ནག་པོ་རྒྱ་གླིང།

༄༅།། གླིང་རྗེ་གེ་སར་རྒྱལ་པོའི་སྒྲུང་ལས།
ནག་པོ་རྒྱ་གླིང༌།

གླེང་བརྗོད།

༄༅། །འཛམ་གླིང་ནང་དམངས་ཁྲོད་རྩོམ་རིག་རིང་ཤོས་སུ་གྲགས་པའི་གླིང་གེ་སར་རྒྱལ་པོའི་སྒྲུང་ནི་བོད་མི་རིགས་ཀྱི་རྩོམ་རིག་ཕུལ་བྱུང་ཞིག་ཡིན་པ་མ་ཟད། འཛམ་གླིང་རྩོམ་རིག་གི་བང་མཛོད་ཁྲོད་ཀྱི་འོད་སྟོང་འཕྲོ་བའི་ནོར་བུ་ཞིག་ཀྱང་ཡིན་པས། ད་བར་སྐད་ཡིག་བཞི་བཅུ་ལྷག་གི་ནང་ཕབ་བསྒྱུར་པར་འགྲེམས་དང༌། ཕྱི་ནང་མཁས་པ་དུ་མས་ཆེད་དུ་ཞིབ་འཇུག་རྒྱུན་མཐུད་བྱེད་མུས་ལགས་ན། རང་རེའི་སློབ་ཕྲུག་རྣམས་ལ་ཕུལ་དུ་བྱུང་བའི་རྩོམ་རིག་དེ་ངོ་སྤྲོད་དང་སྦྲགས། བོད་ཀྱིསྣོད་བཅུད་དང༌། གནའ་བོའི་འཚོ་བའི་གོམས་སྲོལ། ཆོས་དང་འཇིག་རྟེན་གྱི་ལྟ་ཚུལ། ལེགས་ཉེས་བླང་དོར། མུ་ཏིག་བསྟར་ལ་བརྒྱུས་པ་ལྟ་བུའི་གཏམ་དཔེ་དང་ཁ་ཤགས་སོགས་བོད་ཀྱི་རིག་གཞུང་གི་ཞག་རྩི་འཁྱིལ་པ་འདི་རང་རེའི་གཞོན་སྐྱེས་ཚོར་ངོ་སྤྲོད་བྱ་གལ་ཤིན་ཏུ་ཆེ་བར་བརྟེན། ད་བར་འཁྲུངས་གླིང་མེ་ཏོག་ར་བ་དང༌། ཧོར་གླིང་གཡུལ་འགྱེད་སྟོད་ཆ་དང་སྨད་ཆ། རྟ་རྒྱུག་རྒྱལ་འཇོག བདུད་འདུལ་བཅས་ཕྱོགས་བསྡུས་པར་འགྲེམས་རིམ་པར་ཟིན་པ་དང༌། ད་ཐེངས་འདིར་རྒྱ་ནག་པོའི་ལེའུ་དོན་བསྡུས་པར་འགྲེམས་བྱས་པར་རང་རེའི་སྤྱི་ཚོགས་དང་ལྷག་པར་དུ་རྗེས་རབས་གཞོན་སྐྱེས་ཚང་མས་ཐུགས་སྣང་ཆེར་བསྐྱེད་ཡོང་བའི་རེ་བསྐུལ་དང་བཅས།  ཤེས་རིག་ལས་ཁུངས་ནས། བོད་རྒྱལ་ལོ་ ༢༡༣༤ ཕྱི་ལོ་ ༢༠༠༧ ཟླ་ ༣ ཚེས་ ༢ ལ།།

ནག་པོ་རྒྱ་གླིང་། (དང་པོ)
ནག་པོ་རྒྱ་གླིང་(གཉིས་པ)
གློག་རྡུལ་དེབ།

རྩོམ་སྒྲིག་འགན་འཛིན།            ཨཱ་ཙཱརྱ་ཀརྨ་སྨོན་ལམ།
ཕྱོགས་སྒྲིག་པ།                ཨཱ་ཙཱརྱ་ཀརྨ་སྨོན་ལམ།
རི་མོ་དང་རྒྱབ་ཤོག་ཇུས་འགོད་པ།        ཚེ་བརྟན།
ཞུ་དག་པ།                ཆུང་ཚེ་རིང༌།

མདུན་ཤོག

ནག་པོ་རྒྱ་གླིང། (དང་པོ)

༄༅། །དེ་ལ་གླིང་རྗེ་གེ་སར་རྒྱལ་པོས་ཕྱིའི་དགྲ་ཆེན་ཐམས་ཅད་བཏུལ་ནས་ཁམས་གསུམ་བདེ་ལ་བཀོད་དེ་སྐྱིད་ལྷ་མཁར་ནོར་བུའི་ཕོ་བྲང་དུ་སྐུ་མཚམས་དམ་པོར་བཞུགས། སྐབས་དེར་རྒྱ་ནག་རྒྱལ་པོ་ཀ་ར་གུར་མགོན་གྱིས་ཀླུ་གདོལ་བ་ནག་པོའི་སྲས་མོ་ཉི་མ་ཁྲི་སྐྱིད་ཟེར་བ་ཁབ་ཏུ་བསུས་ཤིང༌། དེ་ལ་སྲས་མོ་ཝ་ཨ་ཀུན་མཚོ་ཟེར་བ་ཞིག་འཁྲུངས། སྲས་མོ་ལོ་གསུམ་སོན་པ་ན། ལྷ་ཀླུ་གཉན་གསུམ་གྱི་ཕྱྭ་མོ་རྩིས་གསུམ་ལ་བཙུན་མོ་ཉི་མ་ཁྲི་སྐྱིད་ཚེ་ཐུང་པར་བྱས་ན་སྐྱེ་འགྲོ་ཡོངས་ལ་གནོད་བྱེད་མ་རུང་པ་ཞིག་ཡོང་བར་འདུག་པ་བབས་ཏེ། དེ་གསུམ་ཞ་ལོང་ལྐུག་གསུམ་དུ་སྤྲུལ་ནས་ཟས་སློང་ལ་ཡོང་པ་བཙུན་མོས་གཟིགས་པས། དེ་ནུབ་ནས་རྒྱལ་མོའི་ཁམས་མ་བདེ་བ་ཆགས་ཏེ་ལོ་གསུམ་བར་བསྙུན། ཅི་བྱས་ཀྱང་མ་ཕན་པར་མཐར་བཙུན་མོས་རྒྱལ་པོར། ང་ལན་གཅིག་ཤི་དགོས་ཤིང༌། ང་ཤི་རྗེས་ཕུང་པོ་དར་ཟབ་ཀྱིས་དྲིལ་ལ་རྒྱལ་པོ་ཉིད་ཀྱིས་དྲོད་མ་ཡལ་པར་མུན་ཁོང་དུ་རུམ་ལ་བཞུགས། ཉི་ཟླ་སྐར་གསུམ་གསེར་དངུལ་དུང་གསུམ་བྱོས་ལ་མཛོད་དུ་ཆུག རྒྱ་ཟོག་བོད་དང་བོད་ཟོག་རྒྱ་ལ་མ་འདྲེན། ཕྱི་མི་ནང་དང་ནང་མི་ཕྱིར་མ་གཏོང༌། རྒྱ་ཡུལ་ལ་རང་དབང་མེད་པའི་ཁྲིམས་སྡོམས། ལོ་གསུམ་གྱི་རིང་ཤ་ཁྲག་རུས་གསུམ་ཟོ་དང་སྔར་ལས་ལྷག་པ་ཞིག་ཡོང་ནས་རྒྱལ་པོ་ཁྱེད་ཀྱི་བཙུན་མོ་བྱེད་ཆོག་ཞུས་པས། རྒྱལ་པོས་ཡག་སྡུག་ཅི་ཡིན་ཐེ་ཚོམ་དུ་གྱུར་ཀྱང་བཙུན་མོའི་ཁ་ཆེམས་ལྟར་མཛད་པར་ཞལ་གྱིས་བཞེས།
སྲས་མོ་ཝ་ཨ་ཀུན་མཚོས། ངའི་མ་ཡུམ་དེ་ལེགས་པོ་ཞིག་མ་རེད་དགོངས་ཏེ་རྒྱ་ཡི་བུ་མོ་སྤུན་བདུན་ལ་མས་ཁ་ཆེམས་བྱས་ལུགས་ཞིབ་པར་བཤད་པས། དེ་ལུགས་གླིང་རྗེར་ཞུ་དགོས་པའི་གྲོས་ཐག་བཅད་དེ་གོས་ཆེན་ནག་པོའི་ངོས་ལ་གསེར་དངུལ་སྐུད་པས་ཡིག་གཟུགས་བྱས། སེང་ཆེན་རྒྱལ་པོ་མྱུར་བར་རྒྱ་ལ་ཕེབས་དགོས་པའི་ཚིག་དོན་ཚང་མ་བཀོད་ནས་ཁྲ་མོ་གླིང་ལ་རྒྱ་བྱ་ཚེ་རིང་མཚོ་མོ་གཙོ་བྱས་བྱ་སྤུན་གསུམ་ལ་བསྐུར་རོ།།
ཁྲ་མོ་གླིང་གི་སྐུ་རྗེ་སེང་ཆེན་ནོར་བུ་དགྲ་འདུལ་དེ་ཉིད་གཟིམ་བཞུགས་པའི་ཐོ་རངས་ཁར། སྤྲིན་དཀར་པོ་ལིང་ངེ་བ་ཞིག་གི་སྟེང་ནས་མ་ནེ་ནེ་གནམ་སྨིན་དཀར་མོས་ལུང་བསྟན་གྱི་གླུ་འདི་གསུངས་སོ།།
གླུ་ལུང་བསྟན་བླ་མ་མཁའ་འགྲོས་སྐྱོངས། །གླུ་སྣ་ཆོས་སྐྱོང་སྲུང་མས་དྲོངས། །གླུ་འདི་གླུ་ངོ་མ་ཤེས་ན། །མ་ནེ་ནེའི་འབངས་གླུ་ཁྲ་ཆུང་ཡིན། །མ་བབས་མི་ལ་ལེན་ལེ་མིན། །གལ་ཆེ་ནས་གེ་སར་དཔོན་ལ་ལེན། །མ་གཉིད་ཨེ་གོ་ཕ་ཡི་བུ། །གཉིད་པའི་བུ་ལ་ཡོན་ཏན་མེད། །ཁྱེད་དགུང་ལོ་བརྒྱ་ཕྱེད་ལྔ་བཅུ་ཡིན། །དགྲ་མགོ་ཡར་ཁམས་བྱང་ལ་གཏད། །བདུད་ཀླུ་བཙན་ཐོད་མདའ་སྤྲད་ནས་ཐལ། །དགྲ་སྐེད་སེར་པོ་ཧོར་ལ་གཏད། །གུར་དཀར་གཉའ་སྒ་བརྟད་ནས་ཐལ། །ད་དགྲ་མཐའ་ནག་པོ་རྒྱ་ལ་གཏོད། །རྒྱ་ནག་ཁྲིམས་སྒོ་ཕྱེ་རན་ཐལ། །བཙུན་མོ་ཉི་མ་ཁྲི་སྐྱིད་དེ། །དབུ་ནག་བོད་ཀྱི་སྲོག་བདག་ཡིན། །སྦྱིན་བསྲེག་ད་ལོ་མ་ཐུབ་ན། །ཕན་ཆད་ཐུབ་པའི་རེ་བ་མེད། །ནག་པོ་རྒྱ་ཡུལ་ས་ཆ་ནས། །ནམ་མཁའི་བྱ་ཡིག་འོང་ངེས་པས། །གླིང་གི་དཔའ་བརྟུལ་སུམ་ཅུ་ལ། །བོད་ཀྱི་ལ་སྒོ་བཅོ་བརྒྱད་སྲུངས། །ཚོ་དྲུག་འདུ་ར་བསྡུ་རྒྱུ་གྱིས། །ཞེས་ལུང་དེ་ལྟར་བསྟན་པས། གེ་སར་རྒྱལ་པོའི་དགོངས་པ་ལ་ཚོ་དྲུག་གི་འདུ་ར་ཞིག་བསྡུ་དགོས་འདུག་དགོངས་ཏེ་སེང་ལྕམ་འབྲུག་མོ་ལ་གླུ་འདི་གསུངས་སོ།།
སྐྱབས་དཀོན་མཆོག་གསུམ་ལ་གསོལ་བ་འདེབས། །ང་དང་ང་ངོ་མ་ཤེས་ན། །གླིང་རྗེ་སེང་ཆེན་རྒྱལ་པོ་ཡིན། །གླུ་འདི་གླུ་ངོ་མ་ཤེས་ན། །གེ་སར་རྒྱལ་པོའི་འགྱིང་གླུ་ཡིན། །མ་ཉལ་འབྲུག་མོ་ཡར་ལ་ལོངས། །ཁྱོད་མངགས་ལེ་མིན་ཏེ་དུས་ལ་བབས། །མགོ་ལ་གཡུ་རབ་བཅོ་བརྒྱད་ཐོགས། །ལུས་ལ་གོས་རབ་བཅོ་བརྒྱད་གྱོན། །ལྷ་ཚངས་པ་དེ་ལ་སྙན་དར་ཕུལ། །གཉེན་སྐུ་ལྷ་དེ་ལ་ཡོན་ཆབ་ཕུལ། །ཀླུ་གཙུག་ན་དེ་ལ་ལྷ་བཤོས་ཕུལ། །དཔའ་དགྲ་ལྷ་དེ་ལ་ལྷ་བསང་ཐོངས། །གཞི་བདག་རྣམས་ལ་ངོ་སོ་བསྟོད། །མདང་གསུམ་མལ་ཉལ་སྣང་བ་ལ། །མ་ནེ་ནེས་ལུང་བསྟན་འདི་འདྲ་བྱུང༌། །རྒྱ་མུ་སྟེགས་ཁྲིམས་སྒོ་འབྱེད་དགོས་ཟེར། །གླིང་དཔའ་རྟུལ་འདུ་ར་བསྡུ་དགོས་ཟེར། །ཤ་ཁྲ་མོ་གང་ཡག་ཚོ་འདྲེན་གྱིས། །ཆང་སྐྱེན་པོ་གང་ཡོད་ལ་མོ་གྱིས། །གླིང་ཚོ་དྲུག་མྱུར་དུ་བསྡུ་རྒྱུ་གྱིས། །ཞེས་གསུངས་པས་འབྲུག་མོ་ཡིད་མ་རང་ཞིང་བློ་མ་བདེ་བ་ཞིག་བྱུང་ཡང༌། མོའི་བསམ་པར་རྒྱལ་པོའི་སྨྲ་བ་ལན་གཅིག་ཡིན་པས་དཔའ་ཐུལ་གྱི་འདུ་ར་མ་བསྡུས་ན་བཀའ་བཀྱོན་ཞིག་ཡོང་འདུག་སྙམ་སྟེ། སྐྱིད་ལྷ་མཁར་གྱི་རྩེ་མོར་སོང་ནས་དར་འཕྱར། དུང་བཏང༌། ཁྲིམས་རྔ་བརྡུངས་པས། དེ་མ་ཐག་ཚོ་དྲུག་གླིང་གི་ཆེ་འབྲིང་ཆུང་གསུམ་དཔའ་བོའི་འདུ་ར་ཁྲ་མོར་གཡས་གྲལ་ཉི་མ་ཤར་འདྲ། གཡོན་གྲལ་ཟླ་བ་ཚེས་འདྲ། དཀྱིལ་གྲལ་མུ་ཏིག་བཤམ་འདྲ་བྱས་ཏེ་ཁྲ་ཆིལ་ལེར་ཚོགས། དེ་ནས་འཛམ་གླིང་སེང་ཆེན་ནོར་བུ་དགྲ་འདུལ་ཙན་དན་དམར་པོའི་ཁྲི་སྟེང་དུ་སྐུ་བཞེངས་ནས་གླུ་འདི་གསུངས་སོ།།
གླུ་ཐ་ལ་ཐ་ལ་ཨ་ལ་རེད། །སྐྱབས་བླ་མ་ཡི་དམ་མཁའ་འགྲོ་གསུམ། །བཀའ་གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །འབྲེལ་ཚད་དོན་དང་ལྡན་པར་ཤོག །གླུ་འདིའི་གླུ་ངོ་མ་ཤེས་ན། །སེང་ཆེན་ཁྲོམ་གླུ་ཟིལ་གནོན་ཡིན། །ང་དང་ང་ངོ་མ་ཤེས་ན། །ང་རང་ཇོ་རུ་རྒྱལ་པོ་ཟེར། །ཁྱོད་ཚོ་ཆེན་ལྷ་སྡེ་དཀར་པོ་ཉོན། །འབྲུག་ཟླའི་ཚེས་ཆེན་བཅོ་ལྔ་ལ། །མ་ནེ་ནེས་ང་ལ་ལུང་བསྟན་བྱུང༌། །ངེད་དགུང་ལོ་བརྒྱ་ཕྱེད་ལྔ་བཅུ་དུས། །དགྲ་མཐའ་ནག་པོ་རྒྱ་ལ་གཏོད། །རྒྱ་རྒྱལ་མྱ་ངན་མ་ཞི་ཡོད། །བཙུན་མོའི་རོ་རུལ་མ་ལང་ཡོད། །དགུང་ཉི་ཟླ་ཁྲིམས་བཅོས་བྱས་ནས་ཡོད། །རྒྱ་ནག་པོ་ཁྲིམས་ཀྱི་མུན་པ་འཁྲིགས། །རྒྱ་ནག་པོའི་ཁྲིམས་སྒོ་འབྱེད་དགོས་གསུངས། །རིང་རིང་རྐང་གཉིས་མི་ཡིག་འོང༌། །ཐུང་ཐུང་ནམ་མཁའི་བྱ་ཡིག་འོང༌། །བོད་སྒང་པའི་ལ་སྒོ་བཅོ་བརྒྱད་ལ། །སོ་བ་ཉུལ་མ་གྲབས་གཤོམ་གྱིས། །ཕོ་སུ་ཡིས་ཡི་གེ་རྙེད་ནས་ནི། །གཡོ་སྒྱུ་མགོ་སྐོར་མ་བྱེད་ལ། །ང་ཡི་ལག་ཏུ་འཕྲོད་ངེས་དགོས།།
ཞེས་གླུ་དེ་ལྟར་བླངས་པས། དེར་འདུས་ཐམས་ཅད་ཁ་རོག་གེར་བསྡད་ཙ་ན། སྤྱི་དཔོན་རྒྱལ་པོས་གེ་སར་རྒྱལ་པོ་ཐུགས་བདེན་སྙམ་ནས་ན་རེ། རྟ་རྒྱུགས་པའི་ལམ་དུ་མ་སོང་ན། །འགྱེལ་ལེ་དེ་དང་ཁྱད་པར་མེད། །མདའ་འཕང་བའི་ས་དེར་མ་སོང་ན། །ཆག་ལེ་དེ་དང་ཁྱད་པར་མེད། །ཁྱེད་ཁྲ་མོ་གླིང་གི་དཔའ་ཐུལ་རྣམས་མངགས་པའི་ལམ་དུ་འགྲོ་བ་ལེགས་གསུངས་ཏེ་འདུ་ར་རྣམས་སོ་སོར་གྱེས་སོ།།
དེ་ནས་འདན་མ་དང་ཁྲོ་ཐུང་གཉིས་རྒྱ་གླིང་བྱེ་མའི་ལ་ཁར་སོ་བ་ལ་བྱོན་ཏེ་རྒྱ་ཡུལ་དུ་སོ་བཙུགས་ནས་བཞུགས་པའི་སྐབས་སུ། རྒྱ་བྱ་གསུམ་གྱིས་ཡི་གེ་ཁུར་ནས་འོང་བ་ཁྲོ་ཐུང་གིས་མཐོང་སྟེ་ན་རེ། ཁྱོད་འདན་མ་མངགས་ལེ་མིན་ཏེ་དུས་ལ་བབས་པས་བྱ་དེ་གསུམ་ལ་མདའ་འདྲེན་གྱི་གླུ་ཞིག་མཛོད་དང་བསམ་དོན་འགྲུབ་པ་འདུག་ཟེར་ཙ་ན། འདན་མ་རྟ་ཁམ་ཆུང་གི་གོང་ལ་བཞུགས་ཤིང༌། གཞུ་དཀར་མོ་འཐེན་སྐྱིད་ལ་མདའ་གསེར་ལྟོང་མ་ཞིག་བཞག་ནས་གླུ་འདི་ལྟར་བླངས་སོ།།
གླུ་ཐ་ལ་ཐ་ལ་ཨ་ལ་རེད། །སྐྱབས་བླ་མ་ཡི་དམ་མཁའ་འགྲོ་གསུམ། །བཀའ་གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །འབྲེལ་ཚད་དོན་དང་ལྡན་པར་ཤོག །ང་འདྲ་ང་ངོ་མ་ཤེས་ན། །འདན་ཆོས་གླིང་དཀར་པོའི་བདག་པོ་ལ། །ངའི་མིང་ལ་འདན་མ་བྱང་ཁྲ་ཟེར། །རྒྱ་གླིང་གཉིས་ཀྱི་ལ་ཁ་ནས། །ཁྱོད་མཐོང་མ་མྱོང་བའི་བྱ་རིགས་གསུམ། །ད་ནངས་འོང་བ་གང་ནས་འོང༌། །དོ་ནུབ་འགྲོ་བ་གང་དུ་འགྲོ། །སེམས་རིག་པའི་གཏད་སོ་ཅི་འདྲ་ཡིན། །ཁམས་བཟང་པོའི་ལོ་རྒྱུས་ཅི་འདྲ་ཡོད། །བྱ་ཁྱེད་གསུམ་ལོ་རྒྱུས་ཅི་འདྲ་ཡིན། །དྲིས་པའི་སྐད་ཆ་དྲང་མོར་ཤོད། །དེ་མ་བྱས་འདིར་འོང་མ་ལོ་གདའ། །ངས་བྱ་སྤུ་གནམ་ལ་གཡེང་ལེ་གཅིག །བྱ་ཁྲག་ནམ་མཁར་གང་ལེ་གཉིས། །བྱ་ལུས་ཐང་ལ་ལྷུང་ལེ་གསུམ། །དེ་མ་བྱས་འདན་མ་མིན་རྟགས་གྱིས།།
ཞེས་གླུ་དེ་ལྟར་བླངས་ནས་མདའ་སྣ་བྱ་ལ་གཏད་པས། རྒྱ་བྱ་གསུམ་གྱིས་རྒྱ་ཡིག་འཕང་ནས་ཕྱིར་འཕུར་རོ། །དེར་འདན་མ་རྟ་ལས་འབབ་ཡུན་ལ་ཁྲོ་ཐུང་གིས་ཡི་གེའི་ཞུ་རྟེན་རྣམས་བྱི་ཁུང་ཞིག་ཏུ་སྦས་ཏེ། ད་ཡི་གེ་རྙེད་པས་ངེད་གཉིས་མངགས་པའི་དོན་གྲུབ་ཅིང་གེ་སར་རྒྱལ་པོའི་ཐུགས་དགོངས་ཀྱང་འགྲུབ་སོང་ཟེར་བཞིན་ཡིག་སྟོང་དེ་འདན་མའི་ལག་ཏུ་གཏད། དེར་འདན་མས། རྒྱ་བོད་གཉིས་ཀྱི་བར་ལ་གེ་སར་རྒྱལ་པོར་ཞུ་རྟེན་མེད་པའི་ཡིག་སྟོང་ཕུལ་ཨེ་ཕོད་ཟེར།
དེ་ནས་ཁོང་གཉིས་སྐྱིད་ལྷ་མཁར་ནང་དུ་ཕེབས་ནས་བློན་པོས་ཡི་གེ་རྙེད་ལུགས་ཞིབ་པར་ཞུས་ཏེ་ཡི་གེ་དེ་གེ་སར་རྒྱལ་པོར་ཕུལ་ཙ་ན། གེ་སེར་རྒྱལ་པོས། ངས་རྒྱ་ནག་པོའི་ཁྲིམས་མགོ་ནོན་ན། ཡིག་རྟེན་མེད་ཀྱང་ཕུལ་མི་ཕོད་པ་མེད་གསུངས་བཞིན་ཡི་གེ་ལ་གཟིགས་ནས་ཞལ་ངོ་ཚེས་ཆེན་བཅོ་ལྔའི་དུང་ཟླ་ཤར་བ་ལྟར་མཛད་ནས། ད་གཏམ་དོན་གཉིས་ཀ་མགོ་ཐུག་པས་ཚོ་དྲུག་གླིང་གི་འདུ་ར་ཞིག་བསྡུ་དགོས་གདའ་གསུངས་ནས་བཀའ་ཕབས་པ་ན། ག་དར་བློན་པོ་ཕྱིང་སྔོན་དེ་སྐྱིད་ལྷང་མཁར་གྱི་རྩེ་ལ་ཕེབས་ཏེ། དུང་སྐད་པོ་ཆེ་སྐོར་འབུད། ཁྲིམས་རྔ་བོ་ཆེ་སྐོར་རྡུང༌། དར་བོ་ཆེ་ནམ་མཁར་འཕྱར་ཏེ་ཚོ་དྲུག་གླིང་གི་འདུ་ར་སྐད་ཅིག་ལ་བསྡུས།
དེ་ནས་གེ་སར་རྒྱལ་པོ་དབུ་ལ་བཞུགས་པའི་འདུ་ར་ཁྲ་མོའི་དབུས་སུ། བློན་པོ་ཕྱིང་སྔོན་གྱིས་ཙནྡན་གྱི་ཁྲིམས་ལྕག་དེ་གནམ་ལ་འཕྱར་ནས་འདི་སྐད་གསུངས་སོ།། ཁྱོད་ཚོ་ཆེན་ལྷ་སྡེ་དཀར་པོ་རྣམས་ཉོན་ཅིག ད་རེས་རྒྱ་ཡིག་འདི་བཞིན་སླེབས་བྱུང་པས། ཡི་གེ་འདི་ཀློག་ཤེས་མཁན་ཡོད་ན་གནང་སྦྱིན་གྱ་ནོམ་པ་ཡོད། ཤེས་ཀྱང་མི་བཤད་པའི་མི་ལ་ཆད་པ་དགུ་ཅུ་གོ་དགུ་གཅོད། གལ་ཏེ་སྦས་གསང་བྱས་ན་གེ་སར་རྒྱལ་པོའི་ཡེ་ཤེས་ཀྱི་སྤྱན་གྱིས་མི་གཟིགས་པ་མེད་ཟེར་བ་ན། གཞན་སུས་ཀྱང་ཤེས་མཁན་མེད། ཤྭ་ཚང་གི་ཨུ་ནུ་ཁྲ་རྒོད་དེས་གའུ་ནང་ནས་དར་མི་གཅིག་དར་སྣ་ལྔ་བླངས་ཏེ་གེ་སར་རྒྱལ་པོ་ལ་ཕུལ་ནས་ན་རེ། འཛམ་གླིང་སེང་ཆེན་རྒྱལ་པོ་ལགས། ང་ལ་ཞུ་རྒྱུ་འདི་འདྲ་ཡོད། མ་ཞུས་ན་རྒྱལ་པོའི་བཀའ་དང་འགལ། ཞུས་ན་འབྲུག་མོའི་ཐུགས་ལ་ཕོག རྒྱ་ཡིག་པོ་ཏི་གསེར་མགོ་འདི། སྒྲོལ་མའི་སྤྲུལ་པ་འབྲུག་མོས་ཤེས། ཞེས་ཞུས་པས། འབྲུག་མོའི་ཞལ་ངོ་ནག་ཐིང་ངེར་སོང་ནས། ཀློག་མི་ཤེས་པ་རང་ནི་མི་འདུག་སྟེ། ཉམས་དགའ་སྤྲོ་བ་གང་ཡང་མི་འདུག་ཟེར་པས། གེ་སར་ན་རེ། ཡ། ཁྱོད་ནག་མོ་སྤྲ་མས་སྤྲ་ལབ་ལ། སྣང་སྲིད་ལྷ་འདྲེ་དགོད་ཤོར། གཏམ་དང་མདའ་མོ་དྲང་ན་དགའ། སེམས་ཅན་དོན་ལ་བསམ་ནས་དྲངས་མོར་བརྗོད། ཅེས་གསུངས། འབྲུག་མོས། རྒྱལ་པོའི་བཀའ་གྱེན་ལྡོག་བྱེད་མི་ནུས། ཚིག་དོན་ལ་སྦྱོར་སྡེབ། གཏམ་ལ་གཡོ་སྒྱུ་ཟེར་བ་ལྟར་དགོས་འདུག་བསམ་བཞིན་གྲལ་རབ་གཡོན་གྱི་མགོ་ནས་གུས་ཚུལ་གྱིས་བཞུགས་ཏེ། ཡི་གེའི་ཚིག་དོན་འདི་ལྟར་འདུག་ཟེར་ནས་གླུ་འདི་བླངས་སོ།།
གླུ་ཐ་ལ་ཐ་ལ་ཨ་ལ་རེད། །སྐྱབས་དཀོན་མཆོག་གསུམ་ལ་གསོལ་བ་འདེབས། །འབྲལ་བ་མེད་པར་བྱིན་གྱིས་རློབས། །འཛམ་གླིང་སེང་ཆེན་རྒྱལ་པོ་ལགས། །དེ་རིང་ཨ་འབྲུག་གླུ་ལ་གསོན། །གསོན་དང་འདྲ་མ་འདི་འདྲ་ཡོད། །ཞུ་ཟེར་ནས་དམ་ཆོས་མི་ཞུ་སྟེ། །དམ་ཆོས་འདྲ་བའི་ཚིག་གསུམ་ཡོད། །འགྱུར་བ་མེད་པའི་གཏམ་གསུམ་ཡོད། །བླ་མ་བཟང་པོའི་གསུང་ཆོས་དང༌། །ཕ་མ་བཟང་པོའི་ཞལ་ཏ་དང༌། །ང་ཚེ་གྲོགས་བཟང་པོའི་སྙིང་གཏམ་དང༌། །དེ་མི་འགྱུར་བ་ཡི་གཏམ་གསུམ་ཡིན། །ཁྲོ་ཐུང་གར་འགྲོ་ཡིག་འཁྱམས་རྙེད། །ཁ་ཏ་གར་འཕུར་ཨག་སྐད་ཡིན། །མི་ངན་གར་འགྲོ་གཏམ་ངན་བཤད། །ཁྲོ་ཐུང་ཁོ་ལ་ཡིད་ཆེས་མེད། །རྒྱ་ཡིག་པོ་ཏི་གསེར་མགོ་འདི། །བསྐུར་ནི་རྒྱ་མོ་རྣམས་ཀྱིས་བསྐུར། །ཁུར་ནི་རྒྱ་བྱ་སྤུན་གྱིས་ཁུར། །འཕྲོད་ནི་གེ་སར་དཔོན་ལ་འཕྲོད། །རྒྱལ་མོས་ཡི་གེའི་ཞུ་རྟེན་ལ། །དར་མི་གཅིག་དར་སྣ་བཅོ་བརྒྱད་དང༌། །མུ་ཏིག་དཀར་པོའི་ཕྲེང་བ་བདུན། །རིན་ཆེན་གསེར་དངུལ་གཡུ་བྱུ་རུ། །རིན་ཆེན་མང་པོ་བསྐུར་འདུག་པས། །ད་རེས་མེད་པ་གང་ན་ཐལ། །རྒྱལ་པོ་མྱ་ངན་བསང་ཤོག་ཟེར། །བཙུན་མོའི་རོ་རུལ་བཞུ་དགོས་ཟེར། །རྒྱ་ཡི་ཁྲིམས་སྒོ་འབྱེད་པར་ནི། །གླིང་རྗེ་སེང་ཆེན་རྒྱལ་པོ་ཁྱོད། །མྱུར་དུ་རྒྱ་ལ་བྱོན་དགོས་ཟེར། །རྫས་སྣ་མང་དུ་དགོས་པ་ནི། །ཡབ་སེང་བློན་རྒྱལ་པོའི་སྙིང་ཤ་དང༌། །འགག་བཟའ་ལྷ་མོའི་སྙིང་ཁྲག་དང༌། །ང་ཨ་འབྲུག་མོ་ཡི་མིག་འབྲས་དང༌། །ཚོ་ཆེན་གླིང་གི་མགོ་བོ་རྣམས། །ཤི་འཕོས་མི་ཆོག་གསོན་པོ་རུ། །ནག་པོ་རྒྱ་ལ་འཛོམས་དགོས་ཟེར། །ད་དུང་རྫས་སྣ་མང་དགོས་འདུག །ད་རྒྱལ་པོ་རང་མལ་བཞུགས་ན་ལེགས།།
