བརྡ་ཆད་གཏན་འབེབས་ལྷན་ཚོགས་ཐེངས་ཉི་ཤུ་རྩ་གཅིག་པ་ལེགས་གྲུབ་ཟིན་པ།

༄༅། །ཕྱི་ལོ་ ༢༠༡༩ ཟླ་ ༡ ཚེས་ ༡༤ ནས་ ༡༩ བར་ཉིན་གྲངས་དྲུག་རིང་འདི་ག་ཤེས་རིག་ལས་ཁུངས་ཀྱི་ཐ་སྙད་ཚན་པའི་གོ་སྒྲིག་འོག དྷ་ས་གངས་སྐྱིད་ཤེས་རིག་བརྡ་ཆད་ཚན་པའི་ལས་ཁུངས་སུ་ཆེས་མཐོའི་བརྡ་ཆད་གཏན་འབེབས་ལྷན་ཚོགས་ཐེངས་ཉི་ཤུ་རྩ་གཅིག་པ་བསྐྱངས་ཏེ། འཛིན་སྐྱོང་གི་ཐ་སྙད་ཁོངས་ཤེས་ཡོན་དང་། ཁྲིམས་ལུགས། ཆབ་སྲིད། ཁོར་ཡུག་བཅས་དང་། དེ་བཞིན་ཚན་རིག འཕྲུལ་ཆས་སོགས་ཀྱི་ཐ་སྙད་ཁྱོན་བསྡོམས་གྲངས་ ༦༥༠ ལྷག་ཙམ་གཏན་འབེབས་གནང་ཐུབ་ཡོད་ཅིང་། རྩིས་ལོ་འདིའི་ནང་ཆེས་མཐོའི་བརྡ་ཆད་གཏན་འབེབས་ལྷན་ཚོགས་ཐེངས་གསུམ་བསྐྱངས་འབྲས་སུ། ཐ་སྙད་ཁྱོན་བསྡོམས་གྲངས་ཉིས་སྟོང་ཆིག་བརྒྱ་ཙམ་གཏན་འབེབས་གནང་ཐུབ་པ་བྱུང་ཡོད།

སྤྱིར་བོད་ཀྱི་སྐད་ཡིག་སྲུང་སྐྱོབ་དང་གོང་འཕེལ་སླད་རྒྱུན་སྤྱོད་དང་དེང་རབས་ཀྱི་རིག་ཚན་སྣ་ཚོགས་པའི་ཐ་སྙད་རྣམས་གཅིག་གྱུར་གཏན་འབེབས་དགོས་གལ་གཟིགས་ཏེ། བཀའ་ཤག་སྐབས་བཅུ་གསུམ་པའི་གཙོ་སྐྱོང་ལམ་སྟོན་འོག ཕྱི་ལོ་ ༢༠༠༦ ལོར་ཤེས་རིག་བརྡ་ཆད་ཚན་པ་འདི་བཞིན་དངོས་སུ་འགོ་འཛུགས་གནང་བ་ནས་བཟུང་ད་བར་ཨིན་བོད་ཤན་སྦྱར་གཏན་འབེབས་བརྡ་ཆད་དེབ་ཕྲེང་བཅུ་གཅིག་བར་འདོན་སྤེལ་ཐུབ་པ་བྱུང་ཡོད།

བརྡ་ཆད་དེ་དག་བོད་མིའི་སྒྲིག་འཛུགས་ཀྱི་དབུས་སའི་ལས་ཁུངས་ཡོངས་རྫོགས་དང་། སྤྱི་སྒེར་སློབ་གྲྭ་ཁག གཞུང་དང་གཞུང་འབྲེལ་མ་ཡིན་པའི་ཚོགས་སྡེ། དགོན་སྡེ་ཆོས་སྒར་དང་དཔེ་མཛོད་ཁང་། བརྒྱུད་ལམ་ཁག་སོགས་སུ་རྒྱ་གང་ཆེར་འགྲེམས་གཏོང་དང་དེབ་གཟུགས་པར་འགྲེམས་ཟིན་རིམ་བཞིན་དྲྭ་ཚིགས་ཐོག་འཇོག་མུས་ཡིན་པ་བཅས། །