མ་སུ་རི་བོད་ཁྱིམ་སློབ་གྲྭ།

༡།    འགོ་འཛུགས།

མ་སུ་རི་བོད་ཕྲུག་ཁྱིམ་སྡེ་ཚོགས་པ་ནི། རྒྱ་གར་བྱང་ཕྱོགས་ཨུཏཱར་ཁཱནཌ་མངའ་སྡེའི་ལྡེ་ར་ལྡུན་གྲོང་ཁྱེར་ཉེ་ཁུལ་གྱི་མ་སུ་རི་ཞེས་པའི་རི་གྲོང་དུ་ཆགས་ཡོད། ཕྱི་ལོ་༡༩༥༩ ལོར་བོད་མི་རྣམས་རྒྱ་གར་ནང་བཙན་བྱོལ་དུ་འབྱོར་རྗེས། ཉག་ཕྲ་བའི་དུས་སྐབས་དེར་བོད་མི་རིགས་ཀྱི་ཆོས་དང༌། རིག་གཞུང༌། སྐད་ཡིག གོམས་གཤིས་སོགས་ཐུན་མོང་མ་ཡིན་པའི་ཁྱད་ཆོས་བཟང་པོ་རྣམས་མི་ཉམས་རྒྱུད་འཛིན་སླད། ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་བོད་མི་རྣམས་རང་གི་རིག་གཞུང་སྲུང་སྐྱོབ་དང་རང་ཡུལ་རང་དབང་ལ་ཉེ་བར་མཁོ་བ་ཤེས་ཡོན་ཡིན་པ་རྗེན་གཟིགས་ཀྱིས་ཕྱི་ལོ་༡༩༦༠ ཟླ་༣ པར་མ་སུ་རིར་བཙན་བྱོལ་བོད་མིའི་སློབ་གྲྭ་ཐོག་མར་དབུ་འཛུགས་ཐོག རྒྱ་གར་དབུས་གཞུང་ལ་འབོད་སྐུལ་གྱིས་བོད་མིའི་སྡོད་སྒར་ཁག་ཏུ་བོད་རིགས་སློབ་གྲྭ་ཟུར་འཛུགས་གནང་རྒྱུའི་ལམ་སྟོན་དང་ཐུགས་འཁུར་བླ་མེད་འོག དྷ་རམ་ས་ལ་དང་སིམ་ལ། ཌལ་ཧོར། རྡོར་གླིང་བཅས་སུ་སློབ་གྲྭ་གསར་འཛུགས་ཀྱིས་བོད་ཕྲུག་རྣམས་དེང་དུས་ཀྱི་སློབ་སྦྱོང་ཐོབ་པའི་སྐལ་བ་ལྡན་ཡོད། ཡིན་ནའང༌། དྷ་ས་དང་མ་སུ་རི་བཅས་སུ་བུ་ཕྲུག་གི་གྲངས་འབོར་ཆེས་མང་ཞིང་སློབ་གྲྭའི་མཐུན་རྐྱེན་ཞན་པས་ལྕོགས་ཐབས་མེད་པར་བརྟེན། ལྷ་ལྕམ་ཕྲེང་རིང་རིན་ཆེན་སྒྲོལ་མ་དམ་པ་དེ་ཉིད་ལ་སློབ་ཕྲུག་སྡོད་ཁང་གསར་འཛུགས་ཀྱི་ཐུགས་འགན་བཞེས་དགོས་པའི་ཕྱག་རྟགས་ཕེབས་པ་དང་ཆབས་ཅིག་ྋགོང་ས་མཆོག་སྐུ་སྒེར་ནས་ཧིན་སྒོར་༦༨༧༣༦ གསོལ་སྩལ་གནང་བར་བརྟེན། ཕྱི་ལོ་༡༩༦༢ ཟླ་༡༡ ཚེས་༧ ཉིན་ཁྱིམ་ཚང་གསུམ་གྱི་ས་ཁང་གསར་གཟིགས་ཐོག་ཁྱིམ་ཚང་དང་པོའི་ཕ་མར་གདན་གཉེར་ཚང་ཐུབ་བསྟན་དོན་གྲུབ་དང་བཀྲ་ཤིས་གཡང་འཛོམས། ཁྱིམ་ཚང་གཉིས་པའི་ཕ་ཚབ་བློ་བཟང་ཕུན་ཚོགས་དང་ངག་དབང་འབྱུང་གནས། ཁྱིམ་ཚང་གསུམ་པའི་ཕ་མར་བསོད་ནམས་རབ་བརྟན་དང་ཚེ་རིང་འཛོམས་པ་བཅས་བསྐོ་བཞག་གིས་བོད་རིགས་དྭ་ཕྲུག་ཉམ་ཐག་༦༨ ལ་གཟིགས་སྐྱོང་གནང་འགོ་བཙུགས། ཕྱི་ལོ་༡༩༦༣ ཟླ་༤ ཚེས་༢༢ ཉིན་བོད་ཕྲུག་ཁྱིམ་སྡེ་ཚོགས་པ་འདི་བཞིན་རྒྱ་གར་གཞུང་ལ་ཁྲིམས་མཐུན་དེབ་སྐྱེལ་ཞུས་ཐོབ་བྱུང་སྟེ་ཚོགས་པ་འདི་ཉིད་དངོས་སུ་དབུ་བརྙེས། སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་ཚོགས་པའི་འགན་འཛིན་ལྷན་ཚོགས་ཀྱི་ཚོགས་གཙོའི་མཚན་བཞེས་གནང་བ་དང༌། བློན་ཆེན་ལྕམ་སྐུ་ཨིན་དྷི་ར་གྷན་དྷི་དང༌། སྐབས་དེའི་རྒྱ་གར་ཕྱི་སྲིད་བློན་ཆེན་ལྕམ་སྐུ་ལཱག་ཤཱི་མཱི་ནོན། ཡུ་པིའི་མངའ་སྡེའི་སྤྱི་ཁྱབ་བློན་ཆེན་ལྕམ་སྐུ་སུཇཱིཏཱ་ཀཱིར་པཱ་ལཱནི། ཡབ་གཞིས་ལྕམ་སྐུ་ཚེ་རིང་སྒྲོལ་མ། ལྕམ་སྐུ་ཕྲེང་རིང་རིན་ཆེན་སྒྲོལ་མ། ཡབ་ཚང་ལྕམ་སྐུ་བདེ་ཆེན་སྒྲོལ་མ་བཅས་ནས་ཚོགས་མིའི་མཚན་བཞེས་གནང་ཐོག་ཕྱི་ལོ་༡༩༦༣ ཟླ་༤ ཚེས་༢༣ ཉིན་འགན་འཛིན་ལྷན་ཚོགས་ཐེངས་དང་པོ་སྐོང་ཚོགས་གནང་བ་བཅས། བོད་ཕྲུག་ཁྱིམ་སྡེ་ཚོགས་པ་དངོས་སུ་དབུ་བརྙེས་པར་ངོས་འཛིན་ཐོབ་པ་ནས་ད་ཡོད་གཞི་རྒྱ་ཆེ་བའི་མ་སུ་རི་བོད་ཕྲུག་ཁྱིམ་སྡེའི་སྒྲིག་འཛུགས་འདི་དངོས་སུ་དབུ་བརྙེས། སྐབས་དེར་སློབ་ཕྲུག་རྣམས་མ་སུ་རི་གཏན་སློབ་ནང་ཉིན་སློབ་ཀྱི་ངོ་བོར་བཏང་བ་དང། ལོ་དེར་བཞུགས་སྒར་རྡ་ས་ནས་རང་རིགས་དྭ་ཕྲུག་ཁག་གཅིག་འབྱོར་བར་སྡོད་གནས་ཆེད་ཁྱིམ་ཚང་ཁག་༥ གསར་གཟིགས་ཐོག་ཕྲུ་གུ་ཚོའི་འཕྲོད་བསྟེན་ཆེད་སྨན་ཁང་ཆུང་ཆུང་ཞིག་ཀྱང་གསར་འཛུགས་གནང༌། ཕྱི་ལོ་༡༩༦༤ དགེ་རྒན་གཅིག་བསྐོ་བཞག་གིས་ལག་ཤེས་ཚེམ་བུའི་སྡེ་ཚན་ཞིག་གསར་འཛུགས་དང༌། ལོ་དེའི་ཟླ་༡༠ ཚེས་༡༩ ཉིན་ཐོག་མར་དགེ་རྒན་༣ བསྐོ་བཞག་གནང་ཐོག བོད་ཁྱིམ་ནས་ཉིན་སློབ་བསྐྱོད་བཞིན་པའི་སློབ་ཕྲུག་ཁོངས་བློ་རིག་བཟང་བ་༢༥ དྲག་འདེམས་ཀྱིས་སློབ་གྲྭ་ཆུང་ཆུང་ཞིག་དབུ་འཛུགས་གནང་བ་ནི་མ་སུ་རི་བོད་ཕྲུག་ཁྱིམ་སྡེའི་ཐོག་མའི་རྣམ་པ་དེ་ཡིན། དེང་སྐབས་མ་སུ་རི་བོད་ཕྲུག་ཁྱིམ་སྡེ་འདིར་ཁྱིམ་ཚང་ཆེ་བ་གྲངས་༢༩ དང༌། ཨེས་ཨོ་ཨེསེ་ཁྱིམ་ཚང་ཆུང་བ་གྲངས་༡༡ བུ་དང་བུ་མོའི་ཉལ་ཁང་ཆེ་བ་ཁག་༢ ལག་ཤེས་སློབ་གཉེར་ཁང་༡ རྒན་གསོ་ཁང་༡ བཅས་དང༌། རཱ་ཇི་པུར་ཡན་ལག་སློབ་གྲྭར་ཨེས་ཨོ་ཨེས་ཁྱིམ་ཚང་ཆུང་བ་གྲངས་༡༤ བུ་དང་བུ་མོའི་ཉལ་ཁང་ཆེ་ཁག་གྲངས་༣ རྒན་གསོ་ཁང་༢ ལས་བྱེད་བགྲེས་ཡོལ་ཁང་༡ ལྡི་ལིར་མགྲོན་ཁང་༡ གཞི་རིམ་འོག་མའི་སློབ་གྲྭ་༢ སྔོན་འགྲོའི་སློབ་གྲྭ་༢ སྡེ་ཚན་བཞི་ལྡན་གྱི་ལག་ཤེས་སློབ་གཉེར་ཁང་༡ བཅས་མ་ལག་ལྡན་པའི་མཐུན་རྐྱེན་གང་ལེགས་ལྡན་ཡོད། ཕྱི་ལོ་༢༠༠༨ ལོར་བོད་ཁྱིམ་སློབ་གྲྭ་འདིའི་ནང་སློབ་ཕྲུག་གྲངས་༡༣༥༠ དང༌། དགེ་རྒན་གྲངས་༨༩ ཡོད། འགྲོ་སྡོད་ལམ་སྟོན་དང་འཕྲོད་བསྟེན་གཙང་སྦྲ་གཟིགས་རྟོགས་ཆེད་ལས་བྱེད་གྲངས་༧༩ ཟས་གོས་ཐབས་འཚོལ་སོགས་ཀྱི་ཆེད་ལས་བྱེད་གྲངས་༦༩ བཅས་ཡོད། སློབ་གྲྭ་འདིའི་ཁོངས་སུ་མེད་པར་བོད་སློབ་ཁག་ནང་བསྐྱོད་བཞིན་པའི་རང་རིགས་ཕ་མ་ཉམ་ཐག་ཅན་གྱི་ཕྲུ་གུ་གྲངས་༣༦༠ ལ་བོད་ཁྱིམ་འདི་ནས་འཚོ་སྣོན་དང་སློབ་དོད་རོགས་སྐྱོར་གང་འོས་གནང་བཞིན་ཡོད། ད་ཡོད་རྒན་གསོ་ཁང་ཁག་གསུམ་ནང་རྒས་གཅོང་ཉམ་ཐག་ཕོ་མོ་གྲངས་༡༥༢ ལ་ཟླ་རེར་འཚོ་སྣོན་སྤྲོད་བཞིན་ཡོད། གཞན་ཡང་རྒྱ་གར་མཐོ་སློབ་ཁག་ནང་སློབ་གཉེར་བྱེད་མཁན་སློབ་ཕྲུག་༣༠༠ ལྷག་ལ་ཟས་སྡོད་སློབ་ཡོན་སྤྲོད་བཞིན་ཡོད།

