གངས་ཅན་བདེ་རྩའི་སློབ་གྲྭ།

༡།    འགོ་འཛུགས།

ཕྱི་ལོ་༡༩༥༩ ལོར་བོད་མིའི་ཆོས་སྲིད་གཉིས་ཀྱི་དབུ་འཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་རྒྱ་གར་འཕགས་པའི་ཡུལ་དུ་དགོས་དབང་གིས་སྐྱབས་བཅོལ་ལ་ཕེབས་པ་དང་མཉམ་དུ་བོད་མི་འབོར་ཆེན་ཞིག་ཁྱིམ་མཚེས་རྒྱལ་ཁབ་བལ་ཡུལ་དང་རྒྱ་བལ་འབྲུག་གསུམ་གྱི་ནང་སྐྱབས་བཅོལ་དུ་འབྱོར་བ་དང༌། དེའི་སྐབས་རྒྱལ་སྤྱིའི་རོགས་ཚོགས་དང་ལས་ཁུངས་ཁག་སོགས་སྤྱི་སྒེར་མང་དག་ཅིག་གིས་བོད་མི་སྐྱབས་བཅོལ་བ་རྣམས་ལ་ཟས་གོས་གནས་མལ་སོགས་ཀྱི་རོགས་རམ་རྒྱ་མི་ཆུང་བ་ཞིག་གནང་ཡོད།
བལ་ཡུལ་ནང་ཐོག་མར་ཕྱི་ལོ་༡༩༦༠ ནས་འགོ་འཛུགས་ཀྱིས་རྒྱལ་སྤྱིའི་རྒྱ་གྲམ་དམར་པོ་དང་སུད་སི་ལས་ཁུངས་སོགས་ནས་རོགས་སྐྱོར་གནང་ཞིང༌། ཕྱི་ལོ་༡༩༦༤ ཟླ་༡༡ ཚེས་༢༢ ཉིན་སུད་སི་དང་བལ་གཞུང་གཉིས་དབར་གྲོས་མོལ་གྱིས་གན་ཡིག་བཞག་དོན། སུད་སི་ས་ཊ་རོགས་ཚོགས་(Swiss Association for Technical  Assistance)དང་བལ་ཡུལ་རྒྱ་གྲམ་དམར་པོ་གཉིས་ཀྱིས་དེ་སྔའི་བཟོ་གཞིས་དང༌། ཞིང་ལས། ཚོང་ཁང༌། སློབ་གྲྭ་དང་སྨན་ཁང་བཅས་འཛུགས་སྐྲུན་མཇུག་སྐྱོང་གནང་ཡོད་པ་མ་ཟད། ས་ཊ་དང་བལ་ཡུལ་རྒྱ་གྲམ་དམར་པོ་གཉིས་དབར་ཡང་ཆོད་ཡིག་བཞག་སྟེ། བལ་ཡུལ་བོད་མིའི་བཟོ་གཞིས་ཁག་གི་ས་ཆ་རྣམས་བོད་མི་སྐྱབས་བཅོལ་བའི་བདེ་དོན་ཆེད་བལ་ཡུལ་རྒྱ་གྲམ་དམར་པོའི་མིང་ཐོག་དེབ་སྐྱེལ་གནང༌།
དེ་ནས་ཕྱི་ལོ་༡༩༦༥ ནང་སུད་སི་ས་ཊ་རོགས་ཚོགས་ཀྱིས་བོད་མིའི་གཞིས་ཆགས་ཁག་བཞིའི་འགན་བཞེས་ཆ་ཚང་གནང་སྟེ། བལ་ཡུལ་འཇོ་ཁེལ་བསམ་གྲུབ་གླིང་དང༌། གཉིས་པ་སྤོག་ར་བཀྲ་ཤིས་དཔལ་འཁྱིལ། གསུམ་པ་བལ་ཡུལ་རྡོར་ཐང་ནོར་འཛིན་གླིང༌། བཞི་པ་ཤར་ཁུམ་བདེ་ལེགས་གླིང་བཅས་བོད་མི་སྐྱབས་བཅོལ་གཞིས་ཆགས་ཁག་བཞིའི་ནང་ཐོག་མར་ཟས་གོས་ཀྱི་སྐྱོབ་གསོ་དང༌། དེ་ནས་འཕྲལ་སེལ་སྡོད་ཁང་གུར་དང་རྩྭ་ཁང་སོགས་རོགས་རམ་ཤུགས་ཆེར་གནང་ཡོད། འོན་ཀྱང༌། ཕྱིས་སུ་ཆར་རླུང་གི་རང་བྱུང་དཀའ་ངལ་རིམ་འཕྲད་རྐྱེན་གྱིས་ས་དང་རྡོ་ལས་གྲུབ་པའི་སྡོད་ཁང་མ་བཟོ་ཐབས་མེད་བྱུང་འདུག རིམ་གྱིས་གཞིས་ཆགས་ཁག་གི་ནང་བོད་མི་སྐྱབས་བཅོལ་བ་རྣམས་འཚོ་གནས་ཐུབ་ཆེད་ལག་ཤེས་བཟོ་གྲྭ་དང༌། མཉམ་ལས། ཞིང་ལས། སྔོན་འགྲོའི་འཕྲོད་བསྟེན་སྨན་ཁང་དང༌། སློབ་གྲྭ་དང་བུ་གསོ་ཁང་སོགས་གསར་འཛུགས་དང་འབྲེལ་འཛིན་སྐྱོང་གཟིགས་རྟོགས་དང་རྒྱུན་གྲོན་ཡོངས་རྫོགས་སུད་སི་ས་ཊ་རོགས་ཚོགས་ནས་ཐད་ཀར་རོགས་རམ་གནང་ཡོད། དེ་བཞིན་ཕྱི་ལོ་༡༩༦༦ ལོར་ལག་ཤེས་བཟོ་གྲྭའི་རྒྱུ་ཆ་བལ་དང་སྲིན་བལ་སྐུད་ཚོན་སོགས་ཉོ་འདྲེན་དང་ཐོན་སྐྱེད་རུམ་གདན་རྣམས་ཕྱིར་ཚོང་སླད་སི་ཀྲི་སི་(CTC)གདན་ཚོང་བཟོ་ཚོང་(Company)གསར་འཛུགས་གནང་སྐབས་ཀྱང་སུད་སིའི་ས་ཀྲ་རོགས་ཚོགས་ནས་རོགས་རམ་གནང༌།
བོད་མི་རྣམས་རང་མགོ་རང་ཐོན་ཡོང་སླད་ཕྱི་ལོ་༡༩༦༦ ཙམ་ལ་བཟོ་གཞིས་ཁག་གི་འཛིན་སྐྱོང་འགན་དབང་ཆ་ཚང་བོད་གཞུང་གིས་གཙང་བཞེས་གནང༌། སློབ་གྲྭ་ཁག་དང་འཕྲོད་བསྟེན་གྱི་ལས་གཞི་ཁག་ས་ཊ་ནས་ཕྱི་ལོ་༡༩༧༡ བར་འགན་ཁུར་གནང༌།
དེ་ལྟར་བལ་ཡུལ་ནང་སྐྱབས་བཅོལ་བོད་མིའི་ཤེས་ཡོན་སློབ་གསོ་དང༌། འཕྲོད་བསྟེན་སོགས་ཀྱི་ལས་དོན་མཇུག་སྐྱོང་རྟོག་ཞིབ་གནང་མཁན་ཚོགས་པ་ཞིག་ཟུར་འཛུགས་དགོས་གལ་ལ་བརྟེན། ཕྱི་ལོ་༡༩༧༢ ཟླ་༢ ཚེས་༢༥ ཉིན་བལ་ཡུལ་བོད་གཞུང་སྐུ་ཚབ་དོན་གཅོད་སྐུ་ངོ་སྐལ་བཟང་དགྲ་འདུལ་ལགས་དང༌། བལ་ཡུལ་ནང་སྲིད་སྐུ་ཚབ། ཌོག་ཀྲར་ཨེཆ་ཨེལ་རེག་མི་(Dr.H.L. Regmi ( HMG.Nepal))དང༌། བལ་ཡུལ་རྒྱ་གྲམ་དམར་པོའི་སྐུ་ཚབ་སྐུ་ཞབས་ཤྲི་སེ་ཐ་(Mr B.K Sherestha) སྐུ་ཞབས་བི་ཀེ་ཤྲིརེས་ཋ་དང༌། སུད་སི་ས་ཀྲའི་སྐུ་ཚབ། སྐུ་ཞབས་ཀུན་ཙི་(Mr. P. Kunzi)བཅས་ལྷན་འཛོམས་ཐོག་བཀའ་བསྡུར་གྱིས་བལ་ཡུལ་གངས་ཅན་བདེ་རྩའི་ལས་ཁུངས་འདི་བོད་མི་སྐྱབས་བཅོལ་བའི་དགོས་མཁོ་ལྟར་དབུ་འཛུགས་གནང་རྒྱུའི་ཐག་གཅོད་དང་མོས་མཐུན་བྱུང༌། འོན་ཀྱང༌། སྐབས་དེར་བལ་ཡུལ་གཞུང་གི་རྩ་ཁྲིམས་ནང་གཞུང་འབྲེལ་མ་ཡིན་པའི་ཚོགས་པ་དེབ་སྐྱེལ་བྱེད་རྒྱུའི་ཁྲིམས་ཡིག་གཏན་འབེབས་གནང་མེད་པའི་རྐྱེན་གྱིས། ཚོགས་པ་འདི་བལ་གཞུང་འོག་དེབ་སྐྱེལ་འཕྲལ་མར་གནང་ཐུབ་མེད།
དེ་ཉིན་གངས་ཅན་བདེ་རྩའི་རྩ་ཁྲིམས་དང་སྒྲིག་གཞི་གཉིས་ཨིན་སྐད་ཐོག་ཡོད་པ་ཚོགས་ཕེབས་ཡོངས་ནས་བཀའ་བསྡུར་ལྷུག་པོ་གནང་སྟེ་སྤྱི་མོས་གཏན་འབེབས་དང་འབྲེལ། ཚོགས་འདུ་གཙོ་སྐྱོང་གནང་མཁན་བལ་ཡུལ་ནང་སྲིད་སྐུ་ཚབ་སྐུ་ཞབས་ཌོག་ཊར་ཨེཆ་ཨེལ་རེག་མི་ནས་ཚོགས་པ་གསར་འཛུགས་བྱས་ཟིན་པའི་གསལ་བསྒྲགས་སྤེལ། དེ་ཉིན་སྤྱི་མོས་ཀྱི་ཐོག་ནས་གངས་ཅན་བདེ་རྩའི་འགན་འཛིན་ལྷན་ཚོགས་ཀྱི་ཚོགས་མི་སྐབས་དང་པོ་གཏན་འབེབས་གནང་བ་གཤམ་གསལ།
༡།     བལ་ཡུལ་ནང་སྲིད་སྐུ་ཚབ།
༢།     བལ་ཡུལ་རྒྱ་གྲམ་དམར་པོའི་སྐུ་ཚབ།
༣།     སུད་སི་ས་ཀྲའི་སྐུ་ཚབ།
༤།     བལ་ཡུལ་བོད་མིའི་སྐུ་ཚབ།
(བོད་གཞུང་སྐུ་ཚབ་དོན་གཅོད་སྐུ་ངོ་སྐལ་བཟང་དགྲ་འདུལ་ལགས།)
༥།     ཀ་ཐ་མན་གྲུའི་བོད་མིའི་སྐུ་ཚབ།
(འཇོ་ཁེལ་བཟོ་གཞིས་དབུ་འཛིན་བཀྲིས་ནོར་བུ་ལགས།)
༦།     གངས་ཅན་བདེ་རྩའི་དྲུང་ཆེའམ་འཛིན་སྐྱོང་འགན་འཛིན།
བཅས་བསྐོ་བཞག་གནང་ཐོག་ལས་ཁུངས་དང་རྩིས་ཞིབ་པ་སོགས་གཏན་འབེབས་གནང༌། དེ་བཞིན་བལ་ཡུལ་ནང་སྲིད་ལས་ཁུངས་ནས་རོགས་རམ་གང་ཐུབ་དང་རིན་ཐང་བྲལ་བའི་བཀའ་སློབ་ལམ་སྟོན་དུས་ནས་དུས་སུ་གནང་ཐོག བལ་ཡུལ་རྒྱ་གྲམ་དམར་པོས་ཐུགས་སྣང་ཆེན་པོས་རོགས་སྐྱོར་གནང་བ་དང༌། བོད་མིའི་སྤྱི་ཚོགས་དང་ལག་ཤེས་བཟོ་གྲྭ་ཁག་ནས་ཀྱང་ལས་འགུལ་འཆར་གཞིའི་ཐོག་འདོད་མོས་ཀྱིས་རྒྱབ་སྐྱོར་གནང་བར་བརྟེན་ནས་སུད་སི་སྐུ་ཚབ་ལས་ཁུངས་ཀྱི་དགོངས་བཞེད་ལྟར་སྤྱི་ཚོགས་ཞབས་ཞུའི་ཚོགས་པ་གངས་ཅན་བདེ་རྩ་ཞེས་པའི་ཚོགས་སྡེ་འདི་གསར་འཛུགས་གནང་ཐུབ་པ་བྱུང༌།
དེ་རྗེས་ཕྱི་ལོ་༡༩༧༧ ལོར་བལ་ཡུལ་གཞུང་གི་རྩ་ཁྲིམས་༢༠༣༤ དོན་ཚན་༤ པའི་ནང༌། གཞུང་འབྲེལ་མ་ཡིན་པའི་ཚོགས་པ་དེབ་སྐྱེལ་བྱེད་ཕྱོགས་རྩ་ཁྲིམས་གཏན་འབེབས་བྱུང་ཡོད་ནའང༌། དེ་ནི་བལ་ཡུལ་གྱི་ཡུལ་མིའི་གནས་བབ་དང་ཐོབ་ཐང་ཡོད་མཁན་རྣམས་ཀྱི་ཆེད་ཡིན་པ་ལས་བོད་མི་སྐྱབས་བཅོལ་བའི་ཆེད་མ་ཡིན་པར་བརྟེན། སྐབས་དེར་བལ་གཞུང་དབུས་འཛིན་སྐྱོང་ནས་བོད་མི་སྐྱབས་བཅོལ་བའི་བདེ་སྡུག་གཟིགས་སྐྱོང་སླད་ཚོགས་པ་དེབ་སྐྱེལ་དགོས་པའི་དམིགས་བསལ་གྲོས་ཆོད་འཇོག་གནང་མཛད་དོན་ལྟར། ཕྱི་ལོ་༡༩༧༩ ཕྱི་ཟླ་༡ ཚེས་༧ དང་ནེ་ལོ་༢༠༣༥ པུ་ཤ་ཟླ་བའི་ག་ཏེ་ཚེས་༢༣ ཉིན་གངས་ཅན་བདེ་རྩ་(Snow Lion Foundation)ཞེས་པའི་ཚོགས་པ་འདི་ལོ་༦ དང་ཟླ་བ་༡༡ རྗེས་སུ་བལ་གཞུང་ལ་ལིཏ་པུར་རྫོང་ལས་ཁུངས་སུ་དེབ་སྐྱེལ་གྱིས་སྔ་མོ་ཕྱི་ལོ་༡༩༧༢ ལོར་ཐོག་མར་ཚོགས་པའི་བཅའ་ཁྲིམས་དང་སྒྲིག་གཞི་གཏན་འབེབས་གནང་བ་ཆ་ཚང་དམིགས་བསལ་ངོས་ལེན་ཐོག་ཁྲིམས་མཐུན་དེབ་སྐྱེལ་ཡིག་ཨང་༡༥།༣༠༣༤།༣༦ ཐོག་བཀའ་འཁྲོལ་ཐོབ་ཡོད། དེབ་སྐྱེལ་སྒྲིག་གཞིའི་དགོངས་དོན་བཞིན་ཚོགས་པ་ལོ་རེ་བཞིན་དེབ་སྐྱེལ་ཞུ་དགོས་པ་ལག་བསྟར་གནང་བཞིན་ཡོད་འདུག

