རྩོམ་པ་པོ། རྒྱལ་དབང་ལྔ་པ་ངག་དབང་བློ་བཟང་རྒྱ་མཚོ།
སྔོན་རབས་དམ་པའི་ངང་ཚུལ་ཟླ་ཤེལ་ལ། །བཟང་བོའི་རི་བོང་སྣང་བརྙན་བཀྲ་བ་དང་། །
དཀར་ནག་འདྲེས་མའི་རྡོ་ཐལ་གྱིས་བྱུགས་ངོས། །ཀུན་རྟོག་རི་མོར་འདྲི་བ་ཅི་ཞིག་མཚུངས། །
དེང་དུས་སྒོ་གསུམ་མི་དགེའི་དོ་ར་ན། །གྱ་གྱུའི་གར་མཁན་ཚུལ་འཆོས་གོས་གྱོན་པའི། །
ཆེར་རློམ་མང་བོའི་རྣམ་ཐར་འཁྱོག་པོའི་ཚིག །མཐོང་ཚེ་དཔྱོད་ལྡན་ཕལ་ཆེར་བསྟིང་ཚིག2སྨྲ། །
སྤངས་རྟོགས་ཡོན་ཏན་ནོར་བུས་གང་མིན་ཡང་། །དུག་གསུམ་བརླང་བོའི་ཆུ་སྲིན་མི་རྒྱུ་བར། །
དགེ་བའི་སྤྱོད་ཚུལ་ཡོལ་མེད་རླབས་འཕྲེང་ཅན། །རྟོགས་བརྗོད་ཟླ་བའི་མ་མ་དེང་འདིར་བསྐྲུན། །
སྒྲོ་བཏགས་གླེང་མོའི་མི་གཙང་ཕུང་བོའི་ལུས། །སྒྲ་དོན་སྙན་འགྱུར་རིན་ཅེན་རྒྱན་སྤུད་ནས། །
རྫུན་གྱི་གར་བསྒྱུར་ལྕེ་བདེའི་བརྗོད་པ་ལ། །སྙིང་བོར་རློམ་ཡང་ཨེ་རཎྜ3ཡི་འབྲས། །
གཞན་ངོར་བཟང་བརྫུའི་སྤྲུལ་པའི་རི་དྭགས་ཀྱིས། །འགྲོ་མང་ལོག་པའི་ཐང་ལ་ཉེར་ཁྲིད་ནས། །
ཕན་བདེའི་སི་ཏཱ་འཕྲོག་པའི་ཆོ་ག་དག །རྫོགས་པའི་བཤེས་གཉེན་འབོད་སྒྲོག་4མང་ཞིག་མཆིས། །
དང་པོར་བརྡུངས་པའི་འཁྱོག་ཚིག་རྒྱུད་མངས་སྒྲས། །འཁོར་བའི་རྒྱ་མཚོར་འགྲོ་བའི་བདེ་སྐྱིད་གྲུ། །
བཤིག་ཀྱང་གཞན་ལ་ཁ་འཕངས་གཡོ་ཟོལ་མཁན། །དམ་པར་རློམ་འགས་ཁྱབ་འཇུག་ཁེངས་པ་ཕྲོགས། །
མ་དག་བཅོས་མའི་ར་གན་5ལྷད་ཀྱི་ཟོང་། །འཁྲུལ་མེད་ཡང་དག་ཆོས་ཀྱི་གསེར་སྦྱངས་ཞེས། །
རྨོངས་པའི་ཚོང་འདུས་བཞི་མདོར་བྲིན་མཐོང་ཚེ། །ཐུབ་པའི་བསྟན་ཡང་རྟགས་ཙམ་འཛིན་པའི་དུས། །
ཐོས་བསམ་སྒོམ་པའི་དཀའ་ཐུབ་རབ་ཞིག་ཀྱང་། །ངན་སྤྱོད་དུག་རླངས་འཁྱིལ་བའི་མགྲིན་པ་ལ། །
བསྔགས་བརྗོད་ཡུལ་དུ་བྱེད་པའི་ཆེན་པོ་འགའ། །གཙུག་ན་ཟླ་བ6ས་འདིར་འོངས་པ་བཞིན། །
ཤེས་རབ་རི་དྭགས་རྟུལ་བོའི་རྒྱར་ཆུད་པས། །མཁས་གྲུབ་སྤྱོད་ཚུལ་སྲོག་དང་ཉེར་བྲལ་ཡང་། །
སྟོབས་འབྱོར་ཤ་ཡིས་གཞན་སྣང་བསྒྱུར་ནུས་པའི། །ཤི་ལུས་གསོན་པོའི་གྲལ་དུ་བསྒྲིག་འདི་ཅི། །
གྲགས་འདོད་ཉི་ཟེར་གྱིས་ཕྱེ་པདྨའི་སྒོར། །མུ་ཅོར་བུང་བའི་སྒྲ་དབྱངས་སྒྲོག་པ་ལ། །