༢།    མཐུན་རྐྱེན་འཛུགས་སྐྲུན།

ཕྱི་ལོ་༡༩༦༤ ལོར་མ་སུ་རིར་བཙན་བྱོལ་ནང་གི་དགོན་པ་དང་པོ་བཤད་སྒྲུབ་ཆོས་འཕེལ་གླིང་དང༌། བོད་ཕྲུག་ཁྱིམ་སྡེའི་ཡིག་ཚང་དང༌། སྔར་ཡོད་ཁྱིམ་ཚང་སྟེང་ཁྱིམ་ཚང་༡༢ གསར་འཛུགས་གནང༌། སྐབས་དེར་ཕྲུ་གུ་ཚོའི་དགུན་དུས་གྱོན་ཆས་ཆེད་ཁྱིམ་ཚང་ཕ་མ་ཚོར་བལ་ལན་བསླ་རྒྱུའི་སློབ་སྦྱོང་སྤྲད་དེ་ཐོན་སྐྱེད་རང་གསོ་ཐུབ་པ་བྱས། ལོ་དེར་སློབ་ཕྲུག་གྲངས་འབོར་རིམ་འཕར་དབང་གིས་སླར་ཡང་ཁྱིམ་ཚང་ཁག་༥ གསར་བཞེངས་གནང༌། ཕྱི་ལོ་༡༩༦༥ ལོ་ནས་རྒྱལ་བའི་བཀའ་དགོངས་ལྟར་བྱིས་པ་ཚོ་གཅིག་པུར་མ་ཡིན་པར་རང་རིགས་བཙན་བྱོལ་ནང་སྤུན་ཉེ་བུ་ཕྲུག་ལྟ་སྐྱོང་བྱེད་མི་མེད་པར་གཟིགས་སྐྱོང་གནང་རྒྱུ་ཡང་གལ་ཆེར་དགོངས་བཞེས་ཀྱིས་རྒས་གཅོང་ཉམ་ཐག་བཟའ་མི་༤ ལ་སྡོད་ཁང་གསར་རྒྱག་གནང༌། ཕྱི་ལོ་༡༩༦༧ ལོར་སློབ་ཕྲུག་གྲངས་འབོར་ལ་གཞིགས་ཏེ་ཁྱིམ་ཚང་༥ གསར་རྒྱག་དང༌། ཕྱི་ལོ་༡༩༦༩ ལོར་ས་གནས་སུ་གྲོ་ཞིབ་དུས་ཐོག་ཐོབ་མིན་དཀའ་ངལ་ཡོད་མུས་ལ་སོང་སློབ་ཕྲུག་ཚོའི་ཆེད་གྲོ་ཞིབ་འཐག་ལས་ཁང་ཞིག་དང༌། ཕྱི་ལོ་༡༩༧༠ ལོར་བོད་ཕྲུག་ཚོར་ལས་རིག་སྦྱོང་བརྡར་ཆེད་སྲོལ་རྒྱུན་རི་མོའི་སྡེ་ཚན་ཞིག་གསར་འཛུགས་གནང༌། ཕྱི་ལོ་༡༩༧༡ ལོར་བོད་ཁྱིམ་གྱི་སློབ་ཕྲུག་མ་སུ་རི་གཏན་སློབ་ཏུ་ཉིན་སློབ་བསྐྱོད་མཁན་སློབ་མ་༢ ཐོག་མར་གཞི་རིམ་སློབ་གྲྭ་ནས་སློབ་མཐར་ཕྱིན། ལོ་དེར་རྡ་ས་བོད་ཁྱིམ་དུ་ལམ་བཟོ་བའི་བོད་ཕྲུག་ཁྱོན་ཆེ་སླེབས་སྟབས། བོད་ཁྱིམ་ནས་མཐུན་འགྱུར་རོགས་རམ་དགོས་གལ་ལ་བརྟེན་ཁྱིམ་ཚང་བདུན་གསར་རྒྱག་གི་རོགས་སྐྱོར་གནང༌། ཕྱི་ལོ་༡༩༧༥ ལོར་དྲུང་ཆེ་ཕྲེང་རིང་རིན་ཆེན་སྒྲོལ་མ་ལགས་བགྲེས་ཡོལ་ཕེབས་ཚབ་ཕྱག་མཛོད་ཚང་སྲས་མོ་མཁའ་འགྲོ་མཆོག་བསྐོ་བཞག་གནང་བ་བཞིན་ཐུགས་འགན་བཞེས། ཕྱི་ལོ་༡༩༧༧ ཟླ་༥ ནང་ལྡེ་ར་ལྡུན་གྲོང་ཁྱེར་ཉེ་འགྲམ་དུ་ཡོད་པའི་རཱ་ཇི་པུར་ས་གནས་བོད་མི་རྣམས་ཀྱི་ཕྲུ་གུ་སློབ་གྲྭར་གཏོང་ཡུལ་མེད་པའི་བཀའ་ངལ་ལ་དགོངས་བཞེས་ཀྱིས་ཐོག་མར་དགེ་རྒན་༤ བསྐོ་བཞག་ཐོག་ས་གནས་ཡུལ་མིའི་ཕྲུ་གུ་གྲངས་༢༠ ཡི་ཆེད་རཱ་ཇི་པུར་བོད་ཁྱིམ་སློབ་གྲྭ་ཆེད་འཛུགས་ཀྱི་དབུ་འབྱེད་མཛད་སྒོ་བསྐྱངས་གནང་མཛད་པ་དང༌། མ་སུ་རིར་ལས་བྱེད་གསོལ་ཚང་ཁང་དང་མགྲོན་ཁང་བཅས་གསར་བཞེངས་གནང༌། ཕྱི་ལོ་༡༩༧༨ ལོར་མ་སུ་རི་སྨན་ཁང་རྒྱ་བསྐྱེད་དང༌། སྐབས་དེར་རཱ་ཇི་པུར་དུ་སྨན་ཁང་ཆུང་ཆུང་ཞིག་གསར་དུ་བསྐྲུན། ཕྱི་ལོ་༡༩༧༩ ལོར་ཕྱི་ནང་བོད་མི་འབྲེལ་ལམ་ཚུགས་ཏེ་བོད་ནང་སློབ་སྦྱོང་གི་གོ་སྐབས་མེད་པར་བརྟེན་བོད་ཕྲུག་སློབ་གཉེར་བ་ཐེངས་དང་པོ་འབྱོར། ཕྱི་ལོ་༡༩༨༢ ལོར་མ་སུ་བོད་ཁྱིམ་དུ་ཨེསེ་ཨོ་ཨེས་བྱིས་པའི་གྲོང་སྡེ་གསར་འཛུགས་ཞུས་ཏེ་ཁྱིམ་ཚང་༨ ཨེསེ་ཨོ་ཨེས་མ་ཡིན་པའི་ཁྱིམ་ཚང་༢ གསར་རྒྱག་གནང༌། ྋགོང་ས་ྋསྐྱབས་མགོན་ཆེན་པོ་མཆོག་གིས་དབུས་པའི་བཙན་བྱོལ་གཞུང་གི་སྒྲིག་འཛུགས་སྲ་བརྟན་ཡར་ངོའི་ཟླ་ལྟར་འཕེལ་བ་དང་དུས་མཚུངས། མ་སུ་རི་བོད་ཁྱིམ་ཡང་ཡར་རྒྱས་ཕྱོགས་སུ་གོམ་པ་མདུན་བསྐྱོད་ཀྱིས་སློབ་ཕྲུག་གྲངས་འབོར་འཕར་བ་དང་ཕྱོགས་མཚུངས་རྒྱ་གར་གཞུང་དང་རོགས་ཚོགས་རྣམ་པའི་རོགས་རམ་འོག་རང་རིགས་ཉམ་ཐག་དང་དྭ་ཕྲུག་ཕྱེད་དྭ་ཕྲུག བོད་ནས་གསར་དུ་འབྱོར་བའི་ཕྲུ་གུ་བཅས་གྲངས་མང་ལ་གཟིགས་རྟོག་གནང་རྒྱུའི་ཕྱི་ནང་མཐུན་རྐྱེན་ཇེ་བཟང་དུ་ཕྱིན་པར་བརྟེན། ཕྱི་ལོ་༡༩༨༤ ལོར་སློབ་གྲྭ་རྒྱ་བསྐྱེད་ཀྱི་འཛིན་ཁང་༡༢ དང་བོད་ཁྱིམ་ལས་ཁང་རྒྱ་བསྐྱེད་གནང༌། ཕྱི་ལོ་༡༩༨༥ ཨེསེ་ཨོ་ཨེས་ཁྱིམ་ཚང་༣ གསར་རྒྱག་ཞུས། ཕྱི་ལོ་༡༩༨༧ ལོར་མི་གྲངས་སུམ་སྟོང་ཙམ་ཤོང་བའི་ཚོགས་ཁང་གསར་བསྐྲུན་དང༌། འཛིན་ཁང་ཁང་མིག་༡༢ གསར་སྐྲུན་རྒྱ་བསྐྱེད་གནང༌། རྒྱ་གར་དབུས་འབྲིང་སློབ་ཤེས་ཡོན་ལྷན་ཚོགས་(CBSE)ཁོངས་གཏོགས་འཛིན་རིམ་བཅུ་པ་ངོས་འཛིན་ཡོང་ཐབས་ཞུས། ལོ་དེར་བོད་ཁྱིམ་དྲུང་ཆེ་ཕྱག་མཛོད་ཚང་སྲས་མོ་མཁའ་འགྲོ་མཆོག་འཕོས་ཚབ་ཏུ་གསང་གླིང་ཚེ་རིང་རྡོ་རྗེ་མཆོག་དྲུང་ཆེར་ཕེབས། ཕྱི་ལོ་༡༩༨༨ ལོར་དྲུང་ཆེ་གསང་གླིང་ཚེ་རིང་རྡོ་རྗེ་མཆོག་འཕོས་ཚབ་ཏུ་གྲ་ནང་རྣམ་རྒྱལ་ཚེ་རིང་མཆོག་དྲུང་ཆེར་ཕེབས། ལོ་དེར་བོད་ཁྱིམ་སློབ་གྲྭ་དེ་བཞིན་རྒྱ་གར་དབུས་གཞུང་གི་འཛིན་རིམ་བཅུ་པ་ཅན་གྱི་སློབ་གྲྭར་ངོས་འཛིན་ཆོག་མཆན་ཐོབ། ཕྱི་ལོ་༡༩༨༩ ལོར་སླར་ཡང་ཁྱིམ་ཚང་གཅིག་གསར་འཛུགས་ཞུས་པ་དང༌། འཛིན་རིམ་བཅུ་པ་ཡན་གྱི་སྡོད་ཁང་གསར་སྐྲུན་གནང༌། ཕྱི་ལོ་༡༩༩༢ ལོར་བོད་ཁྱིམ་སློབ་གྲྭ་རྒྱ་བསྐྱེད་ཀྱི་ཚན་རིག་བརྟག་དཔྱད་ཁང་དང༌། གཟུགས་མཐོང་བརྙན་འཕྲིན་ཁང༌། དཔེ་མཛོད་ཁང༌། འཛིན་རིམ་མཐོ་བའི་འཛིན་ཁང༌། རྩེད་ཆས་ཁང་བཅས་ཁང་ཁུངས་༡༧ ཡོད་པའི་ཐོག་བརྩེགས་བཞི་ཅན་རྩེད་ཐང་དང་བཅས་གསར་རྒྱག་གྲུབ། ལོ་དེར་བོད་ཁྱིམ་སློབ་གྲྭ་ནས་འཛིན་རིམ་བཅུ་གཉིས་སློབ་ཐོན་ཐེངས་དང་པོའི་མཐར་ཕྱིན་མཛད་སྒོ་བསྐྱངས། ཕྱི་ལོ་༡༩༩༣ ལོར་དྲུང་ཆེ་གྲ་ནང་རྣམ་རྒྱལ་ཚེ་རིང་མཆོག་འཕོས་ཚབ་ཏུ་ལྕམ་སྐུ་འགོ་རབ་པདྨ་བདེ་ཆེན་མཆོག་དྲུང་ཆེར་ཕེབས། ཕྱི་ལོ་༡༩༩༥ ལོར་མ་སུ་རིར་ཐོག་བརྩེགས་བཞི་ཅན་གྱི་བུ་མོའི་སྡོད་ཁང་དང༌། ཁྱིམ་ཚང་གཅིག་གསར་བསྐྲུན་ཞུས། ཕྱི་ལོ་༡༩༩༦ ལོར་དྲུང་ཆེར་འགོ་རབ་པདྨ་བདེ་ཆེན་མཆོག་འཕོས་ཚབ་ལྕམ་སྐུ་དྭགས་པོ་སྐལ་བཟང་གཡུ་སྒྲོན་མཆོག་དྲུང་ཆེར་ཕེབས། ལོ་དེར་ཁྱིམ་ཚང་གཅིག་གསར་རྒྱག་གནང་བ་དང༌། ཕྱི་ལོ་༡༩༩༧ ལོར་དྲུང་ཆེ་སྐལ་བཟང་གཡུ་སྒྲོན་མཆོག་འཕོས་ཚབ་ཏུ་སྐུ་ངོ་ཐུབ་བསྟན་རྡོ་རྗེ་མཆོག་དྲུང་ཆེར་ཕེབས། ལོ་དེར་ཀམ་པུ་ཊར་༣༥ གསར་གཟིགས་ཀྱིས་བོད་སློབ་ཁག་ནང་དེང་དུས་དང་མཐུན་པའི་ཀམ་པུ་ཊར་ཤེས་ཡོན་སྤྲོད་རྒྱུའི་ལམ་སྲོལ་ཐོག་མ་སྲོལ་གཏོད་མཛད། ཕྱི་ལོ་༡༩༩༨ ལོར་དཔེ་མཛོད་གཅིག་ནང་སློབ་ཕྲུག་ཆེ་ཆུང་ཚང་མར་གོ་སྐབས་ཐོབ་མིན་དཀའ་ངལ་ལ་གཞིགས་ཏེ། གཞི་རིམ་འོག་མའི་སློབ་ཕྲུག་ཚོར་དམིགས་ཏེ་ཕྲུ་གུ་ཚོའི་བློ་རིག་དང་འཚམས་པའི་དཔེ་དེབ་སྔོན་ཡོད་སྟེང་གསར་གཟིགས་ཀྱིས་གཞི་རིམ་འོག་མའི་དཔེ་མཛོད་ཁང་གསར་དུ་སྒོ་དབྱེ་མཛད། དེ་བཞིན་འཁྲིད་ཆས་བཟོ་སྐྲུན་ཁང་དང༌། མདུན་ལམ་སློབ་སྟོན་པ་ཆེད་བསྐོས་ཀྱིས་མདུན་ལམ་སློབ་སྟོན་ཁང་ཡང་སྒོ་འབྱེད་གནང༌། དེ་སྔོན་སྔོན་འགྲོ་དང་གཞི་རིམ་སློབ་གྲྭ་གཉིས་མཉམ་དུ་ཡོད་སྟབས་སློབ་ཕྲུག་ཆེ་ཆུང་གཉིས་ཀྱི་སློབ་ཡུན་སོགས་ཕྱོགས་གང་ས་ནས་མཐུན་མིན་ལ་སོང་ཚད་དང་ལྡན་པའི་སྔོན་འགྲོའི་སློབ་གྲྭའི་སྡེ་ཚན་ཟུར་དུ་འཛུགས་རྒྱུ་གལ་ཆེར་དགོངས་ཏེ། ཕྱི་ལོ་༡༩༩༩ ལོར་སྔོན་འགྲོའི་སློབ་གྲྭའི་སྡེ་ཚན་ཟུར་འཛུགས་གནང་སྟེ་བྱིས་པ་ཚོར་དེང་དུས་ཀྱི་སློབ་སྦྱོང་སྤྲོད་རྒྱུའི་ལམ་སྲོལ་དང་མཐུན་པའི་སློབ་གྲྭ་དབུ་འབྱེད་བྱས། ཕྱི་ལོ་༢༠༠༨ ཟླ་༡༠ ཚེས་༤ ཉིན་སུད་སི་ཨེས་ཨོ་ཨེས་རོགས་ཚོགས་ཀྱི་དཔལ་འབྱོར་རོགས་རམ་འོག་ཁྱིམ་ཚང་གསར་པ་༥ ལེགས་གྲུབ་ཀྱིས་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་གདན་ཞུས་ཀྱིས་དབུ་འབྱེད་གནང༌། ཕྱི་ལོ་༢༠༠༢ ལོར་དྲུང་ཆེ་སྐུ་ངོ་ཐུབ་བསྟན་རྡོ་རྗེ་འཕོས་ཚབ་ཏུ་ཨརྱ་པདྨ་དགྲ་འདུལ་མཆོག་དྲུང་ཆེར་ཕེབས། ཕྱི་ལོ་༢༠༠༣ ལོར་ཤེས་ཡོན་གལ་ཆེར་དགོངས་སྟེ་ཤེས་ཡོན་སྡེ་ཚན་ཟུར་འཛུགས་ཐོག་ཤེས་ཡོན་འགན་འཛིན་གསར་བསྐོ་མཛད་པ་དང༌། སློབ་སྤྱིའི་ཞབས་སྟེགས་གསར་བསྐོ་མཛད། ཕྱི་ལོ་༢༠༠༤ ལོར་སྐུ་ངོ་པདྨ་དགྲ་འདུལ་མཆོག་འཕོས་ཚབ་ཏུ་སྐུ་ངོ་ངག་དབང་འཕེལ་རྒྱས་མཆོག་དྲུང་ཆེར་ཕེབས། ལོ་དེར་སླར་ཡང་ཀམ་པུ་ཊར་གྲངས་༢༢ གསར་གཟིགས་ཀྱིས་གཞི་རིམ་འོག་མའི་སློབ་ཕྲུག་ཚོའི་ཆེད་འཛིན་གྲྭ་ཆེད་འཛུགས་ཞུས་པ་དང༌། ལོ་དེར་བོད་ཁྱིམ་སློབ་གྲྭའི་ནང་རྩོད་པའི་ལམ་ནས་རིགས་ལམ་སློབ་འཁྲིད་ཀྱི་ལམ་སྲོལ་གསར་གཏོད་གནང་བ་ནི་སློབ་གྲྭ་ཁག་གི་མིག་དཔེ་ལྟ་བུར་གྱུར་ཡོད། ཕྱི་ལོ་༢༠༠༥ ལོར་སྐུ་ཞབས་ངག་དབང་འཕེལ་རྒྱས་མཆོག་འཕོས་ཚབ་སྐུ་ཞབས་བཀྲ་ཤིས་ཕུན་ཚོགས་མཆོག་དྲུང་ཆེར་ཕེབས་ཏེ་ད་བར་བོད་ཁྱིམ་གྱི་དྲུང་ཆེའི་ཐུགས་འགན་བཞེས་མུས་ཡིན། མདོར་ན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་གི་ལམ་སྟོན་འོག་འདས་པའི་དབུ་ལས་ཚོས་འབད་བརྩོན་ལ་བརྟེན་ནས་ད་ཆ་ཕྱི་ལོ་༢༠༠༨ ལོར་བར་མ་སུ་རི་བོད་ཕྲུག་ཁྱིམ་སྡེ་ཚོགས་པ་ནས་མཐོ་སློབ་སློབ་ཡོན་མཐུན་འགྱུར་ཞུས་ཏེ་མཐོ་སློབ་སློབ་ཐོན་བྱུང་བ་གཤམ་གསལ་རེའུ་མིག་ལྟར་རོ། །

