སྨྱུག་གསར་འདོན་ཐེངས་བཅུ་གསུམ་པ།

རྒྱལ་ཡོངས་རྩོམ་ཡིག་འགྲན་སྡུར་གྱི་ལས་རིམ་ངོ་སྤྲོད།

༡། རྩོམ་ཡིག་འགྲན་སྡུར་གྱི་དམིགས་ཡུལ།

གཏན་ཉིན་སློབ་གྲྭ་ཁག་གི་བོད་ཡིག་ཁྲིད་སྦྱོང་ལ་སྐུལ་འདེད་དང་མཇུག་གནོན་བྱ་སླད། ཕྱི་ལོ་༡༩༩༦ ལོ་ནས་བཟུང་ཤེས་རིག་ལས་ཁུངས་ནས་ལོ་རེར་འཛིན་རིམ་དྲུག་པ་ཡན་འདབས་སུ་རྒྱལ་ཡོངས་རྩོམ་ཡིག་འགྲན་སྡུར་གྱི་ལས་རིམ་སྤེལ་མུས་ལགས་ཤིང༌། རྩོམ་ཡིག་འགྲན་སྡུར་དེ་ནི་སློབ་གྲྭ་དང་སློབ་ཕྲུག་བྱེ་བྲག་པའི་གྲུབ་འབྲས་གཟེངས་བསྟོད་གནང་རྒྱུ་ཙམ་མ་ཡིན་པར། གཏན་ཉིན་སློབ་གྲྭ་ཁག་གི་བོད་ཡིག་གནས་ཚད་ལ་གདེང་འཇོག་དང་དཔྱད་ཞིབ་ཀྱི་གཞི་རྩར་འགྱུར་ཆེད་དང༌། འབྲེལ་ཡོད་དགེ་རྒན་རྣམས་ལ་སློབ་མའི་རྩོམ་འབྲིའི་གནས་ཚད་དང་ཁ་ཕྱོགས། རྩོམ་འབྲིའི་སློབ་ཁྲིད་ལ་ལམ་སྟོན་དང་དཔྱད་ཞིབ་ཀྱི་རིན་ཐང་མཁོ་སྤྲོད། སློབ་མ་རྣམས་ལ་དུས་རྒྱུན་རྩོམ་འབྲིའི་ནུས་རྩལ་ལ་སྦྱོང་བརྡར་གྱི་དཔྱད་གཞིར་འགྱུར་བ་བཅས་ཀྱི་ཕན་ནུས་འདོན་སྤེལ་ཡོང་བའི་དམིགས་ཡུལ་བཟུང་ཡོད།

༢། རྩོམ་འགྲན་གྱི་བརྒྱུད་རིམ།

རྩོམ་ཡིག་འགྲན་སྡུར་བྱེད་སྟངས་ནི།
ཀ)     ཐོག་མར་འཛིན་རིམ་སོ་སོའི་ཁྲོད་སྔོན་འགྲོའི་རྩོམ་ཡིག་འགྲན་སྡུར་སྤེལ་ཏེ་རྩེ་ཕུད་སློབ་མ་རེ་རེ་འདེམས་དགོས།
ཁ)    ཤེས་ལས་ནས་རྩོམ་འགྲན་གྱི་དུས་ཚེས་དང༌། རྩོམ་ཡིག་གི་ཁ་བྱང་བཅས་སློབ་ཁོངས་སོ་སོར་གཏོང་རྒྱུ།
ག)    གཏན་འབེབས་དུས་ཚེས་སུ། སློབ་ཁག་སོ་སོས་འབྲེལ་ཡོད་བོད་དགེ་དང་ས་གནས་འགོ་འཛིན་ལས་ཁང་གི་འཐུས་མི། དགེ་རྒན་ཕ་མའི་འཐུས་ཚོགས་ཀྱི་འཐུས་མི་གཉིས་བཅས་ཀྱི་གཟིགས་རྟོག་འོག་འགྲན་སྡུར་སྤེལ་རྒྱུ།
ང)   འགྲན་སྡུར་དངོས་གཞི་མ་སྤེལ་གོང་གི་དུས་ཡུན་སྐར་མ་༡༥ སྔོན་དུ་ཤེས་ལས་ཀྱིས་བཏང་བའི་རྩོམ་ཡིག་ཁ་བྱང་གི་ཁ་ཕྱེ་དགོས།
ཅ)    འགྲན་སྡུར་མཇུག་གྲིལ་མ་ཐག་ཏུ་སློབ་མ་རེ་རེའི་རྩོམ་ཡིག་ཐོག་གཟིགས་རྟོག་ཚོགས་ཆུང་གི་རྟགས་ཐམ་འཁོད་དེ་ཉིན་དེ་རང་ལ་ཤེས་ལས་སུ་སྦྲག་གཏོང་བྱ་དགོས།

