མདུན་ལམ་སློབ་སྟོན་ཚན་པ།

 

ཕྱི་ལོ་༡༩༩༨ ཡས་མས་ནས་གཞི་རིམ་གོང་མའི་སློབ་མ་སྤྱི་དང་ཁྱད་པར་གཞི་རིམ་སློབ་ཐོན་པ་རྣམས་ལ་མཐོ་རིམ་སློབ་སྦྱོང་དང་ལས་རིགས་སློབ་ཚན་འདེམས་ཕྱོགས་དང་འབྲེལ་བའི་ཁྱད་ལས་སློབ་སྟོན་པ་དགོས་གལ་ཆེན་པོར་མཐོང་བར་བརྟེན།  ཕྱི་ལོ་༢༠༠༣ ལོའི་ཟླ་བ་ ༡༡ ཚེས་ ༡ ནས་བཙན་བྱོལ་བོད་མིའི་སྒྲིག་འཛུགས་ཀྱི་བཅའ་ཁྲིམས་དོན་ཚན་ ༡༧ ནང་གསེས་ ༥ པར་ཁྱད་ལས་པ་བསྐོ་བཞག་གི་སྒྲིག་གཞིའི་དགོངས་དོན་ལྟར་ཤེས་རིག་ལས་ཁུངས་ནང་མདུན་ལམ་སློབ་སྟོན་པ་གཞུང་བསྐོས་ལས་བྱེད་བསྐོ་བཞག་གནང། དེ་སྔ་མདུན་ལམ་སློབ་སྟོན་པ་དེང་རབས་ཤེས་ཡོན་ཚན་པའི་ཁོངས་ཡིན་ཀྱང༌། ཕྱི་ལོ་༢༠༡༠ ནས་ཟུར་བཏོན་གྱིས་ཚན་པའི་ངོ་བོར་བསྒྱུར། ད་ལྟ་ཚན་པ་འདིར་ཡན་ལག་ལས་ཁང་གཉིས་ཡོད། ཕྱི་ལོ་༢༠༠༥ ཟླ་༡༠ ཚེས་༢༦ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་ཡན་ལག་ལས་ཁང་གསར་འཛུགས་ཀྱིས་ལྷོ་ཁུལ་བོད་མིའི་སློབ་ཁག་ལ་མདུན་ལམ་སློབ་སྟོན་ནུས་ཤུགས་ལྡན་པ་སྤེལ་ཐབས་ཞུ་བཞིན་ཡོད། ཕྱི་ལོ་༢༠༠༧ ལོར་རྒྱ་གར་བྱང་ཤར་ཁུལ་གྱི་མདུན་ལམ་སློབ་སྟོན་ཆེད་རྡོ་རྗེ་གླིང་དུ་ཡན་ལག་ལས་ཁང་གསར་འཛུགས་བྱས།

ཚན་པ་འདིའི་ལས་འགན་གཙོ་བོ་ནི།

  1. གཞི་རིམ་བར་མ་དང་གོང་མའི་སློབ་ཁག་ཡོངས་སུ་མདུན་ལམ་སློབ་སྟོན་དང་འབྲེལ་བའི་ལས་འགུལ་སྤེལ་རྒྱུ།
  2. རྒྱ་གར་ལྷོ་ཕྱོགས་དང༌། བྱང་ཤར་བཅས་ཀྱི་མདུན་ལམ་སློབ་སྟོན་ཡན་ལག་ཚན་པར་འབྲེལ་སྐྱོང༌། དུས་ཚོད་ངེས་མེད་དུ་ཡིག་ངག་ཅི་རིགས་ནས་རང་རིགས་སློབ་མ་རྣམས་ལ་སློབ་སྟོན་དང༌། མཇལ་མོལ། དྲི་བ་དྲིས་ལན་སོགས་དང༌།
  3. འཛིན་རིམ་བཅུ་གཉིས་སློབ་ཐོན་པ་རྣམས་ལ་རྒྱུས་སྟོན་དང། ས་གནས་ཁག་ཏུ་ཕྲུ་གུའི་ཤེས་ཡོན་ཐོག་ཕ་མའི་ལས་འགན་ངོ་སྤྲོད་དང་སློབ་གསོ་ཞུ་རྒྱུ།
  4. སློབ་ཁག་སོ་སོའི་མདུན་ལམ་སློབ་སྟོན་པ་རྣམས་ཀྱི་ཤེས་ཡོན་གོང་མཐོར་གཏོང་ཆེད་ཟབ་སྦྱོང་གོ་སྒྲིག
  5. སློབ་གྲྭ་ཁག་ལ་མདུན་ལམ་སྐོར་གོ་རྟོགས་སྤེལ་ཆེད་དཔེ་དེབ་སྣ་མང་དང་མདུན་ལམ་དུས་དེབ་འགྲེམས་སྤེལ།
  6. མཐོ་སློབ་དང་སློབ་ཡོན། རིགས་གཅིག་རྐང་འཛིན་བཅས་ཀྱི་གནས་ཚུལ་དང་གྲངས་ཐོ་ཕྱོགས་བསྡོམས་ཞུ་རྒྱུ་བཅས་སོ།།

(18801)