མངོན་ཤེས་ཟེའུ་འབྲུ་རྒོད་པའི་གཡུར་ཟ་མཁན། །རྫུན་ཕུགས་བགྲང་བྱའི་མཚན་མོའི་ཐུན་མཐར་རྡིབ། །
གཞོན་ནུའི་ལང་ཚོ་དར་བའི་དཔྱིད་ཀྱི་དུས། །ཤེས་བྱའི་ཕ་མཐར་གོམས་པའི་ས་བོན་དག།།
མ་བཏབ་ན་ཚོད་སྨིན་པའི་སྟོན་གྱི་ཚེ། །གྲུབ་བརྙེས་འབྲས་བུར་སྤྱོད་དེ་དོན་གྱིས་སྟོངས། །
མང་ཐོས་བཅུད་དང་མི་ལྡན་བུམ་པ་ལ། །བསྟོད་བསྔགས་པཉྩ་ལི་ཀའི་7མགུལ་ཆིངས་ཅན། །
མཛེས་ཆོས་རྨ་བྱའི་མདོངས་ཀྱིས་ཁ་བརྒྱན་པ། །རིང་བོར་ཚར་དུ་བསྒྲིགས་འདིའི་བྱེད་པོ་སུ། །
ཀྱེ་མ་སྔོན་བྱོན་དམ་པའི་རྣམ་ཐར་དང་། །དེང་དུས་སྐྱེ་བོའི་བག་ཡངས་སྤྱོད་ཚུལ་རྣམས། །
མ་འདྲེས་རླུང་གི་རྒྱལ་མཚན་ལྟར་མཐོང་ཚེ། །དགའ་དང་སྐྱོ་བའི་ཀུན་རྟོག་འགྲན་པ་བཞིན། །
སྔོན་གོམས་མི་དགེའི་ས་འཛིན་མཐོན་པོ་ནས། །དུག་གསུམ་བག་ཆགས་ཆུ་བོ་དྲག་དབབ་པ། །
འདིར་སྣང་དགེ་ལ་གཞོལ་བ་ཕྲ་མོའི་བློའི། །རགས་ཀྱིས་གྱེན་དུ་ལྡོག་ནུས་ག་ལ་ཡིན། །
དེ་ལྟ་ན་ཡང་ལྔ་བརྒྱའི་ནགས་ཀླུང་ཁྲོད། །སྐྱེས་མོད་གཞན་ལ་འཚེ་བ་ལྷུར་ལེན་པའི། །
མ་རུངས་ཡལ་ག་འཁྱོག་པོ་མི་ལྡན་པ། །ཁོ་བོའི་རང་བཞིན་འཁྲི་ཤིང་གཞོན་ནུ་འདྲ། །
དགེ་སྡུག་ལས་ཀྱིས་ཐགས་སུ་ཉེར་བཏགས་པའི། །ཚེ་འདིའི་ཟ་འོག་བདེ་སྡུག་རི་མོ་ཅན། །
མཐའ་དག་ཡི་གེར་འབྲི་ན་ཚངས་པ་ཡང་། །ངལ་བའི་དཀའ་ཐུབ་བསྟེན་ལས་གཞན་དུ་ཅི། །
འོན་ཀྱང་རྣམ་དཀར་ལས་ཀྱི་འབྲུག་སྒྲ་ཡིས། །རབ་བསྐུལ་ཐོས་བསམ་སྒོམ་པའི་གཙུག་ཕུད་ཅན། །
སྤྱོད་ཚུལ་ལེགས་པའི་ཆུ་ཀུན་བསགས་པའི་སྒྲོ། །རྣམ་བཀྲ་དཔྱོད་ལྡན་གཟིགས་མོར་འདི་ན་མཚར། །
རང་ལ་ལྐོག་ཏུ་མ་གྱུར་བློ་ཡི་མཚོར། །རང་གི་ངང་ཚུལ་གཟུགས་བརྙན་འཆར་བཞིན་དུ། །
རང་ཉིད་ཟོག་པོར་གཏོང་བའི་རྙོག་མ་ཅན། །རང་འདོད་ཕུགས་འཚངས་རྣམས་དང་འདི་མི་འདྲ། །
མེད་ལ་ཡོད་དང་ཡོད་ལ་མེད་པ་སོགས། །གཡོ་སྒྱུའི་ཚུལ་ལ་དམ་པ་རྣམས་ཀྱང་ཁྲེལ། །
དྲང་བོའི་ཉག་ཕྲན་རྒྱུད་ལས་འཕོས་པ་ཡི། །ཚད་མའི་གཏམ་གྱི་སྲིད་སྒྲུབ8འདི་ན་མཆིས། །
ཨེ་མ་འདི་སྣང་མེ་ལོང་དུ། །སྣ་ཚོགས་སྐྱོན་དང་ཡོན་ཏན་གཟུགས། །
ཅི་དགར་འཆར་བའི་གླེགས་བམ་འདི། །ཀུན་གྱི་གཟིགས་མོར་མཚར་བའི་གནས། །
རིགས་རུས་འཆི་མེད་དགའ་ཚལ་ན། །དལ་བརྒྱད་འབྱོར་བཅུ་ལྡན་པའི་ཤིང་། །