༣། རྩོམ་འགྲན་ལ་གདེང་ཞིབ་བྱེད་ཐབས།

ས་གནས་སློབ་ཁག་ནས་དུས་ཚེས་རྒྱས་བཅད་ནང་ཚུད་འབྱོར་བའི་ཕུལ་བྱུང་རྩོམ་ཡིག་རྣམས་ལ་གདེང་ཞིབ་བྱ་སླད། ཤེས་ལས་ནས་རྩོམ་ཡིག་གདེང་ཞིབ་ཚོགས་ཆུང་བསྐོ་འཛུགས་གནང་བ་བརྒྱུད། འཛིན་རིམ་སོ་སོའི་ཨང་རིམ་རྩེ་ཕུད་གསུམ་རེ་འདེམས་སྒྲུག་གིས་བྱ་དགའ་གནང་རྒྱུ་དང་ཆབས་ཅིག ཕུལ་བྱུང་རྩོམ་ཡིག་རྣམས་ལ་དཔྱད་མཆན་གནད་བསྡུས་རེ་དང་བཅས་སྨྱུག་གསར་ཞེས་པའི་ལོ་རེའི་དུས་དེབ་ནང་ཕྱོགས་བསྒྲིགས་ཀྱིས་གཏན་ཉིན་སློབ་གྲྭ་ཡོངས་སུ་རིན་མེད་འགྲེམས་སྤེལ་བྱེད་བཞིན་ཡོད།

རྩོམ་སྒྲིག་པའི་གཏམ།
སྡེ་ཚན་དང་པོ།  (འཛིན་གྲྭ་དྲུག་པ)
སྡེ་ཚན་གཉིས་པ།   (འཛིན་གྲྭ་བདུན་པ)
སྡེ་ཚན་གསུམ་པ།   (འཛིན་གྲྭ་བརྒྱད་པ)
སྡེ་ཚན་བཞི་པ།   (འཛིན་གྲྭ་དགུ་པ)
སྡེ་ཚན་ལྔ་པ།   (འཛིན་གྲྭ་བཅུ་པ)
སྡེ་ཚན་དྲུག་པ།   (འཛིན་གྲྭ་བཅུ་གཅིག་པ)
སྡེ་ཚན་བདུན་པ།   (འཛིན་གྲྭ་བཅུ་གཉིས་པ)

བཙན་བྱོལ་བོད་མིའི་གཏན་ཉིན་སློབ་གྲྭ་ཁག་གི་བོད་ཡིག་ཡིག་གཟུགས་འགྲན་སྡུར་ནང་བྱ་དགའ་ཐོབ་པའི་ཡིག་གཟུགས་བདམས་བཀོད།

(༢༠༠༨)