ཞེས་དེ་སྐད་ཟེར་ཙ་ན། ཨ་ཁུ་སྤྱི་དཔོན་རྒྱལ་པོའི་ཐུགས་དགོངས་ལ། ངས་རྒྱལ་པོ་གེ་སར་འདི་ལ་ཅིག་མ་ཞུས་ན། བུད་མེད་ཀྱི་ཁར་རྒྱུགས་ནས་རྒྱ་ནག་གི་ཁྲིམས་མགོ་ནོན་རྒྱུ་མ་རེད་དགོངས་ནས་གླུ་འདི་ཞུས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །བཀའ་གསོལ་བ་སྙིང་གི་དཀྱིལ་ནས་འདེབས། །བྱིན་གྱི་རློབས་ལ་བར་ཆད་སོལ། །གླུ་འདི་གླུ་ངོ་མ་ཤེས་ན། །ང་སྤྱི་དཔོན་གྱི་དལ་བ་རིང་མོ་ཡིན། །ང་དང་ང་ངོ་མ་ཤེས་ན། །ང་སྤྱི་དཔོན་ཨ་ཁུ་ཁྲ་རྒན་ཡིན། །སྐུ་སེང་ཆེན་ནོར་བུ་དགྲ་འདུལ་ལགས། །དེ་རིང་ཨ་ཁུའི་གླུ་ལ་གསོན། །ནག་མོའི་གཏམ་ལ་བློ་གཏད་མེད། །འབྲུག་མོའི་གླུ་ལ་ཉན་མཁན་མེད། །རྒྱ་རྒྱལ་ཀ་ར་གུར་མགོན་དེ། །ཁྲིམས་གོང་བ་བཅུ་གཉིས་བདག་པོ་ཡིན། །དཔོན་དེ་འདྲས་གདན་འདྲེན་བྱུང་བས་ན། །མི་འབྱོན་ཟེར་ན་དགྲ་ལ་འགྱུར། །རྒྱ་ནག་པོའི་རྫས་སྣ་མང་པོ་འདི། །འཛོམས་པའི་ཐབས་ཤིག་ང་ཡིས་ཤེས། །ཡབ་ཡུམ་སྙིང་ཤ་སྙིང་ཁྲག་དང༌། ཨ་འབྲུག་མིག་གི་མིག་འབྲས་སོགས། །ཤི་འཕོས་མི་ཆོག་གསོན་པོ་དེ། །གླིང་རྗེ་གེ་སར་རྒྱལ་པོ་ཁྱོད། །ཡབ་སེང་བློན་ཁོག་གི་སྙིང་དང་འདྲ། །མ་འགག་བཟའི་སྙིང་ནང་ཁྲག་དང་འདྲ། །འབྲུག་མོའི་མིག་གི་འབྲས་དང་འདྲ། །ཚོ་དྲུག་ཡོངས་ཀྱི་མགོ་འདྲ་བས། །ཁྱེད་སེང་ཆེན་རྒྱ་ལ་འབྱོན་ལ་ཟེར། །དེ་མིན་རྫས་སྣ་གཞན་པ་རྣམས། །ཡུལ་ཕྱོགས་གང་སར་ཡོད་ལེ་རེད། །དེ་རྣམས་ལེན་པའི་ཐབས་ཤེས་དེ། །ཁྱེད་གེ་སར་ཐུགས་ལ་གང་དགའ་མཛོད།།
ཅེས་སྤྱི་དཔོན་རྒྱལ་པོས་གླུ་དེ་འདྲ་ཞིག་བླངས་པས། འཛམ་གླིང་གེ་སར་རྒྱལ་པོའི་ཞལ་ངོ་ཚེས་ཆེན་བཅོ་ལྔའི་དུང་ཟླ་ཤར་བ་ལྟར་སོང་ནས་སྤྲོ་བ་ཆེན་པོས་གླིང་ལྷ་སྡེ་རྣམས་ལ་གླུ་འདི་ལྟར་བླངས་སོ།།
གླུ་ཐ་ལ་ལ་མོ་ཐ་ལ་ལེན། །བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །གླིང་གི་ལྷ་སྡེ་དཀར་པོ་རྣམས། །ཚུར་ཉོན་དང་ང་ཡི་གླུ་ལ་ཉོན། །རྫས་སྣ་མང་པོ་དགོས་ལེ་འདི། །འཛོམས་པའི་ཐབས་ལ་ཅི་ཞིག་བྱ། །བློ་སྔོན་ལ་དྲན་ན་རྒོད་པོ་ཡིན། །བར་དུ་དྲན་ན་འཚམ་ཙམ་ཡིན། །རྒྱབ་ཏུ་དྲན་ན་འགྱོད་པའི་གཞི། །འགྱོད་པ་ལས་ཀྱི་ཐ་མ་ཡིན། །ཁྱེད་མོ་མ་རྣམས་ཀྱིས་མོ་ཞིག་ཐོབ། །རྩིས་པ་རྣམས་ཀྱིས་རྩིས་ཤིག་གྱིས། །མི་ཆེན་རྣམས་ཀྱིས་བློ་ཞིག་དཔྱོད། །རྫས་སྣ་གང་ནས་བཏོན་ན་དྲག །དགྲ་སྣ་གང་ལ་གཏད་ན་དགའ།།
ཞེས་གླུ་དེ་ལྟར་བླངས་པ་དང༌། སྤྱི་དཔོན་གྱི་དགོངས་པར། རྫས་སྣ་དེ་ཚོ་མི་ཉག་ཡུལ་ན་ཡོད་པ་འདྲ་སྟེ། བློན་པོ་དང་མེ་བཟའ་གཉིས་ཀྱིས་དགོངས་ཨེ་ཡོང་བསམ་སྟེ་བློན་པོའི་ངོ་ལ་ལན་གསུམ་བལྟས་ཙ་ན། བློན་པོ་ཕྱིང་སྔོན་གྱིས་དགོངས་པར། སྤྱི་དཔོན་རྒྱལ་པོས་ཤེས་ཡོད་ཀྱང་ང་ལ་སྨོས་མ་བདེ་ནས་བཞུགས་འདུག་སྙམ་སྟེ་ན་རེ། ཁྱོད་མེ་བཟའ་འབུམ་སྐྱིད་མངགས་ལེ་མིན་ཏེ་དུས་ལ་བབས། གེ་སར་རྒྱལ་པོས་རྒྱ་ཡུལ་འདུལ་བའི་ཆེད་དུ་རྫས་སྣ་འདི་རྣམས་འཛོམས་དགོས་པར་འདུག་པས། ཁྱེད་མོ་དམན་རྣམས་ཁྲིད་ནས་མི་ཉག་ཡུལ་ལ་འགྲོ་དགོས་གསུངས་ཙ་ན། མེ་བཟའ་ན་རེ། མི་ཉག་ཡུལ་ལ་འགྲོ་ཆོག་སྟེ། མི་མང་པོ་སོང་བས་མི་ལེགས། གླིང་གི་མོ་དམན་བདུན་དང་འགྲོགས་ནས་འགྲོ་ཆོག དེ་ཡང་མིའི་ལུས་སུ་མིན་པར་འདབ་ཆགས་བྱ་ཡི་ལུས་བྱས་ཏེ་ནམ་མཁའི་བྱ་ལམ་བར་མ་ནས་མི་ཉག་གཡུ་རི་རྩེ་རྒྱལ་གྱི་མགོ་ལ་འགྲོ་དགོས་ཤིང༌། དེར་བསང་དང་གླུ་གར་རྩེད་མོ་སོགས་ཅི་ཡང་མ་བྱས་ན་སྨྱུག་སྦ་མོ་ཚིགས་གསུམ་དེ་ལོན་པའི་ཐབས་ཡོད་དོ་ཟེར། དེ་ནས་མེ་བཟའ་འབུམ་སྐྱིད་གཙོས་མོ་དམན་རྣམས་བྱ་གཟུགས་སུ་བྱས་ནས་ནམ་མཁའི་བྱ་ལམ་བར་མ་བཟུང་སྟེ་སྐད་ཅིག་དེ་ཉིད་ལ་མི་ཉག་གཡུ་རི་རྩེ་རྒྱལ་ལ་སླེབས། དེར་མེ་བཟས་སྨྱུག་གི་སྦ་མོ་ཚིགས་གསུམ་དེ་རྙེད་ནས་ཁུར་ཡོང་རྩིས་བྱེད་དུས། འབྲུག་མོས་མ་ཉན་པར་བསང་དང་ལྷ་བསྭོ་བྱས་པས། མི་ཉག་གཡུ་མཁར་ལྡེམ་པའི་ནང་ནས། གཡུ་རྩེ་སྟོན་པ། གཡུ་འཕྲུ། གཡུ་འོད་སྐུ་མཆེད་གསུམ་གྱིས་མཐོང་སྟེ། གཡུ་རྩེ་སྟོན་པས་དེར་ལྟ་བར་འགྲོ་དགོས་ཟེར་བ་ན། གཡུ་འོད་ཀྱིས་ལྷ་ཀླུ་གཉན་གསུམ་གྱིས་ལྷ་བསང་བཏང་བ་ཡིན་པས་ལྟ་རུ་འགྲོ་མི་དགོས་ཟེར་ཏེ་མ་སོང༌།
དེ་ནས་བུ་མོ་རྣམས་གླིང་ཡུལ་ལ་ལོག་པའི་ལམ་བར་གངས་རི་རྔམས་ཆེན་གྱི་རྩར་སླེབས་ཙ་ན། འབྲུག་མོ་ན་རེ། འདོད་པའི་རྒྱུ་རྫས་ནི་ལོན། གེ་སར་གྱི་སྐུ་དོན་འགྲུབ་སོང༌། ད་ངེད་བུ་མོ་ཚོས་བྱ་གསོབ་ཕུད་ནས་མི་གཟུགས་བྱས་ཏེ་གླུ་གར་རྩེད་མོ་སྣ་ཚོགས་བྱེད་དགོས་ཟེར་ནས་བྲོ་གར་གླུ་སོགས་བྱས་ནས་སྡོད་ཙ་ན། མེ་བཟའ་འབུམ་སྐྱིད་ཀྱིས་བསམ་པར། ཅི་བཤད་ལ་མི་ཉན་པའི་འབྲུག་མོ་འདི་རྗེ་རྒྱལ་པོའི་བར་ཆད་ཅིག་རེད་བསམ་སྟེ། ཕ་བོང་གུར་འདྲ་བ་ཞིག་གི་རྩར་བསྡད་ཙ་ན། དེ་མ་ཐག་ཏུ་ལྕགས་ཀྱི་བུ་ཆུང་ཞིག་གིས་ཁྱུང་ཞིག་བཞོན་ནས་མེ་བཟའི་རྩར་སླེབས་ཏེ་གླུ་འདི་བླངས་སོ།།
བྱང་ཁྲི་ཤོག་མེ་བཟའ་འབུམ་སྐྱིད་མ། །དེ་རིང་ང་ཡི་གླུ་ལ་ཉོན། །ང་དང་ང་ངོ་མ་ཤེས་ན། །གངས་རི་རྔམས་ཆེན་ནང་ཤེད་ནས། །གངས་རྗེ་ཁྲི་རྗེ་རྒྱལ་པོ་ཡིན། །མི་ཉག་རྒྱལ་པོའི་ཞང་པོ་ཡིན། །ཕྱི་ལ་མི་ཉག་སྒོ་སྲུང་ཡིན། །ཁྱོད་ས་ཆ་གང་ནས་ཡོང་ལེ་ཡིན། །ཡུལ་འདིར་འོང་དོན་ཅི་འདྲ་ཡིན། །ཁྱོད་ཆག་སྒོ་ཅན་ཞིག་མ་རེད་དམ། །མི་ཉག་གངས་སྒོ་བཅོ་བརྒྱད་ཡོད། །སེང་དཀར་མོ་མ་གཏོགས་ཐར་ས་མེད། །མི་ཚེ་ཟད་སྲིན་པོའི་སྒོ་རྩར་རེད། །ས་འདི་ལ་ཡོང་ལེ་མ་ལོ་གདའ།།
ཞེས་གླུ་དེ་ལྟར་བླངས་པས། མེ་བཟའ་འབུམ་སྐྱིད་ཀྱིས་རྫུན་གྱི་ལྕེ་ལེབ་བཅོ་བརྒྱད་ཤེས་པས་གླུ་འདི་ལྟར་བླངས་སོ།།
གླུ་ཐ་ལ་ཐ་ལ་ཐ་ལ་ལེན། །ཕ་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །གླུ་འདི་གླུ་ངོ་མ་ཤེས་ན། །ང་མེ་བཟའི་ཅོ་ཀ་དྲུག་འགྱུར་ཡིན། །ང་དང་ང་ངོ་མ་ཤེས་ན། །ཕ་ལ་མེ་ལྕེ་སྟོན་པ་ཟེར། །མ་ལ་མེ་བཟའ་ཨ་སྒྲོན་ཟེར། །ང་རང་མེ་བཟའ་འབུམ་སྐྱིད་ཡིན། །ག་དར་བློན་པོ་ཕྱིང་སྔོན་གྱིས། །ཁྲི་ཤོག་མེ་བཟའ་འབུམ་སྐྱིད་ང༌། །ཤར་མི་ཉག་ཡུལ་ལ་འགྲོ་དགོས་གསུངས། །མི་ཉག་ཕ་ཤ་གླིང་ལ་ཤོར། །བློན་པོ་ཕྱིང་སྔོན་གླིང་ལ་ཤོར། །ང་མེ་བཟའི་ཚེ་རོགས་གླིང་ལ་ཤོར། །བུ་ཤི་ཕ་མ་མཉམ་སྡུག་རེད། །ཁྱོད་མི་ཉག་གཡུ་རྩེ་སྟོན་པ་དང༌། །ག་དར་བློན་པོ་ཕྱིང་སྔོན་གཉིས། །མནའ་ནག་པོ་སྦྲེལ་བའི་ཤག་པོ་བྱས། །ཕ་མ་མི་གཅིག་རྡོ་རྗེ་སྤུན། །ཕུ་ནུ་མི་གཅིག་གྲོགས་མཆེད་རེད། །ག་དར་བློན་པོ་ཕྱིང་སྔོན་གྱིས། །ཁྱེད་དགྲ་སྣ་གླིང་ལ་ཨེ་གཏད་ཟེར། །ཕ་མེས་ཤ་ལེན་ཨེ་བྱེད་ཟེར། །བྱེད་ན་ང་ལ་ཆ་ལན་བསྐུར། །བྲོ་བརྡུང་གླུ་ལེན་བྱེད་ལེ་འདི། །གཟུགས་ཡོད་བུ་མོའི་སྤྲུལ་བ་མིན། །སྨན་མོ་རྣམས་ཀྱི་བྲོ་བརྡུང་ཡིན།།
ཞེས་མེ་བཟས་གླུ་དེ་ལྟར་བླངས་པས། དེར་གངས་རྗེ་རྒྱལ་པོས་མེ་བཟའ་ལ་ཇ་འདྲེན་ཞིག་བྱེད་དགོས་འདུག་བསམ་ཞིང་ཡོད་ཙ་ན། ན་ཆུང་ཁྲོམ་ཤོག་འབྲུག་མོས་འདིས་སྟོང་གཏམ་བཤད་པར་འདུག་བསམ་ནས་ཧབ་དགོད་ཅིག་བྱས་ཏེ་གླུ་འདི་སྐད་བླངས་སོ།།
གླུ་ཨ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །ང་དང་ང་ངོ་མ་ཤེས་ན། །ང་གེ་སར་རྒྱལ་པོའི་ཇ་མ་ཡིན། །དཔའ་ཐུལ་སུམ་ཅུའི་དཔོན་མོ་ཡིན། །མོ་དམན་སུམ་ཅུའི་ཟ་དཔོན་ཡིན། །གླུ་མང་པོ་མི་ལེན་མཚམས་འཇོག་བྱེད། །རེ་རེ་མི་ལེན་ཀ་མེད་རེད། །ང་འབྲུག་མོའི་དགུ་སངས་དྲུག་འགྱུར་འདི། །མ་བབས་མི་ལ་ལེན་ལེ་མིན། །གལ་ཆེ་ནས་བུ་ཆུང་ཁྱོད་ལ་ལེན། །དམན་མེ་བཟའི་གཏམ་ལ་ཆ་བཞག་མེད། །ས་འདི་ན་བུ་མོ་གདའ་ལེ་འདི། །གླིང་གི་ཁྲ་མོ་དམན་བདུན་ཡིན། །གེ་སར་རྒྱལ་པོས་བཏང་ལེ་ཡིན། །རྒྱ་ནག་པོའི་ཡུལ་ལ་འགྲོ་མི་ཡིན། །ས་སྣ་ཆུ་སྣ་བསྡུ་མི་ཡིན། །ངས་མི་གསང་དྲང་པོའི་དྲང་བཤད་ཡིན། །ཁྱོད་གོ་ན་རྣ་བའི་བདུད་རྩི་གྱིས། །མ་གོ་གཏམ་གྱི་ཁ་མཚར་ཡིན།།
ཞེས་འབྲུག་མོས་གླུ་དེ་བླངས་པས། གངས་རྗེ་ཁྲི་རྒྱལ་གྱི་ཁྱུང་དེ་ཆིབས་ནས་མི་ཉག་གཡུ་མཁར་ལྡེམ་པའི་ནང་དེར་སོང་ནས་ན་རེ། ཁྱོད་མི་ཉག་གཡུ་རྩེ་སྟོན་པ་གསོན་དང་ཞུ་རྒྱུ་མཚར་པོ་ཡོད་ལགས། ཡུལ་འདི་ན་མེད་པའི་མགྲོན་གཅིག་འདུག གླིང་གི་བུ་མོ་སྤུན་བདུན་དེ་འབྲུག་མོས་འགོ་བྱས། མེ་བཟས་ལམ་རྒྱུས་བྱས་ཏེ་ས་སྣ་ཆུ་སྣ་བསྡུ་རུ་གེ་སར་གྱིས་བཏང་འདུག དེ་ནི་ཆར་སྣ་སེར་བས་ཁྲིད། དགྲ་སྣ་ཉེ་བས་ཁྲིད། གྱོད་སྣ་ཆུང་མས་ཁྲིད་ཟེར་བ་ལྟར་འདུག་པས་རྒྱལ་པོ་ཁྱེད་ལ་མོར་དེ་རྣམས་ཀྱི་རྩར་ཕེབས་དགོས་འདུག་ཟེར་ཙ་ན། མི་ཉག་རྒྱལ་པོ་ཁོང་ཁྲོའི་མེ་ལྕེ་འབར་བཞིན་ང་ཡི་ཕ་ཤ་དེ་གླིང་ལ་ཤོར་ཡོད་པས། ད་རེས་ནམ་ཕྱེད་ལ་ཉི་མ་ཤར། ཉིན་ཕྱེད་ལ་སྐར་མ་བཀྲ་ཟེར་ནས་གཡུ་རྩེ་སྟོན་པས་ནམ་མཁའ་ལ་སྤྲིན་གྱི་འཁོར་ལོ་དང༌། ས་གཞི་ལ་མེའི་འཁོར་ལོ་བསྐོར། མི་ལྤགས་ཀྱི་རྐྱལ་ཆེན་བཅོ་བརྒྱད་ཁུར། བྱ་གསོབ་གོ་བོ་གཤོག་རིང་ནང་ཞུགས་ཏེ། ཁྲག་གི་ཆར་བ་བབས། ནད་ཀྱི་ན་བུན་འཁྲིགས། གནམ་ས་ཆ་ལང་བརྡབ། བར་སྣང་འུར་སྒྲས་བཀང་སྟེ་སྐད་ཅིག་ཉིད་ལ་གླིང་གི་བུ་མོ་རྣམས་ཀྱི་རྩར་སླེབས་ཏེ་བུ་མོ་རྣམས་མི་ལྤགས་ཀྱི་རྐྱལ་བའི་ནང་བཙུད་ནས་གཡུ་མཁར་དུ་ཁྱེར་རོ།།
དེ་ནས་མི་ཉག་རྒྱལ་པོ་ན་རེ། ང་ཡི་ཕ་ཤ་དེ་གླིང་ལ་ཤོར་ཡོད་པས། གྱོད་དང་ཕ་བོང་རྒས་རྒྱུ་མེད། ད་རེས་གེ་སར་བཟུང་དང་ཁྱད་པར་མེད། འབྲུག་མོ་འདི་ཉེས་ཆེ་བ་ཡིན་པས་སྒལ་ཚིགས་ཞེ་དགུ་ལ་ལྕགས་འཛེར་ཞེ་དགུ་ཐོབས། སེན་མོ་བཅུ་ཡི་བར་ལ་ཟངས་ཐུར་བཅུ་རེ་རྒྱོབ། གཞན་རྣམས་ལ་སྲུང་བྱ་ནན་པོ་བྱོས། ཤ་རུས་པ་མེད་པ་དང༌། ཆང་སྦང་མ་མེད་པ། ཇ་ལོ་མ་མེད་རྣམས་བྱིན་ཟེར། དེ་ནས་མོ་དམན་རྣམས་སྡུག་བསྔལ་ཚད་མེད་པ་མྱོང་ནས་ཨ་རོ་ཨ་ནའི་ངང་ལ་བསྡད་ཡོད་ཙ་ན། མེ་བཟས་གའུའི་ནང་ནས་དར་ཞིག་བླངས་ཏེ་མི་ཉག་རྒྱལ་པོ་ལ་གླུ་འདི་ཞུས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །དེ་རིང་མེ་བཟའི་གླུ་ལ་གསོན། །ཁྱོད་ཕ་མེས་བཟང་པོའི་བུ་རྒྱུད་རེད། །གོ་བ་ཅན་གྱི་མི་གཅིག་རེད། །སྐྱེས་བུད་མེད་ཐུབ་པས་དགྲ་ཐུབ་མིན། །སྐྱེས་བུད་མེད་དགྲ་ཐུབ་བྱས་པ་ན། །སྟོད་ཀྱི་རྒྱ་གར་རྒྱལ་པོ་དང༌། །སྨད་ཀྱི་རྒྱ་ནག་རྒྱལ་པོ་དང༌། །བར་གྱི་བལ་བོའི་རྒྱལ་པོ་སོགས། །ཡུལ་ཁམས་ཀུན་གྱིས་གོ་ནས་འགྲོ། །ཕྱི་ལ་མི་ཁ་ཆེ་ནས་འོང༌། །ཕ་ཤི་བུ་དང་ཕ་བསད་བུ། །དམག་རྐུ་འོང་བ་ལ་ཐང་མེད། །ཁྲ་མོ་གླིང་དང་མི་ཉག་ཡུལ། །དེ་གཉིས་མདུན་མ་གཏམ་རྒྱུ་ཡོད། །ཉེས་པ་མེད་པའི་མོ་དམན་རྣམས། །དེ་རིང་མེ་བཟའི་ངོ་ལ་ཐོངས།།
ཞེས་ཟེར་བ་ན། མི་ཉག་རྒྱལ་པོའི་ཞལ་ངོ་གསལ་ལྷང་ངེར་སོང་སྟེ་ན་རེ། ཁྱོད་མེ་བཟའ་འབུམ་སྐྱིད་བདེན་ནོ། །དེས་ན་ཁྱོད་ཀྱིས་ཅི་བསམ། བློན་པོ་ཕྱིང་སྔོན་གྱིས་ཅི་དགོངས་ཟེར་བས། དེར་མེ་བཟའ་འབུམ་སྐྱིད་ཀྱི་བསམ་པར་ངས་བློ་ཐབས་ཤིག་མ་བྱས་ན་གླིང་གི་བྱེས་དོན་མི་འགྲུབ་པ་འདུག་བསམ་སྟེ། ན་རེ། རྒྱལ་པོ་ཆེན་པོ་ལགས། བློན་པོ་ཕྱིང་སྔོན་གྱིས་ཁྱོད་ཀྱི་ཚེ་རོགས་དང་ངའི་དཔོན་པོ་གླིང་ལ་ཤོར་བས། ཤ་ཤོར་དང་རྒྱུ་ཤོར་གྱི་ར་མདའ་ཞིག་མྱུར་དུ་དགོས་པ་ཡོད་གསུངས་པས། ཁྱོད་རྒྱལ་པོས་ཀྱང་ཐུགས་དགོངས་དེ་འདྲ་ཞིག་ཡོད་ན། བདུད་དམག་དང༌། མི་ཉག་གཉིས་དགྲ་སྡོང་བྱས་ཏེ་མྱུར་དུ་འགྲོ་ན་ལེགས་ཞུས་པས། དེར་མི་ཉག་རྒྱལ་པོས་བདུད་དམག་དང་མི་ཉག་གཉིས་དགྲ་སྡོང་བྱེད་པའི་ཐབས་ཨེ་ཡོད་ཟེར་ཙ་ན། མེ་བཟའ་ན་རེ། རྒྱལ་པོ་ཁྱེད་བྱང་གླིང་སྟག་གི་ས་ཆ་ལ་ཕེབས་དང༌། དེར་བློན་པོ་ཕྱིང་སྔོན་གྱི་བདུད་ཁྲི་སྐོར་བཅུ་གཉིས་ལ་ཁྲལ་སྡུད་པའི་སྐབས་ཡིན་པས། ཁྱེད་ཤག་བཤེས་གཉིས་ཀྱིས་བཀའ་གྲོས་ཞིབ་ཏུ་མཛད་ན་དགྲ་མི་ཐུབ་པ་ག་ལ་སྲིད། གླིང་ལ་དགྲ་ཐུབ་ན་རྒྱ་དཀར་ནག་སོགས་ཡུལ་ཁག་བཅོ་བརྒྱད་ཀྱིས་མ་ལོན་པའི་ཨ་འབྲུག་གི་སྐྲ་བདག མོ་དམན་རྣམས་ཀྱི་མགོ་དཔོན། ཚོ་ཆེན་གླིང་གི་དཔོན་པོ་འོང་བ་ཞིག་ཐག་གིས་ཆོད་ཞུས་ཙ་ན། དེར་མི་ཉག་རྒྱལ་པོས་མི་ལྤགས་རྐྱལ་ཆེན་བཅོ་བརྒྱད་ཁུར། ཤིང་གི་གོ་བོ་གཤོག་རིང་ནང་ལ་ཞུགས་ནས་དེ་མ་ཐག སྤྲིན་ཆར་གློག་གསུམ་དང༌། འབྲུག་སེར་ཐོག་གསུམ་དང་བཅས་བདུད་ཀྱི་ཡུལ་ལ་ཆས་སོ།།
དེ་ནས་མེ་བཟས་བུ་མོ་རྣམས་ཀྱི་ལུས་ལ་གཟེར་བཏབ་པ་རྣམས་བསལ། ཕུན་སུམ་ཚོགས་པའི་ཟས་དྲངས་ཏེ་བདེ་བ་ལ་བཀོད། རྒོད་ཐང་དཀར་ཀྱི་གསོབ་རྣམས་ལུས་ལ་བསྐོན་ནས་ཁྱེད་རྣམས་མྱུར་བར་བྱ་ལམ་གོང་མར་ཞུགས་ཏེ་གླིང་དཀར་སྟོད་ལ་སོང༌། གླིང་རྗེ་ལ་རྒྱུ་མཚན་ཐམས་ཅད་ཞིབ་པར་ཞུས་ཟེར་ནས་བུ་མོ་རྣམས་བཏང་ངོ༌།།
དེའི་ཚེ་གཡུ་རྩེ་སྟོན་པ་བྱང་གླིང་སྟག་གི་ས་ཆའི་ནམ་མཁའི་དབྱིངས་སུ་སླེབས། དེར་བདུད་སྡེ་ཁྲི་སྐོར་བཅུ་གཉིས་སྐར་ཚོགས་ཐང་ལ་ལྷུང་བ་ལྟར་འདུག་པས། མེ་བཟའ་འདི་གང་ཟེར་ཐམས་ཅད་བདེན་ངེས་པའི་བུ་མོ་ཞིག་ཡིན་འདུག་བསམ་སྟེ། ནམ་མཁའ་ལས་དཔག་ཚད་གཅིག་ཙམ་མར་བབས་ཏེ་གླུ་འདི་བླངས་སོ།།
ཡེ་ཡེ། ང་བཙན་གྱི་གླུ་འདི་ཡ་དང་ཡེ། །བཙན་རིགས་མིན་པ་ལེན་ལེ་མིན། །ཕོ་ང་དང་ང་ངོ་མ་ཤེས། །ཤར་མི་ཉག་གི་གཡུ་རྩེ་སྟོན་པ་ཡིན། །བྱ་ངང་པ་བྱང་ལ་འོང་ལེ་འདི། །མཚོ་མེ་ལོང་ཡིད་ཀྱི་གཏད་ས་བྱས། །དམན་མེ་བཟའ་མི་ཉག་ཡུལ་ལ་འོང༌། །ཁྱོད་ག་དར་བློན་པོའི་བསམ་འདུན་བཤད། །ང་ད་ནངས་མི་ཉག་ཡུལ་ནས་འོང༌། །དོན་ཆེན་པོ་ཞིག་གི་དོན་དུ་ཡིན། །ག་དར་བློན་པོ་ཕྱིང་སྔོན་ཁྱོད། །རི་ལ་ཡོད་ན་ཐང་ལ་བྱོན། །ཁྱིམ་ན་ཡོད་ན་སྒོ་ལ་བྱོན། །ཤག་པོའི་མནའ་ཡང་མི་ཟ་བསམ། །དོན་ཐོག་ཡོད་ན་བསུ་བར་ཤོག།