༢།    ཚོགས་པ་ངོ་སྤྲོད།

གངས་ཅན་བདེ་རྩ་ཚོགས་པའི་ཚོགས་ཆེན་དང༌། འགན་འཛིན་ལྷན་ཚོགས།  འགན་འཛིན་དྲུང་ཆེའི་ལས་ཁུངས་སམ། གཏན་འཇགས་ལས་བྱེད་དང་རྩིས་ཁང་བཅས་ནི། ལས་ཁུངས་འདིའི་ཆ་ལག་གལ་ཆེ་ཤོས་གསུམ་ཡིན།
ཚོགས་ཆེན་གྱི་ནང་འགན་འཛིན་ལྷན་ཚོགས་ཀྱི་ཚོགས་གཙོ་དང་འགན་འཛིན་དྲུང་ཆེའི་ཐོག་དམིགས་བསལ་ཚོགས་མི་གཅིག་བཅས་གཤམ་གསལ་སྐུ་ཚབ་བཅུ་བཞི་ཡོད་པ་གཤམ་གསལ།
༡།     འཇོ་ཁེལ་བསམ་གྲུབ་གླིང་བཟོ་གྲྭའི་སྐུ་ཚབ།
༢།     འཇོ་ཁེལ་བསམ་སྒྲུབ་གླིང་མི་མང་འཐུས་མི།
༣།     ཤར་ཁུམ་བདེ་ལེགས་གླིང་མི་མང་འཐུས་མི།
༤།      སྤོག་ར་བཀྲིས་དཔལ་འཁྱིལ་བཟོ་གྲྭའི་སྐུ་ཚབ།
༥།      སྤོག་ར་བཀྲིས་དཔལ་འཁྱིལ་མི་མང་འཐུས་མི།
༦།      རྡོར་ཐང་ནོར་འཛིན་གླིང་མི་མང་འཐུས་མི།
༧།      སྤོག་ར་བྱམས་པ་གླིང་མི་མང་འཐུས་མི།
༨།      བལ་ཡུལ་སི་ཀྲི་སི་གདན་ཚོང་ཀམ་པ་ནིའི་སྐུ་ཚབ།
༩།      བལ་གཞུང་ནང་སྲིད་ལས་ཁུངས་ཀྱི་སྐུ་ཚབ།
༡༠      བལ་ཡུལ་རྒྱ་གྲམ་དམར་པོའི་སྐུ་ཚབ།
༡༡      སུད་སི་ཡར་རྒྱས་དང་མཐུན་འགྱུར་ལས་ཁུངས།
༡༢།      གངས་ཅན་བདེ་རྩའི་ཁྱབ་ཁོངས་ཤེས་ཡོན་སྡེ་ཚན་གྱི་སྐུ་ཚབ།
༡༣།      འཇོ་ཁེལ་མཉམ་ལས། ཟུར་ཉན།
༡༤།      རྩིས་ཞིབ་པ།
དམིགས་བསལ་ཆེ་མཐོང་ཚོགས་མི་སྐུ་ཞབས་ཨོན་ཊ་ལགས།
གངས་ཅན་བདེ་རྩའི་ཚོགས་ཆེན་སྐབས་ལོ་ལྟར་ལོ་འཁོར་ལས་བསྡོམས་ཨིན་བོད་སྐད་ཡིག་ཤན་སྦྱར་ཐོག་སྙན་སེང་ཞུ་མུས་དང་འབྲེལ། ཚོགས་མིའི་དོགས་གཅོད་དྲི་བ་ཁག་ལ་འགན་འཛིན་དྲུང་ཆེ་ནས་ལན་འདེབས་གསལ་བཤད་བྱེད་མུས་ཡིན། ཚོགས་ཆེན་འདི་ནས་ལོ་ལྟར་ཚོགས་འདུའི་གཙོ་སྐྱོང་འོས་འདེནས་གནང་རྒྱུ་དང༌། དེ་བཞིན་བལ་ཡུལ་གཞུང་འབྲེལ་ངོས་ལེན་ཡོད་པའི་རྩིས་ཞིབ་པ་འདེམས་བསྐོ་དང་ཞབས་གླ་སོགས་གཏན་འབེབས་གནང་སྲོལ་ཡོད་པ་ལྟར། ཕྱི་ལོ་༢༠༠༧ ལོར་ཚོགས་ཆེན་ནས་ཨ་ནི་ལ་ཤི་རེ་སེ་ཐ་Anila  Shrestha རྩིས་ཞིབ་པར་བསྐོ་བཞག་གནང༌།
འགན་འཛིན་ལྷན་ཚོགས་ཀྱི་ཚོགས་མིའི་ནང་བལ་གཞུང་ནང་སྲིད་ལས་ཁུངས་ཀྱི་སྐུ་ཚབ་དང༌། བལ་ཡུལ་རྒྱ་གྲམ་དམར་པོ། སུད་སིའི་སྐུ་ཚབ་བཅས་ཡོད། ཕྱི་ལོ་༢༠༠༨ ལོའི་འགན་འཛིན་ལྷན་ཚོགས་ཀྱི་ཚོགས་མི་ནི།
༡།    སྐུ་ཞབས་བཀྲིས་ཕུན་ཚོགས་ལགས།  (ཚོགས་གཙོ།)
༢།    ཤེ་ཤ་ན་ར་ཡན་པོའུ་ཌེལ། བལ་ཡུལ་ནང་སྲིད་སྐུ་ཚབ། (ཚོགས་གཙོ།)
༣།    ཨུ་མེ་ཤ་པྲ་ས་ཏ་ཌ་ཀལ། རྒྱ་གྲམ་དམར་པོའི་སྐུ་ཚབ། (ཚོགས་མི།)
༤།    ལྕམ་སྐུ་ལི་ལིན་བྷར་གི་ཝོན་ཨཀས།  (ཚོགས་མི།)
༥།    སྐུ་ཞབས་ཚེ་རིང་དོན་གྲུབ་ལགས། སེ་ཀྲི་སི་འགན་འཛིན། (ཚོགས་མི།)
༦།    སྐུ་ཞབས་དབང་འདུས་ཕུན་ཚོགས་ལགས། ཤེས་ཡོན་སྐུ་ཚབ། (ཚོགས་མི།)
༧།    སྐུ་ཞབས་ཚེ་རིང་སྟོབས་རྒྱལ་ལགས། གངས་ཅན་བདེ་རྩའི་འགན་འཛིན་དྲུང་ཆེ།
སྐུ་ཞབས་ཨོན་ཊ་ལགས། དམིགས་བསལ་ཆེ་མཐོང་ཚོགས་མི་བཅས་སོ།།
གོང་གསལ་འགན་འཛིན་ལྷན་ཚོགས་ཀྱི་ཚོགས་མི་རྣམས་ཟླ་བ་གསུམ་རེའམ་བཞི་རེའི་ནང་ངེས་པར་ལྷན་འཛོམས་གནང་སྟེ་གངས་ཅན་བདེ་རྩའི་ལས་འཆར་བཀོད་བྱུས་དང་སྲིད་བྱུས་གཏན་འབེབས་ཐོག་དངུལ་རྩིས་བཀའ་འཁྲོལ། དགོས་ངེས་ནམ་བྱུང་ལ་དམིགས་བསལ་ལྷན་འཛོམས་གནང་སྟེ་དུས་ནས་དུས་སུ་དཔལ་འབྱོར་གྱི་སྟངས་འཛིན་གནང་གི་ཡོད།
