརྒྱ་སྐོར་འཇང་ཡུལ་དུ་ལོ་གཅིག་གི་བར་བཞུགས་པར་གདའོ། །དེར་རྒྱལ་བློན་རྣམས་ཀྱིས་འཇང་རྒྱལ་བློན་ཐུགས་ནས་ཟླ་བ་ཕྱེད་གསུམ་གྱི་རིང་ནས་རང་རང་གི་ཤོག་དང༌། རུ་གསུམ་གྱི་དམག་དཔོན་རྣམས་དང༌། དབུས་སུ་རྒྱལ་པོ་ཉིད་བཅས་གླིང་ཕྱོགས་སུ་ཆིབས་ཀྱི་ཁ་ལོ་བསྒྱུར། གླིང་ཡུལ་དུ་དགྲ་ཐུལ་ཞིང་རྒྱལ་བློན་རྣམས་ཕེབས་པའི་གཏམ་སྙན་ཐོས་ནས། བླ་མ་དགེ་རྒྱལ་བསྟན་གསུམ་གྱིས་གཙོས་མཁས་བཙུན་ཕོ་མོ་རྣམས་དང་ཡབ་ཡུམ་མ་སྲུ། དཔོན་བརྒྱུད་བཅས་གྱིས་ཉིན་ལམ་གསུམ་གྱི་བར་བསུ་བ་བྱས་འཇང་ས་ཐམ་གྱི་ཕྱི་ཟོག་ནང་རྫས་རྣམས་ནས། ཆ་ཕྲན་བུ་ཙམ་འཇང་བཟའ་ལྕམ་སྲིང་གི་ཆེད་དུ་གནང༌། གཞན་རྣམས་ནོམ་དུ་བགོས་ཤིང༌། རྒྱལ་པོ་སེང་ཆེན་དང༌། སྲས་དགྲ་ལྷ་ལ་ནོམ་ཕུད་སྔར་ཧོར་ཡུལ་བཅོམ་པའི་སྐབས་ལྟར་དང༌། དཔའ་རྟུལ་རྣམས་ལའང་བཟང་ངན་ཕྱེད་མ་སྔར་བཞིན་བྱས། ཁྲོ་ཐུང་ལ་སྐལ་ལོག་སྤྲད། འཇང་བཟའ་ཆོས་སྒྲོན་དེ་ཡང་དཔའ་རྟུལ་གྲས་སུ་བཅུག དུས་དེ་ནས་བཟུང་གླིང་པ་རྣམས་དགྲ་ཐུལ་བའི་དགའ་སྐྱིད་བློ་བདེ་ཁོང་དུ་ཆུད་ཅིང་གཏམ་སྙན་གྱིས་ཁྲིམས་ཤོག་འདུ་གླིང་ཁམས་གསུམ་ཁྱབ་པ་དང༌། མི་རེས་གླུ་རེ་རྟ་རེས་བང་རེ་ངོམ་པའི་སྐབས་དེར། ཁྲོམ་ཆེན་གྱི་དབུས་ནས་སེང་ཆེན་རྒྱལ་པོས་བཀྲ་ཤིས་གཡང་ཆགས་པའི་མགུར་གླུ་འདི་ཁྲོམ་ཆེན་ཟིལ་གནོན་ལ་དྲངས་ནས་གསུངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །སྐྱབས་མཆོག་གསུམ་དཀོན་མཆོག་རིན་ཆེན་གསུམ། །ཞི་བ་ཁྲོ་བ་ཡི་དམ་ལྷ། །ཆོས་སྐུ་ལོངས་སྐུ་སྤྲུལ་སྐུ་གསུམ། །མ་དང་མཁའ་འགྲོ་དཔའ་བོ་ཡི། །ཕོ་བརྒྱུད་མོ་བརྒྱུད་ཆོས་སྐྱོང་ཚོགས། །དྲེགས་པ་སྡེ་ལྔ་བསྟན་པ་དང༌། །བོད་ཁམས་ཆོས་ལ་འགྱུར་བར་ཤོག །ནོར་གྱི་ལྷ་དང་གསེར་གྱི་གདན། །ཕྱོགས་སྐྱོངས་དཔལ་མགོན་བདུན་ཅུའི་ཚོགས། །སྲིད་པའི་ལྷ་ཆེན་རྗེ་འབངས་ལྷ། །བོད་ཁམས་ཆོས་ལ་འགྱུར་བར་ཤོག །བཀྲ་ཤིས་གནས་དེར་གཡང་དུ་ལེན། །བྱིན་རླབས་རྒྱུན་དུ་བཞུགས་པར་ཤོག །ཁྱད་པར་ཤར་ཕྱོགས་མདོ་ཁམས་གླིང༌། །བདེ་བར་བྱེད་པ་དཀར་པོའི་ཆོས། །མ་ཅིག་གུང་སྨོན་ཆོས་ཀྱི་སྒྲོན། །བཀྲ་ཤིས་གནས་དེར་གཡང་དུ་ལེན། །བྱིན་ཕྱགས་རྒྱུན་དུ་བཞུགས་པར་ཤོག །ཁྱད་པར་ཡུལ་ཁམས་མཐུན་བདེ་ཞིང༌། །སངས་རྒྱས་བསྟན་པ་དར་བར་ཤོག །བཀྲ་ཤིས་གཡང་ཆགས་གླུ་དོན་འདི། །ས་ཐམ་ཐུལ་བའི་དགའ་སྟོན་དུ། །སྐྱེས་བུའི་བློ་ལ་ཤར་ནས་བླངས། །ཕྱི་རབས་དུས་གསུམ་གསལ་ལེ་ཡང༌། །བཀྲ་ཤིས་ནམ་མཁའི་མཐའ་དང་མཉམ། །རྒྱུན་དུ་གནས་པའི་བཀྲ་ཤིས་ཤོག །དཔག་ཏུ་མེད་པའི་དགྲ་བཅོམ་རྣམས། །བྱོན་ནས་རྒྱུན་དུ་དར་བར་ཤོག །སེམས་ཅན་དོན་ཀུན་རབ་འགྲུབ་ནས། །རྒྱུན་ཆད་མེད་པའི་བཀྲ་ཤིས་ཤོག །ལྷ་བུ་དོན་གྲུབ་རྣམ་སྤྲུལ་ནི། །གླིང་གེ་སར་སྐྱེས་བུ་དོན་གྲུབ་ཡིན། །ཐུབ་བསྟན་འཛིན་སྤེལ་བདུད་བརྟུལ་ནས། །རིམ་བཞིན་བདུད་འདུལ་བཀྲ་ཤིས་ཤོག །རྒྱ་གར་གྲུབ་ཆེན་བརྒྱད་ཅུ་ཡི། །སྤྲུལ་བསྒྱུར་དཔའ་བརྟུལ་སུམ་ཅུ་རྣམས། །དཔའ་ངར་གཟི་བརྗིད་འབར་འགྱུར་ནས། །རྒྱུན་དུ་དར་བའི་བཀྲ་ཤིས་ཤོག །
ཅེས་གླིང་གེ་སར་དགྲ་འདུལ་གྱི་མཛད་འཕྲིན་གསུམ་པ། འཇང་ས་ཐམ་རྒྱལ་པོ་ཆམ་ལ་ཕབ་པའི་གཡུལ་འགྱེད་ཅེས་བྱ་བ་རྫོགས་སོ།། །།

གླེང་བརྗོད།
འཇང་གླིང་གཡུལ་འགྱེད། (ཚན་པ་དང་པོ)
འཇང་གླིང་གཡུལ་འགྱེད། (ཚན་པ་གཉིས་པ)

འཇང་གླིང་གཡུལ་འགྱེད།(ཚན་པ་གཉིས་པ)

བདུད་རྒྱལ་བ་ཐོད་དཀར་གྱི་སེམས་ལ་ཁ་སང་གཡུ་ལྷ་ཐོག་འགྱུར་ཡང་སོང༌། དེ་རིང་ང་ལ་འགྲོ་ཟེར་བའི་གཏམ་བསམ་པ་ཆིག་སྒྲིལ་འགྱུར་མེད་ཀྱི་ཚིག་ཡིན་ཚེ་མ་སོང་ན་མི་ཡོང་བསམས་ནས་སྒར་ནང་དུ་ལོག འབྲུག་སྒྲ་དཔལ་ལྡན་ལ་འགྲོ་རྒྱུ་ཡིན་ཚུལ་གྱི་གཏམ་བཤད་ཅིང༌། ཁྱེད་རང་རྣམས་འདི་གར་སྡོད་དང༌། ང་གཡུ་ལྷ་དང་བཅས་མགྱོགས་པོར་སླེབས་ཡོང་ཟེར་ཞིང་ཟླ་གྲོགས་རྟ་མི་ལྔ་བཅུ་སྐོར་དང་བསྡེབས་ནས་དེ་ཉིད་དུ་སོང་ནས། དེར་བྱང་ལའི་ལ་ཆུང་གི་མདའ་རུ་གླིང་དམག་ཡོད་པ་དང་ཉེ་ཆར་སླེབས་པའི་ཚེ་ན་དམག་དེའི་སྒར་བསྒྲིགས་ལུགས་དང་འདོ་འཁྱིལ་ལུགས་གང་ལ་བལྟས་ཀྱང་ཡིད་མ་ཆེས་ཤིང་སྨྲས་པ། ཤན་པ་དམར་པོ་གསན་དང༌། དམག་འདི་ཧོར་དམག་རང་ཨེ་ཡིན་མི་ཤེས། སྒར་བསྒྲིགས་ལུགས་སོགས་ཅི་ལ་བལྟས་ཀྱང་ཧོར་དམག་མི་འདྲ། ལྷག་པར་མདའ་གྲི་སོགས་རྩེ་བཏོན་ལུགས་དང་སྒར་བསྒྲིགས་འདི་ལ་བལྟས་ན་འཇང་རང་ལ་ཆས་པ་འདྲ། གཡུ་ལྷ་འདི་གར་ཐུག་དང་གྱིས། དེ་བར་ངེད་རྣམས་འདི་གར་སྡོད་ཟེར་བའི་འགྲོ་མ་འདོད་པ་ན། ཤན་པས་སྨྲས་པ། བདུད་རྒྱལ་བ་ཐོད་དཀར་ཁྱེད་སེམས་འཁུ་ཁྲིགས་ཡིད་གཉིས་ཅི་ལ་བྱེད། དམག་རུ་གྲ་བསྒྲིགས་ལུགས་སྒར་གྱི་རྒྱག་ལུགས་རྣམས་ཧོར་རང་གི་སྒར་གྱི་བསྒྲིགས་ལུགས་ཡིན། བརྟགས་ཞིབ་མ་དཔྱད་པའི་དགའ་མ་མགུ་ཉམས་དགའ་དང་མ་མགུ་ཞེ་ཁྲེལ་གྱི་དཔེ་ལྟར་བྱས་ན་མི་ལེགས་ཡོང་བས་ལེགས་པར་གསོན་ཅིག་ཟེར་ནས་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གུར་མགོ་རུ་གྲ་བསྒྲིགས་ལུགས་རྣམས། །ཤན་པ་རང་གི་ཨ་ལུགས་ཡིན། །ཡིན་ཡང་ཤན་པའི་ལས་དམག་ཡིན། །ཧོར་སེར་དམག་གི་གཡོན་ཟུར་ལ། །གཡོན་སྒྲིལ་གཡོན་ལ་སྒྲིལ་ལེ་འདི། །འཕྲུ་དཀར་ནག་ས་གཞི་ཁེངས་འདྲ་འདི། །མགར་བ་ཉ་རྒྱའི་ཨ་ལུགས་རེད། །ཡིན་ཡང་ཤན་པའི་ལས་དམག་ཡིན། །ཁྲ་བོ་དམག་གི་གུང་རུ་ལ། །གུར་དཀར་པོ་མཐོང་བ་རྒྱང་ནས་མཛེས། །ལས་གུར་སྟོང་གཤོང་དཀར་མོ་རེད། །གུར་དཀར་རྒྱལ་གྱི་ལས་གུར་རེད། །དཔོན་མཆེད་གཉིས་ཡེ་ན་བཞུགས་ལེ་རེད། །དེ་མཇལ་བ་མ་ནུས་བསྡད་ཟེར་ན། །ཕོ་ཁྲི་འབུམ་འདི་ཙམ་ཚོགས་པ་ལ། །ངོ་ཚ་རྒྱུ་ཨེ་རེད་བདུད་ཆེན་ལགས། །ཞེ་ཁྲེལ་རྒྱུ་ཨེ་རེད་བདུད་ཆེན་ལགས། །གུར་དཀར་པོའི་ནང་ལ་མི་ཕེབས་པར། །ཐང་སྟོང་པའི་ནང་དུ་བཞུགས་ཟེར་ན། །བཀའ་བཀྱོན་ཤན་པ་ང་ལ་ཡོང༌། །ཁ་སྐྱེངས་པ་བདུད་ཆེན་ཁྱོད་ལ་ཡོང༌། །མ་བཞུགས་འདོ་བ་ཆིབས་ཁ་སྐྱོད། །ཧོར་སེར་ལས་དམག་མིན་ཟེར་ན། །ཤན་པ་མི་རྟ་རྐང་སྐོར་གྱིས། །ལུས་དང་སྲོག་ལ་ཕོད་དུ་བཙུགས། །དེ་ནས་ཡིད་ཆེས་ཨེ་སྐྱེས་ལགས། །དེ་ཚོ་བདུད་ཆེན་ཐུགས་ལ་ཞོག  །
ཅེས་ཟེར་ཞིང་གླུ་དེ་ལྟར་བླངས་པས། བདུད་རྒྱལ་གྱི་སེམས་ལ་ཁོ་རང་གིས་ཟེར་བ་ལྟར་བདེན་དུ་ཡང་རུང་བསམ་བཞིན་ཡོང་མུས་ལ། གླིང་པ་རྣམས་ཀྱིས་རྒྱང་ནས་མཐོང་སྟེ་དམག་རྟ་མི་ཁྲ་ལོང་ལོང་ཐལ་བ་ཕྱུར་ཕྱུར་དུ་བྱུང་བས། གླིང་དམག་ཤོར་དོགས་ཀྱིས་དམག་མི་རྣམས་ཆ་བགོས་ཀྱིས་རུ་རེ་རེ་ནས་མི་ལྔ་བཅུ་རེ་ལག་རྡོ་བགོས་ཤིང༌། གཞན་མ་རྣམས་ཀྱིས་སྒར་སྒོར་བསུ་བ་ལྟར་ཟིང་ཟིང་བྱེད་པའི་སྐབས་དེར། བདུད་རྒྱལ་བ་ཐོད་དཀར་དང་ཟླ་གྲོགས་རྣམས་སླེབས་ཤིང་རྟ་ནས་བབས་པའི་སྐབས་དེར། གོང་དུ་རྡོ་བགོས་པའི་འཇང་མི་རེ་རེ་ལ་གླིང་མི་གསུམ་གྱི་ཆ་ཡོད་པ་རྣམས་ཐམས་ཅད་འདུས་ཤིང༌། རང་རང་རྩེ་པག་ཐུར་གྱིས་འཇང་མི་ལྔ་བཅུ་ང་གཅིག་པོ་ཐམས་ཅད་བསད། སྐབས་དེར་གླིང་རྣམས་ནས་ཀི་དིར་གྱིས་ལུང་པ་བཀང་ཞིང་སེམས་བདེ་བས་ཁྱབ་ཅིང་གནས་སོ། །དེའི་སང་སྔ་བར་ཤན་པ་དང་གུང་པ་གཉིས་མངགས་ཤིང༌། འབྲུག་སྒྲ་དཔལ་ལྡན་དེ་ཡང་གོང་གི་དམག་དཔོན་གཉིས་ཁ་བསླུ་བྱས་པ་ལྟར་བྱེད་བསམ་པ་ཡོད་པས། དེའི་ནུབ་འབྲུག་སྒྲ་དཔལ་ལྡན་ལ་རྨི་ལམ་ཡག་རྒྱུ་མ་བྱུང༌། སང་སྔ་བར་ལངས་ཞིང་རུ་གསུམ་གྱི་སྒར་ནང་ནས་མི་དྲག་རྣམས་བསགས་ཤིང༌། དེ་རིང་ཉིན་འཁོར་ལ་མི་གྲིབ་ཅན་གཅིག་ཡོང་བ་ཡོད། མདང་རྨི་ལམ་དུ་རླུང་དམར་གྱི་དཀྱིལ་ན་བདུད་རྒྱལ་བ་ཐོད་དཀར་དཔོན་གཡོག་རྣམས་འདར་ལིང་ལིང༌། གྲང་ཞུམ་ཞུམ་ལུས་ཀྱི་རྒྱན་གོས་རྣམས་ཀྱང་མེད་པ་འདྲ་བ་ཞིག་བྱུང༌། གཡུ་ལྷ་ནི་གར་སོང་ཆ་མེད་ཟེར་བའི་གཏམ་ཤོད་མི་མོན་གྱི་བུ་མོ་འདྲ་བ་ཞིག་འདུག  དེའི་རྗེས་སྤྲང་ཐོག་ཁྲག་གི་མཆིལ་མས་ཚོས་པ་ཞིག་དང་དར་སྤྱང་གྲ་མ་ཉམས་པ་ཞིག་བྱུང་བ་རྨིས། ཅི་ཡིན་མི་ཤེས་ཏེ་བློ་བདེ་བའི་གནས་གཅིག་མི་འདུག་ཟེར་བ་ལ། གཞན་མ་རྣམས་གྱིས་ཅང་མི་ཟེར། གཡུ་ལྷའི་ཤོག་ནས་འདན་རྒོད་དར་ལུ་ཟེར་བ་དེ་ན་རེ། དམག་དཔོན་གཉིས་ནི་ཉ་གཏད་ཀྱི་ཁུལ་མེད་པར་ལངས་སོང༌། །དེའི་རྗེས་འབྲུག་སྒྲའི་རྨི་ལྟས་ངན་པ་སོགས་ཅི་ནས་བལྟས་ཀྱང་ཡག་རྒྱུའི་གཞི་མེད། ཡིན་ཀྱང་དམག་དཔོན་ཆེ་གཉིས་མེད་པས་སོང་བས་ནི་མ་བྱུང༌། དེ་རིང་ཉིན་འཁོར་རིག་པ་ལྕགས་སྐུད་ལྟར་བསྒྲིམས་ནས་སྡོད་པ་ལས་འོས་མེད་ཟེར་ཞིང་གྲོས་འཆམ་ནས་བསྡད་དོ། །ཉི་མ་ཕྱེད་ལ་ཟིན་ཙམ་ནས་ཤན་པ་གུང་པ་གཉིས་སླེབས་ཤིང༌། རྒྱང་ཙམ་ཡོད་སྐབས་འབྲུག་སྒྲའི་དཔལ་ལྡན་དེས་གོ་ཁྲབ་དང་འཁོར་གསུམ་གྱོན།  རྟ་སྤྲིན་དཀར་མཐོང་མཛེས་དེའི་སྟེང་དུ་ཐོན་ནས་སྒར་ནང་ནས་མདའ་རྒྱང་གང་ཙམ་སྔོན་དུ་ཆད་ཅིང༌། སྟོང་འཇུག་གཏམ་ལེན་ཅི་ཡང་མེད་པའི་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ལྷ་མཁྱེན་གནམ་ཐེལ་དཀར་པོ་མཁྱེན། །བསྐྱབས་སོ་བར་ཐེལ་ཁྲ་བོས་སྐྱོབས། །མཆོད་དོ་ས་ཐེལ་ནག་པོ་མཆོད། །དེ་རིང་ཁ་འཛིན་སྡོང་གྲོགས་མཛོད། །ས་འདི་ས་ངོ་མ་ཤེས་ན། །བྱང་ལ་སྐྱ་བོའི་གཡས་ཟུར་རེད། །ང་དང་ང་ངོ་མ་ཤེས་ན། །འཇང་ཡུལ་མཚལ་ར་སྨུག་པོ་ནས། །ཡུལ་གྲུ་བཞི་འདོད་དོན་འཛོམ་ས་ནས། །དཔོན་མི་འགྱུར་རི་རྒྱལ་འདྲ་བའི་གཡོག    །འབྲུག་སྒྲ་དཔལ་ལྡན་རྒོད་པོ་ཟེར། །ཕོ་ལོ་བཅོ་བརྒྱད་སྟེང་ལ་ཡོད། །སྟང་མ་བཅོ་བརྒྱད་ལུས་ལ་ཚང༌། །མི་རྒྱུད་མ་ཆད་ཡ་རབས་རྒྱུད། །དམར་ཡག་སྟག་གི་ངར་རྩེ་ཡིན། །རྨུ་རྗེ་ས་ཐམ་རྒྱལ་པོ་དེ། །ཕྱི་གླིང་ནང་གླིང་བར་གླིང་གསུམ། །ཚོ་གསུམ་སྡེ་ཤོག་ཚོགས་ཉིན་མོ། །རྒྱལ་པོའི་ཐུགས་འཛིན་ང་ལ་ཡོད། །འདྲ་འདྲའི་ནང་གི་ལྷག་ལེ་ཡིན། །ངོ་དཀར་ཕག་ནས་ཞེ་ནག་ཅན། །ཁ་འཇམ་རྒྱུད་ནས་མགོ་སྐོར་ཅན། །ཐན་སྐྱེལ་རིམ་པར་བཏོན་ཞིང་བྱུང༌། །ད་རུང་ཧམ་ཆེན་ཅི་འདྲ་ཡིན། །དམག་དཔོན་གཡུ་ལྷ་ཐོག་བསྒྱུར་དང༌། །བདུད་ཆེན་རྒྱལ་བ་ཐོད་དཀར་གཉིས། །འདིར་ཡོད་མི་བཏོན་ཅི་འདྲ་ཡིན། །ཁ་སང་གཡུ་ལྷ་འགྲོ་བའི་དུས། །ཞག་གསུམ་ཚུན་ལ་འཁོར་ངེས་ཡིན། །ད་རུང་མི་ཡོང་ཅི་འདྲ་རེད། །ཤར་གླིང་དཀར་སྟོད་ཀྱི་རྒྱལ་པོ་ལ། །བྱུས་ཁྲ་མོ་རྒུ་རུ་འཛིན་ཚོད་དེ། །ཐབས་དང་ཤེས་ཀྱིས་ལེན་དགོས་ཟེར། །ད་རུང་མི་ལེན་ཅི་འདྲ་རེད། །ཨ་ཀྱང་མཚར་གྱི་ཆེ་བ་ལ། །སྔ་ཚིག་ཕྱི་ནོན་མེད་པ་ནི། །རྫུན་མས་ཧམ་གཏམ་ལབ་ལབ་རེད། །བསླུ་ཚིག་དྲན་ཁུལ་ཆེ་བ་དེ། །དྲེད་མས་ཁྲམ་གཏམ་ལབ་ལབ་རེད། །མི་མགོ་ཐབས་ཀྱིས་བསྐོར་བ་འདི། །ཁྱི་རྒན་བདག་མ་ཁྲི་ཁྲིག་རེད། །ཁྲམ་ཚིག་དྲན་གཏམ་མགོ་སྐོར་དེ། །མི་ང་ཙམ་ཐོག་ལ་འགྲོ་ས་མེད། །དམག་དཔོན་མཆེད་གཉིས་མགོ་བྱས་ཀྱི། །ཁྲབ་མ་ཚེ་མདུད་སྤུངས་སེ་དེ། །མི་དར་ཁྱོད་ཀྱིས་མགྲོན་དུ་བོས། །འདི་ཡོད་ཡོད་ན་ད་ལྟ་སྟོན། །དེ་མིན་གསོན་དུ་གཏོང་རྒྱུ་མིན། །གོ་ན་རྣ་བའི་བདུད་རྩི་ལ། །མ་གོ་དྲན་པའི་ཟུར་དུ་ཕུད། །དེ་ཚོ་ཡན་ལ་ལབ་རྒྱུ་མེད། །
ཅེས་ཟེར་ཞིང་གླུ་དེ་ལྟར་བླངས། གྲི་མགོ་འཕུར་ཞིང་ངར་ལངས་པའི་སྒོ་ནས་སོ་སྒྲ་ལྡིར། མིག་རྩ་དམར་འཁྲུག་འཁྲུག་བྱེད་པའི་སྐབས་དེར། ཤན་པའི་བསམ་པ་ལ་མི་འདི་ལ་གཞན་འདྲའི་བརྙས་བཅོས་འགྲོ་བའི་རིགས་མི་འདྲ། སྟབས་ལེགས་པོ་ཞིག་མ་བྱས་ན་མི་འོང་བསམས་ནས་སྨྲས་པ། ཁོ་རེ་འབྲུག་སྒྲ་རྒོད་པོ་ང་རྒྱལ་གཅིག་པོས་ཆོག་པ་མིན། མི་གཞོན་གྱིས་དཔའ་འདོད་བྱས་ཀྱང་གྱོད་ཀྱི་གཞི་ཡིན། དེ་བས་ང་ཤན་པ་དམར་པོའི་གཏམ་ལ་དོན་འབྲས་ཡོད་པས་ཉོན་ཅིག་ཟེར་ནས་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ང་དང་ང་ངོ་མ་ཤེས་ན། །སྡིག་སྤྱོད་ཤན་པ་རྨེ་རུ་རྩེ།་་་་།མཐོན་པོའི་ཡའུ་ཤན་པ་ཡིན། །དགུང་དང་ཉི་ཟླ་སྡེབ་འདྲ་ཡིན། །དམའ་བའི་གྲོགས་པོ་ཤན་པ་ཡིན། །གཏམ་དང་སྤྲད་ས་སྡེབ་འདྲ་ཡིན། །གཏམ་ན་བརྒྱ་ཁ་གཅིག་ཐོགས་ཡིན། །དབྱུག་ན་གླང་ཆེན་བརྒྱད་འགྲིག་ཡིན། །ཤེས་གོ་རིག་ནམ་མཁའི་རང་མདངས་ཡིན། །མ་ངར་མ་ངར་ཕ་ཡི་བུ། །དྲིན་ཕ་མའི་མདུན་གྱི་གཅེས་ཕྲུག་དེ། །ས་མདའ་མ་བསྐོར་རིག་ཉུང་ཆུང༌། །རྟ་གསར་ཐུ་རུའི་ལག་སྣེ་དེ། །མ་སྦྱང་མ་རྒྱུག་ཁ་ངར་ཆེ། །ལུང་ཆུང་ཕུག་གི་ཁྱི་རྒོད་དེ། །དམར་ཡག་ཁྱེར་ན་བདག་ལ་འཇུ། །མགོ་སྟོད་རྣ་བས་ང་ལ་ཉོན། །ད་ནང་ནང་མའི་སྔ་དྲོ་ལ། །ཧོར་རྗེ་གུར་དཀར་རྒྱལ་པོ་དང༌། །འཇང་ཕྲུག་གཡུ་ལྷ་ཐོག་འགྱུར་གཉིས། །བདུད་ཆེན་རྒྱལ་བ་ཐོད་དཀར་གསུམ། །ཉི་ཟླ་སྐར་གསུམ་སྡེབ་དང་མཚུངས། །གླིང་བཞིའི་འོད་ལ་དགུག་ཅིང་འདུག    །སྟག་སེང་གཟིག་གསུམ་བསྡེབས་དང་མཚུངས། །ས་གཞི་རྔམ་ཞིང་དཔའ་བར་འདུག །ཤན་རྒོད་ཁྲ་གླག་མཉམ་སྡེབ་བཅས། །དགྲ་ལ་དགྲ་ལན་འཕྲོད་ངེས་འདུག    །གཉན་ལ་ཇ་ཆང་ཕྱར་ངེས་འདུག    །དཔོན་པོ་མཆེད་གསུམ་གསུང་ལེ་ལ། །ཤན་པ་མ་སྡོད་རྒྱུག་ཤོག་གསུངས། །དམག་དཔོན་འབྲུག་སྒྲ་དཔལ་ལྡན་དེ། །ཆིབས་ཁ་གདན་ཞུ་གྱིས་ཤོག་གསུངས། །མ་སྡད་ཤན་པ་ཡོང་ལེ་ཡིན། །སང་གི་ལྷ་ཉིན་དཀར་པོ་ལ། །དམག་དཔོན་ལྷ་གུར་ནང་དུ་འཛོམས། །གླིང་དཀར་བྲན་དུ་འགུགས་ལེ་ལ། །གཏམ་དང་གྲོས་ཁ་འདིང་དགོས་ཡོད། །འབྲུག་སྒྲ་དཔལ་ལྡན་མེད་ཐབས་མེད། །འཇང་ཕྲུག་མཚལ་ར་སྨུག་པོ་ལ། །གྲགས་པ་ཆེ་བའི་མི་གཅིག་རེད། །ལོ་གཞོན་ཀྱང་ཤེས་རིག་རྒྱས་ལེ་རེད། །གངས་སེང་དཀར་པོའི་བུ་རྒྱུད་དེ། །མ་ཚར་གྱུར་ཀྱང་གཡུ་རལ་རྒྱས། །བྱ་རྒྱལ་ཁྱུང་གི་ཕྲུ་གུ་ལ། །མ་ཚར་གོང་ན་གཤོག་སྒྲོ་རྒྱས། །རྒྱ་སྟག་ཁྲ་བོའི་བུ་རྒྱུད་ལ། །གཞོན་ནུའི་དུས་སུ་རི་མོ་ལོགས། །འབྲུག་སྒྲ་དཔལ་ལྡན་རྒོད་པོ་ཁྱོད། །ཆུང་ངུའི་དུས་སུ་ཤེས་པ་བཀྲ། །སྐོར་ན་གོང་དཀར་སེམས་ལ་བསྐོར། །ཁྲ་ཆུང་སྐོར་མགོ་མ་ཤེས་ན། །དགྲ་དང་གཉེན་ལ་ནོར་འཁྲུལ་ཆེ། །བསམ་གཏན་སྒོམ་ལུགས་མ་ཤེས་ན། །ལྷ་བདུད་གཉིས་ལ་ནོར་འཁྲུལ་ཆེ། །ཤན་པ་དགྲ་རུ་འཛིན་རྒྱུ་ལ། །གཡུ་ལྷས་བཏང་བའི་ཕོ་ཉ་ལ། །འབྲུག་སྒྲས་དགྲ་བཟུང་ཟེར་བ་ན། །དམག་དཔོན་ནང་འཁྲུག་ཡོང་བའི་གཞི། །བུ་ཆུང་བསམ་བློ་འཁྲུལ་ལེ་རེད། །དེ་འདྲ་ལར་གྱི་དགོས་དོགས་མེད། །སྡེ་གཉིས་འདུན་མ་གཏམ་ལེ་ལ། །དཔོན་པོ་ཁ་གཏམ་མཐུན་ལེ་དགོས། །ད་ཡང་མི་སྡད་ཕེབས་རྒྱུ་གྱིས། །ངེད་གསུམ་མི་སྡོད་བསྡེབས་ནས་འགྲོ། །རྟ་གསུམ་མི་བཏང་ཁ་རུ་སྒྲིལ། །གཏམ་གོ་ནི་ཨེ་བྱུང་འབྲུག་སྒྲའི་དཔོན། །གོ་ན་སེམས་དཀར་དང་དུ་ལེན། །མ་གོ་ནན་ཏན་སྐྱོར་རྒྱུ་མེད། །
ཅེས་ཟེར་ཞིང་གླུ་དེ་ལྟར་བླངས། མཇུག་མ་རྫོགས་ཙམ་དུ་སྡེ་རྒོད་དར་ལུ་དེ་ཡང་རྟ་ནག་པོ་དེ་གཡབ། འཁོར་མི་ནག་རྟ་ནག་ལྔ་བཅུ་སྐོར་བཅས་ཐམས་ཅད་འུར་སེ་རྒྱུགས་བྱུང་བ་ཡང་སླེབས། ཤན་པ་ནི་བློ་ཕུག་ཏུ་ཧབ་ཧབ་འཚབ་འཚབ་ཡོད་ཀྱང་མ་འཇིགས་པའི་ཚུལ་བྱས། གུང་པ་ནི་འདར་ཞིང་ཁྲབ་གཤོམས་མི་བྱེད་པའི་སྐབས་དེར། འབྲུག་སྒྲ་དཔལ་ལྡན་དེ་ཡི་བསམ་པར་མི་འདི་གཉིས་ཡིན་ལུགས་དང་རང་རྒྱུད་ཅི་ནས་བལྟས་ཀྱང་རྩ་བ་གླིང་ལ་ཐུག་ཡོད་པ་ཁག་ཐེག དཔེར་ན་བང་མཛོད་སྒོ་དབྱེ་བའི་ལྡེ་མིག་ལྟ་བུ་སྔོན་དུ་ཐབས་མཁས་ཀྱི་མངགས་པ་ཡིན་སྲིད། སྒོས་སུ་མ་སྤྱང་བཟའི་རྨི་ལམ་གྱི་ལྟས་རྣམས་མི་འདི་ལ་ཚང་འདུག    གཡུ་ལྷ་དང་བདུད་རྒྱལ་བ་ཐོད་དཀར་གཉིས་ལོག་རྒྱུ་མེད་པ་ཁག་ཐེག ཁོ་རང་གཉིས་འདི་རང་ལ་མེད་པ་བཟོས་ན་འཕྲུག་གཙང་བསམ།  གློ་བུར་ཚིག་པ་ཟ་ནས་གྲི་ཁ་སྤར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །གླུ་ཡར་མཆོད་དགུང་སྔོན་གཡང་གི་རི། །དགུང་སྔོན་གླུ་ཡིས་མ་མཆོད་ན། །མགོ་དར་འཕྲུའི་གཏད་སོ་གང་ལ་བྱེད། །གླུ་བར་མཁྱེན་བར་སྣང་ཡངས་ས་ནས། །བར་སྣང་གླུ་ཡིས་མ་མཆོད་ན། །ལུས་འདོམ་གང་གཏད་སོ་གང་ལ་བྱེད། །མ་མཆོད་དགོས་མོའི་བསྲ་གཏན་ན། །ས་དོག་མོ་གླུ་ཡིས་མ་མཆོད་ན། །རྐང་མཐིལ་དྲུག་གཏད་སོ་གང་ལ་བྱེད། །དེ་ནས་ང་ལ་ཉན་རྒྱུ་ལ། །དར་ལུང་རྣ་བའི་སྐད་རྒྱང་ལ། །ཧོར་ཡ་ཟི་གུར་དཀར་རྒྱལ་པོ་རྣམས། །རྗེས་མེད་ཤི་ནས་ལོ་གཅིག་ཟེར། །གོར་ཡུལ་ལུང་གསུམ་སྟོང་པ་ཟེར། །ད་ལོ་ཤི་སྔ་ཡོད་རྒྱུ་རེད། །ལོ་རེ་ཤི་ཞིང་ལོ་རེ་ལངས། །སྐྱེ་འགྲོའི་སྲོལ་ལ་མི་དར་ལེ། །ཧོར་སེར་པོའི་ཕ་སྲོལ་ཅི་འདྲ་རེད། །ཡང་མིན་ན་ཁྱོད་རང་སྨྱོ་ལེ་རེད། །སྨྱོ་ཚིག་ལུང་པ་འགེངས་ལེ་རེད། །མིན་ན་ཁྱོད་རང་འཆལ་ལེ་རེད། །འཆལ་གཏམ་ས་གཞི་ཁྱབ་ལེ་རེད། །འདི་ལོ་ཕར་དམག་ཆས་པའི་དུས། །ཨ་མ་འཇང་བཟའ་ལྷ་མོ་དེའི། །རྨི་ལམ་མ་བཟང་ངན་ནས་བྱུང༌། །ལྟས་ངན་འུག་པ་སེར་པོ་ཡིས། །དུང་སྒོང་སྤུན་གསུམ་ཟོས་པ་རྨིས། །འདི་ལོ་མི་བཟང་ཉེས་ཡོད་ཟེར། །གེ་སར་རྒྱལ་པོའི་ཆོས་སྲིད་ལ། །མ་གྲགས་མེད་པའི་ཁྱབ་ངོ་རེད། །ཁྱོད་ཀྱི་ཁ་མཁས་གླེང་མོ་དེ། །འཇང་སྡེ་གྲོགས་སུ་འགྱུར་བསམ་མེད། །སེར་པོ་ཧོར་དང་ས་ཐམ་འཇང༌། །བྱུས་སྣེ་འཐུད་ལུགས་ཅི་ཞིག་བྱེད། །ཤི་གསོན་གཉིས་ཀྱི་བྱུས་འཐུད་ནི། །ཅི་ནས་བལྟས་ཀྱང་ཡོང་ཐབས་མེད། །ཧམ་ཆེན་གཏམ་ཏེ་ཞོག་དང་དགའ། །དམག་དཔོན་ཆེ་གཉིས་ཞལ་རེ་དེ། །འདིར་ཡོད་སྟོན་རྒྱུ་གཅིག་ཀྱང་མེད། །ད་རུང་བཤད་བཤད་ལུང་པ་གང༌། །མི་དར་སེམས་ཀྱི་དཀྲུགས་ལུགས་ལ། །རལ་གྲི་ཁྲག་འཐུང་ངར་ཆེན་འདི། །དེ་རིང་ཁྱོད་ལ་མཐའ་ངེས་ཡིན། །ཨེ་རེད་མ་རེད་བསམ་བློ་ཐོངས། །བསམ་ཤེས་ཡིན་ན་བླ་མ་སྒོམས། །འདོན་ཤེས་ཡིན་ན་ཡིག་དྲུག་ཐོན། །སྒྱུ་མའི་ལུས་ཕུངས་ས་ལ་རྡེབ། །རྣམ་ཤེས་མར་མེ་གུང་དུ་འདྲེན། །
ཞེས་ཟེར་ཞིང་མཚོན་ཁྲག་འཐུང་དེ་ཕྱེད་ཙམ་བཏོན་སྐབས། ལྡེམ་རྒོད་དེས་དཔུང་པ་ནས་བཟུང་ཞིང་འདོན་དུ་མ་སྟེར་ཞིང༌།  ཁྱོད་ཅུང་ཟད་ལག་སྔ་བའི་སྐྱོན་ཡོང༌། དེ་བས་འདི་ལྟར་བྱས་ན་བསམ་ཟེར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །མི་དམར་རྟ་དམར་གཡབ་ལེ་ཁྱོད། །ཟར་གཏམ་ཟུར་གཏམ་མང་བ་ལ། །དེ་བསམ་འབྲུག་སྒྲ་ཞེ་སྡང་ལངས། །དམག་དཔོན་མཆེད་གཉིས་འདིར་ཡོད་མེད། །དེ་བསམ་འབྲུག་སྒྲ་ཚིག་པ་ཟོས། །མཐའ་ངེས་ཁྱོད་ལ་མཐའ་རྒྱུ་རེད། །དགའ་རུ་བསམ་མམ་སྡུག་ཏུ་བསམ། །ཡིན་ཀྱང་ཨ་བུའི་འདུན་མ་ཡོད། །དེ་རིང་ཉི་མའི་དཀར་ལམ་དང༌། །སང་ཉིན་གནམ་གང་ཚུན་བསྟན་ལ། །མ་བསད་བུ་གཉིས་བཞག་རྒྱུ་གྱིས། །དམག་དཔོན་ཆེ་གཉིས་སྒུག་ལ་སྡོད། །དེ་ནས་ཚུར་ཡོང་མ་བྱུང་ན། །མི་ཤ་ཟོག་ཤོར་རྩ་ར་རེད། །ཐོན་ངེས་ཁྱོད་ཀྱི་སྟེང་དུ་ཡོང༌། །དེ་ནས་འབྲུག་སྒྲ་དཔལ་ལྡན་ལགས། །ངར་རྒོད་བུ་ཡི་གཡུལ་ངོ་དེ། །དེ་ནུབ་དཔའ་ཁ་འཐེན་ཙམ་གྱིས། །རྣོ་ངར་རྒྱ་ཁྲ་ཤུབས་ལ་བཞུགས། ། །མ་འདུག་ཁྲ་བོ་སྒར་ལ་འགྲོ། །འོག་གི་རྟ་དང་སྟེང་གི་མི། །བར་གྱི་གོ་མཚོན་དེ་རིགས་ལ། །མ་ཉམས་མགྲོན་པོའི་ཚུལ་དུ་བཞུགས། །དེ་ནས་དཔོན་གཉིས་མ་བྱོན་ན། །ཁྱོད་རང་སྒྲུབ་ལེ་རང་ལ་འཁོར། །སྤྱོད་པ་ངན་པའི་ཁྱེར་ཚུལ་དེ། །ཐ་མ་སྲོག་གི་བདུད་དུ་ཡོང༌། །འགྱོད་ཀྱང་བྱ་ཐབས་ཅི་ཡང་མེད། །ཨེ་རེད་མི་རེད་འབྲུག་སྒྲ་དཔོན། །ང་རང་བསམ་བློ་དེ་ལྟར་ཡོད། །རེད་བསམ་འབྲུག་སྒྲའི་ཐུགས་ལ་ཞོག །