ཅེས་གླུ་དེ་བླངས་ཙ་ན། ག་དར་བློན་པོ་ཕྱིང་སྔོན་གྱི་དགོངས་པ་ལ། ཨ་ཨ་ནམ་མཁའི་སྒྲ་འདི་མི་ཉག་གཡུ་རྩེ་སྟོན་པ་ཡིན་པ་འདྲ་སྙམ་ཏེ། དབུ་ཞྭ་དང་ན་བཟའ་གསོལ། བ་སོ་དཀར་པོའི་ཕྲེང་བ་ལ་རིགས་གསུམ་མགོན་པོའི་བསྙེན་པ་བགྲང་བཞིན་ཁྲི་ཐོག་ནས་འགྱིང་འདུག་ཅིག་བྱས་ཏེ། ནམ་མཁར་གཟིགས་ནས་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །ཁྱོད་མི་ཉག་གཡུ་རྩེ་སྟོན་པ་ལགས། །དུས་དེ་རིང་ང་ཡི་གླུ་ལ་གསོན། །ང་དང་ང་ངོ་མ་ཤེས་ན། །ང་ག་དར་བློན་པོ་ཕྱིང་སྔོན་ཡིན། །དཔོན་པོ་ཀླུ་བཙན་རྒྱལ་པོ་དང༌། །ང་ག་དར་བློན་པོ་ཕྱིང་སྔོན་གཉིས། །དཔོན་གཡོག་མགོ་སྐེ་འབྲལ་མེད་ཡིན། །སྐྱིད་དུས་རྟ་ཁ་མཉམ་གཤིབ་བྱས། །སྡུག་དུས་ཁུར་པོ་མཉམ་ཁུར་ཡིན། །བདུད་ཀླུ་བཙན་ཕོ་ལོ་དགུ་ཡི་དུས། །ཕོ་ཡི་དགུ་སྐེག་དེ་དུས་བྱུང༌། །མོ་ཡི་བདུན་ཟུར་དེ་དུས་བྱུང༌། །ང་ཡི་དཔོན་པོ་ཀླུ་བཙན་དེ། །གེ་སར་རྒྱལ་པོས་བཀྲོང་ནས་ཐལ། །ཉི་མ་དེ་ཡི་ཚུན་ཆད་ནས། །དཔོན་ཀླུ་བཙན་མིན་པ་དྲན་རྒྱུ་མེད། །ཤ་ཤོར་གྱི་ར་མདའ་ཨེ་འོང་བསམ། །རྒྱུ་ཤོར་གྱི་ར་མདའ་ཨེ་འོང་བསམ། །ཤར་མི་ཉག་གཡུ་རྩེ་སྟོན་པ་ཁྱོད། །དེ་རིང་ང་ཡི་སྒར་ལ་ཕེབས། །ལྷ་ངོ་ཡག་ལ་བདེན་གཏམ་ཡོད། །ཁ་ཏ་ཡག་ལ་རྒྱུས་གཏམ་ཡོད། །ཅེས་ཟེར་ཏེ་ག་དར་བློན་པོ་ཕྱིང་སྔོན་གྱིས་མི་ཉག་གཡུ་རྩེ་སྟོན་པར་རོགས་བྱས་ཏེ་གླིང་ལ་དམག་བྱེད་པར་གྲོས་ཁ་འཆམ་ཁུལ་བྱས་སོ།།
དེའི་དུས་སུ་གླིང་གི་བུ་མོ་རྣམས་བྱ་ལམ་གོང་མ་ནས་འོང་པས་ལམ་ནོར་ཏེ་ཨ་སྟག་འཁྱིལ་བའི་ཡུལ་དུ་སླེབས། དེར་གཡུ་རྩེ་སྟོན་པས་མཐོང་སྟེ་གླིང་གི་བུ་མོ་རྣམས་འདིར་སླེབས་འདུག་སྙམ་ནས་ཁྲས་བྱེའུ་འདེད་པ་ལྟར་འོང་བའི་སྐབས་སུ། ནིས་ཆུང་མས་ཨ་སྟག་ཀླུ་མོ་ལ་སྐྱབས་རོགས་ཞུ་ཟེར་ནས་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །ས་འདི་ས་ངོ་མ་ཤེས་ན། །བྱང་ཨ་སྟག་འཁྱིལ་བའི་ས་ཆ་རེད། །མཁར་འདི་མཁར་ངོ་མ་ཤེས་ན། །སྤང་མཁར་ནག་པོ་དགུ་ཤོག་རེད། །མཁར་དེ་འདྲ་ཅན་གྱི་རྩ་བ་ན། །ཐག་རྒྱ་ལམ་འདྲ་ཞིག་འཐག་མཁན་དེ། །བྱང་ཨ་སྟག་ཀླུ་མོ་ཨེ་ཡིན་ནམ། །ཡིན་ན་ང་ཡི་གླུ་ལ་གསོན། །ང་དང་ང་ངོ་མ་ཤེས་ན། །ཨ་ཆུང་བུ་མོ་ནིས་ཆུང་ཡིན། །ངེད་གླིང་གི་ཁྲ་མོ་དམན་བདུན་འདི། །གེ་སར་རྒྱལ་པོས་བཏང་ལེ་ཡིན། །རྒྱ་ནག་པོའི་ཡི་གེ་སླེབས་ནས་བྱུང༌། །གེ་སར་རྒྱ་ལ་འབྱོན་དགོས་ཟེར། །རྒྱ་ནག་པོར་མཁོ་བའི་རྫས་སྣ་རྣམས། །ཤར་མི་ཉག་ཡུལ་ལ་ཡོད་ནས་འདུག །དེ་ཨེ་ལོན་བསམ་ནས་བཏང་བ་རེད། །མི་ཉག་ཁྲིམས་ཞབས་བཞག་ནས་བྱུང༌། །ཁྲིམས་དེ་ཡི་ཞབས་ནས་ཐར་ལེ་ཡིན། །ལམ་ནོར་ནས་བྱང་ཡུལ་སྟོད་ལ་སླེབས། །ངེད་བུ་མོ་རྣམས་ཀྱི་སྲོག་བསྐྱབ་ཞུ།།
ཞེས་གླུ་དེ་བླངས་ཙ་ན། བྱང་ཨ་སྟག་ཀླུ་མོས་ལུས་ལ་འཁོར་གསུམ་གོན། ཟངས་གཞུ་གཟི་ལིང་འབྲུག་གྲགས་ལ་ཟངས་མདའ་དམར་པོ་མེ་ལྕེ་འཕུར་ཤེས་བཞག་སྟེ། གཡུ་རྩེ་སྟོན་པ་ལ་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་རྒྱལ་བ་རྒྱ་མཚོའི་ཞབས་ལ་འདུད། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །དམན་ང་དང་ང་ངོ་མ་ཤེས་ན། །བྱང་གླིང་གཉིས་ཀྱི་ས་མཚམས་ན། སྤང་མཁར་ནག་པོ་དགུ་ཤོག་ནང༌། །ང་ཨ་སྟག་འཁྱིལ་བའི་ཀླུ་མོ་ཡིན། །ས་འདི་ས་ངོ་མ་ཤེས་ན། །ང་ཨ་སྟག་ཀླུ་མོའི་ས་ཆ་ཡིན། །དགྲ་ཇག་གཉིས་ཀྱི་འགྲིམ་ལམ་ལ། །ཚོང་མགྲོན་པོས་འགྲིམ་པ་མ་ལོ་གདའ། །ཤར་མི་ཉག་གཡུ་རྩེ་རྒྱལ་པོ་ཁྱོད། །ས་འདི་ལ་འོང་བ་མ་ལོ་གདའ། །མི་གཞན་ལ་བརྙས་བཅོས་འགྲོ་ལེ་དེ། །ང་ཨ་སྟག་ལ་མི་འགྲོ་ཐག་ཆོད་ཡིན། །ཁོང་གླིང་གི་བུ་མོ་སྤུན་བདུན་དེ། །རང་ཡུལ་གླིང་ལ་མ་བཏང་ན། །ང་ཨ་སྟག་གི་ཟངས་མདའ་འཕུར་ཤེས་ལས། །ཁྱོད་གཡུ་རྩེ་ཐར་བའི་རེ་བ་མེད།།
ཞེས་ཟེར་ནས་མདའ་ཚད་ཙམ་བྱས་པ་དང༌། གཡུ་རྩེ་སྟོན་པ་ཤིན་ཏུ་བྲེད་ནས་བྱ་འཕུར་བ་ལྟར་རང་ཡུལ་ལ་བྲོས་སོང་ངོ༌།། དེ་ནས་ཨ་སྟག་གིས་བུ་མོ་རྣམས་གླིང་གི་ས་ཐོག་བར་དུ་སྐྱེལ་མ་བྱས་ནས་བཏང་ངོ༌།།
ག་དར་བློན་པོ་ཕྱིང་སྔོན་གྱིས་མེ་བཟས་མི་ཉག་རྒྱལ་པོར་མགོ་བསྐོར་དེ་འདྲ་བྱས་འདུག་པས། ད་གླིང་རྗེ་རྒྱལ་པོའི་མདུན་ལ་འགྲོ་དགོས་འདུག་བསམ་སྟེ། ཁོང་གི་བློན་པོ་རྣམས་ལ་བཀའ་བསྒོས་ཤིང་གླིང་ཡུལ་ལ་འགྲོ་བའི་ལམ་ལ་ཆས་ཏེ་སྟག་གི་ཟླ་བའི་ཚེས་གསུམ་ལ་སྐྱིད་ལྷ་མཁར་ནང་དུ་ཕེབས། དེར་གེ་སར་རྒྱལ་པོའི་མདུན་དུ་གོང་གི་གནས་ཚུལ་རྣམས་ཞིབ་པར་ཞུས་ཤིང༌། མེ་བཟས་མི་ཉག་རྒྱལ་པོར་མགོ་སྐོར་བཏང་བའི་རྫུན་མཐའ་མ་མནན་ཐབས་མེད་པ་ཞིག་འདུག་སྙམ་སྟེ། ངས་མི་ཉག་རྒྱལ་པོར་ཤིན་ཏུ་ལེགས། ཉིན་ཉེར་གཅིག་གི་ཉིན་ངས་བདུད་དམག་ཁྲིད་ནས་མི་ཉག་ལ་ཡོང་ལབ་སྟེ་གཡུ་རྩེ་རང་ཡུལ་ལ་བཏང་བ་ཡིན། དེས་ན་ང་རང་མི་ཉག་ཡུལ་ལ་སོང་ནས། མི་ཉག་རྒྱལ་པོ་གླིང་ལ་ཁྲིད་ནས་ཡོང་ཟེར་ཙ་ན། གེ་སར་རྒྱལ་པོས། ཤར་མི་ཉག་ཡུལ་དུ་འགྲོ་བ་ལ་བྱ་བ་རྣམས་མ་འཆུག་པར་མཛོད་གསུངས་ནས་ཞལ་བཀོད་མཛད་དོ།།
དེ་ནས་བློན་པོ་ཕྱིང་སྔོན་གཡུ་རྩེའི་ཕོ་བྲང་དུ་སླེབས་ཏེ་གཡུ་རྩེ་རྒྱལ་པོ་ལ་དར་ཞིག་ཕུལ་ནས་རྒྱལ་པོ་སྐུ་མཆེད་ཁམས་བཟང་བར་བཞུགས་སམ་ཟེར་བས། གཡུ་རྩེ་སྟོན་པ་དགའ་སྤྲོ་བླ་ལྷག་ཏུ་ལྡན་པ་བྱུང་སྟེ། ད་ལན་ཉིན་བདུན་གྱི་རིང་བློན་པོ་ལ་སྟོན་མོ་རྒྱ་ཆེན་པོ་བཤམ་སྟེ་ཐུགས་དགྱེས་པར་བྱེད་དགོས་ཟེར་ནས་དགའ་སྟོན་ཕུན་སུམ་ཚོགས་པ་བཤམས། དེ་ནས་གཡུ་རྩེ་རྒྱལ་པོས། བློན་པོ་ཕྱིང་སྔོན་ལགས། གླིང་ལ་དམག་རྒྱག་པར་ཐབས་ཅི་འདྲ་ཞིག་དགོས་ཟེར་བར། བློན་པོ་ན་རེ། ལོ་ཟད་ཟླ་ཟད་ཉི་ཤུ་དགུའི་ཉིན་ཁྱེད་སྐུ་མཆེད་གསུམ་དང༌། གངས་རྗེ་ཁྲི་བཙན་བཅས་ངེད་རང་དཔོན་སློབ་ལྔ་ཆས་ན་ཤིན་ཏུ་ལེགས་ཟེར་བ་དང༌། གཡུ་འོད་སྟོན་པ་ན་རེ། གེ་སར་རྒྱལ་པོ་འདི་གོང་མ་ལྷ་ཡི་སྲས་པོ་ཡིན། དབུ་ནག་བོད་ཀྱི་མགོན་སྐྱབས་ཡིན། རྒྱ་བོད་གཉིས་ཀྱི་མགོ་འཛིན་ཡིན་པས་དེ་ལ་འགྲན་ཡ་ཚད་ཡ་བྱེད་མི་ཉན། རྒྱལ་པོ་རང་མལ་བཞུགས་ན་ལེགས། ངས་ནི་གེ་སར་ལ་སྐྱབས་འཚོལ་བ་ལས་ཚད་འཛུག་མི་ནུས་པས་གླིང་ལ་མི་འགྲོ་ཟེར། དེའི་མཚན་ལ་གཡུ་རྩེ་སྟོན་པ་རྨི་ལམ་འཁྲུགས་ཏེ་ཞོགས་པར་བློ་མ་བདེ་བར་ཡོད་ཙ་ན། མེ་བཟས། རྒྱལ་པོ་ལགས། ད་ནངས་སྔོན་དུས་དང་མི་འདྲ་གདའ་བས་ཐུགས་ལ་ཅི་མངའ་ཞུས་པས། རྒྱལ་པོས། མདང་ནུབ་ཉལ་བའི་རྨི་ལམ་ལ། །མི་ཉག་གི་གངས་རི་རྔམས་ཆེན་དེ། །ཁྲི་གདུགས་ཉི་མས་ཞུས་པ་རྨིས། །མི་ཉག་གི་རྫ་རི་སྨུག་པོ་དེ། །གནམ་ལྕགས་ཐོག་གིས་གཏོར་བ་རྨིས། །རྨི་ལམ་མ་བཟང་རྨི་ལམ་ངན། །ཁོང་གཡུ་འོད་གསུངས་དང་ཁྱད་པར་མེད། །ད་དགྲ་ལས་རང་མལ་བསྡད་ན་དགའ། །ཁ་མཆུ་མེད་ན་རྒོད་པོ་ཡིན། །བུ་ལོན་མེད་ན་ཕྱུག་པོ་ཡིན། །ཟེར་ཙ་ན། མེ་བཟས་དར་སྣ་དགུ་རྒྱལ་པོ་ལ་ཕུལ་ནས་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །གླུ་འདི་གླུ་ངོ་མ་ཤེས་ན། །ང་མེ་བཟའི་སྐྱོ་དགའ་དྲུག་འགྱུར་ཡིན། །ང་དང་ང་ངོ་མ་ཤེས་ན། །ཁྲི་ཤོག་མེ་བཟའ་འབུམ་སྐྱིད་ཡིན། །ཚེ་སྟོད་ཀླུ་བཙན་ཇ་མ་བྱས། །དཔོན་ཀླུ་བཙན་མ་དབང་གླིང་ལ་ཤོར། །ཚེ་སྐེད་གླིང་དཀར་སྟོད་ལ་འཁྱར། །ཚེ་སྨད་མི་ནག་ཡུལ་ལ་འཁྱར། །དུས་ད་རུང་གར་འཁྱར་མི་ཤེས་གདའ། །མི་ཉག་གཡུ་རྩེ་སྟོན་པ་ལགས། །དེ་རིང་ང་ཡི་གླུ་ལ་གསོན། །ཁྱེད་མདང་གསུམ་རྨི་ལམ་བྱུང་ལེ་དེ། །རྨི་ལམ་མ་རེད་མངོན་ཤེས་རེད། །རྟགས་དང་རྟེན་འབྲེལ་འགྲིག་པ་རེད། །ལས་དང་སྨོན་ལམ་འཛོམས་པ་རེད། །དགྲ་ལ་ཕྱི་བཤོལ་མ་བྱེད་པར། །ཁྱེད་རྒྱལ་བློན་སྔོན་མའི་བཀའ་གྲོས་དེ། །མ་བཞུགས་ལ་མོར་འབྱོན་རྒྱུ་མཛོད།།
ཅེས་གླུ་དེ་ལྟར་བླངས་པ་དང༌། གཡུ་རྩེ་རྒྱལ་པོས། བློན་པོའི་གསུང་དང་མེ་བཟའི་གླུ་ལ་འཁྲུལ་བ་མེད། ཁྲ་མོ་གླིང་ལ་ཉི་མ་དང་ཆུ་ཚོད་མ་ནོར་པ་བྱེད་ནས་འགྲོ་བ་གལ་ཆེ་ཟེར་ནས་གླིང་ལ་འགྲོ་རྒྱུར་ཐག་བཅད་དོ།།
སྐབས་དེར་སྐྱིད་ལྷ་མཁར་གྱི་གཟིམ་ཆུང་བཀྲ་ཤིས་གཡང་འཁྱིལ་ནང་སྐྱེས་མཆོག་ནོར་བུ་དགྲ་འདུལ་ཁོང་གཟིམ་ཡོད་པའི་སྐབས་སུ། སྤྲིན་དཀར་པོ་ལིང་ངེ་བ་ཞིག་གི་སྟེང་ནས་མ་ནེ་ནེ་རྣམ་སྨིན་དཀར་མོས་ལུང་བསྟན་གྱི་གླུ་འདི་གསུངས་སོ།།
གླུ་སྣ་བླ་མ་བཟང་པོས་སྐྱོངས། །གླུ་འདིའི་གླུ་ངོ་མ་ཤེས་ན། །མ་ནེ་ནེའི་འབང་གླུ་ཁྲ་ཆུང་ཡིན། །དེ་རིང་ང་ཡི་གླུ་ལ་གསོན། །ཁྱོད་མ་གཟིམ་ལ་མོར་ཡར་ལ་ལོངས། །གཉིད་པའི་བུ་ལ་ཡོན་ཏན་མེད། །རྨ་དེ་ཡག་སྟག་ཐང་ཁྲ་མོ་ལ། །ཚོ་ཆེན་གླིང་གི་འདུ་ར་སྡུས། །ལྷ་གུར་མཐོང་བ་དོན་ལྡན་ཕུབ། །སྐུ་ཡི་སྤྲུལ་བ་གུར་ནང་བཞུགས། །ཐུགས་མ་གཡེང་ནམ་མཁའི་དབྱིངས་ལ་གཟིགས། །ཉི་མ་ཉིན་ཕྱེད་སོང་ཙ་ན། །མི་ཉག་གླིང་ལ་འོང་ལེ་ཡོད། །བློན་པོ་ཕྱིང་སྔོན་ཡོད་པའི་ཐད། །ལྷ་དར་དཀར་པོ་བཙུགས་ནས་ཡོད། །གཡུ་རྩེ་སྟོན་པ་ཡོད་པའི་ཐད། །ལྷ་དར་དམར་པོ་བཙུགས་ནས་ཡོད། །གཡུ་འཕྲུ་སྟོན་པ་ཡོད་པའི་ཐད། །ལྷ་དར་སེར་པོ་བཙུག་ནས་ཡོད། །གངས་རྗེ་ཁྲི་བཙན་ཡོད་པའི་ཐད། །ལྷ་དར་ནག་པོ་བཙུགས་ནས་ཡོད། །མི་དང་རང་གཉིས་མ་ནོར་དགོས། །མི་ཉག་རྒྱལ་པོ་ཆམ་ལ་ཕོབས། །གཡུ་འོད་སྟོན་པ་བསྐྱུར་ལ་ཞོག །མེ་བཟའ་གླིང་ལ་ཁྲིད་ནས་ཤོག །རྒྱ་ལ་མཁོ་བའི་རྫས་རྣམས་ལོངས། །མི་ཉག་ཡུལ་ཁམས་ཆོས་ལ་བཀོད།།
ཟེར་ནས་ལུང་བསྟན་གྱི་གླུ་དེ་བླངས་པ་དང༌། གེ་སར་གྱིས་འདན་མ་བྱང་ཁྲ་ལ། ཁྱོད་མངགས་ལེ་མིན་ཏེ་དུས་ལ་བབས། གླིང་ཚོ་དྲུག་གི་འདུ་ར་ལ་མོར་སྡུས་གསུངས་ཏེ་གླིང་གི་འདུ་ར་བསྡུས། སྟག་ཐང་ཁྲ་མོར་ལྷ་གུར་མཐོང་བ་དོན་ལྡན་ཕུབ་ཅིང༌། གེ་སར་རྒྱལ་པོ་གསེར་ཁྲིའི་སྟེང་བཞུགས་ཏེ་མ་ནེ་ནེའི་ལུང་ལྟར་མཛད་དོ།།
དེ་ནས་གཡུ་འོད་སྟོན་པ་མི་ཉག་རང་ཡུལ་དུ་བསྡད། གཡུ་རྩེ་དང༌། གཡུ་འཕྲུ། གངས་རྗེ་ཁྲི་བཙན། བློན་པོ་ཕྱིང་སྔོན་རྣམས་ཤིང་བྱ་གོ་བོའི་གསོབ་ནང་ཞུགས་ཏེ་ཐོག་སེར་གློག་འཁྱུག་ན་བུན་དང་བཅས་གླིང་གི་ཡུལ་དུ་འོངས། དེ་ནས་གླིང་གི་སར་སླེབས་སྐབས་གཡུ་རྩེ་སྟོན་པས་ཐོག་རྔམ་པོ་ཆེ། མགོ་བོ་རྡོ་རྗེ་ཕ་ལམ་འདྲ་བ། སྨད་ལ་ཚ་ཚ་དམར་པོ་ཕྲོམ་ཕྲོམ་འཕྲོ་བ་ཞིག་ནམ་མཁའི་དབྱིངས་སུ་བཟུང་སྟེ་གླུ་འདི་བླངས་སོ།།
ཡེ་གཅིག་ཡེ་གཉིས་ཡེ་དང་གསུམ། །ཡ་དང་ཡེ་འདི་བཙན་གྱི་གླུ། །བཙན་རིགས་མིན་པ་ལེན་ལེ་མིན། །ང་དང་ང་ངོ་མ་ཤེས་ན། །ཤར་མི་ཉག་ཡུལ་ནས་ཡོང་ལེ་ཡིན། །ངའི་མིང་ལ་གཡུ་རྩེ་སྟོན་པ་ཟེར། །ཁར་ཉིན་ཉི་མའི་དང་པོ་ལ། །གླིང་ནས་བུ་མོ་སྤུན་བདུན་བྱུང༌། །སྨྱུག་གི་སྦ་མོ་ཚིགས་གསུམ་དེ། །དོན་མེད་གླིང་གིས་ཅི་ལ་ཁུར། །ང་ཤ་ཤོར་གྱི་ར་མདའ་འོང་ལེ་ཡིན། །རྒྱུགས་ཤག་ཤག་རྟ་ཕོ་བྱང་མ་ཡིན། །འཐབ་ཤག་ཤག་དགྲ་བོ་ངོ་ནག་ཡིན། །ཁྱོད་ཁྲ་མོ་གླིང་གི་ཧམ་པ་ལ། །དོན་མེད་ཀྱི་སྙད་འདོགས་ཅི་ལ་བྱེད། །ཉེས་མེད་ཀྱི་ཆད་པ་ཅི་ལ་བཅད། །བདེན་པ་གཡུ་རྩེ་ང་ལ་ཡོད། །ལན་པ་ཁྲ་མོ་གླིང་ལ་ཡོད། །ངའི་ལག་གི་ཐོག་རྒོད་འབར་བ་འདིས། །རི་རབ་ཡིན་ཡང་རྩེ་ནས་བཤིག །རྒྱ་མཚོ་ཡིན་ཡང་གཏིང་ནས་དཀྲུགས། །སྡེ་གླིང་རུ་སྐར་ཚོགས་ཤར་འདྲ་འདིར། །རི་ལ་ཆགས་འཇིག་གཏོང་རྒྱུ་ཡིན། །ས་ལ་སྟེང་འོག་བསྒྱུར་རྒྱུ་ཡིན། །ལས་དེ་འདྲ་བ་ཞིག་མ་བྱས་ན། །ང་མི་ཉག་སྐྱེས་དང་མ་སྐྱེས་མེད།།
ཅེས་ཟེར་བ་དང༌། བློན་པོ་ཕྱིང་སྔོན་གྱིས། དོན་མེད་པའི་མི་ཤ་དགོས་དོན་མེད། ཁྱོད་ཀྱི་འདོད་པའི་རྒྱུ། དགའ་བའི་ཟས། སྤྲིན་དཀར་ཐོད་ལ་བཟུང༌། ས་ནག་པོ་འདོམ་ལ་འཇལ་ཏེ་འོང་བའི་དོན་དེ་གེ་སར་རྒྱལ་པོ་ཡིན་པས། ཁོང་མ་གིའི་གུར་དཀར་པོ་དེའི་ནང་ལ་ཡོད་འདུག དེ་ལ་རྒྱོབས་དང་ལས་དོན་འགྲུབ་པ་ཡིན་ཟེར་བས་དེར་ཐོག་བརྒྱབ་པས་ལྷ་གུར་མཐོང་བ་དོན་ལྡན་ལ་རླུང་ཕོག་པ་ཙམ་ཡང་མ་གནོད་པར་སྔར་ལྟར་བཀྲ་ལམ་མེར་གནས།
དེ་ནས་ཚ་ཞང་འདན་མ་བྱང་ཁྲ་དེ་འཁོར་གསུམ་སྐུ་ལ་གསོལ་ནས་སྐྱིད་ལྷ་མཁར་གྱི་རྩེ་མོ་ནས། གཞུ་ཆུང་དཀར་མོ་འཐེན་སྐྱིད་ལ་མདའ་གསེར་ལྟོང་མ་ཞིག་བཞག་ནས་མི་ཉག་རྒྱལ་པོ་ལ་གླུ་འདི་བླངས་སོ།།
གླུ་ཐ་ལ་ཐ་ལ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །ང་དང་ང་ངོ་མ་ཤེས་ན། །ཚ་ཞང་འདན་མ་བྱང་ཁྲ་ཡིན། །ཁྱོད་ས་འདིར་འོང་བ་མ་ལོ་གདའ། །སྲོག་ལ་མཐོ་འཇལ་བྱེད་མི་རེད། །ཚེ་ལ་ཉོ་ཚོང་བྱེད་མི་རེད། །གཞུ་མོ་དཀར་མོ་འཐེན་སྐྱིད་ནང༌། །མདའ་གསེར་ལྟོང་མ་ཞིག་བཞག་ལེ་འདི། །དུས་དེ་རིང་ཁྱོད་ཀྱི་སྟེང་ལ་འཕེན། །མདའ་གཅིག་འཕེན་འབེན་ལ་མ་ཕོག་ན། །གཉིས་འཕེན་མཐེབ་མོ་ཚ་རོགས་རེད། །གཞན་སུ་ལ་མེད་པའི་ཤིང་བྱ་དེ། །ལྕགས་ལྷུ་དགུ་གནམ་ལ་གཏོར་རྒྱུ་ཡིན། །དེ་མ་བྱས་འདན་མ་མིན་པའི་རྟགས།།
ཞེས་ཟེར་ནས་མདའ་འཕང་པ་དང༌། ཤིང་བྱའི་ལྷུ་དགུ་གཏོར་ཏེ་གཡུ་འཕྲུ་སྟོན་པ་བཏུལ་ནས་ཤིང་བྱ་དེ་བར་སྣང་ནས་དཔག་ཚད་ཙམ་མར་བབས་བྱུང་ཙ་ན། གེ་སར་གསུང་གི་སྤྲུལ་པ་ཇོ་རུ་རྒྱལ་པོས་འུར་རྡོ་ཁྲ་རིང་མའི་སྟེང་ལ་རྡོ་ཨ་དཀར་ལུག་གྲོད་ཙམ་ཞིག་བཞག་ནས་མི་ཉག་རྒྱལ་པོ་ལ་གླུ་འདི་ལྟར་བླང་བར་གདའ་འོ།།
གླུ་ཐ་ལ་ཐ་ལ་ཐ་ལ་ལེན། །སྐབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །ང་དང་ང་ངོ་མ་ཤེས་ན། །ངའི་མིང་ལ་མིང་ཆེན་ཇོ་རུ་ཡིན། །གླུ་འདི་གླུ་ངོ་མ་ཤེས་ན། །ང་ཇོ་རུའི་དཔའ་གླུ་ཐུང་ཐུང་ཡིན། །མི་ཉག་གཡུ་རྩེ་སྟོན་པ་ཁྱོད། །དུས་དེ་རིང་ཉི་མའི་གདོང་གང་ལ། །ཕོ་ཁྱོད་དང་ང་གཉིས་འདྲ་ས་མེད། །ཨ་མའི་བུ་རུ་འདྲ་ན་ཡང༌། །ཚེ་བསོད་དབང་ཐང་འདྲ་ལེ་མིན། །མི་ཉག་གཡུ་རྩེ་སྟོན་པ་ཁྱོད། །མ་མཐོང་རྒྱང་གྲགས་ཆེ་ན་ཡང༌། །འགྲམ་བཅར་ན་ཁ་ཕོ་ཆེ་ལེ་ཙམ། །ངའི་འུར་རྡོ་ཁྲ་མོའི་འུར་ལྡེབས་ལ། །རྡོ་ལུག་གྲོད་ཙམ་ཞིག་བཞག་པ་འདི། །འཕེན་ནི་གཡུ་རྩེའི་སྟེང་ལ་འཕེན། །གསོད་པ་ཁྲི་བཙན་རྒྱལ་པོ་གསོད། །ཤིང་བྱ་ཐང་ལ་འཕེན་རྒྱུ་ཡིན། །ལྷུ་དགུ་ས་ལ་གཏོར་རྒྱུ་ཡིན། །ད་མ་བྲོས་ཨེ་གོ་ཕ་ཡི་བུ། །ཁྱོད་བྲོས་ཀྱང་ཐར་ས་ག་ལ་ཡོད།།