གངས་ཅན་བདེ་རྩའི་འཛིན་སྐྱོང་ལམ་ལུགས་ནི། གནས་ཡུལ་རྒྱལ་ཁབ་ཀྱི་ལམ་ལུགས་ལྟར་ཚོགས་པའི་དྲུང་ཆེས་འགན་འཛིན་ལྷན་ཚོགས་ཀྱིས་གྲོས་ཆོད་དགོངས་དོན་ལག་བསྟར་གནང་སྟེ། འགན་ལྷན་ལ་འགན་འཁུར་ལན་འདེབས་དང༌། འགན་ལྷན་གྱིས་ཚོགས་ཆེན་ལ་འགན་འཁུར་ལན་འདེབས་གནང་དགོས་པ་ལས། ཚོགས་པ་དེབ་སྐྱེལ་བྱས་པའི་རྩ་འཛིན་ལམ་སྟོན་ནང་གངས་ཅན་བདེ་རྩ་ཚོགས་པ་ནས་བོད་གཞུང་ཤེས་རིག་ལས་ཁུངས་ཀྱི་སྲིད་བྱུས་ལམ་སྟོན་རྩ་འཛིན་ཞུ་དགོས་སྐོར་གང་ཡང་གསལ་མེད་ནའང༌། བལ་སྡོད་བོད་རིགས་ཡོངས་རྫོགས་ཀྱི་བསམ་འདུན་བཞིན་གངས་ཅན་བདེ་རྩའི་དྲུང་ཆེ་བསྐོ་འཛུགས་ཐད་བོད་གཞུང་ཤེས་རིག་ལས་ཁུངས་ལ་གྲོས་སྡུར་དང་སྤྱན་འབུལ། སྐབས་རེར་ཐད་བསྐོས་ཡོང་བའི་རེ་བསྐུལ་ཀྱང་ཞུས་ཡོད། བོད་གཞུང་ཤེས་རིག་ལས་ཁུངས་ནས་གངས་ཅན་བདེ་རྩའི་སྒྲིག་གཞི་ལམ་སྟོན་ལྟར་ཟུར་སྐྱོང་གི་ངོ་བོར་རྩ་འཛིན་རྒྱུན་གནས་དགོས་པའི་ལམ་སྟོན་གནང་ཡང༌།ཕྱི་ལོ་༢༠༠༤ ལོར། ཚོགས་པ་རང་ཉིད་བོད་མིའི་སྒྲིག་འཛུགས་ཀྱི་ཡ་གྱལ་བསྙོན་མེད་ཡིན་པའི་ཆ་ནས་ཕྱི་ལོ་༡༩༩༦ ཟླ་༡༡ ཚེས་༣༠ བར་རང་གཞུང་ནང་སྲིད་ལས་ཁུངས་ཁྱབ་ཁོངས་ངོས་འཛིན་གནང་ཡོད། ཕྱི་ལོ་༡༩༩༦ ཟླ་༡༢ ཚེས་༡ ནས་བཟུང་རང་གཞུང་བཀའ་ཤག་ནས་ཤེས་རིག་ལས་ཁུངས་ཁྱབ་ཁོངས་བཅུག་ཡོད་པས། དེ་ནས་བཟུང་བཙན་བྱོལ་བོད་མི་སྤྱིའི་ཤེས་ཡོན་དང་གནས་སྟངས་ཐད་རང་གཞུང་ཤེས་རིག་ལས་ཁུངས་ལ་རང་རྟོགས་ཀྱིས་འགན་འཁུར་ལན་འདེབས་དང་སྲིད་བྱུས་སློབ་སྟོན་ཞུ་བཞིན་ཡོད།
ཚོགས་པ་འདིའི་འགན་འཛིན་དྲུང་ཆེ་དང༌། འགན་འཛིན་ལྷན་ཚོགས་ཀྱི་ཚོགས་གཙོ་ཁག་གི་ལས་དུས་གནས་ཚུལ་རགས་བསྡུས་ཤིག་བཀོད་པ་གཤམ་གསལ།
༡)    ཕྱི་ལོ་༡༩༧༢ ལོར་ལྕམ་སྐུ་ཡུ་ཀེལ་ལར་(Mrs. U Keller ( SATA/SDC,Nepal )) གངས་ཅན་བདེ་རྩའི་དྲུང་ཆེའམ་འཛིན་སྐྱོང་འགན་འཛིན་དུ་བསྐོ་བཞག་གནང༌།
༢)    ཕྱི་ལོ་༡༩༧༣ ལོར་ས་ཊ་ནས་ལས་བྱེད་བརྗེ་ལེན་གྱིས་སྐུ་ཞབས་ཝལ་ཊར་ཇུ་ཛི་(Mr. Walter Jutzi)ནས་འགན་འཛིན་གནང་བ་དང༌། ཕྱི་ལོ་༡༩༧༥ ལོར་སུད་སི་ས་ཊའི་སྐུ་ཚབ་སྐུ་ཞབས་པི་ཀུན་ཛི་(Mr. P. Kunzi)ཡིས་འགན་འཛིན་ལྷན་ཚོགས་ཀྱི་ཚོགས་གཙོའི་ཐུགས་འགན་བཞེས།
༣)    ཕྱི་ལོ་༡༩༧༥ ནས་སྐུ་ཞབས་ཀརྨ་བཀྲ་ཤིས་ཀྱིས་གངས་ཅན་བདེ་རྩའི་དྲུང་ཆེར་བསྐོ་བཞག་གནང༌།
༤)    ཕྱི་ལོ་༡༩༧༥ ནས༡༩༧༨ པར་སུད་སི་ས་ཊའི་སྐུ་ཚབ་ལྕམ་སྐུ་ཨེ་ནི་མརི་ཡ་ཨེཆ་སིཔར་(Mr.Annemarie H. Spahr (SATA))ནས་འགན་འཛིན་ལྷན་ཚོགས་ཀྱི་ཚོགས་གཙོ་གནང༌། དེ་རྗེས་ཕྱི་ལོ་༡༩༨༢ ནས་ད་བར་གངས་ཅན་བདེ་རྩའི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་བཀྲ་ཤིས་ཕུན་ཚོགས་ཀྱིས་གནང་མུས་ཡིན།
༥)    ཕྱི་ལོ་༡༩༨༩ ནས་གངས་ཅན་བདེ་རྩའི་འགན་འཛིན་དྲུང་ཆེ་སྐུ་ཞབས་ཀརྨ་བཀྲ་ཤིས་ཀྱིས་བཙན་བྱོལ་བོད་གཞུང་གིས་རེ་འདུན་ལྟར་བལ་ཡུལ་ཤེས་རིག་ལས་འཛིན་གྱིས་འགན་འཁུར་ཡང་གཅིག་ལྕོགས་གནང་སྟེ། མཐར་ཕྱི་ལོ་༡༩༩༧ ལོར་སྐུ་ཞབས་ཀརྨ་བཀྲ་ཤིས་ཀྱིས་གཞུང་འབྲེལ་གནས་སྤོས་ཐོག་དགོངས་ཞུ་གནང༌།
༦)    དེའི་ཚབ་ཏུ་ཕྱི་ལོ་༡༩༩༧ ལོ་ནས་སྐུ་ཞབས་འཕྲིན་ལས་རྣམ་རྒྱལ་གྱིས་བཙན་བྱོལ་བོད་གཞུང་གི་བལ་ཡུལ་ཤེས་རིག་ལས་འཛིན་དང༌། གངས་ཅན་བདེ་རྩའི་འགན་འཛིན་དྲུང་ཆེའི་འགན་འཁུར་གཅིག་ལྕོགས་གནང་ཡོད་ནའང༌། ཕྱི་ལོ་༢༠༠༣ ལོར་སྐུ་ཞབས་འཕྲིན་ལས་རྣམ་རྒྱལ་ཨ་རིར་ནང་མི་ཟླ་སྒྲིལ་དུ་ཕེབས་རྗེས། བཙན་བྱོལ་བོད་གཞུང་བཀའ་ཤག་གི་སྲིད་བྱུས་དགོངས་དོན་བཞིན། གཞུང་འབྲེལ་སྡེ་ཚན་དང་གཞུང་འབྲེལ་མ་ཡིན་པའི་སྡེ་ཚན་གཉིས་གསལ་ཁ་བཏོད་ནས་དབྱེ་འབྱེད་གནང་ཐོག ཕྱི་ལོ་༢༠༠༣ ལོར་སྐུ་ཞབས་ཚེ་རིང་ལྷག་པ་ལགས་བཙན་བྱོལ་བོད་གཞུང་གི་བལ་ཡུལ་ཤེས་རིག་ལས་འཛིན་དང་བལ་ཡུལ་ལག་ཤེས་སྦྱོང་བརྡར་ཁང་གི་ངེས་སྟོན་པར་བསྐོ་བཞག་གནང་ཡོད་ཀྱང༌། ད་ལྟའི་ཆར་ས་མིག་འདི་བཙན་བྱོལ་བོད་གཞུང་ནས་ཕྱིར་བསྡུ་གནང་ཟིན།
༧)    ཕྱི་ལོ་༢༠༠༣ ནས་གངས་ཅན་བདེ་རྩའི་འགན་འཛིན་དྲུང་ཆེར་སྐུ་ཞབས་ཚེ་རིང་སྟོབས་རྒྱལ་ལགས་བསྐོ་བཞག་གནང་ནས་ད་བར་ཕྱག་ལས་གནང་མུས་ཡིན།