ཅེས་ཟེར་བ་ལ། འབྲུག་སྒྲ་དཔལ་ལྡན་གྱི་བསམ་པར་ལྡེམ་རྒོད་དར་ལུ་འདི་ཡང་འཇང་ཡུལ་དུ་ལྡིང་ཆེ་བ་ཚད་དུ་གྲགས། དེ་རིང་ཁོ་རང་གིས་ཟེར་བ་ལྟར་བདེན་ཡོང༌། རྒྱ་ལ་གཡུ་ལྷས་མངགས་པ་ཡིན་སྲིད་ན། གསོད་ཀྱང་མི་རུང་བསམ་ཅུང་ཟད་ངར་ཞི་བའི་ཚུལ་བྱས་ནས་བསྡད་དོ། །དེར་ཤན་པའི་བསམ་པར། ད་སྟེ་མི་འདིས་བྱ་བ་ཉེས་པོ་ཞིག་སྒྲུབ་རྩིས་འདུག་རུང་རེ་ཞིག་ཁོ་རང་གིས་ཟེར་བ་ལྟར་སྡོད་པ་ལས་འོས་མ་འདས། འོན་ཀྱང་ད་རུང་གོ་བསྟོན་འདྲ་ཡོད་བསམ་སྨྲས་པ། ཁོ་རེ་འབྲུག་སྒྲ་ཀླད་མེད་ཀྱི་ལས་དེ་མ་བྱེད་བསམ་བློ་ལེགས་པར་སྐོར་དང༌། ཤན་པ་བསད་རུང་ཆོག་སྟེ། མི་ཤ་ཐོན་ངེས་ཀྱི་ཐ་མ་འཇང་རྒྱལ་བློན་རང་ལ་མཐའ་བ་ཞིག་འགྲུབ་ཡོང་ཟེར་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །སྟོང་ཉིད་དབྱིངས་ཀྱི་རྭ་བ་ནས། །མཁྱེན་ནོ་གནམ་ཐེལ་ར་དཀར་སྐྱ། །དེ་རིང་ཤན་པའི་དཔལ་མགོན་མཛོད། །ཧོར་སེར་བསྟན་པ་ཚུགས་པར་ཤོག     །དེ་ནས་ཉོན་དང་འབྲུག་སྒྲ་དཔོན། །རྒོད་པོ་ངར་གྱི་སྡོང་པོ་ཅན། །རྣོ་སྡིག་མཚོན་གྱི་གྲི་མགོ་ཕུར། །བདེན་ངེས་ཡིན་ནམ་ཀུ་རེ་ཡིན། །བདེན་ངེས་ལས་ཤིག་ཡིན་ཟེར་ན། །དམག་དཔོན་ཁྱབ་ས་ཆེས་ངེས་རེད། །མི་ལ་བཤད་ན་ག་འདྲ་ཤོད། །རང་གི་སེམས་གཏད་ག་ལ་བྱེད། །སྡང་བའི་དགྲ་དང་བྱམས་པའི་གཉེན། མགོ་ནག་མི་ཡི་ཁྲེལ་རྒྱུ་རེད། །གཡུ་ལྷས་མངགས་པའི་བང་ཆེན་རེད། །འབྲུག་སྒྲས་གསོན་དུ་མ་བཏང་ཟེར། །ཁ་ཐོགས་མི་ཡིས་གླེང་རྒྱུ་ཡོང༌། །ཕོ་ལོ་བཅོ་བརྒྱད་ན་གཞོན་ལ། །གཏམ་ངན་ཚད་ཅིག་བཞག་རྒྱུ་རེད། །ད་རུང་དེས་ཀྱང་མ་ཚད་པའི། །འ་ཆེན་གཞུང་གི་གུར་དཀར་དང༌། །ས་ཐམ་འཇང་གི་རྒྱལ་པོ་གཉིས། །རི་དགུ་མདུད་པ་སྒྲིལ་རྒྱུ་རེད། །མཚོ་དགུ་རྦ་རླབས་འཁྲུག་རྒྱུ་རེད། །ད་ལྟ་གངས་རི་ཉི་སྡེབ་ལ། །རྫ་ནག་མུན་སྡེབ་བཟོ་རྒྱུ་མེད། །ད་ལྟ་མེ་ཏོག་སྤང་སྡེབ་ལ། །རྩྭ་ཕུར་རླུང་གིས་དཀྲུགས་རྒྱུ་རེད། །མི་ཆུང་བྱ་བ་མི་ཆེ་འམ། །བསམ་ཆུང་གྱོད་གཞི་མི་ཆེ་འམ། །ད་དུང་བསམ་བློ་ལེགས་པར་སྐོར། །ན་རབ་གཅིག་ལ་རྡོག་གཏད་ན། །ཉི་ཟླ་གུང་དང་ཆེ་སྡེབ་དེ། །ས་ཐར་གུར་དཀར་གཉིས་ལ་གྱིས། །མུན་པ་ཆེ་ཡང་རང་ཤི་ཡིན། །དཔོན་པོ་ཉི་ཟླ་ཟུང་འབྲེལ་དང༌། །བློན་ཚོགས་སྐར་ཕྲན་མཐའ་གང་དེ། །དཔོན་མགོ་ཉི་མ་ཤར་འདྲ་བྱེད། །གྲོས་མགོ་མཁར་བཙན་བཟུང་འདྲ་བྱེད། །སྡེ་གཉིས་རྩི་ཐོག་ཆགས་འདྲ་བྱེད། །མ་བཞུགས་འབྲུག་སྒྲ་ཕེབས་རྒྱུ་གྱིས། །ན་རབ་རྡོག་གཏད་དེ་ལ་གྱིས། །དེ་འདྲ་མི་བྱེད་མི་དགའ་ན། །ན་འབྲིང་སེམས་གཏད་འདི་འདྲ་བྱེད། །ཡ་ཟིའི་ཧོར་གྱི་རྒྱལ་པོ་དང༌། །ས་ཐམ་འཇང་གི་རྒྱལ་པོ་གཉིས། །རྩོད་རྒྱུ་མེད་པའི་ལབ་རྒྱུ་དེ། །ཕར་ཤོར་མེད་པའི་ཤ་ལེན་གཉིས། །དོན་མེད་མི་བྱེད་ཞོག་ནས་ཐོངས། །དཔོན་གཉིས་བྱུས་སྣེ་མི་མཐུད་ཀྱང༌། །སྡེ་གཉིས་ཁ་འཐབ་བཟོ་དོན་མེད། །ར་རྒན་ཆེ་ན་རང་སར་སྡོད། །ཉི་ལམ་དྲོ་ན་བྲག་སྟོད་བཟུང༌། །གཡང་དཀར་ཆེ་ན་རང་སར་སྡོད། །སྤང་རི་མཐོ་བའི་ཟས་ལ་འགྲོ། །ངེད་གཉིས་འཛིན་ས་དོན་མེད་ཡིན། །ད་རུང་དེས་ཀྱང་མ་ཚད་པའི། །སེམས་ནག་སྡོང་པོ་ནོར་ལ་བཟུང༌། །ཚིག་ངན་འབྲས་བུ་ཁ་ནས་འབུད། །སྤྱོད་ངན་ལོ་མ་སྟེང་ནས་འཁྲིགས། །དེ་རིང་ངོ་གཉིས་བསད་ཟེར་ན། །སང་ཉིན་ར་མདའ་སླེབས་ནས་ཡོང༌། །དཔོན་གཉིས་གཏོང་བའི་རེ་བ་མེད། །ཨ་ཡག་ཁྱོད་རང་བསམ་བློ་ཐོངས། །བྱ་རྒྱུ་བྱེད་རྒྱུ་གང་ཡང་མེད། །ད་ལྟ་ཁྱོད་རང་ལག་ལ་ཡོད། །ཡག་ཉེས་བྱ་བ་ཕྱི་ནས་ཤེས། །གོ་ན་གཏམ་ལ་དང་ལེན་གྱིས། །མ་གོ་ནན་ཏན་སྐྱོར་རྒྱུ་མེད། །ཤེས་ན་ཚིག་ལ་དོན་འབྲས་ཡོད། །མ་ཤེས་བཅལ་གཏམ་རྣ་ཟུར་འགྲིམས། །
ཞེས་གླུ་དེ་ལྟར་བླངས། འབྲུག་སྒྲ་དཔལ་ལྡན་གྱིས་སྨྲས་པ། ཨ་བུ་ལྡེམ་རྒོད་ཀྱིས་ཟེར་བ་ལྟར་ཞག་གཅིག་གཉིས་ཁྱོད་རང་གཉིས་སྒར་ནང་དུ་བསྡད་ན་མ་གཏོགས་དེ་མིན་བསམ་བློ་གཅིག་ལས་མེད། ང་ཁྱེད་ཀྱི་རྗེས་ལ་འགྲོ་བ་ཡང་མི་རུང་ཟེར་བ་ལ། ཤན་པ་དང་གུང་པ་གཉིས་ཀྱིས་རེ་ཞིག་སྡོད་པ་ལས་འོས་མ་འདས་ཟེར་ནས་བློ་མཐུན་ཞིང་འཇིགས་ཞུམ་པའི་ངང་དུ་འཇང་དམག་དེའི་སྒར་ནང་དུ་བབས་སོ། །དུས་དེ་ཙམ་ན་འཛམ་གླིང་སེང་ཆེན་རྒྱལ་པོ་འཁོར་དཔུང་དང་བཅས་པ་སྒར་བཏབ་ནས་བཞུགས་པའི་ཚེ། ནམ་སྲོད་ཀྱི་ཕྱེད་ཡོལ་ཙམ་དུ་ནམ་མཁའ་འཇའ་འོད་དང་སྒྲ་སྙན་པའི་རོལ་མོ་ལྷང་ལྷང༌། དྲི་ཞིམ་སྤོས་དང་སྨན་སྣ་ཚོགས་འདུ་བ་འཐིབ་ཏུ་བྱུང་བས་མཐར་སྤྲིན་འཇའ་སྣ་འཁྲིགས་པའི་དབུས་སུ། ལྷ་ཡི་བུ་དར་དཀར་གྱི་ན་བཟའ་འཇའ་ཚོན་སྣ་ལྔའི་མཐའ་བཅད་གསོལ་བ། ཕྱག་གཡས་ན་ཤེལ་དཀར་གྱི་རལ་གྲི། །གཡོན་དགོས་འདོད་ནོར་གཞོང་འཛིན་པ། །ལྷ་རྟ་གྲོ་དཀར་ཞབས་ལ་ཆིབས་པ། །མདུང་དར་སྤྲིན་དཀར་གཡོན་ལ་མཆེད། །མདའ་དར་ལྷ་མཚན་གཡས་ལ་བཀྲ། །ལྷ་ཕྲུག་བྱེ་བ་འབུམ་གྱིས་བསྐོར། །གསུང་ག་ཆིག་འདྲེས་པའི་འོད་གསལ་མདུན་དུ་མར་མེ་འབར་བ་ལྟ་བུའི་ལུང་བསྟན་གྱི་གླུ་དེ་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ས་འདི་ས་ངོ་མ་ཤེས་ན། །འཛམ་གླིང་ལྷོ་ཡི་ལྟེ་བའི་ཤར། །རྒྱ་ནག་ཆགས་པའི་ནུབ་ཕྱོགས་རེད། །ང་དང་ང་ངོ་མ་ཤེས་ན། །ཡབ་ཆེན་ཚངས་པ་དཀར་པོ་ཟེར། །གེ་སར་ལྷ་ཡུལ་འཛིན་པའི་དུས། །སྐྱེས་བུའི་ཡབ་ཆེན་ཚངས་པ་ཡིན། །རྒྱལ་པོ་མི་ཡུལ་ཕེབས་པའི་དུས། །སྐྱེས་བུའི་སྡོང་གྲོགས་ཚངས་པ་ཡིན། །དཀར་ཕྱོགས་ཆོས་ཆར་འབེབས་མི་ལ། །དད་རྟེན་བསམ་བློ་བཟང་ལེ་དགོས། །ཁ་འཛིན་མི་དགོས་གང་ཡང་མེད། །དེ་ནས་ཚངས་པའི་ལུང་བསྟན་ཡོད། །འདི་ལོ་གླིང་དཀར་ཕར་དམག་འདི། །བློ་སེམས་གཅིག་ཏུ་མི་འཛིན་པའི། །རྩེ་གཉིས་བློ་རྩེ་གཅིག་ཀྱང་མེད། །ཡང་སྒོས་སྡིག་སྤྱོད་ཤན་པ་དང༌། །གུང་པ་བུ་ཡི་ཁྲ་སྐྱ་གཉིས། །ཁ་སང་སྔོན་དུ་བུད་ལེ་དེ། །དཔག་ཆེན་མདའ་མོ་རང་ཤུགས་ཅན། །དེ་རིང་བྲག་དམར་ཁྲོམ་ལ་ཕོག །ཚུར་ལོག་ཡོང་རྒྱུ་མི་དགོས་ཏེ། །སྒྲ་སྨྱུག་ཚང་བ་ཁག་པོ་རེད། །འབྲུག་སྒྲ་དཔལ་ལྡན་རྒོད་པོ་ཁོས། །བློ་དང་ཐབས་ཀྱི་ཞགས་པ་ཡིས། །གཟུགས་བཀྱིག་མེད་པའི་བཙོན་དུ་བཟུང༌། །སྡུག་དགུ་སེམས་ལ་འཆར་ཞིང་འདུག །འགྲོ་བསམ་མི་ཡིས་མི་བཏང་འདུག །འཕུར་བསམ་གཤོག་པ་མི་སྐྱེ་འདུག །འཛུལ་བ་ཁང་ལ་མི་ཐར་འདུག །ཞག་གསུམ་ཕན་ལ་འགྱང་ཟེར་ན། །མི་གཉིས་འཇང་གིས་གསོད་ངེས་རེད། །ད་རུང་དེས་ཀྱང་མ་ཚད་པའི། །བྱང་ལུང་རྒྱབ་ཏུ་སོ་པ་འཛུགས། །གླིང་དམག་ཡོད་པའི་སྒར་ཕྱོགས་སུ། །འབྲུག་སྒྲའི་མི་ལྔ་འཁྱུག་རྒྱུ་རེད། །དེ་ནས་མི་ལྔ་འཁྱུག་ཟེར་ན། །འཇང་ཡུལ་མཐིལ་དུ་ཤོར་ནི་འགྲོ། །འཇང་ཡུལ་མཐིལ་དུ་ཤོར་ཟེར་ན། །བར་སྣང་མཐོ་བའི་འགྲིམ་ལམ་ནས། །གཡུ་འབྲུག་སྐད་རྒྱང་དེ་དང་གཅིག །དཔག་བསམ་ཤིང་གི་ཡང་རྩེ་ནས། །ལྕོགས་ཆུང་གཤོག་སྐད་བྱུར་ལྷ་གཉིས། །མཐོ་འཛོམ་བེར་ཐུལ་གངས་སེང་གསུམ། །འཇང་མི་ཁྲི་ཕྲག་དུག་རླངས་བཅས། །སྨར་ཁམས་གླིང་ལ་ཤོར་ངེས་ཡིན། །གདོང་ཐུག་བྱུང་ན་ཐུབ་ས་མེད། །དམར་ནག་གཤིན་རྗེའི་ཞལ་ངོ་དེ། །དྲང་སྲོང་ལྷ་ཡི་བཟློག་པར་དཀའ། །འཛམ་གླིང་སེང་ཆེན་རྒྱལ་པོ་ནི། །ཅི་དགོས་དཔུང་དེ་ལྷ་ཡིས་སྐྱོབས། །འཇང་མི་དུག་རླངས་དཔག་ཚད་ཁྱབ། །ལྷ་འཁོར་ཡིན་ཀྱང་འཁོར་མི་ནུས། །སང་གི་ཉི་མའི་སྔ་དྲོ་ལ། །ལྷ་སྒར་དཀར་པོའི་ལས་དམག་འདི། །འདི་རུ་མ་སྡོད་ཤར་སེ་རྒྱུག  འབྲུག་སྒྲའི་དམག་ལ་ཐོག་བརྫིས་ཐོངས། །འདི་རུ་མ་སྡོད་ཤར་སེ་རྒྱུག །དོ་ནུབ་ཉི་མའི་ཡར་སྟེང་ལ། །འབྲུག་སྒྲའི་དཔལ་ལྡན་རྒོད་པོ་དེ། །མི་བློ་མི་ཡི་མ་གྱུར་ཀྱང༌། །ཡང་བློ་ལྷ་ཡི་ཨེ་འགྱུར་ལྟ། །སང་ཉིན་ཉི་མ་ཕྱེད་ཙམ་ལ། །གླིང་དམག་གཡུལ་སྒོ་ཕུབ་ལེ་གྱིས། །འཇང་མི་གཅིག་ཀྱང་མ་ལུས་པ། །ཁྲག་དམར་སྡིག་ལ་བསྲིས་ནས་ཞོག །དེ་ནས་གང་དགོས་རིམ་གྱིས་བྱེད། །ཅེས་གསུངས་ཞིང༌། ལུང་བསྟན་གྱི་ཚིག་དེ་ལྟར་གསུངས་རྗེས་མི་སྣང་བར་གྱུར་ཏོ། །
དེའི་སང་སྔ་བར་རི་མཐོ་བ་སེར་ཞུ་མ་གྱོན་ཙམ་དུ། རུ་གཡས་གཡོན་གུང་གསུམ་གྱི་དམག་དཔོན་རྣམས་དང༌། དེ་དྲག་གི་དཔའ་བོ་གང་ཡོད་རྒྱལ་པོའི་དྲུང་དུ་འཛོམས་ཤིག་གསུངས། དེར་ཐམས་ཅད་ལྷ་གུར་དུ་འཛོམས་ཞིང༌། རྒྱལ་པོས་གསུངས་པ། གླིང་ཆེ་འབྲིང་ཆུང་གསུམ་གྱི་དམག་དཔོན་རྣམས་དང༌། དེ་དྲག་གི་དཔའ་བོ་གང་ཡོད་རྒྱལ་པོའི་དྲུང་དུ་འཛོམས་ཤིག་ཅེས་གསུངས་བསྒྱུར། དེར་ཐམས་ཅད་ལྷ་གུར་དུ་འཛོམས་ཞིང༌། རྒྱལ་པོས་གསུངས་པ། གླིང་ཆེ་འབྲིང་ཆུང་གསུམ་གྱི་དཔོན་པོ་ཚང་མར་གྱུར་པ་རྣམས་རྣ་བའི་བུ་ག་གཏད་ལ་གསན་འཚལ། །ང་འགོག་ཚ་ཇོ་རུ་ལ་ལྷ་ཡི་ལུང་བསྟན་བྱུང༌། དེ་རིང་སྒར་འདི་འགྱོགས་དགོས་ཡོད་གསུངས་ཤིང་ལུང་བསྟན་བྱུང་བའི་གླུ་འདི་ལྟར་གསུངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ལྷ་ཀི་ཀི་ལ་སྭ་སྭ་སྭ། །ཀི་ཀི་ལྷ་ཡི་འབོད་པ་རེད། །སྭ་སྭ་ལྷ་ཡི་བསུ་བ་རེད། །ཀི་སྭ་དཔའ་བོའི་སྡོང་གྲོགས་མཛོད། །དབང་བསྒྱུར་དམག་དཔོན་ཆེ་གསུམ་དང༌། །བློ་མི་འགྱུར་གྲོས་འགོ་འཛིན་མི་རྣམས། །དགྲ་མཐའ་བཅོམ་པའི་དཔའ་བོ་བཅས། །དར་ལུང་རྣ་བའི་དབང་པོ་གཏོད། །མདང་སུམ་ནམ་གྱི་ཕྱེད་དཀྱིལ་ལ། །དགུང་ནམ་མཁའི་མཐོ་བའི་གཞལ་ཡས་ནས། །མ་མཁའ་འགྲོ་བྱེ་བ་འབུམ་ནང་ནས། །དབང་བསྒྱུར་ཚངས་པ་དཀར་པོ་དེས། །ལུང་བསྟན་གསལ་ཚིག་འདི་ལྟར་བྱུང༌། །