ཅེས་གསུངས་ནས་འུར་རྡོ་ཁྲ་རིང་མ་དེ་ཁྲོབ་སྒྲ་དང་བཅས་བརྒྱབ་པ་དང༌། ཤིང་བྱའི་ལྷུ་དགུ་དུམ་བུ་དགུར་བཏང་སྟེ་ས་ལ་ལྷུང༌། ཁྲི་བཙན་དང་གཡུ་འཕྲུ་སྟོན་པ་གཉིས་བཏུལ། དེ་ནས་གཡུ་རྩེ་སྟོན་པ་དེ་ངོ་སྟོད་ལ་ཁྲག་གི་ཆར་བབས། ངོ་སྨད་ལ་ནད་ཀྱི་ན་བུན་འཁྲིགས། མཆེ་བ་གངས་རི་ལྟར་གཙིགས་ནས་ལང་སྡོད་ཙ་ན། གེ་སར་སྐུའི་སྤྲུལ་བས་རྡོ་རྗེའི་གོ་ཁྲབ་སྐུ་ལ་གསོལ། ཞལ་ངོ་རྫ་རི་ནག་པོ་ལ་ཆར་སྤྲིན་འཁྲིགས་པ་ལྟར་བྱས་ནས་གཡུ་རྩེ་སྟོན་པ་ཁྲས་བྱིའུ་བཟུང་བ་ལྟར་མཛད་ནས་གསུངས་པ། ཤར་མི་ཉག་གཡུ་རྩེ་རྒྱལ་པོ་ཁྱོད་ངའི་ཡུལ་འདིར་ཅི་བྱེད་པར་ཡོང་བ་ཡིན། ངའི་གླིང་གི་མོ་དམན་རྣམས་ཉེས་པ་ཅི་ཡང་མེད་པར་ཆད་པ་བཅད། བཙོན་ལ་བཟུང༌། མེ་བཟའ་ཁྱོད་ཀྱི་ཡུལ་ལ་བཞག ད་ཁྱེད་ཀྱིས་ང་གསོད་པའི་བཤན་པར་མ་བསམ་འདྲེན་པའི་བླ་མར་སྒོམས་གསུངས་ཙ་ན། གཡུ་རྩེ་སྟོན་པས། འཛམ་གླིང་སེང་ཆེན་རྒྱལ་པོ་ལགས། བདག་གིས་བླ་མ་སངས་རྒྱས་ཡིན་པ་ངོ་མ་ཤེས། གདམ་ངག་བདུད་རྩི་ཡིན་པའི་དོན་མ་གོ་བས། མ་ཤེས་མ་དག་ཅི་བྱུང་གེ་སར་མདུན་ལ་བཤགས་པར་ཞུ། ངན་སོང་དུ་མ་བཏང་བར་ལམ་སྣ་དག་པའི་ཞིང་དུ་འདྲེན་པར་ཞུ་ལགས། ཞེས་ཞུས་ཙ་ན། གེ་སར་གྱིས། ཁྱོད་སྡིག་ལ་མི་དགའ་ཆོས་ལ་དགའ་ན་ཤིན་ཏུ་ལེགས་པ་ཡིན་གསུངས་ཏེ་གཡུ་རྩེ་སྟོན་པའི་རྣམ་ཤེས་སངས་རྒྱས་དོན་ཡོད་གྲུབ་པའི་ཞིང་དུ་སྤར་རོ།།
དེ་ནས་ཚེས་བཅོ་ལྔའི་ནངས་པར་སྐྱིད་ལྷ་མཁར་ལ་ཉི་རྩེ་ཕོག་པ་དང་རྒྱལ་བློན་རྣམས་བློན་པོ་ཕྱིང་སྔོན་གྱི་ལམ་རྒྱུས་བྱས་ཏེ་མི་ཉག་ཡུལ་དུ་ཆས་པས། མི་ཉག་གངས་རི་རྩེ་བརྒྱད་ལ་སླེབས་ཏེ་གངས་རི་རྔམས་ཆེན་ལ་ཐུག་པ་དང༌། ལྷ་རྟ་འདོ་བ་རྐྱང་རྒོད་འཕུར་ཤེས་ཀྱིས་གངས་སྒོ་ཕྱེ་དགོས་པའི་གླུ་འདི་བླངས་སོ།།
སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །བྱིན་རླབས་ཐུགས་རྗེའི་ཀློང་ནས་སྩོལ། །འབྲལ་བ་མེད་པར་བྱིན་གྱིས་རློབས། །ཧ་ཧ་ཟེར་བ་མི་སྐད་ཡིན། །ཧུ་ཧུ་ཟེར་བ་རྟ་སྐད་ཡིན། །ས་འདི་ས་ངོ་མ་ཤེས་ན། །ཤར་མི་ཉག་གངས་རི་རྩེ་བརྒྱད་རེད། །རྟ་ང་དང་ང་ངོ་མ་ཤེས་ན། །འདོ་བ་རྐྱང་རྒོད་འཕེལ་བ་ཡིན། །དེ་རིང་ལྷ་ཞིག་འབོད་ལེ་འདི། །བརྒྱ་རྩ་བརྒྱད་མཆོད་རྟེན་རབ་གནས་ནས། །སྟོང་རྩ་གཉིས་ཚ་ཚའི་འབུམ་ཁང་ནས། །ཨོ་རྒྱན་གྱི་ཚོགས་ར་གོང་མ་ནས། །ལྷ་ཆོས་སྐུ་ལོངས་སྐུ་སྤྲུལ་སྐུ་གསུམ། །ཤར་མི་ཉག་གངས་སྒོ་ཕྱེ་རོགས་གྱིས། །ང་རྐྱང་ངེའི་ལམ་སྣ་འདྲེན་རོགས་མཛོད།།
ཅེས་གསུངས་ནས་འདོ་བ་རྐྱང་རྒོད་འཕེལ་བ་དེ་ལུང་ཆེན་ལ་གོམ་ཆེན། ལུང་ཆུང་ལ་གོམ་ཆུང༌། ལ་ལ་ཐང་དཀར་ལྡིང་འདྲ། །ཐུར་ལ་རྦབ་རྡོ་སྒྲིལ་བ་ལྟར་སོང་སྟེ་མི་ཉག་ཡུལ་དུ་སླེབས་པ་དང༌། མེ་བཟའ་དང་གཡུ་འོད་སྟོན་པ་གཉིས་ཀྱིས་གཡུ་མཁར་ནང་གདན་དྲངས་ཏེ། གཡུ་འོད་སྟོན་པས་དར་སྣ་ལྔ་ཕུལ་ནས་ཞུས་པ། འཛམ་གླིང་གེ་སར་རྒྱལ་པོ་ལགས། ཁྱེད་རིང་རིང་རྣ་བས་གོ་བ་ལས། ཐུང་ཐུང་མིག་གིས་མཇལ་མྱོང་མེད། དུས་དེ་རིང་མཇལ་བ་ངོ་མཚར་ཆེ། མ་རིག་མ་ཤེས་གང་བྱུང་བ། །དེ་རིང་ཁྱོད་ཀྱི་མདུན་ལ་བཤགས། །དེ་རིང་ནས་བཟུང་ངའི་མཁར་འབངས་ཀུན་གྱི་བདག་པོ་ཁྱོད་ཀྱིས་མཛད་པར་ཞུ་ཟེར་རོ།།
དེ་ནས་གླིང་རྗེ་གེ་སར་རྒྱལ་པོ་སྐྱིད་ལྷ་མཁར་ནོར་བུའི་ནང་དུ་གཟིམ་ནས་བཞུགས་པ་ན། ནམ་ཕྱེད་ཙམ་ལ་སྤྲིན་དང་འཇའ་འོད་སྣ་ཚོགས་ཀྱི་གུར་ནང་ནས་མ་ནེ་ནེ་རྣམ་སྨིན་དཀར་མོས་སེང་གེ་དཀར་མོ་ཞིག་ཆིབས་ཏེ། ལུང་བསྟན་གྱི་གླུ་འདི་གསུངས་སོ།།
གླུ་ལུང་བསྟན་བླ་མ་བཟང་པོས་སྐྱོངས། །ལྷ་མཁར་ལྡེམ་པའི་ནང་ཤེད་ནས། །གསེར་ཁྲི་གསེར་པོའི་གདན་སྟེང་གི །འཛམ་གླིང་གེ་སར་རྒྱལ་པོ་ཁྱོད། །རྒྱ་ཡི་ཡུལ་དུ་འགྲོ་བའི་རྫས། །བྱ་ཤང་པ་ལོན་པའི་གདམས་པ་ལ། །རྨ་ལུང་ཡིད་གྱི་དཀྱིལ་འཁོར་ན། །དགོ་ཨ་རྒོད་དཔུང་པའི་གཡུ་རྭ་དེའི། །ཕྱི་ལྤགས་ནག་པོ་རྒྱ་ལ་མཁོ། །ཉི་མ་སང་ཉིན་དུས་དེ་ལ། །གེ་སར་ལྷ་མཁར་རྩེ་མོར་བཞུགས། །ཉེས་པ་མེད་པའི་སེམས་ཅན་དེ། །ངན་སོང་མ་གཏོང་ཐུགས་རྗེས་བཟུང༌། །ཚ་ཞང་འདན་མ་བྱང་ཁྲ་དང༌། །ན་ཆུང་ཁྲོམ་ཤོག་འབྲུག་མོ་གཉིས། །རྨ་ལུང་ཡིད་ཀྱི་དཀྱིལ་དུ་སོང༌། །དགོ་ཨ་རྒོད་སོད་ལ་དགོ་ལྤགས་ཤུས། །མུ་ཏིག་ཞགས་པས་རྙི་ཐག་ཚུགས། །དགོ་རོའི་རྩ་ལ་འདན་མས་སྒུགས། །རི་རབ་རི་ཡི་ཁོང་སེང་ན། །བྱ་ཤང་པ་ཤང་མ་དེ་ན་ཡོད། །འབྲུག་མོ་བྱ་ཡི་སྤྲུལ་བ་གྱིས། །ཡུལ་དེ་ལ་ཉུལ་མ་བྱེད་དུ་སོང༌། །བྱ་ཤང་པས་ཅི་ཟེར་ཉོན་ལ་ཤོག །
ཅེས་ལུང་བསྟན་དེ་ལྟར་གནང་ངོ༌།། དེ་ནས་གེ་སར་རྒྱལ་པོས་ནེ་ནེའི་ལུང་བསྟན་ལྟར་འདན་མ་དང་འབྲུག་མོ་གཉིས་རྨ་ལུང་ཡིད་ཀྱི་དཀྱིལ་དུ་འགྲོ་དགོས་པའི་བཀའ་ཕབ་པས། འདན་མ་དང་འབྲུག་མོ་གཉིས་མགྱོགས་པར་ཆས་སོ། །དེར་སླེབས་པས་འདན་མས་བྲག་རི་ཞིག་གི་གཡས་ཟུར་དུ་གཞུ་ཆུང་དཀར་མོ་འཐེན་སྐྱིད་ལ་མདའ་གསེར་ལྟོང་མ་ཞིག་བཞག་ནས་བསྡད། འབྲུག་མོས་རྒྱན་གོས་ལེགས་པར་བཀླུབས་ཏེ་ཕར་འགྲོ་ཚུར་འགྲོ་བྱེད་པ་ན། དགོ་བ་དེ་གཞན་དང་མ་འདྲ་བའི་འབྲུག་མོའི་སྐྱེས་གཟུགས་སོགས་ཀྱིས་ཡིད་འཕྲོག་སྟེ་དེ་ལ་ཡེངས་སྡོད་པའི་སྐབས་སུ། འདན་མས་མདའ་བརྒྱབ་པས་དགོ་བ་བསད། དེ་ནས་པགས་པ་བཤུས་ཏེ་རོའི་རྩར་མུ་ཏིག་ཞགས་པས་བྱ་ཤང་པ་འཛིན་པའི་རྙི་བཙུགས་ནས་བཞག་གོ།
དེ་ནས་འབྲུག་མོ་བྱ་རྒོད་ཅིག་ལ་སྤྲུལ་ནས་རི་རབ་ཀྱི་ཁོང་གསེང་དུ་ཕྱིན་ནས། བྱ་ཤང་པ་ལ་ཕག་ཉན་བྱེད་དུས། བྱ་ཤང་པས་ཤང་མ་ལ། ཁྱོད་ཤང་མ་མ་ཉལ་ཡར་ལ་ལོངས། །ངའི་མདང་གསུམ་ཉལ་བའི་རྨི་ལམ་ལ། །ཁྲ་མོ་གླིང་གི་ས་ཆ་ནས། །དགོ་ཨ་རྒོད་དཔུང་པའི་གཡུ་རྭ་དེ། །གླིང་མི་ཆུང་ཞིག་གིས་བསད་ནས་ཐལ། །དེར་འགྲོ་དང༌། ལོ་རྒྱགས་མེད་ན་ཟླ་རྒྱགས། ཟླ་རྒྱགས་མེད་ན་ཞག་ཅིག་ཡོང་བར་འདུག ད་མགྱོགས་པོ་མ་སོང་ན་གཅན་གཟན་གྱིས་ཟ་འགྲོ་ཟེར། དེ་འཕྲལ་འབྲུག་མོ་མྱུར་བར་ཕྱིར་ལོག་སྟེ་གེ་སར་རྒྱལ་པོར་བྱ་ཤང་པས་ཅི་ཟེར་དང་གླིང་ལ་མྱུར་དུ་ཡོང་རྒྱུ་ཡིན་སྐོར་ཞུས་པ་དང༌། བྱ་ཤང་པ་དེ་ཡང་ནམ་མཁར་གཤོག་སྒྲ་འབྲུག་ལྟར་གྲགས་ཏེ་འཕུར་ཡོང་ནས་དགོ་རོའི་སྟེང་བབས། དགོ་བའི་ཁོག་སྨད་ཙམ་ཟས་པས་ལྟོ་འགྲངས་ཏེ་ལྡིང་མ་ཐུབ་ཙ་ན་མུ་ཏིག་གི་ཞགས་རྙིས་བཟུངས། དེ་ལ་འདན་མས་རལ་གྲི་ཀླད་ལ་གདེང་སྟེ་བྱ་ཤང་པ་ལ། བྱ་ཤང་མ་གར་ཡོད་འདིར་ཁྲིད་མ་ཡོང་ན། ད་ལྟ་མྱུར་དུ་གསོད་རྒྱུ་ཡིན་ཟེར་པ་དང༌། ཤང་པ་ན་རེ། ཁྱོད་ཀྱིས་ང་མ་གསོད་དང༌། ཤང་མ་འགུག་པའི་ཐབས་ཡོད་ཟེར་ནས་ནམ་མཁའི་དབྱིངས་སུ་ཨ་བོ་ཟེར་བས། བྱ་ཤང་མ་དེས་སྒོ་ང་གཤོག་བར་དུ་བཟུང་ནས་འཕུར་ཡོང་སྟེ་ཤང་པའི་རྩར་བབས། དེར་འདན་མ་རབ་ཏུ་དགའ་སྟེ་བྱ་གཉིས་གེ་སར་གྱི་མདུན་དུ་ཁྲིད་ཕྱིན་པས་གེ་སར་རྒྱལ་པོ་ཡང་ཐུགས་དགྱེས་པར་གྱུར་ཏོ།།

གླེང་བརྗོད།
ནག་པོ་རྒྱ་གླིང་(གཉིས་པ)
གློག་རྡུལ་དེབ།

ནག་པོ་རྒྱ་གླིང་(གཉིས་པ)

དེ་ནས་གེ་སར་རྒྱལ་པོས། བྱ་ཤང་པ་ཁྱོད་གཉིས་ལ་བུ་མོ་ཞིག་ཡོད་འདུག་པ་དེ་ང་རྒྱ་ནག་ལ་འགྲོ་དུས་དགོས་པའི་དུས་ཤིག་ཡོད་པས་ང་ལ་སྤྲོད་དགོས་གསུངས་ཙ་ན། ཤང་པ་གཉིས་ཀྱིས་ཕྱག་དང་བཅས། ཁྱེད་གེ་སར་རྒྱལ་པོ་ཐོས་པ་ཡོད་དེ་མཇལ་བ་མེད། དེ་རིང་མཇལ་བ་ངོ་མཚར་ཆེ་ལགས། ངེད་གཉིས་ཀྱང་བསོད་ནམས་དང་སྐལ་བ་ལྡན་པ་ཞིག་ཡིན་འདུག་ཟེར་ཞིང༌། བུ་མོ་ལོས་འབུལ་ཡང་ད་ལྟ་སྒོ་ང་ཁ་མ་ཕྱེ་བར་ཡོད་ཞུས་སོ།། དེ་ནས་ཞག་བདུན་སོང་བ་དང་སྒོ་ང་ཁ་ཕྱེ་སྟེ་བུ་མོ་གཡུའི་མདོག་ལ་དུང་གི་དབུ་སྐྲ་ཅན་མཛེས་ཤིང་ཡིད་དུ་འོང་བ་ཞིག་འཁྲུངས་པས་གླིང་གི་རྒྱལ་བློན་ཐམས་ཅད་ངོ་མཚར་དུ་གྱུར། དེ་ནས་ཡང་གེ་སར་རྒྱལ་པོས། ཨག་གསེའི་བླ་གཡུ་དེ་རྒྱ་ཡུལ་དུ་འགྲོ་དུས་དགོས་མཁོ་ཡོད་པས། ཨག་གསེ་མཁར་ནང་ལ་ཨེ་འདུག་བལྟ་བར་སུ་འགྲོ་ཟེར་ཙ་ན། མ་བཞི་དཔོན་པོ་ཁྲོ་ཐུང་གིས་འགྲོ་རྒྱུར་ཁས་བླངས་ཏེ་ཨག་གསེའི་མཁར་རྩར་སོང་བས། མཁར་སྟེང་དུ་འུར་སྒྲ་ཆེན་པོ་ཞིག་གྲག་བཞིན་འདུག་པས། ཁྲོ་ཐུང་འཇིགས་ཏེ་འགྲོ་མ་ནུས་པར་སླར་སྒར་ལ་ཡོང་ནས་ན་རེ། ང་ཨག་གསེའི་མཁར་ཤོད་དུ་ཁོང་དང་འཕྲད་དེ་འཐབ་པས་ཁོང་ཐུབ། དེ་ནས་ཁོ་རླུང་ལ་གྱུར་ནས་ནམ་མཁའི་དབྱིངས་སུ་ཡལ་སོང་པས་བྱ་ཐབས་མ་བྱུང་ཞེས་ཟེར་ཙ་ན། སྒྲོ་རྒོད་མདའ་བཙན་ན་རེ། ཁྲོ་ཐུང་འདིས་ཅི་ཟེར་ཐམས་ཅད་ནམ་མཁའི་མེ་ཏོག་དང་འདྲ། མི་བདེན་རྫུན་སྒྲིག་མ་གཏོགས་ཆ་འཇོག་ཅི་ཡང་མེད། ཨག་གསེ་ནི་མཁར་ནང་ལ་ཡོད་པ་འདྲ་ཟེར་བས། གེ་སར་རྒྱལ་པོས་འདན་མ་བལྟ་བར་མངགས། དེ་ནས་འདན་མས་འཁོར་གསུམ་གྱོན་རྟ་ལ་བཞོན་ཏེ་ན་རེ། ང་དེ་རིང་ཨག་གསེ་ཁོ་དངོས་འཕྲད་ཀྱིས་ཅི་བྱས་རྒྱུ་མཚན་ཞུ་རྒྱུ་ཡོད་པ་ཞིག་བྱས་ནས་འོང་ཟེར་ནས་སོང་ངོ༌།།
འདན་མ་ཨག་གསེའི་མཁར་ལ་སླེབས་ཏེ་མཁར་གྱི་སྟེང་ཤོད་ཐམས་ཅད་དུ་ཕྱིན་ཡང་ཅི་གང་མེད་པར་སྟོང་པར་ཡོད་པས། འདན་མས་མཁར་སྟེང་དུ་སོང་སྟེ་རྒྱལ་མཚན་དང་རྒྱལ་རྔ་བཅག མཁར་ཕྱི་ནང་ཐམས་ཅད་རྩ་མེད་དུ་བཟོ་པར་བརྩམས་ཙ་ན། ཨག་གསེ་ཁོ་དངོས་ཡོད་ཀྱི་གཟུགས་སུ་བྱས་ཏེ་ན་རེ། ཡ་ཁོ་རེ་འདན་མ་ཐན་བྱིས་མཆུ་ནག ཁྱོད་ཀྱིས་ང་གྱེན་ལ་སོང་ན་སྐས་འཛུགས། ཐུར་ལ་སོང་ན་དོང་རྐོ། སྔ་དགྲ་ད་འཁོན་ཅི་ཡོད་པ་ཡིན། དུས་དེ་རིང་རྒྱལ་ཕམ་རྟིང་ཐག་མ་བཅད་ན་སྲིན་ཁེ་ཚེ་རལ་བའི་ཤ་ལ་ཟོ་ཟེར་ནས། འདན་མ་དང་ཇ་ཡུན་ཙམ་ཕྲག་ཆེན་སྦར་འཛིང་བྱས་ཀྱང་རྒྱལ་ཕམ་མ་བྱུང༌། དེ་ནས་རྡོ་ཕ་བོང་གཡག་ཙམ་ཞིག་ལ་ཁྲབ་རྨོག་དགུ་རེ་བཞག་སྟེ་མདའ་རྩལ་འགྲན་པར་ཨག་གསེས་མདའ་གཅིག་གིས་རྨོག་དགུ་དང་ཁྲབ་དགུ་ཕུག འདན་མས་མདའ་གཅིག་གིས་རྨོག་དགུ་དང་ཁྲབ་དགུ་ཤོག་སྐྱ་ལྟར་ཕུག་སྟེ་རྡོ་ཕ་བོང་དེ་ཐལ་བར་བཏང་པས། ཨག་གསེ་ཕམ་སྟེ་གར་སོང་མེད་པར་ཡལ་སོང་ངོ༌།།
དེ་ནས་འདན་མ་སླར་སྒར་དུ་ལོག་སྟེ་ཅི་བྱུང་གནས་ཚུལ་རྣམས་གེ་སར་རྒྱལ་པོར་ཞིབ་པར་ཞུས། དེ་ལྟར་ཨག་གསེ་འབྱུང་བ་ལྔ་ཅི་འགྱུར་ལ་རང་དབང་ཡོད་པས་ཅི་བྱས་ཀྱང་ལག་ཏུ་མ་ཟིན་པ་ལ། གེ་སར་རྒྱལ་པོའི་དགོངས་པར། དུས་གཞན་ཡིན་ན་ང་ལ་དགྲ་ལྷ་དང་ཝེར་མ་སོགས་སྡོང་གྲོགས་ཡོད་ཀྱང་ད་ལྟའི་སྐབས་སུ་མེད་པས་ཨག་གསེ་ཟིན་པའི་སྐལ་བ་མེད་པ་འདྲ་དགོངས་པའི་སྐབས་སུ། སྒྲོ་རྒོད་མདའ་བཙན་གྱི་བསམ་པར། གེ་སར་རྒྱལ་བློན་རྣམས་རྒྱ་ཡུལ་ལ་འགྲོ་བར་མཁོ་བའི་གཡུ་དེ་ཨག་གསེའི་ལག་ཏུ་ཡོད་པས། ང་དང་ཨག་གསེ་མནའ་ཤག་ཡིན་ཡང༌། གེ་སར་རྒྱལ་པོས་འགྲོ་དོན་མཛད་པའི་སྐུ་ཆས་ལ་ཕན་པ་བྱུང་ན། དེ་ལོན་པའི་ཐབས་ཤིག་བྱེད་དགོས་སྙམ་སྟེ་ན་རེ། གླིང་རྗེ་གེ་སར་རྒྱལ་པོ་ལགས། ཨག་གསེ་འདི་ད་ལྟ་ཡོད་ཀྱང་ད་ལྟ་མེད། ནམ་མཁའི་འཇའ་དང་མཚུངས་པས་ཕྱག་ཏུ་ཚུད་རྒྱུ་དཀའ། ཨག་གསེ་འདི་ངན་སོང་དུ་མི་འགྲོ་བར་བདེ་འགྲོ་མཐོ་རིས་སུ་ཁྱེད་ཀྱིས་འདྲེན་ཐུབ་པའི་ཞལ་བཞེས་གནང་ན་ང་ལ་ཐབས་ཤིག་ཡོད། འབྲུག་མོ་འདིར་སླེབས་ཐབས་ཡོད་ན། ང་ཨག་གསེ་ལ་འཕྲད་དུ་སོང་ནས་འབྲུག་མོ་ཁོའི་ཚེ་རོགས་སུ་སྤྲོད་རྒྱུ་དང༌། དེའི་སྔ་རིན་ལ་གཡུ་རྒོད་ཁྲ་ཆེན་དེ་ལག་ཏུ་ཚུད་ཐབས་བྱེད། གཡུ་རྒོད་དེ་ལག་ཏུ་ཚུད་ན་ཁོ་ལག་ཏུ་ཚུད་པ་དང་ཁྱད་མེད་ཟེར་བ་ན། གེ་སར་རྒྱལ་པོ་ཐུགས་ཤིན་ཏུ་དགྱེས་ཏེ་དེ་ལྟར་བྱུང་ན་ཧ་ཅང་ལེགས། འབྲུག་མོ་ཞག་བདུན་གྱི་ནང་ཚུད་ལ་འདིར་སླེབས་པ་བྱེད་ཆོག་གསུངས།
དེ་ནས་སྒྲོ་རྒོད་མདའ་བཙན་གྱིས་དགྲ་ལྷ་རྩེ་རྒྱལ་སོགས་བློན་པོ་བདུན་ཁྲིད་དེ། གསེར་དངུལ་གཡུ་གསུམ། ཇ་དར་ཕྲུག་གསུམ་སོགས་གྱ་ནོམ་པ་ཁུར་ནས་ཨག་གསེའི་ཁྲ་མཁར་རྫོང་དྲུག་ལ་སླེབས་ཙ་ན། ཨག་གསེས་ཤག་པོ་སླེབས་པ་ཤེས་ཏེ། ཇ་འདྲེན་དང་ཆང་འདྲེན་སོགས་གསོལ་སྟོན་ལེགས་པར་བཤམས་ནས་ན་རེ། ཤག་པོ་སྒྲོ་རྒོད་མདའ་བཙན་ཁྱོད་ཀྱིས་མནའ་ཟས། ཁྲེལ་དང་ཉེས་པ་གཡུག་ནས་གེ་སར་ངན་པའི་སྣ་འདྲེན་བྱེད་སྙམ་པ་མིན་པར་ཤག་འཕྲད་ལ་ཡོང་པ་ཡིན་ན་ཤིན་ཏུ་ལེགས། འོན་ཀྱང་ཡིད་གཉིས་ཟ་བས་དེ་རིང་གེ་སར་གར་ཐལ་ཟེར་བ་ན། སྒྲོ་རྒོད་མདའ་བཙན་ན་རེ། འཇིག་རྟེན་མི་ལ་ཚེ་རོགས་དགོས། །ཚེ་རོགས་མེད་ན་སྟོང་འདུག་རེད། །ཟེར་བ་ལྟར་ད་རེས་གེ་སར་ནི་རྒྱ་ནག་ལ་ཕེབས་སོང་པས་སླར་བྱོན་རྒྱུ་ཨེ་ཡོད་མི་ཤེས། ཁྱེད་ཀྱི་གཡུ་རྒོད་ཁྲ་ཆེན་དེ་ཚ་བོ་དགྲ་ལྷ་རྩེ་རྒྱལ་ལ་ཕུལ་དང༌། སྐྱ་ལོའི་ཁྲོམ་ཤོག་འབྲུག་མོ་དེ་ཁྱོད་ཀྱི་ཚེ་རོགས་སུ་ཁྲིད་ཐུབ་པའི་ཐབས་ཡོད་པས་ཁྱེད་རང་འབྲུག་མོའི་སྐྲ་བདག་དང་ཚོ་དྲུག་གི་དཔོན་པོ་བྱེད་པའི་ཉི་མ་སླེབས་པར་གདའ། གལ་ཏེ་གེ་སར་སླར་སླེབས་ཀྱང་བློན་པོའི་ཚུལ་དུ་བཞག་ཀྱང་འགྲིག་ཟེར་ཙ་ན། ཨག་གསེ་ན་རེ། སྐྱ་ལོའི་ཁྲོམ་ཤོག་འབྲུག་མོ་བྱུང་ན་ཁྱོད་ཅི་ཟེར་བྱེད་ཆོག་ཟེར་ནས་གཡུ་རྒོད་ཁྲ་ཆེན་དེ་ཚ་བོ་དགྲ་ལྷ་རྩེ་རྒྱལ་གྱི་ཕྱག་ཏུ་ཕུལ་ཏེ། འབྲུག་མོ་འོང་བའི་ཞག་གྲངས་ཆུ་ཚོད་དང༌། གཟའ་སྐར་ཚེས་གྲངས་སོགས་བསྒྲིགས་ཏེ་གླིང་གི་བློན་པོ་རྣམས་གླིང་སྒར་དུ་ལོག གེ་སར་རྒྱལ་པོར་གནས་ཚུལ་རྣམས་ཞིབ་པར་ཞུས་པས། གེ་སར་རྒྱལ་པོའི་ཞལ་ནས་དེ་ལེགས་འདུག ཨག་གསེའི་རྩར་འགྲོ་བའི་ཚེས་གྲངས་སོགས་མ་འཆུག་པ་བྱེད་ནས་འགྲོ་དགོས། དེར་འགྲོ་སྐབས་ངའི་སྐུའི་སྤྲུལ་བ་འབྲུག་མོར་སྤྲུལ་ནས་འགྲོ། གསུང་གི་སྤྲུལ་པ་རྟ་རྫི་ལ་སྤྲུལ་ནས་འགྲོ། དེ་དུས་ཨག་གསེ་ལ་ལུས་ངོམས་རང་གཟུགས་སྟོན་གྱིས་དང༌། དེས་རང་གཟུགས་བསྟན་བྱུང་ན། ངས་འཕོ་བ་བཙན་ཐབས་སུ་སྤར་བ་ཡིན་གསུངས།
དེ་ནས་དུས་ཚེས་ལ་བབས་པ་ན་བློན་པོ་རྣམས་ཀྱིས་གླིང་ནས་འབྲུག་མོ་གདན་དྲངས་ཡོང་པའི་ཚུལ་བྱས་ཏེ། ཨག་གསེའི་མཁར་ལ་ཁྲི་གདུགས་ཉི་མའི་མདངས་ཕོག་པ་དང་མཉམ་དུ་སླེབས་པས། ཨག་གསེའི་བསུ་བ་རྒྱ་ཆེན་པོ་དང་བཅས་མཁར་ནང་དུ་གདན་དྲངས། གེ་སར་གསུང་གིས་སྤྲུལ་པ་རྟ་རྫི་མི་ངན་མདོག་ངན་དེ་གྲལ་མཐར་བསྡད། བློན་འཁོར་ཚང་མ་སྟོན་མོ་ཟབ་རྒྱས་ལ་རོལ། དེ་ནས་སྒྲོ་རྒོད་མདའ་བཙན་ན་རེ། ཨག་གསེ་གཡུ་རལ་རྒྱལ་པོ་ལགས། སྐྱེས་ཡག་ལ་གཟུགས་མཛེས་པ་ལྷའི་བུ་མོ་འདྲ་བའི་སྐྱ་ལོའི་ཁྲོམ་ཤོག་འབྲུག་མོ་འདི་དེ་རིང་ཁྱོད་ཀྱི་ཚེ་རོགས་སུ་སྤྲོད་རྒྱུ་ཡིན། དེས་ན་གླིང་གི་བློན་པོ་ཨ་ཞང་ཚོས་ཨག་གསེའི་གཡུ་རལ་དེ་མཇལ་འདོད་པས། ལུས་ཚུལ་ཇི་ལྟ་བ་དེ་ངོམས་དང༌། སྐྱ་ལོ་ཁྲོམ་ཤོག་འབྲུག་མོ་དེ་ཡང་དགའ་ཞིང་སྤྲོ་ལ་ཡིད་ཆེས་ནས་བཞུགས་སྤྲོ་བ་དང༌། ཁྲ་མོ་གླིང་གི་བློན་པོ་རྣམས་ཀྱང་བློ་བདེ་བ་ཞིག་འོང་པས་དེ་ལྟར་དགོས་ཟེར་པས། ཨག་གསེས་སྒྲོ་རྒོད་ཀྱིས་ཟེར་བ་ལྟར་དཀར་དམར་སྔོ་སེར་དུ་གྲུབ་པའི་རལ་བ་དེ་ཚུར་ངོམ་པ་ན། ཁྲོ་ཐུང་གིས་རྟ་རྫི་རྟ་འཚོ་རུ་སོང་ཟེར་བསམ་པ་ཁ་ནོར་ནས། ཇོ་རུ་རྟ་འཚོ་རུ་སོང་སྨྲས་པས། ཨག་གསེས། ཡ་ཁོ་རེ་སྒྲོ་རྒོད། ཁྱོད་ཤག་པོའི་མནའ་ཟ་ན་ཟེར་ནས་མགོ་བོ་སྟག་ལ་ལུས་མི་གཟུགས་སུ་སྤྲུལ་བྱུང་བ་ན། གེ་སར་གྱིས་རྟ་རྫིའི་སྤྲུལ་བ་བཤིག་ཁོམ་མ་བྱུང་པར་ཨག་གསེ་དང་དཔུང་འཛིང་བྱས་པས་ཨག་གསེ་ཡང་དངོས་མེད་ནམ་མཁའི་འཇའ་ཡལ་བ་བཞིན་དུ་སོང༌། དེར་གླིང་རྒྱལ་བློན་རྣམས་ཨག་གསེ་གར་སོང་མ་ཤེས་པར་བཞུགས་སྐབས་སུ་གེ་སར་རྒྱལ་པོར་མ་ནེ་ནེ་རྣམ་སྨིན་དཀར་པོས་ལུང་བསྟན་གྱི་གླུ་འདི་གསུངས་སོ།།