ཕྱི་ལོ། མཐོ་སློབ་སློབ་ཐོན་སློབ་ཕྲུག
༡༩༧༡ ནས་༡༩༩༠ ༣༣༥
༡༩༩༠ ནས་༡༩༩༤ ༡༣༦
༡༩༩༥ ༥༦
༡༩༩༦ ༣༩
༡༩༩༧ ༤༦
༡༩༩༨ ༦༥
༡༩༩༩ ༤༢
༢༠༠༠ ༥༠
༢༠༠༡ ༥༡
༢༠༠༢ ༦༨
༢༠༠༣ ༧༩
༢༠༠༤ ༡༢༠
༢༠༠༥ ༢༥༥
༢༠༠༦ ༢༢༩
༢༠༠༧ ༢༣༤
༢༠༠༨ ༢༤༡
བསྡོམས། ༡༨༧༤

བཅས་ཕྱི་ལོ་༡༩༧༡ ནས་༢༠༠༨ བར་གྱི་འདས་པའི་ལོ་ངོ་༣༨ རིང་སློབ་གྲྭ་འདི་ཉིད་མཐར་ཕྱིན་ཏེ་མཐོ་སློབ་ཁག་ནང་ཞུགས་པའི་སློབ་ཕྲུག་༡༨༧༤ བྱུང་ཡོད་པ་འདིའི་ནང༌། འཛིན་རིམ་བརྒྱད་པ་དང་བཅུ་པ་སོགས་ནས་སློབ་ཕྲུག་རང་རང་གི་འདོད་བློ་དང་འཚམས་པའི་ལག་ཤེས་སྦྱོང་བརྡར་ནང་ཞུགས་མཁན་སློབ་ཕྲུག་གི་གྲངས་འབོར་ཚུད་མེད། བོད་ཁྱིམ་སློབ་གྲྭའི་ནང་དཔེ་མཛོད་ཆེ་བ་ཞིག་ཡོད་པའི་ནང་ཨིན་ཇིའི་སྒྲུང་དེབ་སོགས་དེབ་གྲངས་༣༥༡༥ ཙམ་དང༌། བོད་ཡིག་སྒྲུང་དེབ་སོགས་དེབ་གྲངས་༢༤༠༠ ཧིན་དི་སྒྲུང་དེབ་དེབ་གྲངས་༡༥༠ དཔྱད་གཞིའི་དེབ་ཨིན་བོད་བསྡོམས་དེབ་གྲངས་༣༠༠༠ ཡས་མས་བཅས་དང༌། དཔེ་མཛོད་ཆུང་བའི་ནང་ཨིན་ཇིའི་སྒྲུང་དེབ་སོགས་དེབ་གྲངས་༣༣༠༠ ཙམ་དང༌། བོད་ཡིག་སྒྲུང་དེབ་སོགས་དེབ་གྲངས་༡༠༠ ཧིན་དི་སྒྲུང་དེབ་དེབ་གྲངས་༢༠ དཔྱད་གཞིའི་དེབ་ཨིན་བོད་བསྡོམས་དེབ་གྲངས་༡༠༠༠ གསར་ཤོག་ཁག་འདྲ་མིན་༡༠ ཙམ་བཅས་ཡོད། ཚོགས་སྡེ་འདི་ནས་སློབ་མཐར་ཕྱིན་པའི་སློབ་ཕྲུག་གྲངས་༡༤༨༠ ཙམ་བྱུང་བ་རྣམས་གཞུང་སྒེར་གྱི་ལས་རིགས་སྣ་ཚོགས་ནང་ཞབས་འདེགས་སྒྲུབ་བཞིན་ཡོད། མ་སུ་རི་བོད་ཁྱིམ་དབུ་ཚུགས་པ་ནས་དྲུང་ཆེ་རིམ་བྱོན་གྱི་མཚན་གཞུང་དང་ལས་ཡུན་གཤམ་གསལ།

