སྲོལ་རྒྱུན་ཤེས་ཡོན་ཚན་པ།

 

ཤེས་རིག་ཚོགས་ཆེན་ཐེངས་བཞི་པའི་གྲོས་ཆོད་དགོངས་དོན་བཞིན་ཕྱི་ལོ་༢༠༠༣ ཟླ་༡༡ ཚེས་༡ ཉིན་གསར་འཛུགས་གནང༌། ཚན་པ་འདི་འཛུགས་དགོས་པའི་དམིགས་ཡུལ་ནི། བཙན་བྱོལ་བོད་མིའི་སློབ་གྲྭ་ཁག་ཏུ་བོད་ཀྱི་སྐད་ཡིག་གིས་གཙོས་པའི་སྲོལ་རྒྱུན་གྱི་ལེགས་བྱང་རིག་གཞུང་ཁག་རྒྱུན་འཛིན་ཡོང་ཐབས་དང༌། བོད་ཡིག་བརྒྱུད་ལམ་ཐོག་ཡོད་པའི་སློབ་ཚན་ཡོངས་རྫོགས་ཡར་རྒྱས་ཚགས་ཚུད་ཡོང་བར་དམིགས་བཀར་ནུས་ཤུགས་འདོན་པའི་ཆེད་ཡིན།

ཚན་པ་འདིའི་ལས་འགན་གཙོ་བོ་ནི།

  1. ཤེས་ཡོན་སྲིད་བྱུས་ཀྱི་དགོངས་དོན་གཞིར་བཟུང་གཞི་རིམ་གོང་འོག་བར་གསུམ་གྱི་དགེ་རྒན་འོས་སྦྱོང་འཛུགས་སྐྱོང་དང༌། བོད་སྐད་བརྒྱུད་ལམ་ཐོག་ཡོད་པའི་སློབ་ཚན་ཡོངས་ཀྱི་སློབ་དགེ་རྣམས་ལ་ཟབ་སྦྱོང་གི་ལས་རིམ་གོ་སྒྲིག
  2. དཔེ་སྟོན་སློབ་གྲྭས་གཙོས་པའི་སློབ་གྲྭ་ཁག་གི་ཤེས་ཡོན་གནས་སྟངས་ལ་རྟོག་ཞིབ་དང༌། སྔོན་འགྲོ་ནས་གཞི་རིམ་གོང་འོག་བར་གསུམ་སོ་སོའི་དགེ་སློབ་ཀྱི་ལས་འགན་དང་གནས་སྟངས་ལ་རྟོག་ཞིབ།
  3. བོད་སློབ་འཛིན་ཚོགས་ཁོངས་སུ་ཡོད་པའི་ཆོས་དགེ་དང༌། ཟློས་དགེ། བོད་དགེ་བཅས་ཀྱི་བསྐོ་བཞག་རྒྱབ་གཉེར་ཁུངས་གཏོང་དང༌། བོད་སློབ་འཛིན་ཚོགས་སློབ་གྲྭ་ཁག་གི་ཤེས་ཡོན་རྟོག་ཞིབ་ལ་རམ་འདེགས།
  4. གཞི་རིམ་སློབ་གྲྭ་ཁག་ཏུ་བོད་ཀྱི་སྐད་ཡིག་སློབ་སྦྱོང་ལ་སྐུལ་འདེད་ཆེད་ལོ་རེར་རྒྱལ་ཡོངས་འཛིན་རིམ་སོ་སོའི་ཕུལ་བྱུང་རྩོམ་ཡིག་འདེམས་སྒྲུག་ལས་རིམ་དང༌། བོད་ཡིག་ཡིག་རྒྱུགས་བྱ་དགའི་ལས་རིམ། དགའ་ལྡན་ཕོ་བྲང་བྱ་དགའི་ལས་རིམ། བོད་ཡིག་ཡིག་གཟུགས་རྩེ་ཕུད་བྱ་དགའ་སོགས་ཀྱི་ལས་རིམ་གོ་སྒྲིག་དང་རྩོམ་ཡིག་ཕྱོགས་སྒྲིག་དང་དཔར་འགྲེམས་སོགས་ཀྱི་མཇུག་སྐྱོང་ལས་དོན།
  5. རིགས་གཅིག་རྐང་འཛིན་ཉམས་ཞིབ་སློབ་གཉེར་ལས་རིམ་གྱི་འདེམས་རྒྱུགས་དང་རྟོག་ཞིབ། མཇུག་གནོན་གཞོགས་འདེགས།
    བོད་ཀྱི་མཐོ་རིམ་སློབ་ཁང་ངོས་འཛིན་དང་ཤེས་ཡོན་རྟོག་ཞིབ་དང་འབྲེལ་བའི་ལས་དོན།
  6. གཞི་རིམ་གོང་འོག་གི་སློབ་མར་རིགས་ལམ་འདུ་འཛོམས་ཀྱི་ལས་རིམ་གོ་སྒྲིག
  7. བཙན་བྱོལ་བོད་མིའི་གཞི་རིམ་སློབ་གྲྭ་ཁག་ཏུ་ཤེས་ཡོན་དང་འབྲེལ་བའི་མཐུན་རྐྱེན་མཁོ་སྤྲོད་དང༌། གསར་འཛུགས། ལྟ་རྟོག ཞིབ་འཇུག་བཅས་ཀྱི་ལས་དོན།

(18777)