གླུ་ཐ་ལ་ལ་མོ་ཐ་ལ་ལེན། །གླུ་སྣ་བླ་མ་བཟང་པོས་སྐྱོངས། །ང་དང་ང་ངོ་མ་ཤེས་ན། །ཨ་ནེ་རྣམ་སྨིན་དཀར་མོ་ཡིན། །དེ་ནས་སེང་ཆེན་རྒྱལ་པོ་ལགས། །ཐུགས་མ་ཡེངས་ངང་ནས་ཚུར་ལ་གསོན། །ཉི་མ་སང་གི་དུས་ཚོད་ལ། །ཨག་གསེ་མཁར་ལ་གནས་པར་འདུག །ཉིན་མོ་མི་གནས་མཚན་ལ་གནས། །ལོ་ཟད་ཟླ་ཟད་ཉི་ཤུ་དགུ། །ཁོ་ཨག་གསེ་འདུལ་བའི་དུས་ལ་བབས། །ཨག་གསེ་གཡུ་རལ་རྒྱལ་པོ་དེའི། །མཁར་ལ་ལྕགས་རི་རིམ་དགུ་ཡོད། །ལྷ་དང་དགྲ་ལྷར་འབོད་པ་གྱིས། །ལྕགས་རི་ཕྱི་ནང་བར་གསུམ་ལ། །བློ་ཆེན་འདན་མས་གཙོ་བྱས་པས། །ཨག་གསེ་མི་ཤོར་སྲུང་དགོས་ཡོད། །སང་ཉིན་མ་བཏུལ་ཤོར་བ་ན། །དེ་ནས་ཐུབ་པའི་རེ་བ་མེད།།
ཅེས་ལུང་བསྟན་པས། གེ་སར་རྒྱལ་བློན་རྣམས་ཨག་གསེའི་ཁྲ་མཁར་རྫོང་དྲུག་ལ་ཁྲི་གདུགས་ཀྱི་གྲིབ་སོ་འཕྲད་པ་དང་སོང་སྟེ། ལྕགས་རི་རྣམས་བློན་པོ་ཚོས་བཀག གེ་སར་རྒྱལ་པོས་ལྷ་ཀླུ་གཉན་གསུམ་སྡོང་གྲོགས་ལ་བསྐུལ་པས། ལྷ་དམག་ཁ་བ་འབབ་འབབ། གཉན་དམག་བུ་ཡུག་འཚུབ་འཚུབ། ཀླུ་དམག་ཆུ་མིག་རྡོལ་རྡོལ། དགྲ་ལྷ་རྦབ་རྡོ་སྒྲིལ་སྒྲིལ་བྱས་ཏེ་ཨག་གསེའི་མཁར་ལ་རིམ་པར་བསྐོར།
དེ་ནས་སྐུ་རྗེ་གེ་སར་རྒྱལ་པོ་ཁོང་དངོས་མེད་ཚུལ་གྱིས་ཨག་གསེ་ཡོད་པའི་གནམ་སྒོ་ལ་བྱོན་ཏེ་ཨག་གསེས་ཅི་བྱེད་ཅི་ཟེར་ལ་གཟིགས་དུས། ཨག་གསེས་ཕྱོགས་བཞི་མཚམས་བརྒྱད་ཐམས་ཅད་ལྷ་ཀླུ་གཉན་གསུམ་གྱི་དམག་ཚོགས་ཀྱིས་གང་ནས་འདུག་པ་མཐོང་པས། ཡིད་མ་རང༌། སེམས་མ་བདེ་ནས་འབྲོ་དགོས་བསམ་སྟེ་སྤྲུལ་བ་ཅི་བྱས་ཀྱང་གེ་སར་རྒྱལ་པོས་དེ་དང་དེ་ལ་སྤྲུལ་བ་མཐོང་ནས། འབྲོ་ས་གབ་ས་མ་རྙེད་ཙ་ན། སྐྱེས་ས་ཤི་ས་དུར་ས་གསུམ། །གཤིན་རྗེའི་ཁྲམ་ལ་གར་ཐེབས་ཡིན། །ཟེར་ནས་ཡ་ཁ་གནམ་ལ་ཐུག་པ། མ་ཁ་ས་ལ་ཐུག་པ། ལྕེ་བར་སྣང་ལ་གཡུག་པ། རྔ་མས་ས་བརྡུང༌། ངར་སྐད་རེ་རེས་ས་གཞི་ཡང་འདར་ཡོམ་ཡོམ་བྱེད་པའི་སྟག་ཅིག་ལ་སྤྲུལ་ཏེ་ལྕགས་རིའི་ནང་ལ་མཆོང་ཡོང་ཙ་ན། འདན་མས་སྟག་གི་ཀླད་ལྤགས་ནས་བཟུང་པ་དང༌། ཁྲོ་ཐུང་གིས་སྟག་གི་རྔ་མ་ལ་འཇུས་པས་སྟག་གིས་རྔ་མ་གཡུག་ཐེངས་གཅིག་གིས་ཁྲོ་ཐུང་ས་ལ་བརྡབ་སྟེ་ཇ་ཡུན་ཙམ་ལ་དྲན་མེད་དུ་བརྒྱལ། དེ་ནས་གེ་སར་རྒྱལ་པོ་ཕེབས་ཏེ། ཨག་གསེ་ཁྱོད་ད་རེས་བྲོས་བྲོས་གབ་གབ་བྱེད་ས་མེད། དེ་བས་ཁྱོད་ཀྱི་གཡུ་རལ་དེ་ནག་པོ་རྒྱ་ལ་མཁོ་བ་ཡིན་པས། ཁྱོད་རང་རྒྱ་ལ་ངོམ་ཏུ་འགྲོ་ན་ཕྱི་བློན་ལ་མི་བཞག བར་བློན་ལ་འཇོག དཔོན་གཡོག་མགོ་སྐེ་འབྲལ་མེད་བྱེད། ཤི་དམྱལ་བར་མི་གཏོང་ཁས་ལེན་བྱེད་གསུངས་པ་ན། ཨག་གསེ་ན་རེ། བླ་མ་སངས་རྒྱས་ཡིན་པ་ངོ་མ་ཤེས། གདམས་ངག་བདུད་རྩི་ཡིན་པའི་དོན་མ་ཤེས། མ་རིག་མ་ཤེས་ཅི་བྱུང་ཡང༌། གེ་སར་ཁྱེད་ཀྱི་མདུན་དུ་བཤགས། ང་ཁྱེད་ཀྱི་བར་བློན་ལ་བཞག་ན་འཇིག་རྟེན་ལ་གནོད་པ་འོང་བ་མ་གཏོགས་ཕན་ཐོགས་མི་ཡོང༌། ང་ཨག་གསེའི་ཡུལ་གྱི་འདྲེ་ཡིན་པས་བཞག་མི་ཉན། ད་ཁྱེད་རྒྱལ་བློན་རྣམས་ཨེན་ཙམ་གཞན་དུ་བཞུགས་དང༌། ང་ཡི་སྤྲུལ་པ་འདི་མིན་པ་ཞིག་བྱེད་དགོས་ཟེར་ནས་ཕོ་ལོ་བཅོ་བརྒྱད་ཅན་ཞིག་བྱས་ཏེ། རྒྱལ་བློན་རྣམས་ལ་སྟོན་མོ་ཕུན་སུམ་ཚོགས་པར་བྱས་ནས་གེ་སར་རྒྱལ་པོ་ལ་འདི་སྐད་ཞུས་སོ།། གླིང་རྗེ་གེ་སར་རྒྱལ་པོ་ལགས། ང་ཤི་དམྱལ་བར་མི་གཏོང་པར་འཕོ་བ་བཙན་ཐབས་ཀྱིས་དག་པའི་ཞིང་དུ་འདྲེན་པར་ཞུ། ངའི་དཀོར་མཛོད་བཅོ་བརྒྱད་ཀྱི་ནང་ལ་འཛམ་བུ་གླིང་གི་ནོར་ཟས་ཀྱི་བཅུད་ཚང་མ་ཡོད་པས། དེ་ནས་ཁྱེད་རྒྱ་ལ་མཁོ་བའི་རྫས་དང་ཡོ་བྱད་རྣམས་སྣོམས། དེ་མིན་རྒྱུ་ནོར་གང་ཡོད་པ་རྣམས་ཀྱིས་སངས་རྒྱས་ཀྱི་སྐུ་གསུང་ཐུགས་རྟེན་བཞེངས་ནས་ཕྱི་རབས་ཀྱི་དད་རྟེན་དུ་ཞོག་ཟེར་རོ།།
དེ་ནས་གླིང་རྗེ་གེ་སར་རྒྱལ་པོས་ཨག་གསེའི་རྣམ་ཤེས་དག་པའི་ཞིང་དུ་སྤར། མཛོད་སྒོ་ཐམས་ཅད་ཕྱེ། རྒྱུ་ནོར་ཐམས་ཅད་བསྣམས་དེ་རྒྱལ་བློན་འཁོར་དང་བཅས་སྐྱིད་ལྷ་མཁར་ནོར་བུའི་ཕོ་བྲང་དུ་ཕེབས།
དེའི་སྐབས་སུ་སྐུ་རྗེ་སེང་ཆེན་རྒྱལ་པོའི་ཞལ་ནས། ཚོ་ཆེན་ལྷ་སྡེ་དཀར་པོ་ལགས། ད་རེས་ཨག་གསེའི་ཡུལ་ནས་གདན་དྲངས་པའི་ནོར་རྫས་རྣམས་ལས་རྒྱ་ལ་མཁོ་བའི་རྫས་རྣམས་མ་གཏོགས། དེ་མིན་རྒྱུ་རྫས་རྣམས་ཆུད་མ་ཟས་པར་སངས་རྒྱས་ཀྱི་སྐུ་གསུང་ཐུགས་ཀྱི་རྟེན་བཞེངས་བྱས་ཏེ་ཨག་གསེ་རྒྱལ་པོའི་བཤགས་རྫོངས་དང་ཕྱི་རབས་ཀྱི་དད་རྟེན་དུ་འགྲོ་བ་བྱེད་དགོས། དེ་ནས་ཟླ་བ་འདིའི་ཚེས་བཅོ་ལྔ་ཉིན་ནག་པོ་རྒྱ་ལ་འགྲོ་བ་ཡིན་གསུངས་ཏེ་འདུ་ར་གྲོལ་ལོ།།
དེ་ནས་གླིང་རྒྱལ་བློན་རྣམས་རྒྱ་གླིང་གཉིས་ཀྱི་ས་མཚམས་བརྒལ་ཏེ་རྒྱ་ཡུལ་ན་བ་ཁྲ་ལེབ་ལ་སྒར་བབས་ཏེ། ལྷ་ཀླུ་གཞི་བདག་ལ་མཆོད་བསྟོད་དང་བསང་གསོལ་རྒྱ་ཆེར་བྱས་ཤིང༌། དཔོན་བློན་རྣམས་རྟ་རྒྱུགས་དང་མདའ་ཁ་དཔའ་རྩལ་ལ་སོགས་པ་མཛད་ནས་ཞག་ཉེར་གཅིག་གི་བར་དུ་རྒྱའི་སྣེ་ལེན་བསུ་བ་དང༌། ཇ་འདྲེན་བྱེད་མཁན་ལ་བསྒུགས་ཀྱང་ཅི་ཡང་མ་བྱུང་པས། གེ་སར་རྒྱལ་པོའི་ཞལ་ནས། ང་གེ་སར་རྒྱལ་པོ་རྒྱ་ནག་རྒྱལ་པོ་འདིས་གདན་འདྲེན་བྱས་པས། ངས་ལོ་ལམ་ཟླ་བ་དང༌། ཟླ་ལམ་ཞག་གིས་བཅད་ནས་ས་འདིར་སླེབས་ཀྱང་ཡོང་མཁན་སུ་ཡང་མི་འདུག་པས་སླར་ཁྲ་མོ་གླིང་ལ་ལོག་འགྲོ་བ་ལས་འོས་མི་འདུག་གསུངས་ཙ་ན། བློན་པོ་གཞན་རྣམས་ཀྱིས་ཡར་ཅི་ཡང་ཞུ་མ་ནུས་པར་ཁ་རོག་གེར་བསྡད་པས། མ་བཞི་དཔོན་པོ་ཁྲོ་རྒྱལ་དེས་དར་དཀར་པོ་ཡུག་གཅིག་ཕུལ་ཏེ་ན་རེ། གེ་སར་རྒྱལ་པོ་ལགས། ང་ཚོ་ཁྲ་མོ་གླིང་ནས་ཡོང་པའི་དུས། ཚོ་དྲུག་རྒན་གཞོན་ཡོངས་ཀྱིས་རྫོངས་པ་དང་སྐྱེལ་མ་འགྲན་ཟླ་མེད་པ་བྱས། ནག་པོ་རྒྱ་ཡི་ཁྲིམས་མགོ་གནོན་དུ་འགྲོ་བ་ཡིན་ཟེར་ནས་དར་འཕྱར། དུང་བུས་ཏེ་སྒང་པ་བོད་ལ་གྲགས་པ་ཞིག་བྱས་ནས་ཡོང་པ་ཡིན་པས། སླར་ལོག་ན་སྒང་པ་བོད་ཀྱིས་འཕྱ་སྨོད་བྱེད་པ་ཞིག་ལས་མི་འོང༌། དེ་བས་དོ་ནུབ་ཁྱེད་ལ་འགོ་བའི་ལྷ་དང༌། ཁྱད་པར་དུ་མ་ནེ་ནེའི་ལུང་བསྟན་ཅི་ཡོང་བལྟ་ཆོག་པ་དང༌། ངེད་རྣམས་ལའང་རྨི་ལྟས་ཅི་ཡོང་ལ་བལྟ་ཆོག་ཟེར་ནས་ཞུས་པ་ན། གེ་སར་གྱིས། ཨ་ཁུས་ཟེར་བ་བདེན་ཟེར་ནས་སོ་སོ་རང་མལ་དུ་གཟིམས་སོ།།
དེ་ནས་ཕྱི་ཉིན་ཞོགས་པ་ཉི་མ་ཤར་ཙམ་ལ་ཨ་ཁུ་ཁྲོ་ཐུང་གིས་དར་དཀར་པོ་ཞིག་གེ་སར་རྒྱལ་པོ་ལ་ཕུལ་ཏེ། མདང་ནུབ་རྨི་ལྟས་བྱུང་ཚུལ་གྱི་གླུ་འདི་ལྟར་བླངས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །རྩེ་གཅིག་ཡིད་ཀྱིས་གསོལ་བ་འདེབས། །གླིང་རྗེ་གེ་སར་རྒྱལ་པོ་ལགས། །དེ་རིང་ཁྲོ་ཐུང་གླུ་ལ་གསོན། །མདང་གསུམ་ཉལ་བའི་རྨི་ལམ་ལ། །ཡུལ་ངོ་མི་ཤེས་ས་ཕྱོགས་ལ། །ལུང་པ་དགུ་ཡི་སུམ་མདོ་ལ། །ཆུ་བོ་དགུ་ཡི་འདུས་མདོ་ལ། །ཟམ་པ་དགུ་ཡི་ཚུར་རོལ་ན། །མཁར་རིགས་མི་གཅིག་མཁར་དགུ་གདའ། །ལྕགས་རི་ཁུག་ཆེན་བཅོ་བརྒྱད་གདའ། །རྡོ་རྟེན་སྒམ་འདྲ་བའི་གོང་སྟེང་ལ། །ངེད་བློན་པོ་ཁྲོ་རྒྱལ་བསྡད་པ་རྨིས། །ཟམ་པ་དེ་ཡི་ཕར་ཁ་ནས། །བུད་མེད་བདུན་དང་ཐུག་པ་རྨིས། །གླུ་ཁ་མཚར་མང་པོ་བྱས་པ་རྨིས། །དཀར་པོ་དར་དང་ཇ་ཆང་སོགས། །ང་ཁྲོ་རྒྱལ་དཔོན་ལ་དྲངས་པ་རྨིས། །རྨི་ལམ་མི་ཞན་རྨི་བཟང༌།།
ཞེས་ཁྲོ་ཐུང་གིས་དེ་ལྟར་ཞུས་པ་དང༌། གེ་སར་རྒྱལ་པོའི་ཞལ་ནས། དེ་རྨི་ལམ་མ་རེད་མངོན་ཤེས་རེད། ཁྱེད་བློན་པོ་རྣམས་དང་ཤང་པའི་བུ་མོ་བཅས་ཀྱིས་རྨི་ལམ་དེའི་བཤད་བཀྲོལ་ཤེས་མཁན་ཨེ་ཡོད་གསུངས། དེར་བློན་པོ་རྣམས་ཅི་མི་ཟེར་པར་བསྡད་པས། ཤང་པའི་བུ་མོས། འཛམ་གླིང་སེང་ཆེན་རྒྱལ་པོ་ལགས། ཁྱེད་སྐུ་ཆེ་བ་རི་རྒྱལ་ལྷུན་པོ་ལ། ཐུགས་ཆུང་ཆུང་ཡུངས་འབྲུ་ཙམ། མ་བཞི་ཁྲོ་རྒྱལ་འདིའི་ཟེར་བ་ལ་ཅི་ཆ་ཡོད། འདིས་བརྒྱ་ཟེར་སྟོང་ཟེར་ཡང་བདེན་ཟེར་བ་ཉིན་མོའི་སྐར་མ་དང་འདྲ་བས་དེའི་རྨི་ལམ་གྱི་བཤད་བཀྲོལ་མི་ཤེས་ཞུས་སོ།།
དེར་ཁྲོ་ཐུང་གི་མཚང་ལ་ཕོག་སྟེ་ཁོང་ཁྲོ་ལངས་ཏེ། ངས་ཟེར་བ་མི་བདེན་ཟེར་ན། ང་རང་གིས་རྨིས་པའི་རྨི་ལམ་ང་རང་ངོས་འཛིན་པ་ལ་འགྲོ་བ་ཡིན་ཟེར་ནས་རྟ་ཀུ་ཀུ་རོག་ཙོག་དེ་བཞོན་ནས་ཐལ་རྡུལ་འཚུབ་བེར་སོང་ངོ༌།། དེ་ནས་ཁྲོ་ཐུང་རྒྱ་ཆུ་དགུ་འདུས་པའི་ཟམ་ཁར་སླེབས་ཏེ། རྡོ་ཕ་བོང་ཞིག་གི་སྟེང་དུ་འབོལ་གདན་བཏིངས་ནས་དེའི་སྟེང་དུ་འགྱིང་འདུག་ཅིག་བྱས། རྟ་ཡི་གློ་ཐག་གློད། ལག་སྒྲོག་བརྒྱབ་ནས་བསྡད་ཙ་ན། ཆུའི་ཕ་རོལ་ནས་རྒྱ་ཡི་བུ་མོ་སྤུན་བདུན་གྱིས་ན་བ་ཁྲ་ལེབ་ཀྱི་སྒར་དང་ཁྲོ་ཐུང་མཐོང་སྟེ། དེ་རིང་ཆུ་དགུ་འདུས་པའི་ཟམ་ཁ་ན་མི་ཕོ་གཞན་དང་མི་འདྲ་བ་ཞིག་འདུག་པས། གླིང་གེ་སར་རྒྱལ་པོ་བྱོན་པ་འདྲ་བསམ་ནས་སྐད་ཆ་དྲི་བར་ཡོང་སྟེ་ཟམ་པའི་ཕ་རོལ་ནས་རྒྱ་ཡི་བུ་མོ་ཀླུ་མོ་འཚོ་ན་རེ། ཆུ་ཕ་རིའི་མི་ཕོ་དར་འཕྲུ་ཅན། །ཁྱོད་ས་ཆ་གང་གི་ཕྱོགས་ནས་ཡོང༌། །ད་གང་གི་ཕྱོགས་ལ་འགྲོ་བསམ་ཡོད། །རྒྱ་ཁྲིམས་ཀྱི་མུན་པ་འཁྲིགས་དུས་འདིར། །ས་འདི་ལ་ཡོང་ལེ་མ་ལོ་གདའ། །ཟེར་ནས་གླུ་འདི་བླངས་སོ།།
ཤར་རྒྱ་ནག་རི་བོ་རྩེ་ལྔ་ནས། །སྐུ་མི་འགྱུར་འཕགས་པ་འཇམ་དབྱངས་མཁྱེན། །ང་བུ་མོའི་གླུ་སྣ་སྐྱོང་རོགས་མཛོད། །གླུ་འདི་གླུ་ངོ་མ་ཤེས་ན། །རྒྱ་གླུ་དལ་བ་རིང་མོ་ཡིན། །ས་འདི་ས་ངོ་མ་ཤེས་ན། །ནག་པོ་རྒྱ་ཡི་ས་ཆ་ཡིན། །ང་དང་ང་ངོ་མ་ཤེས་ན། །རྒྱ་ཁྲིམས་ཐར་བུ་མོ་སྤུན་བདུན་ལས། །ཆུང་བ་ཁ་མཚར་ཀླུ་འཚོ་ཟེར། །ཁྱོད་འདི་ན་འོང་ལེ་མ་ལོ་གདའ། །ཁྱོད་སྲོག་ཡོད་ཡིན་ན་འབྲོ་རྒྱུ་བྱོས། །སྲོག་མེད་ཡིན་ན་འདུག་རྒྱུ་བྱོས། །ན་ནིང་སྔོན་གྱི་གཞེ་ནིང་ལོར། །བཙུན་མོ་ཉི་མ་ཁྲི་སྐྱིད་དེ། །མ་དབང་སྐུ་ཚེ་བར་ཆད་བྱུང༌། །དེ་བྱུང་ཉིན་དང་ཚུན་ཆོད་ནས། །རྒྱལ་པོ་མྱ་ངན་མ་སངས་ཡོད། །རྒྱ་ཁྲིམས་མུན་པ་འཁྲིགས་ནས་ཡོད། །གནམ་ལ་བྱ་རྒྱ་བཙུགས་ནས་ཡོད། །ས་ལ་བྱི་རྒྱ་བཙུགས་ནས་ཡོད། །བར་ལ་རླུང་རྒྱ་བཙུགས་ནས་ཡོད། །ཆུ་ལ་ཉ་རྒྱ་བཙུགས་ནས་ཡོད། །རླུང་བསེར་བུ་ཡིན་ཡང་ཐར་ས་མེད། །ཁྱོད་མ་འདུག་ལ་མོར་འབྲོ་རྒྱུ་གྱིས། །རྒྱ་ཁྲིམས་དཔོན་རྣམས་ཀྱིས་མཐོང་བ་ན། །ཁྲིམས་ཆད་པའི་གནས་ནས་ཐར་ཐབས་མེད། །ཁྱོད་མ་འདུག་ལ་མོར་སོང་དང་དགའ། །རྒྱ་སྟོད་ན་བ་ཁྲ་ལེབ་འདི། །རྒྱལ་པོའི་མེ་ཏོག་ལྡུམ་ར་ཡིན། །རྒྱ་བློན་རྣམས་ཀྱི་མདའ་ར་ཡིན། །རྩྭ་རྩི་ཏོག་མེ་ཏོག་བཀྲ་ནས་ཡོད། །ཆབ་ཆུ་བོ་བཞུར་སྒྲ་ཤགས་སེ་ཡོད། །རྒྱ་ཡར་འགྲོ་འགྲོ་སྡོད་མི་ཆོག་དུས། །ཁྱོད་ཕྱོགས་ཡོང་སྒར་བཏབ་ཅི་འདྲ་ཡིན། །ཉི་མ་དེ་རིང་གདོང་གང་ལ། །རྩྭ་ལ་རྩྭ་རིན་དགོས་ལེ་ཡིན། །ཆུ་ལ་ཆུ་རིན་དགོས་ལེ་ཡིན། །ཟེར་བར་ཁྲོ་ཐུང་གིས་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །རྩེ་གཅིག་ཡིད་ཀྱིས་གསོལ་བ་འདེབས། །ཁམས་གསུམ་ཁ་ལོ་ཆོས་ལ་སྒྱུར། །ང་དང་ང་ངོ་མ་ཤེས་ན། །འཛམ་གླིང་གེ་སར་རྒྱལ་པོ་དེས། །ང་ལ་ཨ་ཁུ་ཁྲོ་ཐུང་ཟེར། །ཆོས་བློན་རྣམས་ཀྱི་དྭངས་རྩེ་ཡིན། །ཆུ་ཕ་རིའི་བུ་མོ་སྣང་མཐོ་མ། །ཚུར་ཉོན་དང་འདྲ་མ་འདི་འདྲ་ཡོད། །རྒྱ་སྟོད་ན་བ་ཁྲ་ལེབ་ལ། །སྒར་བཏབ་པ་གེ་སར་དཔོན་བློན་ཡིན། །རྒྱ་ནག་པོ་ཆོས་ལ་སྒྱུར་མཁན་ཡིན། །ན་ནིང་སྔོན་གྱི་གཞེ་ནིང་ལོར། །རྒྱ་རྒྱལ་ཀ་ར་གུར་མགོན་གྱིས། །བཙུན་མོ་མ་དབང་འདས་གྲོངས་སོང༌། །རྒྱལ་པོའི་མྱ་ངན་བསལ་བ་དང༌། །བཙུན་མོའི་གདུང་དེ་བཞུ་བ་དང༌། །རྒྱ་ནག་པོའི་ཁྲིམས་སྒོ་ཕྱེ་བ་ལ། །གླིང་གེ་སར་ལ་མོར་བྱོན་དགོས་ཟེར། །རྒྱ་ཡིག་པོ་ཏི་སེར་པོ་དེ། །རྒྱ་བྱ་གསུམ་ལ་བསྐུར་ནས་བྱུང༌། །དུས་དེ་རིང་གེ་སར་ཕེབས་ནས་ཡོད། །སྣེ་ལེན་དང་ཕེབས་བསུ་ལ་མོར་གྱིས། །ང་རྗེ་བོས་མངགས་པའི་ཕོ་ཉ་ཡིན། །ཇ་འདྲེན་དང་ཆང་ཞུས་དགོས་ལེ་ཡིན། །གོམ་གསུམ་སྤོས་པའི་ཚེགས་གླ་དགོས། །ཚིག་གསུམ་གཏམ་པའི་ལྕེ་དར་དགོས།།
ཟེར་ནས་གླུ་དེ་བླངས་པ་དང༌། རྒྱའི་བུ་མོ་རྣམས་ན་རེ། རྒྱ་ཡི་རྒྱལ་པོའི་མྱ་ངན་བསལ་བ་དང༌། བཙུན་མོའི་གདུང་བཞུ་བ། མུན་པ་ནག་པོའི་ཁྲིམས་སྒོ་ཕྱེ་བར་གེ་སར་གདན་འདྲེན་གྱི་ཡི་གེ་སྐུར་མཁན་ངེད་བུ་མོ་རྣམས་ཡིན། དེ་སྔོན་རྒྱའི་རྒྱལ་པོས་དེ་ལུགས་མཁྱེན་མེད་ཀྱང་ད་ངེད་རྣམས་ཀྱིས་རྒྱུ་མཚན་ཞུས་ནས་ཁྱེད་གེ་སར་དཔོན་བློན་རྣམས་ལ་ཕེབས་བསུ་དང༌། ཇ་འདྲེན་ཆང་ཞུ་བྱེད་དུ་འོང་ཟེར་ནས་རྒྱའི་བུ་མོ་རྣམས་རྒྱ་རྗེའི་ཕོ་བྲང་དུ་སོང་སྟེ་སྲས་མོ་ཝ་ཨ་ཀུན་འཚོས་དར་དཀར་པོ་ཞིག་རྒྱལ་པོར་མཇལ་དར་དུ་ཕུལ་ཙ་ན། རྒྱལ་པོས། ཁྱེད་བུ་མོ་རྣམས་ད་བར་གར་སོང་གསུངས་པ་དང༌། ཀུན་འཚོ་ན་རེ། རྒྱ་ཡི་ན་བ་ཁྲ་ལེབ་ན་སྒར་པ་བསམ་གྱིས་མི་ཁྱབ་པ་ཞིག་འདུག་པས། ཆུ་དགུ་འདུས་པའི་ཟམ་ཁ་ན་གླིང་གེ་སར་རྒྱལ་པོའི་ཁུ་བོ་མ་བཞི་དཔོན་པོ་ཁྲོ་རྒྱལ་ཡིན་ཟེར་བ་ཞིག་འདུག་པར་སྐད་ཅ་དྲི་བར་སོང་པ་ཡིན། དེར་ཁྲོ་ཐུང་གིས་གེ་སར་རྒྱལ་པོར་མ་ནེ་ནེའི་ལུང་བསྟན་ལ་ཁྱེད་རྒྱལ་པོའི་མྱ་ངན་སེལ། རྒྱ་མུན་པ་ནག་པོའི་ཁྲིམས་སྒོ་ཕྱེ་དགོས་པའི་ལུང་བསྟན་བྱུང་ནས་ཕེབས་པས་སྣེ་ལེན་ཕེབས་བསུ་ལ་ཡོང་དགོས་ཟེར་འདུག་ཅེས་ཞུས་པས། རྒྱལ་པོའི་ཞལ་ནས། འཛམ་གླིང་སྐྱེས་བུ་དོན་གྲུབ་དེ། ཆོས་སངས་རྒྱས་བསྟན་པ་འཛིན་པའི་རྒྱལ་པོ། ཕྱི་མ་འདྲེན་པའི་བླ་མ་དངོས་ཡིན་ཀྱང༌། ངས་གདན་འདྲེན་མ་ཞུས་པར་ག་ལ་ཕེབས་སྲིད། བོད་ལ་གཡོ་སྒྱུ་དང་མིག་འཁྲུལ་མཁན་འགའ་རེ་ཡོད་པས་དེ་ཚོའི་གཡོ་འཕྲུལ་ཡིན་སྲིད་པས། དེ་ཅི་ཡིན་བརྟག་པར་རྒྱ་འདྲེ་རྣམས་བཏང་ནས་བལྟ་དགོས་ཟེར་ནས་རྒྱ་འདྲེ་རྣམས་བཏང༌། དེར་ཁྲོ་ཐུང་གི་བསམ་པར་ད་རྒྱའི་ཇ་འདྲེན་ཆང་ཞུ་བྱེད་མཁན་ཡོང་བ་ཡོད་པས། དེ་རིང་ངས་བྱེས་དོན་གྲུབ་པས་དཔོན་བློན་རྣམས་ཀྱི་མདུན་དུ་ངོ་སོ་དགུང་ལས་མཐོ་བ་ཞིག་འོང་བར་གདའ་བསམ་ནས་བསྡད་ཙ་ན། རྒྱ་འདྲེ་རྣམས་ཁ་གདངས། མཆེ་བ་གཙིགས། ཁ་རླངས་ཀྱིས་མུན་པ་འཁྲིགས་ནས་སླེབས་པས། ཁྲོ་ཐུང་སྒྱིད་པ་འདར། ངོ་མདངས་འགྱུར། ཞེད་སྣང་གིས་བླ་ཁྱེར་བ་ལྟར་བྱས་ནས་རྟ་ཀུ་ཀུ་རོག་ཙོག་ལ་བཞོན་ནས་སྒར་ཕྱོགས་སུ་ཕྱི་ལྟས་ཙམ་ཡང་བྱེད་མ་ཕོད་པར་བྲོས་སོང་ངོ༌།།