ཧོར་སྡིག་སྤྱོད་ཤན་པ་དམར་པོ་དང༌། །གུང་པ་བུ་ཡི་ཁྲ་སྐྱ་གཉིས། །ཁ་སང་སྔོན་དུ་སོང་ལེ་དེ། །དབང་དུས་འབྲུག་སྒྲས་ཐབས་ཀྱིས་བཟུང༌། །སང་ཉིན་ཐོག་བརྫིས་མ་ཐོངས་ན། །ཁོ་མི་གཉིས་གསོན་དུ་བཏང་ཟེར་ན། །ཉན་ཟེར་སྒྲ་འཇིག་རྣ་བ་ལ། །ཐོས་བྱེད་དབང་པོའི་གྱེར་སྒོ་རུ། །གསུང་ཞལ་ཏ་མ་ཉམས་དེ་ལྟར་བྱུང༌། །དེ་བདེན་པར་མ་བཟུང་རང་ཉིད་འཕྲུལ། །ལྷ་དཀར་པོས་བསླུ་བ་ག་ལ་ཡོད། །ད་མ་སྡོད་གླིང་དཀར་ལས་དམག་རྣམས། །རུ་གཡས་ཤོག་གཡོན་ཤོག་གུང་ཤོག་གསུམ། །གུར་དཀར་མོ་འུབ་སེ་མཉམ་ལ་བསྡུས། །ལ་ཕར་རྒྱབ་དྲེད་མོའི་ཁུག་འདྲ་ལ། །དམག་མི་མང་དེ་རུ་སྒར་ཆེན་སྒྲིགས། །དམག་དཔོན་རེ་རེའི་མངའ་ཞབས་སུ། །སྟོང་ཚོ་རེ་རེའི་ཚོ་དང་བཅས། །རྒྱུག་དམག་སྔོན་དུ་བརྫངས་ནས་སུ། །འཇང་འབྲུག་སྒྲའི་དཔལ་ལྡན་རྒོད་པོ་ཁོ། །ཁས་ལེན་བྱེད་མི་ག་འདྲ་ཡོད། །དེ་མིན་འཇང་དམག་གར་ཡོད་ལ། །འཇིགས་མི་དགོས་ལུག་ནང་སྤྱང་ཕོ་ཡིན། །དགྲ་ལྷའི་ཚེ་གོས་སྨུག་པོ་དང༌། །གྲུབ་པའི་རྒྱལ་མོའི་ཚེ་མདུད་ཀྱིས། །ལུས་འདོམ་གང་མདའ་གྲི་ཁྱོག་ཙམ་ཡོད། །ད་མ་སྡོད་གླིང་དམག་བུད་ནས་འགྲོ། །
ཞེས་གསུངས་དེ་ལྟར་བླངས་པས། དཔའ་རྟུལ་ཐམས་ཅད་དགའ་དྲགས་རྒྱལ་པོའི་གསུང་དང༌། ལྷ་ཡི་ལུང་བསྟན་ལ་དད་པ་ཐུན་མོང་མ་ཡིན་པའི་སྒོ་ནས། དེ་རིང་ས་ཐམ་དམག་ལ་གཡུལ་གྱི་ཐོག་མ་འབྲུག་སྒྲ་དཔལ་ལྡན་གྱི་འཐབ་ཡ་ངས་བྱེད་ཡོང་ཟེར་ཅིང་དཔའ་ཁ་མཉམ་པ་མ་གཏོགས། མི་ཡོང་ཟེར་མི་གཅིག་ཀྱང་མ་བྱུང་ཟེར། དེའི་ནུབ་འབྲུག་སྒྲ་དཔལ་ལྡན་དེ་ལ་ལྷ་ཡི་འཕྲུལ་བྲན་པའི་རྨི་ལྟས་ལ། ས་ཐམ་གྱིས་མངགས་པ་ཡིན་ཟེར་བྱུར་ལྷའི་ཤོག་ནས་གསེར་ཁྲབ་ཅན་གསུམ་སྟོང་ཙམ་བྱུང་ནས་ཁྱེད་རྣམས་བསུ་བ་ཡིན་ཟེར་དགའ་དགའ་བྱེད་པ་རྨིས། སང་བསམ་བློ་ལ་རྨི་ལྟས་ཀྱི་ཆ་ལ་བལྟས་ན་ངེད་རྣམས་ཡུན་རིང་བས་རྒྱལ་པོས་ཅི་ཡིན་བརྟག་པར་དམག་དཔུང་བཏང་བ་ཨེ་ཡིན་བསམ།  དེ་ནས་གློ་བུར་དུ་གླིང་དམག་གསུམ་སྟོང་ཙམ་འཇང་དམག་ཡོད་ས་དེར་སླེབས་སྐབས་གླིང་དམག་རྣམས་གཅིག་མཇུག་གཉིས་མཐུད་ཀྱིས་ཀི་དི་རི་འདེབས་ཤིང༌། ལག་གཡས་སུ་དཔའ་ལུང་དང་ཉག་ཕྲན། གཡོན་དུ་གཞུ་རེངས་འཆང་བཟུང༌། དང་པོ་དཔའ་ལའི་ཀོང་རེ་དར་དཀར་དེ་སྐྱ་ཁྲིལ་གྱི་བྱུང༌། དེའི་རྗེས་འདན་མ་དངོས་གྲུབ་དར་འདོང་ཆུ་དར་ཕྲུག་ཕྲུག་བྱུང༌། དེའི་རྗེས་ཉི་འབུམ་སེར་བྱ་ལྡིང་ཤེས་གཙོ་དམར་འགྲིལ་འགྲིལ་བྱུང༌། དེའི་རྗེས་དམག་རྣམས་ཧྲིལ་ལེ་དཔུང་ལམས་སེ་བྱུང་བས་སྐད་ཅིག་ལ་ལུག་ཁྱུའི་ཁྲོད་སྤྱང་ཀི་ཤོར་བ་ལྟར་ལན་སློག་པའི་འདུ་ཤེས་སྐྱེས་ཀྱང་ལན་མ་ཐེབས་པར་ཐམས་ཅད་བསད། འབྲུག་སྒྲ་དཔལ་ལྡན་དཔོན་གཡོག་རྣམས། ཤར་ཕྱོགས་ནས་ཡོང་པས་སྒར་བཏབ་པའི་ས་དེར་མ་སླེབས་ཙམ་དུ་གླིང་གིས་མཐའ་བསྐོར།  ཁོ་རང་གི་དམག་སྒར་ཡོད་སའི་ལུང་པ་དེ་མི་རོས་ཁེངས་ཤིང་གུར་རྣམས་སྟོད་ལངས་སྨད་འགྱེལ་གྱིས་ཅི་ནས་བལྟས་ཀྱང་ཉམས་སྐྱོ་བར་གྱུར། མཐའ་མི་ཡིས་བསྐོར་ཅི་དྲག་མེད་པའི་སྐབས་དེར་ཐོག་གཏུག་ཏུ་དཔོན་པོ་ཁྲོ་ཐུང་དེ་གླིང་དམག་ནས་སྔོན་རྒྱུག་ཏུ་ཤོར་ཞིང༌། རྒྱང་ཙམ་ནས་མདའ་མགོ་ཕུར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ས་འདི་ས་ངོ་མ་ཤེས་ན། །བྱང་ལ་སྐྱ་མོའི་གཡས་ཟུར་རེད། །ང་དང་ང་ངོ་མ་ཤེས་ན། །ང་མ་བཞིའི་དཔོན་པོ་ཁྲོ་རྒྱལ་ཡིན། །རྒྱ་བོད་གཉིས་ཀྱི་བར་མཚམས་ལ། །མགོ་སྤྱི་བོ་ནམ་མཁར་གཏོད་མི་དང༌། །རྐང་མཐིལ་དྲུག་ས་ལ་སྤོ་མི་ལ། །ཕོ་ང་ལས་ལྷག་པ་ཡོང་དོགས་མེད། །ལ་དགུ་བརྒྱབ་ཅིང་ལུང་དགུ་བརྒལ། །དམག་ཁྲ་བོ་འདི་ཙམ་རྩབས་ལེ་འདི། །ཁལ་རྟ་སྨུག་ཆུང་དྲེལ་ལ་བྱས། །སྤྲིན་ནག་བུན་གསུམ་གོས་སུ་གྱོན། །དགོས་མོའི་ས་འཁྱག་རྐང་གིས་བརྫིས། །ཡོང་ལེའི་རྩ་བ་བཤད་པ་ན། །ཁྱོད་ལ་བསམ་ནས་ཡོང་ལེ་ཡིན། །དེ་རིང་བསམ་པ་འགྲུབ་ལུགས་ལ། །ཕ་བྱུས་གྲུ་བཞི་ཟིན་ལུགས་ལ། །ཁྱོད་ཙམ་གསོན་ལ་གཏོང་རྒྱུ་མིན། །རྨུ་རྗེ་ས་ཐམ་རྒྱལ་པོ་དེས། །ཁེ་གྲགས་སྤར་མོ་ཨེ་ཁེབས་ལྟོས། །འཇང་ཕྲུག་བདུད་འཁོར་བརྒྱད་ཅུ་དེས། །གག་ཐུག་སྐྱོར་རོགས་ཨེ་ཡོང་ལྟོས། །རང་ཚོད་བཟུང་ནས་མི་སྡོད་ལེ། །སྲོག་དམར་སྐྱེལ་དུ་ཡོང་ལུགས་ལ། །ང་མི་རྒན་སྡིག་གི་རྣོན་མ་ལ། །སྐྱ་འབན་འབན་འདི་འདྲ་ཐུག་རྒྱུ་ཨམ། །གཡས་སྟག་དོང་ནས་མདའ་ཞིག་འདོན། །རྟེན་ཆེན་ཁ་ལ་མེ་འབར་འདོན། །གཟིག་ཤུབས་ནང་ནས་གཞུ་ཞིག་འདོན། །ལག་གཞུ་རྭ་རྒོད་མཆོག་དཀར་འདོད། །མི་རྒན་ལུས་རྩལ་ཤོར་མི་ལ། །དེ་རིང་ཁྱོད་ལ་ངས་ཅིག་ཡ། །ཕྱི་རུས་པའི་བསེ་མཁར་གཏོར་རྒྱུ་ཡིན། །ནང་རྣམ་ཤེས་མི་གཏོར་མེ་བཀྲོངས་རྒྱུ། །དོན་སྣོད་བཅུ་གཉིས་ཨེ་མ་ཡ། །ཨ་བ་རེ་ལ་སྙིང་རེ་རྗེ། །
ཞེས་ཟེར་ཞིང་མདའ་ལྟོང་སྤྲད་ཅིང༌། ཁོ་ཡི་གླུ་ལེན་ཞིག་ཨེ་ཡོད་བསམ་བསྡད་པས། འབྲུག་སྒྲ་དཔལ་ལྡན་དེ་ལྷག་པར་ངར་ལངས་ཤིང་ལན་འདེབས་པའི་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ས་འདི་ཡི་ས་ངོ་མ་ཤེས་ན། །བྱང་ལ་སྐྱ་བོའི་གཡས་ཟུར་རེད། །ང་དང་ང་ངོ་མ་ཤེས་ན། །འཇང་ཡུལ་མཚལ་ར་སྨུག་པོ་ན། །རྨུ་རྗེ་ས་ཐམ་རྒྱལ་པོ་དེའི། །བློན་རྒྱུད་གསེར་གྱི་མགྲོན་བུ་ལ། །འབྲུག་སྒྲའི་དཔལ་ལྡན་རྒོད་པོ་ཟེར། །གནའ་མི་རྒན་པོའི་གཞུང་གཏམ་ལ། །གཡང་དཀར་ཟས་ལ་མ་བཞག་ན། །ཁྱུ་གཏིང་རྫི་ལ་ཐུག་ཀྱང་སྲིད། །སྤྱང་ཐོང་ཀླད་ཁྲག་སྟོར་ཡང་སྲིད། །རྒྱ་ཁྲ་དྭང་རུས་ཆགས་ཀྱང་སྲིད། །ཕམ་པོ་གདན་ལ་མ་བཞག་ན། །གག་ཐུག་སྦར་འཛིན་བྱུང་ཡང་སྲིད། །རྒྱལ་ཁ་ཕྱི་ལ་ཤོར་ཡང་སྲིད། །གླིང་པ་རང་ཚོད་མ་ཟིན་ན། །མི་གཅིག་གདོང་ལ་དཔའ་མདོག་བྱེད། །སྲོག་དམར་ཐང་ལ་ཤོར་ཡང་སྲིད། །མ་བཞིའི་དཔོན་པོ་ཡིན་ནོ་ཟེར། །དེ་རིང་ཉི་མའི་གདུག་ནང་ལ། །ཕོ་སུ་རེད་ཚད་ཅིག་བལྟ་རྒྱུ་གྱིས། །ལྟད་མོ་ཨ་སྔོན་དགུང་ལས་མེད། །བར་པ་སྐྱི་བསེར་རླུང་ལས་མེད། །ཁྲག་འཐུང་དོག་མོ་ས་ལས་མེད། །མདའ་རྒྱང་ནས་འཕངས་ན་རྒོད་པོ་མིན། །གྲི་བཅར་ནས་དབྱུག་ན་དཔའ་བོ་ཟེར། །ངས་རལ་གྲི་ཁྲག་འཐུང་ངར་ཆེན་འདི། །ཨེ་རེད་ཚད་གཅིག་དེ་རིང་ལྟ། །གླིང་སྡུག་མགོ་འཕྲུ་ཐང་ལ་སྙོལ། །ཨ་ཟེར་ལྟོས་དང་མི་ཟེར་ཉོན། །
ཞེས་ཟེར་ཞིང་གྲི་བཏོན་ནས་མཆོངས་པས། ཁྲོ་ཐུང་གི་མདའ་ལག་ནས་ཤོར་ཅིང་ས་ཁར་དྲུས། སྡོད་མ་ནུས་པར་རྟ་ཁ་ཕྱིར་བསྒྱུར་བྲོས་ཤིང་ཕྱི་མིག་བལྟས། ཁོ་ནི་ཉེ་བར་སླེབས་ཚར་འདུག    འདར་ཡེབ་པའི་ངང་ནས་འཇིགས་པའི་སྐད་ཀྱིས་གླུ་ཐུང་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །བོན་སྟོན་པའི་ལྷ་སྲུང་སྐུ་དྲིན་ཅན། །དེ་རིང་ཁྲོ་བོའི་མགོན་སྐྱབས་མཛོད། །ཡེ་ཤེས་ཡོད་ན་སྤྱན་གྱིས་གཟིགས། །རྫུ་འཕྲུལ་ཡོད་ན་ཞབས་ཀྱིས་ཆོག །རང་བསྟན་པའི་སྲུང་མས་ཁ་འཛིན་མཛོད། །ཕོ་ཨ་ཀྱང་མི་ཡི་འཇིགས་པ་ལ། །ངོ་གདོང་གནམ་ནག་ཁྲོ་ཁྲོ་རེད། །མིག་སྤྲིན་གློག་དམར་འཁྱུག་འཁྱུག་རེད། །སོ་སྒྲ་གྲོ་ཡོས་རྔོ་རྔོ་རེད། །འཇང་ཕྲུག་ཨམ་དེ་ཡིན་དོགས་མེད། །བདུད་འཇིགས་སུ་རུང་བ་ཡིན་ངོ་རེད། །ཁ་ཀླུ་བཙན་ལངས་པ་ཡིན་ངོ་ཤེས། །ད་བླ་མ་མཁྱེན་ནོ་བླ་མ་མཁྱེན། །དེ་རིང་ཨ་ཁུའི་སྲོག་སྐྱབས་མཛོད། །འཆི་བདག་ཁ་ནས་ཕྲལ་རོགས་མཛོད། །འ་ཁྱུ་ཁྱུ་ཁྱུ་ལ་སྲིན་རྟ་ཁྱོད། །རྟ་འདི་འདྲ་སྡུག་གདོང་གར་གཏད་རེད། །རྒྱུག་རྒྱུ་ཡོད་ན་དེ་རིང་རྒྱུག །འདི་ལྕག་ཚན་དགུ་མཐུད་མི་རྒྱབ་རོ། །ཡོབ་ཆེན་དགུ་མཐུད་མི་བརྟབ་རོ། །བྲོས་རྒྱུ་ཡོད་ན་དེ་རིང་བྲོས། །འཆི་བདག་བདུད་ཀྱིས་འཛིན་གྲབས་འདུག    །འཕུར་ཟེར་གཤོག་པ་མི་རྒྱས་འདུག    །གབ་ཟེར་ཕུང་རྩ་མི་རྙེད་འདུག །ལས་ཅི་འདྲ་བྱས་ན་དྲག་རྒྱུ་རེད། །ང་ཁྲོ་བོ་ཐོད་པ་གར་བསྟན་རེད། །དེ་རིང་སྟང་མའི་འགོ་བོ་ལ། །བདུད་ནག་པོ་འདི་དང་ཐུག་རྒྱུ་ཨང༌། །གླིང་དཔའ་བདུད་ཡོད་ན་ལ་འུར་ཤོག །བུ་རོང་ཚ་ཡོད་ན་ཨེ་རག་འདུག །ད་ལྟ་ཤི་གསོན་མཚམས་ན་གདའ། །བཟུང་ཚར་ནས་འོང་ན་སྟོང་པ་རེད། །