ཨང༌། མཚན་གཞུང༌། འགོ་འཛུགས། མཇུག་གྲིལ།
ཕྲེང་རིང་རིན་ཆེན་སྒྲོལ་མ། ༡༩༦༢ ༡༩༧༥
མཁའ་འགྲོ་ཕྱག་མཛོད་ཚང༌། ༡༩༧༥ ༡༩༨༧
གསང་གླིང་ཚེ་རིང་རྡོ་རྗེ། ༡༩༨༧ ༡༩༨༨
གྲ་ནང་རྣམ་རྒྱལ་ཚེ་རིང༌། ༡༩༨༨ ༡༩༩༣
སྒོ་རབ་པདྨ་བདེ་ཆེན། ༡༩༩༣ ༡༩༩༦
དྭགས་པོ་སྐལ་བཟང་གཡུ་སྒྲོན། ༡༩༩༦།༣།༨ ༡༩༩༧།༧།༦
ཐུབ་བསྟན་རྡོ་རྗེ། ༡༩༩༧།༧།༦ ༢༠༠༢།༥།༡༡
ཨརྱ་པདྨ་རྡོ་རྗེ། ༢༠༠༢།༥།༡ ༢༠༠༤།༤།༡༢
ངག་དབང་འཕེལ་རྒྱལ། ༢༠༠༤།༤།༡༢ ༢༠༠༥།༡༢།༦
༡༠ བཀྲ་ཤིས་ཕུན་ཚོགས། ༢༠༠༥།༡༢།༦ ་་་་་་་་་་་་་་་་་་་་་་་

༣།    སློབ་འཇུག་དང་ཡིག་རྒྱུགས་གནས་སྟངས།

འདས་པའི་ལོ་ངོ་༡༥ ནང་རང་ཡུལ་བོད་ནས་སློབ་སྦྱོང་དོན་དུ་གཉེར་བའི་ཕྲུག་གྲངས་༢༠༨༦ རྒྱ་དམར་གྱི་དམ་དྲག་འོག་ནས་ཐབས་ལམ་སྣ་ཚོགས་བརྒྱུད་གསར་དུ་སློབ་ཞུགས་བྱུང་བའི་གྲངས་འབོར་རེའུ་མིག་གཤམ་གསལ། ཕྱི་ལོ་༡༩༩༤ ནས་༢༠༠༨ བར་བོད་ནས་གསར་དུ་སློབ་ཞུགས་བྱས་པའི་སློབ་ཕྲུག་ཕོ་མོའི་གྲངས་ཐོ་གཤམ་གསལ། བོད་གཞུང་ཤེས་རིག་ལས་ཁུངས་ཀྱི་ཕྱི་ལོ་༢༠༠༧ ཟླ་༡༢ ཚེས་༣༡ ཉིན་གྱི་སྡོམ་ཐོ་ལྟར་ན། མ་སུ་རི་བོད་ཁྱིམ་སློབ་གྲྭ་འདིར་སློབ་ཕྲུག་བུ་༨༦༡ དང་བུ་མོ་༧༥༣ བཅས་ཁྱོན་བསྡོམས་༡༦༡༤ ཡོད་པ་ལས་སློབ་ཕྲུག་༨༢ མ་གཏོགས་ཚང་མ་གཏན་སློབ་ཡིན་ཞིང༌། སློབ་ཕྲུག་ཚང་མ་བོད་རིགས་ཤ་སྟག་ཡིན། དགེ་རྒན་༧༥ དང་ལས་བྱེད་༡༢ བཅས་ཁྱོན་བསྡོམས་དགེ་ལས་༨༧ ཡོད། ཕྱི་ལོ་༡༩༨༩ ནས་༢༠༠༩ བར་འདས་པའི་ལོ་ངོ་༢༡ རིང་མ་སུ་རི་བོད་ཁྱིམ་སློབ་གྲྭའི་ནང་སློབ་ཕྲུག་གྲངས་འབོར་འབོར་གནས་སྟངས་གཤམ་གསལ།

མ་སུ་རི་བོད་ཕྲུག་ཁྱིམ་སྡེ་འགོ་བཙུགས་པ་ནས་ཕྱི་ལོ་༢༠༠༨ བར་སློབ་གྲྭའི་ནང་འཛིན་གྲྭ་མཐའ་འཁྱོལ་བའི་སློབ་ཕྲུག་གྲངས་༡༤༠༨ ཙམ་བྱུང་ཡོད་པ་དང༌། རཱ་ཇི་པུར་བོད་ཁྱིམ་སློབ་གྲྭའི་འཛིན་རིམ་བཅུ་པ་༢༠༠༤ ལོར་ངོས་ལེན་བྱུང་བ་ནས་ཕྱི་ལོ་༢༠༠༨ བར་སློབ་གྲྭའི་ནང་འཛིན་གྲྭ་མཐའ་འཁྲོལ་བའི་སློབ་ཕྲུག་གྲངས་༡༦༢ ཙམ་བྱུང་ཡོད།

མ་སུ་རི་སློབ་གྲྭ་མ་ལག་གཉིས་འགོ་ཚུགས་པ་ནས་ཕྱི་ལོ་༡༩༩༦ ནས་༢༠༠༩ བར་གཞི་རིམ་གོང་མ་འཛིན་རིམ་བཅུ་པ་དང་བཅུ་གཉིས་པའི་རྒྱལ་ཡོངས་ཡིག་རྒྱུགས་གྲུབ་འབྲས་གནས་སྟངས་གཤམ་གསལ།

ཕྱི་ལོ། ༡༠ པའི་ཕྲུག་གྲངས། རྒྱུགས་འཕྲོད། ༡༢ པའི་ཕྲུག་གྲངས། རྒྱུགས་འཕྲོད།
༡༩༩༦ ༦༣ ༧༩་༠༣ ༣༢ ༨༤་༠༣
༡༩༩༧ ༣༨ ༨༤་༢༡ ༣༩ ༧༤་༣༥
༡༩༩༨ ༦༩ ༦༥་༢༡ ༦༢ ༩༥་༡༦
༡༩༩༩ ༤༥ ༩༡་༡༡ ༤༠ ༨༠་༠༠
༢༠༠༠ ༧༦ ༧༦་༣༡ ༤༨ ༨༥་༤༡
༢༠༠༡ ༧༨ ༦༦་༦༧ ༤༢ ༨༨་༠༩
༢༠༠༢ ༡༡༨ ༧༧་༡༠ ༧༡ ༨༨་༧༣
༢༠༠༣ ༡༡༢ ༥༨་༩༢ ༦༡ ༩༡་༨༠
༢༠༠༤ ༡༠༦ ༦༣་༢༡ ༡༠༤ ༨༨་༥༠
༢༠༠༥ ༨༨ ༥༥་༦༨ ༨༡ ༩༢་༦༠
༢༠༠༦ ༨༨ ༧༦་༡༤ ༨༥ ༨༧་༡༠
༢༠༠༧ ༡༡༢ ༨༨་༣༩ ༨༨ ༨༧་༥༠
༢༠༠༨ ༡༣༥ ༨༧་༤༡ ༨༠ ༩༦་༣༠
༢༠༠༩ ༡༥༩ ༨༩་༣༠ ༩༠ ༨༦་༦༧

