ཤེས་ཡོན་ལྷན་ཚོགས།

 

༄༅། །བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཀྱི་འབྲུ་དོན་བཞིན། ཕྱི་ལོ་༢༠༡༠ ཟླ་༩ ཚེས་༦ ཉིན་བཀའ་ཤག་གིས་བཙན་བྱོལ་བོད་མིའི་ཤེས་ཡོན་ལྷན་ཚོགས་ཀྱི་སྒྲོམ་གཞི་དང་འཛིན་སྐྱོང་སྒྲིག་གཞི་གཏན་འབེབས་དང་འབྲེལ། ལྷན་ཚོགས་ཀྱི་ཚོགས་མི་གསར་བསྐོ་དང་། ༢༠༡༡ ཟླ་༧ པ་ནས་བཟུང༌གནས་སྐབས་རིང་ཤེས་རིག་ལས་ཁུངས་ཀྱི་ཁྱབ་ཁོངས་སྡེ་ཚན་ཞིག་གི་ངོ་བོར་གསར་འཛུགས་གནང་ཞིང༌། མ་འོངས་པར་ཆ་རྐྱེན་འཛོམས་རིམ་བཞིན་ཤེས་རིག་ལས་ཁུངས་ཀྱི་འཛིན་སྐྱོང་དབང་བྱུས་འོག་ཡོད་པའི་རང་སྐྱོང་སྡེ་ཚན་གྱི་ངོ་བོར་ཟུར་དབྱེ་གནང་འཆར་ཐག་གཅོད་མཛད་པ་བཞིན་ཞུ་བཞིན་ཡོད།

ཤེས་ཡོན་ལྷན་ཚོགས་ཀྱི་ལས་འགན་གཙོ་བོ་ནི།

  1. བཙན་བྱོལ་བོད་མིའི་ཤེས་ཡོན་སྤྱི་དང་ཁྱད་པར་གཞི་རིམ་ཤེས་ཡོན་སྲིད་བྱུས་ཀྱི་དགོངས་དོན་ལག་བསྟར་དང༌། ཡར་རྒྱས་ཚགས་ཚུད་ཡོང་ཐབས་སླད་བཀའ་ཤག་དང་ཤེས་རིག་ལས་ཁུངས་སུ་གྲོས་འདོན། འཆར་འབུལ།
  2. བཀའ་ཤག་དང་ཤེས་རིག་ལས་ཁུངས་ཀྱི་གཞི་རྩའི་སྲིད་བྱུས་ལམ་སྟོན་བཞིན་བཙན་བྱོལ་ནང་བོད་མིའི་རིག་གཞུང་རྒྱུན་འཛིན་དང༌། ཤེས་རིག་དར་སྤེལ། སློབ་སྦྱོང་དང་སློབ་ཁྲིད་ཀྱི་སྤུས་ཚད་ཡར་རྒྱས། བསླབ་གཞི་གཏན་འབེབས། སློབ་དེབ་རྩོམ་སྒྱུར། གཞོགས་འདེགས་རྒྱུ་ཆ་མཁོ་འདོན། དགེ་རྒན་གསོ་སྐྱོང༌། ལས་དོན་རྟོག་ཞིབ། རྒྱུགས་ཞིབ་ཐབས་ལམ་གསར་གཏོད་བཅས་ཡོང་ཐབས་སྐོར་གྱི་སྤྱི་ཁྱབ་འགན་ཁུར།
  3. བཙན་བྱོལ་བོད་མིའི་གཞི་རིམ་སློབ་གྲྭའི་ཤེས་ཡོན་དང་འབྲེལ་བའི་ལས་དོན་ཐོག་སློབ་སྟོན་ཚོགས་ཆུང་དང་ལས་དོན་ཚོགས་ཆུང་གང་དགོས་སྐབས་འཕྲལ་ཟུར་འཛུགས་ཀྱིས་ལས་གཞི་ཞིབ་འཇུག་དང༌། གསར་གཏོད། བསྐྱར་ཞིབ། བཏང་འཛིན་བཅས་བྱ་རྒྱུ།
  4. བཙན་བྱོལ་བོད་མིའི་གཞི་རིམ་སློབ་གྲྭ་ཁག་ལ་གཞུང་འབྲེལ་ངོས་འཛིན་དང༌། ལག་འཁྱེར་ཚད་འཛིན། ཤེས་ཡོན་རྟོག་ཞིབ། སྲིད་བྱུས་ལག་བསྟར་བཅས་དང་འབྲེལ་བའི་ལས་དོན་བཀོད་སྒྲིག་དང་བཏང་འཛིན་བྱ་རྒྱུ།
  5. བོད་མིའི་སྤྱི་ཚོགས་ནང་ཤེས་ཡོན་ཡར་རྒྱས་དང་ཚགས་ཚུད་ཡོང་ཐབས་སླད་ཕྱི་ནང་ཤེས་ཡོན་ཚོགས་སྡེ་ཁག་ལ་འབྲེལ་སྐྱོང་དང༌། ཁྱད་པར་རིགས་གཅིག་རྐང་འཛིན་ཚད་ལྡན་ཡོང་ཐབས་དང་འབྲེལ་བའི་ལས་དོན་སོགས།
  6. གཞི་རིམ་གོང་འོག་བར་གསུམ་གྱི་སློབ་དེབ་རྩོམ་སྒྲིག་དང༌། བསྐྱར་ཞིབ། བོད་སྒྱུར། བསླབ་གཞིའི་རྩ་འཛིན་བཟོ་འགོད། ཤེས་ཡོན་སློབ་སྤེལ་དང་འབྲེལ་བའི་གཞོགས་འདེགས་རྒྱུ་ཆ་རྩོམ་སྒྲིག་དང་མཁོ་འདོན་བཅས་ཀྱི་ལས་དོན།

(18760)