ཅེས་ཟེར་ཞིང་འདར་སྐད་ལྷང་ལྷང་གི་འདེབས་ཤིང་བྲོས་པས། གླིང་དཔའ་རྟུལ་རྣམས་ཀྱི་ནང་ནས་དེ་ཕྱོགས་སུ་ཡོད་པའི་དཔའ་ལ་དང༌། འབྲུ་སྒར་སྡེ་གཉིས་ནས་གཅིག་ཤོར་གཉིས་ཤོར་གྱིས་གདོང་བསུས་པས་ཁྲོ་ཐུང་ཐར་ཞིང༌། ཕྱི་མིག་གཅིག་བལྟས་ནས་བློ་བདེ་བས་ཉི་ལྷ་རྒྱལ་པོ་ཟེར་ཞིང་ལྷོད་ཀྱིས་སོང་ངོ༌། །དེར་དཔའ་ལས་སྨྲས་པ། ངེད་རང་གཉིས་མི་གཅིག་ལ་གཉིས་རུབ་ན་མི་ལེགས། ཁྱེད་རང་ལྟད་མོ་ལྟོས་མཛོད། ངས་གདོང་བླངས་གྱིས་ཟེར་བ་ལ་སྒར་སྡེས་དེ་ལྟར་གྱིས་ཟེར་རྟ་ལས་བབས་ནས་བསྡད་དོ། །འབྲུག་སྒྲ་དཔལ་ལྡན་དེ་ལྷག་པར་ངར་ལངས་ཤིང་ལྷ་མདའ་དང་ལག་གཞུ་བཏོན་ནས་དཔའ་ལུང་མཛུབ་མོར་རྒྱུས་ཤིང༌། གཞུ་སྟེང་དུ་མདའ་བཞག་ནས་མདའ་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད།    །མི་དཀར་རྟ་དཀར༌གཡབ་ལེ་ཁྱོད། །ཁྱོད་དང་ང་རང་གཉིས་པོ་ནི། །ཚེ་སྔོན་ཐོད་པའི་བསྐོར་ཐང་རེད། །སྲོག་དང་ལག་པ་སྦྲེལ་ལེ་འདྲ། །ད་ལོན་གདོང་གི་ནག་པོ་གཡབ། །འདར་སྐར་ལིངས་སེ་བྲོས་ནས་སོང༌། །ཐུག་དོན་མེད་པའི་དཀར་པོ་གཡབ། །མ་བཞག་མདའ་མོའི་འབེན་དུ་བྱུང༌། །ཉག་ཕྲན་ཨེ་རེད་དེ་རིང་ལྟ། །འབྲུག་སྒྲ་དཔལ་ལྡན་རྒོད་པོ་ང༌། །ཁེར་རྒྱུག་ཡོང་བསམ་ཡིད་ལ་མེད། །དེ་བྱུང་ན་རྒོད་པོ་ཨེ་རེད་ལྟ། །འཇང་ཕྲུག་གཡུ་ལྷ་ཐོག་བསྒྱུར་དང༌། །བདུད་ཆེན་རྒྱལ་བ་ཐོད་དཀར་གཉིས། །མགོ་བསྐོར་དགྲ་ཡི་ཐབས་ཀྱིས་བླངས། །ལས་དམག་ཅི་ཡོད་ས་ལ་བརྡབ། །ད་རུང་གླིང་པ་ཧམ་པ་ཆེ། །གནམ་ཐེལ་དཀར་པོ་ར་དཀར་སྐྱ། །དེ་རིང་མདེལ་སྣེ་ཁྲིད་རོགས་གྱིས། །བར་ཐེལ་ཁྲ་པོ་ར་ཁྲ་སྐྱ། །དེ་རིང་མདེལ་སྣེ་ཁྲིད་རོགས་གྱིས། །ས་ཐེལ་ནག་པོ་ར་ནག་སྐྱ། །དེ་རིང་མདེལ་སྣེ་ཁྲིད་རོགས་གྱིས། །ད་སྟེ་གླིང་དཀར་གྲོ་བོ་གཡབ། །དཀར་གཏོར་མགོ་མཇུག་བསྒྱུར་འདྲ་བཟོ། །མནར་མེད་དམྱལ་བའི་གཏིང་དུ་རྒྱུག    །ཤ་ཁྲག་དགྲ་ལྷའི་ཚོགས་སུ་རོལ། །སྟང་མ་ཨ་བུས་ལོན་པར་ཤོག། །ཕ་རྗེའི་བུ་རྒྱུད་ཨེ་རེད་བལྟ། །
ཞེས་ཟེར་ཞིང་མདའ་གཅིག་བསྲིང་བྱུས་བས་དཔའ་ལའི་མདུན་ནས་ཁྲབ་ཀྱི་བྱང་བུ་ཁྲ་ཐོ་རེ་བཏང༌། ནང་དུ་དགྲ་ལྷའི་ཚེ་གོས་ཀྱིས་བརྟེན་པ་མ་གཏོགས་གོ་ཁྲབ་ཀྱིས་བརྟེན་པའི་རེ་བ་མ་བྱུང་བར་དེར་མདའ་ཡིས་གཟེར་འཁྱུགས་པའི་དཔའ་ལ་རྟ་ཐོག་ནས་མི་ཚུགས་པ་ཙམ་བྱུང༌། དེར་དཔའ་ལས་གཏམ་ལན་འཇལ་བསམ་ཀྱང་ཁོ་རང་ངར་བའི་སྟབས་ཀྱིས་གྲི་ཕྱར་ཏེ་མཆོངས་བྱུང་བས། དཔལ་ལས་གཞུ་སྟེང་དུ་མདའ་གཅིག་བཞག་འདོམ་བཀང་སྟེ་བཅར་སླེབས་པ་དང་མདའ་ཞིག་བསྲིངས་པས། ཁོ་ལ་ཐེ་རང་གི་གོ་དགུ་ཡོད་པས་གཅིག་མ་ཕིག་པར་ལུས། ཡང་མདའ་གཅིག་འཕངས་པས་རྟ་ལ་ཕོག་ཅིང་སྤྲིན་དཀར་མཐོང་མཛེས་དེ་ཐལ་བ་ཕྱུར་ཏེ་འགྱེལ། དེར་སྒར་སྡེས་གང་མིན་བྱུང་དོགས་རྒྱུག་ཅིང་དཔའ་ལའི་དཔུང་རོགས་བྱས་ནས་དང་པོ་གྲི་དབྱུགས་རེས་མང་ཙམ་བྱས། ཁོ་མི་གཅིག་ཡིན་ཀྱང་མ་ཞེད་པ་ཡུད་ཙམ་བརྟེན། བར་དེར་དཔའ་ལའི་མཚོན་ལེབ་ཆེན་དབྱུགས་པས་མགོ་དར་འཕྲུ་དང་བཅས་ས་ལ་ལྷུང་ངོ༌། །དུས་དེ་ཙམ་ན་འཇང་ཡུལ་དུ་དོགས་ཟོན་ཤིན་ཏུ་ཆེ་བས་ཕྱི་ནང་གི་བློན་ཆེན་རྣམས་རྒྱལ་པོའི་དྲུང་དུ་གར་ཡང་མི་འགྲོ་བར་གནས་ལ་སྒོ་ཕྱོགས་བཞིར་སོ་དང་རྐང་བརྒྱ་བཙུགས། ནང་དུ་གྲོས་བྱེད་ཀྱི་བློན་ཆེན་རྣམས་ནང་ནུབ་མེད་པར་གྲོས་བསྡུར་ལ་བརྩོན། ཕྱི་བལྟས་བྱུང་བ་ལ་ཡང་ལྟས་ངན་པ་མང་པོ་བྱུང་བས་ཐམས་ཅད་བློ་མི་བདེ་བའི་ངང་དུ་གནས་ཤིང་གོང་དུ་མངགས་པའི་དམག་རྣམས་ཡོང་རྒྱུ་མ་བྱུང་བས། རྒྱལ་པོ་ས་ཐམ་གྱི་གསུང་བཞིན་འཇང་མི་རྣམས་ཕོ་བྲང་དུ་འདུས། བྱུར་ལྷ་དང་མཚལ་དམར་བེར་ཐུལ་བཅས་བློན་པོ་ཆེ་བ་རྣམས་རྒྱལ་པོའི་སྤྱན་སྔར་འཁོད། རྒྱལ་པོ་ཆེན་པོ་ནི་སྔར་དང་མི་འདྲ་བའི་ཐུགས་གཏུམ་ཞིང༌། གཞན་མ་འབངས་འཁོར་དང་བློན་རིགས་རྣམས་ལ་ཡང་བཀའ་བཀྱོན་གྱི་རྣམ་པ་ཁོ་ན་མཛད། ལྟས་ངན་པའི་ཆར་འགྱུར་ཡོད་རུང་བློན་ཆེན་རྣམས་ཀྱིས་ཞུ་མ་ནུས་པར་གནས། བར་དེར་རྒྱལ་པོའི་གསུངས་ལ། འོ་ན་ཕྱི་ནང་གི་བློན་པོ་རྣམས་དང༌། ཡང་སྒོས་བྱུར་ལྷ་དང་མཚལ་དམར་བེར་ཐུལ་བཅས་ཉོན་དང༌། གཡུ་ལྷ་ཐོག་འགྱུར་བཅས་འགུགས་རྒྱུ་མ་བྱུང་བས་ཅི་ཡིན་བལྟ་བ་དང་རྒྱབ་དཔུང་ལྟ་བུར་དམག་དཔོན་གསུམ་དང༌། དེ་འོག་གི་དམག་བཅས་མངགས་པ་ལས་འོས་མེད་གསུངས་ཤིང་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །བྱུར་ལྷ་དཔོན་དང་མཚལ་དམར་བུ། །འགྲན་མེད་བེར་ཐུལ་བཀའ་བློན་བཅས། །ཁྱེད་གསུམ་བཀའ་བློན་གུང་ནས་ཉོན། །ཆོས་རྒྱལ་བུ་དང་བདུད་ཕྲུག་བུ། །སེང་ལྕམ་ལྷའུ་ཐོག་བསྒྱུར་བཅས། །རྒོད་གསུམ་དམག་དཔོན་ཟུར་ནས་ཉོན། །སེ་རིག་བུ་དང་གསེར་ལྷ་དཔོན། །སྡེ་རྒན་ཨ་ཁུ་ཁ་མཁས་གསུམ། །རྒན་གསུམ་དཔའ་བོ་མཐའ་ནས་ཉོན། །གསོན་དང་སྐད་ཆ་ཚིག་གསུམ་ཡོད། །གླུ་དར་མ་འདྲ་བའི་གཡུ་ལྷ་དང༌། །སྤྱང་དར་འདྲ་མ་འདྲ་བའི་བདུད་ཆེན་གཉིས། །ཁྲ་དར་མ་འདྲ་བའི་འབྲུག་སྒྲ་གསུམ། །ད་རུང་མི་འགུགས་ཅི་འདྲ་ཡིན། །ཡང་མིན་ན་ངན་པ་ལམ་ནས་འཆར། །བྱུས་ཆག་སྒོའི་བསུ་སྣ་བྱུང་ལེ་འདྲ། །མི་རྟ་སྒ་ཚག་རུག་གེ་དེ། །འཁྱམས་ཤིང་ཨེ་ཡོད་མི་ཤེས་འདུག།།ཡང་མིན་ན་ཕར་སོང་མི་གསུམ་པོ། །དགའ་བའི་ནོར་དང་འཕྲད་རྗེས་སུ། །སྐྱིད་དགའ་ལེ་དལ་བུས་གནས་ལེ་རེད། །དེ་མིན་གྲོགས་ལ་ཕྱི་དལ་ཆེ། །ཅི་ཡིན་བརྟག་པར་འགྲོ་དགོས་འདུག    །དགྲ་ཟོན་མཚམས་དེར་སླེབས་པའི་དུས། །མི་རྟའི་འགྲོ་ཚོད་མཁས་ལེ་དགོས། །ཁ་གཏམ་ཚིག་འབྲས་གཅིག་ལེ་དགོས། །མི་གསུམ་གྲོས་མགོ་ཆིག་སྒྲིལ་གྱིས། །ལེགས་ན་སྤོབས་པ་མི་འཕར་དགོས། །ཉེས་ན་སྡུག་ཐག་མི་ཆད་དགོས། །དེ་ཚོ་མི་གསུམ་སེམས་ལ་ཟུངས། །དེ་ནས་ཚུར་ཡོང་འགུགས་པའི་དུས། །ཕོ་བྲང་གཡུ་འབྲུག་ཟིལ་པ་ལ། །དམག་དཔོན་མཆེད་གསུམ་དཔའ་གཟེངས་བསྟོད། །རྟ་བརྒྱ་མཛོ་སྟོང་དཔའ་དར་སྟེར། །སྡེ་ཤོག་རེ་རེའི་དཔོན་དུ་བསྐོ། །གོ་ནི་ཨེ་བྱུང་དམག་དཔོན་གསུམ། །གོ་ན་གཏམ་ལ་དང་ལེན་གྱིས། །མ་གོ་ནན་ཏན་སྐྱོར་རྒྱུ་མེད། །གྱེན་ལྡོག་མེད་པའི་ལས་ཤིག་གྱིས། །
ཞེས་ཟེར་ཅིང་གླུ་དེ་ལྟར་རི་གཟར་གྱི་རྦབ་ལྟར་འབྲེལ་ཐུང་གིས་བླངས་སོ། །བློན་པོ་རྣམས་ཅི་ཡང་མི་ཟེར། མངགས་པའི་མི་གསུམ་ནི་ཡར་ལངས་ཞིང༌། འོ་དེ་ལྟར་རྒྱལ་པོས་གསུངས་པའི་དོན་དེ་ངེད་གསུམ་གྱི་འགྲུབ་ངེས་བྱས་ཡོང་ཟེར་ཞིང་ཆས་པའི་སྐབས། སྤྱང་བཟའ་ལྷ་མོ་ལ་སྔོན་དུ་འབྲུག་སྒྲ་དམག་ལ་འགྲོ་སྐབས་རྨི་ལྟས་བཟང་པོ་མ་བྱུང་བས་སེམས་མི་བདེ་བའི་སྟེང་དུ་དེའི་ནུབ་ཀྱང༌། རྨི་ལམ་གྱི་དཔྱད་ཉེས་པས་བཟང་ངན་ཅི་ཡིན་ཀྱང་རྒྱལ་བློན་རྣམས་ཀྱིས་མཁྱེན་ཡོང༌། རྨི་ལམ་བྱུང་ཚུལ་མ་ཞུས་ན་མི་ཡོང་བསམ་ཤིང་ཞུས་པ། འོ་ན་རྒྱལ་བློན་འཁོར་དང་བཅས་བཙུན་པོ། བཙུན་མོ་སྲས་དང་འབངས་ཀྱི་ཚོགས། ཡང་བསྐྱར་ཕར་ཆས་མི་གསུམ་བཅས། སོང་ལེ་ཨེ་ཡག་ཐུགས་ལ་བསྐོར། མདང་སུམ་རྨི་ལམ་འདི་ལྟར་བྱུང་ཟེར་ཞིང༌། གླུ་ངག་དང་ལྡིང་ཁུ་བྱུག་གཤོག་འགྱུར་བའི་རྟ་ལ་དྲངས་ཏེ་ཕུལ་བ་འདི་ལྟར་རོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །དུར་ཁྲོད་བརྒྱད་ཀྱི་ས་མཆོག་ནས། །ཡུམ་ཆེན་ཕར་ཕྱིན་བྱིན་རླབས་ཅན། །གུས་པའི་ལུས་ཀྱི་ཕྱག་ཀྱང་འཚལ། །ཅིར་སྣང་ཆོས་སྐུར་འཆར་བར་ཤོག    །འོད་གསལ་ལོངས་སྐུ་བྱིན་རླབས་ཅན། །བདག་དང་འགྲོ་དྲུག་སེམས་ཅན་རྣམས། །སངས་རྒྱས་འབྲས་བུ་ཐོབ་པར་ཤོག    །བྱིན་རླབས་དངོས་གྲུབ་བདག་ལ་ཞུ། །རྒྱལ་མཆོག་ས་ཐམ་སྙན་གསོན་དང༌། ངག་སྙན་པི་ཝང་མི་འགྱུར་ཀྱང༌། །རྒྱ་དར་དཀར་པོའི་ངང་ནས་ཞུ། །སྙོམ་ཆུང་ཞུ་བ་ཐུགས་འཇོགས་ཞུ། །གཞན་ཡང་བློན་ཚོགས་སྐར་ཕྲན་དང༌། །གླུ་རྒྱལ་གཙུག་ནོར་བཙུན་མོའི་འགྲོས། །འཁོར་འབངས་འདབ་དྲུག་རང་ཤར་བཅས། །མ་ཡེངས་སེར་མོའི་གླུ་ལ་གསོན། །དེ་སྟེ་མདང་སུམ་རྨི་ལམ་ལ། །བཟང་ངན་ཅི་ཡིན་མ་རྟོགས་ཞིང༌། །རྒྱལ་བློན་བཀའ་གྲོས་ཞིབ་ན་བསམ། །བྱུང་ཚུལ་རྨི་ལམ་འདི་ལྟར་འདུག །འོང་དོན་མེད་པའི་རྨི་ལམ་དེ། །དང་པོ་ཤར་རི་མཐོན་པོ་ནས། །ནོར་བུའི་གཏེར་ཁ་བླངས་པ་ཡིན། །ཉི་མ་དེའི་རྗེས་བརྙོགས་པ་རྨིས། །རྩེ་མཐོའི་གངས་རི་བཞུར་བ་རྨིས། །བཟང་རྨིས་ཡིན་ནམ་ངན་རྨིས་ཡིན། །ཤར་གླིང་དཀར་སྟོད་ནས་ཡིན་ཀྱང་ཟེར། །མི་དཀར་རྟ་དཀར་གཡབ་པ་གཅིག  །ཕོ་བྲང་འགྲམ་དུ་སླེབས་པ་རྨིས། །མདུང་མོ་ལན་གསུམ་བརྡབ་པའི་ཚེ། །ཕོ་བྲང་གཡུ་འབྲུག་གཟིལ་པ་དེ། །མཁར་མིན་ས་ཕུང་བྱུང་བ་རྨིས། །མི་སེར་རྟ་སེར་གཡབ་པ་གཅིག །དར་མདུང་སེར་པོ་ཕྱར་བ་ཅིག      །གཡུ་འབྲུག་འགྱིང་རྫོང་སྒོ་འགྲམ་ཕྱིན། །གཡས་སྐོར་ལན་གསུམ་བྱས་པའི་ཚེ། །འགྱིང་རྫོང་མགོ་མཇུག་བསྒྱུར་བ་རྨིས། །མི་སྔོན་རྟ་སྔོན་གཡབ་པ་ཅིག།།
དར་མདུང་སྔོན་པོ་ཕྱར་བ་གཅིག །མཁར་སྐྱིད་རྫོང་སྒོ་འགྲམ་སླེབས་པ་རྨིས། །གཡོན་སྐོར་ལན་གསུམ་བྱས་པའི་ཚེ། །སྐྱིད་རྫོང་ཕྱེད་གཤག་བྱུང་བ་རྨིས། །མི་དམར་རྟ་དམར་གཡབ་པ་གཅིག།།དར་མདུང་དམར་ས་མེ་རུ་མཆོད། །མཚལ་དམར་ལྔ་འཛོམ་སྒོ་འགྲན་ཕྱིན། །ཨམ་གཙིགས་ལན་གསུམ་བསྡམས་པའི་ཚེ། །མཚལ་དམར་ས་ལ་བརྡབ་པ་རྨིས། །ན་ཆུང་དཀར་མོ་མེ་ལོང་ཐོགས། །མེ་ཏོག་ཕྲེང་བས་བརྒྱན་པ་གཅིག །དྲེལ་ནག་རྐང་གསུམ་གཡབ་པ་གཅིག །ཁུ་ལུང་གཡུ་སྒོང་སྒོང་འགྲམ་ཕྱིན། །ཆུ་སྟོར་ནས་སྟོར་རབ་གནས་བྱེད། །མཁར་སྒོ་ཉི་མ་སྟོང་ལྡན་དུ། །གསེར་གྱི་མཆོད་རྟེན་མཛུབ་གང་བ། །འོད་ཟེར་ལྷང་ལྷང་བྱས་པ་རྨིས། །བསྐོར་ཞིང་འཇང་མིས་བལྟས་པ་རྨིས། །མཁར་སྒོའི་སྟེང་གི་ནོར་བུ་དེ། །འོད་དང་མཉམ་འགྲོགས་སོང་བ་རྨིས། །རྩ་རྭ་པདྨ་སྟོང་ལྡན་ནས། །ཁལ་བཏེགས་ནོར་བུ་བོང་གཟུགས་གསུམ། །འཇང་ཕྲུག་ཐེལ་མོས་རྙེད་པ་རྨིས། །གངས་རི་ཟུར་ལ་འུར་བ་རྨིས། །རྩ་རྭ་པདྨ་སྟོང་ལྡན་ན། །རྟ་པས་སྐྱ་བྲོ་བརྡུང་བ་རྨིས། །གཡས་ནས་རི་བཀྲ་སྟག་གི་བུ། །མཆོང་ཞིང་རྒྱུག་པའི་ཁ་ཟུར་ནས། །བྱུར་ལྷའི་རྟ་ཁྱུ་ཟོས་པ་རྨིས། །གཡོན་ནས་སྙིང་དཀར་དོམ་སྨྱོན་བུ། །འདུར་ཞིང་འཕྱོ་བའི་ཁ་ཟུར་ནས། །མཚལ་དམར་མཛོ་ཁྱུ་ཟོས་པ་རྨིས། །དབུས་ནས་གཡུ་རལ་སེངྒེའི་བུ། །འགྱིང་ཞིང་བསིགས་པའི་ཁ་རྩ་ནས། །རྒྱལ་པོའི་ཕུ་རྟ་སྟོར་བ་རྨིས། །མདུན་ནས་རྭ་རྣོ་འབྲོང་སྨྱོན་བུ། །འགྲིམ་ཞིང་འགྲོགས་པའི་ཁ་རྩ་ནས། །རྒྱལ་པོའི་བླ་དྲེད་བསད་པ་རྨིས། །རྒྱབ་ནས་རྩལ་ཅན་འཕར་བའི་བུ། །ཁྱུག་ཅིང་འདོད་པའི་ཁ་རྩ་ནས། །བེར་ཐུལ་ར་ཁྱུ་ཟོས་པ་རྨིས། །མཁའ་ན་མེ་དམར་གཡག་གུ་ཙམ། །འུར་ཞིང་ལྷུང་བའི་ཁ་ཟུར་ནས། །གསེར་གྱི་མཆོད་རྟེན་ཞུ་བ་རྨིས། །འཇའ་ཚོན་ཁ་དོག་སྣ་ལྔ་པས། །འཇང་ཡུལ་མཚལ་ར་སྨུག་པོ་རུ། །མཚར་བའི་ལྟད་མོ་བྱས་པ་རྨིས། །ང་རང་སྤྱང་བཟའ་ལྷ་མོ་དང༌། །རྒྱལ་པོ་སྲས་མོ་མེ་ཏོག་སྒྲོན། །ངོ་མི་ཤེས་ལ་ཕྱིན་པ་རྨིས། །དེ་ཚོ་རྨི་ལམ་ཅི་འདྲ་ཡིན། །ལ་གཞིའི་གནས་ལུགས་བརྗོད་ཟེར་ན། །ད་ལོའི་གནམ་ལོ་ཤར་ཚུན་ནས། །འཇང་ཡུལ་ཆག་སྒོ་ཆེ་བ་འམ། །རྒྱལ་པོ་མངའ་ཐང་ཉམས་འདོད་དམ། །བཟང་བའི་རྟགས་ནི་སྤུ་ཙམ་མེད། །ངན་པ་འཚུབ་མ་བཞིན་དུ་ལངས། །ཕུ་ནས་གངས་དཀར་ཞུ་ཞིང་ཁོལ། །མདའ་ནས་གཞུང་ཆུ་འཁོར་ཞིང་ལུད། །བྲག་ཆེན་ཆགས་པ་ཞིག་ཅིང་རལ། །ད་ལྟ་ལེགས་ཉེས་རྐེད་ལ་འདུག །རྒྱལ་བློན་བཀའ་གྲོས་ལྷང་ངེར་མཛོད། །འགྱོད་མེད་ལས་ཤིག་གནང་བར་ཞུ། །