སྐབས་དེར་བློན་པོ་ཕྱིང་སྔོན་གྱིས། ཁྲོ་ཐུང་གི་བྲོས་ལུགས་ལ་བལྟས་ན་རྒྱབ་ནས་འདེད་མཁན་ཞིག་ཡོད་པ་ཐག་ཆོད་ཟེར། ཁྲོ་ཐུང་སྒར་ནང་སླེབས་ཙམ་ལ་རྒྱ་འདྲེ་རྣམས་སྒར་ཐོག་ལ་ཤོར་ཡོང་པས། གེ་སར་གྱིས་འདན་མ་དང་བུ་ཆུང་གཉིས་ལ་རྒྱ་ལ་དགོས་པའི་རྫས་དུག་སྦྲུལ་ཟེར་རེ་མགོ་འཇམ་དེ་རྒྱ་འདྲེའི་ཕྱོགས་སུ་སྟོན་དང་རྒྱ་འདྲེ་རྣམས་སླར་ལོག་འགྲོ་བ་ཡིན་གསུངས་པ་ལྟར་བྱས་པས་ལོག་སོང་ངོ༌།། སླར་ཡང་རྒྱ་ཁྱི་དང༌། རྒྱ་བྱ། དུག་སྦྲུལ་རྣམས་བཏང༌། དེ་རྣམས་ཀྱང་ཙན་དན་སྦྲུལ་སྙིང་དང༌། མི་ཉག་སྦ་མོ་ཚིགས་གསུམ། ཐན་གླ་བ་རོག་པའི་སྙིང་ཚིལ་སོགས་རྒྱ་ལ་མཁོ་བའི་རྫས་རྣམས་བེད་སྤྱད་པས་ཁྱི་བྱ་རྣམས་སླར་ལོག དུག་སྦྲུལ་རྣམས་ཤི་བས། དེར་གེ་སར་རྒྱལ་པོས། དུག་སྦྲུལ་འདི་རྣམས་ཤི་འདུག་པས། ཞེ་སྡང་སྦྲུལ་ལས་སྡིག་པ་ཆེ་བ་མེད་པས་ད་འགྲོ་དོན་འོང་བ་ལྟ་ཞོག་སྡིག་པོ་ཆེ་ཞིག་ལས་མི་འོང་འདུག་ཟེར་ནས་སྤྱན་ཆབ་བསིལ་བཞིན་བཞུགས་པའི་སྐབས་སུ། སློབ་དཔོན་པདྨ་འབྱུང་གནས་ནམ་མཁའ་ཆོས་ཉིད་ཀྱི་ཕོ་བྲང་ནས་འཁོར་དཔའ་བོ་མཁའ་འགྲོའི་ཚོགས་ཉི་ཟླ་ལ་རྡུལ་འཁྲིགས་པ་ལྟར་བྱས་ནས་གསུངས་པ། འཛམ་གླིང་གེ་སར་རྒྱལ་པོ་ལགས། །ཐུགས་མ་ཡེངས་ང་ལ་ཡར་གསོན་དང༌། །ང་ཨོ་རྒྱན་པདྨ་འབྱུང་གནས་ཡིན། །ལྷོ་ནུབ་རྔ་ཡབ་གླིང་ཕྲན་ནས། །གེ་སར་ཁྱོད་ཀྱི་གྲོགས་ལ་འོང༌། །ཁྱོད་སྔ་དྲོ་གསོད་པའི་ཤན་པ་ཡིན། །ཕྱི་དྲོ་འདྲེན་པའི་བླ་མ་ཡིན། །དུག་སྦྲུལ་མང་པོ་ཤི་བ་དེ། །དེ་འདྲའི་གཟུགས་བརྙན་མང་པོ་བྲིས། །དུག་སྦྲུལ་རྣམ་ཤེས་དེ་ལ་ཁུགས། །སྦྲུལ་གཟུགས་ཡེ་ཤེས་མེ་ལ་སྲེགས། །དུག་སྦྲུལ་ཐར་པའི་ཞིང་དུ་དྲོངས། །དེ་ནས་ཁྱེད་ལ་ཉེས་སྒྲིབ་མེད། །ཅེས་གསུངས་པས། གེ་སར་རྒྱལ་པོས་དེ་ལྟར་མཛད་དོ།།
དེ་ནས་གེ་སར་གྱི་ཞལ་ནས། གཞན་ཡིན་ན་བསུ་བ་དང་སྣེ་ལེན་སོགས་ཡོང་ཚོད་ཡིན་ཡང་དེ་འདྲ་མི་བྱེད་འདུག ད་ཅི་བྱས་ཀྱང་ད་ལྟའི་སྐབས་སུ་རྒྱ་ནག་པོ་ཆོས་ལ་འཛུད་པའི་འགྲོ་དོན་མི་འོང་འདྲ་གསུངས་པའི་སྐབས་སུ། མི་ཆུང་ཁ་བདེས་འདི་ལྟར་ཞུས་སོ།། འཛམ་གླིང་གེ་སར་རྒྱལ་པོ་ལགས། ཁྱེད་དེ་འདྲའི་ཐུགས་ཆུང་མི་དགོས། འདི་ལྟར་སླར་གླིང་ལ་ལོག་ཕྱིན་ན་སྒང་པ་བོད་ཀྱིས་འཕྱ་བའི་ཡུལ་ལས་མེད། ཁྱེད་ལ་བླ་མ་ཡི་དམ་སངས་རྒྱས་བྱང་སེམས་སོགས་ཀྱི་སྡོང་གྲོགས་སྤྲིན་ཚོགས་འཁྲིགས་པ་ལྟ་བུ་ཡོད་པས། གལ་ཆེ་བའི་དུས་སུ་ལུང་བསྟན་ཞིག་མི་འོང་མི་སྲིད་པས་ཞག་ཁ་ཤས་བཞུགས་དང༌། ངེད་དཔལ་ཐུལ་རྣམས་ཀྱིས་ཀྱང་དཀོན་མཆོག་ལ་གསོལ་བ་བཏབ་སྟེ་རྨི་ལམ་འདྲ་ཨེ་ཡོང་བལྟ་ཞུས་པས། གེ་སར་གྱིས། ཁྱོད་མི་ཆུང་ཤེས་རིག་བཀྲ་བས་དེ་ཡང་བདེན་ཟེར་རོ།།
དེའི་མཚན་དེར་དཔོན་བློན་གཞན་རྣམས་ལ་རྨི་ལྟས་ཅི་ཡང་མ་བྱུང་ཡང་ཞོགས་པ་མི་ཆུང་ཁ་བདེས་གདོང་འཛུམ་དམུལ་ལེ་དར་དཀར་པོ་ཞིག་ལག་ཏུ་བཟུང་སྟེ། ཁྱེད་དཔོན་བློན་རྣམས་ལ་རྨི་ལྟས་མ་བྱུང་པ་འདྲ། ང་མི་ཆུང་ལ་རྨི་ལམ་འདི་ལྟར་བྱུང་ཟེར་ནས་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །ང་མདང་གསུམ་འཁྲུལ་བའི་སྣང་བ་ལ། །ཁྱེད་གེ་སར་རྒྱལ་པོའི་གུར་སྒོ་ལ། །ཁྲི་གདུགས་ཉི་མ་ཤར་བ་རྨིས། །ནག་པོ་རྒྱ་ཡི་ས་ཆ་ལ། །ཉི་མ་གླིང་བཞི་བསྐོར་བ་རྨིས། །ཉི་ཟེར་གླིང་ལ་འཁོར་པ་རྨིས། །དེ་ནས་མི་ཆུང་ང་རང་ནི། །བོང་བུའི་རྒྱབ་ལ་བཞོན་པ་རྨིས། །མགོ་ལ་རྩྭ་ཞྭ་གྱོན་པ་རྨིས། །རྐང་ལ་རྩྭ་ལྷམ་གྱོན་པ་རྨིས། །ཆུ་དགུ་འདུས་པའི་ཟམ་ཁ་ལ། །བུད་མེད་བདུན་དང་ཐུག་པ་རྨིས། །གླུ་དང་ཁ་མཚར་བཀྱེ་བ་རྨིས། །རྨི་ལམ་རྨི་ལུགས་འདི་འདྲ་གདའ། །མངོན་ཤེས་ཡིན་ན་ཐིག་པར་ཤོག །རྨི་ལམ་ཡིན་ན་མ་ཐིག་ཤོག །གླུ་འཁྲུལ་པ་སོང་ན་མཐོལ་ལོ་བཤགས། །ངག་འཁྲུལ་པ་སོང་ན་བཟོད་པར་གསོལ། །ཁྱེད་རྒྱལ་བློན་ཐུགས་ལ་དེ་ལྟར་ཞོག །
ཅེས་གླུ་དེ་ལྟར་བླངས་པས། གེ་སར་རྒྱལ་པོ་ཐུགས་རབ་ཏུ་དགྱེས་ཏེ། འོ་ན་མི་ཆུང་གི་དེ་རང་བཞིན་གྱི་རྨི་ལམ་ཞིག་མིན་པས། ཁྱེད་བློན་པོ་རྣམས་དང་ཤང་པའི་བུ་མོ་བཅས་ནས་བཤད་བཀྲོལ་ཤེས་པ་ཡོད་ན་སྨྲོས་ཤིག ཅེས་གསུངས་ཙ་ན། ཤང་པའི་བུ་མོས་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །ང་དང་ང་ངོ་མ་ཤེས་ན། །བྱ་ཤང་པའི་བུ་མོ་མོད་སྒྲོན་ཡིན། །ཚུར་གསོན་དང་གེ་སར་རྒྱལ་པོ་ལགས། །མདང་གསུམ་མི་ཆུང་རྨི་ལམ་དེ། །རྨི་ལམ་མི་འདྲ་མངོན་ཤེས་འདྲ། །གླིང་གེ་སར་རྒྱལ་པོའི་གུར་སྒོ་ན། །ཁྲི་གདུགས་ཉི་མ་ཤར་ལེ་དེ། །ཁྱེད་གེ་སར་ཁྲི་གདུགས་ཉི་མ་འདྲ། །ནག་པོ་རྒྱ་ཡི་ས་ཆ་ནས། །ཁྲི་གདུགས་ཀྱིས་གླིང་བཞི་བསྐོར་ལེ་རེད། །རྒྱ་མུན་ནག་ཆོས་ལ་བསྒྱུར་རྟགས་རེད། །ཉི་ཟེར་གླིང་ལ་འཁོར་ལེ་དེ། །རང་དཔོན་པོ་གླིང་ལ་འཁོར་བའི་རྟགས། །བོད་ཕྲུག་མི་ཆུང་ཁ་བདེ་དེ། །བོང་བུའི་རྒྱབ་ལ་བཞོན་པ་དང༌། །རྐང་ལ་རྩྭ་ལྷམ་གྱོན་པ་སོགས། །གཞི་བདག་ལྷ་ཀླུས་སྐྱོབས་ལེ་རེད། །ཆུ་དགུ་འདུས་པའི་ཟམ་པ་དེ། །རྒྱ་ཆུ་དགུ་འདུས་པའི་ཟམ་པ་རེད། །བུད་མེད་བདུན་དང་ཐུག་ལེ་དེ། །རྒྱ་ཁྲིམས་ཐར་བུ་མོ་སྤུན་བདུན་རེད། །གླུ་ཁ་མཚར་གཏམ་ཁ་བཀྱེ་ལེ་དེ། །རྒྱ་གླིང་གི་འདུན་མ་འོང་རྟགས་རེད། །རྨི་ལམ་མ་རེད་མངོན་ཤེས་རེད། །ཁྱེད་གེ་སར་ཐུགས་ལ་དེ་ལྟར་ཞོག།
ཅེས་རྨི་ལམ་བཤད་བཀྲོལ་གྱི་གླུ་དེ་ལྟར་ཕུལ་ལོ།། དེ་ལ་གེ་སར་རྒྱལ་པོས། ཤང་པའི་བུ་མོས་ཟེར་བ་ལྟར་བདེན་པར་འདུག་པས། ཁྱོད་མི་ཆུང་མངགས་ལེ་མིན་ཏེ་རྒྱ་ནག་པོའི་ཡུལ་ལ་འགྲོ་བའི་དུས་ལ་བབས། ཞེས་གསུངས་པས། མི་ཆུང་རྨི་ལྟས་ལྟར་རྒྱ་ཆུ་དགུ་འདུས་པའི་ཟམ་ཁར་སོང་ངོ༌།།
དེ་ནས་མི་ཆུང་ཆུ་དགུ་འདུས་པའི་ཟམ་ཁར་ཡོང་པ། ཁྲིམས་ཐར་བུ་མོ་སྤུན་བདུན་གྱིས་མཐོང་སྟེ་སུ་ཡིན་ནམ་སྙམ་ནས་བལྟ་བར་ཡོང་ནས། དཔོན་ཆེན་བུ་མོ་གཡུང་དྲུང་མཚོ་ཟུར་དུ་བུད་ནས་ན་རེ། ཆུ་ཕ་རིར་ཡོད་པའི་མི་ཕོ་ཁྱོད། ས་འདི་ལ་ཡོང་དོན་ཅི་འདྲ་ཡིན་ཟེར་བར་མི་ཆུང་གིས་བསམ་པར། རྒྱ་མོ་འདི་ཚོས་སྔར་ཁྲོ་ཐུང་ལ་གནོད་པ་བྱས་པ་ལྟར་ང་ལའང་བྱེད་འོང་སྙམ་སྟེ་གླུ་འདི་བླངས་པར་གདའ་འོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །ཚུར་ཉོན་དང་རྒྱ་མོ་སྤུན་བདུན་རྣམས། །ཕོ་ང་དང་ང་ངོ་མ་ཤེས་ན། །བོད་ཕྲུག་མི་ཆུང་ཁ་བདེ་ཡིན། །ཨ་རོགས་རྒྱ་མོ་ལོ་བརྒྱ་ཚོ། །ཚུར་ཚུར་མ་ཡོང་ཕར་ལ་སོང༌། །ཨ་ཅེ་རྒྱ་མོའི་བཙོག་ལུགས་ལ།། རྒྱ་མོ་ར་མགོ་རེའུ་སུག་མ། །ར་ཚང་ནང་ནས་འོང་བ་འདྲ། །ར་དྲིས་ནམ་མཁའ་གང་ནས་བྱུང༌། །རྒྱ་མོ་མི་མགོ་ཁྱི་སུག་མ། །ཁྱི་ཚང་ནང་ནས་འོང་བ་འདྲ། །ཁྱི་དྲིས་ས་གཞི་ཁྱབ་ནས་བྱུང༌། །རྒྱ་མོའི་མིང་གི་སྡུག་ལུགས་ལ། །མི་མིང་མ་རེད་ཁྱི་མིང་རེད། །ཁྱི་རྒྱལ་ལིར་འདྲ་བས་རྒྱ་མོ་ཟེར། །རྒྱ་རྒྱལ་ཀ་ར་གུར་མགོན་དེས། །བཙུན་མོའི་རོ་རུལ་རུམ་པ་དེ། །རྒྱ་ནག་པོ་མོ་ཟད་ཁུར་བ་འདྲ། །མོ་ཟད་རྩ་བ་རོ་ལ་ཐུག །དེ་རུམ་ནས་གསོན་གོ་མི་ཆོད་དོ། །ཁྲིམས་བཙན་པོས་རྒྱལ་ཁམས་མནན་པ་དེ། །རང་ཕུང་བྱེད་པའི་གཞི་མ་རེད། །རྒྱ་ཁྲིམས་ཁ་བཙན་ཡང་སྐྲག་དོན་མེད།།
ཟེར་ནས་གླུ་དེ་ལྟར་བླངས་པས། རྒྱ་མོ་རྣམས་ཀྱི་ནང་ནས་ཚོང་དཔོན་བུ་མོ་དར་ལུ་སྐྱིད་ཀྱིས། ཡ་ཁོ་རེ་མི་ཕོ་ཁེར་རྐྱང་ཁྱོད། ཚུར་གསོན་དང་གནས་ལུགས་འདི་འདྲ་ཡོད་ཟེར་ནས་གླུ་འདི་བླངས་སོ།།
ཤར་རྒྱ་ནག་རི་བོ་རྩེ་ལྔ་ནས། །སྐུ་མི་འགྱུར་འཕགས་པ་འཇམ་དབྱངས་མཁྱེན། །བུ་མོའི་གླུ་སྣ་སྐྱོང་རོགས་མཛོད། །མོ་ང་དང་ང་ངོ་མ་ཤེས་ན། །རྒྱ་ནག་པོའི་ཚོང་ར་བར་མ་ནས། །ཚོང་དཔོན་བུ་མོ་དར་སྐྱིད་ཡིན། །ཁྱོད་དེ་རིང་ང་ཡི་གླུ་ལ་ཉོན། །མི་ངན་གླེན་པ་ཚིག་སྟོབས་ཆེ། །ཁྱི་ངན་ཤོར་ན་རྒྱུགས་སྙིང་ཆེ། །མི་ངན་ཚིག་ལ་ཅི་ཡང་འབྱུང༌། །ཁྱི་ངན་ཟུག་སྐད་ལུང་པ་གང༌། །ཁྱོད་མི་ངན་ཡོང་བ་གང་ནས་ཡོང༌། །འདི་ལ་ཡོང་དོན་ཅི་འདྲ་ཡིན། །ཁྱོད་ཆ་ལུགས་གླིང་དང་མི་འདྲ་འདུག །བཤད་ལུགས་གླིང་དང་མི་མཚུངས་འདུག །ཁ་ཕོ་རྒྱ་ལ་སྒྲོག་སྟངས་ལ། །ཁྱོད་བསོད་ཟད་ཆག་སྒོའི་སྣ་འདྲེན་རེད། །ཁྱོད་དྲིས་པའི་གཏམ་ལན་མ་དྲང་ན། །རྒྱ་ནག་པོའི་ཁྲིམས་ལ་གཏུགས་ལེ་ཡིན།།
ཟེར་ནས་གླུ་དེ་བླངས་པས། ཡང་མི་ཆུང་གིས། ཚུར་གསོན་དང་བུ་མོ་སྤུན་བདུན་རྣམས། །ངའི་ཆ་ལུགས་གླིང་དང་འདྲ་ལེ་མིན། །ང་ཡུལ་ཁམས་བཅོ་བརྒྱད་འགྲིམ་མྱོང་ཡོད། །ཆ་ལུགས་བཅོ་བརྒྱད་སྤྲས་ནས་ཡོད། །བཤད་ལུགས་གླིང་དང་འདྲ་ལེ་མིན། །སྐད་རིགས་བཅོ་བརྒྱད་ཤེས་ལེ་ཡིན། །བྱ་ངང་པ་བྱང་ལ་འོང་ལེ་དེ། །མཚོ་མེ་ལོང་ཙམ་ལ་བལྟས་ནས་འོང༌། །ང་མི་ཆུང་འདི་ལ་ཡོང་བ་དེ། །རྒྱ་ནག་པོའི་ཁྲིམས་སྒོ་ཡངས་སོ་ཟེར། །ཁྱོད་རྒྱ་མོའི་གླུ་སྒོ་ཡངས་སོ་ཟེར། །དེ་ཟེར་བས་འདི་ལ་ཡོང་ལེ་ཡིན། །ངའི་རྒྱབ་ལ་ཡུང་མངར་སྒྱེ་གང་ཡོད། །ཁྱོད་རྒྱ་མོས་ཉོ་ན་བཙོང་རྒྱུ་ཡིན། །ཨེ་ཉོ་མི་ཉོ་རང་མོས་གྱིས།།
ཞེས་གླུ་དེ་བླངས་པས། དེར་རྒྱ་མོ་རྣམས་ཀྱིས། མི་ཆུང་གི་ཡུང་མངར་ཟེར་བ་དེ་ཟ་མ་མྱོང་པས། ཟས་དེ་ཅི་འདྲ་འདུག་ཅིག་བལྟ་དགོས་འདུག་ཟེར་ནས་ཉོ་རྒྱུ་གྲོས་འཆམ་སྟེ། སྲས་མོ་ཝ་ཨ་ཀུན་མཚོ་ན་རེ། བོད་ཕྲུག་མི་ཆུང་ཁ་བདེ་ལགས། རྟ་མགྱོགས་ཞན་དེ་རྒྱུགས་ནས་ལྟ། ཕོ་རྒོད་ཞན་དེ་གཏམ་གྱིས་ལྟ། མཚོན་རྣོ་ཞན་དེ་སོ་ལ་ལྟ། སྔོན་ལ་ཡུང་མངར་ཞིག་བྱིན་དང་ཟེར་པར། མི་ཆུང་ན་རེ། ཡུང་མངར་འདི་སུ་ལ་ཡང་སྟེར་རྒྱུ་མེད། འོན་ཀྱང༌། ཁྱེད་རྒྱ་མོ་རྣམས་སྐད་འབྲེལ་བའི་ངོ་ཤེས་ཡིན་པས་སྟེར་བ་ཡིན་ཟེར་ནས་རེ་རེ་བྱིན་པ་དང༌། རྒྱ་མོ་རྣམས་ཀྱིས་ཟས་པས། དེ་ནས་རྒྱ་མོ་རྣམས་ལུས་མ་བདེ། མགོ་ཡོམ་འཁོར། སྐྱུག་མེར་ལངས། དྲི་ངན་ཤོར། སེམས་འཁྲུལ་ནས་ཅ་ཅོ་སྣ་ཚོགས་སྨྲ་བ་ཞིག་བྱུང་བས། དེར་སྲས་མོ་ཝ་ཨ་ཀུན་མཚོ་ན་རེ། གྲོགས་མོ་ཚོ། ངེད་རྣམས་ལ་མི་ཆུང་གིས་བྱིན་པའི་ཡུང་མངར་དེ་སྐྱོན་ཅན་ཞིག་ནི་གདའ་བས། ཁྱེད་ཁ་མཚར་གླུ་མོ་མཚོས་ཁོས་ཅི་ཟེར་ཉམས་སད་ཀྱི་གླུ་ལེན་ཞིག་གྱིས་ཟེར་པས། ཁ་མཚར་གླུ་མོ་མཚོས་གླུ་འདི་ལྟར་བླངས་སོ།།
ཚུར་ཉོན་དང་བོད་ཕྲུག་ཁ་བདེ་ཁྱོད། །ང་དང་ང་ངོ་མ་ཤེས་ན། །རྒྱ་ནག་པོའི་བུ་མོ་སྤུན་བདུན་ལས། །ཆུང་བ་ཁ་མཚར་གླུ་མཚོ་ཡིན། །གླུ་ཁ་ཤགས་རང་དབང་ཐོབ་ལེ་ཡིན། །ཁྱོད་ཆག་སྒོ་ཅན་གྱི་མི་ཞིག་གདའ། །གཏམ་ལ་རྫུན་ཞིག་ཡོད་ལེ་གདའ། །ཟས་ལ་དུག་ཅིག་ཡོད་ལེ་གདའ། །ཁ་སོར་གསུམ་གྱོད་ཀྱི་སྒོ་མོ་ཡིན། །ཕྱེ་བ་སླ་སྟེ་རྒྱག་པ་དཀའ། །ལྕེ་ལེབ་ཆེན་གྱོད་ཀྱི་གཞི་མ་ཡིན། །རྐྱོང་བ་སླ་སྟེ་བསྐུམ་པ་དཀའ། །ཁྱོད་མི་གསར་གཏམ་འདོད་བྱེད་མི་རེད། །རྟ་གསར་རྒྱུགས་འདོད་བྱེད་ལེ་རེད། །ཁྱོད་དེ་འདྲའི་མཁས་པ་ཡོད་ན་ནི། །སྲིད་པ་ཆགས་པའི་ཕ་དེ་ཤོད། །སྲིད་པ་ཆགས་པའི་མ་དེ་ཤོད། །བོད་དབུ་ནག་ཆགས་པའི་གཞི་མ་ཤོད། །དེ་ཤེས་ན་མཁས་པའི་གྲལ་ལ་འཇོག །དེ་མ་ཤེས་ཉི་མ་རྩ་གཅིག་ནས། །རྒྱ་སྟོད་ན་བ་ཁྲ་ལེབ་ཀྱི། །སྒར་དེ་ལ་ཅི་ཡོད་ང་ལ་དགོས།།
ཞེས་གླུ་དེ་བླངས་པ་ན། མི་ཆུང་ན་རེ། སྔ་གཏམ་གོང་མ་གཙོ་ཆེ། ཕྱི་གཏམ་འོག་མ་བརླིང་དགོས། ཁྱོད་རྒྱ་མོས་ཟེར་བ་ལྟར་བྱས་ཆོག་སྟེ། སྒར་འདི་ལ་ཅི་ཡོད་ངས་སྟེར་ཐག་མི་ཆོད། དེ་མིན་གུར་མང་པོ་དེ་ལ་སྐྱིད་སྡུག་བལྟས་ཆོག་ཟེར་ཏེ་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །ཚུར་གསོན་དང་བུ་མོ་གླུ་མོ་མཚོ། །ཁྱོད་སྣང་བ་དེ་ཡི་མཐོ་ལུགས་ལ། །ལོང་བའི་བུ་མོ་ཡིན་པ་འདྲ། །དེ་མིན་རྒྱ་མོ་རྣམ་པ་ཚོའི། །བྱ་སྤྱོད་དེ་ཡི་ངན་ལུགས་ལ། །ཇག་རྐུན་བུ་མོ་ཡིན་པ་འདྲ། །ཟ་མ་མོ་ཡི་ལོ་རྒྱུས་དེ། །བཤད་ན་མི་མཛེས་བཞག་ན་མཛེས། །ཨ་ཙི་མི་ཞུ་ཀུ་རེ་ཡིན། །གཏམ་ཀུ་རེ་མེད་ན་ལྐུག་གཏམ་ཡིན། །ཟས་མཆོད་ཁ་མེད་ན་ཁྱི་ལྟོ་ཡིན། །སྲིད་པ་ཆགས་པའི་ཆགས་ལུགས་དེ། །ཁྱོད་ཀྱིས་མི་ཤེས་ང་ཡིས་ཤེས། །སྲིད་པ་ཡས་དང་ཡས་ནས་ཆགས། །སྲིད་པ་མས་དང་མས་ནས་ཆགས། །སྲིད་པ་ཆགས་པའི་ཕ་ཡང་ཡོད། །སྲིད་པ་ཆགས་པའི་མ་ཡང་ཡོད། །ཕུ་ཡས་ན་བྱ་ཞིག་བྱུང་ལེ་དེས། །སྒོ་ང་དྲུག་གསུམ་བཅོ་བརྒྱད་བཞག །སྒོང་དྲུག་བར་མ་མི་ལ་ཆད། །དེ་ཡི་ཆགས་ཚུལ་ཅི་འདྲ་རེད། །དོན་དེ་ཡི་འགྲེལ་བཤད་མ་ཤེས་ན། །དོན་ཆེན་པོ་ང་ལ་ཤོར་ནས་ཐལ།།
ཞེས་གླུ་དེ་ལྟར་བླངས་ནས། རྒྱའི་བུ་མོ་རྣམས་དང་ཕན་ཚུན་གླུ་ལེན་ཤགས་འགྱེད་མང་དུ་བྱས་མཐར། མི་ཆུང་གིས་གེ་སར་རྒྱལ་པོར་རྒྱ་ཡི་ཡི་གེ་དང༌། མ་ནེ་ནེས་ལུང་བསྟན་བྱུང་བ་ལྟར་རྒྱ་ཡུལ་ལ་འོང་སྟེ། རྒྱ་སྟོད་ན་བ་ཁྲ་ལེབ་ལ་སླེབས་ནས་ཉིན་གྲངས་མང་དུ་ཕྱིན་ཀྱང་རྒྱའི་བསུ་མ་སྣེ་ལེན་ཅི་ཡང་མ་ཡོང་པའི་གནས་ཚུལ་ཞིབ་པར་བཤད་པ་ན། སྲས་མོ་ཝ་ཨ་ཀུན་མཚོས་ཁྱེད་ཀྱིས་ཟེར་བ་བདེན་ཡང༌། ང་ཚོ་མྱུར་དུ་ཡབ་རྒྱལ་པོའི་མདུན་དུ་སོང་ནས་གེ་སར་རྒྱལ་པོ་བྱོན་འདུག་པ་སྙན་ཞུ་བྱེད་པ་ལས་དྲི་བ་དྲིས་ལན་མི་ཁོམ། དེ་ནས་ཅི་དགོས་བྱེད་འོས་ཟེར་ནས་བུ་མོ་རྣམས་སོང༌། མི་ཆུང་ཡང་སླར་སྒར་དུ་ལོག་སྟེ། གེ་སར་རྒྱལ་པོའི་སྐུ་མདུན་ལ་སོང་པ་དང༌། གའུའི་ནང་ནས་དར་ཞིག་ཕུལ་ནས་ཅི་བྱུང་གི་གནས་ཚུལ་རྣམས་ཞིབ་ཏུ་ཞུས་སོ།།