གླེང་བརྗོད།

ར་སྲོལ་ཡིག་རིས་ཀྱི་རྒྱུན་བཟང་མི་ཉམས་གོང་འཕེལ་དང༌། ད་སྲོལ་གྱི་མཛེས་རྩལ་དང་གསར་བཏོད་ལ་ཁ་ཕྱོགས་ཕྱིར། ཕྱི་ལོ་༢༠༠༧ ལོ་ནས་འདི་ག་ཤེས་རིག་ལས་ཁུངས་ནས་ལས་འགུལ་འདི་འདྲ་ཞིག་རྒྱ་བལ་འབྲུག་གསུམ་གྱི་བོད་པའི་སློབ་གྲྭ་ཁག་ཏུ་རྒྱ་ཁྱབ་ཏུ་སྤེལ་འགོ་ཚུགས་ཤིང༌། འདི་ནི་སྤེལ་ཐེངས་གཉིས་པ་དེ་ཡིན། ལས་འགུལ་འདི་དང་བསྟུན་ནས་ཡིག་གཟུགས་ཀྱི་མཛེས་རྩལ་སྐུལ་ལྕག་ཐེབས་པར་ཡིད་ཆེས་དང་རེ་བ་བཟང་པོ་བཅངས་ཡོད།
ལས་འགུལ་འདི་ཡང་སྡེ་ཚན་དྲུག་ཏུ་བགོས་ཏེ། སྡེ་ཚན་རེ་ལ་འཛིན་གྲྭ་གཉིས་རེ་དང༌། སྡེ་ཚན་རེ་རེའི་སློབ་ཕྲུག་རྣམས་ཀྱི་ཡིག་གཟུགས་རྣམས་གདེང་ཞིབ་ཚོགས་ཆུང་ལ་ཕུལ་ནས་སྡེ་ཚན་རེ་ལས་སློབ་ཕྲུག་རྩེ་ཕུད་གསུམ་དང་ལེགས་གསོལ་གྱི་བྱ་དགའ་ལྔ་བཅས་བརྒྱད་རེ་བདམས་ཡོད་ལ། རྩེ་ཕུད་རྣམས་ཀྱི་ཡིག་གཟུགས་རྣམས་འདིར་བདམས་བཀོད་བྱས་ཡོད།
ཡིག་གཟུགས་རྣམས་ཇུས་འགོད་བདེ་ཆེད་བཅད་གཏུབས་ཀྱི་ཡིག་ཕྲེང་བཟོས་ཡོད། ཡིག་གཟུགས་རྣམས་སློབ་མ་རང་ཉིད་ཀྱི་ཡིག་རིས་དངོས་ཡིན་པའི་གསལ་འདེབས་ཞུ།
མ་འོངས་པར་ལས་འགུལ་འདི་རྒྱུན་མཐུད་དེ་སྤེལ་རྒྱུ་ལགས་ན། ལས་དོན་འདི་ཚགས་ཚུད་དང་སློབ་མའི་ཡིག་གཟུགས་ཡར་རྒྱས་ཡོང་བ་ལ་དགེ་རྒན་གྱིས་འབད་བརྩོན་ལ་ཁ་བྲལ་ཐབས་མེད་སྟབས། དགེ་རྒན་རྣམ་པས་ལས་དོན་འདི་ལ་གཞོགས་འདེགས་དང་སློབ་ཕྲུག་ལ་གལ་ཆེན་དོན་ཆེན་དུ་བརྩིས་ཏེ་སྐུལ་སློང་བྱེད་རྒྱུ་རེ་བ་དང་བཅས་༢༠༡༠ ལོའི་ཟླ་༡ པོའི་ཚེས་༦ ཉིན།

ཕྱི་ལོ་༢༠༠༨ ལོའི་རྒྱལ་ཡོངས་ཡིག་གཟུགས་འགྲན་སྡུར་ནང་བྱ་དགའ་ཐོབ་པའི་ཡིག་གཟུགས།

རྩོམ་སྒྲིག་པ། དགེ་འདུན་དོན་ཡོད།
རྒྱབ་ཤོག་ཇུས་འགོད་པ། ཚེ་བརྟན།

མདུན་ཤོག