ཞེས་ཟེར་ཞིང་རྨི་ལམ་བྱུང་ཚུལ་གྱི་གླུ་དེ་བླངས། རྗེ་བློན་རྣམས་ཅི་ཡང་མི་གསུང༌། བར་དེར་མཛངས་མ་ཁྲི་ལྕམ་རྒྱལ་མོས་སྤྱང་བཟའི་རྨི་ལམ་གྱི་དོན་ཁོང་དུ་ཆུད་ཅིང༌། རྨི་ལམ་ངན་པའི་ལྟས་རྣམས་ཚང་འདུག སྒོས་སུ་འདི་ལོའི་གནམ་དཔྱད་དང་ས་དཔྱད་ལྟས་གང་ལ་ཡང་རྟགས་དང་ཡག་ཉེས་བཟང་བསམ་མེད། སྤྱང་བཟས་རྨི་ལམ་གྱི་བརྡ་བཀྲོལ་ཞིང་དམག་བཤོལ་ཐབས་ཀྱི་ཞུ་བ་ཞིག་མ་བྱས་ན་མི་ཡོང་དགོངས་ཞིང་གསུངས་པ། འོ་ན་རྒྱལ་བློན་འཁོར་བཅས་རྣམས། ད་གསོན་དང་ཁྲོམ་ཆེན་དམར་ནག་ཚོགས། ཁྱོད་ཤེས་ཆེས་ནམ་མཁའི་གོ་འབྱེད་ལ། ངས་རྨོངས་པའི་གསལ་འདེབས་མི་དགོས་ཀྱང༌། སྤྱང་བཟའི་རྨི་ལྟས་ཉེས་ནས་འདུག    དོན་མེད་དམག་འཁྲུག་ཡོ་ལངས་འདི། དང་པོའི་ལས་བྱུས་ཉེས་འདུག་སྟེ། ད་ལྟ་ལེགས་ཉེས་མཚམས་སུ་འདུག བཅོས་ན་བཅོས་ཐབས་རན་རན་རེད། གསུང་ཞིང་ངག་རྟ་གླིང་བུའི་དྲུག་འགྱུར་ལ་དྲངས་ཏེ་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ཤར་རྡོ་རྗེ་རིགས་ཀྱི་མཁའ་འགྲོ་མ། །ལྷོ་རིན་ཆེན་རིགས་ཀྱི་མཁའ་འགྲོ་མ། །ནུབ་པདྨ་རིགས་ཀྱི་མཁའ་འགྲོ་མ། །བྱང་ལས་ཀྱི་རིགས་ཀྱི་མཁའ་འགྲོ་མ། །དབུས་སངས་རྒྱས་རིགས་ཀྱི་མཁའ་འགྲོ་བཅས། །མི་འབྲལ་སྤྱི་བོའི་གཙུག་ཏུ་བཞུགས། །ཁམས་གསུམ་འགྲོ་བ་ཐུགས་རྗེས་ཟུངས། །གསེར་ཁྲི་ཉི་མ་རང་ཤར་སྟེང༌། །མིང་ཡོངས་གྲགས་ས་ཐམ་རྒྱལ་པོ་ཁྱེད། །ཐུགས་མ་གཡེང་གངས་དཀར་དབང་པོ་གཏོད། །ཤར་མདོ་ཁམས་གླིང་ཁྲི་དཀར་པོ་དེ། །འགོག་ཚ་ཇོ་རུ་རྒྱང་དབྱེར་ཆེ། །དགྲ་ཐོག་བཀལ་བྱུང་ན་མ་གཏོགས་པ། །ཁྱེད་ཕར་བརྙས་རང་གིས་བྱེད་དོན་མེད། །བདེ་དང་དལ་ལ་སྡོད་པའི་དུས། །བསམ་བློ་སྡང་བ་དགྲ་རུ་ལངས། །བྱ་བྱེད་མང་བ་དགྲ་འདྲེ་ཟབ། །ནམ་བཞག་གཏན་གྱི་དུས་ཚོད་ལ། །སྨྲ་བ་མང་ན་ཆག་སྒོའི་རྒྱུ། །རང་སྡུག་གཡབ་མོ་བྱེད་དོན་མེད། །འདི་ལོ་ཕར་འབུད་མང་བ་ལ། །སྔར་ཡང་རྟགས་ལྟས་རིམ་པར་ཉེས། །ད་ཡང་ཉེས་པའི་སྣ་ལྟས་ལ། །མདང་སུམ་སྤྱང་བཟའ་བུ་མོ་ལ། །མ་ཉལ་རྨི་ལམ་བྱུང་སྐད་ལ། །དེ་འཁྲུལ་པའི་རྨི་ལམ་ག་ལ་ཡིན། །མངོན་ཤེས་ལུང་བསྟན་མངོན་སུམ་རེད། །ཕར་འགྲོའི་ལས་དམག་བཏང་ཕོད་མེད། །རང་སྡུག་རྩ་བ་ཤོམ་ནུས་སམ། །སྔ་འགྲོ་གཡུ་ལྷ་ཐོག་འགྱུར་བཅས། །ཚུར་ཡོང་མེད་པ་ཀུན་ཤེས་རེད། །ཨ་སྡུག་སྟེང་གི་ཡང་སྡུག་དེ། །སྡུག་པ་ཤིན་ཏུ་རྩེག་དོགས་མེད། །ད་ལན་དཔུང་འཇུག་སྔོན་ཆས་འདི། །མ་བཏང་རྒྱལ་པོས་དགོངས་པ་གནང༌། །ཞུ་མགོ་སེར་མོ་ང་ཡིས་འཛུག །དེ་མཇུག་འཇང་མི་ཀུན་གྱིས་ཞུས། །ཕྱག་དང་འབུལ་བའི་ལེ་ཚན་སྒྲིགས། །དེ་ལ་རྒྱལ་པོས་ཐུགས་གཏད་འཚལ། །
ཞེས་ཟེར་ཞིང་དམག་བཤོལ་ཐབས་ཀྱི་ཞུ་བ་ནན་གྱིས་ཕུལ་རུང༌། རྒྱལ་པོ་ཆེན་པོ་སྙན་མི་གཏད་ཅིང་སྤྱན་ཟུར་གཡོ་བ་ཡང་མི་འགྱུར་ཞིང་ཐུགས་འཁྲུགས་པའི་ངང་ནས། ནག་མོ་རྣམས་ཁ་བདེ་མཆུ་སྲབ་པས་མི་ཚེ་འཁྱོལ་བ་མིན། ང་རྒྱལ་པོའི་དཔའ་རྟགས་ཀྱི་དམག་སྔོན་མཇུག་ལ་ནག་མོས་གཏམ་ཚད་མི་ཕེར་བས་ཡོང་ངེས་ཚོད་ཀྱི་ལས་གྱིས་ལ་སྡོད་གསུངས་ནས་གསན་ཕྱོགས་མ་མཛད་པའི་སྐབས་དེར། བློན་བེར་ཐུལ་གྱིས་ཞུས་པ། རྒྱལ་པོ་ཆེན་པོ་ལགས་སྤྱིར་ནས་འཇང་ཡུལ་ལ་བཀྲ་མི་ཤེས་པའི་ལྟས་སྣ་དགུ་བྱུང༌། ཡང་སྒོས་ཁ་སང་མི་གསུམ་མངག་སྐབས་སྤྱང་བཟའི་རྨི་ལྟས་དེ་ལོག    ད་ལན་ཀྱང་རྨི་ལྟས་ཉེས་པའི་དཔྱད་ཚང༌། ཁོང་གསུམ་ཡུན་རིང་ལུགས་དེ་མ་བཟང་ཚར་ལེ་ཡིན། ད་རུང་དམག་དཔོན་གསུམ་དང་དེ་འོག་དམག་བཅས་བརྫང་རུང༌། དཔེར་ན་སྲིན་མོའི་གླིང་དུ་ཚོང་པ་ལྟར་རང་ནོར་གཞན་སྐྱོན་མ་གཏོགས་མི་ཡོང་ཟེར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ས་འདི་ས་ངོ་མ་ཤེས་ན། །ཕོ་བྲང་གཡུ་འབྲུག་ཟིལ་པ་ལ། །འདུ་ར་ཉི་མ་སྟོང་ལྡན་རེད། །ང་དང་ང་ངོ་མ་ཤེས་ན། །གཡུ་འབྲུག་འགྱིང་རྫོང་ནང་བཅུད་ལ། །རྒོད་པོ་བེར་ཐུལ་བཀའ་བློན་རེད། །རྒྱལ་པོ་རྒྱལ་རབས་རེ་རེ་ལ། །བློན་པོ་བློན་རབས་འཛིན་མི་ཡིན། །འདི་ལོ་གནམ་ལོ་ཤར་ཚུན་ནས། །སྐྱིད་ཟེར་མིག་གིས་མཐོང་ལེ་མེད། །རང་དགྲ་གཡབ་མོ་ཐབས་ཀྱིས་བྱ། །ཉི་མ་འདི་ལོའི་ལས་དམག་དེའི། །སྔོན་དུ་མངགས་པའི་སྟོང་གསུམ་པོ། །དེང་སང་ལོག་རྒྱུ་ག་ལ་ཡོང༌། །དགྲ་ཡ་འཛམ་གླིང་རྒྱལ་པོར་བྱས། །འཁོན་དེ་ཚངས་པ་ལྷ་ལ་བཟུང༌། །གླིང་དཀར་དཔའ་བདུད་འཐབ་རོགས་གཡར། །འགྲུབ་རྒྱུ་ཅི་ཡོད་འགྲུབ་ཡོང་བསམ། །རྟེན་འབྲེལ་མཚན་མ་རིམ་གྱིས་ངན། །ད་རུང་ལས་དམག་ཁྲ་བོ་འདི། །མངག་དགོས་རྒྱལ་པོའི་གསུང་དུ་བྱུང༌། །ཞུ་དགོས་ལར་གྱི་མི་འདུག་སྟེ། །མི་ཡག་བསམ་པ་སེམས་ལ་འདུག    །ཁྲི་གདུག་ཉི་མ་འོད་པོ་ཆེ། །སྤྲིན་ལམ་འགྲོས་ལ་མ་བལྟས་ན། །མུན་ནག་འཁོར་བ་རང་བཞིན་ཡིན། །ལྷ་ཆར་ཟིམ་བུ་འབབ་ལུགས་དེ། །སྐྱི་བསེར་རླུང་ལ་མ་གཟུར་ན། །སྤྲིན་ལམ་འཐོར་བ་རང་བཞིན་ཡིན། །གཡུ་འབྲུག་སྔོན་མོའི་སྐད་རྒྱང་དེ། །འབྱུང་བ་ཤུགས་ལ་མ་ཐུག་ན། །དབྱར་དུས་ཐན་པས་རང་ཤི་ཡིན། །རྒྱལ་པོ་ས་ཐམ་ཕར་དཔུང་འདི། །རྒྱལ་ས་རང་གི་མ་བཟུང་ན། །སྡང་དགྲའི་སྐོར་རྒྱུག་རང་ཆས་ཡིན། །ཕོ་སྐྱེས་དཔའ་བོ་དཔའ་ཚོད་དེ། །རྒོད་རྒོད་མང་ན་ཡག་རྒྱུ་མེད། །མི་རུང་ལས་འདི་བཞག་ན་བསམ། །སྟོང་ཚོ་གསུམ་གྱི་དམག་བགོས་འདི། །ལ་ལུང་མ་བརྒལ་བཞག་ན་བསམ། །ངེད་རང་རྒྱལ་བློན་འཁོར་བཅས་རྣམས། །ལས་དམག་མི་འཐོར་ཁྲིགས་སེ་སྡོད། །དེ་མིན་ཕར་འབུད་མང་བ་འདི། །ཕུག་སོ་མེད་པའི་ལས་ཅིག་འདུག །དེ་བསམ་རྒྱལ་བློན་ཐུགས་ཀྱིས་སྐོར། །རང་གི་བསམ་ལུགས་དེ་ལྟར་འདུག །
ཅེས་ཟེར་ཞིང་གླུ་དེ་ལྟར་བླངས། དེའི་རྗེས་སུ་འཇང་བཟའ་མེ་ཏོག་ཆོས་སྒྲོན་གྱི་དགོངས་པར། བེར་ཐུལ་གྱིས་ཟེར་བ་ལྟར་བདེན། ཁ་སང་སྔོན་རྒྱུག་གི་དམག་རྣམས་ཅི་བྱུང་ཡོད་མི་ཤེས། ད་རུང་ཡོ་ལངས་འདི་མི་ལེགས། ཡབ་ཀྱིས་གསན་ན་ཞུ་བ་ཞིག་མ་ཕུལ་ཐབས་མེད། མ་གསན་ཀྱང་འགྱོད་མེད་ལས་ཡིན་དགོངས་ཤིང༌། འོ་ན་ཨ་པ་ས་ཐམ་ལགས། བློན་བེར་ཐུལ་གྱིས་ཟེར་བ་ལ་ཆ་བཞག་ན། རབ་ཏུ་གནས་འདྲ་བསམ་ཟེར་ཞིངགླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །དུར་ཁྲོད་བརྒྱད་ཀྱི་ས་མཆོག་ནས། །ཡུམ་ཆེན་ཕར་ཕྱིན་བྱིན་རླབས་ཅན། །མི་མངོན་དབྱིངས་ནས་ཐུགས་རྗེས་གཟིགས། །འབྲས་བུ་སངས་རྒྱས་ཐོབ་པར་ཤོག  །ས་འདི་ས་ངོ་མ་ཤེས་ན། །འདུ་ར་ཉི་མ་སྟོང་ལྡན་རེད། །ཕོ་བྲང་ཟིལ་པའི་མིང་ཆེན་རེད། །ང་དང་ང་ངོ་མ་ཤེས་ན། །འཇང་བཟའ་པདྨ་ཆོས་སྒྲོན་ང༌། །དཔེ་བཟང་དགུང་དུ་གྲགས་ལེ་ཡིན། །ནག་མོའི་གཏམ་འདོད་མ་ཡིན་ཏེ། །གླུ་སྙན་ཁུ་བྱུག་གསུང་ལ་དཔེ། །ཚིག་བཟང་གསེར་ཕྱེ་བརྟུལ་མ་ཡོད། །རྒྱལ་བློན་ནམ་མཁའི་མཁྱེན་ཁྱབ་ལ། །ཞུ་དགོས་ལར་ནས་མི་འདུག་སྟེ། །མི་ཞུ་ཐབས་མེད་ང་ལ་འདུག །གངས་དཀར་ཟུར་གྱི་དར་སེང་དེ། །གཡུ་རལ་ཡོད་པ་ཆ་མཆིས་ཀྱང༌། །འབབ་ས་ངན་ན་ཆག་སྒོའི་རྒྱུ། །ལྷ་ཤུགས་རྩེ་ནས་ཁུ་བྱུག་འགྱུར། །སྐད་སྙན་ཡོད་པ་ཆ་མཆིས་ཀྱང༌། །དགུན་ལྷགས་འགྲིམ་ན་ཆག་སྒོའི་རྒྱུ། །འདམ་ཆུང་རྫོང་གི་མེ་ཏོག་དེ། །ལོ་འདབ་རྒྱས་པ་ཆ་མཆིས་ཀྱང༌། །མི་ལག་འགྲིམ་ན་སྐམ་པའི་རྒྱུ། །ས་ཐམ་རྒྱལ་བློན་འཁོར་བཅས་ལ། །མངའ་ཐང་ཡོད་པ་ཆ་མཆིས་ཀྱང༌། །ཡོ་ལངས་མང་ན་མི་སྡེ་སྟོང༌། །ཡང་སྒོས་མདང་སུམ་རྨི་ལམ་ལ། །ད་ལན་སོང་ན་མི་ལེགས་འདུག    །ཅིས་ཀྱང་འཇང་བཟའི་ཞུ་བ་གསོན། །ཡབ་ཆེན་ས་ཐམ་རྒྱལ་པོ་ལ། །འཇང་ཡུལ་མི་སྡེ་ཁྲོམ་ཚོགས་ཀྱི། །མཆོད་ན་ཟས་ཕུད་ཞུ་ས་རེད། །གླེང་ན་སྐྱབས་འགྲོ་ཞུ་ས་རེད། །རང་གཞན་སྐྱིད་པའི་ལས་གཅིག་མཛོད། །ས་ཐམ་འཇང་དང་སྨར་ཁམས་གླིང༌། །ངར་ཡག་འཁྲུག་རེས་བྱེད་དོན་མེད། །སོ་ནམ་སྡིག་ལ་བྱེད་དོན་མེད། །སེར་མོའི་ཞུ་བའི་ཚིག་ལ་གསོན། །བྱུས་རང་ལ་ཡོད་པ་མ་གསན་ན། །འགྱོད་གཏིང་ཐུག་ན་འགྱོད་པ་ཆེ། །ཡང་སྒོས་བེར་ཐུལ་བློན་ཆེན་འདི། །ཅི་ཟེར་གཏམ་དེ་བདེན་ངེས་ཡིན། །སྔར་འདས་ད་རབས་ཕན་ཆད་དུ། །གྲོས་མགོ་འཛིན་ན་བེར་ཐུལ་ཟེར། །བྱུས་མགོ་ཉེས་ལེ་ཡོང་མ་མྱོང༌། །དེ་ནས་རྒྱལ་བློན་བསམ་བློ་སྐོར། །བསམ་བློ་ལེགས་པར་མ་བསྐོར་ན། །ཕྱི་རེས་འགྱོད་པ་ཚར་ལེ་ཡོང༌། །ནགས་མ་ཤིང་གི་སྤྲེ་འུ་དེ། །འགྲོ་སྡོད་མང་ན་མགྲོན་འཛར་ཤོར། །ཚེ་ཚེ་རྭ་ཡི་མཐོ་འདོད་དེ། །འཁྲབ་རྒྱུ་མང་ན་སུག་ལག་ཆག།།གླང་ཆུང་བྲེ་བོ་ངར་ངར་དེ། །འགྱང་འགྱིང་མང་ན་གླང་སྲོག་འཆོར། །འདུ་ར་ཉི་མ་སྟོང་ལྡན་ལ། །སྐྱིད་སྐྱིད་ཉི་མ་ལྡེ་བའི་དུས། །སྡུག་སྡུག་རླུང་དམར་གཡབ་མོ་ནི། །རང་སྡུག་མ་ཤོམ་ཞོག་ནས་ཐོངས། །རེད་བསམ་རྒྱལ་བློན་ཐུགས་ལ་ཞོག།།