༣།    ཁྱབ་ཁོངས་སློབ་ཁག

གངས་ཅན་བདེ་རྩའི་ཁྱབ་ཁོངས་སུ་ཐོག་མར་སློབ་གྲྭ་༤ ལས་མེད་ནའང༌། ད་ལྟའི་ཆར་སློབ་གྲྭ་༡༢ ཡོད། སྔོན་འགྲོ་འོག་མ་ནས་འཛིན་རིམ་བཅུ་གཉིས་བར་འཛིན་སྐྱོང་དང་དགོས་ངེས་ཀྱི་སྲིད་བྱུས་གཏན་འབེབས་ཐོག་དུས་ནས་དུས་སུ་སྒྲིག་གཞི་དང་ལམ་ལུགས་ངོ་སྤྲོད་ཀྱིས་ཕྱག་བསྟར་གནང་ཡོད།
ཕྱི་ལོ་༢༠༠༨ ནང་ཁྱབ་ཁོངས་སུ་ཁྱོན་བསྡོམས་སློབ་ཕྲུག་གྲངས་༢༥༤༨ དང༌། དགེ་རྒན་ལས་བྱེད་གྲངས་༢༦༢ བསྐོ་བཞག་བྱས་ཡོད། ཁྱབ་ཁོངས་སློབ་གྲྭ་སོ་སོའི་གནས་སྟངས་རགས་བསྡུས་ཙམ་བཀོད་པ་གཤམ་གསལ།

༡)     བལ་ཡུལ་ཀ་ཐ་མན་གྲུ་ཀརྞ་རྣམ་རྒྱལ་མཐོ་སློབ།
གོ་ཀརྞ་རྣམ་རྒྱལ་མཐོ་སློབ་ཀྱི་ནང་འཛིན་གྲྭ་དྲུག་པ་ནས་བཅུ་གཉིས་བར་ཁྱོན་བསྡོམས་སློབ་ཕྲུག་གྲངས་༣༩༧ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༨༥ དང་བོད་རིགས་སློབ་ཕྲུག་གྲངས་༣༡༢ ཡོད། དགེ་རྒན་ལས་བྱེད་བསྡོམས་གྲངས་༥༣ ཡོད། རྩིས་ལོ་༢༠༠༦།༠༧ ནང་རྣམ་རྒྱལ་མཐོ་སློབ་ལ་གངས་ཅན་བདེ་རྩ་ལས་ཁུངས་བརྒྱུད་སྦྱིན་བདག་གི་སློབ་ཡོན་བལ་སྒོར་༧༣༠༨༢༧༢།༨༥ བགོད་འགྲེམས་གནང་ཡོད། དེ་མིན་སློབ་གྲྭའི་འགྲོ་གྲོན་དང་རྒྱུན་གྲོན་ཡོངས་རྫོགས་སློབ་ཡོན་སྣེ་སེལ་བསྡུ་བཞེས་གནང་ནས་རང་ཁ་རང་གསོ་ཐུབ་པ་བྱེད་བཞིན་ཡོད།

༢)     བལ་ཡུལ་མཆོད་རྟེན་སྲོང་བཙན་བལ་བཟའ་མཐོ་སློབ།
མཆོད་རྟེན་སྲོང་བཙན་བལ་བཟའ་མཐོ་སློབ་ནང་འཛིན་གྲྭ་སྔོན་འགྲོ་གོང་འོག་གཉིས་ནས་བཅུ་པ་བར་ཁྱོན་བསྡོམས་སློབ་ཕྲུག་གྲངས་༦༧༦ ཡོད་པའི་ཁོངས་ནས་ས་གནས་ཡུལ་མིའི་ཕྲུག་གུ་གྲངས་༢༠༩ དང་བོད་རིགས་སློབ་ཕྲུག་གྲངས་༤༧༠ ཡོད། དགེ་རྒན་ལས་བྱེད་ཁྱོན་བསྡོམས་གྲངས་༦༡ ཡོད།
རྩིས་ལོ་༢༠༠༦།༠༧ ནང་སྲོང་བཙན་བལ་བཟའ་མཐོ་སློབ་ལ་གངས་ཅན་བདེ་རྩ་ལས་ཁུངས་བརྒྱུད་སྦྱིན་བདག་གི་སློབ་ཡོན་བལ་སྒོར་༧༣༥༩༤༧༡།༨༩ བགོད་འགྲེམས་གནང་ཡོད། དེ་མིན་སློབ་གྲྭའི་འགྲོ་གྲོན་དང་རྒྱུན་གྲོན་ཡོགས་རྫོགས་སློབ་ཡོན་སྣེ་སེལ་བསྡུ་བཞེས་གནང་ནས་རང་ཁ་རང་གསོ་ཐུབ་པ་བྱུང་ཡོད།

༣)     བལ་ཡུལ་འཕགས་ཤིང་རྣམ་རྒྱལ་འབྲིང་སློབ།
འཕགས་ཤིང་རྣམ་རྒྱལ་འབྲིང་སློབ་ནང་འཛིན་གྲྭ་སྔོན་འགྲོ་གོང་འོག་གཉིས་ནས་བརྒྱད་པ་བར་ཁྱོན་བསྡོམས་སློབ་ཕྲུག་གྲངས་༤༧༧ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༡༨༣ དང་བོད་རིགས་སློབ་ཕྲུག་གྲངས་༣༣༥ ཡོད། དགེ་རྒན་ལས་བྱེད་ཁྱོན་བསྡོམས་གྲངས་༥༠ ཡོད།
རྩིས་ལོ་༢༠༠༦།༠༧ ནང་འཕགས་ཤིང་རྣམ་རྒྱལ་འབྲིང་སློབ་ལ་གངས་ཅན་བདེ་རྩ་ལས་ཁུངས་བརྒྱུད་སྦྱིན་བདག་གི་སློབ་ཡོན་བལ་སྒོར་༤༤༠༦༩༠༦།༦༠ བགོད་འགྲེམས་གནང་ཡོད། འཕྲོས་སློབ་གྲྭའི་འགྲོ་གྲོན་དང་རྒྱུན་གྲོན་ཡོངས་རྫོགས་སློབ་ཡོན་སྣེ་སེལ་བསྡུ་བཞེས་གནང་ནས་རང་ཁ་རང་གསོ་བྱེད་བཞིན་ཡོད།

༤)     བལ་ཡུལ་འཇོ་ཁེལ་ཨ་ཏི་ཤ་ཉིན་སློབ།
འཇོ་ཁེལ་ཨ་ཏི་ཤ་ཉིན་སློབ་ནང་འཛིན་གྲྭ་སྔོན་འགྲོ་གོང་འོག་གཉིས་ནས་འཛིན་གྲྭ་ལྔ་པ་བར་ཁྱོན་བསྡོམས་སློབ་ཕྲུག་གྲངས་༨༨ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༣ དང་བོད་རིགས་སློབ་ཕྲུག་གྲངས་༨༥ ཡོད། དགེ་རྒན་ལས་བྱེད་ཁྱོན་བསྡོམས་གྲངས་༡༢ ཡོད།
རྩིས་ལོ་༢༠༠༦།༠༧ ནང་འཇོ་ཁེལ་ཨ་ཏི་ཤ་ཉིན་སློབ་ལ་གངས་ཅན་བདེ་རྩ་ལས་ཁུངས་བརྒྱུད་སློབ་ཡོན་དང་རོགས་དངུལ་བལ་སྒོར་༡༢༢༧༤༦༩།༢༤ བགོད་འགྲེམས་གནང་ཡོད། འཕྲོས་སློབ་གྲྭའི་འགྲོ་གྲོན་དང་རྒྱུན་གྲོན་ཡོངས་རྫོགས་སློབ་ཡོན་སྣེ་སེལ་བསྡུ་བཞེས་གནང་ནས་རང་ཁ་རང་གསོ་བྱེད་བཞིན་ཡོད།