དེ་ནས་རྒྱ་མོ་རྣམས་རྒྱ་རྗེའི་མདུན་དུ་སོང་ནས་སྲས་མོས་རྒྱལ་པོ་ལ་ཞལ་ལག་དྲངས་པ་ན། རྒྱལ་པོས། ཁྱོད་ད་བར་གང་དུ་སོང༌། ཟས་ཟ་བའི་དུས་ཚོད་ཀྱང་ཡོལ་འདུག ནག་མོའི་ལོང་གཏམ་ལ་སྐྱ་མིའི་ཉིན་ལམ་བཤོལ་ཟེར་བ་བདེན་པར་འདུག་གསུངས་པ་ན། སྲས་མོ་ན་རེ། ཡབ་ཆེན་ལགས། ད་ནངས་མཁར་སྟེང་ནས་བལྟས་དུས། ཆུ་དགུ་འདུས་པའི་ཟམ་པ་ལ་མི་གཅིག་འདུག་པ་མཐོང་པས། དེ་སུ་ཡིན་བལྟ་བར་སོང་སྟེ་ངེད་བུ་མོ་རྣམས་ཀྱིས་གླུ་ལེན་དང་དྲི་བ་མང་པོ་བྱས་ཙ་ན། རྒྱ་སྟོད་ན་བ་ཁྲ་ལེབ་ལ་ཡོད་པའི་སྒར་པ་དེ་ནི་གེ་སར་རྒྱལ་པོ་ནག་པོ་རྒྱ་ལ་ཕེབས་པའི་སྒར་ཡིན་འདུག་པས། མྱུར་དུ་ཕེབས་བསུ་དང་ཇ་འདྲེན་ལ་སོགས་ཡོང་དགོས། གལ་ཏེ་མགྲོན་བསུར་མི་ཡོང་ན་རྒྱལ་བློན་རྣམས་གླིང་ལ་ལོག་འགྲོ་བ་ཡིན་ཟེར་འདུག་ཞུས་པས། རྒྱ་རྒྱལ་ན་རེ། སྲིད་པ་ས་ཆགས་པ་ནས་ང་གནམ་བསྐོས་རྒྱལ་པོ་ལས་ལྷག་པ་ལྟ་ཞོག ང་དང་མཉམ་པ་ཞིག་ཀྱང་ས་སྟེང་ལ་ཡོད་པ་ག་ལ་སྲིད། དེ་བས་ང་བསུ་བ་ལ་འགྲོ་བབས་མེད། ངས་གེ་སར་རྒྱ་ལ་གདན་འདྲེན་ནི་ཞུས་མེད། ཁོ་རང་སྣང་གིས་འོང་བར་བསུ་བར་འགྲོ་མི་དགོས་གསུངས།
དེ་ནས་རྒྱལ་པོས་མི་ཐོས་པའི་ས་ནས་བུ་མོ་རྣམས་གྲོས་བྱས་པས། གེ་སར་དཔོན་བློན་ས་ཐག་རིང་པོ་འདི་ལ་ཕེབས་གྲུབ་ནས་བསུ་བ་དང་ཇ་འདྲེན་མ་བྱས་པར་འདི་མུར་བཞག་ན་མི་རུང༌། ཞུ་ཡིག་ཕུལ་བ་དགའ་ཟེར་བ་ན། ཚང་མ་དེར་འཐད་པ་བྱུང་སྟེ་མཚན་མོ་མར་མེའི་འོད་ལ་བརྟེན་ཏེ། གེ་སར་རྒྱལ་པོ་ལགས། སྔོན་གྱི་ཡི་གེ་དེ་ཡབ་རྒྱལ་པོའི་ལྐོག་ནས་ངེད་བུ་མོ་རྣམས་ནས་ཕུལ་བ་ཡིན། ཁྱེད་ཐུགས་ངལ་མ་མཛད་པར་འདིར་ཕེབས་པར་འཚལ། ངེད་ཀྱི་ཡབ་རྒྱལ་པོས་གསུངས་པ་ལ། གེ་སར་རྒྱལ་པོ་དང་ངེད་གཉིས་སྔོན་གྱི་ལས་སྨོན་ཡོད་པས་བསུ་བར་འགྲོ་མི་དགོས་འདིར་ཕེབས་ཡོང་གསུངས། ཁྱེད་ཀྱིས་བློན་པོ་ཤེས་རིག་ལྡན་པ་ཞིག་ལ་རྒྱལ་པོར་མཇལ་རྟེན་ཁྱད་དུ་འཕགས་པ་ཞིག་བསྐུར་ཏེ་ཐོངས་ཤོག་ཟེར་ནས་ཞུ་ཡིག་བསྐུར་རོ།།
དེ་ནས་རྒྱ་བྱ་རྣམས་ཀྱིས་ཡི་གེ་གེ་སར་རྒྱལ་པོའི་བཞུགས་སྒར་དུ་ཁྱེར་སྟེ་མི་ཆུང་གི་གུར་རྩར་བབས། མི་ཆུང་གིས་བྱ་མགུལ་ནས་ཡི་གེ་བླངས་ཏེ་གེ་སར་རྒྱལ་པོར་ཕུལ་པས། ཐུགས་རབ་ཏུ་མཉེས་ཏེ་ཡི་གེའི་འབྲུ་དོན་ལྟར་ག་དར་བློན་པོ་ཕྱིང་སྔོན་གཙོས་བློན་པོ་བཞི་ལ་ནོར་བུ་ཕ་རོལ་དཔུང་འཇོམས་བསྐུར་ཏེ་རྒྱ་རྗེའི་མདུན་དུ་བཏང༌། དེར་བློན་པོ་རྣམས་ཡོང་བ་ཁ་མཚར་གླུ་མོ་མཚོས་མཐོང་སྟེ་རྒྱ་རྗེའི་སྙན་དུ་གསོལ་བས། རྒྱ་རྒྱལ་གྱི་ཞལ་ནས། བུ་མོ་རྣམས་ཀྱིས་བཤད་པ་ལྟར་གླིང་རྗེ་གེ་སར་རྒྱལ་པོ་ན་བ་ཁྲ་ལེབ་ལ་ཕེབས་ནས་ཡུན་རིང་སོང་བ་འདྲ། ཁོང་གི་བློན་པོ་རྣམས་ང་ལ་མཇལ་དུ་ཡོང་བ་ལ་བསུ་བ་བྱེད་དུ་ཁྱོད་བློན་པོ་ཧ་ཤ་རྔམ་པ་སོང་གསུངས།
དེ་ནས་བློན་པོ་ཧ་ཤ་རྔམ་པ་འཁོར་དང་བཅས་པས་གླིང་བློན་རྣམས་ལ་བསུ་བ་དང་སྣེ་ལེན་སོགས་བྱས། དེར་གླིང་བློན་རྣམས་ནས་རྒྱ་རྗེ་ལ་ནོར་བུ་དང་དར་ཟབ་སོགས་མཇལ་རྟེན་རྣམས་རྒྱ་བློན་ཧ་ཤ་རྔམ་པ་ལ་བསྐུར་ཏེ་གེ་སར་རྒྱལ་པོ་རྒྱ་ལ་ཡོང་དོན་རྣམས་ཞིབ་པར་ཞུས། བློན་པོ་ཧ་ཤ་རྔམ་པས་དེ་ལུགས་རྒྱ་རྗེའི་སྙན་དུ་གསོལ་བ་ན། རྒྱ་རྗེའི་ཞལ་ནས། དེ་ན་འདིའི་ཚེས་པ་བཅོ་ལྔ་ལ། གེ་སར་རྒྱལ་བློན་རྣམས་རྒྱ་ནག་པོའི་འདུ་ར་གོང་མ་ལ་གདན་འདྲེན་ཞུ་བ་མ་གཏོགས། ཕོ་བྲང་དུ་གདན་འདྲེན་ཞུས་ན་བཙུན་མོའི་གདུང་ལ་བར་ཆད་འདྲ་མི་འོང་ངེས་པ་མེད་པས། དེ་ལུགས་གྲབས་བཤོམ་བྱོས་གསུངས་པས། རྒྱ་བློན་ཧ་ཤ་རྔམ་པས་གླིང་བློན་རྣམས་ལ་ཚེས་བཅོ་ལྔ་ལ། གེ་སར་དཔོན་བློན་རྒྱ་ནག་པོའི་འདུ་ར་གོང་མ་ལ་བྱོན་པར་ཞུ་ཞུས་ཏེ་གླིང་བློན་རྣམས་སླར་སྒར་དུ་ལོག་གོ།
དེ་ནས་ཧོར་ཟླ་ལྔ་པའི་ཚེས་བཅོ་ལྔ་ཉིན་གྱི་ཉི་རྩེ་རྒྱ་སྟོད་ན་བ་ཁྲ་ལེབ་ཀྱི་གླིང་སྒར་ལ་ཕོག་སྐབས། འཛམ་གླི་གེ་སར་རྒྱལ་པོ་དེ་པབྱབྱི་ཏའི་ཆ་ལུགས་སུ་བྱས་ཏེ། གདུགས་དང་རྒྱལ་མཚན། བ་དན། རོལ་མོ་དང་བཅས་ཏེ་རྒྱའི་ཕོ་བྲང་གི་ཕྱོགས་སུ་ཕེབས་པ་ན། རྒྱའི་ཕོ་བྲང་ནས་རྒྱ་བློན་ཧ་ཤ་རྔམ་པས་གཙོས་རྒྱ་བློན་རྣམས་ཀྱིས་བསུ་བ་དང་སྣེ་ལེན་འགྲན་ཟླ་དང་བྲལ་བ་བྱས་ཏེ་རྒྱ་ཡི་འདུ་ར་གོང་མ་ལ་གདན་དྲངས་སོ།།
དེ་ནས་རྒྱ་ནག་གི་རྒྱལ་པོས། གླིང་རྗེ་གེ་སར་རྒྱལ་པོ་ལགས། ཁྱེད་བོད་ས་ཐག་རིང་པོ་ནས་བྱོན་པས་ཐུགས་ངལ་དང་སྙུན་མི་མངའ་བར་བདེ་བར་ཕེབས་པ་ཤིན་ཏུ་ལེགས་ཟེར་ཞིང་རང་རང་གི་བཞུགས་ཁྲིར་འཁོད་དེ་བཟའ་བཏུང་ལོངས་སྤྱོད་ཀྱི་དཔལ་ལ་རོལ་ཏོ།།
དེ་ནས་རྒྱ་རྗེའི་ཞལ་ནས། ཁྱེད་འཛམ་གླིང་སེང་ཆེན་རྒྱལ་པོ་འཁྲུལ་མེད་ཡིན་ན་རྩལ་གྲུབ་རྟགས་ལ་རང་དབང་ཐོབ་ཡོད་པས། སང་ཉིན་ཚེས་པ་བཅུ་དྲུག་ལ་ང་ཡི་མངའ་འོག་གི་རྒྱ་ཞིང་ཆེན་བཅོ་བརྒྱད་རྣམས་བསྡུས་ནས་དཔོན་བློན་རྣམས་དང་བཅས་གྲུབ་རྟགས་འགྲན་ཟེར་པར། གེ་སར་གྱིས། ཁྱེད་རྒྱ་རྗེས་ཇི་ལྟར་ཟེར་བ་ལྟར་བྱེད་ཆོག་གསུངས།
ཉི་མ་དེའི་ཕྱི་ཉིན། རྒྱ་ཡི་ཁྲིམས་དུང་སྐད་པོ་ཆེ་དེ་སྐོར་འབུད། ཁྲིམས་རྔ་པོ་ཆེ་དེ་དྲག་རྡུང༌། ཁྲིམས་དར་ལེབ་ཆེན་དེ་དགུང་ལ་འཕྱར་ཏེ་རྒྱ་ཞིང་ཆེན་བཅོ་བརྒྱད་ཀྱི་མངའ་རིས་རྣམས་འདུ་དགོས་པའི་བརྡ་བྱས་པས། སྐྱ་མི་སེར་རྒོད་འབབ་འབབ། རྐང་ཐང་ལ་ཐག་ཆད་ཆད་བྱས་ནས་རྒྱའི་འདུ་ར་གོང་མ་ལ་ཁྲ་ཆིལ་ལེར་འདུས་པའི་དབུས་སུ། རྒྱ་རྗེ་གསེར་ཁྲི་ལ་བཞུགས། གེ་སར་དངུལ་ཁྲི་ལ་བཞུགས། གཡོན་གཡས་ཀྱི་སྟག་གདན་དང་གཟིག་གདན་ལ་རྒྱ་བློན་དང་གླིང་བློན་རྣམས་བཞུགས་སོ།། ཚོགས་ཆེན་དབུས་སུ་ཆོས་ཀྱི་རྩོད་པ་དང་རྫུ་འཕྲུལ་འགྲན་པས་བོད་ཀྱི་བླ་མ་རྒྱལ།
དེ་ནས་ཡང་རྒྱ་རྗེའི་ཞལ་ནས། ད་ང་རང་ཚོས་མིག་འཁྲུལ་འགྲན་དགོས་ཟེར་བ་ན། གེ་སར་གྱིས་དེ་ཡང་འགྲན་ཆོག་གསུངས། ཉི་མ་དེའི་ཕྱི་ཉིན་རྒྱ་ཡི་མིག་འཕྲུལ་མཁན་བརྒྱ་ཕྲག་མང་པོ་འཛོམས་པ་ན། རྒྱལ་པོ་གཉིས་ཀྱི་གཙོས་འདུ་རའི་དབུས་སུ་མ་བཞི་དཔོན་པོ་ཁྲོ་ཐུང་རྒྱལ་པོ་དེས། གོས་ཆེན་ནག་པོའི་གོས་ཞིག་གྱོན། ཆུ་བལ་ནག་པོའི་ལྷམ་ཞིག་གྱོན། སྤྲིན་བལ་ནག་པོའི་ལ་ཐོད་བཅིང༌། ཨག་ཚོམ་ནག་པོར་བྱིལ་བྱིལ་བྱེད་བཞིན་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །ལྷ་བླ་མ་ཡི་དམ་མཁའ་འགྲོ་ལ། །རྩེ་གཅིག་ཡིད་ཀྱིས་གསོལ་བ་འདེབས། །གླུ་འདི་གླུ་ངོ་མ་ཤེས་ན། །ཁྲོ་ཐུང་གི་སྟག་མོ་ངར་གླུ་ཡིན། །ང་དང་ང་ངོ་མ་ཤེས་ན། །མ་བཞི་དཔོན་པོ་ཁྲོ་ཐུང་ཡིན། །རྒྱ་ཞིང་ཆེན་བཅོ་བརྒྱད་མིག་འཁྲུལ་མཁན། །དུས་དེ་རིང་ཁྲོ་ཐུང་ང་ལ་ལྟོས། །རྒྱ་གླིང་གཉིས་ཀྱི་རྒྱལ་པོ་ལགས། །སྤྱན་མ་ཡེངས་ཁྲོ་ཐུང་ང་ལ་གཟིགས། །ང་ཁྲོ་ཐུང་སྤྲུལ་པ་རང་ཙམ་ལ། །མིག་འཁྲུལ་རྣམ་པ་སྣ་ཚོགས་ཡོད། །དེ་རིང་ཉིན་མོའི་དུས་ཚོད་ལ། །རྒྱ་ནག་པོའི་ཡུལ་གྱིས་མཐོང་ལེ་གཅིག །སྒང་པ་བོད་ལ་གྲགས་ལེ་གཉིས། །ངས་ཨ་ལོང་ནང་ནས་ཨ་འགྱུར་བྱེད། །ཡོབ་ཆེན་ནང་ནས་ཡོབ་འགྱུར་བྱེད། །ཁྲི་སོའི་ཁ་ནས་རྟ་རྒྱུགས་བྱེད། །མདོང་མོའི་རྩེ་ནས་བྲོ་གཅིག་བརྡུང༌། །ལག་མཐུལ་ནང་ནས་ཡོས་ཞིག་བརྔོ༌། །མཆན་ཁུང་ནང་ནས་ཆང་ཞིག་བཙོ། །མེ་ཆུ་རྫས་གསུམ་མི་དགོས་ལེ། །འཕྲུལ་འདི་འདྲ་ངོམ་དང་ངོ་མཚར་ཆེ།།
ཞེས་གླུ་དེ་བླངས་པ་དང༌། ཁྲོ་ཐུང་གིས་མིག་འཁྲུལ་ངོ་མཚར་བསམ་བརྗོད་ལས་འདས་པ་རྣམས་བྱས་པས་རྒྱལ་ཁ་ཐོབ་བོ།། དེར་རྒྱ་རྗེས། ད་ཆོས་དང་མིག་འཁྲུལ་གྱི་རྒྱལ་ཁ་ཐོབ་ཀྱང༌། སང་ཉིན་སྐྱེ་ཡག་གི་འགྲན་བསྡུར་བྱེད་དགོས་ཟེར་བ་ན། གེ་སར་རྒྱལ་པོས་ཁྱོད་རྒྱལ་པོས་གསུངས་ལྟར་བྱེད་ཆོག་གསུངས།
ཉི་མ་དེའི་ཕྱི་ཉིན་རྒྱ་ཡུལ་གྱི་སྐྱེ་ཡག་རྣམས་འདུ་ར་ལ་འཛོམས་པ་དང༌། བློན་པོ་སྐྱེ་ཡག་ཉི་མ་རང་ཤར་དེའི་ཞལ་ངོ་ཚེས་ཆེན་བཅོ་ལྔའི་དུང་ཟླ་འདྲ་བ། སོ་སེན་ཐམས་ཅད་དུང་ལས་གྲུབ་པ། གཟུགས་གཞིས་དགྲ་བཞི་ནོན་པ། མ་བུ་མོས་མཐོང་ན་ཡིད་སེམས་ཤོར་བ། ཕོ་དར་མས་མཐོང་ན་ཡིད་སྨོན་སྐྱེ་བ་དེ་རྒྱ་ཡི་འདུ་ར་བར་མ་ནས་ཕར་འགྲོ་ཚུར་འགྲོ་བྱས་པ་ན། དགུང་སྔོན་དཀྱིལ་ནས་ཉི་མ་ཤར་བ་ལྟ་བུ་ཞིག་བྱུང༌། རྒྱ་ཡི་སྐྱེ་ཡག་རྣམས་ནི་སྲིན་འབུ་མེ་ཁྱེར་ལྟ་བུའམ། སྤྲེའུའི་གདོང་ལྟར་གྱུར་ཏེ་མགོ་སྒུར་ནས་བསྡད་ཙ་ན། རྒྱ་རྗེའི་ཐུགས་ལ། ཉམས་རེ་མཚར། གེ་སར་ལ་འདི་འདྲ་མེད་ན་ཅི་འདྲ་ཡོད། ཁོང་གི་བློན་པོ་རྣམས་གང་གི་ཐད་ནས་ཀྱང་འདྲ་ཡ་མི་འདུག་བསམས། དེ་ནས་ཡང་རྒྱ་རྗེས། ད་སང་ཉིན་ནས་རྟ་སུ་མགྱོགས་ཀྱི་ལྟད་མོ་ལྟ་རྒྱུ་བྱེད་ཟེར་བ་ན། གེ་སར་གྱིས་དེ་ལྟར་བྱེད་ཆོག་གསུངས།
ཉི་མ་དེའི་ཕྱི་ཉིན་རྒྱ་ཞིང་ཆེན་བཅོ་བརྒྱད་ལས་མགྱོགས་པ་རྟ་ཡི་རྒྱལ་པོ་ཟེ་ར་འཕུར་ཤེས་ཟེར་བ་འདུ་ར་ལ་ཁྲིད་འོང་བ་དང༌། གླིང་བློན་རྣམས་ཀྱིས་ཨ་དཔལ་གཡུ་བྱ་རྟེའུ་སྔོན་ཁྲིད་དེ་ཡོང༌། དེར་གེ་སར་གྱིས། དེ་རིང་རྟ་རྒྱུགས་པར་རི་བོ་རྩེ་ལྔའི་གཤམ་ལ་སྐོར་བ་བྱས་ནས་རྒྱུགས་ཏེ། སང་ཐོ་རེངས་ཕོ་བྲང་ལ་ཉི་རྩེ་ཕོག་པ་དང་འཁོར་བ་དགོས་གསུངས་སོ།། དེ་ནས་རྒྱ་རྟ་ཟེ་ར་འཕུར་ཤེས་དེ་རྒྱ་བློན་ཁྲི་ཤོག་རྔམ་པས་ཆིབས། གཡུ་བྱ་རྟེའུ་སྔོན་དེ་ཨ་དཔལ་གྱིས་ཆིབས་ཏེ་རྒྱུགས་སོང་པས། ཨ་དཔལ་མི་རྟ་གཉིས་ཕྱི་ཉིན་རི་རྩེ་ལ་ཉི་ཟེར་ཕོག་ཙམ་ལ་རྒྱ་ཡི་འདུ་ར་ལ་འཁོར། རྒྱ་བློན་མི་རྟ་གཉིས་ཉི་དྲོས་ཙམ་ལ་མ་གཏོགས་མ་འཁོར་པས། མགྱོགས་པའི་རྒྱལ་ཁ་དེ་གཡུ་བྱའི་རྟེའུ་སྔོན་གྱིས་ལོན་ནོ།། དེ་ནས་རྒྱ་གླིང་གཉིས་ཤེད་འགྲན་བྱས་པས་འབྲུ་དགའ་བདེས་རྒྱལ་ཁ་བླངས། ཤྭོ་འགྲན་བྱས་པས་ཤང་པའི་བུ་མོ་མོད་སྒྲོན་གྱིས་རྒྱལ་ཁ་བླངས། མདའ་འགྲན་བྱས་པས་ཚ་ཞང་འདན་མས་རྒྱལ་ཁ་བླངས་པས། ཡང་རྒྱ་རྗེས། དེ་རིང་ཉི་མ་ཕན་ཆོད་ལ་གླིང་གི་བློན་པོ་རྣམས་ཀྱིས་རྒྱལ་ཁ་ལོན་ཀྱང༌། སང་ནས་ཕོ་འཕྱོར་པོའི་སྐྱེ་གཟུགས་འགྲན་ན་ཉམས་མཚར་ཟེར་བ་ན། གེ་སར་གྱིས། ཁྱེད་ནག་པོ་རྒྱ་ཡི་ཞིང་ཁམས་ཆེན་པོ་ལ་འཕྱོར་པོ་ལོས་ཡོད། དེ་དང་མི་འདྲ་ངེད་རྣམས་ལ་མི་མང་པོ་མེད་རུང་ཁྱོད་རྒྱལ་པོས་གསུངས་པ་ལྟར་བྱེད་ཆོག་གསུངས་སོ།།
དེའི་ཕྱི་ཉིན་རྒྱ་ཡུལ་ཆེན་པོ་ནས་འཕྱོར་པོ་ཀླུ་ལྟ་བུ། མཚར་པོ་ལྷ་ལྟ་བུ་མང་པོ་འཛོམས་བྱུང་པ་ན། གླིང་གི་ཨ་བར་བུའི་དཔལ་འབྱོར་དེས་ཨག་གསེའི་གཡུ་རལ་གྱི་གསོབ་དེ་ལུས་ལ་གྱོན། དུང་གི་སྣམ་བུ་སྲུབ་མེད། བྱུ་རུའི་གཟན་ཤམ་བཅོ་བརྒྱད། འཇའི་ལྷམ་བུ་སྲུབ་མེད་རྣམས་གྱོན། སྐྲ་རྫི་མ་ཐམས་ཅད་གཡུ་ལས་གྲུབ། སོ་སེན་ཐམས་ཅད་དུང་ལས་གྲུབ། ཞལ་འཛུམ་ཆུང་དམུལ་ལེར་རྟ་ཤ་བ་སྤྱང་འཛོམས་ལ་བཞོན་ཏེ། མ་བུ་མོ་རྣམས་ཀྱིས་མཐོང་ན་ཡིད་སེམས་དབང་མེད་དུ་འཕྲོག་ནས་ལུས་ཀྱི་ཚུགས་ཤོར་བ། སྐྱེས་དར་མ་རྣམས་ཀྱིས་མཐོང་ན་ལྟ་བའི་ཆོག་མི་ཤེས་ཤིང་ཡིད་སྨོན་འཆོར་བ་ཞིག་བྱས་ནས་འདུ་རའི་དབུས་སུ་ཕར་འགྲོ་ཚུར་འགྲོ་བྱེད་པ་ན། རྒྱ་རྒྱལ་གྱི་བསམ་པར། ཨེ་ཨེ་འཇིག་རྟེན་ན་ཤ་ཁྲག་ལས་གྲུབ་པ་ཞིག་ལ་འདི་ལྟ་བུའི་སྐྱེ་གཟུགས་དང་རྒྱན་གོས་ཡོད་ག་ལ་སྲིད། འདི་མིག་འཁྲུལ་ལམ། ཡང་ངའི་རྨི་ལམ་གྱི་སྣང་བ་ཅི་ཡིན་བསམ་སྟེ་སེམས་ཀྱི་དཔྱད་སྒོ་སྣ་ཚོགས་བྱེད་ཅིང་བཞུགས་པའི་སྐབས་སུ།
གེ་སར་སྐུ་ཡི་སྤྲུལ་པ་རྒྱ་རྗེའི་ལྷན་དུ་བཞུགས། གསུང་གི་སྤྲུལ་པ་དེ་ཁྱུང་ཆེན་རྡོ་རྗེ་འབར་བ་ལ་སྤྲུལ་ནས། བློན་པོ་ཕྱིང་སྔོན་དང་མི་ཆུང་གཉིས་གཤོག་སྟེང་དུ་བཞག་སྟེ་རྒྱའི་ཕོ་བྲང་གནམ་སྒོ་གོང་མ་ལ་བྱོན། དེར་བཙུན་མོའི་རོ་རུལ་དེ་ལྕགས་ཀྱི་སྒམ་ཆུང་སྲུབ་མེད་པ་ཞིག་གི་ནང་དུ་བཅུག་སྟེ་ས་གྲུ་གསུམ་གནམ་གྲུ་གསུམ་ཞིག་ཏུ་སྦས་ཏེ་བཞག འོན་ཀྱང་གེ་སར་གྱིས། ད་མྱུར་ཏུ་བཙུན་མོའི་རོ་དེ་ཙན་དན་དང༌། ཏིལ་མར་སོགས་རྫས་སྣ་དང་བཅས་བསྲེག་དགོས། རྒྱ་རྗེས་ཤེས་ན་བསྲེག་རྒྱུ་མི་ཡོང༌། རོ་དེ་བསྲེག་སྐབས་སྐད་ངན་ཅི་གྲགས་ཀྱང་ཡ་ང་སྙིང་རྗེ་མ་བྱེད་གསུངས་པའི་སྐབས་སུ། ཁྲོ་ཐུང་གིས་ལྕགས་ཀྱི་སྒམ་འདིའི་ནང་ལ་ཅི་ཡོད་དམ་བསམ་སྟེ་སྐེད་ནས་སྲིན་གྲི་བླངས་ཏེ། སྒམ་གྱི་ཁ་ཕྱེ་བ་ན། ནང་ནས་དུ་བ་སྔོ་ལོང་ངེ་བ་ཞིག་མཁའ་ལ་སོང་པས་འཇིག་རྟེན་དུས་འཁྲུག་དང་ལོ་ཉེས། རྒྱ་ནད་ཧ་ལ་རྒྱུགས་སོགས་བྱུང༌། དེ་ནས་བཙུན་མོའི་རོ་རུལ་བསྲེགས་ཏེ་སྒར་དུ་ལོག་གོ།
རྒྱ་རྗེ་ཕོ་བྲང་དུ་ཕེབས་ཏེ་བཙུན་མོའི་རོ་མེད་པ་ཤེས་པས་ཐུགས་མ་བདེ་པར་བློན་པོ་རྣམས་བསྡུས་ནས་བློན་པོ་ཧ་ཤ་རྔམ་པ་ལ། ད་རང་རེ་རྣམས་ཁ་ཟས་དང་མི་འཕྲད་ལག་པ་དུག་དང་འཕྲད། ཁ་སང་གེ་སར་བྱོན་འདུག་ཟེར་བ་དེ་ལྟས་ངན་གེ་སར་ག་ལ་ཡིན། གླིང་གི་བྱ་བྲལ་བ་མིག་འཁྲུལ་མཁན་ཞིག་ཡིན་པ་ཐག་གིས་ཆོད། བཙུན་མོའི་གདུང་དེའང་དེས་རྐུས་ཏེ་མི་འདུག་པས་རྒྱལ་ཁྲིམས་ཚད་མེད་པ་གཅོད་དགོས་ཟེར་པས། བློན་པོ་ཧ་ཤ་རྔམ་པ་ན་རེ། རྗེ་རྒྱལ་པོས་གསུངས་པ་ཐུགས་བདེན་ཡང༌། སླར་ཡང་གེ་སར་ཡིན་མིན་རྟོག་ཞིབ་མཛད་དགོས། བཙུན་མོའི་གདུང་ལྷག་མེད་ལ་སོང་བ་ཨེ་ཡིན་ཟེར་ཙ་ན། རྒྱ་རྒྱལ་གྱིས། ངའི་བཙུན་མོའི་གདུང་དེ་ལྷག་མེད་དུ་སོང་མེད་ན་རེ་ཞིག་ནས་སྔར་ལྟར་འགྲོ་རྒྱུ་ཡོད་པ་ཞིག་ཡོང་བ་ཡིན་པས། ཁྱོད་ཀྱིས་གེ་སར་ཟེར་བ་དེ་ལ་བཙུན་མོའི་གདུང་མི་འདུག་པས་ཁྱོད་ཀྱིས་ཤེས་སམ་ཞེས་དྲིས་དང༌། གེ་སར་ངོ་མ་ཡིན་ན་མངོན་ཤེས་ཡོད་པས་རྫུན་དང་གཡོ་སྒྱུ་མི་བྱེད་པར་དྲང་པོར་བཤད་འོང་གསུངས། དེ་ནས་བློན་པོ་ཧ་ཤ་རྔམ་པ་གེ་སར་མདུན་དུ་སོང་ནས། རྒྱལ་པོའི་བཙུན་མོའི་གདུང་མི་འདུག་པས། ཁྱོད་གེ་སར་ཡིན་ན་མངོན་ཤེས་ཡོད་པས་གར་ཡོད་དྲང་པོར་སྨྲོས་ཤིག་ཞུས་པས། གེ་སར་གྱིས། ང་ལ་ལྷ་ཀླུ་གཉན་གསུམ་དང༌། མ་ནེ་ནེ་སོགས་ཀྱི་ལུང་བསྟན་ལ་བཙུན་མོའི་གདུང་དེ་མ་བསྲེགས་ན། སྤྱིར་འཛམ་བུ་གླིང་དང༌། ཡང་སྒོས་རྒྱ་གླིང་གི་སྐྱེ་འགྲོ་ལ་འཚེ་བའི་གདོན་འདྲེ་མ་རུང་པ་ཞིག་ཡོང་གསུངས་པས། ལུང་བསྟན་ལྟར་བསྲེགས་ཚར་པ་ཡིན་གསུངས།
དེ་ནས་བློན་པོས་རྒྱ་རྒྱལ་ལ་གེ་སར་གྱི་གསུངས་པའི་ལོ་རྒྱུས་རྣམས་ཞིབ་པར་བཤད་ཙ་ན། རྒྱ་རྗེས། ཧ། ཕོ་ངའི་བཙུན་མོ་ཉི་མ་ཁྲི་སྐྱིད་ཀྱི་གདུང་དེ་ཞག་གྲངས་ཉི་མ་ཆུ་ཚོད་ལ་སླེབས་ན་སྔར་ལྟར་གསོན་པོར་འགྲོ་རྒྱུ་ཡོད་པ་ཡིན་པས། ཁྱོད་གེ་སར་དཔོན་གཡོག་གིས་བཙུན་མོའི་གདུང་རང་མལ་དུ་བཞག་ན་མ་གཏོགས། ལྷ་འདྲེའི་ལུང་བསྟན་ཡིན་ཟེར་ནས་རང་མལ་དུ་མི་བཞག་ན་རྒྱ་ཁྲིམས་ལས་ཀྱི་ཆད་པ་བརྒྱ་དང་རྩ་བརྒྱད་ངེས་པར་བཅོད་པ་ཡིན་ཟེར་ནས་བློན་པོ་ཁྱོད་ཀྱིས་གེ་སར་ལ་སྨོས་ཤིག་ཟེར།
བློན་པོ་ཧ་ཤ་རྔམ་པས་གེ་སར་ལ་རྒྱ་རྒྱལ་གྱིས་གསུངས་པ་ལྟར་ཞུས་པ་ན། གེ་སར་གྱིས། བཙུན་མོའི་གདུང་ནི་མེ་ལ་བསྲེགས་ཚར་པས་རང་མལ་དུ་འཇོག་རྒྱུ་ག་ལ་ཡོད། རྒྱལ་པོས་ཁྲིམས་ཆད་གཏོང་ན་ངའི་བློན་པོ་རྣམས་ལ་གཏོང་དགོས་དོན་མེད། ལན་པ་ང་ལ་ཡོད་པས་ཁྲིམས་ཆད་གང་བཅད་ཀྱང་འཁུར་ཆོག་གསུངས། རྒྱ་བློན་གྱིས་དེ་ལུགས་རྒྱ་རྗེ་ལ་ཞུས་ཙ་ན། རྒྱ་རྗེ་ཐུགས་རབ་ཏུ་ཁྲོས་ཏེ། ཁྱོད་བློན་པོ་རྣམས་ལ་བཀའ་བཏང་བ་ལྟར་ཞག་ཉེར་གཅིག་རིང་གེ་སར་ཁྲིམས་ཤིང་རྩེར་བསྐྱོན་ཏེ་བཞག་གོ།