ཅེས་ཟེར་གླུ་དེ་ལྟར་བླངས། གཞན་མ་རྣམས་ཅི་མི་ཟེར། བེར་ཐུལ་གྱིས་ད་ལྟར་འཇང་བཟའི་ཞུ་བའི་ཚིག་བཟང་དེ་དོན་རྒྱལ་པོའི་ཐུགས་ཀྱིས་བཅུད་དུ་བཞུགས་ནས་འབྲས་བུ་ཞུ་དོན་སྨིན་པའི་མཐའ་རྒྱས་མཛད་པར་ཞུ། རྒྱལ་པོས་གསུངས་པ། ཁ་རོག་སྡོད་བློན་པོ་སྨྱོ་བ་ཡིན་ནམ་ཅི་ཡིན་ཀྱང་སྙིང་མེད་ཀྱི་གཏམ་དེ་དུས་རྒྱུན་མ་བཏང༌། འཇང་བཟའ་ཆོས་སྒྲོན་འདི་བློ་ཆུང་བའི་ཁ་ལ་བལྟ་རྒྱུ་ཅི་ཡོད། བུ་མོ་ཁྱེད་རང་ལ་རྨི་ལམ་ངན་པ་བྱུང་ཟེར། བདེན་ན་ཁྱོད་རང་ལ་ཉེས་ཡོང༌། བཟློག་ཐབས་འདྲ་བྱས་ན་ཟེར་ཞིང་དམག་བཤོལ་ཐབས་མེད་པའི་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ནམ་མཁའ་མཐོ་བའི་དབྱིངས་རུམ་ནས། །མཁྱེན་ནོ་གནམ་ཐེལ་ར་དཀར་སྐྱ། །བར་སྣང་སྟོང་ཁམས་ཡངས་པ་ནས། །བར་ཐེལ་ཁྲ་བོ་ར་ཁྲ་སྐྱ། །ས་བརྟན་ས་གཞིའི་གཞལ་ཡས་ནས། །མཁྱེན་ནོ་ས་ཐོ་ནག་འཛི་སྐྱ། །མཁྱེན་གཟིགས་ས་ཐམ་སྐུ་བྱུས་སྲུངས། །འགྲན་མེད་བེར་ཐུལ་བཀའ་བློན་ཁྱོད། །བསམ་པ་བྱིས་སྙིང་མ་བྱེད་ཅིག    །ཀླད་མེད་རླུང་ཁྱེར་མ་བྱེད་ཅིག    །མི་རེའི་འགྱུར་ཁ་མ་མང་ཅིག  །ལས་དམག་ཁྲ་བོ་སྒར་གྲལ་ལ། །བཤོལ་ཐབས་མ་མང་ཁ་རོག་ཞོག །འཇང་བཟའ་མེ་ཏོག་ཆོས་སྒྲོན་ཁྱོད། །བུ་མེད་སེམས་ཆུང་གཏམ་འདོད་དེ། །མང་ན་གཞན་གྱི་འཕྱ་ཁྲེལ་ཡོང༌། །ལྟས་དང་རྨི་ལམ་ངན་ནོ་ཟེར། །ངན་ན་སྡང་བའི་དགྲ་ལ་བསྒྱུར། །བུ་མོ་རང་ལ་ངན་པ་དང༌། །ཡིད་ལ་འཁོན་གྲིབ་ཡོད་ཟེར་ན། །དགོན་པ་མཚལ་གྱི་གདན་ས་རུ། །བླ་མ་མི་བོན་ཆ་བོན་བཞུགས། །ལྟས་ངན་གཡང་དུ་ཁོང་གིས་ཁུགས། །རྐྱེན་ངན་གྲོགས་སུ་ཁོང་གིས་ལེན། །ཆོ་འཕྲུལ་དཔུང་འདི་ཁོང་གིས་འགུགས། །རྨི་ལྟས་བཟློག་པའི་དཔྱད་ཁ་ཞུ། །སྐྲག་སྐྲག་མི་དགོས་ལྷོད་ཅིང་སྡོད། །ལྷོ་སྤྲིན་སྨུག་པོ་དཔུང་མཐུག་ཀྱང༌། །སྐྱི་བསེར་རླུང་གིས་མི་འཐོར་མེད། །སྲིབ་ལུང་སྤ་ཤུག་དཔུང་མཐུག་ཀྱང༌། །དམར་པོ་མེ་ཡིས་མ་འཇོམས་མེད། །སྨར་ཁམས་གླིང་ཕྲུག་དཔུང་རྒོད་ཀྱང༌། །ས་ཐམ་དཔུང་གིས་མི་ཐུབ་མེད། །གླིང་རྟ་བང་ཁ་མགྱོགས་གྱུར་ཀྱང༌། །འཇང་རྟས་མི་ཟིན་གཅིག་ཀྱང་མེད། །འཇིགས་པ་མི་དགོས་ཨ་འུ་ཙི། །ད་ལྟ་མངགས་པའི་མི་གསུམ་པོ། །འགྲོ་རྒྱུ་ཡིན་ན་ལ་མོ་སོང༌། །ལ་འགོ་ལུང་གསུམ་སོ་ཡི་ཉུལ། །མི་བདེའི་རྣམ་པ་ཡོད་གྱུར་ན། །རླུང་ཟེར་མ་རི་རྩེ་འགྲིམས་འདྲ་གྱིས། །སྐད་ཅིག་ཡུད་ལ་ལོག་ནས་ཤོག །དེ་ནས་གང་དགོས་རིམ་གྱིས་བྱེད། །
ཅེས་ཟེར་ཞིང་གླུ་དེ་ལྟར་བླངས་སོ། །དེར་བློན་ཆེན་རྣམས་དང་འཇང་མི་རྣམས་མི་བདེའི་རྣམ་པ་ཡོད་གྱུར་ཀྱང་ཞུ་མ་ནུས་པའི་སྐབས་དེར། དུག་ཕྲུག་ལྷའུ་སིལ་སིལ་དང༌། སེང་ལྕམ་ལྷའུ་ཐོག་འགྱུར། དཔའ་ལིང་དཔའ་བོ་ཐོག་འགྱུར་གསུམ་རང་རང་གི་ལས་དམག་སྟོང་ཚོ་རེ་དང་བཅས་འཇང་ས་ཐམ་གྱི་རྒྱ་སྒོ་ཤར་མ་ནས་བཤར་ཅིང་མི་ཐམས་ཅད་ལྟད་མོ་བལྟས། དཔའ་བོ་རྣམས་ཀྱང་མདའ་རེ་དར་རེའི་སྐྱེལ་མ་བྱས་ནས་ཞལ་མྱུར་དུ་མཇལ་བའི་སྨོན་ལམ་གྱི་མཚམས་སྦྱར་ནས་ལམ་དུ་བཞུགས་ཤིང་ཆས་སོ། །དུས་དེ་ཙམ་ན་གླིང་དམག་རྣམས་འཇང་ཡུལ་དུ་ཉེ་བར་སླེབས་ཤིང༌། ན་མ་ཆུ་ཡི་མར་ཞབས། བརྒྱད་ཅུ་སྟག་གི་རབ་ཐད་དུ་བཞུགས་ཡོད་པས་དེའི་ནུབ། ནམ་གྱི་ཕྱེད་ཆ་ཙམ་དུ་ཡབ་ཆེན་ཚངས་པ་དཀར་པོ་དེ། ནམ་མཁའ་སྤྲིན་གྱི་གཞལ་ཡས་ནས། འཇའ་ཚོན་སྣ་ལྔའི་གུར་ཁྱིམ་ནས། ལྷ་ཡི་འཁོར་དང་བཅས་ཏེ་འོད་ལམ་མེ་ཕེབས་ཤིང་ལུང་བསྟན་གྱིས་གླུ་འདི་ལྟར་གསུངས་སོ། །
ཨེ་ཨེ་ལྷ་མཁྱེན་ནོ་བསྟོད་དོ་དཀོན་མཆོག་གསུམ། །དཀར་ཕྱོགས་སྐྱོང་བའི་ལྷ་སྲུང་རྣམས། །ཐུགས་རྗེ་དཀར་པོའི་ཕྱོགས་ལ་བསྟོད། །འགྲོ་དྲུག་སེམས་ཅན་ཐམས་ཅད་ལ། །སྙིང་རྗེའི་ཆུ་རྒྱུན་ཤ་ར་ར། །བྱང་ཆུབ་མྱུ་གུ་ལམ་སེ་ལམ། །ཕྱི་རེས་བསྐལ་པ་མ་སྟོང་པར། །སེམས་ཅན་དོན་དུ་བརྩེ་བས་དགོངས། །ས་འདི་ས་ངོ་མ་ཤེས་ན། །འཇང་གླིང་གཉིས་ཀྱི་ས་མཚམས་ལ། །ལྷ་ལུང་ཉི་མ་ཞུད་ཀྱི་གཡས། །ང་དང་ང་ངོ་མ་ཤེས་ན། །སུམ་ཅུ་བརྩེགས་པའི་ཕོ་བྲང་ནས། །དགའ་ལྡན་ཆོས་ཁྲི་དགུ་བརྩེགས་ནས། །ཚངས་པ་དཀར་པོ་དུང་གི་གཙུག །སྤྱིར་གྱི་འགྲོ་དྲུག་སེམས་ཅན་ལ། །སྙིང་རྗེ་ཚད་དུ་སྐྱོང་མི་རེད། །ཡང་སྒོས་སྨར་གླིང་ཁྲ་མོ་ལ། །ཆོས་དགེ་བའི་ས་བོན་འདེབས་མི་ཡིན། །ལྷག་པར་ཨ་ཕའི་བུ་ཚ་ཁྱོད། །དགྲ་ཚུར་བཀལ་དཔའ་བོ་ཐུག་པའི་དུས། །བྱུས་མ་ཤོར་གྲུ་བཞི་བཟུང་ལེ་དགོས། །ཁྱེད་འདོ་མེད་མ་ཉལ་ཇོ་རུ་ལགས། །སང་གི་ཉི་མའི་སྔ་དྲོ་ལ།  །མ་སྡོད་ཇོ་རུ་སྔོན་ལ་སོང༌། །རྨུ་རྗེ་ས་ཐམ་རྒྱལ་པོ་ཡི། །ཁ་ལག་ཟས་ཀྱི་འབྲེལ་བ་དང༌། །རྒྱུ་སྣ་རེ་ལག་ཏུ་ཨེ་ལོན་ལྟོས། །དྲག་པོའི་མཐུ་སྒྲུབ་རོང་པས་བྱེད། །འདུལ་བ་ཇོ་རུ་ཁྱོད་ལ་བབས། །འཇང་མ་ཁྲི་ལྕམ་རྒྱལ་མོ་དེ། །གསལ་སྒྲིབ་མེད་པ་མཁའ་འགྲོའི་སྐུ། །དེ་འདྲ་འདུལ་ཐབས་གེ་སར་བབས། །དེ་ནས་གསོན་དང་ཞུ་རྒྱུ་ཡོད། །ཁོས་བློ་ཐབས་གཉིས་ཀྱི་དྲན་ཁུལ་ལ། །སྟོང་ཚོ་གསུམ་གྱི་ལས་དམག་དེ། །གླིང་རུའི་གདོང་ལ་མངགས་ནས་སོང༌། །ཞག་ལྔ་དྲུག་ཚུན་ལ་ཐུགས་ངེས་རེད། །དོན་དེ་ལ་རྒྱལ་པོས་ཞལ་ཏ་སློབ། །ཁྱོད་རང་མི་རྟ་གཉིས་པོ་དེ། །འོད་སྤུངས་སེ་སང་ཉིན་ལམ་ལ་བཞུགས། །སྒར་ཁྲ་མོ་བློ་འགྱོད་བྱེད་དགོས་མེད། །ནང་དུ་དཔོན་བློན་ཆེ་གསུམ་ཡོད། །ཟུར་དུ་དཔའ་བོ་མི་གསུམ་ཡོད། །མི་འབྲལ་ཚངས་པ་དཀར་པོ་ཡོད། །བློ་བདེ་བདེ་དགའ་སེམས་སྐྱིད་ནས་སོང༌། །དེ་ནས་འཇང་ཡུལ་མཚལ་ར་ལ། །རྒྱལ་པོ་ཉིད་ཀྱི་ཕེབས་སྐྱོད་མཛོད། །འགྲོ་སྡོད་གང་ལ་མཁས་ལེ་དགོས། །དེ་ཚོ་རྒྱལ་པོའི་ཐུགས་ལ་ཞོག །
ཅེས་གསུངས་ཤིང་ལུང་བསྟན་གྱི་ཚིག་དེ་ལྟར་གསུངས་ནས་མི་སྣང་དར་གྱུར་ཏོ། ། དེའི་སང་སྔ་བར་རྒྱལ་པོའི་དྲུང་དུ་དཔའ་བདུད་རྣམས་ཁྲ་ལམ་མེར་འཚོགས་གྲལ་འཁོད་པའི་སྐབས་དེར། རྒྱལ་པོ་སེང་ཆེན་གྱིས་དཔའ་བདུད་རྣམས་ལ་ལུང་བསྟན་བྱུང་ཚུལ་དང་རྒྱལ་པོ་མི་རྟ་གཉིས་སྔོན་ལ་ཕེབས་དགོས་ཚུལ་གྱི་གསུང་གླུ་འདི་བླངས་སོ། །
གནས་སྤྱི་གཙུག་བདེ་ཆེན་འཁོར་ལོའི་སྟེང༌། །ལྷ་སངས་རྒྱས་ཀུན་འདུས་སྤྱན་རས་གཟིགས། །སྐུ་གང་གི་མོས་པའི་ཡེ་ཤེས་གཏེར། །བདག་མོས་གསོལ་བ་སྙིང་ནས་འདེབས། །གསོན་དང་ཚོ་ཆེན་ལྷ་སྡེ་རྣམས། །འགོག་ཚ་གླིང་གི་ཇོ་རུ་ལ། །དཀར་པོ་ལྷ་ཡི་ལུང་བསྟན་བྱུང༌། །བར་ཆད་སེལ་བའི་བྱིན་རླབས་བྱུང༌། །ལོག་པར་མི་འགྲོ་ལེགས་སློབ་བྱུང༌། །ལྷ་ཆེན་ཚངས་པ་དཀར་པོ་དེ། །མི་དཀར་གཡུ་ཡི་གཟེ་མ་ཅན། །དུང་དཀར་ཐོར་ཚུགས་ལྡེམ་སེ་ལྡེམ། །ལྷ་རྟ་གྲོ་དཀར་ཞབས་ལ་ཆིབས། །གྲོ་དཀར་འགྲོས་སྐོར་གྱི་ལི་ལི། །ལྷ་ཕྲུག་བྱི་བ་འབུམ་གྱིས་བསྐོར། །གཞོན་ནུ་གར་བྱེད་ཁྱུག་སེ་ཁྱུག    །གསུང་དང་ཞལ་ཏ་འདི་འདྲ་བྱུང༌། །དེ་རིང་ཉི་མའི་ཡར་སྟེང་ལ། །ཇོ་རུ་མི་རྟ་གཉིས་པོ་དེ། །སྔོན་འགྲོ་ལམ་ལ་རྒྱུག་ཅིག་གསུངས། །རྨུ་རྗེ་ས་ཐམ་རྒྱལ་པོ་དེ། །ཞི་བའི་ཁུལ་གྱིས་མ་ཐུལ་ན། །དྲག་པོས་ཐུལ་བ་ཁག་པོ་གསུངས། །མི་སྡོད་སྔོན་ལ་འགྲོ་དགོས་ཡོད། །སོང་ནས་དོན་གོ་ཆོད་ལེ་བྱེད། །ད་མ་སྡོད་དཔའ་བདུད་ལྷ་དམག་རྣམས། །རང་རང་ལས་དམག་གང་ཡོད་རྣམས། །གུར་མཐོང་ལྡན་སྒོ་འདིར་ཁྲིད་ལ་ཤོག །ཁྲི་པདྨའི་མདུན་འདིར་སྒྲིག་ལ་ཤོག །ང་དང་གོང་མ་ལྷ་རྣམས་ཀྱིས། །འགལ་རྐྱེན་སེལ་བའི་རབ་གནས་བྱེད། །དབུ་འཕང་མཐོ་བའི་རྟེན་འབྲེལ་བསྒྲིག །དེ་ནས་རྒྱལ་བློན་འཁོར་བཅས་རྣམས། །ཞལ་མྱུར་མཇལ་བའི་སྨོན་ལམ་འདེབས། །གླིང་ཚོ་ཆེན་ཐུགས་ལ་དེ་ལྟར་ཞོག །
