ཨ་ཀྱཱ་ཡོངས་འཛིན་བློ་བཟང་དོན་གྲུབ། (༡༧༤༠ – ༡༨༢༧)
༄༅། །ན་མོ་གུ་རུ་ཝེ། རྒྱལ་ཀུན་ཡབ་གཅིག་མཁྱེན་པའི་གཏེར། །ངག་དབང་ལྷ་མོ་དབྱངས་ཅན་མ། ། བདག་སྙིང་པདྨའི་དབུས་བཞུགས་ཏེ། །ཐོགས་མེད་སྨྲ་བའི་སྤོབས་པ་སྩོལ། །དབྱངས་ཡིག་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན། །ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་བཅུ། །ད་དང་ས་གཉིས་ཡང་འཇུག་གོ །ག་ད་བ་མ་འ་སྔོན་འཇུག །གོ་ངོ་དོ་ནོ་བོ་མོ་འོ། །རོ་ལོ་སོ་རྣམས་རྫོགས་ཚིག་སྟེ། །སླར་སྡུད་ཟླ་སྡུད་ཅེས་ཀྱང་བྱ། །རྗེས་འཇུག་རང་འདྲའི་མཐའ་ལ་སྦྱར། །ན་ར་ལ་གསུམ་རྗེས་སུ་ནི། །ད་དྲག་ཐོབ་ཚེ་ཏོ་ཞེས་སྦྱར། །སུ་རུ་ར་དང་དུ་ཏུ་ན། །ལ་དོན་རྣམ་པ་དྲུག་ཡིན་ཏེ། །རྣམ་དབྱེ་གཉིས་པ་བཞི་པ་དང༌། །བདུན་པ་དེ་ཉིད་དུས་ལ་འཇུག །ས་སུ་ག་བ་ད་དྲག་ཏུ། །ང་ད་ན་མ་ར་ལ་དུ། ། འ་དང་མཐའ་རྟེན་མེད་པའི་མཐར། །རུ་དང་ར་གཉིས་ཅི་རིགས་སྦྱར། །གི་ཀྱི་གྱི་འི་ཡི་ལྔ་པོ། །རྣམ་དབྱེ་དྲུག་པ་འབྲེལ་སྒྲ་སྟེ། །ད་བ་ས་ཀྱི་ག་ང་གི །ན་མ་ར་ལའི་རྗེས་སུ་གྱི། །འ་དང་མཐའ་རྟེན་མེད་མཐར་འི༑ ༑རྐང་པ་སྐོང་ཚེ་ཡི་འཐོབ་བོ། །གི་ཀྱི་སོགས་མཐར་ས་སྦྱར་ཚེ། །རྣམ་དབྱེ་གསུམ་པ་བྱེད་པའི་སྒྲའོ།། ཀྱང་ཡང་འང་གསུམ་རྒྱན་སྡུད་དོ། །ག་ད་བ་སའི་རྗེས་སུ་ཀྱང༌། །ང་ན་མ་འ་ར་ལ་ཡང༌། །མཐའ་རྟེན་མེད་མཐར་འང་དང་ཡང༌། །དེ་ཏེ་སྟེ་གསུམ་ལྷག་བཅས་ཏེ། །ད་དེ་ན་ར་ལ་ས་ཏེ། །ག་ང་བ་མ་འ་རྣམས་དང༌། །མཐའ་རྟེན་མེད་མཐར་ས་སྟེ་འཐོབ། །གམ་ངམ་དམ་ནམ་བམ་མམ་འམ། །རམ་ལམ་སམ་རྣམས་འབྱེད་སྡུད་སྒྲ། །རྗེས་འཇུག་རང་འདྲའི་མཐའ་ལ་སྦྱར། །ད་དྲག་ཅན་མཐར་ཏམ་སྦྱར་རོ། །ནས་དང་ལས་གཉིས་འབྱུང་ཁུངས་དང༌། །དགར་དང་སྡུད་པ་ལ་ཡང་འཇུག །ཀྱེ་དང་ཀྭ་ཡེ་བོད་སྒྲ་སྟེ། །ཕལ་ཆེར་མིང་གི་ཐོག་མར་སྦྱོར། །ནི་སྒྲ་དགར་དང་བརྣན་པའོ། །གང་སུ་ཅི་ཇི་སྤྱི་སྒྲ་སྟེ། །དཔེ་དང་གཞན་ལ་ཅི་སྦྱོར་ཞིང༌། །དོན་ལ་ཅི་དང་གང་ཟག་ལ། །སུ་འཐོབ་གང་གི་ཀུན་ལ་སྦྱར། །པ་དང་ཅན་ལྡན་བདག་པོའི་སྒྲ། །ག་ད་བ་ས་ན་མ་པ། །ང་འ་ར་ལ་མཐའ་མེད་བ། །བདག་པོའི་སྒྲ་ལ་པ་ཉིད་དོ། །མ་མི་མིན་མེད་དགག་པའི་སྒྲ། །མ་མི་གཉིས་ནི་ཐོག་མ་དང༌། །མིན་མེད་གཉིས་པོ་རྗེས་ལ་སྦྱར། །ཚིག་འཕྲད་ཅིང་ལ་སོགས་པ་ནི། །ག་ད་བ་དང་ད་དྲག་མཐར། །ཅིང་ཅེས་ཅེའོ་ཅེ་ན་ཅིག །ང་ན་མ་འ་ར་ལ་དང༌། །རྗེས་འཇུག་མེད་པའི་མིང་མཐའ་རུ། །ཞིང་ཞེས་ཞེའོ་ཞེ་ན་ཞིག །ས་མཐར་དམིགས་གསལ་(ཤེས་སྦྱར་ན་བློའི་ཤེས་པར་འཁྲུལ་བ་འབྱུང་བས་མི་བྱ་གསུངས)ཞེས་མ་གཏོགས། །ཤིང་ཤིག་ཤེའོ་ཤེ་ན་འཐོབ། །ཁ་ཅིག་ལྷན་ཅིག་ཐབས་ཅིག་དང༌། །ལན་ཅིག་སོགས་ཀྱི་ཅིག་སྒྲ་དེ། །མིང་གི་ཆ་ཤས་ཡིན་པས་ན། །ཚིག་འཕྲད་གྲངས་སུ་མ་ནོར་གཅེས། །ཚིགས་བཅད་རྐང་པའི་མཐའ་ལ་ནི། །ཉིས་ཤད་ངེས་པར་འཐོབ་པ་ཡིན། །ག་མཐར་ཆིག་ཤད་ང་ཡི་མཐར། །ཤད་ཀྱི་གོང་དུ་ཕྱི་ཚེག་(ང་ཡིག་རྐང་པ་ཤད་དང་མི་འདྲེས་པའི་ཆེད་ཡིན)དགོས། །ཚིག་ལྷུག་ལ་ནི་རྫོགས་ཚིག་མཐར། །ཉིས་ཤད་རྣམ་གྲངས་སོ་སོ་དང༌། །དོན་ཚན་ཕལ་ཆེར་མཐའ་དང་ནི། །བོད་པའི་སྐབས་ལའང་ཆིག་ཤད་བྱ། །སྡེ་ཚན་ཆེན་མོ་རྫོགས་པ་དང༌། །ལེའུའི་མཚམས་སུ་བཞི་ཤད་འཐོབ། །རྐང་པ་སྐོང་དང་མི་སྐོང་ལས། །འོ་འུ་འམ་གྱི་ཚིག་བར་ཡང༌། །འཐོབ་ཚུལ་སྐབས་དང་སྦྱར་བར་བྱ། །དེ་ལྟར་རྗེས་འཇུག་དབང་གིས་ནི། །རྣམ་དབྱེ་ཚིག་ཕྲད་མི་འདྲ་བའི། །ཁྱད་པར་ཞིབ་ཏུ་ཤེས་པར་བྱ། །ཚིག་གི་འདབ་མས་མ་བསྒྲིབས་པའི། །གནད་བསྡུས་འབྲས་བུ་གཡུར་ཟ་བ། །བློ་གསལ་དོན་གཉེར་དགའ་སྟོན་དུ༑ ༑དབྱངས་ཅན་དགའ་བའི་བློ་གྲོས་སྤེལ།། །།དགེའོ།།
མཆན། དག་ཡིག་འདི་ནི་པོ་ཏཱ་ལའི་ཞོལ་པར་ཁང་ཆེན་མོ་གངས་ཅན་ཕན་བདེའི་གཏེར་མཛོད་ཀྱི་དཔེ་རིང་ལྟར་བསྒྲིགས་པ་ཡིན།
རྩོམ་པ་པོའི་ལོ་རྒྱུས་མདོར་བསྡུས།
ཨ་ཀྱཱ་ཡོངས་འཛིན་བློ་བཟང་དོན་གྲུབ་ནི། མདོ་སྨད་ཕྱག་རྡོ་ཐང་གི་ཨ་ཀྱཱ་སྡེ་ཞེས་བྱ་བའི་ཡབ་ལོ་ལོ་དང་ཡུམ་འབའ་ཀོ་གཉིས་ཀྱི་སྲས་སུ་རབ་བྱུང་བཅུ་གཉིས་པའི་ལྕགས་སྤྲེལ་ཕྱི་ལོ་༡༧༤༠ ལོར་སྐུ་འཁྲུངས། དགུང་ལོ་བདུན་ལ་ལྷ་རི་བློ་བཟང་འབྱུང་གནས་ཀྱི་དྲུང་དུ་རབ་བྱུང་བསྒྲུབས། ཤིང་བཟའ་བློ་བཟང་དར་རྒྱས་རྒྱ་མཚོ་(༡༧༥༩ – ༡༨༢༣)སློབ་དཔོན་དུ་བསྟེན་ནས་མདོ་སྔགས་ཀྱི་བཀའ་ཆོས་མང་དུ་གསན། དགུང་ལོ་ཉེར་བདུན་སྟེང་དབུས་སུ་ཕེབས་ནས་འབྲས་སྤུངས་སྒོ་མང་གྲྭ་ཚང་དུ་ཆོས་ཞུགས་མཛད་དེ་གཞུང་ཆེན་པོར་སློབ་གཉེར་གནང༌། དགུང་ལོ་ཉེར་བརྒྱད་ཐོག་པཎ་ཆེན་དཔལ་ལྡན་ཡེ་ཤེས་ཀྱི་དྲུང་དུ་བསྙེན་རྫོགས་བསྒྲུབས། དགུང་ལོ་སོ་གཉིས་ལ་གྲྭ་སྐོར་མཛད། སྒྲ་རིག་པར་ལེགས་པར་སྦྱངས་པས་ཀུན་བཤད་ཀྱི་མིང་ལ་དབྱངས་ཅན་དགའ་བའི་བློ་གྲོས་ཞེས་འབོད། ཀུན་མཁྱེན་འཇིགས་མེད་དབང་པོ་དང་ཐུའུ་བཀྭན་ཆོས་ཀྱི་ཉི་མ་སོགས་ཀྱི་ཞབས་ལ་གཏུགས་ནས་མདོ་སྔགས་ཀྱི་ཟབ་ཆོས་མང་དུ་གསན། དགུང་ལོ་དྲུག་ཅུ་རེ་བཞི་ལ་བྱ་ཁྱུང་དགོན་གྱི་གདན་རབས་ཞེ་དགུ་པའི་ཁྲིར་ཕེབས། སྐུ་འབུམ་ཁྲི་ཆེན་ཞེ་དགུ་པ་བུམ་པ་ངག་དབང་ཆོས་ཀྱི་ཉི་མ་སྐུ་འབུམ་གྱི་ཁྲིར་བཞུགས་དུས། ཕྱི་ལོ་༡༨༢༧ ལོར་རྗེ་ཡབ་སྲས་གསུམ་གྱི་གསུང་འབུམ་དཔར་དུ་འགོད་རྒྱུ་ཞུ་དག་ལེགས་པར་མཛད། སྐུ་འབུམ་བླ་མ་ཨ་ཀྱཱ་ཡེ་ཤེས་སྐལ་བཟང་མཁས་གྲུབ་རྒྱ་མཚོའི་(༡༨༡༧ – ༡༨༦༩)ཡོངས་འཛིན་མཛད་པས་ཡོངས་གྲགས་སུ་ཨ་ཀྱཱ་ཡོངས་འཛིན་ཞེས་གསོལ། མདོར་ན་སྐུ་ཚེ་གང་པོར་དམ་ཆོས་འཆད་ཉན་མཛད་ནས་དུས་འདའ་བར་མཛད། དགུང་ལོ་བརྒྱད་ཅུ་གྱ་བརྒྱད་ལ་ཕེབས་པ། རབ་བྱུང་བཅུ་བཞི་པའི་མེ་ཕག ཕྱི་ལོ་༡༨༢༧ ལོར་དགོངས་པ་ཆོས་དབྱིངས་སུ་ཐིམ།
ཁོང་གི་བཀའ་རྩོམ་ནི། མཁས་པ་དང་བླུན་པོ་བརྟག་པའི་བསྟན་བཅོས་དགེ་ལྡན་ལེགས་བཤད་པདྨ་དཀར་པོའི་ཆུན་པོའི་འགྲེལ་པ་ཉི་མའི་འོད་ཟེར། ཤིང་རྟའི་སྲོལ་འབྱེད་ཀྱི་རྣམ་གཞག་སྐལ་བཟང་མགུལ་རྒྱན། འདུལ་བའི་སྡོམ་ཚིག་གནད་བསྡུས་ནོར་བུའི་ཕྲེང་བ། སྙན་ངག་གི་བསྟན་བཅོས་མུ་ཏིག་ཕྲེང་བ། སྡེབ་སྦྱོར་རིན་འབྱུང་གི་གནད་དོན་གསལ་བའི་མེ་ལོང༌། རྟགས་ཀྱི་འཇུག་པའི་དཀའ་གནད་བདག་གཞན་དང་བྱ་བྱེད་ལས་གསུམ་གྱི་ཁྱད་པར་ཞིབ་ཏུ་ཕྱེ་བ་ཉུང་གསལ་འཕྲུལ་གྱི་ལྡེ་མིག་སོགས་ཆོས་ཚན་ལྔ་བཅུ་ཐམ་པ་པོད་འབྲིང་གཉིས་ལྷག་བཞུགས་པ་བཅས་སོ། །