༥)     སྤོག་ར་བྱམས་པ་གླིང་ལེགས་བཤད་ཚལ་གཞིས་སློབ།
སྤོག་ར་བྱམས་པ་གླིང་ལེགས་བཤད་ཚལ་གཞིས་སློབ་ནང་འཛིན་གྲྭ་སྔོན་འགྲོ་གོང་འོག་གཉིས་ནས་བདུན་པ་བར་ཁྱོན་བསྡོམས་སློབ་ཕྲུག་གྲངས་༢༢༦ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༡༢༡ དང་བོད་རིགས་སློབ་ཕྲུག་གྲངས་༡༠༥ཡོད། དགེ་རྒན་ལས་བྱེད་ཁྱོན་བསྡོམས་གྲངས་༡༠ ཡོད།
རྩིས་ལོ་༢༠༠༦།༠༧ ནང་སྤོག་ར་བྱམས་པ་གླིང་ལེགས་བཤད་ཚལ་སློབ་གྲྭའི་རྒྱུན་གྲོན་དང་དགེ་ལས་ཀྱི་ཞབས་གླ་བསྡོམས་བལ་སྒོར་༡༩༠༢༩༧༩།༢༣ དང༌། རྒན་འཁོགས་འཚོ་སྣོན་བལ་སྒོར་༩༩༠༠༠  སློབ་ཡོན་བལ་སྒོར་༡༨༠༠༠  སློབ་གྲྭའི་ཉལ་ཁང་དང་གནས་མལ་ཟས་གྲོན་དང་ལས་བྱེད་ཞབས་གླ་བལ་སྒོར་༡༩༠༠༢༦༣།༨༨ བཅས་ཁྱོན་བསྡོམས་བལ་སྒོར་༣༩༢༠༢༤༣།༡༡ གངས་ཅན་བདེ་རྩ་ལས་ཁུངས་བརྒྱུད་བགོད་འགྲེམས་གནང་ཡོད།

༦)     སྦོག་ར་དཔལ་འབྱོར་གླིང་འཇམ་དབྱངས་སློབ་གྲྭ
སྦོག་ར་དཔལ་འབྱོར་གླིང་འཇམ་དབྱངས་སློབ་གྲྭའི་ནང་འཛིན་གྲྭ་སྔོན་འགྲོ་གོང་འོག་གཉིས་ནས་འཛིན་གྲྭ་ལྔ་བ་བར་ཁྱོན་བསྡོམས་སློབ་གཉེར་བ་གྲངས་༦༨ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༣༥ དང་བོད་རིགས་སློབ་ཕྲུག་གྲངས་༣༣ ཡོད། དགེ་རྒན་ལས་བྱེད་ཁྱོན་བསྡོམས་གྲངས་༦ ཡོད།
རྩིས་ལོ་༢༠༠༦།༠༧ ནང་སྤོག་ར་དཔལ་འབྱོར་གླིང་འཇམ་དབྱངས་སློབ་གྲྭའི་དགེ་རྒན་གཅིག་གི་ཞབས་གླ་དང་གཏན་འཇགས་དགེ་རྒན་ལས་བྱེད་ཀྱི་གསོག་དངུལ་བཅས་ཁྱོན་བསྡོམས་བལ་སྒོར་༡༨༢༡༧༠ གངས་ཅན་བདེ་རྩ་ལས་ཁུངས་ནས་བགོད་འགྲེམས་གནང་ཡོད། དེ་འཕྲོས་འགྲོ་གྲོན་དང་རྒྱུན་གྲོན་ཡོངས་རྫོགས་སྤོག་ར་གློ་སྒྲིག་བདེ་དོན་ལྷན་ཚོགས་ནས་ཐབས་འཚོལ་གནང་མུས་ཐོག་སློབ་གྲྭའི་རྒྱུན་གྲོན་རང་ཁ་རང་གསོ་བྱེད་ཀྱི་ཡོད།

༧)     སྤོག་ར་བཀྲ་ཤིས་དཔལ་འཁྱིལ་གངས་ཏི་སེ་གཞིས་སློབ།
སྤོག་ར་བཀྲ་ཤིས་དཔལ་འཁྱིལ་གངས་ཏེ་སེ་གཞིས་སློབ་ནང་འཛིན་གྲྭ་དང་པོ་ནས་བདུན་པ་བར་བསྡོམས་སློབ་ཕྲུག་བུ་༨༥ དང་བུ་མོ་༡༠༢ བཅས་ཁྱོན་བསྡོམས་སློབ་གཉེར་བ་གྲངས་༡༨༧ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༣༠ དང་བོད་རིགས་སློབ་ཕྲུག་གྲངས་༡༥༧ ཡོད། དགེ་རྒན་ལས་བྱེད་གྲངས་༢༠ ཡོད།
རྩིས་ལོ་༢༠༠༦།༠༧ ནང་སྤོག་ར་བཀྲ་ཤིས་དཔལ་འཁྱིལ་གངས་ཏེ་སེ་གཞིས་སློབ་ཀྱི་རྒྱུན་གྲོན་དང་སློབ་གྲྭའི་དགེ་རྒན་ཞབས་གླ་བཅས་བསྡོམས་བལ་སྒོར་༡༨༧༤༣༨༢།༩༩ དང་སློབ་གྲྭའི་ཉལ་ཁང་གི་གནས་མལ་དང་ཟས་གྲོན་བལ་སྒོར་༩༤༥༠༨༡།༤༥ དང༌། རྒན་འཁོགས་འཚོ་སྣོན་བལ་སྒོར་༣༤༠༢༠༠ བཅས་ཁྱོན་བསྡོམས་བལ་སྒོར་༣༡༥༩༦༦༤།༤༤ གངས་ཅན་བདེ་རྩ་ལས་ཁུངས་ནས་འགྲོ་གྲོན་ནར་གཏོང་གནང་ཡོད།

༨)     ཤབ་རུག་ཤར་སྨད་དབང་འཕེལ་སློབ་གྲྭ
ཤབ་རུག་ཤར་སྨད་དབང་འཕེལ་ཞོར་སློབ་ནང་འཛིན་གྲྭ་སྔོན་འགྲོ་གོང་འོག་གཉིས་ནས་ལྔ་པ་བར་བསྡོམས་སློབ་ཕྲུག་བུ་གྲངས་༦༩ དང་བུ་མོ་གྲངས་༤༦ བཅས་ཁྱོན་བསྡོམས་སློབ་གཉེར་བ་གྲངས་༡༡༥ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༦༩ དང་བོད་རིགས་སློབ་ཕྲུག་གྲངས་༤༦ ཡོད། དགེ་རྒན་ལས་བྱེད་བསྡོམས་གྲངས་༧ ཡོད།
རྩིས་ལོ་༢༠༠༦།༠༧ ནང་ཤབ་རུག་ཤར་སྨད་དབང་འཕེལ་ཞོར་སློབ་ཀྱི་རྒྱུན་གྲོན་དང་སློབ་གྲྭའི་དགེ་རྒན་ཞབས་གླ་བཅས་བསྡོམས་བལ་སྒོར་༥༠༡༦༨༤།༡༣ དང༌། སློབ་གྲྭའི་ཉལ་ཁང་གི་གནས་མལ་དང་ཟས་གྲོན་བལ་སྒོར་༦༧༩༥༣༨།༣༡  རྒན་འཁོགས་འཚོ་སྣོན་བལ་སྒོར་༩༢༤༠༠ བཅས་ཁྱོན་བསྡོམས་བལ་སྒོར་༡༢༨༣༦༢༢།༤༤ གངས་ཅན་བདེ་རྩ་ལས་ཁུངས་ནས་འགྲོ་གྲོན་ནར་གཏོང་གནང་ཡོད།

༩)     ཝ་ལུང་བསམ་འཕེལ་གླིང་ཉིན་སློབ།
ཝ་ལུང་བསམ་འཕེལ་གླིང་ཉིན་སློབ་ནང་འཛིན་གྲྭ་སྔོན་འགྲོ་ནས་ལྔ་པར་བསྡོམས་སློབ་ཕྲུག་བུ་གྲངས་༡༤ དང་བུ་མོ་གྲངས་༡༤ བཅས་ཁྱོན་བསྡོམས་སློབ་ཕྲུག་གྲངས་༢༨ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༦ དང་བོད་རིགས་སློབ་ཕྲུག་གྲངས་༢༢ ཡོད། དགེ་རྒན་ལས་བྱེད་གྲངས་༣ ཡོད།
རྩིས་ལོ་༢༠༠༦།༠༧ ནང་ཝ་ལུང་བསམ་འཕེལ་གླིང་ཉིན་མོའི་ཞོར་སློབ་ཀྱི་རྒྱུན་གྲོན་དང་སློབ་གྲྭའི་དགེ་རྒན་ཞབས་གླ་བཅས་བསྡོམས་བལ་སྒོར་༢༨༢༣༩༩༠༤ དང༌། ས་གནས་སློབ་གཉེར་བར་འཚོ་སྣོན་བལ་སྒོར་༢༦༠༠༠  རྒན་འཁོགས་འཚོ་སྣོན་བལ་སྒོར་༨༥༨༠༠ དེ་བཞིན་ཝ་ལུང་སློབ་གཉེར་བ་དང་ཀ་སྦུག་དང་རྡོར་གླིང༌། སྤོག་རེ་བྷོང་དང་སྒང་ཏོག་སོགས་ཀྱི་སློབ་ཡོན་བགོད་འགྲེམས་གནང་བ་བལ་སྒོར་༢༢༡༥༢༠ བཅས་ཁྱོན་བསྡོམས་བལ་སྒོར་༦༡༨༧༡༩།༠༤ གངས་ཅན་བདེ་རྩ་ནས་ནར་གཏོང་གནང་ཡོད།

༡༠)     གློ་ཚེ་རོག་དཔལ་དབྱངས་ཅན་ལྷ་མོའི་ཉིན་སློབ།
གློ་ཚེ་རོག་དཔལ་དབྱངས་ཅན་ལྷ་མོའི་ཉིན་སློབ་ནང་འཛིན་གྲྭ་སྔོན་འགྲོ་གོང་འོག་གཉིས་ནས་བཞི་པ་བར་ཁྱོན་བསྡོམས་སློབ་ཕྲུག་གྲངས་༤༣ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༡༠ དང་བོད་རིགས་སློབ་ཕྲུག་གྲངས་༣༣ ཡོད། དགེ་རྒན་ལསབྱེད་བསྡོམས་གྲངས་༥ ཡོད།
རྩིས་ལོ་༢༠༠༦།༠༧ ནང་གློ་ཚེ་རོག་དཔལ་དབྱངས་ཅན་ལྷ་མོའི་ཉིན་སློབ་དང་བུ་གསོ་ཁང་གི་རྒྱུན་གྲོན་དང་སློབ་གྲྭའི་དགེ་རྒན་ཞབས་གླ་བཅས་བསྡོམས་བལ་སྒོར་༧༥༧༢༥༩།༠༨ དང༌། ཤིང་འབྲས་ཀུ་ཤུ་འདེབས་ལས་ཀྱི་རྒྱུན་གྲོན་བལ་སྒོར་༡༨༠༠༠༠༠  རྒན་འཁོགས་འཚོ་སྣོན་བལ་སྒོར་༢༢༢༠༠ བཅས་ཁྱོན་བསྡོམས་བལ་སྒོར་༧༩༧༤༨༩།༠༨ གངས་ཅན་བདེ་རྩ་ལས་ཁུངས་ནས་འགྲོ་གྲོན་ཐབས་འཚོལ་གནང་ཡོད།