ཅེས་གསུངས་ཤིང་གླུ་དེ་ལྟར་བླངས་པས་དཔའ་རྟུལ་རྣམས་རྒྱལ་པོ་སྔོན་དུ་ཕེབས་དགོས་པའི་འོ་བརྒྱལ་རུང༌། ལྷའི་ལུང་བསྟན་ཡིན་པས་ཕུ་རེ་མེད་པ་ཐམས་ཅད་བློ་མཐུན། རྒྱལ་པོའི་གསུང་ལ་མངོན་པར་བསྟོད་པའི་བར་དེར་ཁྲོ་ཐུང་གིས་སྨྲས་པ། འོ་ན་ཚ་བོ་སེང་ཆེན་སྔོན་ལ་ཕེབས་དགོས་ལུང་བསྟན་ཡིན་རུང་ངེད་རྣམས་ཀྱི་ལམ་དུ་དམག་མགོ་ཐོན་པ་བྱུང་ན་རབ་སྟེ། མ་བྱུང་རིགས་ཤར་ན་འགྱོད་ལས་ཆེ་བས་འདི་གར་བཞིན་དུ་ཕེབས་ན་མི་ལེགས་སམ། རྒྱལ་པོ་ཡང་གཅིག་པུར་ཕེབས་ན་དགྲ་འདུལ་བའི་ལམ་དུ་དཔའ་རོགས་དང་དཔུང་རོགས་འཐབ་རོགས་མེད་ན་ཐུགས་འོ་བརྒྱལ་ཟེར། དེར་རྒྱ་གར་མ་ཎི་ཕ་ལ་དེས་སྨྲས་པ། གླིང་དཔའ་རྟུལ་རྣམས་གཟུགས་མེད་ཀྱི་དགྲ་འདྲེ་ལ་ཅུང་ཟད་འཚེར་དགོས། གཟུགས་ཅན་གྱི་བདུད་ཕྲུག་ཁྲི་འབུམ་གྲངས་མང་ཡང་འཇིགས་པ་སྐྱེ་མི་དགོས། གཟུགས་མེད་ཀྱི་འདྲེ་སྲིན་སྔོན་དུ་སྐྱེས་མཆོག་ནོར་བུ་ཆེན་པོས་འདུལ་བར་མཛད་ན་ལེགས་ཟེར། དེར་ག་ནེ་གོམས་པས་གསུངས་པ། ལྷ་ཡི་ལུང་བསྟན་དང་རྒྱལ་པོ་སྔོན་ལ་ཕེབས་དགོས་ཐུགས་བསུན་པ་ཙམ་ཡིན་རུང་འོས་མེད། ལམ་བར་དུ་དམག་འགོ་ཐོན་པ་ཡོང་ཟེར་ཞིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །ལྷ་མཁྱེན་པའི་གཟིགས་དང་སྤྲུལ་པའི་སྐུ། །ལམ་སྣ་དྲོངས་དང་ཐུགས་རྗེ་ཅན། །བར་ཆད་སེལ་དང་མཁའ་འགྲོ་མ། །སྟོང་དབྱེར་ཁ་ལོ་ཆོས་ལ་བསྒྱུར། །ཆོས་འབྱུང་དཀར་པོས་ལམ་སྣ་དྲོངས། །མི་རྒན་ཅི་བསམ་འགྲུབ་པར་ཤོག    །ཚོ་ཆེན་ལྷ་སྡེ་དཀར་པོ་དང༌། །ཡང་སྒོས་འཛམ་གླིང་ཆོས་ཀྱི་རྒྱལ། །གསོན་དང་ཞུ་རྒྱུ་ཚིག་གསུམ་ཡོད། །རྒྱལ་པོ་སྔོན་ལ་ཕེབས་རྩིས་ལ། །གེ་སར་རང་གི་ཐུགས་འདོད་དང༌། །ཚངས་པ་ལྷ་ཡི་ལུང་བསྟན་གཉིས། །ཨ་ཁུའི་མོ་ལུང་རྩིས་དང་གསུམ། །མི་མང་བློ་ཁ་མཐུན་དང་བཞི། །ལ་ཁ་གཅིག་ཏུ་འཛོམ་ལེ་རེད། །དེ་བསམ་རྒྱལ་པོ་སྔོན་ལ་ཕེབས། །གླིང་དམར༌སྒར་ཆེན་ཁྲ་མོ་ལ། །བར་ཆད་སེལ་བའི་ཆ་རྒྱན་དུ། །བགེགས་སེལ་ལྟ་བུའི་རབ་གནས་དང༌། །བྱིན་རླབས་དངོས་གྲུབ་ཆར་རྒྱུན་དེ། །ད་ལྟ་ཉིད་དུ་ཞུ་རྒྱུ་གྱིས། །ས་ཐམ་འཇང་དུ་འགྲོ་ཉིན་མོ། །ས་རྒྱུས་ལམ་རྒྱུས་ང་ལ་ཡོད། །ཆུ་ཆེན་རབ་རྒྱུས་ང་ལ་ཡོད། །རྒྱ་གར་རྒྱ་ནག་བལ་མོན་སོགས། །རྐང་པས་མ་བཅག་གཅིག་ཀྱང་མེད། །སྤྱི་དཔོན་ན་སོ་རྒས་གྱུར་ཀྱང༌། །ཁྲབ་སྔོན་མོའི་ཁ་རྒྱན་རྒྱུན་བུ་འདྲ། །མཚོན་ལེབ་ཆེན་དབྱུགས་པའི་དཔའ་ལུང་འདྲ། །རྒད་པོ་གླིང་ལ་མེད་ཐབས་མེད། །དམག་དཔོན་ཆེ་གསུམ་སྡོང་པོའི་ཚུལ། །དཔའ་རྟུལ་དེ་རྒོད་ལོ་འདབ་ཚུལ། །ཁ་འཛིན་ཨ་ཁུ་འབྲས་བུའི་ཚུལ། །རྒྱལ་པོ་རྩ་བའི་ས་བོན་ཚུལ། །འཇིགས་སམ་མི་དགོས་བདེན་གཏམ་ཡིན། །མ་བཞིའི་དཔོན་པོ་ཁྲོ་ཐུང་ལ། །ནམ་མཁའི་གོ་འབྱེད་གེ་སར་གྱིས། །ཉི་མའི་ཚུལ་དུ་འཛིན་ལེ་རེད། །མུན་པའི་རང་དམངས་མ་འཐིབ་ཅིག །དམག་དཔོན་ཆེ་གསུམ་དབུ་མཉམ་གྱི། །རྩོད་མེད་ནོམ་ཕུད་བཞག་པ་རེད། །སྟག་རོང་དཔོན་པོ་ཁྲོ་རྒྱལ་རེད། །དེ་ལ་ཁྲོ་ཐུང་བསམ་བློ་སྐོར། །སྙིང་ལ་རུས་པ་ཨེན་ཙམ་དགོས། །ཨེ་རེད་གླིང་དཀར་རྒྱལ་བློན་རྣམས། །
ཞེས་གླུ་དེ་ལྟར་བླངས། དཔའ་རྟུལ་རྣམས་ཀྱི་རྒྱལ་པོ་དང་ཨ་ཁུས་གསུངས་པ་ལྟར་ལེགས་སོ་མགྲིན་གཅིག་ཏུ་བརྗོད། དེར་བློན་པོ་རྣམས་དང་དམག་མང་བཅས་རང་རང་གི་རྟ་ལ་གཡབ་ཅིང༌། རྒྱལ་པོས་གསུངས་པ་ལྟར་ལྷ་གུར་མཐོང་བ་ཀུན་སྨོན་གྱི་སྒོ་ནས་ཚུར་ཤར། རྒྱལ་པོ་ཉིད་ཀྱི་བགེགས་སེལ་དང་རབ་གནས་མཛད་པའི་མེ་ཏོག་གི་ཆར་དང༌། ཙནྡན་གྱི་དྲི་རོལ་མོའི་སྒྲ་སོགས་སྙན་པའི་བར་དེར། དམག་མི་རྣམས་འོད་ལམ་ཁྱུག་ཁྱུག། མི་བཀྲག་རྟ་བཀྲག་མདངས་ཡས་ལ་བྱིན་ཐེབ་ཐེབ། རྒྱལ་ཆེན་ཉིད་འདན་མས་ཆིབས་ཁ་ཞུས་ཏེ་འཇའ་དང་འོད་ཁྱིལ་ལེ། ས་གཞི་རྣམས་འདར་ཤིག་ཤིག་ཆིབས་ཀྱི་ཁ་ལོ་འཇང་ཕྱོགས་སུ་བསྒྱུར་ཅིང་ཤུགས་བསྐྱེད་དོ། །དེའི་ནུབ་མོ་ཚངས་པས་ལུང་བསྟན་པའི་ས་དེ་གར་བཞུགས། གླིང་དམག་རྣམས་སྒར་བཏེགས་ཏེ་འགྲོ་མུས་ལ། དེ་ནུབ་འབྲོང་ལུང་སེར་མོའི་མར་ཞབས་སུ་སྒར་བཏབ་ནས་བསྡད། འབྲོ་ལུང་སེར་མའི་ནང་སྒར་བཏབ་ནས་གླིང་དམག་ཕལ་ཆེ་བ་འབྲོང་བཤོལ་དུ་སོང་བའི་སྐབས་རྒོད་པོ་དཔའ་ལས་འཇང་བཀྲ་ཤིས་བསོད་ནམས་གླིང་གི་དམག་དང་ཉེ་བར་སླེབས་དུས། འཇང་བཀྲ་ཤིས་བསོད་ནམས་ཀྱི་གདོང་བཀཀ་ཅིང་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །རེ་རེ་མི་ལེན་དཀའ་མེད་རེད། །སྐྱིད་ན་ཇ་ཆང་མཚར་གླུ་རེད། །སྡུག་ན་རང་སེམས་གསོ་གླུ་རེད། །འགྲོ་དྲུག་ཚིག་གི་འབྱོར་ཚུལ་རེད། །བསམ་དོན་རང་གི་ཤུགས་འབྱུང་རེད། །དེ་ནས་ཉོན་དང་ཁམ་པ་གཡབ། །ས་འདི་ས་ངོ་མ་ཤེས་ན། །ཉི་མ་ཞུད་ཀྱི་མར་ཞབས་རེད། །ཕར་འགྲོ་བརྒྱ་བརྒྱའི་འགྲིམ་ལམ་རེད། །ཚུར་འོང་སྟོང་སྟོང་གཤར་ས་རེད། །ཆུ་ཆེན་ཉག་མ་ཉག་ས་རེད། །ང་དང་ང་ངོ་མ་ཤེས་ན། །རང་ཡུལ་སྟོད་ཀྱི་ས་ཆ་རུ། །ཆེན་པོ་ཧོར་གྱི་ཁྲི་རྒོད་ཡིན། །མ་བྲེལ་མ་བྲེལ་ཕ་ཡི་བུ། །ཚིག་གསུམ་གྲབ་ལེན་མ་བྱས་ན། །དགྲ་གཉེན་ཤན་དེ་ཕྱེ་མདོག་མེད། །སྣ་གཏད་ག་ན་འགྲོ་རྒྱུ་ཡིན། །སེམས་གཏད་ག་འདྲ་ཡོད་ལེ་ཡིན། །མི་བདུན་རྟ་བདུན་གོ་བདུན་གསུམ། །བདུན་གསུམ་གང་དུ་གཏད་ལེ་ཡིན། །མི་རྒྱབ་རྟ་རྒྱབ་གོ་རྒྱབ་གསུམ། །རྒྱབ་གསུམ་གང་དུ་བཞག་ལེ་ཡིན། །རྐུན་མ་ཡིན་ན་ཧམ་རེ་ཆེ། །ཇག་པ་ཡིན་ན་དཔུང་རེ་ཉུང༌། །རྒོད་བསམ་ཁེར་འབུད་མང་བ་འདི། །རིན་ཆེན་སྲོག་ལ་མི་གཟན་ནམ། །ཟ་བསམ་ཧམ་པ་ཆེ་བ་དེ། །འགྱོད་པ་གཏིང་ནས་མི་སྐྱེའམ། །ངར་བསམ་གྲི་མགོ་ཕུར་བ་དེ། །གྱོད་ཀྱི་གཞི་མ་མི་འདིང་ངམ། །དེ་ནས་འདི་རུ་སྐད་ཆ་ཡོད། ། འདི་ནས་འཇང་ལ་ག་ཙམ་དགོས། །ཁྱོད་ལ་ས་རྒྱུས་ཨེ་ཡོད་ལགས། །རྒྱལ་པོ་ས་ཐམ་སྐད་པ་དེ། ། ཞལ་བཟང་ཁྱོད་ཀྱིས་ཨེ་མཇལ་ལགས། །ཡུལ་ལ་བདེ་སྐྱིད་ཅི་འདྲ་ཡོད། །དེ་ནས་ག་ལེར་རིམ་གྱིས་གྱིས། །རྒོད་རྒོད་ངར་ངར་མ་བྱེད་ཅིག །ཕོ་རབ་མར་དཀར་ཐུག་འདྲ་གྱིས། །ཨེ་རེད་མ་རེད་ཁམ་པ་གཡབ། །
ཅེས་གང་ཟེར་ལྟ་བའི་གླུ་དེ་ལྟར་བླངས། ཁོ་ཡི་བསམ་པར་མི་བདེན་རྫུན་གཏམ་མགོ་སྐོར་ཚད་མེད་པའི་ལས་རེད། འཇང་ས་ཐམ་དམག་རོགས་ཧོར་ནས་ཡོང་དོན་མེད་བསམ་ནས་སྨྲས་པ། ཁོ་རེ་གྲོ་དཀར་གཡབ། ཕོ་འཕྱོར་ཤ་མོ་འདྲ་ལེ་བ། མཚོན་འཕྱོར་ཐག་མཁན་ལུ་ལུ་འདྲ། ངས་མདའ་གཅིག་མགོ་ལ་མི་ལེན་རེ་ཟེར་ཞིང་མདའ་མགོ་ཕུར་ནས་གླུ་འདི་ལྟར་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །དེ་ནས་ཉོན་དང་གྲོ་དཀར་གཡབ། །ང་དང་ང་ངོ་མ་ཤེས་ན། །འཇང་ཕྲུག་བཀྲ་ཤིས་བསོད་ནམས་ཡིན། །འཇང་ཡུལ་མཚལ་ར་སྨུག་པོ་ནས། །ས་ཐམ་རྒྱལ་པོས་མངགས་པའི་མི། །ཁྱོད་ཡོང་དོན་མེད་པའི་དམག་སྒར་འདི། །ཧོར་ནག་རྒྱལ་ཆེན་ཆེ་གསུམ་གྱི། །མངག་ཟེར་རྫུན་གཏམ་སྨྲས་པ་འདི། །ང་ཙམ་རྣ་བར་མི་འགྲོ་འདུག །ཡིན་ཐག་ཆོད་ཨ་བུའི་ནོར་སྐལ་རེད། །ཅི་ཡོད་གང་ཡོད་ལྟ་མི་རེད། །ཁྲ་ཆུང་མིག་གིས་མ་མཐོང་ན། །གཞན་ལ་འདྲི་བ་བཅོལ་རེ་ཆུང༌། །དེ་ནས་ཉོན་དང་གྲོ་དཀར་གཡབ། །རྒོད་བསམ་ཁེར་རྒྱུག་མི་བྱེད་རྒྱུ། །དགྲ་ནག་ཁྱོད་ཀྱི་ཐོག་བརྫིས་བྱུང༌། །ངར་བསམ་གྲི་མགོ་མི་འཕུར་རྒྱུ། །སྔོན་སོང་དམག་གི་མི་ཤ་བགོས། །ཧམ་བསམ་བློ་རྒྱ་མི་སྐྱེ་རྒྱུ། །རྟ་ཁྲག་གཉིས་ཀྱི་ཙ་ར་ཡིན། །ད་རུང་ཧམ་ཆེན་ཚོད་རང་མེད། །ཕུག་སོ་མེད་པའི་རྫུན་གོ་གཏམ། །ཅ་ཅོ་ཁ་ནས་འཆད་ཅིང་འདུག    །ང་ཙམ་དེ་ལ་ཉན་དོགས་མེད། །སྟག་དོང་ནང་ནས་མདའ་ཞིག་འདོན། །གཟིག་ཤུབས་ནང་ནས་གཞུ་ཞིག་འདོན། །དོན་སྣོད་བཅུ་གཉིས་ཧོ་མ་ཡ། །འཆི་བའི་ལམ་དུ་ཨེ་མ་ཧོ། །
ཞེས་ཟེར་ཞིང་སྐད་ཅིག་ལ་མདའ་དེ་འཕངས་བྱུང་བས། དཔའ་ལའི་ལུས་ལ་ཕོག་ནས་ཁྲབ་རྨོག་སོ་སོར་འཐོར་རུང་ནང་དུ་དགྲ་ལྷའི་ཚེ་གོས་ཀྱིས་མཐུས་མདའ་རྨས་མ་བྱུང༌། དཔའ་ལ་ནི་ངར་ལངས་ཤིང་གཡའ་ཁོ་རེ། མདའ་ནུས་མེད་རྩྭ་འཇག་རླུང་ཁྱེར་དེ། ང་དཔའ་ལའི་གདོང་ལ་ངོ་མི་ཚའམ། ད་ཁྱོད་རང་གོ་གཟུར་ལ་སྡོད་དང་ཚད་གཅིག་གྱིས་ཟེར་ནས་གླུ་འདི་བླངས་སོ། །
གླུ་ཐ་ལ་ཐ་ལ་ལ་ལ་རེད། །ཨ་ལ་གླུ་ཡི་ལེན་ལུགས་རེད། །མ་ཅིག་གཡུ་ཡི་སྒྲོལ་མ་མཆོད། །དེ་རིང་དཔའ་ལའི་སྡོང་གྲོགས་མཛོད། །དེ་ནས་ཉོན་དང་ཁམ་པ་གཡབ། །ཁྱོད་རང་ཟེར་ཟེར་དེ་རང་ཡིན། །ཡིན་རྒྱུ་ཅན་གྱི་དམག་སྒར་འདི། །གཏད་རྒྱུ་ཁྱོད་ལ་གཏོད་ལེ་ཡིན། །དགྲ་ལན་ནུས་ཡོད་ན་འཇལ་རན་ཡིན། །རྩ་བ་ཁུང་ནས་མ་ཕུད་ན། །རྩེ་མོ་ལོ་འདབ་རྒྱས་དོན་མེད། །ཚུར་བརྙས་འཇང་གིས་དྲན་ལེ་ཡིན། །ཕར་བརྙས་གླིང་པས་འགྲུས་ལེ་ཡིན། །ད་རུང་དེས་ཀྱང་མ་ཚད་པའི། །ལས་དམག་ཕྱི་ནས་ཅི་ཡོད་རྣམས། །སྔོན་མ་ཇི་བཞིན་བཟོ་རྒྱུ་ཡིན། །གཙོ་བཞུགས་འཛམ་གླིང་ཆོས་ཀྱི་རྒྱལ། །མུ་པའི་ལྷ་སྲས་དགྲ་ལྷ་ཡོད། །གཡས་བཞུགས་གསེར་བའི་ཉི་འབུམ་ཡོད། །གཡོན་བཞུགས་འོམ་བུ་དཔའ་སེང་ཡོད། །མུ་སྤྱང་རིན་ཆེན་དར་ལུ་ཡོད། །གྲོས་བྱེད་དཔའ་བོའི་ཁ་འཛིན་ལ། །ཨ་ཁུ་རི་རྒྱལ་ལྷུན་པོ་ཡོད། །དགྲ་མགོ་བརྡུང་བའི་ཐོ་བ་ལ། །བཀའ་བློན་འདན་མ་བྱང་ཁྲ་ཡོད། །དགའ་སྡེ་མི་ཆེན་སེར་པོ་ཡོད། །སྟག་རོང་དཔོན་པོ་ཁྲོ་རྒྱལ་ཡོད། །ཡ་ཟི་ཧོར་གྱི་ཤན་པ་ཡོད། །དཔའ་བོ་ངར་རྒོད་དེ་ཚོ་ཡོད། །མི་དེ་ཚོ་ཐུག་ན་ག་འདྲ་ཡོད། །ང་རང་གླིང་གི་རྒོད་པོ་མིན། །དེ་རིང་སྟང་མའི་འོག་མ་ལ། །མི་ཁྱོད་ཙམ་གདོང་ལེན་བྱེད་དགོས་བྱུང༌། །དཔའ་ཨེ་འདུག་ཚད་ཅིག་བཞག་མི་ཡིན། །དཔའ་སྙིང་འབྲོང་ལ་མ་ཤེས་དེ། །གླང་ཆུང་ཉ་ཡུ་ཨེ་འདར་བལྟ། །འཕུར་རྩལ་གླག་ལ་མི་ཤེས་ཏེ། །རི་བོང་གཟུགས་གཞི་ཨེ་འཐོར་བསམ། །སྟག་དོང་ནང་གི་མདའ་མོ་འདི། །དེ་རིང་མི་འདོན་བཞག་ལ་གཏོང༌། །གཟིག་ཤུབས་ནང་གི་གཞུ་མོ་འདི། །དེ་རིང་མི་འདོན་བཞག་ལ་གཏོང༌། །རལ་གྲི་ལེབ་ཆེན་ལོག་ན་ཀྲབ། །དེ་རིང་མི་འདོན་བཞག་ལ་གཏོང༌། །
ཞེས་ཟེར་ཞིང་རྟ་སྟོང་རི་དར་དཀར་ལ་ཡོབ་བརྡབ་ཁ་སྤྲུག་བྱས་ནས་རྒྱུག་པས། ཁོས་ཀྱང་གོ་ཟུར་ནས་བསྡད། དཔའ་ལས་སྐད་ཅིག་ལ་ཁྱེར་ནས་ཡར་ནམ་མཁའ་ལ་དབྱུག མར་ས་གཞི་ལ་བརྡབས་ནས་བསད་དོ། །དམག་མི་བྱིངས་རྣམས་ཕན་ཚུན་དུ་ཨ་ལོང་ལྟར་ཐུག་པས་རྩྭ་འཇག་རླུང་གིས་སྟོར་བ་ལྟར་ཉིལ་གྱིས་བསད། དེ་དག་གི་ནང་ནས་སྐད་ཆ་ཤོད་མི་གཉིས་སྐེ་ལ་ཐག་པ་བརྒྱབ་ནས་ལྷ་གུར་གྱི་མདུན་དུ་ཕུར་པ་རེ་ལ་ཁྱི་ལྟར་བཏགས་སོ། །

གླེང་བརྗོད།
འཇང་གླིང་གཡུལ་འགྱེད། (ཚན་པ་དང་པོ)
འཇང་གླིང་གཡུལ་འགྱེད། (ཚན་པ་གསུམ་པ)

Menu