དེ་ནས་ཞག་ཉེར་གཅིག་སོང་བ་ན་རྒྱ་རྗེས་བློན་པོ་རྣམས་ལ། ཁྱོད་རྣམས་སོང་ལ་གེ་སར་ཅི་བྱེད་ལྟོས་ཤོག་ཟེར་པས། བློན་པོ་རྣམས་སོང་པར། གེ་སར་བྱ་རིགས་མང་པོས་བསྐོར་ཏེ་བྱ་ཆེ་བས་ཕྱག་འཚལ། འབྲིང་བས་སྐོར་བ་བྱེད། ཆུང་པས་ཆོས་ཞུ་བཞིན་འདུག་པས། རྒྱ་བློན་རྣམས་ངོ་མཚར་དུ་གྱུར་ཏེ་རྒྱ་རྗེ་ལ་དེ་ལུགས་ཞུས་ཤིང་ཁྲིམས་གཅོད་མི་རིགས་པར་ཞུས་ཀྱང༌། རྒྱ་རྗེས། ཁོ་གེ་སར་གྱིས་ངའི་བཙུན་མོའི་གདུང་དེ་ཕོ་བྲང་སྦུགས་ནས་བླངས་ཏེ་མེར་བསྲེགས། གང་མིན་སྣ་ཚོགས་བྱས་སོང་པས་ཁྲིམས་གཅོད་མི་རིགས་ཟེར་རྒྱུ་ག་ལ་ཡོད། ཁོ་འབུ་དོང་ནང་དུ་ཞག་ཉེར་གཅིག་ལ་ཞོག་ཟེར་བ་ལྟར་འབུ་དོང་དུ་བཞག་ཀྱང་མ་གནོད། དེ་ནས་བྲག་མཐོན་པོའི་གཡང་ལ་གཡུག་ཀྱང་མ་གནོད་པར་སྔར་ལས་སྐུ་ལ་གཟི་མདངས་རྒྱས་པར་ཡོད་པས། རྒྱ་བློན་རྣམས་ངོ་མཚར་དུ་གྱུར་དེ་རྒྱ་རྗེ་ལ་དེ་ལུགས་ཞིབ་ཏུ་ཞུས་སོ།།
དེ་ནས་ཡང་རྒྱ་རྗེས། གེ་སར་ཟེར་བ་དེ་གཞན་གྱིས་མི་ཐུབ་ན། ཙན་དན་དམར་པོའི་མེ་ལ་སྲོགས་ཤིག་ཟེར་བ་ལྟར་བྱས་པས། མེ་འོབ་དེའི་དཀྱིལ་དུ་དཔག་བསམ་གྱི་ཤིང་ལོ་མ་དང་མེ་ཏོག་གིས་བརྒྱན་པ་ཞིག་སྐྱེས་ཤིང༌། དེའི་དབུས་སུ་གེ་སར་གྱི་སྐུ་གཟི་མདངས་ཟིལ་བ་ཁྲོམ་མེར་བཞུགས་པས། རྒྱ་བློན་རྣམས་སྔར་ལས་ངོ་མཚར་དུ་གྱུར་ཏེ་རྒྱ་རྗེའི་སྙན་དུ་ཞིབ་པར་ཞུས། དེར་རྒྱ་རྗེས། གེ་སར་ཁོ་ཁྲིམས་ཤིང་དང་འབུ་དོང༌། མེར་བསྲེགས་ཅི་བྱས་ཀྱང་མི་ཐུབ་ན། ད་དཔོན་བློན་རྣམས་ཁྲིམས་མཚོ་ཕྱུག་མོའི་ནང་ཞོག་ཟེར་བས། རྒྱལ་བློན་རྣམས་ཀྱིས་ཁྲིམས་མཚོ་ཕྱུག་མོའི་ནང་བཞག་གོ།
དེའི་སྐབས་སུ་བློན་ཆེན་འདན་མ་བྱང་ཁྲ་དང་མི་ཆེན་སེར་པོ་གཉིས་ན་རེ། གླིང་རྗེ་གེ་སར་རྒྱལ་པོ་ལགས། ཁྱེད་འོད་གསལ་ལྷ་ཡི་སྲས་པོ་ལ་རྒྱ་ཁྲིམས་འདི་འདྲ་གཅོད་པ་འོས་མེད། ངེད་བློན་པོ་རྣམས་ཀྱིས་ཡ་ལན་བྱས་ཏེ་ལྟད་མོ་དགོང་ནས་མཐོང་བ་ཞིག་བྱེད་ཆོག་ཟེར་བ་ན། གེ་སར་གྱིས། རྒྱ་རྗེ་འདི་དུས་སྙིགས་མར་སངས་རྒྱས་ཀྱི་བསྟན་པ་ལ་ཕན་ཐོགས་ཡོད་པས་ཁྲིམས་ལུགས་མ་ཁུར་ན་རྒྱ་རྗེ་དབང་དུ་མི་འདུས། མི་ཁྲིམས་ཀྱིས་ལྷ་སྐུ་ལ་གནོད་མི་ཐུབ་པས། ཅུང་སྒུགས་དང་ཁོ་དབང་དུ་འདུ་རན་པ་ཡིན་གསུངས། དེར་གེ་སར་རྒྱལ་བློན་རྣམས་མཚོ་ནང་ལ་ཕེབས་པ་ཀླུ་རྣམས་ཀྱིས་མཐོང་སྟེ། འདོད་ཡོན་སྣ་ལྔའི་མཆོད་པ་ཕུལ་ཞིང༌། ཀླུ་རིགས་གྲངས་མེད་ཀྱིས་ཆོས་ཞུས་ཏེ་བསྙེན་བཀུར་དང་མཆོད་བསྟོད་ཀྱི་ངང་དུ་གནས་སོ།།
དེ་ནས་ཞག་ཉེར་གཅིག་ན་རྒྱ་བློན་རྣམས་ལྟ་བར་ཡོང་པས་གང་མཐོང་བ་རྒྱ་རྗེ་ལ་ཞིབ་ཏུ་ཞུས་ཏེ། གེ་སར་ཡིན་པ་ཐག་གིས་ཆོད་ཟེར་ཡང༌། རྒྱ་རྗེ་ན་རེ། གེ་སར་ཅི་ལ་ཡིན། ངའི་བཙུན་མོའི་གདུང་རྐུ་མཁན་དེ་ཁྲིམས་ར་བར་མར་ཁྲིད་ནས། སྒལ་ཚིགས་རེ་ལ་ལྕགས་འཛེར་རེ་དང༌། གསང་ཆེན་ལ་མེ་བཙའ་གོ་དགུ། སེན་བར་ལ་ཟངས་འཛེར་རེ་རྒྱོབས། ཉི་མ་རེ་ལ་དུག་ཆུ་ཕོར་བ་དགུ་རེ་བླུད་ཟེར་པས། རྒྱ་བློན་རྣམས་གྱིས་གེ་སར་ཁྲིམས་ཁང་དུ་ཁྲིད་དེ་མེ་བཙའ་དང་ལྕགས་འཛེར་སོགས་བརྒྱབ་པར། གེ་སར་རྒྱལ་པོ་མེ་བཙས་མ་ཚིག འཛེར་མ་རྣམས་མ་ཟུག་པས། རྒྱ་བློན་རྣམས་སོང་སྟེ་རྒྱ་རྗེ་ལ་ལོ་རྒྱུས་རྣམས་ཞུས་ཤིང༌། དུག་བླུད་མི་ཉན་པར་འདུག་ཞུས་པ་ན། རྒྱ་རྗེས། དུག་མ་བླུད་པར་ཐབས་མེད་པས། ཞག་ཉེར་གཅིག་གི་རིང་དུག་ཕོར་དགུ་རེ་བླུད་ཟེར། རྒྱ་བློན་རྣམས་ཀྱིས་རྒྱ་རྗེས་ཟེར་བ་ལྟར་གེ་སར་ལ་དུག་བླུད་པས། གེ་སར་ལ་དུག་གིས་མ་གནོད་པར་སྐུ་ལུས་རྨ་བྱ་ལྟར་གཟི་མདངས་སྔར་བས་ལྷག་པར་རྒྱས་པས། རྒྱ་བློན་རྣམས་ལྷག་པར་ངོ་མཚར་དུ་གྱུར་ཏེ་རྒྱ་རྗེ་ལ་ལོ་རྒྱུས་རྣམས་ཞུས་ཏེ། ཁྲིམས་ཆད་མི་གཏོང་པའི་ཞུ་བ་བྱས་ཀྱང༌། རྒྱ་རྗེས། གེ་སེར་ཟེར་བ་འདི་ཁྲིམས་ཆད་ཅི་བྱས་ཀྱང་མི་ཐུབ་པར་འདུག་པས། འདི་ཤ་ཁྲག་ལས་གྲུབ་པའི་མིག་འཁྲུལ་མཁན་ཞིག་ཡིན་ན། ཁྲིམས་སྣ་གཅིག་གིས་མི་ཐུབ་པ་མི་སྲིད། ད་གེ་སར་ཁོ་མནོལ་གྲིབ་ཕོག་པ་ཞིག་བྱས་ན་ཁྲིམས་ཀྱིས་ཐུབ་པ་ཡིན་པས། གེ་སར་གྱི་སྟེང་དུ་རྐང་པ་བཀྲུས་པའི་ཆུ་བླུགས། སྐྲ་ཡི་ཐག་པས་སྡོམས། ལྷམ་ཚང་གི་བདུག་པ་བྱོས་དང་ལྷའི་སྤྲུལ་བ་གེ་སར་ངོ་མ་ཡིན་ན་མི་གནོད། དེ་མིན་གཞན་ཐུབ་པ་ཡིན་པས་དེ་བྱེད་དགོས་ཟེར་བ་ན། བློན་པོ་ཧ་ཤ་རྔམ་པ་ན་རེ། རྒྱལ་པོ་ལགས། ཁྲིམས་གཅོད་དེ་འདྲ་བདག་གིས་བྱེད་མི་ཐུབ་ཞུས་པས་རྒྱ་བློན་ཆེ་དགུ་ཐམས་ཅད་ཁྲིམས་གཅོད་དུ་འགྲོ་བར་བྱས་སོ།།
དེའི་ནུབ་མོའི་མཚན་ཕྱེད་ཙམ་ལ་མ་ནེ་ནེ་རྣམ་སྨིན་དཀར་མོས་གེ་སར་རྒྱལ་པོ་ལ་ལུང་བསྟན་གྱི་གླུ་འདི་ལྟར་བླངས་སོ།།
ཆོས་ཨོཾ་ཆེན་མ་ཎི་པདྨེ་ཧཱུཾ། །སྡིག་ཆེན་བློ་སྣ་ཆོས་ལ་སྒྱུར། །ང་དང་ང་ངོ་མ་ཤེས་ན། །མ་ནེ་ནེ་རྣམ་སྨིན་དཀར་མོ་ཡིན། །མ་ཉལ་གེ་སར་ཡར་ལ་ལོངས། །ཉི་མ་སང་གི་དུས་དེ་ལ། །རི་རྩེར་ཉི་མ་མ་ཕོག་དུས། །རྒྱ་ནག་རི་བོ་རྩེ་ལྔ་ལ། །མགོན་པོ་མ་ནིང་ནག་པོར་སྤྲུལ། །ཉི་ཟླ་ཞལ་གྱི་གཡས་གཡོན་ཆུག །སྐར་མ་སོ་ཡི་བར་དུ་བཟུང༌། །རྒྱ་ནག་རྒྱལ་པོའི་སྐེད་ནས་བཟུང༌། །ཕྱག་ལ་རྡོ་རྗེ་གྲི་གུག་འཕྱོར། །ད་རེས་དུས་ཀྱི་ཉི་མ་ལ། །རྒྱ་རྗེར་འཇིགས་ཚུལ་མ་ངོམ་ན། །ཁྱེད་ལ་མནོལ་གྲིབ་ཕོག་ནས་འོང༌། །རྒྱལ་པོར་འཇིགས་ཚུལ་མ་གཏོགས་པ། །སྲོག་ལ་བར་ཆད་མི་ཡོང་དགོས། །དེ་བྱོས་དང་རྒྱ་ནག་རྒྱལ་པོ་དེས། །ཕྱག་དང་དད་པ་བྱས་ནས་འོང༌། །རྒྱ་ཡུལ་ཆོས་ལ་འགྱུར་ནས་ཡོང༌། །ཐུགས་མ་ཡེངས་ཨེ་གོ་རིགས་ཀྱི་བུ།།
ཞེས་ལུང་དེ་ལྟར་བསྟན་པས། གེ་སར་རྒྱལ་པོ་མགོན་པོ་མ་ནིང་ནག་པོར་སྤྲུལ་ཏེ་ཞབས་གཡས་པ་རི་བོ་རྩེ་ལྔ་ལ་བཞག གཡོན་པ་སྤོམ་རའི་སྟེང་ལ་བཞག་སྟེ་མ་ནེ་ནེའི་ལུང་བསྟན་ལྟར་བཞུགས་ཙ་ན། རྒྱ་བློན་རྣམས་གེ་སར་ལ་མནོལ་གྲིབ་བྱེད་པར་ཡོང་པས་མཐོང་སྟེ་ཅི་བྱ་གཏོལ་མེད་དུ་གྱུར་ནས་རྒྱ་རྗེ་ལ་ཞུས་པས། རྒྱ་རྗེ་ན་རེ། དེ་གེ་སར་ཡིན་པའི་ངེས་པ་ཅི་ཡོད། རང་རེའི་ཡུལ་གྱི་ཧ་ཤང་ཞིག་གིས་མིག་འཕྲུལ་བསྟན་པ་ཡང་སྲིད་ཟེར་ནས་དད་པ་དང་ཡིད་ཆེས་མ་བྱས་པས། གེ་སར་ཐུགས་རབ་ཏུ་ཁྲོས་ཏེ་རྒྱ་རྗེའི་སྐེད་ནས་བཟུང་སྟེ་བར་སྣང་དུ་སྤྲུག་སྤྲུག་འགའ་བྱས་ནས། དམ་ཉམས་ཁྱོད་མཐའི་རྒྱ་མཚོའི་ཕ་རོལ་གྱི་སྲིན་པོ་རཀྵ་མགོ་དགུའི་ཁ་ཟས་སུ་སྤྲད་པ་ལས་འོས་མེད་ཀྱང༌། ད་རེས་ང་ཡི་བཀའ་ལ་ཉན་ཏེ་རྒྱལ་ཁམས་ཆོས་ལ་བསྒྱུར། ཁྲིམས་ཀྱི་མུན་པ་བསལ་བ་སོགས་ཁས་ལེན་ན་རྒྱལ་པོ་མངའ་རིས་དང་བཅས་བདེ་ཞིང་སྐྱིད་པ་དང༌། ཕྱི་མ་ཐར་ལམ་ལ་འགྲོ་བ་ཡིན་གསུངས་པས། དེར་རྒྱ་རྗེ་ཤིན་ཏུ་སྐྲག་ནས་ཅི་གསུང་བཀའ་བསྒྲུབས་བྱས་ཏེ་ཕོ་བྲང་དུ་བྱོན། གེ་སར་ཡང་སྤྲུལ་པ་བཤིག་སྟེ་རང་སྒར་དུ་བཞུགས་སོ།།
དེའི་སྐབས་སུ་ཡང་རྒྱ་རྗེ་ན་རེ། ངས་གེ་སར་གྱིས་ཅི་ཟེར་ཁས་བླངས་ཀྱང༌། ད་དུང་བརྟག་པ་ཞིག་བྱེད་དགོས་འདུག་པས། དེ་རིང་ཕོ་བྲང་དུ་ཆོས་པོ་ཏི་རྣམས་ཀྱིས་ཁྲི་རྒྱོབས། དེའི་སྟེང་དུ་ཟ་འོག་གི་གདན་གདིང་ནས་པོ་ཏི་རྣམས་མི་མཐོང་བར་བྱས། དེ་ནས་གེ་སར་དཔོན་བློན་ཕོ་བྲང་དུ་གདན་འདྲེན་ཞུ་དགོས། དེ་དུས་པོ་ཏི་ཡིན་པ་མ་ཤེས་པར་སྟེང་དུ་བཞུགས་སོང་ན་གེ་སར་མིན་པའི་རྟགས་ཡིན་ཟེར་པས། རྒྱ་བློན་རྣམས་ཀྱིས་དེ་ལྟར་བྱས་ཏེ་གེ་སར་དཔོན་བློན་རྣམས་གདན་དྲངས་པས། གེ་སར་གྱིས་མ་མཁྱེན་པའི་ཚུལ་མཛད་ནས་ཁྲིའི་རྩར་སེ་གོལ་ཞིག་གཏོགས་ཏེ་ཡི་གེ་རྣམས་མེད་པར་བྱས་ནས་ཁྲི་ལ་བཞུགས་ཤིང༌། རྒྱལ་བློན་རྣམས་ལ་འཚོ་བ་ཕུན་སུམ་ཚོགས་པའི་སྟོན་མོ་རྒྱ་ཆེར་བྱས་སོ།།
དེ་ནས་གེ་སར་རྒྱལ་བློན་སྒར་ལ་ཕྱིན་ཟིན་པ་དང༌། རྒྱ་རྗེ་ན་རེ། ཁོ་གེ་སར་མིན་པར་འདུག་པས་སླར་ཡང་ཁྲིམས་གཅོད་བྱེད་དགོས་འདུག་ཟེར་བ་ན། རྒྱ་བློན་ཧ་ཤ་རྔམ་པས། རྗེ་རྒྱལ་པོ་ལགས། སྔོན་ལ་ཅི་གསུངས་ཁས་བླངས། སླར་ཡང་ཁྲིམས་གཅོད་བྱས་ན་ག་ལ་འགྲིག འོན་ཀྱང༌། གདན་ཁྲི་བྱས་པའི་པོ་ཏི་རྣམས་ལ་གཟིགས་དང་ཅི་འདྲ་བྱུང་ཡོད་མི་ཤེས་ཟེར་པས། པོ་ཏི་རྣམས་ལ་ལྟ་སྐབས་ཚང་མ་ཤོག་སྟོང་དུ་གྱུར་པ་གཟིགས་པས། རྒྱ་རྗེ་ཡིད་ཆེས། དད་མོས་ཚད་མེད་སྐྱེས་ཏེ་ནང་བློན་རྣམས་བསྡུས་ཏེ་གསུངས་པ། ད་དེ་གླིང་རྗེ་གེ་སར་རྒྱལ་པོ་ཡིན་པ་ཐག་གིས་ཆོད། སང་ཉིན་ཕོ་བྲང་དུ་གདན་འདྲེན་ཞུས་ཏེ་བཤགས་པ་འབུལ་དགོས་པས་གྲབས་བཤོམ་ཡང་དག་པ་གྱིས་ཤིག་ཅེས་བློན་པོ་རྣམས་ལ་བཀའ་ཕབས་སོ།།
དེའི་ཕྱི་ཉིན་གདུགས་དང་རྒྱལ་མཚན་ལ་སོགས་པའི་མཆོད་རྫས་སྣ་ཚོགས་དང་རོལ་མོའི་བྱེ་བྲག་དཔག་དུ་མེད་པ་དང་བཅས་གེ་སར་རྒྱལ་བློན་རྣམས་རྒྱ་རྗེའི་ཕོ་བྲང་དུ་གདན་དྲངས། དེར་ཕུན་སུམ་ཚོགས་པའི་ཟས་སྣས་སྟོན་མོ་དང༌། གླུ་གར་ལ་སོགས་པའི་རིམ་པས་རྒྱལ་བློན་རྣམས་ཐུགས་མཉེས་པར་བྱས། དེ་ནས་རྒྱ་རྗེས་ནོར་བུ་སྣ་ཚོགས་དང༌། ཟ་འོག་དར་ཟབ། གསེར་དངུལ་མུ་ཏིག རྟ་དང་གླང་པོ་ཆེ་སོགས་གྲངས་མེད་པ་ཕུལ་ནས་སྔར་བྱས་ལ་བཤགས་པ་དང་ཕྱིན་ཆད་མི་བྱེད་པའི་ཁས་ལེན་བྱས་ཤིང༌། རྒྱ་ནག་མུན་པའི་གླིང་ལ་དམ་པའི་ཆོས་ཀྱི་འཁོར་ལོ་བསྐོར་བར་གསོལ་བ་ཡང་བཏབ་བོ།།
དེ་ནས་འཛམ་གླིང་གེ་སར་རྒྱལ་པོས། རྒྱའི་ཞིང་ཆེན་བཅོ་བརྒྱད་ཀྱི་རྒྱལ་བློན་འབངས་དང་བཅས་པར། རང་རང་གི་བློ་དང་འཚམ་པའི་ཆོས་ཐེག་པ་རིམ་དགུའི་ཆོས་འཁོར་བསྐོར། མ་འགྲོ་དྲུག་བློ་སྣ་ཆོས་ལ་བསྒྱུར། ནད་མུག་འཁྲུག་རྩོད་ཞི། ལོ་ལེགས་ཚེ་བསོད་འཕེལ། རྒྱ་ནག་པོའི་ཡུལ་ཁམས་ཆེན་པོ་དེར་སངས་རྒྱས་ཀྱི་བསྟན་པ་ཉི་མ་ཤར་བ་ལྟར་མཛད་ནས་བཞུགས་སོ།།
དེའི་སྐབས་སུ་རྒྱ་རྗེས་གེ་སར་རྒྱལ་པོ་ལ། ཁྱེད་བོད་ཁ་བ་ཅན་ཟེར་བ་དེ་དུད་འགྲོའི་གླིང་ལྟ་བུ། མི་རྣམས་དམུ་རྒོད་པ། ལོངས་སྤྱོད་དམན་ཞིང་ས་གཞི་རྩུབ་པ། གཡང་ས་དང་ཚེར་མ་མང་པ། ནགས་ཚལ་སྟུག་པ་དེ་འདྲ་ཞིག་ཡོད་པར་གདའ། ང་རྒྱ་ཡི་ཡུལ་ནི་རྩི་ཤིང་མེ་ཏོག་འཛོམས་པ། འབྲུ་སྣ་མང་བ། ལོངས་སྤྱོད་ཆེ་ཞིང་ཡུལ་སྐྱིད་པ་འདི་འདྲ་གཞན་ན་མེད། དེས་ན་ངའི་བུ་མོ་ཝ་ཨ་ཀུན་མཚོ་དང༌། རྗེ་རྒྱལ་པོ་གེ་སར་ཁྱེད་གཉིས་ང་རྒྱ་རྗེའི་རྒྱལ་ཚབ་ལ་བཞུགས་དང༌། རྒྱའི་རྒྱལ་སྲིད་མངའ་ཐང་བཅས་པ་ཕུལ་ཏེ། བདག་སྐྱབས་འགྲོའི་སྡོམ་པ་བླངས་ཏེ་ཆོས་བསྒྲུབ་པ་ཡིན་གསུངས་པ་ན། གླིང་གེ་སར་རྒྱལ་པོས་རྒྱ་རྗེ་ལ་གླུ་འདི་བླངས་སོ།།
གླུ་ཐ་ལ་ལ་མོ་ཐ་ལ་ལེན། །སྐྱབས་བླ་མ་ཡི་དམ་མཁའ་འགྲོ་གསུམ། །གསོལ་བ་སྙིང་གི་དཀྱིལ་ནས་འདེབས། །འབྲལ་བ་མེད་པར་བྱིན་གྱིས་རློབས། །ཚུར་གསོན་དང་རྒྱ་ནག་རྒྱལ་པོ་ལགས། །ང་སེང་ཆེན་ནོར་བུ་དགྲ་འདུལ་དེ། །གོང་མ་ལྷ་ནས་མངགས་ལེ་ཡིན། །ནག་པོ་དགྲ་ཡི་ཁ་གནོན་ཡིན། །བོད་ཁ་བ་ཅན་གྱི་ལྷ་སྐལ་ཡིན། །ངས་ཕྱོགས་བཞིའི་དགྲ་བཞི་ཆམ་ལ་ཕབས། །ང་རང་ལོ་ལྔ་བཅུ་ཐམ་པའི་ལོར། །མ་ནེ་ནེས་ལུང་བསྟན་བྱུང་བ་ལ། །རྒྱའི་བཙུན་མོ་ཉི་མ་ཁྲི་སྐྱིད་གྲོངས། །རྒྱའི་རྒྱལ་པོ་མྱ་ངན་མ་སངས་ཡོད། །བཙུན་མོའི་རོ་རུལ་མ་ལང་ཡོད། །རྒྱ་ནག་པོ་ཁྲིམས་ཀྱི་མུན་པ་འཁྲིགས། །རྒྱ་རྒྱལ་མྱ་ངན་སེལ་དགོས་ཟེར། །རྒྱ་ནག་པོའི་ཁྲིམས་སྒོ་ཕྱེ་དགོས་ཟེར། །ལྷ་གོང་མའི་བཀའ་མངགས་མིན་པས་ན། །ང་གེ་སར་རྒྱ་ལ་ཡོང་དོན་མེད། །རྒྱ་ནག་པོར་དགོས་པའི་རྫས་སྣ་རྣམས། །དེ་མ་འཛོམས་ལོ་ངོ་ལྔ་ཙམ་འགོར། །དེ་ནས་རྒྱ་གླིང་ས་མཚམས་ལ། །ཟླ་གྲངས་ཞག་གྲངས་མང་པོ་འགོར། །རྒྱ་རྒྱལ་མཇལ་བའི་ཚུན་ཆད་ནས། རོ་རུལ་བསྲེགས་པའི་ཕྱི་ནང་ནས། །ཁྲིམས་ཆད་བཅད་ནས་ལོ་གཅིག་སོང༌། །དེ་ནས་རྒྱལ་པོས་ཆོས་ངོ་ཤེས། །སྡིག་ལས་མ་བྱེད་དགེ་བ་སྒྲུབས། །ཚེ་འདི་ལས་ཕྱི་མ་རིང་ལེ་རེད། །ལམ་འདི་ལས་བར་དོ་ལམ་འགག་ཆེ། །རྒྱ་ནག་པོ་མུ་སྟེགས་ས་ཆ་འདི། །བདེ་བ་དག་པའི་ཞིང་དུ་འཁོད། །ཁྱེད་རྒྱལ་སྲིད་ཆོས་བཞིན་སྐྱོངས་པར་གྱིས། །ང་ཡི་བཀའ་ལས་མ་འགལ་དགོས། །ང་གེ་སར་རྒྱུ་ལ་ཆགས་པ་མེད། །རྒྱ་ཡི་རྒྱལ་ས་འཛིན་དགོས་མེད། །རྒྱ་ནག་པོའི་རྒྱལ་ས་བཟུང་བ་ན། །གོང་མ་ལྷ་ཡི་བཀའ་ཆད་ཡོང༌། །གེ་སར་ཚེ་ལ་བར་ཆད་འོང༌།།
ཞེས་གླུ་དེ་བླངས་ཤིང༌། རྒྱ་རྗེ་ལ་ངས་ད་དུང་བོད་དབུ་ནག་གི་འགྲོ་དོན་རྫོགས་མེད་པས་བོད་ལ་འགྲོ་དགོས། ཁྱེད་རྒྱལ་པོས་རྒྱལ་ཁྲིམས་ཆོས་བཞིན་བསྐྱངས་ཏེ་ང་ལ་དད་པ་གྱིས་དང་མ་འོངས་པ་ན་ཁྱེད་ཀྱི་རྒྱལ་ས་འཛིན་པའི་རྟེན་འབྲེལ་འོང་གསུངས།
དེ་ནས་སྟག་གི་ཟླ་བའི་ཚེས་པ་བཅོ་ལྔ་ལ་གླིང་གི་རྒྱལ་བློན་རྣམས་རང་ཡུལ་ལ་ལོག་པར་བརྩམས་པ་ན། རྒྱ་རྗེས་འཛམ་གླིང་གེ་སར་རྒྱལ་པོར་སྐུ་དྲིན་གསོ་བའི་ཕྱིར། རིན་པོ་ཆེ་དང་དར་ཟབ། རྟ་གླང་སོགས་འབུལ་བ་བསམ་གྱིས་མི་ཁྱབ་པ་ཕུལ། དེར་སྲས་མོ་ཝ་ཨ་ཀུན་མཚོས་སྨོན་ལམ་གྱི་གླུ་འདི་བླངས་སོ།།
ཤར་རྒྱ་ནག་རི་བོ་རྩེ་ལྔ་ནས། །སྐུ་མི་འགྱུར་འཕགས་པ་འཇམ་དབྱངས་མཁྱེན། །ང་བུ་མོའི་གླུ་སྣ་སྐྱོང་རོགས་མཛོད། །ང་དང་ང་ངོ་མ་ཤེས་ན། །རྒྱའི་སྲས་མོ་ཝ་ཨ་ཀུན་མཚོ་ཡིན། །གླིང་རྗེ་གེ་སར་རྒྱལ་པོ་ལགས། །ངས་མ་ཤེས་མ་མཁས་ཅི་བྱུང་ཡང༌། །རྗེ་གེ་སར་མདུན་ལ་མཐོལ་ལོ་བཤགས། །ངའི་ཡབ་ཆེན་ཀ་ར་གུར་མགོན་འདི། །སྐུ་ཚེ་ལ་བར་ཆད་མི་འོང་ཞུ། །ལས་སྨོན་རྟེན་འབྲེལ་བཟང་པོ་ཞུ། །དེ་རིང་ཚེས་པ་བཅོ་ལྔ་ལ། །ཁྱེད་དཔོན་བློན་འཁོར་དང་བཅས་པ་ཀུན། །གཟའ་སྐར་འཕྲོད་སྦྱོར་ལེགས་པར་ཤོག །ལམ་སྣ་དར་ལས་འཇམ་པར་ཤོག །ཀེག་དང་བར་ཆད་མེད་པར་ཤོག །སྨོན་ལམ་ཅི་བཏབ་འགྲུབ་པར་ཤོག །སྐུ་ཚེ་བརྟན་ཅིང་མཛད་འཕྲིན་རྒྱས། །སླར་ཡང་མཇལ་བའི་སྨོན་ལམ་འདེབས།།
ཞེས་གླུ་དེ་ལྟར་བླངས་ནས་གེ་སར་ལ་གྱེས་ཕྱག་ཕུལ། དེ་ནས་གེ་སར་རྒྱལ་པོས་དར་དཀར་པོ་ཉིན་མོ་བདེ་ལེགས་ཤིག་ལ་རྡོ་རྗེའི་ཚེ་མདུད་ཅིག་བརྒྱབ་སྟེ་རྒྱ་རྗེ་ལ་ཕུལ། བློན་པོ་རྣམས་ལ་མདའ་གསེར་ལྟོང་མ་ལྔ་བཅུ་རེ་ཕུལ་ཏེ། གླིང་གི་རྒྱལ་བློན་རྣམས་བྱེས་དོན་ལེགས་པར་གྲུབ་ནས་རང་ཡུལ་ཁྲ་མོ་གླིང་ལ་ཕེབས་སོ།། །།

གླེང་བརྗོད།
ནག་པོ་རྒྱ་གླིང་། (དང་པོ)
གློག་རྡུལ་དེབ།

Menu