༡༡     ཤར་ཁུམ་གངས་ཇོ་མོ་གླང་མ་གཞིས་སློབ།
ཤར་ཁུམ་གངས་ཇོ་མོ་གླང་མ་གཞིས་སློབ་ནང་འཛིན་གྲྭ་སྔོན་འགྲོ་གོང་འོག་གཉིས་ནས་འཛིན་རིམ་ལྔ་པ་བར་བསྡོམས་སློབ་ཕྲུག་གྲངས་༡༥༥ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་གྲངས་༡༤༦ དང་བོད་རིགས་སློབ་ཕྲུག་གྲངས་༩ ཡོད། དགེ་རྒན་ལས་བྱེད་བསྡོམས་གྲངས་༡༢ ཡོད།
རྩིས་ལོ་༢༠༠༦།༠༧ ནང་ཤར་ཁུམ་གངས་ཇོ་མོ་གླང་མ་གཞིས་སློབ་ཀྱི་རྒྱུན་གྲོན་བལ་སྒོར་༡༠༢༣༦༠༤།༩༡ དང༌། སློབ་གྲྭའི་ཉལ་ཁང་གི་གནས་མལ་འགྲོ་གྲོན་བལ་སྒོར་༩༡༦༣༤༨།༣༣  རྒན་འཁོགས་འཚོ་སྣོན་བལ་སྒོར་༣༡༨༩༠༠ བཅས་ཁྱོན་བསྡོམས་བལ་སྒོར་༢༢༥༨༨༥༣།༢༤ གངས་ཅན་བདེ་རྩ་ལས་ཁུངས་ནས་ནར་གཏོང་གནང་ཡོད།

༡༢     མ་ནང་བློ་འཕེལ་གླིང་སློབ་གྲྭ
མ་ནང་བློ་འཕེལ་གླིང་སློབ་གྲྭའི་ནང་འཛིན་གྲྭ་སྔོན་འགྲོ་གོང་གཉིས་ནས་འཛིན་གྲྭ་གསུམ་པ་བར་ཁྱོན་བསྡོམས་སློབ་ཕྲུག་གྲངས་༧༤ ཡོད་པའི་ཁོངས་ནས་ས་གནས་ཡུལ་མིའི་བུ་ཕྲུག་༢༢ དང་བོད་རིགས་སློབ་ཕྲུག་༥༢ དགེ་རྒན་ལས་བྱེད་བསྡོམས་༡༢ བཅས་ཡོད།
རྩིས་ལོ་༢༠༠༦།༠༧ ནང་མ་ནང་སློབ་གྲྭའི་དགེ་རྒན་ཞབས་གླ་བཅས་བསྡོམས་བལ་སྒོར་༦༠༥༤༩༧།༥༠ དང༌། སློབ་གྲྭའི་ཉལ་ཁང་གི་གནས་མལ་དང་ཟས་གྲོན་བལ་སྒོར་༡༧༠༠༤༩༥།༥༠ སློབ་གྲྭའི་རྒྱུན་གྲོན་དང་སློབ་ཡོན་འཚོ་སྣོན་བཅས་བལ་སྒོར་༢༨༣༩༩༠།༥༤ བཅས་ཁྱོན་བསྡོམས་བལ་སྒོར་༢༨༨༥༦༣༢།༩༢ གངས་ཅན་བདེ་རྩ་ལས་ཁུངས་ནས་འགྲོ་གྲོན་ཐབས་འཚོལ་གནང་ཡོད།
གོང་གསལ་ཁྱབ་ཁོངས་སློབ་གྲྭ་ཁག་ལ་གཟིགས་རྟོག་གནང་རྒྱུ་མ་ཟད། གངས་ཅན་བདེ་རྩས་རྒྱ་གར་དང་བལ་ཡུལ་སོགས་ཀྱི་ཆེས་མཐོའི་སློབ་གཉེར་ཁང་གི་ནང་སློབ་གཉེར་བྱེད་པའི་སློབ་མ་དང་སྦྱིན་བདག་རྣམས་ཀྱི་རེ་འདོད་དང་འབོད་བསྐུལ་ལྟར་སློབ་ཡོན་ཐབས་འཚོལ་དང༌། བོད་གཞུང་ཤེས་རིག་ལས་ཁུངས་ཀྱི་སློབ་ཡོན་བཅས་བགོད་འགྲེམས་གནང་གི་ཡོད།

༤།    ཤེས་ཡོན་ཡར་རྒྱས་ལས་རིམ།

བལ་གཞུང་ཤེས་རིག་ལས་ཁུངས་ཀྱི་སློབ་ཚན་དང་སློབ་དེབ་སྡེ་ཚན་ནས་འཛིན་རིམ་དགུ་པ་དང་བཅུ་པ་གཉིས་ཀྱི་ནང་བོད་ཀྱི་སྐད་ཡིག་གདམ་ཁའི་སློབ་ཚན་དུ་འཇོག་གནང་ཐོག་སློབ་དེབ་རྩོམ་བྲིས་པ་དགོས་པའི་གཞུང་འབྲེལ་ཡོངས་ཁྱབ་གསལ་བསྒྲགས་གནང་དོན་ལྟར་རྣམ་རྒྱལ་མཐོ་སློབ་དང༌། སྲོང་བཙན་བལ་བཟའ་མཐོ་སློབ། རྒྱལ་ནོར་རྒྱལ་སྤྱིའི་དཔེ་སྟོན་སློབ་གྲྭའི་བོད་དགེ་དང། གངས་ཅན་བདེ་རྩའི་འཛིན་སྐྱོང་བ་བཅས་མི་བཞི་ནས་འཚངས་སྙན་ཕུལ་བར་ལས་ཐོབ་བྱུང་འཕྲལ། འཛིན་རིམ་དགུ་པ་དང་བཅུ་པའི་བོད་ཀྱི་སྐད་ཡིག་གདམ་ཁའི་སློབ་དེབ་ཕྱོགས་བསྒྲིགས་ཞུས་པ་བོད་གཞུང་ཤེས་རིག་ལས་ཁུངས་ལ་མཐའ་མའི་བསྐྱར་ཞིབ་གནང་བར་ཕུལ་ཏེ་གཏན་འབེབས་ཐུབ་པ་བྱུང་ཡོད།
དེང་འཛམ་གླིང་ནང་ཚན་རིག་ཡར་རྒྱས་ཀྱི་ཉེར་ལེན་ལ་བརྟེན་ནས་ཕྱི་དངོས་པོའི་མཐུན་རྐྱེན་བཟང་དུ་ཕྱིན་ཡོད་ནའང༌། དེ་དང་ཆབས་ཅིག་མི་དང་མིའི་དབར་གྱི་འབྲེལ་ལམ་ཇེ་དམ་དང༌། འགྲན་རྩོད་ཇེ་ཆེར་སོང་བས་བསམ་བློའི་ནང་བློ་བདེ་བག་ཕེབས་ཡོང་དཀའ་བ་དངོས་ཡོད་ཡིན་སྟབས། ནང་པའི་ཆོས་ཀྱི་རྩ་བ་འགྲོ་བ་མིའི་ཡ་རབས་བཟང་སྤྱོད་དང༌། བྱུང་ན་གཞན་ལ་ཕན་ཐོགས་བྱེད་དགོས་པ་དང༌། དེ་ལྟར་བྱེད་མ་ཐུབ་ནའང་གཞན་ལ་གནོད་པ་སྐྱེལ་རྒྱུ་མེད་པ་དང༌། རང་རྒྱལ་གཞན་ཕམ་མིན་པར་རང་ལས་གཞན་གཅེས་པའི་སྙིང་རྗེ་དང༌། གཏོང་ཕོད་ཀྱི་བསམ་བློ་ཡོད་པ་དང༌། དེ་བཞིན་དམིགས་བསལ་བོད་ཀྱི་ཆོས་དང་རིག་གཞུང་ཡ་རབས་བཟང་སྤྱོད་རྣམས་སོར་གནས་ཡོང་སླད། བོད་ཀྱི་སྐད་ཡིག་གལ་འགངས་ཆེ་ཤོས་ཡིན་གཤིས། གངས་ཅན་བདེ་རྩའི་ཁྱབ་ཁོངས་སློབ་གྲྭ་ཁག་དང་སྤོག་ར་ཨེས་ཨོ་ཨེས་གཞི་རིམ་གོང་མའི་སློབ་གྲྭ་བཅས་ཀྱི་ནང་བོད་ཡིག་ནང་ཁུལ་རྒྱལ་ཡོངས་ཡིག་རྒྱུགས་གཏོང་མུས་ལྟར། འདི་ལོ་ཡང་འཛིན་རིམ་བརྒྱད་པའི་ནང་སློབ་གཉེར་བ་གྲངས་༡༦༥ དང་འཛིན་རིམ་བཅུ་པའི་ནང་སློབ་གཉེར་བ་གྲངས་༡༥༡ དང་འཛིན་རིམ་བཅུ་གཉིས་ཀྱི་ནང་སློབ་གཉེར་བ་གྲངས་༥༨ བཅས་ཁྱོན་བསྡོམས་སློབ་ཕྲུག་གྲངས་༣༧༤ ནས་བོད་ཡིག་རྒྱལ་ཡོངས་ཡིག་རྒྱུགས་བཏང་ཡོད།
དེ་བཞིན་ཀ་ཐ་མན་གྲུ་མངའ་ཁུལ་རྣམ་རྒྱལ་མཐོ་འབྲིང་གཉིས་དང༌། སྲོང་བཙན་བལ་བཟའ་མཐོ་སློབ་དང༌། སྤོག་ར་ཨེས་ཨོ་ཨེས་མཐོ་སློབ་བཅས་སློབ་ཁག་བཞིའི་འཛིན་རིམ་༨།༡༠།༡༢ བཅས་སོ་སོའི་ནང་ཨང་དང་པོར་བལ་སྒོར་༡༠༠༠ དང༌། ཨང་གཉིས་པར་བལ་སྒོར་༨༠༠ ཨང་གསུམ་པར་བལ་སྒོར་༥༠༠ ཐམ་པ་བཅས་བོད་ཡིག་རྒྱལ་ཡོངས་ཡིག་རྒྱུགས་ཨང་རིམ་ཐོབ་པ་རྣམས་ལ་ལོ་ལྟར་ྋགོང་ས་མཆོག་གི་སྐུའི་འཁྲུངས་སྐར་ཉིན་གངས་ཅན་བདེ་རྩའི་ལས་ཁུངས་ནས་བྱ་དགའ་འབུལ་བཞིན་ཡོད།