མ་སུ་རི་བོད་ཕྲུག་ཁྱིམ་སྡེ་ཚོགས་པ་ནས་འདས་པའི་ལོ་ངོ་༡༥ རིང་བོད་སློབ་གཞན་ལ་མཐུན་འགྱུར་རོགས་རམ་བྱ་སླད་སློབ་འཇུག་དང་འཚོ་སྣོན། བོད་སློབ་ཁག་ཏུ་ཟས་གོས་གནས་མལ་དོད་བཅས་ཕྱོགས་གང་ཐད་ནས་རོགས་ཕན་ཅི་ཐུབ་ཞུས་པར་གཞུང་སྒེར་ཚང་མས་བསྔགས་བརྗོད་གནང་ཡུལ་དུ་གྱུར་ཡོད།

མ་སུ་རི་བོད་ཁྱིམ་ནས་འདས་པའི་ལོ་ངོ་༡༥ རིང་སློབ་འཇུག་དང་འཚོ་སྣོན། བོད་སློབ་ཁག་ཏུ་ཟས་དོད་བཅས་རོགས་རམ་གནང་བའི་གནས་སྟངས།

ཕྱི་ལོ། སློབ་འཇུག་གྲངས། འཚོ་སྣོན། བོད་སློབ་ཁག་ཏུ་སློབ་དོད། བསྡོམས།
༡༩༩༤ ༨༦ ༩༨ ༡༩༣
༡༩༩༥ ༥༤ ༦༤ ༡༥ ༡༣༣
༡༩༩༦ ༣༥ ་་་་་་་ ་་་་་་་་་ ༣༥
༡༩༩༧ ༨༡ ་་་་་་་་ ་་་་་་་་་ ༨༡
༡༩༩༨ ༩༤ ༤༢ ༤༠ ༡༧༦
༡༩༩༩ ༤༣ ༢༤ ༡༡ ༧༨
༢༠༠༠ ༦༠ ༡༨ ༢༢ ༡༠༠
༢༠༠༡ ༤༤ ༢༦ ༡༢ ༨༢
༢༠༠༢ ༥༧ ༢༣ ༨༧
༢༠༠༣ ༣༦ ༢༦ ༦༨
༢༠༠༤ ༤༨ ༡༢༧ ༢༨ ༢༠༣
༢༠༠༥ ༧༡ ༨༨
༢༠༠༦ ༢༥ ༡༢ ༤༠
༢༠༠༧ ༡༩ ༡༣ ༣༩
༢༠༠༨ ༣༤ ༣༥ ༧༡
བསྡོམས། ༧༩༦ ༤༨༠ ༢༠༦ ༡༤༧༤