སོ་ཐར་ཁྲིམས་ཀྱི་རྩ་བ་བརྟན། །གཞན་ཕན་ལྷག་བསམ་ཡལ་ག་ཅན། །
གནས་ལྔ་རིག་པའི་ལོ་འདབ་རྒྱས། །ཐོས་བསམ་སྒོམ་པའི་མེ་ཏོག་བཀྲ། །
ཚུལ་བཞིན་བསྒོམས་པའི་འབྲས་བུ་སྨིན། །དོན་ཀུན་གྲུབ་པའི་དཔག་བསམ་དབང་། །
དེ་ཕྱིར་ཁོ་བོའི་རྟོགས་བརྗོད་ལ། །ལྟ་བར་དྲང་སྲོང་ཕུར་བུ་དང་། །
གཞོན་ནུ་མདོངས་མཐའ་ལ་ཞོན་ཏེ། །ལྷ་ལམ་ངོས་སུ་ཡང་ཡང་རྒྱུ། །
གསེར་མངལ་9ཐིག་ལེ་མཆོག་མ་10ལ། །གཟིགས་པའི་ཟོལ་གྱིས་ཞལ་བཞི་སྤྲུལ། །
དྲང་སྲོང་དམོད་པར་སྒྲོ་བཏགས་ཏེ། །བརྒྱ་བྱིན་འདྲེན་བྱེད་སྟོང་ཕྲག་བགྲད། །
ཕུན་ཚོགས་བཀྲ་ཤིས་སྣང་བའི་འོད། །སྟེར་བྱེད་ཉི་མ་ཟླ་བ་ཟུང་། །
རླུང་གི་ཤིང་རྟས་ཉེར་དྲངས་ནས། །གཟིགས་མོར་ཕྱོགས་འདིར་ཡང་ཡང་འཁོར། །
དེས་ན་དོན་གྱི་ཤ་ཚུགས་ཀུན། །ངོ་མཚར་གཏམ་གྱི་དུ་ཀུ་ལས11། །
མ་བསྒྲིབས་བློ་གསལ་མིག་དབང་གིས། །གསལ་བར་མཐོང་ངོ་ཤེས་ལྡན་ཀྱེ། །
མཆན་འགྲེལ།
- སྙན་རྩོམ་འདི་ནི་རྒྱལ་དབང་ལྔ་པ་ངག་དབང་བློ་བཟང་རྒྱ་མཚོས་མཛད་པའི་རང་རྣམ《ཟ་ཧོར་གྱི་བན་དེ་ངག་དབང་བློ་བཟང་རྒྱ་མཚོའི་འདི་སྣང་འཁྲུལ་བའི་རོལ་རྩེད་རྟོགས་བརྗོད་ཀྱི་ཚུལ་དུ་བཀོད་པ་དུ་ཀཱུ་ལའི་གོས་བཟང》ཞེས་པ་ལས་དྲངས་པ་དང་། ཁ་བྱང་སྒྲིག་པ་པོས་བསྣན་པ་ཡིན།
- བསྟིང་ཚིག ཚིག་རྩུབ་མོའམ་འཕྱ་སྨོད་ཀྱི་ཚིག
- ཨེ་ར་ཎྜ། ལེགས་སྦྱར་གྱི་སྐད་དེ། བོད་སྐད་དུ་དན་རོག་ཟེར། དེ་ནི་ཤིང་སྨན་གྱི་རིགས་དན་ད་དཀར་ནག་ཁྲ་གསུམ་གྱི་ནང་ཚན་ནག་པོ་སྟེ། རོ་ཚ་ཞིང་ཁ་ལ་མངར་བ། ཞུ་རྗེས་དྲོད། ནུས་པས་མ་ཞུ་བ་སོགས་ལྡན་འདུས་ཀྱི་ནད་རྣམས་ཐུར་དུ་བཤལ་བར་བྱེད།
- འབོད་སྒྲོག སྲིན་པོའི་མངོན་བརྗོད།
- ར་གན། ལྕགས་རིགས་སེར་པོ་ཞིག
- གཙུག་ན་ཟླ་བ། ལྷ་དབང་ཕྱུག་ཆེན་པོའི་མངོན་བརྗོད།
- པལྕ་ལི་ཀ ལྔ་ལེན་ཞེས་པའི་ཡུལ་ལམ་རས་ཤིག་གི་མིང་སྟེ། འདིར་ཁ་དོག་ལྔ་ལྡན་གྱི་རས་ལ་གོ་དགོས།
- སྲིད་སྒྲུབ། བརྒྱ་བྱིན་གྱི་བུའི་མིང་།
- གསེར་མངལ། ཚངས་པའི་མངོན་བརྗོད།
- ཐིག་ལེ་མཆོག་མ། ལྷའི་བུ་མོའི་མངོན་བརྗོད།
- དུ་ཀཱུ་ལ། རྩྭ་དུ་ཀཱུ་ལས་བྱས་པའི་གོས་ཆེན་གྱི་མིང་།
འབྲུག་མོས་ཞུ་དག་བྱས། ཡོང་ཁུངས། བོད་ཡིག་དྲ་བ།