བལ་ཡུལ་སློབ་གྲྭ་ཁག་གི་ཕྱི་ལོ་༢༠༠༦ ལོའི་ཡིག་རྒྱུགས་གྲུབ་འབྲས་རེའུ་མིག 

སློབ་གྲྭའི་མིང༌།  རྒྱུགས་ཞུགས། རྒྱུགས་འཕྲོད་པ། མ་འཕྲོད་པ། རྒྱུགས་འཕྲོད་བརྒྱ་ཆ།
རྣམ་རྒྱལ་མཐོ་སློབ། ༣༩༣ ༣༥༢ ༤༡ ༨༩་༥༧
སྲོང་བཙན་བཐོ་སློབ། ༦༤༣ ༦༠༡ ༤༢ ༩༣་༤༧
རྣམ་རྒྱལ་འབྲིང་སློབ། ༤༦༥ ༤༢༠ ༤༥ ༩༠་༣༢
ཨ་ཏི་ཤ་ཉིན་སློབ། ༨༨ ༧༦ ༡༢ ༨༦་༣༦
ལེགས་བཤད་ཚལ། ༢༡༩ ༡༨༤ ༣༥ ༨༤་༠༢
འཇམ་དབྱངས་སློབ་གྲྭ། ༦༨ ༦༥ ༩༥་༥༩
གངས་ཆེན་ཏེ་སེ། ༡༨༦ ༡༥༦ ༣༠ ༨༣་༨༧
ཤར་སྨད་དབང་འཕེལ། ༡༠༥ ༩༠ ༡༥ ༨༥་༧༡
བསམ་འཕེལ་གླིང༌། ༢༨ ༢༣ ༨༢་༡༤
དབྱངས་ཅན་སློབ་གྲྭ། ༣༩ ༣༠ ༧༦་༩༢
གངས་ཇོ་མོ་གླང་མ། ༡༥༢ ༡༢༨ ༢༤ ༨༤་༢༡
བློ་འཕེལ་གླིང༌། ༧༤ ༦༡ ༡༣ ༨༢་༤༣
ཁྱོན་བསྡོམས། ༢༤༦༠ ༢༡༨༦ ༢༧༤ ༨༨་༨༦

༥།    འཕྲོད་བསྟེན་སྐོར།

དེ་ཡང་ཐོག་མར་ཕྱི་ལུགས་ཀྱི་སྔོན་འགྲོའི་སྨན་ཁང་དང་སྨན་པ། སྨན་ཞབས་ལས་བྱེད་པའི་སྐོར་བརྗོད་ན། འཕྲོད་བསྟེན་གྱི་དགོས་མཁོ་ནི་མིའི་མི་ཚེའི་ནང་གལ་གནད་ཆེ་ཤོས་ཞིག་ཡིན་པས།  ཀ་ཐ་མངའ་ཁུལ་འཇོ་ཁེལ་དང་མཆོད་རྟེན་ཁུལ་དུ་གཞི་རིམ་འཕྲོད་བསྟེན་སྨན་ཁང་གཉིས་འཛིན་སྐྱོང་བྱེད་མུས་ཡིན། ལོ་འདིར་སྨན་ཞབས་པ་བཞི་དང་སྨན་པ་གཉིས་ཀྱི་ཞབས་གླ་བལ་སྒོར་༦༢༠༨༢༨ ཕྱིན་ཡོད། དེ་བཞིན་འཕྲོད་བསྟེན་སྨན་ཁང་གཉིས་ཀྱི་རྒྱུན་གྲོན་བལ་སྒོར་༤༧༠༣༧།༨༢ དང༌། འཇོ་ཁེལ་རྒན་གསོ་ཁང་གི་སྨན་རིན་དང་སྨན་སྦྱིན་སོགས་བསྡོམས་སྨན་རིན་བལ་སྒོར་༢༦༧༤༠༣།༧༩ བཅས་ཀ་ཐ་མངའ་ཁུལ་འཇོ་ཁེལ་དང་མཆོད་རྟེན་གཉིས་ཀྱི་གཞི་རིམ་འཕྲོད་བསྟེན་སྨན་ཁང་གི་ལོ་འཁོར་འགྲོ་གྲོན་ཁྱོན་བསྡོམས་བལ་སྒོར་༩༣༥༥༦༩།༦༡ ཕྱིན་ཡོད། གཞི་རིམ་འཕྲོད་བསྟེན་སྨན་ཁང་གཉིས་ནས་ནད་པ་གྲངས་༡༢༠༠ ལྷག་ལ་སྨན་བཅོས་ཀྱི་མཐུན་འགྱུར་ཞབས་ཞུ་གནང་བཞིན་ཡོད།
བོད་སྨན་གྱི་སློབ་སྦྱོང་དང་སྨན་པ་ལས་བྱེད་ནི། རྡོར་ཐང་ནོར་འཛིན་གླིང་གཞིས་ཆགས་སུ་བོད་སྨན་སློབ་སྦྱོང་བྱེད་མཁན་བུ་གྲངས་གཉིས་དང་བུ་མོ་གྲངས་གཅིག་བཅས་སློབ་གཉེར་བ་གསུམ་ལ་བོད་སྨན་སྦྱོང་བརྡར་ཐོག་འཚོ་སྣོན་དང་སྨན་དགེའི་ཞབས་གླ་བཅས་བལ་སྒོར་༨༤༧༢༡ ཕུལ་བ་མ་ཟད། ས་གནས་གཞིས་མི་དང་ཡུལ་མི་རྣམས་ལ་བོད་སྨན་མཐུན་རྐྱེན་མཁོ་སྒྲུབ་ཞུས་ཐོག་ལོ་འདིར་བོད་སྨན་བལ་སྒོར་༧༡༨༡༩ སྨན་སྦྱིན་དུ་ཕུལ་ཡོད།

༦།    སྤྱི་ཚོགས་ཞབས་ཞུའི་ལས་རིམ།

གངས་ཅན་བདེ་རྩའི་དམིགས་ཡུལ་དགོངས་དོན་སྐུ་ན་བགྲེས་པ་དང་དབང་པོ་སྐྱོན་ཅན་དངོས་ཡོད་དཀའ་ངལ་ཡོད་རིགས་ལ་གུས་བཀུར་དང་བཅས་འཚོ་སྣོན་བགོད་འགྲེམས་ཞུ་མུས་ཐོག ཕྱི་ལོ་༢༠༠༦།༠༧ ལོ་ནས་གངས་ཅན་བདེ་རྩའི་འགན་འཛིན་ལྷན་ཚོགས་ཀྱི་གྲོས་ཆོད་དགོངས་དོན་བཞིན་ས་གནས་ཁག་བཅོ་ལྔའི་རྒས་འཁོགས་གྲངས་༣༣༤ ལ་འཚོ་སྣོན་འཕར་ཆ་དང་སྦྲགས་ཁོངས་སོ་སོར་ནར་གཏོང་གནང་ཡོད།

༨།    དཔལ་འབྱོར་ཡོངས་ཁུངས་དང་འགྲོ་གྲོན་གནས་སྟངས།

ཕྱི་ལོ་༡༩༧༢ ལོར་བལ་ཡུལ་ནང་ཡོད་པའི་བོད་མི་སྐྱབས་བཅོལ་བ་རྣམས་རང་ཁ་རང་གསོ་ཐུབ་པའི་གཞི་རིམ་གྱི་དམིགས་ཡུལ་འདི་བཟུང་ནས་སུད་སི་ས་ཀྲ་ནས་གངས་ཅན་བདེ་རྩའི་ལས་ཁུངས་འདི་དབུ་འཛུགས་གནང་ཡོད་ནའང༌། དེ་ནས་ད་བར་བོད་མིའི་དགོས་མཁོ་དང་བསྟུན་ཏེ་འཕོ་འགྱུར་མང་པོ་ཕྱིན་ཡོད།
ཕྱི་ལོ་༢༠༠༦།༠༧ ནང་ཁུལ་ནས་ཞལ་འདེབས་དང་འགྲོ་གྲོན་གནང་མཁན་ཁག
༡།    བོད་གཞུང་ཤེས་རིག་ལས་ཁུངས།
༢།    བོད་གཞུང་ནང་སྲིད་ལས་ཁུངས།
༣།    བོད་གཞུང་འཕྲོད་བསྟེན་ལས་ཁུངས།
༤།    འཇོ་ཁེལ་བཟོ་གཞིས་ལས་ཁུངས།
༥།    བཀྲ་ཤིས་དཔལ་འཁྱིལ་བཟོ་གཞིས་ལས་ཁུངས།
༦།    བཀྲ་ཤིས་དཔལ་འཁྱིལ་མཉམ་ལས།
༧།    གློ་སྒྲིག་བདེ་དོན་འཛིན་སྐྱོང་ཚོགས་ཆུང༌།
གོང་གསལ་ཁག་ཕུད། ཐེབས་རྩ་ཚོགས་པ་འདིར་ཞལ་འདེབས་དང་རོགས་རམ་གནང་མཁན་གཞུང་འབྲེལ་དང་གཞུང་འབྲེལ་མ་ཡིན་པའི་སྡེ་ཚན་སྤྱི་སྒེར་ཁག་མང་པོ་ཡོད།