༤།    ལག་ཤེས་སྦྱོང་བརྡར།

མ་སུ་རི་བོད་ཁྱིམ་ནས་ཕྱི་ལོ་༡༩༦༥ ལོར་ལམ་བཟོ་ཁག་ནས་འབྱོར་བའི་སློབ་ཕྲུག་ལོ་ན་ཆེ་རིགས་ཚོར་ལག་ཤེས་དགོས་གལ་གཟིགས་ཏེ་ཚེམ་བུའི་སྡེ་ཚན་ཞིག་འགོ་འཛུགས་བགྱིས་ཏེ། ཁོང་ཚོར་ཚེམ་བུའི་སྦྱོང་བརྡར་ཐོག་པང་གདན་འཐག་ལས་དང༌། བལ་ལན་བསླ་རྒྱུ་སོགས་ཀྱི་སྦྱོང་བརྡར་སྤྲད། དེ་རྗེས་ཕྱི་ལོ་༡༩༧༠ ལོར་བོད་ཀྱི་སྲོལ་རྒྱུན་རི་མོའི་སྡེ་ཚན་ཞིག་གསར་འཛུགས་ཞུས། ཕྱི་ལོ་༡༩༨༩ ལོར་སྣུམ་ཚོན་རི་མོའི་སྡེ་ཚན་ཞིག་ཀྱང་གསར་འཛུགས་ཞུས་པ་དང༌། ཕྱི་ལོ་༡༩༩༢ དེ་བཞིན་ལས་རིགས་སློབ་གཉེར་ཁང་ཆེད་ཚེམ་ཁང་དང༌། འཐག་ཁང༌། ཕར་ཕྱིན། ལྷ་བྲིས། སྣུམ་ཚོན་ཁང༌། ཕྲུ་གུ་ཚོའི་ཉལ་ཁང༌། ཐབ་ཚང༌། ལས་ཤག་བཅས་ཐོག་བརྩེགས་བཞི་ཅན་གྱི་ཁང་མིག ༢༦ ཡོད་པ་ཞིག་གསར་སྐྲུན་གྱི་ལས་རིག་སྦྱོང་བརྡར་སྡེ་ཚན་ཁག་ཕྱོགས་གཅིག་ཏུ་ཟླ་བསྒྲིལ་ཞུས་ཏེ་ད་ལྟའི་འཆར་སློབ་གཉེར་ཁང་འདིར་ལྷ་བྲིས་སྡེ་ཚན་དང༌། སྣུམ་ཚོན་སྡེ་ཚན། བོད་ཚེམ་སྡེ་ཚན། རྒྱ་ཚེམ་སྡེ་ཚན་བཅས་ཡོད་པ་དང༌། སློབ་ཕྲུག་གྲངས་༧༠ དང༌། ལས་བྱེད་གྲངས་༡༣ ཡོད་པའི་ལག་ཤེས་སློབ་སྦྱོང་སྤྲོད་རྒྱུའི་སྡེ་ཚན་ཞིག་ཏུ་འགྱུར་ཡོད། ༥།     ཤེས་ཡོན་ལས་རིམ་དང་གྲུབ་འབྲས། མ་སུ་རི་བོད་ཁྱིམ་ཡན་ལག་དང་བཅས་པ་ནས་དམའ་རིམ་འཛིན་རིམ་དང་པོ་ནས་ལྔ་པ་བར་ཨིན་ཇིའི་སྐད་ཡིག་རྐྱང་པ་ཙམ་ལས། དེ་བྱིངས་སློབ་ཚན་འདྲ་མིན་ཚང་མ་བོད་ཀྱི་སྐད་ཡིག་གཙང་མའི་ཐོག་སློབ་འཁྲིད་ལག་བསྟར་སྔ་མོ་ནས་ཞུས་དང་ཞུ་མུས་ཐོག བཅའ་ཁྲིམས་དགོངས་དོན་བཞིན་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་ཇུས་ཀྱི་ཆ་ཤས་ལག་བསྟར་ཞུས་ཏེ་རིམ་པས་ཤེས་ཡོན་སྲིད་ཇུས་ཆ་ཚང་ལག་བསྟར་ཞུ་འཆར་ཡོད། སློབ་གྲྭའི་ནང་རྒྱུན་ལྡན་སློབ་ཁྲིད་ཀྱི་ལས་རིམ་ཁག་ཕུད། བོད་ཀྱི་རིག་གཞུང་རྒྱུན་འཛིན་དང་སློབ་མ་རྣམས་ཀྱི་ལུས་སེམས་འཚར་ལོངས། ལས་དོན་དང་ཁོར་ཡུག་སྤྱི་ཚོགས་ཀྱི་ཉམས་མྱོང་གསོག་སྒྲུབ་བཅས་ཀྱི་སླད་སློབ་སྦྱོང་ལ་གཞོགས་འདེགས་ཀྱི་ལས་རིམ་དང་བྱེད་སྒོ་མང་པོ་ཞིག་གོ་སྒྲིག་གནང་མུས་ཡིན། བོད་དང་རྒྱ་གར། རྒྱལ་སྤྱི་བཅས་ཀྱི་དུས་ཆེན་ཆེ་ཁག་སྲུང་བརྩི་བྱས་ཏེ། དུས་ཆེན་གྱི་ནང་དོན་དང་འབྲེལ་བའི་འཁྲབ་སྟོན་དང༌། རིག་རྩལ་འགྲན་ཚོགས། སྒྱུ་རྩལ་འགྲེམས་སྟོན། བགྲོ་གླེང༌། གློག་བརྙན་སོགས་རིག་གཞུང་དང་འབྲེལ་བའི་ལས་རིམ་སྤེལ་བ་དང༌། དེ་བཞིན་སློབ་ཕྲུག་ཚོའི་སློབ་སྦྱོང་ལ་གཞོགས་འདེགས་དང་མཐོང་ཐོས་རྒྱ་བསྐྱེད་སླད་ཕྱི་བསྐྱོད་ལྟ་བསྐོར་དང༌། ཞག་སྡོད་འགྲུལ་བསྐྱོད། དམག་སྦྱོང་ཉམས་གསོག སྤྱི་ཚོགས་ཞབས་ཞུ་སོགས་ཀྱི་ལས་རིམ་གོ་སྒྲིག་གནང་མུས་ཡིན། སློབ་གྲྭ་འདི་མངའ་སྡེ་དང་ཐག་ཉེ་ཡུལ་མིའི་སློབ་གྲྭ་དང༌། བོད་སློབ་ནང་ཁུལ་བཅས་སློབ་ཁག་ཕན་ཚུན་དབར་ཤེས་ཡོན་དང༌། རྩེད་རིགས། རིག་གཞུང་གི་ལས་འགུལ་བཅས་ཀྱི་ཁྲོད་མཉམ་ཞུགས་བྱས་ཏེ་གྲུབ་འབྲས་བཟང་པོ་ཐོབ་ཡོད། དཔེར་ན། ཕྱི་ལོ་༢༠༠༡ ཟླ་༡༠ ཚེས་༡༤ ཉིན་ལྡེ་ར་ལྡུན་རྩེད་འགྲན་ཁང་དུ་ཐེངས་བདུན་པའི་སལ་ཝན་རྒྱང་རྒྱུགས་འགྲན་ཚོགས་ནང་རྒྱ་གར་གྱི་སློབ་གྲྭ་དྲག་གྲས་ཁག་གི་སློབ་ཕྲུག་༡༤༠༠༠ ལྷག་འཛུལ་ཞུགས་བྱས་པའི་ཁྲོད། སློབ་གྲྭ་འདིའི་སློབ་མ་ཚོས་ལོ་༡༤ དང་༡༧ སྡེ་ཚན་ནང་བུ་དང་བུ་མོའི་བྱ་དགའ་ཨང་དང་པོ་དང༌། ལོ་༡༤ སྡེ་ཚན་ནང་རུ་ཁག་ཨང་དང་པོ་བཅས་ཀྱི་གྲུབ་འབྲས་བཟང་པོ་ཐོབ། སློབ་ཕྲུག་རྣམས་རང་གི་མ་འོངས་མདུན་ལམ་ཐད་མཁྱེན་རྒྱ་ཡངས་ཤིང་གདམ་ཀ་མ་ནོར་བ་ཡོང་ཐབས་སླད། སློབ་གྲྭའི་ནང་མདུན་ལམ་སློབ་སྟོན་པ་ཆེད་འཛུགས་ཀྱིས་གཞི་རིམ་བར་མ་དང་གོང་མའི་སློབ་ཕྲུག་རྣམས་ལ་མ་འོངས་མདུན་ལམ་འདེམས་སྒྲུག་གི་འབྲེལ་ཡོད་བརྡ་འཕྲིན་མཁོ་འདོན་དང་སློབ་སྟོན་གནང་མུས་ཡིན། བོད་གཞུང་ཤེས་རིག་ལས་ཁུངས་ནས་གོ་སྒྲིག་གནང་བའི་གཏན་ཉིན་སློབ་ཁག་གི་རྒྱལ་ཡོངས་རྩོམ་ཡིག་འགྲན་བསྡུར་གྱི་ལས་རིམ་ཁྲོད། སློབ་གྲྭ་འདིའི་སློབ་ཕྲུག་ཚོས་འདས་པའི་ལོ་ངོ་བཅུ་ལྷག་གི་རིང་གཟེངས་བསྟོད་བྱ་དགའ་མང་དུ་བླངས་ཡོད། ཕྱི་ལོ་༢༠༠༨ ལོ་ཁོ་ནར་མཚོན་ནའང༌། འཛིན་རིམ་དྲུག་པ་དང༌། བརྒྱད་པ། བཅུ་པ་བཅས་ཀྱི་ཕུལ་བྱུང་བྱ་དགའ་ཐོབ་ཡོད། དེ་བཞིན་ཕྱི་ལོ་༢༠༠༦ ནང་འཛིན་རིམ་བཅུ་གཉིས་པའི་སློབ་ཕྲུག་ཚེ་རིང་ཟླ་བ་དང༌། འཛིན་རིམ་དགུ་པའི་སློབ་མ་ཕུན་ཚོགས་རྣམ་རྒྱལ་དང༌། འཛིན་རིམ་བརྒྱད་པའི་སློབ་མ་ཀུན་དགའ་གྲགས་པ། འཛིན་རིམ་བདུན་པའི་སློབ་མ་ཟླ་བ་ཆོས་སྒྲོན་བཅས་དང༌། ཕྱི་ལོ་༢༠༠༧ ལོར་འཛིན་རིམ་བཅུ་པའི་སློབ་མ་ཕུན་ཚོགས་རྣམ་རྒྱལ། ཕྱི་ལོ་༢༠༠༨ ལོར་འཛིན་རིམ་དྲུག་པའི་སློབ་མ་ཆོས་དབྱངས་གྲགས་པ་དང༌། འཛིན་རིམ་བརྒྱད་པའི་སློབ་མ་སྐལ་བཟང༌། འཛིན་རིམ་བཅུ་པའི་སློབ་མ་ཕུན་ཚོགས་ཆོས་འཕེལ་བཅས་ལ་གཟེངས་བསྟོད་ལག་ཁྱེར་དང་བྱ་དགའི་ཕྱག་དངུལ་བཅས་གསོལ་རས་ཐོབ། འཛིན་རིམ་བཅུ་གཉིས་པའི་རྒྱལ་ཡོངས་ལོ་འཁོར་ཡིག་རྒྱུགས་ནང་གྲུབ་འབྲས་རྩེ་ཕུད་སོན་པའི་སློབ་ཕྲུག་རེར་བོད་གཞུང་ཤེས་རིག་ལས་ཁུངས་ནས་ལོ་ལྟར་དགའ་ལྡན་ཕོ་བྲང་ཕུལ་བྱུང་སློབ་མའི་བྱ་དགའ་གནང་མུས་ཁོངས་མ་སུ་རི་བོད་ཁྱིམ་སློབ་མ་ངག་དབང་དབྱངས་འཛོམས་ལ་ཚན་རིག་ཐོག་བརྒྱ་ཆ་༨༡ ལོན་པས། ཕྱི་ལོ་༢༠༠༨ ཟླ་༩ ཚེས་༢ ཉིན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་ནས་གཟེངས་བསྟོད་ལག་ཁྱེར་དང་བྱ་དགའ་སྒོར་༥༠༠༠ བཅས་གསོལ་རས་གནང༌། དེ་བཞིན་ཚོང་རིག་སྡེ་ཚན་ནང་སློབ་མ་དོན་གྲུབ་ལ་བརྒྱ་ཆ་༨༥་༢ ཐོབ་པ་རྒྱལ་ཡོངས་བོད་རིགས་སློབ་མའི་ཁྲོད་ཨང་གཉིས་པ་ཐོབ་པ་དང༌། སྒྱུ་རྩལ་སྡེ་ཚན་ཁོངས་སློབ་མ་ངག་དབང་དཔལ་མོ་ལ་བརྒྱ་ཆ་༨༣ ཐོབ་པ་རྒྱལ་ཡོངས་བོད་རིགས་སློབ་མའི་ཁྲོད་ཨང་གཉིས་པ་ཐོབ་ཡོད། ཕྱི་ལོ་༢༠༠༥ ཟླ་༡༠ ནས་བཟུང༌། མ་སུ་རི་བོད་ཁྱིམ་སློབ་གྲྭས་ལོ་ལྟར་སློབ་ཁག་གཞན་དག་གདན་ཞུས་ཀྱིས་གཞི་རིམ་བར་མའི་སློབ་ཕྲུག་དབར་བོད་ཀྱི་སྲོལ་རྒྱུན་རིག་གནས་ལས་རིགས་ལམ་རྩོད་གྲྭའི་འགྲན་བསྡུར་ལས་རིམ་སྤེལ་མུས་ལ་ྋགོང་ས་མཆོག་དང་བོད་གཞུང་ཤེས་རིག་ལས་ཁུངས་ནས་བསྔགས་བརྗོད་དང་གདེང་འཇོག་མཐོན་པོ་ཐོབ་ཡོད། མ་སུ་རི་བོད་ཁྱིམ་ཡན་ལག་དང་བཅས་པ་ནས་དམའ་རིམ་འཛིན་རིམ་དང་པོ་ནས་ལྔ་པ་བར་ཨིན་ཇིའི་སྐད་ཡིག་ཙམ་ཕུད། དེ་བྱིངས་སློབ་ཚན་ཚང་མ་བོད་ཀྱི་སྐད་ཡིག་གཙང་མའི་ཐོག་སློབ་འཁྲིད་ལག་བསྟར་སྔ་མོ་ནས་བྱེད་མུས་ཐོག བཅའ་ཁྲིམས་དགོངས་དོན་བཞིན་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་ཇུས་ཀྱི་ཆ་ཤས་ལག་བསྟར་ཞུས་ཏེ་རིམ་པས་ཤེས་ཡོན་སྲིད་ཇུས་ཆ་ཚང་ལག་བསྟར་ཞུ་འཆར་ཡོད།