༩།    གཞིས་ཆགས་སོ་སོར་འགྲོ་གྲོན་ཕྱིན་པ་གཤམ་གསལ།

ཕྱི་ལོ་༢༠༠༦།༢༠༠༧ ལོའི་གངས་ཅན་བདེ་རྩའི་རོགས་དངུལ་འགྲོ་གྲོན་གནས་སྟངས་གཤམ་གསལ།

ཨང༌། གཞིས་ཆགས་ཀྱི་མིང༌། བལ་སྒོར།
༡། ཤར་ཁུམ་གཞིས་ཆགས། ༢༢༥༨༨༥༣།༢༤
༢། སྤོག་ར་བཀྲ་ཤིས་དཔལ་འཁྱིལ་གཞིས་ཆགས། ༣༩༢༠༦༦༤།༤༤
༣། རྡོར་པ་ཊོན་གཞིས་ཆགས། ༣༣༢༨༨༩།༠༠
༤། སྤོག་ར་བྱམས་པ་གླིང་གཞིས་ཆགས། ༣༩༢༠༢༤༣།༡༡
༥། དགོན་སྡེ་ཁག་གསུམ། ༢༢༡༢༤༢།༦༢
༦། སྤོག་ར་དཔལ་འབྱོར་གླིང་གཞིས་ཆགས། ༡༨༢༡༧༠།༠༠
༧། སྤོག་ར་བཀྲ་ཤིས་གླིང་གཞིས་ཆགས། ༢༥༦༨༠༠།༠༠
༨། ཤབ་རུག་གཞིས་ཆགས། ༡༢༨༣༦༢༢།༤༤
༩། ཝ་ལུང་གཞིས་ཆགས། ༦༡༨༧༡༩།༠༤
༡༠། གློ་ཚེ་རོག་གཞིས་ཆགས། x
༡༡། མ་ནང་བློ་འཕེལ་གླིང་སློབ་གྲྭའི་འགྲོ་གྲོན། ༢༥༨༥༦༣༢།༩༢
༡༢། ཀ་ཐ་མན་གྲུ་མངའ་ཁུལ། ༢༠༨༡༥༠༢།༧༥
༡༣། སློབ་ཡོན། ༣༧༥༤༦༡༩༦།༦༥
༡༤། འཛིན་སྐྱོང༌། ༢༢༤༣༢༤༨།༨༠
༡༦། བྱེད་སྒོ་དང་ལས་རིམ་ཁག ༣༣༠༨༣༠།༥༦
ཁྱོན་བསྡོམས་སྒོར། ༥༧༨༣༦༠༧༤།༦༥

རྩིས་ལོ་༢༠༠༦།༠༧ ནང་འགྲོ་གྲོན་གཏོང་སྒོ་ཁག

ཨང། སྡེ་ཚན་ཁག་གི་མིང་། བལ་སྒོར།
༡། བྱེད་སྒོ་དང་ལས་རིམ། ༣་༤༨་༨༣༠།༥༦
༢། ཉལ་ཁང་རྒྱུན་གྲོན། ༦༡་༥༡་༧༢༧།༤༧༢
༣། འཛིན་སྐྱོང༌། ༢༢་༤༣་༢༤༨།༨༠
༤། ཤེས་ཡོན་དང་སློབ་གྲྭའི་འགྲོ་གྲོན། ༧༢་༢༣་༥༨༧།༤༢
༥། སྨན་ཞབས་པའི་ཞབས་གླ་དང་སྨན་རིན། ༡༠༩༡༨༠༨།༦༡
༦། སློབ་ཡོན། ༣༧༩༦༦༣༦༦།༠༣
༧། རྒན་འཁོགས་འཚོ་སྣོན་དང་རྒས་གསོ་ཁང༌། ༢༨༡༠༥༠༥།༧༦
ཁྱོན་བསྡོམས་སྒོར། ༥༧༨༣༦༠༧༤།༦༥

གོང་གསལ་འགྲོ་དངུལ་རྣམས་ཆ་བགོས་བྱེད་ཕྱོགས་གཤམ་གསལ།

༡།    བྱེད་སྒོ་དང་ལས་རིམ།(བརྒྱ་ཆ་༡)
ལས་རིམ་འདིའི་ནང་འཚོ་སྣོན་དང་འབྲེལ་བའི་རྒྱུན་གྲོན། སློབ་ཡོན་དང་འབྲེལ་བའི་རྒྱུན་གྲོན། དཔལ་འབྱོར་འདུ་འགོད། དངོས་ཆས་སྐུལ་ཟད། ལས་ཁུངས་ཁང་པ་ཉམས་གསོ། བོད་ཡིག་རྒྱལ་ཡོངས་ཡིག་རྒྱུགས་འགྲོ་གྲོན། ཞབས་རིམ་དང་ལོ་གསར་རྟེན་འབྲེལ་གྱི་མཆོད་འབུལ་ཁག་ཡོད།

༢།     ཉལ་ཁང་རྒྱུན་གྲོན།(བརྒྱ་ཆ་༡༡)
འགྲོ་དངུལ་འདི་ཁོངས་སུ་ཤར་ཁུམ། བཀྲ་དཔལ། བྱམས་པ་གླིང༌། ཤབ་རུག མ་ནང་བཅས་ཉལ་ཁང་ལྔའི་རྒྱུན་གྲོན་ལ་བཏང་ཡོད།
༣།     འཛིན་སྐྱོང་འགྲོ་གྲོན།(བརྒྱ་ཆ་༤)
འདི་ནི་ལས་ཁུངས་མ་ལག་ཁག་གི་འཛིན་སྐྱོང་འགྲོ་གྲོན་ཡོངས་རྫོགས་ཆེད་ཡིན།

༤།     ཤེས་ཡོན་སློབ་གྲོན།(བརྒྱ་ཆ་༡༢)
ཤར་ཁུམ་དང༌། བཀྲ་ཤིས་དཔལ་འཁྱིལ། བྱམས་པ་གླིང༌། དགོན་སྡེ་གསུམ། དཔལ་འབྱོར་གླིང་དགེ་རྒན་གཅིག ཤབ་རུག ཤར་ཁུམ། ཝ་ལུང༌། གློ་ཚེ་རོགས། མ་ནང་བཅས་སློབ་གྲྭ་དགུའི་ཤེས་ཡོན་གྱི་རྒྱུན་གྲོན་ཆེད་ཡིན།

༥།     འཕྲོད་བསྟེན་འགྲོ་གྲོན།(བརྒྱ་ཆ་༢)
འགྲོ་དངུལ་འདི་ནི་བལ་ཡུལ་ཀ་ཐ་མངའ་ཁུལ་འཕྲོད་བསྟེན་སྨན་ཁང་གཉིས་དང༌། རྡོར་ཐང་བོད་སྨན་གྱི་དགེ་སློབ་འཚོ་སྣོན་དང་ཞབས་གླ་སྨན་སྦྱིན་བཅས་ཀྱི་འགྲོ་གྲོན་ཡིན།

༦།    སློབ་ཡོན།(བརྒྱ་ཆ་༦༥)
ཀ་ཐ་མངའ་ཁུལ་སློབ་ཁག་བཞིའི་སློབ་ཡོན་དང༌། བྱམས་པ་གླིང༌། ཝ་ལུང༌། མ་ནང་བཅས་སློབ་ཁག་བདུན་དང༌། མཐོ་སློབ་ཁག་དང་སྒེར་སློབ་ཁག་ནང་བསྐྱོད་བཞིན་པའི་སློབ་གཉེར་བ་སྒེར་ལ་སློབ་ཡོན་བགོད་འགྲེམས་ཞུ་རྒྱུ་བཅས།

༧།     རྒན་འཁོགས་དང་འཚོ་སྣོན།བརྒྱ་ཆ་༥
འགྲོ་དངུལ་འདི་ནི་རྒན་འཁོགས་འཚོ་སྣོན་དང༌། ཤར་ཁུམ། བཀྲ་དཔལ། རྡོར་པ་ཊན། བྱམས་པ་གླིང༌། དགོན་སྡེ་གསུམ། དཔལ་འབྱོར་གླིང༌། བཀྲ་ཤིས་གླིང༌། ཤབ་རུག ཝ་ལུང༌། གློ་ཚེ་རོགས་དང་ཀ་ཐ་མངའ་ཁུལ་བཅས་རྒན་འཁོགས་གྲངས་༣༣༤ ལ་འཚོ་སྣོན་སྤྲོད་ཆེད་ཡིན།
མཐའ་དོན། བལ་ཡུལ་གངས་ཅན་བདེ་རྩ་ཞེས་པའི་གཞུང་འབྲེལ་མིན་པའི་ཤེས་ཚོགས་དགེ་རྩ་ཚོགས་པ་འདིས་འདས་པའི་ལོ་ངོ་༣༠ ལྷག་གི་རིང་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གི་བཀའ་སློབ་དགོངས་དོན་དང༌། བོད་གཞུང་ཤེས་རིག་ལས་ཁུངས་ཀྱི་སྲིད་བྱུས་ལམ་སྟོན་འོག་བལ་ཡུལ་དུ་གནས་སྡོད་སྐྱབས་བཅོལ་བོད་མིའི་ཕྲུ་གུ་རྣམས་ལ་བོད་ཀྱི་ཆོས་དང་རིག་གཞུང༌། སྐད་ཡིག་རིག་གནས་སོགས་སྲོལ་རྒྱུན་རིག་གཞུང་ཐོག་དེང་རབས་ཀྱི་ཚན་རྩིས་རིག་གནས་ཟུང་འབྲེལ་གྱིས་འདབ་གཤོག་ཟུང་ལྡན་གྱི་མི་རབས་གསར་པ་སྟོང་ཕྲག་མང་པོ་གསོ་སྐྱོང་བྱས་ཡོད་པ་མ་ཟད། སྤྱི་ཚོགས་ཁྲོད་ཉམ་ཐག་དང༌། དབུལ་ཕོངས། རྒས་གཅོང་སོགས་ལ་འཚོ་སྣོན་དང་སློབ་ཡོན་གྱི་རོགས་སྐྱོར་སོགས་བཙན་བྱོལ་བོད་མིའི་སྤྱི་ཚོགས་ལ་ཞབས་འདེགས་ཀྱི་བྱས་རྗེས་ཆེན་པོ་བཞག་ཡོད་ལ། མ་འོངས་པར་མུ་མཐུད་ཡར་རྒྱས་ཀྱི་ཕྱོགས་སུ་ཧུར་བརྩོན་གནང་མུས་རེད།

(696)