༦།    སྤྱི་ཚོགས་བདེ་དོན།

བོད་ཁྱིམ་འདིའི་ཁྱབ་ཁོངས་གཏན་འཇགས་དགེ་ལས་ཚང་མར་སྨན་དོད་དང་ལས་ཤག ཕྲུ་གུ་སློབ་འཇུག རྒན་ཡོལ་བཅས་ཀྱི་ཐོབ་ཐང་དང་གཟིག

2008
ས་རྟོག་སྒྲིག་གསལ་བཞིན་གནང་མུས་དང༌། སློབ་ཕྲུག་རྣམས་ལ་ཉིན་ཞག་དུས་དྲུག་ཏུ་ཟས་གོས་གནས་མལ་དང་སློབ་སྦྱོང་གི་མཐུན་རྐྱེན་ཆ་ཚང་སྦྱོར་སྤྲོད་གནང་བ་མ་ཟད། གཞི་རིམ་གོང་མ་སློབ་ཐོན་བྱུང་རྗེས་སུའང་སློབ་གྲྭའི་སྒྲིག་གཞིའི་གཏན་འབེབས་བཞིན་མཐོ་རིམ་སློབ་གཉེར་གྱི་འདུན་པ་ཡོད་པའི་བོད་འབྱོར་སློབ་ཕྲུག་དང༌། ཉམ་ཐག་གིས་གཙོས་པའི་སློབ་ཐོན་པ་ཕལ་ཆེ་བར་སློབ་ཡོན་གྱི་མཐུན་རྐྱེན་རྒྱ་ཆེར་སྦྱོར་སྤྲོད་གནང་དང་གནང་མུས་ཡིན། ཕྱི་ལོ་༡༩༦༥ ལོར་ཐོག་མར་རང་རིགས་རྒས་གཅོང་ཉམ་ཐག་སྤུན་ཉེ་བུ་ཕྲུག་སུ་ཡང་མེད་པ་༨ ལ་སྡོད་ཁང་གསར་རྒྱག་གནང་སྟེ་རྒས་གཅོང་གཟིགས་རྟོག་གནང་རྒྱུ་འགོ་འཛུགས་གནང་བ་ནས་བཟུང༌། མ་སུ་རིར་༡༩༩༥ ལོར་མ་སུ་རིར་རྒས་གཅོང་༣༠ ཙམ་ལ་གཟིགས་རྟོག་ཞུ་རྒྱུའི་རྒན་གསོ་ཁང་བཅས་གསར་བསྐྲུན་ཞུས། རིམ་བཞིན་ལས་གཞི་རྒྱ་བསྐྱེད་ཀྱིས་ད་ལྟའི་ཆར་མ་སུ་རིར་དགེ་འཕེལ་གླིང་རྒན་གསོ་ཁང་ནང་རྒས་གཅོང་གྲངས་༢༦ དང༌། སྡོད་ཁང་དང༌། སྨན་བཅོས་མཐུན་རྐྱེན། འཚོ་བའི་མཐུན་རྐྱེན་ཆེད་ཟླ་རེ་སྒོར་༥༠༠ རེ་གནང་མུས་ཁོངས་རྒས་གཅོང་གྲངས་༡༠ དང༌། ཕྱི་ལོ་༡༩༧༧ ལོར་རཱ་ཇི་པུར་དུ་རྒན་གསོ་ཁང་གསར་རྒྱག་གི་རྒས་གཅོང་གྲངས་༣༦ གཟིགས་སྐྱོང་དང་དེ་རྗེས་རྒན་གསོ་ཤོད་ཕྲེང་རིང་ནས་བོད་ཁྱིམ་ལ་གཟིགས་རྟོག་ཡོང་བ་ཞུས་དོན་ལྟར་དུ་རྒས་གཅོང་གྲངས་༤༥ དང༌། རྒན་གསོ་ཁང་ཤོད་དུ་རྒན་གཅོང་གྲངས་༦༢ ཡོད་ཁར། བོད་པའི་གཞིས་ཆགས་ཁག་འདྲ་མིན་ནང་རྒན་གཅོང་ཉམ་ཐག་ལ་འདི་ག་བོད་ཁྱིམ་ནས་འཚོ་སྣོན་ཕུལ་བཞིན་ཡོད་པའི་རྒན་གཅོང་གྲངས་༡༤༩ བཅས་ཁྱོན་བསྡོམས་རང་རིགས་རྒན་གཅོང་ཉམ་ཐག་གྲངས་༢༨༢ ལ་གཟིགས་རྟོག་བདག་སྐྱོང་གནང་མུས་ཡིན།

༧།    གཞུང་འབྲེལ་གཟིགས་སྐོར།

མ་སུ་རི་བོད་ཁྱིམ་སློབ་གྲྭ་འདིར་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་དབུས་བཙན་བྱོལ་བོད་གཞུང་གི་མཛད་གཙོ་རྣམ་པ་དང༌། གཞུང་དང་ཚོགས་སྡེ་དུ་མའི་འབྲེལ་ཡོད་ལས་གནས་པ། བླ་སྤྲུལ། ཆེད་ལས་མཁས་པ་སོགས་ལོ་ལྟར་གདན་ཞུའམ་ཆེད་ཕེབས་ཀྱིས་འཚམས་གཟིགས་དང་རྟོག་ཞིབ། ལས་འགུལ་སྤེལ་བ་སོགས་ཀྱི་ལས་རིམ་རྒྱུན་ཆད་མེད་པར་སྤེལ་མུས་ཡིན། ཁྱད་པར་ཕྱི་ལོ་༢༠༠༣ ཟླ་༤ པའི་ནང་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་མ་སུ་རི་ས་གནས་སུ་ཆིབས་བསྒྱུར་བཀའ་དྲིན་ཆེ་བསྐྱངས་སྐབས་དགེ་སློབ་ཡོངས་ལ་བཀའ་སློབ་ཟབ་རྒྱས་བསྩལ། དེ་རྗེས་བཙན་བྱོལ་བོད་གཞུང་གི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེས་དབུས་པའི་རང་གཞུང་གི་མཛད་གཙོ་རྣམ་པ་དང༌། ཕྱི་རྒྱལ་རོགས་ཚོགས། རྒྱལ་སྤྱིའི་ཚོགས་སྡེ། འབྲེལ་ཡོད་སློབ་གྲྭའི་སྐུ་ཚབ་སོགས་ཀྱིས་འཚམས་གཟིགས་རིམ་པར་བསྐྱངས་པ་བརྗོད་ཀྱིས་མ་ལངས། ཉེ་བའི་ལོ་ཤས་རིང་སློབ་གྲྭ་འདིར་བོད་ཀྱི་སྲོལ་རྒྱུན་རིག་གནས་སྤྱི་དང་ཁྱད་པར་ཚད་མ་རིག་པའི་འཇུག་སྒོ་རིགས་ལམ་སློབ་ཁྲིད་ལ་ཤུགས་སྣོན་བརྒྱབ་སྟེ་གྲུབ་འབྲས་མི་དམན་པ་ཐོབ་ཡོད། དཔེར་ན། ཕྱི་ལོ་༢༠༠༨ ཟླ་༡༠ ཚེས་༤ དང་༥ བར་གྱི་རིགས་ལམ་འགྲན་བསྡུར་ལས་རིམ་ཁྲོད་མ་སུ་རི་གཏན་སློབ་དང༌། སྤོན་ཊ་གཏན་སློབ། ཅོང་ཏ་ར་བོད་ཁྱིམ། དྷ་སྟེང་བོད་ཁྱིམ། དྷ་ཤོད་བོད་ཁྱིམ། སུ་ཇ་བོད་ཁྱིམ། ཅོན་ཏ་ར་དབུས་སློབ། བྷུན་ཏར་བོད་སློབ། བདེ་སྐྱིད་གླིང་ཉིན་སློབ། ར་ཇི་པུར་བོད་ཁྱིམ་བཅས་འཛུལ་ཞུགས་ཞུས་ཡོད་ལ། བོད་གཞུང་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་སྐུ་མགྲོན་གཙོ་བོར་གདན་ཞུས་བཞིན་ཆེད་ཕེབས་ཀྱིས་བསྔགས་བརྗོད་དང་འབྲེལ་བའི་བཀའ་སློབ་ཞིབ་རྒྱས་གནང་བ་བཅས་ཀྱི་ལོ་རྒྱུས་གནད་བསྡུས་སུ་བཀོད་པའོ། །

(18213)